Hmasawnna Thar | 28 July, 2015

Tuolsung

CM in a thutiem sukpuitling dingin an ngen

CCPur: July 20, 2015 ni khan Tipaimukh Area Village Authority Union le Hmarbiel HNU  Tipaimukh Area han Joint meeting an nei a, hi huna hin Tipaimukh Area harsatna tum tum hai  hriltlangin December 17, 2014 nia Manipur CM O.Ibobi Singh in Pherzawl ADC a hawng huna  mipui hmaa an tiemna hai­ national Highway 150 tukum sung ngeia siem zo ding, Electric meivar khawtina pek ding le Civil supply bufai le K.Oil, Chini, Machi hai a dawngtu ding han indik takin dawng an tih tia a hril hai chu tuchen hin a la sukpuitling naw a, hieng thil hai hi tukum 2015 sung ngeia sukpuitling dingin Manipur Chief Minister an ngenna thu an resolution­ah an zieklang.

   

Mipui, Authority Union le HNU chun sawrkarin an tiemna a ngaisak nawna thua hin an lungawi naw le an hrietthiem naw thu an hrila  an hma thei anga sukpuitling dingin an ngen bawk.

   

Chun, Old Age Pension sum khawm hmu le hmu naw chang a um bakah a neitu han a card el khawm an hmu phak lova an umna chungthua, indik taka an hmu theina dinga thang la tlanga thuneitu hai kuoma intlun nisien tiin Joint meeting chun an rel bakah Hmarbiela Malaria tam leiin CMO in khawtin haiah medical team le damdawi thawn sien an nuom thu an hril bawk.

           

Tipaimukh biela Civil supply zawrna rate chu ­Senvawn kg. 1­ah Rs. 15/­; Lungthulien Rs. 15/­; Parbung Rs. 14/­; Taithu Rs. 14/­; Tuolbung Rs. 17.5/­; Thingpan Rs. 17.5; H. Maulien Rs. 17.5/­; Sipuikawn Rs. 17/­; Rovakawt Rs. 17/­ le Parvachawm Rs. 15/­ niin an zieklang bawk.

ADC CCPur a member han meeting an nei

CCPur: July 27, 2015,1:30PM khan Mr Langkhanpau, ADC/CCPur Chairman(caretaker)  inrawinain a office chamber­ah ADC member han formal meeting an nei. Hi huna hin State sawrkarin an rang thei anga nominated MDCs hai ruotna order insuo ding le ministry siem vat a  ni theina dinga Manipur Hill districts haia ADCs 6 haia leader hai  leh Chief Minister le Dy. CM hai hun remchang hmasa taka inhmupui dingin thutlukna an siem thu Mr Langkhanpau Guite chun a hril.

   

Manipur­a ADC 6 Chandel,Churachandpur,Senapati, Tamenglong,Ukhrul le Sadar Hills ah  Autonomous District Council  (ADC) seats 144 haia inthlangna hi June 1, 2015 a nei, June 10, 2015 a result puong le July 13, 2015 a member tamlem han MDC dinga intiemkamna an nei ta a ni a. Resul puong  a ni thla khat le ni 17 a liem hnung khawmin nominated seat appointment order a lan suo naw bakah sawrkar chun ministry a lan siem tirnaw a nih.

Dist. Level Training nei

CCPur:  District Program Office, ICDS Cell/CCPur hmalaknain July 27, 2015, 10AM khan HSA compound, Rengkai­ah Anganwadi Workers hai ta dingin District Level training on Management Information Service (MIS) nei a nih. Hi huna hin Block 10 haia Anganwadi Centres 1010 haia workers hai an thang a, Block 10 haia CDPO hai resource person in an thang.

