Tuolsung
Tuilien tuor hai thangpuina pek
CCPur: Kuki Khanglai Lawmpi (KKL) Gen. HQ chun 1st phasea Joumol khuoa mimkei nasa tak tlung leia thangpuina an pek hnungin zanikhan 2nd phase a dingin tuilien leia harsatna tuortu hai ta dingin thangpuina an pek. Tuibuong areaah In 10 vel hai kuomah Bufai bag 1 seng, Haopi areaa In 79 haia ding bufai bag 79, Makhau areaa In 43 a ding bufai 43 leh Chandel districta Molnom khuoa ding bufai bag 69 le thil tum tum an pek a. Hieng relief material le Relief Team chu zani zingkar 9:00AM khan KKL Complex, IB Roadah Pumtulthang, MDC, Sangaikot in a vailiem.
PLA/RPF cadre 1 AR han an man
CCPur: August 20, 2015, 3:00AM khan 7Assam Rifles han Zouveng Khuga Tampak hmuna PLA/RPF cadre ni dinga ringhla Ningthoujam Basanta @ Chinglem Khamba (35) s/o (L) N. Pishak of Ningthoukhong Mamang Leikai, Bishnupur District, tuta Zouveng Khuga Tampak a um mek chu an man a, Police kutah an peklut. CCPur Police chun FIR No. 67 (8) 2015 CCPPS U/S 20 UA (P) A. Act an registered khum bakah JMC/CCPur hmaah an inlangtir a, Court chun Aug. 26, 2015 chen Police Custodya la um phawt dingin a rel.
Manmasi Digest a suok nawk tah
CCPur: CCPur thangsana insuo Manmasi Digest JulyAugust, 2015 issue chu inchawk thei dinga sut zo nawk a ni tah. NSCN (IM) & India Govt. Peace Accord, Sinlung Express Band bichiengna, First Intl. Muaythai Refree Samuel Lalrozama Hmar; God’s Unfailing Love for the Manassesh People; Top officials in India le a dang dang tiem ding a um. Lekhabu zawrna leAgent hai kuoma inthawk hmu thei ning a tih.
Pasal pakhat kap hlumsaa hmu nawk
CCPur: Policea inthawk ei thu dawngnain a hril danin Aug. 20, 2014 zan khan Doungam Mate (28) s/o (L) Tonglet Mate of Lhajangphai chu tu ti hrietlo han Koite area lai an kap hlum a, zanikhan District Hospital Morgueah postmortem thaw zo a ni hnungin a ruong hi a sunghai kuta inhlan a nitah.
Ei thu dawngnain a hril danin Doungam Mate hi zani hmasa zana ina inthawka suok a ni a. Aug. 20, 2015 zan dar 10:00 vel khan Patlen le Gamnom khuo inkar lampui lai mithiruong a um thu Gannom khaw mi han hriein KKL an inpun nghal a. Chu huna mithi hi Doungam Mate a nih ti hriet a ni a, KKL, Lhanjangphai Lal le mipuiin KKL Ambulance hmangin mithiruong hi a in an phurtlung a, zan an mengpui hnungin Policeah report an pek a. Zani zing dar 8:00 vel khan Police han postmortem thaw dinga va lain District Hospital Morguea an sie a nih. Doungam Mate hin a nuhmei Lamneikim bakah nau nuhmei 2 le nau pasal 1 a thisan. Doungam Mate hi KNA(I) a thang niin ei thu dawngna thenkhat chun a hril. Hi thina thua hin Police chun FIR No. 69 (8) 2015 CCPPS U/S 302/34 IPC & 25 (1C) Arms Act an registered.
Dr Lalzarzolien Saiate training in
CCPur: State Health Society, NRHM, Manipur in Dr Lalzarzolien Saiate le Dr M. Neison Kom hai chu Shivpuri, Madhya Pradesh ah naute pieng hlim hai enkawl dan training dingin a tir a, hi lei hin August 2428, 2015 inkar sung chu an umnaw ding a nih.
DC Hospitala enkawl
CCPur: Mr Lunminthang Haokip, DC, CCPur chu sungkhaw le blood sugar insang leiin zani hmasa zana inthawk khan District Hospitala admit le enkawl a nih.
