Pu CH Khawthlang Statue siemna dingin Construction Committee indin

Haflong/Muolhoi, 15th Sep.  2015: Hun sawttaka inthawka NC Hills Autonomous Council a Chief Executive Member hmasatak Pu CH Khawthlang (Hmar-Tuolor) hrietzingna dinga limker (statue) siem dinga Hmar hnam sunga Organisation hran hran in Council authority hai kuoma a lo ngenna chu bawzui peiin, abikin tulai HSA NC Hills & Karbi Anglong Jt. Hqrs in hma a hung lak nawkna le inzawm peiin Council rorelna insangtak Executive Committee a Pu Ngamrothang Hmar, Chairman NCHAC in a hung putlut pawmpek a ei umna ah ei lawm hle a. Hi hi statue hi NCHAC Campus sunga inthut ding ani leiin an hmatienga bawzuia siem dan ding ngaituo tlangna dingin vawisun tarik 15/9/15 hin HSA NC Hills & Karbi Anglong Jt. Hqrs chun Hmar hnam organisation hran hran hai kokhawm in meeting nei ani a, hun hmasatakah Rev Dr. Hrilrokhum Thiek in Pathien kuomah tawngtaina a neizo in ngaituo tan a nih. Hi statue siem nghal nuomna leiin iengkim a hmala tu ding le sum le pai thu a khawm hmalatu dingin 'Construction  Committee ' chu indin in hieng a hnuoia hai hi lungruol taka ruot an nih.

Chairman: Pu Ngamrothang Hmar, Chairman, NCHAC
Secretary: Pu John L Puruolte
Finance-cum-Treasurer: Pu Robert L Tuolor.

Chun organisation tin hieng HSA, HWA, Hmar Inpui, HPU, HPC (D) (Assam Region* overground a um an ni tah) le MDC elected anthawk Pu Khawvelthang Hmar hai chu member a ruot an nih.

Hun hung fe peia le hmatieng peiah khawm nisien mi tamtak hai inhriettirtu le research thawtu hai chen khawma NCHAC Campus an fe pha an hmu thei ding statue ei hang inthut ding hi ei vangnei em em a nih.