Hmasawnna Thar | 23 July, 2015

Lanva vadung lienin Suspension bridge a suksiet; khuo tum tumah tui a lut nasa hle

DC in CE/IFCD enfel dingin a ngen

CCPur: Tulai fur ruotui inzawm zuta ei dawng mek le inzawmin Churachandpur district sunga vadung tui tam tieng a pan zing bakah zanita ruosur leia Lanva Vadung tui lien chun Dorcas Veng­a ADC Chairman hlui Pu Langkhanpau in thlang laia Gangpimol le infepawna leilak chu tuilienin a suksiet bakah In khawm iemanizat a suksiet niin ei thu dawngna chun a hril. Lanva vadung tui lienin leilak a suksiet le inzawm hi DC CCPur chun zani zantieng 6:00PM khan  Lanva bridge­ah District Disaster Management Respond Team a members hai meeting neipui dingin a ko khawm bakah Lanva vadung tuilien leia thil a suksiet hai le tuilien ngirhmun enfel­a, a tul anga hma la dingin Chief Engineer, IFCD, Lamphel, Manipur a ngen.

   

Lanva vadung chau ni lovin ruotui tlak rawn lei hin Tuithapui le CCPur khawpui sunga vadung dang dang haia khawm tui a lien hle a, vadung bul hnai le hmun inhnuoina hmuna cheng hai chun harsatna nasa tak an tuok pha mek. Sielmat vadung le Lailam vadung hai khawm an lien hle a, Lailam vadung luongliem leiin zanikhan Rengkai­a khawm In thenkhat a chim bawk niin ei thu dawngna chun a hril.

   

Ruosur lei hin lampui sira tuiluongkawr (nulla) mumalnaw leiin lamlienpui haia chun vadung ang hielin tuihawk an luong huou huou bawk. Vadung luongliem le tuihawk luong hin hmun inhnuoi deuna khaw tum tum haia chun tui a lut nasa hle. Tuilien leia mihriem thi le hliemna tuok ruok chu hi thu ei sut chena hin hrietna ei nei nawh. Tuiin a chim khuo hai lai hin Gangpimuol le Neishial Veng, Zoumunnuam hai khawm a thang.

           

Tuithapui vadung hi a lien pei leiin zani zan hi thu ei sut chena hin P. kamdou veng, Zoumunnuam le New Zouveng haia chun In thenkhata tui a lut mek a, an tithawng hle niin ei thu dawngna chun a hril. Tui a tam pei lei hin Tuithapui vadung bul hnaia um hai chu an hmun himna tieng an inthak tawl. Weather forecast dungzui chun ruo hi a la sur pei ding a nih.

Hnam thuoitu han Pu Kiren Rijiju an inhmupui

CCPur/New Delhi: July 21, 2015  khan Pu Francis Songate le Pu Lalmuanpuia Punte hai chun Hnam thuoitu le Hmar hnam aiawin Union Minister of State for Home Affairs Pu Kiren Rijiju chu New Delhi­ah an inhmupui. Hi huna hin Mizorama Hmar hnam harsatna (political issue) chi tum tum le an ditdan hai Pu Kiren Rijiju kuomah an intlun. Pu Rijiju chun an thil dit le mamaw hai ziek ngeia pe dingin a lo hril bakah an thuhrilhai a lo bawzui ngei ding thu a hril.

   

Pu Rijiju in ziek ngeia pe dinga a lo hril angin zanikhan hnam thuoituhai inrawnkhawmna neiin an lekha pek ding hai sukfel nghal a ni a, vawisun hin Pu Kiren Rijiju kuoma peng an tih. Chun, July 23, 2015 hin Pu Shambu Singh, Jt. Secretary, Ministry of Home Affairs an inhmupui bawk ding niin ei thu dawngna chun a hril a, mipui hai tawngtainaa lo san dingin ngenna an siem.

