Responsive Ad Slot

Hmasawnna Thar | 21 July, 2015

Tuesday, July 21, 2015

/ by VIRTHLI HMAR
Tuolsung
A puonsawp a em naah electric in a man hlum
CCPur: July 20, 2015, 10:00AM vel khan CCPur Police station­a inthawka Km.8 vela hla Monglenphai khuoah Mrs Ngaineikim (41) w/o L. Lienmawi Pulamte of Monglenphai chu a puonsawp tingban­a a em naah tingban­ah electric current a lo fe leiin a man hlum niin Police thusuok chun a hril.
   


L. Lienmawi Pulamte in CCPur Police­a report a pek dan dungzui chun, a nuhmei Ngaineikim hin zani zingkar dar 10 vel khan a puon sawp hai tingban­a em/pho a tumnaah tingban­a hin electric current a lo fe leia a man niin a hril. Hi thua hin CCPur Police chun UD Case No.05/CCP­PS/2015 U/S 174 CrPC an registered.
   
Electric in a manhlum Ngaineikim sung hai hril dan chun, puon a emna tingban hin an chengna ina electric an lakna LT line chun an inchung rangva a tawkfuk a, rangva chun an tingban a tawk leia electric fe ni dinga an ring thu an hril .
   
Ngaineikhum hi electric in a man hnungin inrang taka District Hospital panpui a ni a, sienkhawm doctor han enkawl hman lova thi a nih. Ngaineikim hin a pasal bakah nau pasal 3 le nau nuhmei 2 a thisan.

Dist. Hospital­ah­ah enkawl mek
PHERZAWL: Ram suoka fe ni 18 zet an hmang hnunga July 17, 2015 nia Tinsuong rama dama hmu Mr Ruolthangsei (25) s/o Daniel of Pherzawl chu District Hospital, CCPur hmuna enkawl mek niin ei thu dawngna chun a hril. Mr Ruolthangsei hi June 29, 2015­ a silai chawia ramsuok, in inlawi talova um, khawsung mi le tlawmngai pawl han ni 7 zet an zawng hnung khawma an hmu zo lo, sienkhawm vangnei thlak taka dama hmu nawka um a nih.

Torbung­ah IED pakhat hmu
CCPur: Zani hmasa zingkar dar 7:20 vel khan  CCPur le Kangvai inkara Torbung Bungalow, Teddim Road­a nullah sungah 7­Assam Rifles­a road opening party han IED pakhat an hmu a, pawitawk lo dingin 11:30AM velin hmun himna hmuna an sukpuok. Hi thil lei hin inlirthei inlawn vel darkar 4 sung sukchawl pha a nih.

Africa­ah an inzin 
CCPUR: July 14, 2015 khan Tv. Michael Esh (Director, For One Life ­USA) le Tv. Joseph R. Joute Director, For One Life South­East Asia/India le Life CafĂ©, Rengkai, CCPur (Manipur) neitu le enkaituhai chu Johannesburg, South Africa panin an inzin. MAF (Missionary Aviation Fellowship) hnuoia Pilot le Aviation Engineer hai Retreat hmangpui dinga fe suok ding an nih. Date 27 hin India ram tieng hung kir nawk dinga riruong a nih. Chun, Churachandpur­a inthawka insuo ‘The Churachandpur Times’ Monthly Magazine Editor Alan Famhoite khawm South Korea­ah an zin niin ei thu dawngna chun a hril.
(with inputs from ­LRS Puruolte)
  
Headline
Vawisun Parliament Monsoon Session tan ning a tih; Parliament Session boruok a sosang ring
New Delhi: Parliament Monsoon Session ni 24 sung aw ding chu vawisun hin New Delhi­ah tan ning a ta; Sitting vawi 18 um a ta, Parliament Session hi August 13, 2015 chen nei ning a tih.  Hi hun sung hin sawrkarin Bills thar 8 putlut a tum a, pending Bills 11 a la um bawk. Bills phar ding hai lai Consumer Protection Amendment Bill, Road Transport and Safety Bill, Merchant Shipping Bill le nuhmei hai ta dinga Panchayat le Urban local bodies haia seat reservation  thawna ding Constitution Amendment bills hai phar ning a tih. Lok Sabha a chun pending Bills, SC and ST prevention of Atrocities Amendment Bill le Land Acquisition Bill hai phar nawk ning a ta, Rajya Sabha chun Mental Health, Child Labour, Prevention of Corruption, Whistle Blower’s Protection, Real Estate le Juvenile Justice le pending bills dang hai chai an tih. Parliament Session ding le inzawm hin zani zan khan PM Narendra Modi chun NDA meeting a ko a, Parliament Sesion sunga an hmalak dan dinghai an hriltlang.