HSA in School ­hai an kan

CCPur: Hmar Students’ Association (HSA) GHQ inrawinain HSA CCPr Jt. Hqrts le Jt. Hqrts huom sunga inchukna in tum tum hai zanikhan kanna nei a nih. School an kan hai lai Young Learners School, Sielmat Christian Higher Secondary School, Happy Heart School, Assemblies of God le Pathway School hai a thang. Hieng inchuknain haia Principal/Headmaster le Headmistress hai inhmupuiin inchuilaihai ta dinga thil tul le pawimaw hran hran hai an hriltlangpui a. Takinning taka lekha inchuk mi harsa zuol hai school thuneitu hai le thangruola thangpui dan ding khawm hriltlang a nih.Chun, School/Hr.Sec. School haia Corporal punishment, RTE le inzula naupang enkawlna chungchang khawm an hriltlang a, Data tul le pawimaw dang danghai an lakkhawm bawk.  July 28, 2015 hin zanita School an la kan hman lo hai kan nawk an tih. (Alan Famhoite)

ZSF le CDPSA han inbiekna an nei

CCPur:  Blue Star Academy­a Class IX inchuklai nuhmei naupang pakhat an hotupa in a sawisak hliemna le inzawma Zomi Students Federation (ZSF) GHQ in hi School an khar le inzawmin zani zantieng 1:00PM khan ZSF GHQ Office, Salem Veng­ah Blue Star Academy palai, CCPur Dist. Private School Assn. (CDPSA) le ZSF GHQ han inbiekna an nei a, hi hun hi Simte Students Association GHQ thuoituhai khawm hrepuituin an thang.

   

Hi huna hin Blue Star Academy in kut tuortu naupang kuoma pi le pu dana inbiekna nei ding, chu dungzuia hma lak ding; kut tuortu le Blue Star Academy in inbiekremna an nei thei leh nidang ang bawka school hawng nawk ding; inbiekremna thatak a umnaw chun School khar zawm pei ding tiin an rel. ZSF thupek dungzuiin zanikhan school kai an um nawh.

Peace Rally neilo dingin

CCPur: July 29, 2015 a Meitei  Society, CCPur in CCPur town sunga Peace rally nei an tum  chu  HSA, KSO, CCPur le ZSF, GHQ han zanita uluk taka an hriltlang hnungin tha an tinaw a, hi lei hin hieng  Students Organisations pathum Joint meeting chun Meitei Society, CCPur chu an Peace  Rally nei tum thul dingin an ngen.

Dist. Magistrate in silent peace rally nei remti lo

CCPur: Tulaia Manipur phairam biela Inner Line Permit (ILP) system hmang nawk dinga nawrna nasa tak fe mek le inzawma Meitei Society, CCPur in July 29, 2015 nia CCPur khawpui sunga Silent Peace Rally nei an tum chu, State Govt. in a bawzui mek a ni lei bakah buoina suok theina ding a ni leia nei remchang a tinaw thu Mr Lunminthang Haokip, District Magistrate, CCPur chun hrilin an hriettir. CDSU chun a biela cheng majority tribal hai remtina le hrietpuina lova thilthaw an remtinaw ding thu an hril.

ZEO in Awareness pe dingin an hriettir

CCPurL JNV Academic Session 2016­17 sunga Class IV inchuk ding lakna ding le inzawmin ZEO/CCPur chun a hnuoia Headmasters/Headmistress hai chu an school chita student kum 9­13 inkar hai tha taka awareness pe dingin an hriettir. Application hi August 3, 2015 in ZEO/CCPur Office­a inthawk semdawk tan le September 30, 2015 chena peklut thei ding a ni a, Exam chu January 9, 2016 in Block Hq. tina exam centre haia nei ning a tih.

Headline

India Scientist ropui le President hlui Dr APJ Abdul Kalam Shillong IIM-a lecture a neinaah khaw hre lova  tluin a thi

Shillong: India President hlui Dr APJ Abdul Kalam (84) chu zani zan dar 8 vel khan Shillong hmuna a thi. Ei thu dawngnain a hril danin Dr APJ Kalam hi Indian Institute of Management, Shillong­ah lecture a pek lai zani zan dar 6:30 vel khan tlu a, khawmuol hre lova a um leiin Hospital hnai tak Bethany Hospital panpui a ni a, sienkhawm doctor han an san thei tanaw a nih. Bethany Hospital­a Managing Director David Sailo chun, Dr Kalam hi zan dar 7 vela kha hospital­a hung phurtlung a ni a, hi huna hin a so (pulse) um ta lo niin a hril. Dr Kalam hin kum 2002­2007 sung khan India President a chel a, India President 11­na a nih. Dr Kalam hi Scientist, khawvel hrieta inlar, India Space le Missile programme­a thluokbur thawtu tak a lo  nih.

