Tuolsung
ICDS hnuoia food item a hungtlung
CCPur: Zanikhan Imphala inthawk CCPur district sunga ICDS Project Block 9 Lamka, Singngat, Thanlon, Henglep, Parbung, Samulamlan, Saikot, Sangaikot le Tuibuong haia ding naupang kum 5 le a hnuoitieng le nupui naupai hai ta ding Hot Cook food item chi tum tum Tuithaphai (CCPur) hung phurtlung a nih.
Micro Nutrient Fortified Energy Dense food hung tlung hai lai Lamka block a Awanganwadi Centre 181 a ding kg 1846; Singngat block a Aganwadi Centre 125 a ding kg 1275; Thanlon block a Aganwandi centre 144 a ding kg 1469; Henglep block a Aganwadi centre 122 a ding kg 1244; Parbung block a Aganwadi centre 62 a ding kg 632; Samulamlan block a Aganwadi centre 65 a ding kg 663; Saikot block a Aganwadi centre 73 a ding kg 745; Sangaikot block a Aganwadi centre 60 a ding kg 612 le Tuiboung block a Aganwadi centre 134 a ding kg 1367, a rengin kg 9853 a nih.
Micro Nutrient Fortified Energy Dense food hung tlung hai hi Not for sale (For ICDS) le best before 6 months from date of Manufacture ti inziek an ni a, sienkhawm thenkhat chu March le April, 2015 a siem dam an ni tawl.
Hmar Inpui in thupuong an siem
CCPur: Hmar Inpui (HI) General Headquarters Executive Council chun August 28, 2015 khan an Headquarters, Rengkai,CCPurah Council an inthung a, hi Councila hin thupuong (declaration) an siem. An thupuonga chun, Hmar hnam hai hluona ram haiah, an nunphung le dam suokna dingin right an neihai humhim le a sukse theitu ding haia intahwk thangruol ding tia thtlukna lain; Manpur Land Revenue & Land Reform Act (MLR&LR) 1960 siem that tum (Amendment) hin Hmar mipuihai nina le rights bakah Manipur a tribal hnamhai tawksa lo ding, Manipur sawrkarin dan thar a siem ah Hmar le Tribal Communityhai rights a sukbuoi naw ding, hnam tum tum hai inkara inremna le muongna a um theina dinga hmalak ding ti hai a thangsa.
Health Minister in ram Rs. 50 lakh manhu a pek
CCPur: Zani 11AM khan EBCC College Veng chun Chhungi Memorial Sunday School hmunah Chhungi Memorial Sunday School Hall lawmna, Pathien le a donate tuhai chunga lawmthu hrilna hun hmang a nih. Hi huna hin Sunday school bawlna ding le compound an neinaw leia kohran hotu han vawi tam tak an lo ngenna angin Health Minister Phungzathang Tonsing chun ram Rs. 50 lakh manhu ding a pek chu a patta kohran hotuhai kutah an hlan a, a lawmnain kohran mipuiin Siel 2, thatin ruoi an the.
Health Minister chun, EBCC College veng han Sunday School hmun ding ram an ngen lai khan, ram lien huntawk pek el chu thil awlsam a ninaw a, harsa hle sienkhawm an sungkuoa remtina angin Pathien rawngbawlna dinga ram hi an pekdawk a ni thu a hril. PT Sports Complex bawlnaa Rs. Crore 1 chuong hmanga um hai Centre government in a hung pek ding ti chu state sawrkarin sum a um naw tia a peknaw leiin Rs. 50 lakh zet a seng thu; New Lamka a PHSC inthut a ni theina dinga sawrkar thlungpuia rawtna a peklut thu a hril bawk.
Hi hun hmangna hi Rev. Dr Sonna Langzakham, D/S EBC Lamka South Divn. in tawngtainain a hawng a, Rev. S. Vung Minthang, Gen. Secy. EBC chun Minister le a nuhmei Sangte hai ta dinga tawngtai pekna a nei bakah midang dang khawmin thuhrilna hun an hmang.
Lib. Cum study centre
CCPur: Aug. 31, 2015, 7AM khin Chinlunthang, President, UZO/GHQ chun Zogal Hall, Zovengah LibrarycumStudy Centre hawng a ta, Ms Mannuamching, CEO/ADCC in ZSP SSC Free Coaching hawng a tih.