Bike inrutu a Bike inruk leh man
CCPur: August 19, 2015, 10:00 AM vel khan New Lamka JB School Campusa inthawk Apache Bike 150 (No. MZ01B0660) chu inrukhmang a ni a. Bike inhmang an suizuinaah ZRA town duty han an rutu Kamgoulian Neihsial (18) s/o Mangtinlal Neihsial of Gangpimual chu Aug. 21, 2015, 10:00AM vel khan Mr Kamgoulian hin Workshopa a motor inruk an enfel tir laiin an man.
Mr Kamgoulian chun, New Lamka JB Schoola inthawk Bike hi inrua, Dorcas Road zuiin, Ngathal workshopa a sie niin a hril a. Tuta hma khawm khan District Hospital campusa Activa motor Mr Chinkhanhau of Vengnuam leh thangruola inruin Kwakta hmuna inruithei zawrtu Ima an ti kuomah Rs. 25,000/ in an zawr a, hi huna hin Ima hin Rs. 20,000/ a lo pek a, a dang Rs. 5000/ ruok chu Activa inhmang Police han an hriet ta leiin an va lak ngam tanaw niin a hril. Tangnuam khuoa Nengzathang hai puon khawm 3 lai an inruk ta thu le a, thil inruk hi New Bazara Alu zawr Meitei nupui hai kuoma Rs. 5100 in an lo zawr ta niin an puong bawk.
Mr Kamgoulian hi ZRA chun tha taka thu hrila ain intiemkamtir hnungin an inthlasuok nawk a, Bike hi a neitu Lalmuanpuia of Thingkangphai kuomah an inhlan.
Claim & Objection thaw thei
CCPur: District Council, CCPur hnuoia Assistant Teacher hai seniority list December 31, 2009 dungzuia siem a ni a. Suksuol le thaw suol pal um thei a ni a. Hi le inzawm hin claims & objection thaw nuom han document kim taka chawiin August 28, 2015 chenin CEO/ADC kuoma peklut thei ning a tih.
Musical Road Show an nei
CCPur: India le Myanmarram haia tuilien tuortu hai thangpuina dingin Zomi Relief Committee (ZoREC) chun zani zantieng 3:30PM khan Tuibuong le Rengkai Bazar haiah Musical Road Show an nei. Hi huna hin Zomi Idol Nk. Lawmnakim Hrangate thangin hlasakthiem dang dang han hla an sak. Hi huna sound system chu Mangboi of Bungmual in a thlawnin an hmangtir.
Headline
Manipurah President Rule sie tumna a um nawh: Kiren Rijiju
Shillong: Tulaia Manipura Law and Order ngirhmun tlangpui um dan le inzawm hin Manipur President Rule hnuoia sie ning a tim? tia zanita Shillong hmuna Journalists han indawnna an siem dawnin Union Minister of State for Home Kiren Rijiju chun, sawrkar thlungpuiin Manipur State President Rule a sie tumna riruong a nei naw a, nisienlakhawm Central Paramilitary Force ruok chu sie belsa dingin thutlukna a siem ta a, Manipur chu President Rule hnuoiah la sie nawng kan tih tiin a hril.
Manipurah Autonomous District Council election neizo chau a ni a, election chu hlawtling taka nei a ni a, Manipur ngirhmun chu a la tha tawk. Amiruokchu, Security ngirhmun chu ngaimaw a nih. Assan chu, a pangngaia a la u m naw leiin. Joint Committee on Inner Line Permit System (JCILPS) hmalaknain Civil Society Groups 30 velin Inner Line Permit System (ILPS) ngennain beipui an thlak a, law and Order ngirhmun chu a suksiet pha. Inner Line Permit (ILP) chu India khuo le tui, khapna (protected/restricted) biel huop sunga an inzin ding huna sawrkar thlungpuiin an inzin theina dinga official travel document a pek hlak, hun tiemchin um a nih tiin Kiren Rijiju chun a hril.
Sawrkar thlungpui chun Manipurah venghimtu (Assam Rifles) thawnlut belsa dinga thutlukna a siem tasa a ni a. India le Myanmar ramri zula um hai chu a hma neka Myanmar ramri hnai le depa um dinga thu pek an nih. India le Myanmar inkara ramri um hi Km. 1,643 a sei a ni a, ramri dai siem zo a la ninaw leiin a lan hawng huou el a nih. Hi lei hin ramri dep ela um dingin Assam Rifles Battalions 46 um hai laia battalions 15 hai chu Myanmar le ei ramri zula sie an nih tiin Kiren Rijiju chun a hril.
