Sermon:
ALMOST CHRISTIAN-PART-III
“Kawng khat I la bak” Mark 10:21
Pathien ram ah ‘bak’ ei nei senga, ei bak nei dan I zirin ei hringin ei khawsa a. Ei ‘bak’ dan i zirin kohran ah rawng ei bawl hlak. Thenkhatin an bak chu ‘thipui khawp suolna’ ana, thenkhat ‘bak’ chu ‘inthanglien theilo khawpa suol kawptlat’ dam, thenkhat bak chu ‘Pathien rawl ngai nawna’ dam, mi thenkhat chu an inpek zo tawk naw leiin Pathien ram le kohran ram ah ‘thangmaw bawk’ an ni hlak a, mi ta ding chenin ‘hling’ an ni bawk hlak. Chuleiin, Pathien kohran inti hai laia hieng suolna chi dang dang, uiretna, tuol thatna, mani inthatna, hurna lei a inpawngsuol, zu, corruption, inrukna- bible a suol ra ati popo khan ami chim nel mek an tah. Hindu hai, Sikh hai, Jain hai, Budhism hai lai nekin Christian hai lai suolna (crime rate)a nasa lem hrim a, theft (rukrukna), zu le drugs hai khawm a tam lem a hril ani rawp. Hieng anga ‘bak’ tamtak ei nei ferfur hi Ringtuhai ei inthang thei nawna lientak pakhat a ni a, Pathien ram ei inzau theinawna san a ni bawk. Kohran thuoitu inti le hotu a inngai tamtak hai khawmin ‘bak’ an nei a, nu le pa hai khawmin ‘bak’ ei nei senga, thalai hai khawmin ‘bak’ an nei a, rongbawltu hai khawmin ‘bak’ ei nei seng hlak. Tamtak chun ei bak hai hi ei hriet a, mi tamtak ruok chun an bak hai an hriet kher nawh. Bak neia inngai le hre hai chun nasatakin thang an lak hlaka, bak neia inngailo hai chun hmasawn dan ding an zawng chuong nawh. Ringtuhai hi hieng an hin ‘age grouping’ hang thaw inla. Grouping tin hai ‘bak langsar zuol’ ziek dawk a awlsam el dim. (i) Workers’ group (rongbawltu hai bik); (ii) Parents’ group (Nu le pa hai bik); (iii) Youth group (Thalai hai bik) le (iv) Children group (naupang hai bik). Tuta tum hin Youth Group (Thalaihai bik) hi holistic approach in ei bakna hai hang zawng suok inla a tha ka ring.
Thalai bik: Thalai hai hi “Pathien in” (temple) ei ni hi ei hriet tho de naka chu, ei zawm tawk naw hi thil pawi tak a nih. Zawm ei tum naw khawm a hawi. Pathien thu hringpui ta lovin, a tamlem chun ‘fashion’ in ei hmang tah. A pawi em em. Inkhawmpui le conference inhawtirna dinga hmang chau. Hla pawl inchuk khawm a huou huou lawm leia thang ve ringawt el, Pathien tina le inzana nei mumal lo thalai ei pung hrat hle. Ringtu ei nina hi ‘Pathien naupa neisun thisen ngeia’ intlan ei na, mana inchawk ei nih a, mani ta nita lovin, a min chawtu Pathien ta ei ni ti hriet chieng a tul emem. Bawng nene tuipawl angin ei hringna hi a da zo an tah. Sanctified life (nun sawp thieng) ei ni tah a, ei sukpawrche ding an ta nawh. “Pathien In in ni le Pathieng thlarau nangniah a um ti inhrietnaw am a nih? Mi tukhawmin Pathien in chu a sukkhawhlo chun Pathienin ama chu sukkhawhlo veng a tih. Pathien in chu an thieng si a, chu in chu nangni in nih” 1Cor 3:16 ah an ziek a nih. Chuleiin, thalai haiin ‘Pathien in’ ei nina anga ei hringpui naw hi ei ‘Kawngkhat bak’ inlawk bura inlang zing chu a nih. Nu le pa le naupanghai nekin Thalai hai hi puongtieng mihai tadinga langsar