Waste Management meeting
CCPur: Zanikhan Shija Biomedical Waste Management team chu CCPurah an hung a, CMO/CCPur Office chamberah CCPur districta Diagnostic /Clinic/Laboratorz a representative han waste management thuah joint meeting an nei. Hi huna an thurel dungzuiin waste (hmunhnawk) Kg 40, Kg 10, kg 20 a thein trip 1ah Imphal chen phurtlungnain Rs.1100/ chen Shija Biomedical Waste Management kuoma pein waste tum tum hai an raw hmang thei ding ti a nih.
Scholarship Exam a um ding
CCPur: Directorate of Education (S) Govt. of Manipur chun November 8, 2015 khin examination centre tum tum 13 haiah State Level Talent Search Examination (SLNTSE), State Talent Search Examination (STSE) le National MeanscumMerit Scholarship Examination 201516 buotsai a tum. CCPur district a inthawk hi exama thang nuom han ZEO/CCpur Office ah August 31September 15, 2015 sung Application form lain September 25, 2015 chenin ZEO/CCpur Office ah pelut thei an tih.
SLNTSE hi Govt. Aided le Private Schoola Class IX inchuklai; STSE hi Private schoola Class X inchuklai le National MeanscumMerit Scholarship Examination hi Govt. Schoola Class VIII inchuklai han apply thei an tih.
Headline
Haipou Jadonang thi champha vawi 84-na inser; CM O.Ibobi Singh in Haipao Jadonang lim a hawng
Imphal: Zanikhan Organising Committee of Haipou Jadonang statue & park Development Committee huoihawtnain Haipou Jadonang thi champha a vawi 84na inser a nih. Hi huna hin CM O.Ibobi Singh khuollien le Deputy CM Gaikhangam functional President in an thang a, Ministers, Parliamentary Secretaries, MLAs, Sate Government officials le Zeliangrong mipuihai an thang.
CM O.Ibobi Singh in darsena siem Haipou Jadonang lim feet 9 a insang a hawng. CM in mombati insitin hi hunser hawngna hi a thuoi a, a limah par inhlanna an neizo ah totawkin sunna hunser minute 2 sung hun an hmang. Organising Committee in an buotsai “A brief biography of Haipou Jadonang” ti hmingchawia siem chu CM O.Ibobi Singh in a tlangzar bawk.
CM O.Ibobi Singh in mipui pungkhawm hai hmaa thu a hrilnaa chun, Haipou Jadonang hi Manipur nau pasal le Rani Gaidinliu hi Manipur naunu an nih. Sawrkar thlungpuiin Nagalanda Rani Gaidinliu memorial museum & library bawl a tum chu demin, Rani Gaidinliu hi Nagaland Naga a ninaw a, Manipur Naga a nih. Jadonang hi Zeliangrong hnam hai thuoitu chau ni loin Manipur mihai po po thuoitu a nih. A chanchin hi thi lovin a hringzing a, tawp thei lo a ni a, a thi champha ei inser hin Manipur zalenna dinga an pumpekna a suklang. A chanchin hi NCERT in Class I to X inchuklaihai syllabus a inthangsatir dingin sawrkar thlungpui kuoma ngen a ni ta a, Jadonang chengna khuo a Jadonang Memorial Hall bawla um khawm zo vat dinga hma lak a nih. Rani Gaidinliu lim khawm Imphalah inthut ning a tih tiin O.Ibobi Singh chun a hril. Manipurah Rani Gaidinliu library & Museum khawm indin a ni ding thu a hril bawk.
Jadonang hi Manipur le India zalenna dinga British lo dotu, Kambiron Village, Nungba SubDivision, Tamenglong district a pieng, kum 1931 a kha tuta Haipou Jadonang Park hmuna British sawrkarin a lo khai hlum a nih.
Sawkkhe leh pasal pakhat AR han an man
Imphal: August 28, 2015 khan 24 Assam Rifles han ImphalMoreh roada Khudengthabi Check post hmunah Imphal pana hung Maruti Suzuki sukchawla an dapnaah Sawkkhe grams 220 a rik, Rs. 2 crore manhu an dapdawk a, a neitu Jamdou Haokip (47) s/o (L) Ngamjaheno Haokip of Chavangphai, Moreh Ward No. 7 leh an man a, Forest Department, Imphal kutah an peklut niin AR thusuok chun a hril. Chun, Jamdou Haokip a inthawk hin driving licence 1, SBI ATM card 2, SBI Green Reamed card 1, PAN Card 1 le voter I Card 1 an man sa.
