Tuolsung Headline
Dengue thuah NVBDCP official 4 an hung;
Hmun tum tumah fogging thaw nawk a nih
CCPur: Tulaia Dengue natna hri an leng mek le inzawma CCPur Districta khawm hi natna invawi iemanizat zet hmudawk an nita leiin Malaria Department chun hi natna an darzau nawna dingin hma nasa takin an lak mek.
Dengue natna inleng mek le inzawmin Dr Zamkhokam Kuki, State Malaria Officer inrawinain National Vector Borne Disease Control Program (NVBDCP) a inthawk Dr Ch. Dhablilo Singh, Dr Ritindra Mohan Singh le N. Gopa Kishore Singh hai chu zanikhan CCPurah an hung. NVBDCP team hin zani 10:00AM khan CMO office le District Hospital an sir a, Dengue natna hri inleng mek le inzawma hmalak dan ding hai an hriltlang.
DR Zamkhokam Kuki, SMO inrawinaa medical department chun Dengue outbreak laka himna dinga hmalakna ding thuah khawpui sung survey thaw malama damdawi kap (fogging) ding le a tul le pawimaw anga District hospital wardah Dengue case/patient hai ta ta dinga Special ward hawng dingin a hril. October 6, 2015 chen khan CCPur district ah Dengue cases 10 a tling ta niin CMO Office report chun a hril.
Hieng laizing hin zanikhan Malaria Department chun fogging machine hmangin dengue laka mipui him theina dingin khuo le veng tum tum haiah fogging an kap. Zanita fogging kapna hmun hai chu Zomunnuam, Zenhang Lamka, Nehru Marg, Khumujamba, Police station hai an nih.
Chun, VBDCP/CCPur in Aedes Larva Breeding site enfeltu dinga team 4 an din hai chun zanita inthawk khan mawphurna pek an ni angin hmun tum tum hai sirin Dengue natna phurtu Aedes tui umna ding awm hai dapna sin an thaw tan a, Dengue laka inveng dan ding inziekna lekhaziek an sem pei bawk. Team 4 hai hin October 9, 2015 chena CMO kuoma pelut ding a nih.
JPO kutah ralna Rs. 89,860/ a lut
CCPur: District Hospitala Tribal martyrs hai ralna mimal le pawl tum tum 10 han zanita JPO kuta an pek chu Rs. 89,860 / le puon 18 a nih. Zanita JPO kuta ralna petuhai chu Chin Baptist Assn. Tangnuam Rs. 4,000/ le puon 9; All Tribal Women Org., Chandel Rs. 1,000/; HIPO NAPUI INLAM, Office, Khongshiem, Chandel Rs. 5,000/; Integrated Rural Devpt. Service Organisation, Wangjing, Thoubal Dist. Rs. 2,000/; Khuanggin Village Authority Rs. 2,300/ le Puon 9; Chin Baptist Association, Lanva Rs. 5,000/; Khousabung Area Youth Devpt. Forum Rs. 4,000/; Unau Pastor Fellowship, Shillong Rs. 20,000/; EBCC, Nepal Mission Field Rs. 25,700/, Gate donation Rs. 860 le Hmar Women Association, NC Hills, Karbi Anglong hai an nih. HWA NC Hills/Karbi Anglong aiawin ralna sum hi HWA GHQ President Pi JL Sawmi in JPO kutah an hlan.
CDSA in Winners Cup-ah team a tirnaw ding
CCPur: CCPur District Sports Association (CDSA) hotu han zani zingkar 9:30PM khan CDSA Office, Hiangtam Lamkaah martyrs Paulianmang, RUSS sunna hun an hmang a, hmatienga CDSA hmalak pei dan ding an hriltlang. AntiTribal Bills 3 hai an ditnawzie ientirnain CDSA chun AMFA huoihawtnaa October 19, 2015 a inthawka tan ding Winners Cup, 2015 ah CDSA a inthawk club/team inkhel ding tir lo dingin an rel. Hi le inzawm hin CDSA chun Hill district a team hai chu AMFA huoihawtnaa Winners Cup, 2015 a tukhawm thang lo dingin an inhriettir.
Chun, Martyrs hai ruong vui zo a ni hnunga district sunga nundan pangngai a um nawk huna Super Division match inkhelna sunzawm nawk chau dingin meeting chun an rel bawk.
