Tuolsung Headline
St. Peter’s School meiin a kang; mi raw ni dinga ring
CCPur: October 13, 2015 zan dar 11:30 vel khan Vengnuam, New Lamka-a St. Peter’s School chu meiin a kang a, block 1 chu a kangsiet vawng. School meiin a kang ti khawsung mi han an hriet leiin darrang vuoin mipui an pungkhawm a, sienkhawm a kang nasa hman ta leiin an thel thei naw a, Fire Brigade chu 12:20 velin a hmun an tlung a, sienkhawm duthusama tui a kapsuok theinaw leiin fire brigade 1 ko sa a ni a, zani zingkar 1:00AM khan kangmei suok hi thelmit thei chau a nih.
Kangmei suok huna hin electric a varnaw a, campus sunga hin hostel student iemanizat le principal le a sunghai an khawsa a nih. Kangmei intanna tak hriet ninaw sien khawm mi tu haiin amani an raw ni dinga ring a nih. School building block 1 hi Class III-X inkar hai classroom a ni a, kangmei suok hi class VIII room sunga inthawka intan niin mi thenkhat chun an hril.
Zani zingkar khan St. Peters Managing Committee, Chairman ADCC; MDC hai, CCPur district Private School Assn. thuoitu hai le mi tam takin a hmuna thil umdan an hang enfel tawl. Tuta Auditorium chu class room 2 a hmang phawt ding, school pucca building bawl mek room 4 hai classroom a hmang ding, Oct. 19, 2015 a inthawk hi school kai tan ding tiin an rel. Vengnuam South YPA le VA hai hmalaknain zanikhan socialwork neiin an inthielfai a, pasal han thungna le table an siem.
Hi school neitu le Principal chu L. Nenglianlal a ni a, mi thenkhatin an raw ni a ring thu a hril a, sienkhawm ringhla ruok chu a neinaw thu le raw dinga vauna khawm a hmunaw thu a hril. CCPur Private School Assn. thuoitu hai chu ama school kang leiin school dang hai khar lo dingin a ngen a, sienkhawm CDPSA chun a siet tuok tuorpuinaa CDPA hnuoia school hai zanikhan kai lo phawt dinga an rel niin a hril. Hi thua hin Police chun FIR No.90(10) 2015 CCP-PS U/S 435/436/34 IPC an registered a, zanikhan a hmuna inquiry an thaw.
CDPSA school raw an dem; Rs 1 Lakh in an ral
CPur: Octoberr 13, 2015 zana tu ti hrietlo han Vengnuam, New Lamka-a St. Peter’s School dawizep taka rawtu hai an dem thu;member school han St. Peters School thiltuok an tuorpui thu hai an puong. CCPur mipui le social organisations hai chu hi thil thawtu hai thiemnaw inchang dingin CDPSA chun an ngen a, Thuneitu hai le District Administration chu hi thilthawtuhai man le dan anga hremna pe dingin an ngen bakah district sunga schools hai, a bik takin St. Peter’s School himna dinga hma la dinga ngenin lungsen hrittlaknaa educational instution hai hmang lo dingin an ngen bawk.
CDPSA chun zani zantieng 2:00PM khan St. Peters School Principal inhmupuiin an va kan a, a School kangna thuah thangpuina dingin Rs. 1 lakh bakah Chini le bawngnene hai an pek. Principal chun ieng pawl le organisation le student haia a inthawk khawmin warning le vauna a hmunaw thu a hril a, CDPSA member shool hai chu school hawng seng ta dingin a ngen.