   

Dr Avul Pakir Jainulabdeen Abdul Kalam (Dr APJ Abdul Kalam) hi October 15, 1931 khan Rameswaram, Tamil Nadu­a pieng a ni a, Madras Institute of Technology­ah Aeronautical engineering inchukin hieng tiengpang thiemna insang tak nei niin India ram Satellite kapsuokna hmasatak, SLV III puitlingna dinga sulsutu pawimaw tak hai laia mi a ni bakah Indian Guided Missile development porgramme a thluokbur thawtu tak   a nih.

Aeronautical engineer a zo hnung hin Defence Ministry a Technical Development and Production Directorate­ah a lut a, hi hnung hin Indian Committee for Space Research (INCOSPAR) ah Rocket Engineer sin a thaw tan a, Kum 1982 khan Defence Research and Development Laboratory, Hyderabad –ah Director a ni a, DRDL Director sin a chel sung hin Integrated Guided missile Development Programme hotu tak ni nghalin Prithvi le Agni Missile hai hlawtling taka siemsuok a nih. Kum 1981 khan Padma Bhushan le 1990 khan Padma Vibhusan inhlan a ni bakah 1997 khan Bharat Ratna inhlan a nih. Universities 28 lai zetin Doctor of Sciene (D.Sc. Honoris­causa) an lo inhlan ta bawk. Sap tawngin lehkhabu pathum, “India 2020: A vision for the New Millenium” , “Wings of Fire : an Autobiography” le Ignited Minds – unleashing the power within India” t ihai a lo ziek ta bawk.

Manipur­ah darkar 38 bandh

Imphal: Sapam Robinhood @ Thoi thina le inzama JAC siema um chun vawisuk zing dar 5 a inthawk July 29, 2015 zan dar 7 chenin darkar 38 sung Manipur Bandh an thaw ding thu an puonglang. Sapam Robinhood kap hlumtu Police hai suspended dinga an ngenna state sawrkarin a sukpuitling naw dodalnaa bandh hi an thaw tum niin an hril. An bandh thaw hin Medical, Water supply, Electricity, private le Govt. Hospital hai huomsa naw nih tiin an hril.

August 1 ah MCPM in Bandh

Imphal: Shusibala Devi, Director of Arts and Culture, Govt. of Manipur in sum tam tak indiklo taka a hmangna thuah action a lak vat naw chun August 1, 2015 zing dar 5 a inthawk darkar 12 Manipur Bandh an thaw tum niin Maoist Communist Party, Manipur (MCPM) chun thusuok an siem. Shusila Devi hin Deputy Director (Archive) sin a chel lai khan Archive hmangruo inchawkna ding sum tam tak a sukchavai a, hi lei hin July 30, 2015 chena ama le ama an ban annawleh state sawrkarin action a lak ding a tia MCPM chun deadline an siem a nih.

Curfew darkar 15 inthlazal nawk

Imphal: District Magistrates, Imphal West le East hai chun vawisun hin hieng district pahni haia Curfew darkar 15, zign dar 5 a inthawk zan dar 8 chen inthlazal nawk a ni thu zanikhan an puong.

Health Minister in PHC a hawng

Imphal: Health & Family Welfare Minister Phungzathang Tonsing chun zanikhan Nongpok Sekmai­ah PHC thar a hawng a, Manipur­ah MBBS zo han direct­a post Graduate an inchuk thei dan ding state sawrkarin a ngaituo mek a nih tiin  hi huna thu a hril huna Health Minister chun a hril.

Pasal 1 rangkachak 1.955 kg leh man

Imphal: July 26, 2015 khan NH­102, Imphal­Moreh Road­a Khudengthabi hmuna Maruti Van MN01G/1049 sukchawla an dapnaah Laishram Mohan Singh (32) of Khangabok Awang Leikai, Thoubal District chu rangkachak 1.955 kg leh 24 Assam Rifles han an man a, Custom Department, Moreh kutah an pek.

R. Thangmawia ruong a hungtlung

Aizawl: R. Thangmawia, President, ZORO ruong chu zani 3:50PM khan Lengpui Airport, Mizoram phurtlung a nih. YMA, ZORO le State sawrkar palai han an lo hmuok a, Vanapa Hall­ah inzana le sunna hunser hmang a nih. R. Thangmawia hi July 20, 2015 a Geneva khawpui, Switzerland­a a tlungna Hotel­a thi a nih.