Chun, August 28, 2015 khan 12 Bihar battaqlion of 9 Sector Assam Rifles han Langjing ah PREPAK cadre pakhat M. Ramananda (37) s/o M. Naran of Bijoy Govinda Sagolband, Imphal West District an man a, Patsoi Police Stationah an peklut niin AR thusuok chun a hril.
An nikhat hlaw seng
Imphal: Federation of Government College Teachers Association (FEGOCTA), Manipur chun tuilien leia harsatna tuorhai thangpuina dingin an nikhat hlaw seng thawlawm ding le Manipur Chief Minister’s Relief Funda peklut ding tiin thutlukna an siem.
Commission hmaa inlang dinga ko
Imphal: Kum 2009 a Kh. Ibungo @ Priyokumar fake encounter a kap hlum a nina le inzawmin National Human Rights Commission (NHRC) chun Secretary, Home Department, Govt. of Manipur chu NHRC hmaa inlang ding le Crime Branch in final report le ADM, Imphal in statement a recorded copyhai chawia NHRC kuta pelut dingin a ko.
Irilbung bazarah dawr 11 a kang
Imphal: Zani zingkar inhma tak dar 1:30 vel khan Imphal East district sunga Irilbung Bazarah kangmei rapthlak takel a suok a, Dawr 11 a kang fai vawng. Thil a kangsiet hi Rs. 50 lakh manhu vel ni dinga ring a nih. Kangmei hi electric short circuit lei ni dinga ring a nih. Dawr 11 a kanghai lai hin Dal, Alu, Bemu, Chini le a dang dang zawrna, Hotel le Nga zawrna dawr hai a thangsa.
ImphalMoreh Blockade tawpsan
Imphal: DC, Chandel le SP, Chandel hai inrawinain State sawrkar palai le ImphalMoreh Road Transporters Association thuoitu han zani chawhnungtieng khan inbiekna an nei a, hi taka hin inbiekremna an nei thei ta leiin tiemchin um lova ImphalMoreh Road a blockade/bandh an thaw chu vawisuna inthawk an bandh thaw an tawpsan ta ding a nih. District Administration, Chancel chun Transporters Association thil ngen chu September 10, 2015 chena pek an tiem. An thil ngen chu Moreh buoinaa motor suksieta um neituhai motor siemthatna ding zangnadawmna pek ding ti a nih.
Y. Sanathoi Devi kuomah Arjuna Award
Imphal: Zanikhan Rashtrapati Bhavan, New Delhiah National Sports Day hmang a nih. Hi huna hin President Pranab Mukherjee in National Sports Award, 2015 a sem a, Manipur nunghak Yumnam Sanathoi Devi khawm Arjuna Award inhlan a nih. Sania Mirza chu Rajiv Gandhi Khel Ratna Award inhlan a nih.
Doctorhai pension hun kum 62
Imphal: August 28, 2015 a Manipur Cabinet meeting chun tuilien le mimkei leia harsatna tuorhai thangpuina ding sawrkar thlungpui kuomah fund hni ding, Doctorhai pension hun kum 60 ni hlak kha kum 62 a suksei ding, Assistant Election Supervisor (AES) post 43 siem thar ding le AES lakna digna DPC fe mekah AES 12 lak ding tihai an rel.
Hmarcha Kut hmang a nih
Imphal: Kum tina thaw hlak Hmarcha Kut ni 2 sung aw chu zanikhan Sirarakhong village, Ukhrul Distrct ah nei a nih. Hi kuta hin Manipur a inthawk le state dang danga mihai khawm an hung thang a, Hmarchapui tam takel zawr suok a nih. Sirarakhong Ukhrul District a Hmarchapui hi hmun danga chîng hai nekin a lienin a sei bakah an hnik bik leiin zawr a tla hle niin ei thu dawngna chun a hril.
Manipurah sin zawng 7,29,012 an um
Imphal: Directorate of Employment, Manipur chun June, 2015 chena Manipur state sunga Employment Exchange hran hran haia sin dita hming zieklut 7,29,012 an tling ta a, hienghai lai hin pasal 5,17,594 le nuhmei 2,11,418 an um. Imphal Westah 1,90,567 (pasal 1,24,001 le nuhmei 66,566; Imphal East ah 1,16,452 (pasal 82,284 le nuhmei 34,168); Thoubal 1,22,611 (pasal 96,080 le nuhmei 26,531), Bishnupur 70,154 (pasal 52,035 le nuhmei 18,119), Churachanpur 73,045 ( pasal 53,506 le nuhmei 19,539), Ukhrul 29,447 (pasal 200,499 le nuhmei 6,321) ; Chandel 30,859 ( pasal 21,071 le nuhmei 9,788) ; Piengphunga ruolbanlo 2,736 ( pasal 837 le nuhmei 899) le UEI & GB 6,625 ( pasal 3,071 le nuhmei 3,554) an nih.
