Hmasawnna Thar | 12 August, 2015

Tuolsung

Loneituhai kuomah Sprayer sem

Parbung: August 12, 2015 khan Parbung area Office­ah Development Department, RPC­NEI chun Hmarbiela lonei le huon siemtu hai mamaw em em Crop Sprayer a damdawi leh Loneitu mi 25 hai kuomah a sem. Crop Sprayer hi Hmarbiel sunga loneitu mi 70 bek kuoma sem tuma riruong siem a ni a, market stock­ah vawikhata hmu thei a ninaw leiin khaw dang danga um mi 45 hai kuoma khawm sawtnawte hnungah sem nawk ning a tih. Sawrkar­a inthawk subsidy­a lak thei a ni dim tia lampui dap a ni a, sienkhawm lampui a umnaw leiin Devpt. Dept. RPC­NEI chun theitawp suoa hi thil hi a sem a nih.

   

Crop sprayer hi Rev. Chawngrosiem in Pathien kuomah lawmthuhrilna le inhlanna a nei zo in Pu Lalhming Songate,V/Chairman le Pu Ebenezer, Secretary V/A Parbung han loneituhai kutah an inhlan. Loneituhai chu tangkai taka hmang ding le fakhmuna lampuia hmang dingin Area Manager, Devpt. Dept. RPCNEI: Parbung area chun ngenna a siem. (Lalnunthang Songate)

Danger position

CCPur: Kum dang ruo nasa taka a sur khawma thil  um ngailo, ruo sur tam intum ding khawm ni lo, Khuga Dam Department (IFCD) hai thilthaw that a tha tawk naw a, a derdep leiin RD8750M huom sunga an Culvert siem pahni (2) a chim a, tui luong thei lova a block tlat leiin Pu J. Phaihluothang, Muolbem Village a Private Farm hieng, Fishery, Piggery, Duckery, Poultry le Cattle rearing hmunhai tuiin a chim siet pek vawng a. Natural lake angin tui tam tak an dil a, a pung pei a ni leiin mihriem chengna (dwelling house) House No. 44 chen khawm danger point­a um a ni ta leiin an bei a dawngin an thla a phang hle el a, santu le thlamuongtu ding Minister, MLA, MDC, DC le Media JAC hai le a dang dang an ngai hle a nih ti thu lo dawng a nih. Canal hnuoiteng In 10 vel lem chu Danger position­ a um an nih.

Vijaya Bank an khar pek; hawng nawk

CCPur: 2013­14 PMEGP Beneficiaries Association/CCPur District chun PMEGP 2014- ­15 beneficiaries 12 hai kuoma 1st Instalment a peknaw leia lungawi lovin zani 10:00AM khan Vijaya Bank an khar. Hi thu an hriet le inruolin OC, CCPur Police station inrawinain CCPur Police han Vijaya Bank kalna chabi hi sukse in an hawng a, Bank hi an veng nghal bawk.  PMEGP Beneficiaries 12 han EDP training an zo hnungah margin money le rate quotation hai an deposit hnung khawma Vijaya Bank in 1st Instalment a pek naw leia Bank hi an khar nia hril a nih.

A hmuna enfel dingin an suok

CCPur: KKL GHQ chun group pahni­a inthein Joumol­a mimkei le Sangaikot area­a tuilien leia harsatna tuortu hai a hmuna thil umdan enfel dingin zanikhan CCPur an suoksan. KKL GHQ  chun tuchena hin Joumol khuoa mimkei le Sangaikot area­a tuilien leia harsatna tuortuhai thangpuina dingin bufai bags 200 le Rs. Rs. 3,80,330/­ bakah thuomhnaw thahnemtawk tak an khawn dawk tah. An hmatiengin thangpuina thil hai hi sem ni dingin KKL GHQ chun an hril.