Director General DD dingin C. Lalrosanga

Lawngtlai: Cabinet Appointment Committee, Ministry of Informationa & Broadcasting chun interim (lailawk) Director General, Doordarshan chel lai mek Pu C. Lalrosanga chu Director General, Doordarshan dingin (Director General puitling) a ruot tah. Pu C. Lalrosanga hi Additional Director General, All India Radio lo chel hlak, a hnunga interim Director General, DD dinga ruot a ni a, India hmarsakbiel mi hai laia Doordarshan India (DD) Director General chel hmasatak a la nih.

   
Pu Lalrosanga hin kum 1975 khan All India Radio­ah regular News Reader in a lut a, hi zo hin Indian Information Service (IIF) zawmin Aizawl­ah News Editor in a thang a, a hnung kum 1991 khan Indian Broadcasting Programme Service –ah a lut nawk a nih. (mizoram news)

Gurdaspur a helpawlhai chetna leia inkaptuonaah SP thangin Police 4, Civil mi 3 le helpawl 3 an thi

Dinanagar/Gurdaspur: Zani zing dar 5 vel khan Punjab State a Gurdaspur District­a  Gurdaspur khawpui sunga Dinanagar Police Station Complex chu ralthuom tha tak tak le bomb chawi, Army uniform anga inthuom han an va hlukhum a, SP pakhat thangsain Police 4, Civil mi 3 le helpawl 3, an rengin mi 10 an thi.

   

Inkaptuonaa SP kap hluma um hi Baljit Singh, Detective Branch of Police, Gurdaspur a nih. Darkar 12 sung Police le Seurity Forces han operation an thaw zovin Commandos han combing operation an thawzui nawk nghal. Pathenkot a um Army hai khawm ko nghal anni bakah Army Helicopters pahni operation thawnaah hmang an nih. Amritsar­Pathankawt Rel lampuia khawm bombs 5 hmu a nih. Union Home Minister Rajnath Singh chun Punjab CM Parkash Singh Badal le National Security Advior Ajit Doval hai an biekpui nghal a. Rajnath Singh chun helpawlhai dona le a tulna thil haiah sawrkar thlungpuiin Punjab sawrkar a thangpui ding thu a hril. Helpawlhai chetna lei hin district­a inchuknain hai khar vawng nghal a nih.

   

Hi thil tlung le inzawm hin zani zan dar 7 khan PM Narendra Modi in Union Home Minister le Defence Minister hai thangin Union Minister hai meeting a neipui a, hmalak dan dinghai an hriltlang. PM chun Pakistan chu a vau. PM chun Gurdaspur a chehai hi Pakistan thangsana um helpawl hai anni a ring thu a hril.

           

Maharashtra State a Mumbai, Pune, Aurangabad le Nagpur hai bakah khawpui dang dang hai khawm helpawlhai chet theina dinga ring hai chu inralring dinga inhriettir an nih. Punjab­a helpawlhai chetna thanghni zet a liem hnunga Punjab­a helpawlhai chet nawkna hmasa tak a nih.

Pastor nuhmeihai sawrkar sin nei lo ding

Lunglei:  Baptist Church of Mizoram (BCM) chun an Kohran sunga Pastor nuhmeihai chu an pasalhai thawkna hmuna an um ngei ding tiin BCM Assembly in a rel. Hi thu rel hi tukum April a inthawka hmang tan a nih. Kum 2008 a BCM Assembly in hi thu hi an rel le pawm ta a nih. Amiruokchu, Kohran mihai lungril sukbuoi thei zawnga thu leng vel a um ti an hriet leia hi thu hi Kohran mihai inhriettir nawn an nih tiin BCM General Secretary chun a hril. Kohran rorelna insang tak thusuok sukhlawtling dingin Pastor thenkhat, an nuhmei sawrkar sin le sin dang neihai chu an insingsa mek tiin BCM General Secretary thusuok chun a hril bawk.

Myanmar Army Chief in PM an hmupui ding

New Delhi: Myanmar Commander­in­Chief, Senior General Min Aung Hlaing chu New Delhi­ah hung inzin a ta, vawisun le zinga khin PM Narendra Modi, Union Defence Minister Manohar Parrikar, Service Chiefs le midang hai inhmupui a tih. June 4, 2015 nia helpawl han Army hai an lo lambunna le inzawma Indian Army han hrillawkna um lova June 9, 2015 a Myanmar ram sunga helpawl Camps um hai an hang run kha Myanmar sarwkar chun a lawm naw hle nia hril a nih. Hi lei hin ramri zulah Myanmar chun a sipai 6,000 a sie belsa nia hril a nih.