Nuhmei naupang 2 nunrawng taka that
Aizawl: August 28, 2015 khan Mizorama Chhingchhip venghluna khaw mi, unau nuhmei naupang pahni Mary Lalremruati (6) le Maria Vanlalhmangaihi (3), Pu Kawldinga nauhai chu nunrawng taka that an nih. Mary Lalremruati hi saruoka hmu a ni a, suollui hnunga that niin an lang. Tuolthattu ni dinga ringhla Lalchhantluanga (18), Chhingchhip khaw mi tho chu a tlan hmang a, khawtlang mipui le Police han man tumin an zawng mek.
Mizoramah Kristien 87.16%
Aizawl: India rama kum 2011 a intiempui dungzuiin Mizoramah mihriem 10,97,206 an um a, hienghai laia 9,56,331 hai chu Kristien an ni a, mihriem um zat po poa inthawka sutin Mizorama Kristien umzat chu 87.16% an ni a, Buddhist 40,797 (8.51%); Hindu 30,136 (2.76%); Muslim 14,832 le Sikh 216 (0.02%) an nih. ST 10,36,115 le SC 1,218 an um. Any Mizo (Lushai) Tribe 7,34,910 an um a, a tam tak an nih. Literacy rate 91.33% a nih.
Rs. 125 thir siem tum a nih
New Delhi: Bhim Rao Ambedkar kum 125 tling hrietzingna dingin sawrkar thlungpui chun Rs. 125 thir (Coin) siem a tum a, hi thua hin Finance Ministry le Social Justice Ministry hai chun thil thaw dan ding an hriltlang mek a, hi huna hin pawisa thir hmelput dan ding le a hlutna hai a thangsa. Hi pawisa thira hin Bhim Rao Ambedkar lim inchuon sa ning a tih tiin Union Social Justice Minister Thaawar Chand Gehlot chun a hril. Bhim Rao Ambedkar kum 125 champha hi kum khat sung hmang dinga riruong a nih.
AIMTC in Oct. 1 a inthawk nuorna
New Delhi: October 1, 2015 a inthawk khin All India Motor Transport Congress (AIMTC) chun hun tiemchin um lovin India ram pumpui huopin an sinthaw chawlsana nuorna nei an tum thu an puong. AIMTC a hin Truck neitu nuoi 93, Bus neitu nuoi 50 le tourist operator hai member in an thang a nih. An thil ngen Union Transport Ministry in a sukpuitling pek naw leia nuorna nei an tum niin AIMTC thusuok chun a hril. An thil ngen hai lai toll tax lak suktawp le Tax deduction at source (TDS) hai niin Bhim Washwa, President, AIMTC chun a hril.
APJ Abdul Kalam Road a thlakthleng
New Delhi: Zani hmasa khan New Delhi Municipal Council (NDMC) chun Aurangzeb Road chu APJ Abdul Kalam Road tia thlakthleng dingin thutlukna an siem. Mipuia inthawka ngenna a tam leia hi thil hi thaw niin Karan Singh Tanwar, Vice Chairman, NDMC chun a hril. NDMC a member le Delhi CM Arvind Kejriwal khawm hi thil thawna dinga thutlukna siem huna hin an thang ve. Dr Kalam hi ‘Missile Man’ tia ko a ni hlak.
Indian Railway in online hmangin
New Delhi: August 26, 2015 a inthawk September 4, 2015 inkar sungin Indian Railways chun Senior Section Engineer le Junior Section Engineer post 3,273 lakna dingin online a hmang tan a, mi nuoi 18 in hnina an peklut ta a, Indian Railways in online hmanga sin ruok a lak tan hmasatakna a nih tiin Railway Recruitment Board (RRB) thusuok chun a hril. Online hi sin ruok dang lakna haia khawm RRB chun a hmang pei ta ding a nih.
Death Penalty thuah Draft report
New Delhi: Union Law Commission chun Death Penalty chungthuah Draft Report phek 272 zeta sei a siemzo ta a, hi Commission memberhai kuomah a semsuok ta a, hi draft report hi haptakar thar tieng khin sawrkar thlungpui kuomah pelut a tih. Terrorist thi dinga Court in thiemnaw an changtir ti lo hai chu death penalty thaw le pek ta lo dinga recommendation draft report a hin a thangsa nia hril a nih. Khawvel rambung tum tum hai laia rambung 60 in Death Penalty hi an la hmang a, chu hai lai chun India ram khawm a thang ve a nih.