   

Chun, YPA GHQ in Joumol a mimkei le Sangailot area a tuilien tuor hai thangpuina ding vawisun hin YPA Gen HQ inrawinaa YPA Lamka block thuoitu han inhlan an tih. Thanpuina petu ding hai hi vawituk 9AM hin DC/CCPur in Hiangtam Lamka YPA Gen HQ hall­a inthawk vailiem a tih. Joumol­a harsatna tuortu hai Sungkuo pakhat peiah Bufai bag 2+ Rs. 2000/­ peng an ta, thina tuok hai Rs. 1000/­ sengin an ral bawk ding a nih. Sangaikot area­a tuilien leia harsatna tuortu sungkuo 23 hai chu Bufai bag 2 seng pe bawk an tih.

DC CCPur khuollien ding

CCPur: August 15, 2015 a Public Ground, Churachandpur a Independence Day hmang huna Mr Lunminthang Haokip, DC, Churachandpur chu khuolliena thangin India hnam puonzar keipharin parade a thang hai chibai bukna  nei a ta, hi zo hin mipui pungkhawm hai hmaah thu hril a tih. A thuhril zova Cultural programme um a tih.

Tuilien le mimkei tuor hai ta dinga Road show nei

CCPur: B. Muan Ngaihte le Daniel K. Gangte hai inrawinain zani zantieng 3:00PM khan Molnom a inthawk Teddim Road zuiin Thingkangphai chenah Myanmar rama tuilien leia harsatna tuortu hai thangpuina dingin Charity Musical road show’ nei a nih. Hi huna sum hmusuok hai Myanmar a tuilien leia harsatna tuortu hai thangpuina dinga thawn ding a nih.

   

Zani 7:30AM khan ZOLLS le ZOREC inrawinaiin joint meeting nei a ni a, hi huna hin Manipur le Myanmar haia tuilien le mimkei le inzawma awareness nei dan ding le harsatna tuortu haia inthawk report ngaithlak a nih. Hi huna hin Zomi Council hnuoia Organisation tum tum thuoitu hai an thang. Awareness hmasatakna dinga Road show hi nei a nih.

Friendship Nite hlawtling taka hmang

CCPur: August 10, 2015, 6PM khan HOPE le The Churachandpur Times (Multi­Lingual Monthly News Magazine & Online News Portal) chun Agape Care Centre, Muolhlum, Rengkai, CCPur kanin Friendship Nite an hmangpui. Hi huna hin Pu Lal Hossan Vice Chairman, ADCC; Pu M. Gouzamang Guite EM; Pu Lalhrillien Member, Fin. Comm., ADCC; Pu Lalhmangpui Fimate MDC, le Pu CT Lian Guite MDC han special invitees a thangin an uop. Friendship Nite zan hin Agape Singers’, Beauty N’ Beast, Hope Band, Snumb Crew, Mr. Revisang, Mrs. Laldinpui, Mr. Vincent Hekte Hmar, Mr. JJ han mipui hai rimawi le hla’n an in awi a, Mr. Rimson C. Zote Founder & Admin, Hmar Online Church chun Gospel Short Message hun a hmang baka Special Invitees MDC tlingtharhai lawmpuina ni nghalin Friendship Coffee dawntlang a ni bawk. Pu Lalhmangpui Fimate, MDC chun “Mangtha, Mangtha” ti Music Video hi huna hin a tlangzar bawk.

LRS Puruolte Tech., Adviser, HOPE le hi Event Manager chun programme hlawtlingna dinga rimawi remtu le hlasaktu hai bakah prog. uoptu online le print media hai chunga lawmthu a hril.

DIC Office­a documents pelut dingin

CCPur: DIC/CCPur hnuoia Aromatic Medicinal Plants (Stevia & Lemon Grass) ching nuoma inzieklut (registered) hai chu, Chairman, Secretary& Treasurer hai thangsain Commitee member mi 5 neka tlawmlo le mi 10 neka tam ni lo Joint Liability Group indin ding le Land Ownership/ Possession Certificate;mania ram neinaw han VA a inthawk No Objection Certificate SDO/ SDC in countersigned a thawna le an Group­a Joint Bank Account le Pass Book copy pelut dingin DIC/CCPur chun inhreittirna a siem.