Martyrs ralna sum a la lut pei
CCPur: Distict Hospital JPO donation centre-a chun zanikhan Tribal Martyrs hai ralna mimal le Organisations 11 han Rs. Rs.95,700/-; bel 9 le puon 18 an peklut nawk. Zanita ralna le thangpuina petu hai chu -(L) Jangkholien , Kilong Kangchup Makhong, Sadar Hills Rs.4,500/-; ZYA Bungbilon Unit 2,000/-; EBCC Dimapur Nagaland 5,000/-; Haipi Baptist Church,Sadar Hills 5,000/-; H. Nengsong, Eden Huan, Hiangtam Lamka Rs.500/-; Manchester United Fans Rs 2,500/-; V.Bethel Presbyterian Church Rs.1,600/-; Paite Tribe Council, New Lamka block Belpui 9; Saichang Area KCC Manipur Synod Puon 9; Ast Question Bible in JPO- hmang dingin Rs.2,950 le Puon 9; YPA Jt HQ, Shillong Rs.71,650/- a nih. Chun zani hmasa khan Chassad Avenue Welfare Committee, Imphal in puon 9, Khamkhanthang Guite@ Guite Saplian in Maibal 9 a pek bawk.
JAC kutah ralna Rs. Rs.34,400/-
CCPur: JAC Finance Sub-Committee kuta zanikhan martyrs hai ralna Rs. 34,400/- a lut nawk. Zanita ralna petu khuo hai chu- Thanlon block a Milongmun Rs.2,000/-; Tuibuong block a Peniel Rs.2,000/- . Henglep block-a V.Munlai Rs.1,700/-; N.Saikot Rs.500/-; Damjol Rs.1,200/-; K.Lonmual Rs.800/-; Khantang Rs.1,000/-; Saihum Rs.1,000/-; Phaibatang Rs.1,500/-;D.Loupum Rs.1,000/-; K.Tuiliphai Rs.1,000/-; Thingkeu Rs.6,200/-; D. Munlui Rs.2,400/-; Dawjang Rs.1,600/-; D.Khawzim Rs.4,100/ le Phailianbung Rs.6,400/- a nih.
KSO, ZSF le HSA in an dem thu an puong
CCPur: Kuki Students Organisation/CCPur (KSO); Zomi Student Federation (ZSF) GHQ le Hmar Students Association (HSA) CCPur Jt. Hqrts chun October 13, 2015 zana St. Peter’s School tu ti hriet lo han an raw chu nasa taka an dem thu an puong a, mi dawizep hai thilthaw a nih tia hrilin hiengang thil thaw nawk ta ngai lo dingin a thawtu hai an inhriettir. Thuneitu hai chu School rawtu hai an hmatienga zawng dawk le man dingin an ngen a, hiengang thil a tlung nawk ta nawna dinga mipui hai thlawp dingin an ngen. Chun, educational institutions hai free le safe zone a sie dingin mitin an ngen bawk.
NGMF in Dr Pudaite an sun thu an puong
CCPur: Nationwide Gospel Music Festival (GNMF) chun Oct. 10, 2015 nia Colorado Springs, USA a fam lo chang tah Bibles For The World indintu Dr Rochunga Pudaite an sun thu an puong. Kohran hai hmangaitu, mi inngaitlawm, thi chena Pathien ram ta dinga sinthawtu a ninaah NGMF chun inzana insang tak a pek a, NGMF in hnam tin hai Kristaa pumkhata ei um theina dinga hma a lakna lungril taka inhnikpuitu a ninaah NGMF ta dingin inhmangna nasa tak a nih tiin an hril a. A thurawn tam tak mamaw a ni lai zinga Chatuon ram a lo inlawina thuah pawi an ti hle thu, a thina hi hnam pumpui le khawvel mipui ta dinga inhmangna nasa tak a nih an sunna thupuong ah an zieklang.