Tribal nilo hai inthangtir lo dingin
Tura: Garo Hills Autonomous District Council election hung um dinga hin Garo Students Union (GSU) chun tribal ni lohai chu inthangtir lo dingin sawrkar kuomah ngenna an siem. Hi thil hi NCP Meghalaya a Minorities Cell Chairman, Islam Haque Choudhary chun tha ti lovin dodalna thu DC, Garo Hills district kuomah ziekin a pek.
Army campa bomb puokah sipai 12 hliem
Srinagar: Zanikhan Jammu & Kashmir a Army Campah bomb a puok pal a, sipai 12 an hliem a, 92 Base Hospital, Badamibagh Cantonment panpui an nih. Hliemhai laia mi 7 an hliem inrik leiin admit le sipai 5 dang hai ruok chu first aid pek anni hnungin insuoktir nawk an nih. Bomb hi Core Battle School CBS), Khrew, Pulwama district a puok a nih.
Bihara student han Credit card le Rs. 4 lakh loan
Patna: Bihar Chief Minister Nitish Kumar chun zanikhan five yer “Vision Document” a tlangzar a. Bihar Assembly election hung um dinga hin sawrkarna siem thei khawpa thlanglal nawk an ni chun a state sunga sawrkar sin 35% nuhmei hai huol a ni ding thu; student class XII le a chungtieng zo hai inchukna insanglem nei theina dingin 3% subsidya Rs. 4 lakh chen loan lak theina ding Credit Card tlangzar a ni ding thu a thang. Hi baka hin Bihara Colleges le Universities tinah WiFi a thlawna pek an ni dign thu Nitish Kumar chun a hril bawk.
NDFB(S) cadre 2 kap hlum
Guwahati: Zani zingkar inhmatak khan Army le Police thangruol han Chirang district, Assama Oxiguri khuoah dappui an thaw a, NDFB(S) pawl leh an inkaptuo a. Inkaptuonaah hin NDFB(S) cadre pahni, Gwndai le Junthi hai an kap hlum a, an kuta inthawk M16 Rifle pakhat le a magazine pakhat, AK47 Rifle le a magazine le Pistol pakhat hmu a nih tiin Police thusuok chun a hril. Anni pahni hi December 23, 2014 a Adivasi hawnkhat kap hlumna le Class X inchuklai Priya Basumatary kap hlumnaa thang niin L.R. Bishnoi, IGP, BTAD chun a hril.
Rangkachak kg. 7 lain an tlan hmang
Unao: Zanikhan misuol, SUV car a chuong le silai chawi han Sequel Logistic Privte Limited, Ahmedabad Van chu an hnawt a, FI Logistic Medical and Research Centre, Bajhera khaw bula an hnawt phak a, Van driver Harichand Yadav (30) le security Guard pakhat an kap hlum a, Van sunga rangkachak kg. 7 chuong an lak hnungin an tlansan nawk. Van a chuong mi pakhat chu him le damin a suok hram a, hi thil tlung hi Sohramau Poilce stationah report pek a nih.
Assam state a pakhatnain an thang
Guwahati: Kum 2014 sunga India rama nuhmei chunga suol thaw tamna tak chu Assam a ni a, hiengang case hi 19,139 a um niin National Crime Records Bureau (NCRB) thusuok chun a hril. Crime Against Women cases 19,139 hai laia 5,307 chu sex thil, cases 9,626 chu nuhmei chunga an pasal le an sunghai nunrawngna le cases 3,895 chu inthuoihmangna le nuhmei suolluina cases 2,047 a um tiin NCRB thusuok chun a hril.
---------------------------------------------------------------------------------------------------------------------
VAWISUN THUPUI
I lei chu suola inthawkin vengtha la, I hmur chu hlemna thu hril lo dingin. Suol chu fe san la, thil tha thaw rawh; Inremna zawng la, a hnawtin hnawt rawh. Sâm 34:1314
Editorial
Chona tha le lawmum a nih
Manipur Truck Owners Welfare Association (MTOWA) President, H. Ranjit chun, sawrkarin remtina le phalna a pek phawt chun ImphalJiribam Road a Tuiruong (Barak) leilak tha naw chu an pawlin Rs. 9/10 lakh seng tul sienkhawm siem that an nuom thu le ni 2 sunga Motor lien hai hraw thei dinga an siem zo hman ding thu zani hmasa khan MTOWA Office, M.G. Avenue, Imphal a Chanchinbumihai an hmupui huna a hril. Hi lampui siemtu Border Road Organisation (BRO) chun hi leilak siemzona ding hin ni 12 sung hun a lut ding niin an hril. Hieng laizing hin BRO chun hi leilak siem thatna sin an la thaw ‘an naw a, an la tosan veng veng el a nih. MTOWA thusuok hi ‘chona tha le lawmum’ a nih. Amiruokchu, sawrkar thlungpui, state sawrkar le BRO hai ta ding ruok chun muolphona le thil inzakum tawpkhawk a ni thung.