Pasal pakhat mi that ni dinga ring inkhaihlum anga thingkunga khai
CCPur: Policea inthawk ei thu dawngnain a hril danin Mr Thangliansiam (20) s/o Thonsong of College Veng, New Lamka chu Oct. 6, 2015 khan Thingkangphai thlanmuol bul lai thingkungah inkhaihlum saa hmu a nih. A ruong hi zani 1:30PM khan Police han va lain District Hospital Morgueah an sie a, doctor han Imphal tienga postmortem thaw dinga an refer leiin Oct. 7, 2015 zingkar inhma tak hin Postmortem thaw dingin Imphal tieng phur ning a tih.
Ei thu dawngnain a hril danin sun dar 11:30 vel khan naupang vate per dinga fe han thingkunga inkhaiin an hmu a, chu taka inthawk hi thil hi hrieta hung um a nih. Thangliansiam hi inawkhlum angin thingkunga inkhai sienkhawm a taksa hmun tam takah hliemna be hmu a ni a, a ke le a hnar haiah thisen a suok bawk leiin mi tu haiin amani an sawisak hlum hnunga inkhaihlum anga thingkunga an khai ni dinga ring a nih.
Mr Thangliansiam hi a nu Ngaihoihching tapa (a pu) Thonsong ina inthawka seilien niin a piengna pa hmel khawm hmu phak lo a ni a. Thla 1 vel liemta khan Gangpimual a a nu Ngaihoihching tuta pasal dang nei ta kuoma hang um niin ei thu dawngna chun a hril. A nu Ngaihhoiching chun, October 3, 2015 zan dar 11:50 vel khan an insungah inselbuoina a um leiin Thangliansiam hi ina inthawk a suok a, Oct. 4, 2015 zantieng 4:00PM chen khan ama chun hmunaw sienkhawm mi thenkhat chun khawlaia an la hmu a, chu hnung chun a chanchin a hriet tanaw thu a hril. Hi thina thua hin Police chun FIR No.89 (10) 2015 CCPPS U/S 302/34 IPC an registereda suizuina an nei mek.
JAC thuoituhai tawngtaipekna an nei
CCPur: Grace Bible College, New Lamkaa Teaching & Nonteaching staff le students hai chun zani zantieng khan KKL Complex, IB Roadah JAC Against AntiTribal Bills hai inhmupuiin JAC thuoitu hai ta dingin Pathien kuoma tawngtaipekna an nei. Hi huna hin JAC Chief Convenor chun kohran le organisation tum tum han Pathien kuoma ma lova an tawngtai pekna leia JAC kal pen pei theia um a ni thu hrilin hmatieng peia khawm tawngtainaa hre zing hlak dingin a ngen a. JAC hmalakna report hi huna hin a pek bawk.
JAC kutah ralna sum Rs. 38,100/ a lut
CCPur: Martyrs hai ralna ding JAC hnuoia Finance SubCommittee in In tina Rs. 100/ le a chungtieng dawl dinga a lo puong angin sum a lut zing a, zanikhan khuo 6 le mi pakhat haia inthawk ralna sum Rs. 38,100/ a lut nawk. Zanita ralna sum petu khuo hai chu Hiangdung (Singngat) Rs. 1,500/; Seichang (Henglep) Rs. 4,600/; Leijang Khopi (Tuibuong) Rs. 4,000/; M. Tanglian (Singngat) Rs. 3,900/; Teikhang (Tamenglong) Rs. 2,000/; Hmuia Veng (CCP block) Rs. 22,000/ le Mr Pakhai (M. Compound) Rs. 100/ hai an nih.
Dadri a thil tlungin ei ram hmel a suksiet: Jaitley
Buoina intluntu hai chunga zangaina inlangtir lo dingin MHA state tin an hriettir
New Delhi: Finance Minister Arun Jaitley chun Uttar Pradesha Bawngsa faa intumna leia pasal kum 50 mi Mohammad Iqlakh mipuiin an sawisak hlumna chu nasa taka a dem thu a hril a, hi thil tlung hin ei ram hmel nasa takin a suksiet a nih tiin New York hmuna Columbia Universitya thu a hril zova reporter hai an hmupui huna a hril. Hiengang thil hin ei ram hmel a suktha naw leiin ei bansan a tul tiin a hril bawk. Iqlakh kha bawngsa faa intum leia Bishada villagea mipui 200 ruolin an sawisak hlum a nih.