Blood Donation Camp

CCPur: August 13, 2015 sun dar 12 a inthawk khin Blood bank, District Hospital, CCPur­ah 23rd. Blood Donation Camp um a tih. Hi Camp hi Patriots Day le  Independence Day, 2015 hai hmangna ding le inzawma nei ding a nih. Blood Donation Camp hi Mr Lunminthang Haokip, DC, CCPur in hawng a tih. District Level Officer­hai chu an staff hai an thisen pe dinga inhriettir dingin ngen an nih.

Motor eksiden­ah mi 2 an hliem

CCPur: Zani zantieng 2:30PM vel khan Pulser Bike a chuong Shokholun (47) s/o (L) Hemjathang of M. Songgel chun kea fe lai V.L. Paula (76) of Parbung, tuta SA Road, Zenhang Lamka a um mek chu a baw vang a, an pahnia an tlu leiin an luah hliemna an tuok a, Genneikhup EM, ADCC chun an pahni hin District Hospital CCPur a panpui a, Doctor han dressing an thaw hnungin Obserservation room­ah an sie.

Thangpuina ding Rs. 73550 an hung thawn

CCPur: Israel rama eini mi um hai chun Joumol, Manipur­a mimkei rapthlak takel tlungleia harsatna tuortu hai thangpuina dingin  Rs. 73550/­ an hung thawn a, zani hmasa khan KKL chun remchang lem dinga ngai leiin Bufai bag 75 lain KKL Complex­ah an sie.

Diarrheoa control Fortnight

CCPur: District Health Society (DHS)/CCPur le ZEO/CCPur hai thangruolin Aug. 12, 2015 hin School iemanizat haiah “Intensified Diarrheoa Control Fortnight” hmang ning a ta, student hai kut sawp dan (handwashing technique) inchuktir ning an tih. 11:00AM in Rengkai Hr Sec School; 12:00noon in Vimala Raina H/S le 1:00 in Phungkhothang govt H/S haiah prog. hmang ning a ta, Vung Mary, DCM/NRHM, Malsawmtluangi,Nurse le Dam Johny, Nurse han handwashing technique  inchuktir an tih.

Bike pakhat inruk

CCPur: Aug. 8, 2015 khan Bike Yama RX 100 MN1M­0803 Mr Huoplien of Muolvaiphei ta, an In bula an sie chu inruk hmang a nih. Bike inhmang hi tuchen hin hmukir a la ni nawh.

Dist. Level inter­school Games

CCPur: DYASO, CCPur huoihawtnain August 20, 2015 September 12, 2015 inkar sung khin   Discipline tum tum haiah District Level Inter­

School Games 2015 um a tih. Inhnikna nei hai chun August 10, 2015 a inthawk District Youth  Affairs & Sports Office (DYASO), CCPur­ah Elegibility Certificate lak thei ning a tih tiin  DYASO, CCPur chun inhriettirna a siem. Thu chieng lem DYASO Office­ah hmu thei ni bawk a tih.  

Under 17 Trial Selection

CCPur: August 14, 2015, 7AM khin CDSA chun AIFF U­17 World Cup Academy­a AMFA scouting team a thang ding thlangsuokna dingin Public Ground, CCPur­ah Under 17 Preliminary trial­cum­seletion buotsai an tih. Players a thang ding hai form pelut le trial a thang dingin Gen. Scy. CDSA in an hriettir.