PLA cadre pakhat AR han an man

CCPur: Police­a inthawk ei thu dawngnain a hril danin July 21, 2015, zantieng 1:00PM khan New Bazar Bus parking, CCPur hmuna PLA cadres Self­styled 2nd Lt. Ngaithem Tomba Singh  @ Laiba (37) s/o Ngaithem Samayaima Singh of Thanga Samukon Leikai, Bishnupur District an man a, hi ni ma zantieng 3:50PM khan CCPur Police kutah an peklut. CCPur Police chun FIR No. 61 (7) 2015 CCP­PS U/S 20 UA (P) A.Act an registered.

CDSA inrawinain Manager’s meeting nei

CCPur: CCPur Dist. Sports Association (CDSA) inrawinain Public Ground, CCPur­a District Super Division League le First Division League um ding le inzawmin zani 11:00AM khan   CDSA affiliate hnuoia Club/Team managers han meeting an nei. Hi huna hin tournament huna thil thaw dan ding le dan le dun zawm ding hai an hriltlang. (L) Lianboi Simte Memorial Dist. Super Division League chu July 28, 2015 in tan ning a ta, (L) Khaikhanlian Memorial Dist. 1st Division League chu August 1, 2015 a tan ning a tih. Super Divn. League­ah team/club 6 thang an ta, July 28, 2015, 3:00PM in Opening Ceremony um a ta, hi huna hin Langkhanpau Guite, Chairman (caretaker)/CCPur thang a ta, T. Goukhomang, ZEO chu guest of honour in thang a tih. Opening match­ah RACC (Rengkai) le SLC (Leatherite) inkhel an tih. First Division League a chun Club 11 thang an tih.

Mass Enrolment Drive

CCPur: District Committee, BJP, CCPur chun July 24, 2015, 10AM­2PM inkar sung khin BJP Office, Hmarveng, CCPur­ah ‘One Day Mass Enrolment drive’ huoihawt an tih. BJP­a thang ve nuomhai chun Aadhar Card, Voter I­Card le PMJDY Account Number chawia inzieklut thei a nih.

ILP chungchanga Drafting Committee meeting hmasatak nei;

 Transport Organisations 12 han July 24 ah motor an khal naw ding

Imphal: ILP chungchanga Bill thar Draft­tu dinga State sawrkarin an din members 5 umna Drafting Committee meeting hamsa tak chu zanikhan hi Committee Chairman le Law & Revenue Minister Th. Debendra Singh Office pindanah zanikhan nei a nih. Hi meeting zova Th. Debendra Singh in a hril dan chun, Committee member­hai  chu zingah dan hrie mihai in sengah fein Bill thar draft­na ding thuah inrawnpui an ta, July 25, 2015 in All Manipur Bar Association (AMA) thuoitu le member­hai inrawnpui an ta, final draft thaw ding huna JCILPS thuoituhai leh inrawntlang an tih tiin a hril.

   

Bill Drafting Committee Chairman in Law & Revenue Minister Th. Debendra Singh; Convenor in M. Yaiskul, Special Secretary Home; Members in Manipur Pollution Control Board Chairman Dr Ng. Bijoy MLA; N. Biren, MLA le R.K Anand, MLA hai state sawrkarin zani hmas khan a ruot tawl.

           

ILPS chungthua hmalatu JCILPS hmalakna an thlawpzie suklangna dingin Manipur a Transporters Organisations 12 hai chun July 24, 2015, zing dar 4 a inthawk zantieng dar 6 inkar sung khin an motor khal an chawlsan ding niin zanikhan thusuok an siem. Hi ni hin passenger Buses hai khawm an service naw ding niin an hril. Transporters 12 hai hin zanikhan Sapam Robinhood thina le inzawma Police personnel inrawlna nei hai chunga action la dinga ngenna in Keishampat hmuna sit in protest an nei bawk.

Imphal­Ukhrul road­ah bandh

Imphal: ILP chungthu le inzawma nuorna chi tum tu m neia um chu a la fe pei a, hmun hran hranah lampui dang le thungbuma nuorna nei a ni bakah Imphal ­Ukhrul Road a cheng han zanita inthawk khan Imphal­Ukhrul Road­ah bandh an thaw tan.