Union Home Minister Rajnath Singh chun Dadri hmuna thil tlung chu thil vangduoithlak tak a ni thu hrilin mipui hai chu inrem taka um dingin zanita Bharat Kisan Union founder Mahendra Singh Tikait piengchampha vawi 80 hmangna huna a hril. Home Ministry in October 1, 2015 nia report pe dinga an hriettir angin Uttar Pradesh sawrkar chun Union Home Ministry kuomah Dadri thil tlung hi report a pek tah.
Sawrkar thlungpui chun chi ke kuong le sakhuo hran hran zuitu hai inkara intheidana le innghirnghona intlun thei ding thil hril le hiengang tienga infuipawrtu hai hrim hrim chungah zangaina inlangtir lo dingin state sawrkar tin hai an hriettir. Hiengang buoina intlun thei thil thawtu hai chu dan ang taka le a nat thei ang taka hremna pe dingin Home Ministry chun state tin hai an hriettir bawk. India ram sunga sakhuo thil le chi le kuonga innghirnghona tum tum tlung hai chu sawrkar thlungpuiin a ngaimaw hle thu Home Ministry thusuok chun a hril.
HSA Imphal Jt. HQ in Free Coaching
Imphal: Hmar Students’ Association (HSA) Imphal Jt. Hqrts chun October 8, 2015 a inthawk khin Savio English Higher Secondary School, Thangmeiband hmunah Competitive Exama thang ding hai ta dingin Free Coaching huoihawt a tum. Coaching a hin Class X le a chungtieng hai thang thei an ta, Class nei hun ding hi zingkar 6:30AM (Sharp) ning a tih. HSA Freshers MeetcumFelicitation prog. huoihawt tum ruok chu ei ram buoina leiin la thul hri phawt a ni thu HSA Imphal Jt. Hqrts chun thusuok a siem.
Dengue natna invawi mi 12
Imphal: Zani chen khan Manipurah Dengue natna invawi mi 12 an um ti an thisen testnaa inthawk finfie a ni ta a, hienghai laia mi 10 hai chu Churachandpur mi an ni a, pakhat chu Bishnupur district a um le pakhat dang chu Porompat a um a nih tiin Dr Jamkhokam Kuki, State Malaria Officer chun a hril. Dengue hi thina thei natna a ni a, sienkhawm a hun taka enkawl chun sukdam vat thei a ni leiin titthawng ding a ni nawh. Sawrkar hmalakna chauva sukre thei ding a ninaw leiin sawrkar le mipui thangruol a tul tia hrilin mipuihai chu sawrkar hmalakna lo thlawp seng dingin ngenna a siem. Chun, Churachandpur a fogging thaw tan a ni ta a, hun sawtnawte hnungah damdawia thosilen inchiena sin tan ning a tih tiin Dr Jamkhokam Kuki chun a hril.
Manipur in 1st Intl. Bamboo Conf. a mikhuol ding
Imphal: Manipur chun October 2226, 2015 inkar sung khin ni 5 sung aw ding 1st International Bamboo Conference cum Workshop (IBCCW) chu Oriental College, Takyel hmuna a mikhuol ding a nih. Hi huna hin rambung dang dang 10 haia inthawk palai an hung thang beisei a nih.
Hi Conference hi Union minister of state (Independent Charge), Ministry of Textiles (India) le minister of state for parliamentary affairs ni bawk Santosh Kumar Gangwar in hawng a tih. Conference a hin khawvel rambung tum tum haia inthawk palai 500 le experts 20 an thang ding niin Th. Brojendro, Concenor, IBCCW chun a hril. Hi huna hin kutthemthiem han an thil siem suok hai pholang an tih.
MPSC Chairman dinga ruot
Imphal: Manipur Chief Secretary a pension tah Pu P.C. Lawmkunga chu Mizoram sarwkarin Mizoram Public Service Commission (MPSC) Chairman sin chel dinga a ruotna Order an suo tah. Pu P.C. Lawmkunga chun October 12, 2015 in Imphal suoksanin Aizawl a pan ta ding thu le sin thar hi October 14 or 15, 2015 in a zawm ding niin a hril. P.C. Lawmkunga hi 1979 bath IAS Officer, Manipur&Tripura Cadre, Registrar, Mizoram University sin khawm lo chel ta hlak a nih.
Lamlai PS sungah bomb 2 a puok
Imphal: Zani zing dar 6 vel khan Imphal East districta Lamlai Police station huop sung Leisiphung le Phuramakhong inkarah bomb 2 a puok a, mihriem thi le hliem an um nawh. BSF hai patrollinga an fe laia bomb hai hi hung puok nia hril a nih. Hi thil tlung le inzawm hin Police le Security Forces han dappui an thaw a, man ruok chu an nei nawh. Chun, Security Forces han zanikahn Bomdier area, Bishnupur districtah IED 1 le Detonator 2 lampui sira kam an hmu bawk.