PMEGP Application lak le peklut thei
CCPur: PMEGP hnuoia kum 2015-15 a dingin Entrepreneurs/Artisans/Craftman hai ta dingin Financial Assistance hni thei a ni a, Application chu DIC Office, Bishnupur district-ah October 20-10-2015, 4PM chenin lak le hi hmuna bawk hin peklut thei ning a tih. CCPur law& order ngirhmun thatnaw leia DIC Bishnupur a lak dinga ti a nih.Application form hi www.pmegp.in; www.kvic.org.in le dcimanipur.govt.in haiah khawm download thei ning a tih tiin General Manager, DIC,CCPur chun inhriettirna a siem. PMEGP 2015-16 a CCPur a identified industrial trade hai chu- bakery, beauty parlour, bee keeping, cane & bamboo, carpentry, Computer (hardware & servicing); Embroidery; Apparel & garment making, tailoring; Processing of Lemon Grass, Processing of Stevia, Automobile, Turmeric processing, King Chilly processing le Ginger processing an nih.
Headline
Netaji files January 23 a inthawk puongzar ni tang a tih: PM
New Delhi: India zalenna suoltu (freedom fighter) Netaji Subhas Chandra Bose sung hai chun zanikhan New Delhiah PM Narendra Modi chu a official residence 7 Race Course Roadah an inhmupui. Hi huna hin Home Minister Rajnath Singh le External Affairs Minister Sushma Swaraj hai khawm an thang. Prime Minister Narendra Modi chun Netaji le inzawm files hai chu January 23, 2016 ah Subhas Chandra Bose piengchampha a vawi 118na a inthawk thuruk ni ta lova mipui hriet dinga puonglang (declassify) a nita ding thu a hril.
Ramdang sawrkar hai khawm an kuta um Netaji files hai puonglang dinga a ngen ding thu a hrilin Russia sawrkar khawm Russia an zin huna Netaji files hai puonglang dinga ngen a ni ding thu Pu Modi chun a hril a, Netaji files/information puongzar a ninaw chun History ziekdik thei ninaw nih tiin a hril. Netaji tupa Chandra Kumar Bose chun, Netaji files hi Russia, Japan, China, America, UK, Japan, Singapore le Malaysia haia khawm a um niin a hril. Netaji hi an hmanga inthawk kum 70 a liem hnung chena khawm an hmang dan hi chieng taka hriet lova la um zing a nih.
Subhas Chandra Bose kha November 12, 1941 a inthawk mak tak ela umna hriet lova inhmang, hi hun lai hin English Weekly Forward Bloca “The Day of Reckoning” ti a ziek leia Defence of India Rules hnuoia a chungthu ngaituo lai mek a ni a, a sung le kuo hai khawma a umna an hrietnaw lei le a seat hluo lova sawt tak a um ta leiin November, 1941 khan Governor –General chun Central Assemblya a seat hi a ruokin a puong a. March 28, 1942 vuongna tuoksietah a thi niin German News Agency chun a puong zui ta pei a nih.
Netaji files puongzar ding le inzawm hin home ministry chun files hai a enfel mek a nih. Thla hmasa laia West Bengal sawrkar in Kolkata Police le West Bengal Police kuta um Netaji files inthup 64 hai a lo puongzar a inthawk khan Netaji files hai puonzar dinga sawrkar thlungpui nawrna nasa tak hung um a nih.
NSCN(K) Dy. Army Chief in Niki Sumi
Dimapur: NSCN/GPRN Chairman le President, SS Khaplang chun Lt. Gen. Niki Sumi, Military Supervisor, West chu Deputy Chief, People’s Army of Nagaland, NSCN/GPRN dingin a ruot. NSCN(K) Dy. Army Chief dinga ruotna Order hi Col. Isak Sumi, PRO NSCN/GPRN in an suo a nih.
Sainik School Entrance Jan. 3, 2016ah
Imphal: Sainik School, Imphala Academic Session 201617 inkar sunga Class VI & IX inchuk ding lakna dinga entrance examination chu January 3, 2016 in nei ning a tih tiin Sainik School, Imphal thusuok chun a hril. Prospectus chu office hawng ni haia 9AM a inthawk lak thei ning a ta, Appliction November 30, 2015 chena peklut thei ning a tih. Thu chieng lem Sainik School, Imphal le notice Board, M. Sectorah hmu thei ni bawk a tih.