Curfew darkar 14 inthlazal nawk

Imphal: Manipur sawrkar chun vawisun hin Imphal East le Imphal West district haiah   darkar 14 sung, zing dar 5 a inthawk zan dar 7 chen inthlazal nawk a ni thu zanikhan a puong.  Zani khawm khan darkar 14 sung Curfew inthlazal a ni a, hi hun sung hin buoina suok a um hriet a ni nawh.

Pasal thisa ruong JNIMS Morgue­ah

Imphal: Zani hmasaa intahwk khan JNIMS Morgue­ah tu ti hrietlo pasal pakhat thisa ruong sie a ni a, a en nuom hai ta dingin en thei a nih. July 25, 2015 chena a va ngaiven le la an um naw chun dan angin mithiruong hi hre hmang ni tang a tih tiin Police thusuok chun a hril. Mithi hi Sanjenthong Leilak bula hmu, kum 34 mi vel niin an lang.

Manipur naupang UN Gen. Assembly­ah

Imphal: Kum 14­a upa Konkham Lamjinganba of Heirangoithong, Imphal West District, Manipur chu September 18­27,2015 inkar sunga New York, USA­a United Nations Headquarters­a 70th United Nation General Assembly (UNGA) ­ah thang ve dinga thlang a nih. Ama hi India rama mi 10 thlangsuok hai laia thang niin India hmarsakbiel­a inthawk ama chau a thang ding a nih.

CBSE School haiah Yoga class vawihni

New Delhi: Central Board of Secondary Education (CBSE) hai chu haptakar khatah Yoga class vawihni pei nei ding le Compulsory subject­a siem dinga inhriettir an nih tiin AYUSH Minister, Shripad Yasso Naik chun zani hmasa khan Rajya Sabha an hriettir. Chun, Yoga education­ah Master of Education le Elementary Eduation­ah Diploma Course siem dingin  National Council of Teachers Education (NCTE) chu inhriettir a nih tiin a hril bawk. India rama hin CBSE hnuoia affiliated schools 15962 a um tiin Human Resource Development Ministry thusuok chun a hril.

R. Thangmawia ruong July 27­ah

Aizawl: Geneva khawpuia a tlungna Hotel pakhata thi Zo Reunification Organisation (ZORO) President R. Thangmawia ruong chu July 27, 2015 khin a chengnain, Electric Veng, Aizawl tlungpui beisei a nih. A ruong hung phurna ding le inzawma thil tul hai buoipui mek a nih.

Smriti Irani PS thar dingin Jamir

New Delhi: Union Human Resource Development Minister Ms Smriti Irani Private Secretary (PS) thar dingin IAS Officer Ms M. Imkongla Jamir ruot a nih. Jamir hi kum 2002 batch IAS Officer, Karnataka cadre, Nagaland mi niin tuta Deputy Secretary, Department of Commerce sin chel lai mek a nih.

Kutdawhai Rs. 5,000 a pek tawl

RAjahmundry:July 14, 2015 a inthawk khan Godavari Pushkaralu Kut chu Andhra Pradesh state ah hmang tan a ni a. Hi Kut a hin kutdaw han chimbuoi lova an fe hmang theina dingin kutdaw, ration card nei lo hai chu thangpuinain Rs. 5,000 pei pek an ni a, sienkhawm Kutdaw ni lo, ration card nei, Rs. 5000 beiseia Pushkaram Gate a intlar an tam hle a, Gate po po ah kutdaw 1,000 neka tam pei an um niin official thusuok chun a hril. Hi Kut hi ‘River Festival’ a nih.

Delhi Lt. Governor in a hnawl

New Delhi: Delhi­a AAP sawrakrin Delhi Commission for Women Chairperson thar dinga  Mrs Swati Maliwal (30) a ruotna chu Delhi Lt. Governor, Najeeb Jung in a hnawl pek. Najeeb Jung chun, Delhi Commission for Women (DC) Chairperson ruotnaa hin iengleia ama remtipuina lak a ninaw am a na? tiin Delhi AAP sawrkar chu hrilfiena pe dingin a phut. Procedure dungzui chun Delhi Lt. Governor remtipuina lak hmasa ding ti a nih.