tak ei nih. Ei hnam nunphung le ei sakhuo mizie tarlangtu lientak ei ni leiin iengkim ah ei pawi emem. Ei nina indiktak ‘Pathien Lal nau’ ei nina ei hriet chieng taktak chun iengkim ah, titakna, taimakna, tlawmngaina, felna, ringumna, indikna le thienghlimna haiin an mi zui ding a nih. Mani nina hre naw thalai lai hin ei pung deu deuin ka hmu a, pawi ka ti ngawt el. Ka hmu suol nisien ka nuom el a nih. Inchuktu haiin inchuk ding in nih, ti inchieng chun hril ngai lovin taimakna in inkhum a cheu a, kawr le vai hai nekin inhnuoi bik naw ti niu. Kan naupanglai kan hotu haiin ‘thu khel’ in an milo inchuktir hlak leiin, Vai le Meitei hai tluk naw dingin kan in ngai tlat hlak! ‘Mathematics le Tribal thluok an mil nawh, thiem thei naw ti niu’ an mi ti hlak! Ka lo awi ve leiin mathematics ka thiem naw sawng! ‘Vai thluok le tribal thluok an ang nawh! Bengali hai lem chu phak ngai naw ti niu’ an mi tih a. Ka awi sung po khan ‘Vai ruol’ ka tluk naw hrim a nih! A lo pawi sei em em a nih. Pathien in pasal le nuhmei thluok hi danglam met in a siema ngai a nih. Pasal thluok popo dan naran in a lien zie le rik zie an ang vawng an tih. Hrietna tlawm hi ti alo va um de! Hrietna tlawm ei lo intu rawp hlak leiin ‘bak’ ei hau pha chau ni lovin, ruol ei ban naw pha a nih. Entirna dingin “London bridge is falling dawn, my fair lady” ti hla kha, kan naupang lai “London pi chil foren dan, my fe lezi” tiin an min chuktir! A hla indiktak ka hrietna kha ala sawt bek nawh! 1963 kum laia zirtirtu pakhat chun “Play while you play, work while you work. That is the way to be happy and gay” ti kha, “In fiem chu infiem, sinthaw chu, sinthaw” tiin class ah an let! Zirtirtu ni tlak loin an mi zirtir a, Pathien thu hre mumal lovin, ringthu an milo hril hai hin, vawisun chenin ei thizam a fang a nih. Zirtirtu thenkhat ruok kha chu theitawpin, an thiem ang tawkin an inbuotsai hlak. Kha hma deua Pathien thu an mi hril ka la hriet thenkhat le an min chuktir hai dam chu, a zieka ziek dawk chi an ta nawh! Vanram chanchin pulpita an milo hril hai dam kha chu, a rapthlak tho a nih! Chuleiin a nih, thalaihai hi ‘self starter’ ei ni a pawimaw na chu!
Tumruna: Thalai hai tadinga kan fui nuom chu ‘self starter’ ni tum hi a nih. {Holistic approach in hang sui met inla. Chu umzie chu, midang mi hril fawm ngailova mani a thil thaw le zawng suok a nih. Harsatna tuok met leia In suk lungzinga, insuk kur inkuk fawma, love song sak ding mai ruoi el ding an nawh! Nang a neka harsa lema, inchuk tawk tawk an tam lem dai ti hre tlat rawh. Kawr le vaihai lem chu eini rawi neka harsa a inchuk deu vawng an nih. Rawngbawla ka lut hnung chun Vai neka tuor sel kha ka tum lem hrim hrim hlak. Ei phaklo hai le ei tluklo hai kha ei hneban tum ding a nih. Chuong naw chun, Pathien thu chau ah ni lovin khawvel tieng a khawm ‘bak’ hau taluo pal ei tih. Thiemna kawng ah thiem bek bek chu ka ni ve nawh. Ruol hnung hnawt ah kan ngai chau. Pathien kona ka dawng hlimin “Lalpa, BA tawng chau ka nih. Hmangna ding ka um nawh. Mi hmang