Lunghlu 67 leh nupui 1 man
Imphal: October 13, 2015 khan 24Assam Rifles han NH102 Khudengthabi hmuna Imphal pana hung tlan Maruti Van MN05A5193 an dapnaah Mrs L. Ranjana Devi (31) d/o L. Kulumani Singh of Soibam Leikai Kananglabung, Imphal West district chu lunghlu rawng dang dang 67, PAN Card le Driving Licence leh an man a, Moreha Custom department kutah an peklut niin zanita Assam Rifles thusuok chun a hril.
AR han OGWs le PLA an man
Imphal: 2Assam Rifles chun Oct. 13, 2015 khan Thoubal police Commandos hai le thangruolin Wangjing marketah dappui an thaw a, PLA ta dinga sinthaw (OGWs) N. Naocha Singh (26) s/o (L) Kulla Singh of HeirokIII an man. Kum 2013 khawm khan man a lo nita a, PLAa Manimohan in a tir anga student 2 PLA a thang dinga la dinga hung niin an puong a, hi le inzawma dappui an thawnaah hi lai hmuna maa hin PLA cadre P. Manimohon Meitei (43) years, S/o P Dharama Meitei of Salungpham Kangthokchao Maning Leikai chu an man niin zanita PRO. Assam Rifles thusuok chun a hril.
Ibobi hun ‘age of corruption’ a nih: Sovakiran
Imphal: Manipur People Party (MPP) President, N. Suvakiran chun O.Ibobi inrawi Manipur sawrkar hun hi ‘age of corruption’ annawleh ‘period of dark age’ a nih tiin zanita Imphal hmuna press conference huna a hril. Kum 20 (thang hni) liemta sung khan state sawrkar chun hmathlir sei tak neia thilthaw iengkhawm a nei nawh tiin a hril bawk. Court in Primary teacher 1400 chuong a lakna, KPro scam MI Dam le a dang dang hai leiin Ibobi hun hi age of corruption ni phu hle a nih tiin a hril a, Loktak Scam chu CBI insuizuitir dingin a ngen.
Bihar 2nd Phase election campaign a tawp
Patna: Bihara 2nd Phase Assemby election October 16, 2015 a nei dinga vote campaign theina chu zani zantieng khan a tawp tah. 2nd phase a hin district 6 a constituencies 32 haia inthlangna um a tih.
Hieng laizing hin Bihar Assembly 3rd Phase electiona October 28, 2015 a nei dinga chun candidates 33 in nomination paper an hnukkir leiin district 6 haia Constituencies 50a inthlangna
um dinga chun candidates 808 an um.
Bawngkawna Baptist Biekin suksiet a nih
Bawngkawn: Mizorama Bawngkawn Brigade Venga Baptist Kohan Biekin bawl thar chu October 13, 2015 zan dar 7 vel khan Bawngkawn khawtlang mipui pungkhawm chun lunga dengin an suksiet a, a tukver darthlalang hai chu an dengkawi deu vawng niin ei thu dawngna chun a hril. Hi thil tlung le inzawm hin Bawngkawn Baptist Kohran Chairman, Upa Dr Lenghaia le Secy. Upa R. Zosiamliana han Bawngkawn Police stationah FIR thelut.
FIR a chun, Bawngkawn Local Council chun zan dar 6 velin tawnginringna (mike) hmanga mipui kokhawmin zan 7 vel khan Baptist Biekin hi lungin an deng a, Biekin bang, tile le tukver darthlalang hai chu an suksiet deu vawng niin FIR a hin an zieklang. Biekin hi ni 3 sung ngeia thiek dar a ninaw chun raw hmang vawng dinga vauna an hmu bawk nia hrilin Police hai chu Biekin la um ang ang chu venghim pek ding le Biekin suksetu hai hremna pe dingin Police hai an ngen.
Ei thu dawngnain a hril dan chun BCM Biekin bawlna ding hmun hi Bawngkawn khawtlangin Indoor Stadium bawlna dinga an hni le sawrkar khawmin a pek ta nia hril a ni a, hieng lai zinga BCM han a ram hi a neitu kuoma inthawk dan ang thlapa an inchawk nia hrila Biekin hi an bawl nia hril a nih.