Headline

JD(U) Manipur in All Party meeting ko dingin state sawrkar an ngen;

Naga Peace Accord thuah RTI hmangin indawnna siem

Imphal: India sawrkar le NSCN(IM) han Naga Peace Accord an ziek le inzawmin Janata Dal United (JD­U), Manipur chun Manipur sarwkar  kuomah All Party meeting ko dingin ngenna an siem. Naga Peace Accord zieka um ta hi ngaimaw um takel a ni a, mipui lungril a suk himaw leiin hmalak dan ding hriltlang le ngaituo a tul a nih. Assam a chun an state sawrkarin All Party meeting a ko a, Naga Peace Accord le inzawmin New Dlehi­ah All party palaihai tir dingin thutlukna an siem ta a nih tiin JD­U Manipur  President M. Tombi chun a hril a, NSCN(IM) thuoitu V.S. Atem thu hril hi ngaitha chi a ni nawh tiin an hril.

   

RTI Activist Kambam Seityajit of Khurai Chingangbam Leikai, Tinsid Road, Imphal East District chun zanikhan RTI Act hmangin Naga Peace Accord thua hin indawnna tam tak a siem. Iengleia hi Peace Accord sunga thu inziek um hai kimchang taka tarlang a ninaw am ana? Sawrkar thlungpuiin an rang thei angin Accord a thu inziekhai mipui hriet thei dingin tarlang raw seh tiin Kambam Seityajit chun zanikhan RTI Application Prime Minister Office, Government of India kuoma a peklut.

           

Naga Peace Accord chungthua hin Assam Pradesh Congress Committee (APCC) Secretary, Bibhuti Bhusan khawmin Union Home Secretary kuomah Naga Peace Accord a thu inziek chipchier sawrkar thlungpuiin mipui hriet thei dingin puonglang raw seh tiin ngenna lekha a lo peklut ta bawk. Hi hma dai hin Manipur, Asam le Arunachal Pradesh Chief Minister­hai chun sawrkar thlungpui kuomah Naga Peace Accord sunga thu inziek hai chipchier taka puonglang dingin ngenna an lo siem ta a nih.

Joumuol khawmihai Relief Camp­ah

Imphal:  Chandel district sunga Joumuol khaw sunga mimkei rapthlak takel a tlung leia naupang 2 thangsaa mi 9 an thi hnungin, dama la u m hai laia mi 40 vel hai chu Sugnu bula Utangpokpi khawsunga Temporary Relief CAmp­ah an la khawsa mek. Hi Relief Camp hi Natural Disaster Relief Committee (Kuki Area) Chandel District in an hawng a nih.

Tui tam leiin harsatna an tuok

Imphal: Tulai hin Loktak dila tui a hung tam leiin a se vela cheng han harsatna an tuok bakah Ithai Barrage Shutter hawng a ni leiin tui a tam a, Kumbi le Ningthoukhong biela cheng han harsatna an tuok nasa hle. Chun, Thoubal district a Pumlen le Ikokpat dil haiah tui a hung tam leiin a bul hnaia cheng han harsatna lien tak an tuok pha.

Sawrkar le JCILPS thuoituhan inbiekna

Imphal: ILP Bill chungthuah Manipur sawrkar le JCILPS thuoitu han vawisun 3PM hin inbiekna sunzawm nawk an tih. Inbiekna hi August 10, 2015 a an lo nei tan ta a nih. Inbiekna a hlasam chun ILP thuah nuorna fe mek chu sunzawm pei la ni dingin JCILPS thusuok chun a hril.

Mithiruong 3 hmu a nih

Imphal: August 10, 2015 khan Purul Sub-­Division, Senapati District sunga Purul bula Vahki an ti hmuna mithiruong 3 hmu a nih. Mithihai hming chu Francis (25) s/o Seizii of Phaibung Kullen village, Veihriizii (18) s/o Sou of Koide upper village le John (32) s/o Sapuni of Leiyai village hai an nih. An luah silaia kap seng an ni a, an luhai chu a kawi vawng nia hril a nih. Mi 3 hai laia 2 hai ruong chu a thu ta hle nia hril a nih. Thina tuok hai hi NSCN (K) cadres ni dinga ring an nih.

