Responsive Ad Slot

EI LO LA PUI NAW NGEI! / EI LO PUI TA NAW NGEI!

Friday, August 7, 2015

/ by VIRTHLI HMAR
"Inhma khan chu hnam dang po po hai mi chungen le mi entawntak ei ni hlak ana" ti tawngbau hi ka hriet zeu zeu hlak a, andik khawm ka ring hle. Tulai hun taka hin chu ei lo pui ta naw ngei! Kha lai hun kha lo liem tah in tuhin chu thangthar, hunthar a lo ni nawk tah a, a bul tan that ang deu a inngaina a um chu tie! Tuhin chu hnam danghai, kawng tinrengah ti’ng ei tih, ei tluk ta naw chieng hle. Hmar hnamin ei lo la phak hla naw ngei. Ei lo la pui naw ngei!


Vawisun khan hotuhai ditsakna zarin ka ruolpa leh Churachandpur College in Freshers’ Social Meet an hmangnaah sound operate dingin an mi tir a, ka thil hmu le hriet ha’n ka lungril an hluosip rek ta tlat! Ka thil hung inzawt ding hai hi ka hrietnaw leia a’ndiknaw lem dam ka hung hril pal ani chun mi hrethiem unla, hun remchangah thudik in mi la hril ding a nih. Chun, chu hnam-kha hnam ti in ka hung inzawt bawk ding a na, ka ruol-le-paihai le hi thu lo tiemtuhai po po in lungril a lo na pal ani khawmin mi hnam phana’n lunginsiettakin mi hmangpek naw hram dingin ka hung ngen hmasa cheu.

Thu ka hriet danin, kha program huoihawtna dinga mawphurna ama chan reng anga ngaia thaw nasatu tak chu an Social&Cultural Secy., HSA Unit thuoitu ni bawk kha a ni a, a taimakna le a mawphurna hlen ngei a tumna kha a ropuiin inza a um hle. Program tan hun ding kha zing dar 11 ana, keini kha inhma metin hung thei unla chu tha’ng a tih an mi ti leiin dar 8 velin a hmun kan tlung a, chutaka chun an Social&Cultural Secy. pa ti lo chu midang hmu ding an um nawh. Ama chun thungnahai a lo hrukfai a, a hnung met chun a thawpui dingin mi pakhat a hung a, khawm chu Hmar tho. Chu hnung deu chun unau Thado hai hawnkhat an hung a, chu khawm chu an ni hlasak dan ding ngaituo a sound system hung en thlitlai an nih.

Khuollien ding CCPur DC inzaum Pu Lunminthang Haokip a hung tlung tah tiin program tan zai kan hang rel ta ngei a, Khuol inzaum dingin CEO, ADC, CCPur ana, ama khawm hi hnam dang tho ala nih. An hotuhai lai khawm khan Hmar rimkai chu Pu Ruoivel Pangamte ti chau naw kha chu ka hmu nawh. Comperes hai hlak chu Paite le Thado an ni nawk a. ‘Hienghai hi a chantha po an chang hmel hi ti’ tiin ngaidan ka nei nghal a. Hlasak dinga an ko hmasatak chu Thado ana, chu zo ah welcome speech hriltu Sailo, hlasak ding bawkin hnam dang(a hnam ka chieng nawh) ko a ni nawk a, chu zo ah Paite nunghak in a hung sak nawk a, Khuollien pa’n hun a hmang hma met in Emma Pachuau in hla a sak nawk a, chu hai karlak ah chun paite hnam lam le Thado hnam lam inentir ani bawk. Khuollien in hun a hmangzo in tawite la chambangin an lawi nghal a, kha zo khan chu hotuhai khawm a um mumal an um ta nawh, Principal pa le mi pahni ti naw kha chu. ‘Tuhin chu an hung ko hmel ta hi’ tia ka lo ngaituo lai tak Gloria Khawlhring le Grace Famhoite inzawm zutin an hung ko ta ngei a, anni karlak ah chun Hmar hnam lam, Zou hnam lam le hnam dang lam pahni dang inentir ani bawk. Chun mak ka tih nawk pakhat chu Principal pa’n Freshers-hai tawngtaipekna a nei khan benediction in a tawp tlat a, a hming bulah Elder/Upa annawleh Rev. ti a um bawk si nawh, hnam danghai hi chu a nuom nuom hril thei an ti mani aw  tiin kei le kei ka’n dawn ta ringawt a. Refreshment an hang sem a, SSPP (Paite) Unit le HSA Unit ha’n hung semin a bawm ruokhai an hung rut nawk nghal a, an thaw tha ka ti hle. Tin hnung khan, SSPP hai khan an mi hung sempui khiet a tiin tawngbau ka hriet nawk a, mak ka ti naw hle.