SAI in U17 boys trial selection
CCPUr: Sports Authority of India (SAI) chun Oct. 17, 2015, 7:00AM khin Public Ground, CCPurah India rama U17 World Cup 2017 um ding le inzawmin U17 (boys) trial cumselecion huoihawt a tih. Kum 2000 chena pieng players hai hi taka hin thang thei an tih tiin Gen. Secy. CDSA chun inhriettirna a siem.
DBT leiin Rs. 14,672 crores a hum
New Delhi: LPGa Direct Benefit Transfer scheme hmang a ni leiin nikum khan sawrkar chun LPG subsidyah Rs. 14,672 crores a hum (saved) phak niin Oil ministry thusuok chun a hril. Tukum April thla chen khan registered LPG consumers 18 crores an um a, 34 lakh hai chu a lem annawleh a thi a ngaiin PAHAL hnuoiah blocked an nih.
PMJDY Accountah Rs. 25,000 crore chuong
New Delhi: Pradhan Mantri Jan Dhan Yojana (PMJDY) hnuoia Bank Accounts hawng haia pawisa sieluta um chu Rs. 25,000 crores a chuong ta niin sawrkar thusuok chun a hril. Finance Ministry thusuokin a hril danin October 7, 2015 chen khan PMJDY hnuoia bank accounts haia pawisa thunlut chu Rs. 25147 crores a tling ta niin a hril. PMJDY bank accounta pawisa (balance) um chu 60% chuong le pawisa (balance) umlo chu 40% niin ministry thusuok chun a hril bawk. RBI guidelines dungzuiin PMJDY hnuoia hin balance um lova account hawng thei a nih. PMJDY hi national mission on financial inclusion hnuoia in tinin bank account pakhat bek an nei theina dinga thaw a nih.
BSF han heroin kg. 12 an man
Amritsar: BSF le Punjab Police thangruol hai chun zani zingkar khan India le Pakistan ramria Chhina Bidhi Chand Sector bula lo lai Heroing Kg. 12, bazar rateah Rs. 60 crores manhu el ding dapdawkin an man. Heroin hi Pakistana inthawk India rama hung phurlut niin BSF official hai chun an hril a, Heroin dapdawk le inzawm hin mi man ruok chu an nei nawh. October 12, 2015 khawm khan BSF chun Uddar Dhariwal Sector, IndoPak. border lai Heroin kg. 6 zet an lo man ta bawk. BSF chun kum 2015 fe mek sung hin Heroin kg. 230, Rs. 1,150 crore manhu ding an man ta niin official thusuok chun a hril.
DRDO complex Kalam hmingin
New Delhi: DRDO Missile Complex chu India President hlui fam lo chang tah ‘Missile Man’ tia ko bawk Dr APJ Abdul Kalam hming chawiin “Dr APJ Abdul Kalam Missile Complex’ tia thlakthleng tum a nih tiin Defence Minister Manohar Parrikar chun a hril. Dr Kalam hin kum 1982 khan Missile Complex, DRDO hi a zawm tan a, Dr. Kalam hi Missile Complexa Advanced Systems Laboratory (ASL),Defence Research le Development Laboratory (DRDL) and Research Centre Imarat (RCI) hai indinnaa thluokbur thawtu tak a nih.
Myanmara KMM TTPa dingin Rs. 2904 crore
New Delhi: Union Cabinet chun Myanmara Kaladan Multi Modal Transit Transit Project –a Rs. 2904 crores hmang dingin hi projecta sum hmang ding ennawnin an remtih tiin cabinet meeting zoa press conference huna Communication & IT minister Ravi Shankar Prasad chun a hril. Hi project hin India hmarsak bielah hmasawnna nasa tak an tlun ding a nih tiin minister chun a hril. Hi baka hin Cabinet chun National Institute of Fashion Technology campus dawmsang ding; Rs. 3090 crores senga CISF, CRPF le ITBP hai barracks le houses indin ding le a dang dang cabinet chun an remti bawk.