theinaw ti nih” tiin ka tawngtai hlak. Amiruokchu, hringna thar pek kani hnung le rawngbawlna ram ah ka lut hnung ruok chun Pathien zar chauin ‘mi hnung hnawt’ ni ka tum nawh a, theitawpin mani inchuk fawmin le inzawng fawmin, sum ka hlaw sunhai seng in, hma ka lak hlak. Theology le management kum sawm deu thaw kan chuk sung khawm Pathien kuomah hriselna ka ngen a, international school ah ‘Bengali thluok tha’ tia an mi lo hril hai le, ram dang mi ei ni neka changkang hai hnuoi ah Lalpa’n a mi sie der nawh. Kei telul, Class X third division a passed, PUC third division a passed in hienga kan siem thei chun, Aw, thalai, nang Class X first division/2nd division a passed, 12th second/first division a passed phak le thiemin, I ‘bak’ hai kha maksan la, IAS chau ni lovin, WAS (World Administrative Service a lo um ani chun) chen khawm tling taluo ringawt I tih! ‘Ieng leia officer ei kai thei tanaw ma nih’, ‘Ieng leia IAS ei tling thei ta naw ma ni’? ti a chier chier lovin, Pathien malsawmna dawng tlakin ei bak laia a lientak ‘Thabona’kha hlip inla, tu inam tluk bik an che a? Ei officer hlui hai lekha inchuk dan le tiem dan dam, ngaivena hma lak ve ding ni naw nim. Lekha tiem mumal lova zan sawt tak tak menga, zingkar in ‘Good Morning’ hman lo ringawt khan iem hlaw dawk I ta? Ieng sin am hmu zo I ta? Pathienin iengtinam mal misawm thei a che a?
Tienlai Texas ram ah chu tharum hratna le huoisenna in ro a rel tak meu hlak a. Ram dam, bawng tlatna ding ram dam, rangkachak chona khur dam nasatakin an inchu hlak a. An inthat hlak. A hratnaw tamtak hai chu khawlai dung ah le Saloon hai ah muolpho takin an sawp hrep hlak a nih. Chuonga sop hrep a umhai chu ram dang ah kum nga dam an tlan hmang a, pistol kap le kut tuma insuol dan an van chuk hlak. Hrat tawk a an inngai pha leh, a sawp hrep tuhai kha an hung cho hlak a, an hne rawp hlak a nih. Nang khawm, a huou huou lawm taluo naw la, midang hai in iem tuta, Khauphar thawvenga an thawvenga an innui huou huou lai, kum thum dam, kum nga dam, nitin darkar 8 le 10 vel tiem zing la, inkhum rawh. Chun, hung suok dawk rawh! Chu zet chun I hnam chanpui hai lawmna le uongpui hung ning I ta, Kawr le Vaihai khawmin an chung en ding che a nih. Titak nawna hmun le a huou huou hmun kha kum nga vel tlansan rawh. I hung nawk tieng chu Cowboy-phawirang hai ang I ni tading a nih! Dawizepna I bak ani chun, hlip nghal la, Pathien malsawmna’n zui ngei a che a, ei ram le hnam haiin kan lo lawm dur dur ding che a nih! Chu chu, I thawthei a nih. Nang ah a um a nih! Tumruna le dawizepna I la bak rawp am ie? Chuong a I hung kir pha chun, nunghak hmeltha hai le nungchang thahai khan I hma ah ‘Cat walk’ an hung thaw zut zut el ding a nih! Chuong ang hlawtlingna chang chu, a siemtu che Lalpa ditdan a nih. A hun hma a nunghak sai kuol vel kha ‘Phulo ‘D’’ tawng rawnna mei mei a nih! Nunghak, tlangval hai, hung tho suok ta um ie! I potential, nanga thilthawtheina um kha hmang tangkai raw khai. I Kawngkhat bak kha iem a na? Thabona am tum neilo nun?