Naupang 3 tuiah an tla hlum
Imphal: Zani zantieng dar 3:30 vel khan Bishnupur District a Kumbi Police Station huop sunga um Kumbi Khujumantak an ti hmuna nuhmei naupang 3, kum 6, kum 10 le kum 12 mihai chu tuiah an tla hlum. Hieng nuhmei naupang 3 hai hi unau vawng ann i a, an sang a chin tak tuiah a tla lut a, sansuok an tumna lama tuia tla hlum vawng an nih. Naupang 3 hai ruong hi postmortem thaw dingin Imphal tieng phur an nih.
Manipur President Rule hnuoia sie dingin
Imphal: Tulaia Manipur a JCILPS hmalaknaa ILP ngenna thu le inzawmin buoina le harsatna tam takel an tlun pha a, Manipura Law & Order ngirhmun khawm a suksiet pha bawk bakah tribal mipui han an tuorhla hle a nih. Chuleiin Manipur chu President Rule hnuoia sie ni raw seh tiin All Tribal Students Union Manipur (ATSUM) chun PM kuomah ngenna an siem. August 20, 2015 khan ATSUM chun PM Narendra Modi kuomah Memorandum an pek a,ATSUM President Muan Tombing le General Secretary Vareiyo Shatsang han Memorandum a hin suoi an thaw. Memorandum a hin JCILPS hmalaknaa ILP ngenna leia nuorna le h elna chi tum tu m leia tribal mipui han harsatna chi tum tum an tuok hai an zieklang bakah ILPS thua buoina suok chu President Rule chauin a chingfel thei ding a nih tiin an zieklang.
Morehah Curfew hlip a la ni nawh
Imphal: Moreh a chun zing dar 5 a inthawk zan dar 7 chen Curfew inthlazal a ni a, Curfew hlip a la ninaw a, vawisun khawm hin 5AM7PM inkar sung inthlazal nawk a nih. Cufew hlip a ni sung hin Moreh a dawr tam lem hawng a la ninaw a, Namphalong Bazar khawm khar a la nih. Moreh town sunga mihriem invak vel khawm an la um meu naw niin ei thu dawngna chun a hril. State sawrkarin nundan a pangngai nawk tah tiin hril sienkhawm a sungril takah buoina boruok a la sosang hlea hril a nih. Zana khawm silai puok ri hriet a nih. August 18, 2015 nia Moreh buoinaa khan mi 4, Lalminlen Zou (35) of Moreh Ward No. 7, Hougunlen (25) of Moreh Ward No. 1, Lalminlen (28) le Seingam (24) of Chawangphai hai chun silaia kap hliemna an tuok a, firstaid an pek niin Assam Rifles thusuok chun a hril. Moreh a hin DC, Chandel le Police Officer lien hai an lan camp zing.
Manipurah UAPA cases 630
Kolkata: India ramah kum 2014 khan Unlawful Activities Prevention Act (UAPA) cases 975 registered a ni a, hienghai laia UAPA cases 630 chu Manipur a registered an nih. India rama UAPA cases registered tamna tak chu Manipur a nih tiin National Crime Records Bureau (NCRB) thusuok chun a hril. Kolkata a um human rights activist Sujata Bhadra chun UAPA hi “Draconian Act”, Rowlatt Act neka tha lo a nih tiin a hril.
Union Home Minister thangpui a tiem
New Delhi: Union Home Minister Rajnath Singh chun zanikhan Assam rama tuilien chungthu a ennawn a, Assam CM Tarun Gogoi chu telephone hmangin a hung phone a, tuilien leia harsatna tuorhai, sawmdawlna le sansuokna sin thawna dingin Central Assistance pek anni ding thu a hung hril. Assam state a tuilien zuolkaina hi district 13 a ni a, mi nuoi 3 velin harsatna an tuok pha mek. Rajnath Singh chun Central thangpuina Tarun Gogoi kuomah pek ngei a ni ding thu a tiem bawk.
Anna Hazare “Z” Plus category
Mumbai: Social Activist Anna Hazare chun that dinga vauna le inthina a hmu belsa pei leiin Maharashtra sawrkar chun “Z” Plus Category security a pek. That dinga vauna hi Osamanabad, Maharashtra a intahwka a hmu a ni a, vauna lekha a chun Delhi CM Arvind Kejriwal an thlawppuina tawpsan dinga ti a nih. Delhi CM an thlawppuina a tawpsan naw chun an that ding niin an vau a nih. Chun, kum 2 liemta a Punea Narendra Dabholkar thil tuok ang kha a tuok ding niin vauna lekhaa chun an ziek.