Lok Sabha Speaker Sumitra Mahajan in All Party meeting a ko a, Selkaltu member­hai chu Parliament Session tluong taka a fe theina dingin an thlawpna le thangpuina a ngen. Selkaltu member­hai khawma an thlawp ding thu an hril. Hi meeting a hin PM Narendra Modi khawm a thang a, a sawrkar chun Land Acquisition Bill a fepui pei ding thu, a sawrkarin issue tum tum hriltlang an peizing thu hai a hril bakah Selkaltu member han rawtna an siem hai chu ngaithlak a ni ding thu a hril.
   
All Party meeting zova Union Parliamentary Affairs Minister M. Venkaiah Naidu in Media hai an hmupuinaa chun, Vyapam Scam le Lalit Modi chungchangah ieng Minister khawma dan kalin thil an thaw naw a, ieng minister khawm inban naw nihai tiin a hril. Congress chun Vyapam Scam le Lalit Modi chungthu haiah External Affairs Minister Sushma Swaraj; Rajasthan CM Vasundara Raje le Madhya Pradesh CM Shivraj Singh Chouhan hai chu inban dingin an phut a nih.
           
Selkaltu pawlin Vyapam Scam le Lalit Modi hai chungthu Parliament Session a hin hrillang an tum leiin Parliament Monsoon Session boruok hi a sosang hle ring a nih. Land Acquisition Bill thua khawm ngaidan le dit dan nasa taka an kal leiin session boruok a suklum hle ring a ni bawk.

July 23 a inthawk Private school­hai hawng tan
Imphal: JCILPS hmalakna thlawpna leiin July 22, 2015 chen chu Private School­hai khawm la khar ding le July 23, 2015 a inthawk chun Imphal West le Imphal East district sunga Private School­hai chu hawng tan nawk ni tang an tih tiin L. Joy Khuman, Secretary, All Manipur Recognised Private School Welfare Association chun zanita Manaipur Press Club, Imphal­a Chanchinbumihai an hmupui huna a hril. A hma chun July 20, 2015 a inthawka hawng tan dinga an lo rel ta a nih.

Tamubi Devi thattuhai an inpe
Imphal: Irom Ningol Tamubi Devi (65) of Loitang Khullen Mamang Awang Leikai, P.S. Sekmai, Imphal West district thattu mi 4­ hai chu zani zingkar khan Sekmai Police Station­ah an inpe. Tamubi Devi alias  Apabi  thattuhai hi a upa le a nauhai 3 anni a, an that ngei a ni thu Police hmaah an inpuong tah.

Curfew darkar 14 sung inthlazal
Imphal: Manipur sawrkar chun Imphal East le Imphal West District haiah vawisun hin Cufew darkar 14 sung, zing dar 5 a inthawk zan dar 7 chen inthlazal nawk a ni thu a puong. Zani khawm khan darkar 14 sung Curfew inthlazal a ni a, buoina suok hriet a ni nawh.

NSCN(IM) le ZUF an inkaptuo
Imphal: Zani zingkar dar 5 vel khan Irang vadung bul, Tousang area, PS Nungba, Tamenglong district­ah NSCN(IM) le Zeliangrong United  Front (ZUF) pawl an inkaptuo a, thi le hliem ruok chu a tu tieng tieng khawm an um naw niin ei thu dawngna chun a hril.

JCILPS in an thiltum fepui pei
Imphal: Manipur a ILP System hmang nawk dinga an ngenna le inzawma an ngirna le an thiltum chu thlakthleng an la tum naw a, fepui pei an la tum bakah State sawrkarin inbiekpui dinga a fielna thuah an lan pei nawh tiin Kh. Ratan, Convenor, JCILPS chun a hril. Zani khawm khan umni kham le an sinthawhai chawlsanin Manipur phairam mi han human chain le sit in protest an nei a, Imphal kawhpui sunga inchuknain, dawr, bazar le sumdawngna hmun hai khar anni a, Bus le Winger hai khawmin JCILPS ngenna thlawpin an services an chawlsan.

RIMS campus­ah quarter bawl ding
Imphal: Mr S. Minlianthang Vaiphei, IAS, Director, TA, Hills & SC and Managing Director MTDC le RIMS Director Dr Rita Devi hai chun MoU an ziek a, MoU dungzui hin MTDC chun  RIMS campus­ah doctors, nurses le Chowkidar hai umna ding quater bawl a tih. Hi baka hin Managing Director le Kolkata based International multi­national company Larson & Turbo han Imphal International airport infrastructure development chu MTDC in mawphurna a lak dingin MoU ziek a ni bawk tiin ei thu dawngna chun a hril.