BSNL in mobile subscribers 2.5 lakh
Imphal: Bharat Sanchar Nigam Limited (BSNL) chun tuhin Landline hmangtu 18,000 le Mobile (postpaid le prepaid) consumers 2.5 lakh a nei mek thu J. Lunkim, GMTD BSNL in Imphal, Telephone Bhavan hmuna ni 7 sung aw ding BSNL Week celebrations a ni 6na an hmang huna thu a hrilna huna a hril. Sawrkar enkawl a ni leiin a chang chun sawrkar tienga inthawk fund indainaw leiin private sector hai angin service a pek theinaw chang a um hlak a, sienkhawm nidang ngaituo chun that tieng a pan pei a nih tiin a hril a. BSNL chun tower tamlem lan thut pei a tu m thu a hril bawk.
Sawrkarin Mao loneitu hai hmun a pek
Imphal: Manipur sawrkar chun Mao a inthawk loneitu han an lohmasuok hai an zawrna dingin (temporary) in Lamphel Supermarketah hmun a pek. Dzuko chungthua Southern Angami People’s Organisation an thlai thar hai zawr an phal peknawa inthawk hun iemanichena inthawka kha Imphal khawpui an lo hmasuok hai an hung zawr ta a nih. PDA Chairman, T. Mangibabu chun, Chingmeirong hmuna market shed bawlzo a ni hmapo hi hmuna lo inthung phawt ding thu hrilin market shed bawlzo vat a ni theina dingin sawrkarin hma a lak a nih tiin a hril.
Tu ti hrietlo mithi RIMSah
Imphal: Tu ti hrietlo mithi pasal pakhat RIMS Surgery Ward (Male) ah a um a, en thei dingin RIMS Morgueah sie a nih. A lang danin kum 39 mi vel a put niin Police chun an hril.
State Merit Scholarship hni thei
Imphal: Director of University and Higher Education, Govt. of Manipur chun State Merit Scholarship (NonTechnical & Professional, NEC stipend le Book Grants (Technical and nontechnical) hni thei a nih tiin inhriettirna a siem. Online hmangin hnina December 31, 2015 chena peklut thei a nih. Thu chieng lem chu hi Department website:www.highereducationmanipur.gov.in ah hriet thei ning a tih.
Meghalayaah misuolin Biekin an raw
Tura: October 2, 2015 zantieng 5:30PM vel khan Meghalaya, West Garo Hills district sunga Jesus Light for All Nations Ministry biekin chu meiin an raw. Hi ministrya senior Pastor Order R. Marak chun Biekin raw a ni huna hin musical instrument Rs. 1,28,820,25 lakh manhu, Chairs 25 le Rangva bundles 13 chu a kangut vawng a nih tiin a hril.
MACT in zangnadawmna Rs. 29.36 lakh
Thane: August 30, 2011 nia tanker in a rawt hlum Jatashankar Yavav sung hai kuoma Thane District Motor Accident Claims Tribunal (MACT) chun zangnadawmna Rs. 29.36 lakh a pek. Jatashankar Yadav hi private company a sinthaw, Nagothane a inthawk Goregaon pan Jeep a chuong a ni a, an chuongna motor hi hrat taka tlan Tanker in a baw leia thi a nih. A nuhmei le a sung hai chun zangnadawmna Rs. 30 lak an ngen a, sienkhawm Court hmaah vawi tam tak an inlang hnunga Court in zangnadawmna Rs 29,36,664 pek dinga a rel a nih.
Maoist han TDP hotu 3 an thuoihmang
Visakhapatnam: Andhra Pradesha chun Telugu Desam Party (TDP) hotu pathum hai chu Maoist ni dinga ringhla han Visakhapatnam districta inthawk zani hmasa zantieng khan an thuoihmang. Thuoihmanga um hai chu TDP Mandal President Mamidi Balayya Padal, Senior leader Vandalam Balayya le district committee member Mukkala Mahesh hai an ni a, Gudem Kotha Veedhi Mandala Kothaguda village an chengna in haia inthawka thuoihmang an nih. CPI (Maoist) party east division secretary Kailasam chun, bauxite mining thaw tumna suktawp ding, paramilitary forces hai lakdawk vawng ding le tribal hai suknawmnatna tawpsan dinga an ngenna sawrkar kuoma lekhathawn an pek. Andhra Pradesha TDP sawrkar chun Bauxite mining thaw tum chu a fethlengpui ngei ding thu a hril.