Loktak Cable­car project

Imphal: Loktak Lake, Manipur a Integraed Cable­Car le Lakeside Tourism Development Project thawna dingin Ministry of Tourism chun kum 2013­14 khan Manipur state sawrkar kuomah Rs. 20.35 crore a sanctioned tiin Union Minister of state for Tourism (Independent Charge) Dr Mahesh Sharma chun Aug. 10, 2015 khan Lok Sabha an hriettir.

Myanmar mi silai leh man

Aizawl: August 7, 2015 zan khan Chingsianpianga (36) of Darkhai village, Myanmar chu Hnahlan village, Champhai district, Mizoramah Mizoram Police le Assam Rifles thangruol han M­3 Rifle 2, a sipa thun magazines 3 le silaimu tam tawk tak leh an man niin Police thusuok chun a hril.

India rama kum 24 sungin mi 26 khai hlum

New Delhi: India rama chun kum 1991 a inthawk kum 24 liemta sung khan misuol tum tum 26 khaihlum an ni ta a, hienghai laia 4 hai chu Muslim hnama mi an nih. Yakub Memon khaihlum a ni hnunga minority hai tumbik an nih tia hril le sawiselna um le inzawma hi thu hi India sawrkarin a hril a nih.

Rel sungah India pawisa lem dapdawk

Amritsar: Custom officials hai chun August 10, 2015 khan Attari Railway Station, Amritsar­a Samjhauta Express Rel sungah India pawisa lem dapdawkin an man. Rel hi Pakistan­a inthawka hung a ni a, custom officials han Rel ceiling sunga an dapdawk a nih. Pawisa lem dapdawka um hi bundle 10 zet niin Rs. 500 notes vawng le quality tha takel an ni a, suizui mek a nih.

--------------------------------------------------------------------------------------------------------------

VAWISUN THUPUI

Chuongchun, chuong ang lawma tam, mi thlirtuhai inhuol vela ei um leiin, a mi sukhnawk taphawt le suol einia kawp tlat chu sie thla veng ei ta, ei hmaa intlansiekna uma hin seltakin tlan pei ei tiu. ~ Hebrai 12:1

Editorial: Lekhatiem uor

Technology khawvel ei chuongkai china inthawk lekhabu/lekhatiem hi ei inthlada nuom sawt hle. Hi hi a bik takin zohnathlak hai lai a zuolkai. Hi lei tak hin thangthar hai hi ei hrietna a pawnlang in an ril naw a nih ti inla ei hril suol taluo ring a um nawh. Lekha tiem rawn hi inchuklai hai ta ding chau ni loin nu le pa, ram le hnam, kohran le khawtlang thuoitu hai ta ding khawmin a pawimaw. Mi tam tak chun technology leiin lekhabu sa tak le sum tam tak senga inchawk tul lovin Television le  Internet hai fethlengin ei thu hriet nuom hai ei hmuin ei hriet thei tho tiin lekhabu tiem hi ei inthlada khawm a lo ni thei. Amiruokchu, lekhabu tiema hrietna le internet hmanga social networking site le a dang dang haia inthawka hrietna ringawt ni lova lekhabu ngei tiem hin hrietna a suktam el chau ni lovin mihriem hringnun nasa takin a keithuoi thei a nih ti hi ei hriet tlat nuom a um.

   

Television (TV) hai ang lo takin lekhabu tiem hin ei ngaituona thluok a min hmang tir a, a tiema tiem hin ngaituona a siem rawnin, ei seng rawn lem hlak. Chun, lekhabu tiem rawn hin tawng­a thumal tam tak ei hriet in ei hmu belsa hlak. Hi lei hin a tiem rawn na nana chun thumal le a umzie hai an hriet rawn hlak. Study vawi tam tak thawnaa mithiem han an hmusuok chu ‘ thluok hmang lo le sawizawi zing lo chun inhmang’ thei a nih ti hi a nih. Hi lei hin ei upat hnunga chen khawm ngaituona lungril fim tak ei nei theina ding chun ei thluok sawizawi rawpa ngaituona seng hi mihriem han ei mamaw a nih. Lekhabu ei tiem tlawm lei hi mani ding eini Zohnathlak hai chu kum 60/70 ei hung chuongkai dek dek chun hmang tlak hi ei vang vieu ta hlak.