Mani tawng: Mani tawng hmang thu a khawm tulai thalai hai hi demna cheu ka nei! In Hmar tawng ziek hai hi a ngaina hlawl ka hriet nawh, ka tiem mumal theinaw tieng a nih! Kei hman ka naupang lai, Meitei rama khawsa le lekha inchuk, Hmar tawng ziek chu hrillo, a hmang tak ngiel khawm buoi hlak, Class four kani khawma, bible tiem mumal theilo ka nih! Ka ‘bakna’ kha ka siemtha naw chun Hmar lai Pathien thu ka hril theinaw ding ani le ka ziek thei ngainaw ding ani zie kha ka chieng em em. Mani tawng ka thiemnaw chun Sap tawng ka thiem thei naw ding ani ti ka man chieng bawk a. Chuleiin, Hmar tawng vaihnu ram in kan chuk tan a nih. A hmasatak in Pu L Keivom Nairobi ah First Secretary vela a um lai, a Hmar tawng ziekhai ka hni a, ka lo inchuk a. Chulaia a lekha ziek mi thawn tha ka ti em em chu “Khawvel ah hian lawmna a kim thei si lo” ti Siampuii Sailo a hla kha, Hmar tawng in a zieka, a thu ka hlawk pui a, a tawng ka hlawkpui bawk. Chu hnung ah Pu L Ruoivel Pangamte khi coach in ka hmang a, hun iemani chen sunga ka sermon ziek popo ami correct pek vawng hlak a nih. Thenkhat in ‘I Hmar tawng ziek chu ava mawi nuom sawt de aw’, dam an hung ti a, insuk mitak hun a nih ka ta, ka to tawk tawk hlak! Hmar tawng a Pathien thu ziek dinga Lalpa’n ami tirna hi kum ruk vel chau a la nih. Chu sunga thahnem ngai taka mi thangpuitu hai tam tak an um a. Mobile in an mi hung hril hlak! Kei neka Hmar tawng inchuk nasa Hmar Pastor lai an um ka ring nawh. Mani tawng thiem lo kha thil mawi le tha ni thei dingin ka ring theinaw tlat a nih. Thalai hai, mani tawng thiem dingin hma la ve tu’m ie! In ‘bakna’ lientak ani uo! Mani tawng inzapui hai hi (tawng mawilo ah inchang naw sien) ka hmu pei pakhat khawm an um nawh! Nunghak pakhat hi Assam regiment centre, Shillong ah kum khat nau dawnin a zu uma, ‘Hmar tawng ka thiem ta nawh’ a hung ti chu! Mizoram ah kumkhat uma, insung a mani tawng hmang ngam lo dam- hnaam an um ka tih! Khawvel pumpui ah Zomi Christian Fellowship 40 vel an um tah. USA, Australia, Singapore, etc ah an tawngin hla an sakin, Pathien an biek zing. Kuki Worship Service hi USA a ringawt khawm iemanizat an um, London ah an nei, Tokyo ah an nei Kaula Lampur, etc ah an nei. Tukhawmin an tawng an hmusit nawh. Mani veng suoksan meta, lunga deng phakna chau ah khawsaa hriet ngawi ngawi ha’n, “Hmar tawng ka harsa e ek e” an ti vet hi sim vang vang inla, inchuk ro! Pathien hmangai tuha’n an hnam le an chipui hai an hmangai in an theinghil ngai nawh.
Chun, hun (time) hmangna kawngah ‘bak’ in hau taluo! Hun hi Lalpa ta a nih. Eini rawi tamtak chun ‘10:00 am ah inkhawm ding ti chu, 10:00am ah insiem tan ding’ tina ah an la ngai! Hun awl hau hi suol in a hmang nuom. Thlemna tuokna ani bawk. Chuleiin, hun sukbit zing ro. Subject text bak ah, Christian books, daily bible guide hai tiem inla, hma sawn emem in tih. UK a soloist a ka hmang hlak nunghak pakhat chu pastor tam takin Pathien thu tiemna le Christian book tiem rawnna kawngah an phak nawh. Pathien thu ah titi pui khawp a tling. A nun a tha in, a takin a fel hrim a nih. Technology in a control cheu chun thil inlau umtak a nih. I hringna, I hun, I lungril kha control tlat rawh. Hmangna bo hrila inpan khawm ding an nawha, inpan ani khawmin ‘inpan hlawk’ tum lem ding a nih. Pastor khawm nihai sien ka hlawkpui theinaw ding hai chu ka ngai bek nawh. Chuleiin, ka thalai chanpui hai, thlarau ram le taksa khawsakna ram ah in ‘bakna hai popo’ kha tlansuok san unla, Lalpa tiem ram hang lut sup sup ta u le! Amen!