------------------------------------------------------------------------------------------------------
VAWISUN THUPUI
Kei mi ko la, lo dawn ka ti cheh a, thil ropui le inthup i hriet naw hai chu inentir ka ti che. Jeremia 33:3
Editorial
Thuawina ei tlasam
Israel, Abraham thlahai chun kum 2000 chuong an vakvai hnungah khawm “Abrraham thlahai kan nih” tiin an ram an suol suok nawk a, thlaler ramtawl; chu khuoizu le bawngnene luongna ramah an inchangtir nawk mek a, kum 1945 a Atom Bomb hmanga bomb siet ta Japan ram chun khawvel an hung ngam nawk ta a. Mihai chun thaw thei dingin an inngai a, an thaw thei el hlak. Ei Scientist ropui, umpui mu zat hretu ei pu dit tak Pu Sura chun, “Nahai chu nisienla a lo el ding” ti hi tuchen hin ei la sunzawm niin an lang. Ram ropui takhai thilthaw ropui takhai hi mak ti takin ral khata inthawk ram thuoitu le mipuihai hin chilthli far pumin ei la thlir mek a ni hi!
Spartan han an nauhai pasaltha dinga an sersuok dan dam, ram ropui tak thuoitu America President nauhai meu khawm mani mamaw ding sum an inthawksuoktir dan dam, dan an bawsiet chun an chunga hremna an lekkaw dan dam, ram ni tla seng lova roreltu England Lal naupahai khawm ral beia thi ngam lungril puta Afghanistan ram khawkhrawk taka an fe suok hang hmu hin chu ei fe dan hi a lo inpersan deu chu a nih.
Ram ropuihai thaw dan ei en a, thu an awi a nih. Rinumin harsa hle sienkhawm an ram le an hnam ta ding a ni phawt chun Lal nauhai khawm an awl bik nawh. Thuawi takin an thaw dinga ti chu an thaw ve el a nih. An ram le an hnam thuoituhai thu an awina le an inzana hi entawn dinga tha a nih. Ei ni rawi ruok chu ei ram le ei hnam thuoituhai rel tasa khawm kalin a khing zawngin kal ei pen ngam a ni hi! Thuawi lo le hotuhai thusuok palzut a, mani tha ti dan ang anga ei fe a, thil ei thaw sung hin chu ei thil ngen le hmalakna haia hin ei hlawtling beisei a um nawh.
A bik takin Churachandpur district a cheng thangthar, nunghak le tlangval hai hin thuawina ei tlasam hle niin an lang. Churachandpur district a tribe tum tum le pawl tum tuma thuoitu han education an ngaipawimaw a, inchuknainhai hawng nawk ni ta raw seh tiin ro an rel a. Area thenkhata cheng han hotu le thuoitu hai thu an zawm a, inchuknainhai an hawng a, studenthai khawmin regular class tha takin an sunzawm nawk ta a nih. Amiruokchu, area thenkhata chun inchuknain hawng le kai dodal pawl an um leiin school le college hai hawng thei lovin an um pha. Hi thil hin Churachandpur district a cheng Zohnathlakhai ei inthuruol nawzie chieng takin a tarlang.
Inthuruol tak ni inla chu hiengang thil hi a um thei ring a um nawh. Ei unau Meiteihai chun ralkanga inthawk an mi nuisaw vur vur ngei ring a um. Ei movement fe dan enin khawlai hmuna mani an diknawna le a famkimnawna a um niin an lang a, tribe le civil society a Organisation tum tum a thuoitu han JAC leh ennawn hai sienla, an diknawna, a fe suolna le hmai pal dam a um am ti ennawn hai sienla nuom a um.
Chun, tulai hin Manipura Special Summary Revision of Photo Electoral Roll, 2015 a fe mek a, Churachandpur District ti lo District dang 8 haia chun hi sin thawna hi a fe mek a. Amiruokchu, Churachandpur District a chun hi thil hi hril rik a ninaw bakah District Administration khawmin iengkhawm an thaw bawk nawh. Vote nei thei sangtelin an vote nei ding an chan pha thei ding a ni leiin hotu le thuoitu han hi thil khawm hi ngaituotlang hai sienla nuom a um. Ei hmakhuo tiengpang ding khawm ei ennawn rawp naw chun chan ei hau taluo ding niin an lang.