Bank thawktuhai 2nd le 4th Saturday chawl
new Delhi: Sawrkar thlungpui chun Bank thawktuhai ta dingin thla tin Second Saturday le Fourth Saturday hai chu chawl ni ta dingin a puong. Hi thil hi September 1, 2015 a inthawk hmang tan ning a tih. Chawl belsaa um hi Bank thawktuhai ta dingin phurrik le sin zangkhaina a hung ni ding a nih tiin C.H. Venkatachalam, General Secretary, AIBEA chun a hril.
Kasab thi dinga reltu a pension tah
Mumbai: Mumbaia bomb a zawna sukpuok a nina le inzawma a lusa taka intum Pakistan terrorist Mohammed Ajmal Kasab thi dinga thiemnaw inchangtirtu Justice M.L. Tahilyani chu zanikhan a sin, Mumbai High Court Judge a inthawk a pension tah. Judge sin hi kum 28 lai zet el a thaw hman. Kum 197 khan Metropolitan Magistrate, Badra sin a chel tan a, hi taka inthawk hin Court hran hran haiah Judge sin a thaw a nih.
Chance pek belsa an nih
New Delhi: Kum 2011 a Civil Services Preliminary examinationa thang dinga hnina pelut sia exam thang ta lo hai chu vawikhat, tukum hin exam theina chance pek nawk dingin Central Administration Tribunal chun a rel. Kum 2011 Preliminary exam dinga khan mi 4,72,290 in exam dingin hnina an pek a, 2,43,003 an exam a nih. UPSC Notification dungzuiin General category han vawi 6 (6 attempts) phal pek an nih.
Assamah Car chin zawr le registered khap
Guwahati: Assam state ah Car chin chi, kg. 1,500 hnuoitienga rik, Crash le safety tests norms tling lo hai chu Gauhati High Court in zawr le register thaw thei ta lo dingin khapna Order an siem niin Agencies thusuok chun a hril. Khap (banned) a um Car model hai lai Maruti Suzuki Alto; Maruti Suzuki Swift; Hyundai i10, Hyundai EON, a suok thar Honda Jaza le a danghai a thangsa. Hi khapna hin SUVs le a tha lem hai chu huomsa naw nih. Sawrkar thlungpui khawma Auto Manufacturers hai chu motor chin, ke pali nei hai chu pesuok le zawr suok ta lo dingin thu a pek.
Pasal pakhat RDX leh man
Ranchi: Zani hmasa khan Jharkhand state khawpui Ranchi sunga Kita Railway station bulah pasal pakhat, Intezar Ali an ti chu RDX grams 500, bombs 6, Gelatin tluon 24, timers 6 le lekha pawimaw thenkhat leh Police han an man a, thu indawnna Police, Army le Intelligence Bureau han an nei mek tiin Jharkhand Police spokesman S.N. Pradhan chun a hril.
Purunsen man a kaisang
New Delhi/Nasik: Tulai hin Purunsen man a kaisang hrat hle a, New Delhi a chun Kg. 1 ah Rs. 80 a ni a, Nasik, Maharashtra a chun Rs. 100 a tling phak niin ei thu dawngna chun a hril. Churachandpur, Manipur a khawm Purunsen hi kg. 1 ah Rs. 80 a zawr a nih.
Nuhmei han vote neiin an ngir ve thei ding
Riyadh: December, 2015 khin Saudi Arabia rama chun inthlangpui a um ding a ni a, hi election a hin nuhmei han vote neiin an thlak thei ta ding bakah inthlangnaa khawm an ngir ve thei ta ding a nih. Saudi Arabia rama nuhmei han vote an nei le thlak le electiona an ngir theina ding thu hi kum 2011 a Saudi Arabia Lal (King) Abdullah in a lo puong ta a nih. Municipal Election a ngir ve dingin nuhmei 2 in an hming an peklut tah.