A nuhmei inrai lai a raw hlum

Aizawl:  July 25, 2015 zan khan Sangau­I, Ramhlun venga cheng Vanlala s/o Biakthanga chun a nuhmei Biakdiki d/o P.T. Lalbuaia, Sangau ­III Venglai chu Khawnvartui buok khumin a raw hlum. A phinga inthawka a chungtieng, a awm, a ring le a hmai hai a kang nasa hle a, Sangau Hospital panpui a ni a, sienkhawm a kang hliemna tuorzo lovin a hnungah a thi a, a pasal hi Police han manin case an registered khum. Vanlala le Biakdiki hai hi an inselbuoi a, Biakdiki sung han va thuoikir an tum a, sienkhawm Vanlala hin ngaidam a lo inhni a, a nuhmei a sukrimsi tanaw ding thu le a suol a sim ta ding thu le a nuhmei thuoikir pek lo dinga an ngen leiin Biakdiki hi thuoikir lovin an maksan nawk a. An fesan zovin a in kawtkhar a sung tieng kalin Khawnvartui bur khumin a lighter hmangin a raw a. A khek ri hriein an veng han kawtkhar suksein an va sansuok a, sienkhawm a hliemna tuorzo lovin a thi a nih.

Hit­and­run case­a Salman Khan chungthu July 30­ah

Mumbai:  Kum 2002 hit­and­run case­a kum 5 sung jail intang dinga court in thiemnaw an changtir actor Salman Khan (49)  in appeal a thaw le inzawma hearing chu July 30, 2015 khin nei ni dingin zanita Bombay High Court thusuok chun a hril. Salman a lawyer Amit Desai chun August 3, 2015 chena  hearing hi sukchawl dingin a ngen a, sienkhawm Justice AR Joshi chun  July 30 a hearing nei dingin a rel a nih. Salman Khan hi bail­a suok mek a ni a, zanikhan Court­ah an lang naw a, sienkhawm a farnu Alvira chu a van lang. Salman hin September 28, 2002 khan Bandra hmuna bakery tuol laia zal hai chu a Toyota Land Cruiser motor in a rawt a, pakhat a thi a, midang 4 an hliem a nih. Hi thua hin May 6, 2015 nia kha session Court in kum 5 sung jail intang dinga thiemnaw an changtir a nih.

LTTE cadre hlui fake passport leiin man

Trichy: Police chun zanikhan Trichy International Airport­ah LTTE helpawl hlui A. Kumaraguru (39) of North Jaffna, Sri Lanka chu passport lem (fake) leiin an man. Mr Kumaraguru hi Malaysia pan ding vuongnaa chuong tu m le Switzerland fe tu m niin Police chun an hril. A passport lem hi mi pakhat A. Arockiadass of Pamban, Ramanathapuram district kuta inthawka a lak niin Police chun an hril. Kumaraguru hin Sri Lanka rama civil war tlung huna khan a ke changtiengpang a chân a, ke lem (artificial) inbuk pek a nih. Kum 2014 khan a nuhmei Sudharsini leh Chennai­a hungin Choolaimedu hmuna an cheng a nih. Amiruokchu, hima an ngainaw bakah an ram (Sri Lanka) tienga kir a nuom tanaw leia Switzerland tienga fe hmang tum a nih.

NE a cities 6 Solar cities a siem

Agartala: Union Ministry of New and Renewable Energy hmalaknain NE biela states 6, Assam, Tripura, Jorhat, Kohima, Dimapur, Itanagar le Agartala hai chu Solar Cities a siem tum a nih tiin Tripura Urban Development Department thusuok chun a hril. Sum seng ding hai laia 100 ah 90 chu Ministry of New and Renewable Energy (MNRE), in tum a ta, 100­ah 10 chu a state sawrkar han an tum ding ti a nih.