August 26, 2015 nia Moirangthem Asnikumar, General Secretary (Administration), BJP Manipur in Imphala Chanchinbumihai an hmupui huna khan Ministry of Road Transport & Highway (MORTH) in National Highway No. 37 (ImphalJiribam road) siemthatna dingin kum 201516 sunga dingin Rs. 111.62 crore lai zet a sanctioned ta thu le NH37 hi Prime Minister, Narendra Modi 100 Days programme a thangsa a ni a, an leh hieng zozai pawisa hi Manipur state sawrkar kut a la hungtlung naw a ni ding? Annawleh a thu mei mei, a tak tak ni lo a ni dim? tihai hi Manipur mipuihai ta ding chun indawnna siem lo thei lo a nih.
Centre a Narendra Modi PM nina le BJP thuoina hnuoia NDA sawrkar hlak chu ni 100 el chau ni ta lo, ni 425 chuong zet a ni ta a, chu hnunga khawm NH37 siem thatna ding pawisa sangsawna um hi hmang lova la um am ning a ta? NH37 in siem that ngai ngawi ngawia a um lai meka iengleia BJP Manipur in Centrea an hotulienhai kuoma NH37 siemthatna dinga rawl an zu nei naw? Rawl an insuo a hun hle. Manipur a O.Ibobi Singh CM nina hnuoia Manipur a Congress sawrkar a chau ti ringawta an dem hi an thaw thei tawk a ni ding? Annawleh BJP khawm hi mipui innghatna le ringzotlak a ni ve naw a ni ding? Tawngbau ringawt le insawisel ringawt hi chu mipuihai ta ding chun fak le lem an tak deu a nih.
NH37 chau ni loin MORTH chun NH2 (ImphalMao) siemthatna dingin Rs. 47.64 crore, NH102 (ImphalMoreh road) le Lokchao leilak siemthatna dingin Rs. 37.18 crore le Singjamei Lilong (NH2) ma siemthatna dingin Rs. 56 crore a sangsawn niin Moirangthem Asnikumar in a hril a. Hieng pawisa hai khawm hi Manipur a la hung tlungnaw a ni ding? Lokchao leilak sie leiin motor lienhai ImphalMoreh fe thei lovin an um ve mek a, hi lampui khawm hi siemthat tul ngawi ngawi a nih. Nisienlakhawm tuchen hin siemthat lovin a um a, ieng huna siemthat am a ni ding tiin mipui chun nghakhla takin an lo thlir a nih.
Thiltha tieng thawna dinga inchona hi chona tha le chona lawmum a ni leiin Political party hran hran le sawrkarna cheltuhai hi chona thain incho hai sienla chu ei ram le ei hnam hi tuta ei ngirhmun ang chau hin um ta nawng ei ta, ram le hnam hmasawn ta hai elphakin, an ngirhmun ang charah um em naw inlakhawm a mawitawk annawleh a awmtawk ngirhmuna ei um ta ngei ring a um. Politics a chirhak inthekhum, inhrilsiet le indem nekin Political party tum tum hai hin thiltha thawin incho ta lem hai sienla nuom a um.
Chun, mimal, khawtlang, kohran pawl hran hran, hnam tum tum hai khawm hi a tha nawzawnga incho nekin a tha zawngin incho lem ta inla nuom a um. Thiltha tienga ei incho a ni phawt chun ei mimal, ei pawl, ei kohran, ei khawtlang, ei hnam le ei rama hin inremna, muongna le hmasawnna hung intlun ngei ngei a tih. Hnam var, ram hmasawn le changkang ei tihai hi thiltha thaw, thangpui ngaihai thangpui a inel le incho an nih. Ram hmasawn le hnam inthanglien, mihai inza le ngaisang nina ding chun thiltha thaw le chona thaa incho hai hi a lampui umsun le a damdawi thapa tak an nih.