Modi le Obama han hotline an nei tah
Washington: India Prime Minister Narendra Modi le US President Barack Obama han inbiekpawna ding hotlines an nei tah. Hotlines tulai hnai ela siem a ni thu Peter R. Lavoy, Special Assistant to US President le senior director for South Asian Affairs, National Security Council, White House chun a hril a, sienkhawm Mr Obama le Modi hai chun tuchena hin hotline hi an la hmang hri naw niin a hril. Hi thil hi rambung thuoitu pahni han thu pawimaw thil haia an inbiektuona dinga siem a nih. January 26, 2015 India Republic Daya thang dinga US President Barack Obama India rama a hung inzin huna kha Obama le Modi han hotline nei dinga an lo remti ta a nih. Russia, Great Britain le China hai khawmin US le hin hotline an nei ta a, India chu US le hotline nei khawvel rambung a palina a ni bakah India ta ding chun head of state le hotline a nei hmasatakna a nih.
Kum 2004 khan India le Pakistan chun foreign secretaries level –a hotline nei ding le kum 2010 khan New Delhi le Beijing chun foreign minister levelah hotline nei dingin an lo remti ta bawk. India le Pakistan inkara hotline chu US military thangpuinaa siem a ni a, India le China hotline nei ding ti chu sukpuitling a la ni nawh.
Taslima Nasreen Visa kum 1 dang suksei nawk
New Delhi: Bangladesh a inthawka hung tlansuok (exiled) a um lekhabu ziektu Ms Taslima Nasreen (52) Visa chu zanikhan Home Ministry in kum 1 dang a suksei pek nawk. Taslima in India rama a la um theina dinga a visa suksei pek dinga India sawrkar kuoma a ngen hnunga Home Minister Rajnath Singh in a Visa hi kum 1 dang suksei a remti pek a nih. A visa kum 1a sukseina hi July 23, 2015 a inthawk hmang tan ding a nih tiin Home ministry official thusuok chun a hril. Hi chungthua hin Ms Taslima chun lawmum a ti thu a hril.
Taslima Nasreen hi kum 1994a fundamentalist group han that dinga an vau leia Bangladesha inthawka exile a um tah a nih. Ama hi Sweden ram mi nina (citizenship) nei niin kum 2004 a inthawk India rama a um theina dinga a Visa hi kei sei pek peia um a ni a, kum 2014 khan sawrkar chun a visa hi kum 1 a lo suksei pek ta a nih. India ram chau ni loin US le Europe haia khawm a lo um ta hlak a, sienkhawm India ram, a bikin Kolkata hmuna um a nuom a nih.
Biharah nuhmei 4 tuiah an tla hlum
Dehrionsone: Zani hmasa khan Bihar state a Rohtas district sunga Sone vadungah lawng pakhat tuoksiet a tuok a, nuhmei 4 tuiah an tla hlum a, mi 5 an inhmang a, mi 5 sansuok an nih. Mithiruong 4 hai hmu anni ta a, mi 5 hai ruok chu hmu an la ni naw a, zawng mek an nih. Nupui pakhat chu damin vakam an hlieu kai.
Ranil Wickremesinghe in SL PM in sesamna
Colbombo: Zanihan Ranil Wickremesinghe chun an President Maithripala Sirisena hmaah Sri Lanka Prime Minister thar dingin sesamna a nei. Ranil hin Sri Lanka Prime Minister sin a chel vawilina a ni tah. Sri Lanka Parliament seats 225 umah Ranil u mna party chun seats 106 an lak a, party mala a hrat tak anni a, rorelna chellai mek United National Party le Sri Lanka Freedom Party hai chu thangruolin sawrkarna an siem a nih. India PM Narendra Modi chun Ranil Wickremesinghe hi a lawmpui thu le hmatieng peia khawm hlawtlingna chang pei dinga ditsakna an hlanna thu a thawn.
---------------------------------------------------------------------------------------------------------------------
VAWISUN THUPUI
“Hi hairawi hin an bauin an mi chawimawi a, An lungril ruok chun an mi hlat sih a. Iengkhawm ni sienla, an inchuktirnaah mihriem thupek an inchuktir leiin, An mi biek hlak hi a thlawn el a nih,’ tiin,” a ta, a dawn a.