India in international border a khar

Bhopal: Zanita Punjab hmuna helpawl ralthuom tha tak tak chawi han Police station an hlukhumna le inzawmin zanikhan India chun Pakistan le inrina (international) a chun security sukhau in ramri a khar. Union Home Minister Rajnath Singh chun hi thil tlung hi suizui mek a ni thu le BSF hai chu Pakistan le ramria venghimna sukkhau dinga inhriettir an nih tiin a hril.

Nepal nunghak 21 sansuok an nih

New Delhi:  July 26, 2015 zingkar khan Indira Gandhi International Airport, New Delhi­ah Police han mihriema sumdawngtu mi 2, Vishnu Tamang (25) le Daya RAm (33) hai an man a, an inpuongnaa inthawk Nepal a inthawka an inchawk nunghak kum 20­35 inkar mi 21 zet, Dubai­a thawn an tum hai chu sansuok an nih tiin M.I. Haridar, Deputy Commissioner of Police, IGI Airport chun a hril. July 22, 2015 khan Air India SATS staff 2 man anni a, anni inpuongnaa inthawka hi thil hi Police han an hung thaw thei pha a nih.

Union Minister hlui Handique a thi

Jorhat: Union Minister hlui le Assam a inthawka Lok Sabha MP terms 6 zet lo tling Bijoy Krishna Handique chu lung tieng natna leiin zani hmasa khan kum 82 mi niin Jorhat Medical College and Hospital­ah a thi. UPA­II sawrkara khan Handique hi Union Minister for Mines & DoNER le UPA­I sawrkarah Union Minister of State for Defence, Parliamentary Affairs, Mines, Chemicals & Fertilizers hai a lo chel a nih. Nau nuhmei 3 le a nuhmei a thisan.

Afghanistan sipai 125 in Taliban an zawm

Kabul: Afghanistan rama Badhakhakshan Province sunga Tirgaran phairuomah tuilai hnai el khan Afghanistan sipai le Taliban helpawlhai ni 3 sung an inkaptuo a, hi huna hin Afghanistan sipai 125 hai chun Taliban helpawl an zawm niin Xinhua News Agency chun a hril. Hi inkaptuonaa hin Afghanista sipai 10 le Taliban helpawl 20 an thi nia hril a nih.

Olympic a Gold medal dawnghai Rs. 5 crore

Vadodara: Olympic Games a an state mi le sa, gold medal danghai chu lawmmanin Rs. 5 crore pek ning an tih tiin Gujarat CM Anandiben Patel chun a puong. Olympic Games hi kum thar khin Rio De Janeiro khawpuia nei ding a nih. Hi thu hi zani hmasaa Swami Vivekananda Residential Centre of Excellence Academy, Jama Indoor Stadim, Vadodara hmuna a hawng huna a hril a nih. CM hin players 37 hai kuomah suma thangpuina Rs. 1 crore a sem.

ASPL­ ah Best Midfielder of the Tournament a lak

Diphu: Assam State Premier League (ASPL) football nei zo hlim­a chun Karbi Anglong Morning Star FC Player Cornelius Laldinsang Pudaite, s/o Dr Rosiem Pudaite le Pi Lallawmkim of Sielmat chu Best Midfielder of the Tournament lawmman inhlan a nih. Ama baka hin  Assam Premier League a hin Hmar tlangval Immanuel Intoate, Sielmat; Michael Zote, Rengkai le Thomson, Haflong hai khawm an thang ve a, Final­ah Tv Immanuel hin goal khat a thun ve nghe nghe a nih.

   

Cornelius hi MBBS (doctor) inchuk zo, tuta Balipathar, Karbi Anglong­a Rural Posting Medical Officer sin chel lai mek a nih. I­League Club lien hai khawmin offer an pek zing nia hriet a ni bawk.

ASPL hi Assam­a football inelna insang tak niin May 29­July 25, 2015 inkar sunga khel a nih.

(Input: Kaprivung @ Fox Journal)

Detroit ah Satanic Temple inthut

Detroit:  Satanic Organisation chun July 26, 2015 zan dar 11:30 (loal time) khan Detroit vadung bula Industrial building pakhatah Satanic Temple, darsena siem (Baphomet Sculpture) an thut a, mihriem taksa ang, a lu Kel lu  ang deu le a sir tuokah nuhmeite le pasalte han an biek lai lim a u m a, Satan betu zatelin thla an lakpui niin Reuters chun a hril. Satanic Temple Detroit Chapter a an Director hi Jex Blackmore nia hril a nih.