Ka zuk hrilnuom tak chu hi hi a nih; hotuhai le an mi fielhai an kim lai po khan hnam dang ha’n hun an chang a, Hmar tawng hmang mi a chang tak hlak chu Pachuau ani nawk a. Hmar hai chu hotuhai le mi fielhai tin hnung, mi hawklak le inrui tam hnungah an mi zuk ko bik ku kha an tum hram am ani ding, lung a sen tum vang vang el anih. Ei lo la pui naw hle!/Ei pui tanaw hle! Hmar hnam lam inentir hai khan an lam tawpnaa salute an hei pek ve bawk lem kha chu lukhawng a nei tanaw hle. Hun hmangzo a nih a, Vote of Thanks hriltu kha chu Hmar a ni nawk hram a(an Social&Cultural Secy. pa bawk kha). Program hmang laia risie siema inlawnkuol vel Thado hai kha hmu ding an um tanawh(An ni hi chu a tamin an tam reng reng a, a hawklak pawl lo tam hai sienkhawm mi chunga leng le line dang danga thiemna insang tak tak nei an tam anih. Ei la tluknaw hle!/Ei tluk tanaw hle!) Stage le a kawlvela thuomhnaw le thil dang dang hrefaitu chu HSA Unit hai bawk an ni ta rek! A sawl po ei thaw a ni deu tak. Amiruokchu hi hi ka lawmna a nih; a tan laia buoi rak raka invir hai bawk khan a tawp tak ah a hrefaitu le a khartu ei ni nawkna kha. Ei mawphurnahai hlen nachang ei hriet kha lawm a um ngawt el.
Chuonga an inhrefai kar chun panthlang Public Ground a ball pet ka lo zu en mei mei a, RACC (Rengkai) hai le Rangers (Zou Veng) hai an lo inkhel lai tak ana, an ball pet khawm chu thlir taluo bek lovin ka lungril ngaituona a’n vakvel nawk a. Hmar hai hi ball pet ei thiem, pet khawm ei taima, a pet khawm ei tam, amiruokchu a phak insang ti a zuk hril ding an vang hle. Ka hriet phak chin ah I-league pet phak khawm ei la um nawh. Hmar hming kai umsun hlak chu Mizoram mi, Hmar tawng hmang ni lo a nih. Ka hmu dan taka chu discipline hnuoiah ei umpeinaw lei hi ni deu takin ka hriet ei phak insang thei naw nasan hi. Hlaw nei in an hung pet tan dek dek a, zu an hung he zuol nawk pei a, umzie a um thei nawh.
Hienghai po po khela khawm hin, thiem inchukna nisien, sawrkar sin inziekkaina ah nisien, hla le rimawi tienga khawm nisien Hmar hming hin hmun a hluo tlawm em em a, hnam danghai hlawtlingna thu hrietchang lung a na naw thei nawh, thang a tlawm naw thei nawh. Chuleichun unauhai, thaw ro! Ei ni thang chin a’nthawk hin chu Hmar hnam chawisang ani theina dingin ei inhnikna zawn seng le ei thilthaw le inchukna zawn sengah hlawtling le thiem tak ni tumin theitawp hei suo thar ei tiu. A chun ei Pa Pathien khawmin mal mi sawm zuol ngei a tih.

Kaprivung
Sielmat
August 7, 2015
8:43 pm
Don't Miss
© all rights reserved
made with by Simon L Infimate