   

India Prime Minister hlui Morarji Desai khah kum 97 mi a ni chen khawmin tar inhai a neinaw niin an hril a, khanganga a um theina san chu lekhabu a tiem rawn lei niin a hril. Khawvela mithiem le hrietna inril taphawt hai hi an chanchin ei sui chun lekhabu tiem rawn mi vawng an nih. Eini lai ngei khawm tar kun chena hmang tlaka la um hai hi chu lekhabu tiem rawn hai an nih. Lekhabu chau ni lovin magazines le chanchinbu tiem rawn taphawt chun mimawl le lekha thiemlo khawm ni hai sien thil chinchang le khawvel inlumlet dan an hrietin an fena taphawta mi titi naah an thangin hril ding an hriet hlak. Hi lei hin lekhabu tlung phak nawna ram chu ram inthim a ni hlak a, In ropui le changkang tak tak ngir tuor sienkhawm tukver umlo In inthim tak ang a ni hlak.

   

Inchuklai le sin zawng mek hai ta ding lem chun mani subject chau ni lovin hrietna sukzauna dingin lekhabu tiem rawn hi a tul zuol. Khawvel thiemna le varna an sang pei le inruolin mithiem le mivar ei pung pei a, hi lei hin mani subject hrietna chau ni lovin hrietna inril tak nei kha sin la tu han an hung dit ta a, hi lei hin hrietna suktamna dingin lekhabu tiem ei uor zuol hi thangthar hai ta dinga pawimaw le tul a hung nita a nih. Mithiem hai chun lekhabu hi mihriem hai kutsuok hai laia hlu le tlo tak a ni a, lekhabu neka thangthar hai ta dinga thu le hla inhlansawngna ding hmangruo tha a um nawh tiin an hril. Technology in khawvel run mek sien khawm hi thil hin lekhabu pawimaw zie chu an lang chieng hle a nih.

   

US President lo nitah Abraham Lincoln dam kha ei hang en chun, sungkuo pasie le rethei taka inthawka seilienin school khawm kai thei lo a ni a, sienkhawm lekha a tiem rawn leiin Amnerica President chen a hung ni thei a ni khah. Hieng a ni lei hin lekhabu le lekha tiem hi thalai le sin zawng mek hai ta ding chun inthlada ding chi a ni nawh. A san chu, lekhatiem rawn hi hrietna suktamna ding chau ni lovin kum upat hnung chen khawma tar inhai nei lova um theina a ni lei a nih. Ei subject/lekhabu hai hi thangpuitu ang chauva hmanga lekhabu tha chi hran hran ei tiem rawn a ni phawt chun ‘hrietna tlawm’ ni ngainaw mani. Tulai thalai lekhathiem tam takin belchieng ei dawlnaw nasan chu mani lekhabu a chau ei innghat a, lekhabu dang le chanchinbu hai ei tiem tlawm lei a nih.

   

A hmaa ei zieklang ta angin lekhabu tiem hin hrietna a suktam chau ni lovin mihriem nungchang khawm nasa takin a siem thei bakah mani thluok le ngaituona a min seng tir a, ei hrietnaw karin ei lungril le ngaituona keihruoia in­thanglien tirin miropui tak tak dam a hung sersuok hlak a lo nih. Tulai thangthar hai laia nundan mawi le khawsak dan nasa taka ei inhmang nasan khawm hi lekhabu tiem ei tlawm lei a ni el thei. Lekhabu tiem hi hunawl hmangna dinga tha tak a ni bawk. Lekhabu hi tiem rawn inla chu ei khawnghat khawm hi nasa takin a hung inthlakdanglam ngei ring a um.