--------------------------------------------------------------------------------------------------------

VAWISUN THUPUI

Hi hi thil tawp chu a nih; thil po po chu hriet a ni tah a; Pathien ti la, a thupekhai chu zawm rawh; hi hi mihriem thilthaw ding pumpui chu a nih.  ­Thuhriltu 12:13

Editorial

Ei nun hi tuta am a ni a?

Ei hringnun po pova thuneitu chu Pathien a nih. Ami siema inthawk ei thi ni chena ei um dan ding hi a ruot fel sa diem a nih. Hi khawvel var ei hung hmu theina san ama hmangaina lei a ni a, tuchena hring le dama, fa le dawn thei, chang thei, tawng thei, thaw thei a ei um nasan khawm a hmangaina le a zangaina lei lieu lieu a nih. Amiruokchu, mihriem hai hin ei that lai, ei hrat lai, ei hrisel lai, ei khawsa thei lai chu ei Pathien hi hriet fuk harsa ei ti hlak. Bawrsawmna, tlaksamna le harsatna ei tuok huna ei hriet fuk chau hlak. Sienkhawm ei suolna ang chun a mi thungrul ngai nawh.

   

Ei hung tleirawl a, chu hnung hun sawtnawteah ei hung tlangvalin ei hung nunghak a. Ka nun hi keima ta a nih. Ka nu le pa, ka u le nauhai khawmin thuneina an nei nawh. “It’s my life” ei hung ti hlak. Thuawina ei ngainep a, nu le pa inchuktirna le zilna hai ei theida hluo hluo hlak. Midang ngaisakna hrim hrim ei nei nawh. Amiruokchu, nu le pa han an mi ngaisak naw nia ei hriet chun ei lungsenna le lungawinawna hai an chunga ei buokkhum a, an ngaidan le an dit dana um tum der si lovin ei nuom dan le ei dit danin ei um hlak. Sienkhawm a tawpah nu le pa bawk ei bel hlak.

   

Lunngai taka umin ei beiseina meiser chu mani ngeiin ei bur hlum hlak ti ei hung inhrietsuok meu chun ei hratna le ei thahrui a lo tuoizo ta a, ei lungril ngaituona le thluok hratna a lo chawlawl zo tah. “Its My Life” tia thuawina ei ngainep leia  nu le pa mi hmangaina le zilna hai chu ei nakawrah a hung inri veng veng hlak, sienkhawm ei ni ding ang ang ei lo ni zo  ta hlak.

   

Ei damlai Lawng hi mani sengin ei khal a nih. Ei hringnun hi ei kuta an nghat tlat a, ei thilthaw leia thiem changa, thiem lo chang ding ei nih. Ei sin thaw inrimna leia hlawtling ding, ei thabo leia retheina khgura tla lut ding ei nih. Hi ei khuol inzinna rama hin ei chantawk khuo rel Lalpa i ni a, i thlarau hotu tak i ni bawk.  Ei ni ngei ku hi ei ruoltha tak le ei hmelma lien tak ei ni a, ei hlimna le lawmna, ei harsatna le lungngaina hai khawm hi ei nia inthawka hung suok vawng ding a nih. Damlai lawng khal thiem hi a pawimaw bek bek el a nih.

   

Ei damlai Lawng le ei hringnun lampui ei hraw indik chun hlimna, lawmna, hlawtlingna le ropuina haiin mi hmuok an ta, ei hraw suol ruok chun boralna hmuna ei tla lut ding a nih. Bible a ei hmu angin ei hringnun le ei nitin nun dan h i a hraw dan le a tiem dan ei thiem a tul takzet a nih.

           

Zalenna famkim le hlimna tluontling zawngin hringnun  mawina le hlutna sirdein ei tisa chakna lampuiah ei inher liem vut hlak. Ei nun lampui ei sut chieng ngai naw a, ei inchawmna ding ei enchieng ngainaw bawk. Ei lampui chu inrui pumin ei hraw a, tium le thina chang khawm thlir  hran lovin ei um buon buon a, a tawp chu beidawngna le harsatna a hung ni hlak. Ka nun hi keima ta a nih ‘its my life’ ti hin umzie a nei ta ngai nawh. Ei nun hi tu ta’m a ni a? Ngaituo hlak ding a nih.