-Mathai 15:89
Editorial
Thuoitu le mipui han hril le ngen ei nei ve a tul
Tulai hin Manipurah Inner Line Permit System (ILPS) ngenna a huongintau a, state sawrkar khawm nasa takin a sukluhai a, a state sunga mipuihai khawm nasa taka sukbuoiin harsatna chi tum tum an tlun pha bawk. JCILPS hmalak dan le an inkhawmpuinaa an thu relhai ei en vang vang chun an thil ngen le hmalakna hi tawpsan el an tum naw niin an lang. ILPS ngenna lei hin buoina le harsatna intlun tanaw nih ti thei chi niin an lang nawh. ILPS hi Manipur a hnam chitin reng cheng han ei hnawl naw a, tha ei titlang seng ring a um. Amiruokchu ngaituo um em em le ngaimaw um em em chu ILPS le inzawma Bill/Act siem ding hi a nih.
ILPS le inzawma Bill/Act thar siem ding chungchanga hin Manipur a cheng tribal mi, Manipur mi ni ve hai hin hril le ngen ei nei ve a tulin a pawimaw hle in an lang. Chuong a ninaw chun ei tapna ding hmakhuo a la sei ding a nih. Hi Bill/Act thar siem ding thua hin Manipur a tribal thuoituhai chun hril an la nei ve naw a, tosan le en liem el lovin hril nei ve ngei hai sienla nuom a um takzet. Tribal mihai lai seng seng khawm Zohnathlak han ei tuor bik ding niin an lang a, hi lei tak hin Zohnathlak hai hi to el lovin, thangruola hma ei lak ve a tul a; a tui infawn lai a ni leiin Zohnathlak hai laia politicians le tribe tum tum thuoituhai hang che ve ngei hai sienla nuom a um ngei el.
Zohnathlak sunga mipuihai khawm totawka um bik ding ei ni nawh. Ei politicians le tribe thuoitu han hma an lak naw chun mipui han ei nawr ve a tul a, chu chu mipuihai mawphurna ve a nih. Thuoituhai an lo inlusu a, ILPS thua hin chetna an nei der naw a lo ni khawma mipuihai hi a keihar le a nawrhartu ding ei nih. A hun laia thang ei lak naw chun ei lan sir ding a ni a, beidawng takin hun ei la hmang ding a nih. Thuoituhai le mipuihai ILPS thua ei thanghar a hun ta takzet a nih.
Manipur phairam, a bik takin Greater Imphal huop sunga ILPS nawrna a huongintau leiin him lova inngai, Greater Imphal area sunga cheng Vaihai khawlam an insawn a ti dam hi ngaituo le ngaimaw a tul ve naw maw? Sungkuo le mimal thil chau ei ngaituo ding a ninaw a, ei ram le ei hnam hmakhuo hi Zohnathlak hai hin chik taka ei ngaituo ve a tul takzet a nih. Vai ei tihai khuoma sie (tax) ei lak hi ei damna le himna ding a ni nawh a, chimrala ei um vena ding le sirdea ei umna ding a la nih. Tax ei lak thei hi ei lungawi le hlimna dingah ei nei annawleh ei thatpuina niah ei ngai el thei. Nisienlakhawm ei tapna ding, ei beidawngna ding le hnawchepa ei umna ding dam a la hung ni ding a nih ti hi hriet dinga tha a nih.
Churachandpur District a hin kum 2011 Census dungzuiin mihiem 2,71,274 ei um a, SC population 0.03 percent le ST population 98 percent niin kum 2011 Census ah ziek le record a nih. Hi record hi an dik tak tak chun a tha, lawmum ah ngai ei tih. Amiruokchu, an dik tak a ni ngei am ti ruok chu ngaituo chet chet a ngai hle in an lang. Manipur phairam biela ILPS huongintau leia Vai ei tihai inpemlut tamna tak chu Churachandpur town sung niin thil suimihai chun an hril tlat chu tie!
Ei hrillang ta angin ILPS hi ei dodal naw a, ei hnawl bawk nawh. Tuta hma deu khan State sawrkara JCILPS in points 5 Bill thara inthangsatir dinga a ngen ei hung tarlang ta a, ei la hriet seng ring a um. JCILPS thil ngen hi state sawrkar chun ILPS le inzawma bill thara inthangsatir a remti ta a nih. JCILPS thil rawt le ngen, state sawrkarin a pawmpui ta points 5 hai laia points panganaa hril chu, kum 1951 hnunga Manipur state sunga hung lut hmun danga intan hai suisuoka hnawtdawk annawleh tirkir ding ti a nih. ILPS thua an ngenna a puitling vai chun a tuor ding le a tawksa ding hi tribal hai khawm ei ni ve ding a nih.