Zanita dingin LS le RS inthung sukchawl

New Delhi: Zanikhan Lok Sabha le Rajya Sabha haiah Selkaltu pawl han Lalit Modi le Vyapam Scam chungthu haiah External Affairs Minister Sushma Swaraj; Madhya Pradesh CM Shivraj Singh Chouhan le Rajasthan CM Vasundara Raje hai inban dinga ngennain inpuiah placard hai chawiin an khek sup sup a, rorelna a fe tluong theinaw leiin zanita dingin Inpui pahni hai inthung sukchawl pha ve ve a nih. Lok Sabha inthung vawihni lai sukchawl hri le Rajya Sabha inthung vawili lai sukchawl pha a ni hnunga khawm session inthung boruok a la pangngai zing leia zanita dinga Inpui pahni hai inthung hi sukchawl an nih.

Maharashtra Governor kuomah Mercy petition

Mumbai: July 30, 2015 a khaihlum dinga ti Yakub Memon lawyer Advocate Anil Gedan chun zani hmasa zantieng khan Maharashtra Governor kuomah Mercy petition a pek nawk. Yakub Memon hi tuhin Nagpur Central Prison­a Solitary Cell­ah khum mek a nih. Mumbai a kum 1993­a a zawna bomb sukpuokna le inzawma July 27, 2007 a kha TADA Court, Mumbai in thi dinga thiemnaw a lo inchangtir ta a nih.

Sapeltu 2 kap hlum an nih

Jorhat: July 21, 2015 khan Kaziranga National Park sunga Burapahar Forest Range, Rangalu Anti­Poaching Camp bulah sapeltu le Forest Guard hai an inkaptuo a, Sapeltu pahni kap hlum  anni a, an kuta inthawk .303 Rifle 1, silaimu 2 le Mobile phone hmu a nih. Tu kum sunga Sapeltu 15 kap hluma an umna a ni ta a, tukum sung sapeltu mi 35 man an ni ta bawk tiin official thusuok chun a hril.

Nupui kum 60 mi thina thuah mi 16 man

Guwahati: July 20, 2015 khan Bishwanath Chariali Police Station huop sunga Number 1  Bhimajuli village­ah nupui kum 60 mi a thisaa hmu a ni a, hi le inzawm hin Police han mi 16 an man. Nupui kum 60 mi hin dawi a thaw hlak tia intuma mipuiin an that nia hril a nih. Thata um nupui hi Birubala Rabha of Bhimajuli village, Sonitpur District, Assam a nih. Birubala Rabha hi a lu tanbawng a nih.

Mobile phones 61 zet inrutu man

Shillong: M/s Suman Transport Godown, Paltan Bazar, Guwahati rawk a ni a, M/s Trade Sell Communication, Jhalupara ta ding Mobile phones 61, Rs. 13,71,440 manhu inruk hmang a nih. Hi le inzawm hin Mobile Phones inrutu Sunar of Paltan Bazar, Garikhana chu Mobile phones 31 leh a Ina inthawk Special Cell, Shillong Police han July 20, 2015 khan an man. Sunil Sunar (23) hi M/s Suman Transport, Paltan Bazar, Guwahati hnuoia thawktu a nih.

Assam­ah JE natna leia thi mi 13

Jorhat: Ni 10 liemta sung khan Assam state a Jorhat district sunga chun Japanese  Encephalitis (JE) natna hri leia thi mi 13 an tling ta bakah JE natna invawi mi 22 hmusuok an nih tiin Dr Mobibur Rahman, Joint Director, Health & Family Welfare, Govt. of Assam chun a hril. Hi district sunga hin khuo 45 chuongah fogging le DDT kap, Health Awareness camp vawi 205 nei le thokang damdawia inchie sa Thosilen 33,000 sem a ni ta tiin Dr Mobibur chun a hril.