Myanmar General election a hun taka nei ding
Yangon: Myanmar Election Commission chun Myanmar General Election nei dinga ti chu remruotna lo um ta angin a hun taka nei ning a tih tiin a hril. Myanmar rama tuilien le mimkei nasa taka a tlung leiin election hi sukhnuk el thei dinga hril rik a ni a, hi thua hin Election Commission chun Political parties tum tum hai khawm an rawnpui tah. Myanmar General Election hi November 8, 2015 a nei ding a ni a, kum 25 liem hnunga open general election hmasa takna ding a nih.
Marlon James kuomah Man Booker Prize
London: Jamaican author Marlon James (44) chu kum 1975 laia Bob Marley that tumna le inzawma ‘A Brief History of Seven Killings’ ti novel a ziek naah Man Booker Prize inhlan a nih. Man Booker Prize Chairman chu Michael Wood a nih. Man Booker Prize hin pound 50,000 a sawm a nih. Man Booker Prize hi kum 1969 a indin niin English le United Kingdom a published fixtion novel ziektu hai dawmsangna dinga indin a nih. Marlon James hi Jamaican author hai laia Man Booker Prize dawng hmasa tak a la nih.
VAWISUN THUPUI
“Chuleiin, aw Israel, i chungah hieng ang hin ka thaw ding a nih, i chungah hi hi ka thaw ding a ni leiin, aw Israel, i Pathien chu tuok dingin insiem zo rawh”, Amos 4:12
Editorial
Taliban style chetna
Manipur south district a chun kum 1910 khan Senvawn khuoah Chanchintha a hung lut a. Chanchintha a hung lut le inruolin inchukna a hung phurlut sa nghal a. Kristienna in a hung sawm Education leiin khawvel rambung tinah ei indarzau ta a ni a, Kristienna hi eini tribal hai ta ding hin a tha in a hlu zuol a nih ti inla ei hril suol ring a um nawh. Silaimu pakhatin vate pahni a phir angin Kristienna chun thlarau boral ding hai Chatuon hringna lampui a mi kawkhmu el khelah khawvel lienlem ei daksuok theina dingin inchukna (education) a hung phursa bawk leiin a hlawk em em. Hi Kristienna lei hin eini hnam hnuoihnung, thingbullungbul biea tu hriet phak lova um hai khan khawvel ram changkang tak tak hai nun ei tawmpui ve thei ta bakah khawvel hriet ei hung ni ve thei ta a nih.
Hienganga Kristienna in a hung sawm Eduction in nasa taka ei ngirhmun a dawmsang mek lai zinga October 13, 2015, zan dar 11/12 vela Vengnuam, New Lamka, CCPura St. Peter’s School rawa a hang um el kha thil pawi tawpkhawk a nih. School building kang kha hostel ni lovin classroom a ni el khela, kha thil tlung huna khan electric a varnaw bawk leiin electrica inthawka kangmei kha intan a ni ring a um naw a, tu ti hriet lo misuol thenkhat thilthaw ni ngei dinga ring a nih. Hi thil tlung huna hin hostela um naupang hai chu an in vawng ta a, Hostela khawm Candle hmang a ninaw bakah Hostel kitchen le Hostel building hi a sawng chung (third floor) a um a ni leiin kangmei suok hi school annawleh hostel sunga inthawka intan chu ring a um naw nia hril a nih. School rawa um hi Private School Association hai chau ni lovin mitinin ei demin ei inthiemnaw seng a nih. Hi lei hin a thawtu hai hi zawngsuoka dan anga hremna natak pek an phu hle a nih.
