Responsive Ad Slot

Kumtling lo nuhmei naupang- 2 suolluia nunrawng taka thattu man a nih

Sunday, August 30, 2015

/ Published by VIRTHLI
~ Henry L Khojol

Aizawl, 30 Aug, 2015 (Virthli News): August ni 28 a nia, thimbut dar 5 le dar 6 inkar bawr vela Pu. Kawldingliana hai panthlang huonah kumtling lo nuhmei naupangte- 2 ruong hmu a ni chun Singchhip mipui bakah Mizoram a barakhaiin athawngtak zet el.
Chawmkhat loin hi thiltlung rapthlak tak hi social media ah an dar nghal chuoi chuoia, khawtlang thuoitu le police hai khawma pawitawktu zawnghmu tumin ngawr takin hma anlak nghala, mi 4 chu ringhla an ni nghal. Sienkhawm 4 laia mi 3 hai chu hi thil tlung ni a, an chetdan le an umna hai sui anni hnungin an inhnamhnawi nawh ti hrietsuok a ni a, ringhlana lientak chu mi pakhat chunga cho a tla ta.

Chuonga ngawr taka nikhat le zankhat zawng a ni hnung chun pawitawktu misuol chu a phingtam taluo beidawnga hnam dang (Vai) in ah an vaklut lai chu a ma zawngtu YMA thuoituhai chun an man ta hlau el.

Singchhip khuo a Pu. Kawldingliana le Pi Vanlalmawii hai nau 7 laia a naupang tieng pang pahni Mary Lalremruati, kum 6 mi le a sangnu Maria Vanlalhmangaihi, kum 3 le chenve mi hai suolluia nunrawng taka thattu Lalchhantluanga (18) chu August ni 29 (Inrinni) zan dar 7 vel khan Singchhip YMA le khawtlang thuoitu ha’n an mana, Serchhip police hai inhriettir nghal an nih.

Singchhip hi Serchhip district, Mizorama um a nia, Aizawl anthawkin 212 km vel a hla a nih. Misuol Lalchhantluanga S/o Malsawmi, Chhingchhip venghlun man a ni thu hriet a ni phing hin mipui lungsen an pungkhawma, pawitawktu chu an kuta pe dawka chilhlum dingin police le khawtlang thuoitu hai an nawra, hun sawttak police duty mi 60 vel leh an innawr buoi a nih. YMA office-a thu indawnfie dinga an sie Lalchhantluanga vuok tumin mipui chun puotienga inthawkin an bei mek bawka, police thenkhat le lem chun an inphet thlu nawk nawk bawk. Chuonga hun sawt fe police hai leh an innawr hnung chun mipui thenkhat chun YMA office a bang ravang chu suksietin misuol chu kut an thlak mur mura, a lu, a beka hai anhnek ri bawr bawra, athenin ke in an lo rak thluk bawka. Khawtlang thuoituhai in ban pharin mipui lungsen chu khap dei an tuma, Thenzawl le Aizawl tieng police inchasa an nih ti an hriet phing lem chun misuol chu an kuta lak ngei tumin an bei nasa zuola, a vangnei hai lem chun an lo hnek ri bur bur hman hlak.

Zan dar 1 velah Aizawl le Thenzawl a inthawk police an hung thlungsa hnung chun misuol chu mipui lungsen laka inthawk chun venghim thei hram a ni ta a, vawizan (inrin zan) la la khan Aizawl hung panpui niin, August ni 30, zing dar 5 vel khan Aizawl hung lutpui a nih.
Aizawl tlungpui a ni hlim hin Lalchhantluanga hi Aizawl Civil hospital, Casualty ah ‘first aid’ pek nghal a ni a, hi zo hin Aizawl police station ah thu indawnfie dingin thuoi a ni a, vawisun la la khan Central jail ah sielut a nih ti ei thu dawngna chun a hril.

August ni 28 (Zirtawpni) khan Pu. Kawldingliana le Pi Vanlalmawii, Singchhip khuo a mi hai chu lo a inthawka in an hung inlawi hnung chun an nauhai, in nghak dinga an sie 3 hai chu tukhawm in a um an lo umnaw a, an insung thuomhnaw umdanhai an hei enchieng chun ‘rawk’ ni ngeiin an hmu ta a. An naupang pa, a sang nuhmeite 2 hai dawn dinga a zamsan chu a khawlai leng a hung kir phingin a sanghai in ah a zamsan thu a hrila. Sienkhawm nuhmeite –2 hai hi in ah an umnaw leiin thenum khawvenghai leh an zawng ta a, hienga zawng anni lai hin a upa lem Mary Lalremruati (6) chu saruok in Pu. Kawldingliana hai panthlang huona thulbuk karah hmu a ni a, a khel met a hin a naupang lem Maria Vanlalhmangaihi chu bedsheet a tuomin cement bag sungah hmu a ni bawk.Naupang lungsietumtak hai pahni hin an lu le taksa bung dang danga hai hliem nasatak antuor a, thisen an kai pheng phunga an ser khawm an thi niin an ruong hmutu hai chun an hril.

Hi thlitlung rapthlak tak hin Mizoram a dengsuok nghala, Serchhip police hai inhriettir nghal an nih. Pawitawktu misuol hi ngawr taka zawng nghal a nia, ringhla mi 4 lai mi 3 chu an chetdan le umdan hai suichieng an ni hnungin an inhnamhnawi nawh ti hriet a ni a. Sienkhawm Lalchhantluanga (18) chu naupangte 2 hai ruong hmu a ni lai hin a bag inruk (an thlak pal) sungah ama T-Shirt ngei hmu a ni a ngawrtaka zawng a ni hnungin ni 29 zan dar 7 vel khan Singchhip Mualpui Venga-Vaipa in a phingtama hung invak lut chu a sakela YMA office a um YMA thuoitu hai chun an lo man ta a nih.

Lalchhantluanga hin police le khawtlang thuoitu hai kuomah an puong danin Pu. Kawldingliana hai inkawla Pu K Lalsangzuala In (Assam type) bawi lai mek, a tuong la pha zo lo a chun a upa lem nu Mary hi a thuoia, a suollui hnungin a that a ni thu a hrila, a sangnu Maria, kum 3 le achenve mi chun iengkim a hmu vawng leiin a ma khawm a thatsa el a ni thu a hril.

Nuhmei naupang 2 hai hin nasatakin hliem an tuora, an luhai an hawp deu vawng niin, ruong hmutu hai chun an hrila, misuolin an vuokna thir hmawl ni awm tak khawm hmu a ni bawk.

Lalchhantluanga hi vawizan dar 2 khan Singchhip anthawk Aizawl hung panpui a ni a, an hung suok tawm le lampui ah buoina iengkhawm a tuoknaw thu police hai chun an hril. Aizawl hung tlungpui a ni hnungin Aizawl Civil Hospital, Casualty ah first aid pek a ni a, hi zo hin Aizawl Police station ah thu indawnfie dinga thuoi niin, hi chanchin buotsai a ni lai hin Central Jail ah thakthlak a ni ta thu dawng a nih.
Don't Miss
© all rights reserved
made with by Simon L Infimate