Nagaland Assembly Dy. Speaker dingin Cong. MLA

Kohima: Nagaland Assembly Deputy Speaker dingin Congress MLA Imtikumzuk chu khingtu um lovin July 21, 2015 khan thlangtling a nih tiin Assembly Speaker Chotisuh Sazo chun a hril. Deputy Speaker ni lai Levi Rengma chu Parliamentary Secrtary a ruot a ni leia  Deputy Speaker post hi hung ruok a nih. Dy. Speaker dinga Congress MLA thlanga u m hi BJP chun an dit naw a, a dodalnain BJP MLA­hai chu inpuia inthawk an suoktau.

July 20 ah Delhi Assembly Special Session

New Delhi: Zani hmasa a Delhi Cabinet meeting chun Delhi Assembly Special Session chu July 28, 2015 a inthung dingin an rel. Hi Session a hin nuhmeihai venghim dan ding chungthu chai tlang an tih. Anand Parbal, Delhi­a nuhmei kum 19 mi that a nina le inzawma Special Session hi ko a nih. Nuhmeihai chunga suolna tlung hlak suitu dingin inquiry Commission indin ning a tih tiin Delhi Deputy CM Manish Sisodia chun a hril.

MP Assembly tiemchin um lova suktawp

Bhopal: Vyapam Scam chungthua opposition han risie nasa taka an siem leia rorel hlei thei lova an um leiin Madhya Pradesh Assembly Monsoon Session chu zo ni ding ni 9 vel la bakin tiemchin um lovin zanita inthawk khan suktawp a nih. Vyapam Scam thua Assembly inthung a zawna ni 3 rorel thei lova sukbuoia a umna a nih. Zanikhan BSP members 4 hai le nuhmei MLA dang 2 hai chun Assembly­ah Chief Minister Shivraj Singh Chouhan chu Vyapam scam thuah inban dinga phutin an khek a, anni hi Congress MLA hai khawmin an lo thlawp bawk a nih

Delhi le Chennai­ah Natl. Centre for Elders

New Delhi: Tar hai ta dingin All India Institute of Medical Sciences (AIIMS), New Delhi le Madras Medical College (MMC), Chennai haiah National Centre for Elderly/Ageing indin a nih tiin Union Health Minister, J.P. Nadda chun zani hmasa khan Rajya Sabha an hriettir. Hieng Centres pahni haia hin Out Patient services le Special Clinics hai hawng a damdawi a thlawna pek an nih tiin J.P. Nadda chun a hril.

---------------------------------------------------------------------------------------------------------------------

VAWISUN THUPUI

Tukhawm mi pasie khek ria a nahai sukset chu, Ama khawm khek ngei a ta, amiruokchu, ngai ni naw nih. -­ Thuvarhai 21:13

EDITORIAL: Thangruol hratna le hlawtlingna

Thangruol hi hratna le hlawtlingna a nih ti chu mitin hriet a nih. Mihriemhai hi khawsa tlang dinga siem ei ni angin sungkuo a inthawkin nun bul ei tan a, chu taka inthawk chun thenum khaw veng a hung um a, khuo le veng a hung um nawk a, ram leilung pienghmang le sawrkar inrelbawlna izirin area hran hran a um nawk a, ram le hnam a hung um a, chuong po poa chun thangruol a tul a, sungkuo a inthawka ram le hnam chenin a thangruol thiem thiem hai an ngirsuokin an thil thawna haiah an hlawtling hlak. Manipur mihai khawm ei thangruol thiem a tul a, ei thangruol thiemnaw chun ei thil ngenah hlawtling ngai nawng ei tih.