Inchukna (education) pawimaw zie, eini tlangmi, hnam hnuoihnung hai ta ding hlei hleia a that zie, a pawimaw zie hi ei la hriet tawknaw mani ding hiengang thil ei rama a tlung el hi a pawi takzet a nih. Education leiin mawng bal raka fak le dawn zawng hlak hai khan deihlim hnuoiah sin thawin fak ei zawng mek a, education lei bawkin khawvel lien lem ei dak thei a, milien milal lai a mi sie a, ei chunga thilthanaw thaw tumtu hai laka a mi veng him a, tuta hmaa ei theina le thiem zawng khawm hmang thei lo hai kha mani thiem zawng chita sin thawin ngirhmun insang lema a min thungtir a; khawvel milienmilal le lekhathiem tak tak hai leh ruoltha in a mi siem a; khawvel chanchin le thil tlung hai tu hrilfie ngai lovin ei hriet zung zung thei pha a, sin tha le sin insang lem a mi kawkhmu bakah thil dang tam tak education in a hung phur suok ei dawng hai zo zai hi a ropuiin a hlu em em vei leh, hiengang thil ei hang tuok hi a pawi tinaw chu hril dan ding a vang khawp el.
Hiengang khawpa ngirhmun insanga min chuongkaitirtu Educational institution chen raw le sukse ngama ei umna hi ‘Taliban Style’ chetna a nih ti naw thei a ni nawh. Ei hriet seng angin Taliban helpawl hai hin lekha inchuk (a bikin nuhmei lekha inchuk) an theida leiin an khap ‘ban’ hiel a, school tam tak suksiein an raw hlak ti khawm ei hriet. Hi chau ni lovin kum tlawmte liemta khan inchukna (education) a hrilmawi leiin Taliban hai chun nuhmei tleirawl Malala Yousafzai chu that ngei tumin a luah silaiin an kap a, sienkhawm a vangneia siemin London hmuna enkawl a ni hnungin tuhin khawvela education campaigner ropui tak hung niin kum 2014 khan Nobel Peace Prize inhlan a lo nita hiel a nih.
Kum 2005 khawm khan Manipur State Central Library chu Meitei Mayek invetchil pawl han an raw a, lekhabu 145,000 deuthaw a, lekhabu pawimaw, lekhabu hlui le tha tak tak hai a kangral vawng a ni kha. Kha thil tlung kha mitinin pawi ei ti a, Manipur mipui chun an dem hle bakah pawi an tizie hrilin a siek naw a ni kha! A thawtu hai kha lungril fim tak nei lo le, an khawnghat a hla naw leia khang thil kha an thaw niin an lang. An raw nasan kha a nep em em; Library a lekhabu siethat hai Bengali Script a ziek an nih ti lei ringawta lungsena kha thil kha an thaw a nih.
Education dodal zawng le sukbuoi zawnga chetna ram le hnam hrim hrim ram inhnarum, ram changkang le ram inhawi a ni ngai nawh. Asan chu education hi tulai khawvela dingin a neka pawimaw um lo, education leia khawvel in hmasawnna hmel thar tam tak a hmu le chang ; ngirhmun inhawi lema mi dawmkaitu a nih. Ram changkang le ram hmasawn haia chun education hi tukhawmin sukbuoi ding tinin an tin naw a, chuongang bawkin inchuktirtu (teachers) hai khawm mi inza an ni a, Teacher sin thawtu hai chu mi inzaum an nih. A san chu zinga ram le hnam thuoitu ding hai sersuoktu an ni tlat. Hi leiin ram changkang haia chun Teacher hai hi an inzain an ngairopui em em a nih.
Education hi ei ngirhmun mi dawmsangtu, milienmilal laia min thungtirtu a ni leiin educational institution hai hi inza le duot taka enkawl an phu hle a nih. Hi lei hin education dodal zawng le a bik takin School raw zawnga chetna hi Taliban Style chetna a ni leiin mitinin ei dem le tuta hnung hiengang thil tlung nawk ta ngailo dinga mitinin ei dodal le thiemnaw ei inchang a tulin a pawimaw takzet.
