Responsive Ad Slot

HSA Serlui Block Conference vawihnina ropui taka hmang

Saturday, August 22, 2015

/ Published by VIRTHLI
Vairengte, August 22,2015 (Virthli News): Hmar Students' Association (HSA) Serlui Block Conference a vawihnina chu IOC ground, Vairengte hmuna ropui taka hmang zo alo ni ath. Hi Conference a hin HSA Serlui Block hnuoia Unit 15 hai bakah Mizoram sunga hmun dang danga inthawkin an fekhawm. Assam tienga HSA thuoitu thenkhat le HSA General Headquarters thuoitu hai khawmin an hung uop bawk a nih.  Hi Conference sung hin mipui an thahnem hlea hall lien tawk taka bawl a nia chu hall i kenglo tawk mipui an um zing a nih.


Serlui Block Conference hi 19th August, 2015 a inthawk khan tan niin 21st August,2015 zan chen kha hmang a nih. Hi Conference  huna hin Pi Zohunmawii, President, HSA Kolasib JHQ, SK Sinha, Jail  Superintendent, Kolasib le H. Lalnunmawia Hmar hai hmang an nia, Pu  Hmingchunghnung, Chairman, Sinlung Hills Development Council le Dr.  Chaltawn Lien Amo, MLA & Chairman, Hill Areas Committee, Manipur hai ruok chu buoina  dang an nei leiin hi hun hi an hung hmang thei naw a nih.

Special Guest in Pu Lalmuanpuia Punte, Vice Chairman, Mizoram Hmar Welfare Committtee le Tv. Lalringum Riengsete, Dy. Secretary HSA GHQ hai hmang an ni a,  hi huna guest dinga fiel Dr. John H Pulamte, President, Hmar  Inpui GHQ khawm Manipur buoina leiin a hung thei naw bawk a nih.

A nikhat zan (19th August,2015) hi Conference hawngna le Unit report hai ngaithlakna huna hmang a ni a, a nihni ni (20th August,2015) na hi Rorelna huna hmang a nih. A ni tawpni hin Serlui Block term 2015-2017 sunga thuoitu ding hai thlangna nei a ni a, hi ahnuoi hai hi thlangtling an nih.

President: Pu Lalruotlien Inbuon, Saipum
Vice President:  Tv. CThangngur Keivom, Saiphai
Secretary: Pu Lalparsang, Vairengte
Asst. Secretary: Pu Lalthlirlien, Saiphai
Finance cum Treasurer: Pu Remseng, Phainuam

Hi Conference huna hin khuollien haia inthawkin hnam politics le inchukna tieng le inzawmin thu ngai nuom um tak tak hai ngaithlak a ni hlaka, a zana hai prokram nei zie ani bawk. Sun le zan huna hai ei hlasakthiem inlar tak tak le Pu Laltuoklien Hmar (Pistol Puokruk), Iris L Buongpui, Haflong,  Zokhumthang, Saiphai, Lalngaikim, Lamthar, Lalnghetlien, Saipum, Lalditlien Lungtau, Saiphai, Jessica Thiek le local artiste haiin mipui an inawi bawk a nih.

Pic: Joseph Darngawn, Virthli Admin, Barak Valley















Don't Miss
© all rights reserved
made with by Simon L Infimate