   

Manipur­ah ILP system hmang nawk annawleh a ram mihai le ram venghim theina ding Bill le dan siem ei ngen a. JCILPS hmalaknain hma lak a ni a, JCILPS hmalakna hin Manipur mihai po po ei thangruol am ti le a mi huop sa vawng am ti hi ngaituo chet chet a tulin an lang. Eie en vang vang chun JCILPS hmalakna hin phaimihai chau a huomsa amani ding aw ti theiin a um. JCILPS hmalaknain phairam biel hai nasa takin a nghawng a, tlangram biel haia ruok chun nghawng a nei nawh ti inla ei hril suol taluo ring a um nawh. Bandh le nuorna chi hran hran thaw el nek hin Manipur mihai po po ei thangruol theina dingin JCILPS hin hma la sienla chu tuta nek hin an thil ngen hi a hrat lem le a hung hlawtling lem beisei a um.

   

JCILPS thua hin Manipur mihai ei inthuruol tawknaw el bakah political party tum tum hai khawm an thangruol tawk naw niin an lang. Thangruol nekin insawiselna tieng an uor lem a, hi thil hin thangruolna le hlawtlingna intlun ngai naw nih. ILP thua hin ngaidan le dit dan khawm an ang tawl naw niin an lang. Ei hmathlir hi a sei nawh. A bikin JCILPS hmathlirna, dit dan le ngaidan hi a thapa tak a ni thei dim chu maw! Ni 15 sunga Dan annawleh Bill siem zo ding ti hi thil tha tak a tlingzo ring a um nawh. Dan le Bill tha taka Manipur mipui le an ram venghimna ding siemna ding chun hun a lak sawt ding a nih ti chu a chiengsa a nih. China hai thuvarin, ‘vawisun a thi dingin inngaituo la, chatuon dai dingin sin thaw rawh’ ti angin Dan tha le puitling siemna ding chun ni 15 or thla khat ti chu a tawi taluo deu a nih.

   

India danpui induongna ding khan hun iengchen am a aw a, tuhai dan dan am an en a, mithiem le mivar,a bikin dan hrie mihai iengzat am an rawn kuol ding, tuhai rambung le sawrkar constitution, Bill le Act siem hai am an rawn ding ti kha ngaituo ve a tul. Thiltha thaw ding chun hun tawite sunga zo el thei a ni ngai naw a, hun a lak sawt hlak. Thaw phelphuol chun a dai sawt naw a, a tlo ngai bawk nawh. Chuleiin, ILP ngentuhai hin sawrkar hi hun pe tam thei hai sienla nuom a um. Hmawsarum thil thaw hrim hrimin ra tha an suo ngai nawh. Puitling taka thil thaw hin ra tha tak an suo hlak ti hi ei hriet tasa a lo ni khawma hrie nawn nawk a, hmathlir sei tak nei a hun ta takzet a nih.

   

ILP le inzawmin ei state sawrkar chun Drafting Committee an din a, hi Committee a hin legal expert, constitutional expert, Law Department le thil chinchang hrie le mithiem filawra ei neihai inthangtir anni ve si naw a, ieng tak am a hung ang ding ti khawm ngaituo um takel a nih. Bill, Act, Law ei tihai hi ei state a dan siemtu han an induong thei. Amiruokchu, dan a hung ni theina ding chun ei ram President pawmpui thei a tul a, chu dinga dan tha, ei ram le mipui humhim theitu ding ei induong a tul ti khawm hriet a pawimaw.

           

Manipur mi han thil ngen ei nei leia Bandh le nuorna chi hran hran ei nei changa inchuknainhai ei khar pha rawp el hlak khawm hi thil tha le thaw dan tha a ni thei ring a um nawh. JCILPS hlak chun ILP chungthu sukfel a ni hmakhat inchuknainhai hawng lo ding an la ti deu deu! Hi thil hin a tha tieng nekin a thanaw tieng kakhawk a nei lem ring a um. Hieng a ni lei hin inchukna tiengpang hi free zone a sie a tha ring a um. Student­hai ILP leia an lekha inchukna ei sukbahla chun, ei ram siemtu ding le ei ram thuoitu la hung ni dinghai Career ei suksiet ding tina a ni a, hi lei hin ei ram hmakhuo a sukthim pha ding niin an lang. Ei hmalak dan hi ei ennawn rawp nuom a um hle.