Ceasework strike ding an chawlsan hri
Imphal: JAC hnuoia AMTUC le AMGEO in zanita inthawka hun tiemchin um lova an sintahw chawlsana nuorna nei an tum chu ILP ngenna a la fe pei inzanain tuta inthawk ni 15 sung Ceasework Strike la thaw lo le  la chawlsan hri ni dingin JAC thusuok chun a hril.

Rangkachak Rs. 22 lakh manhu leh
Imphal: July 18, 2015, 10:30AM vel khan Moreh a inthawka Imphal pana hung Van pakhat  Customs­a Anti­ Smuggling Unit official, Imphal han sukchawla an dapnaah rangkachak tlang 5 ( Gold biscuits pieces 5), Rs. 22 lakh manhu an man niin Custom division, Imphal Inspector PRO Unit Thilu Lanmai chun a hril.

NSCN SS Major Pistol leh man
Imphal: July 18, 2015 khan T. Akutpa, Senapati district­ ah Red Shield Division hnuoia sipai han Self­styled NSCN (IM) Major Chinghulan Kamei @Alang (40),s/o R.K.Victor of Awangkhul, P.S. Noney, Tamenglong district chu 9mm Pistol 1, a mu 3, Rs. 3,00,000 le Nokia Mobile 2, SIM Cards 6 leh an man a, Kangpokpi PS­ ah peklut a nih. NSCN (IM) Buning Camp a um, thaw ding tul a nei leia hung inzin niin Alang hi an puong.

ZORO President R. Thangmawia a thi
Aizawl: Zo Re­Unification Organisation (ZORO) President R. Thangmawia (79) chu zani zingkar dar 8 vel khan (local time) in a tlungna Hotel, Geneva khawpuiah a thisaa hmu a nih. R. Thangmawia hi Zunthlum natna invawi a ni leiin lungphu chawla thi ni dinga ring a nih. July 15, 2015 a kha a ruolhai le UN 8th Session on Expert Mechanism on The Rights of Indigenous Peoples” ­a thang ve dinga Geneva khawpui pana fe an nih.
   
A ruong hi Mizoram tienga hun thawn dan ding ngaituo a ni a, Iengtik ni am a ruong a hungtlung thei ding ti ruok chu hriet a la ni hri nawh.
   
Thiemna tieng B.Com zo niin hnam invawi mi tak, MNF hun lai khawm Senator nina lo chel a ni a, ZORO an ding hnungin UNO hnuoia Zohnathlak hai insuikhawm nawkna ding kawnga nasa taka hma latu a nih.

DCW Chairperson tharin Maliwal
New Delhi: Delhi sawrkar chun AAP thuoitu Navind Jaihind nuhmei, Mrs Swati Maliwal chu Delhi Commission thar dingin a ruot. DCW members dingin Promila Gupta, Frarhan Malik le Sarika Chaudhary hai ruot an nih. Mrs Maliwal hin Mrs Barkha Singh Shukla a thlakthleng ding a nih.

Labour Law siem that ning a tih:PM
New Delhi: Zanikhan New Delhi­ah Prime Minister Narendra Modi in Indian Labour Conference a vawi 46­na a hawng. Sinthawtu (labours) hai an lawmnaw chun ei ram hi hlim le lawmin um thei naw nih. Sinthawtuhai hi ei ram tungdingtu an nih. Hi lei hin Labour Law siem that ning a tih tiin hi Conference­a PM Narendra Modi in thu a hrilna huna a hrillang.

Kum 2014 sung loneitu 5,650 an inthat
New Delhi: Kum 2014 sung khan Maharashtra, Telangana le Chhattisgarh state haiah Loneitu beidawnga mani le mani inthat 5,650 an tling phak a, hienghai laia 5,178 chu pasal le 472 hai chu nuhmei an nih tiin National Crime Records Bureau (NCRB) thusuok chun a hril. Loneitu mani le mani inthat taamna tak chu Maharashtra a ni a, loneitu 2,568 an inthat.

Nagaland Dy. Speaker dingin Imtikumzuk
Kohima: Nagaland Assembly Deputy Speaker thlangna um dingah inhnukdawk theina hun tawpna tak zanikha a ni ta a, Congress MLA Imtikumzuk chau hin nomination a file leiin Nagaland Assembly Dy. Speaker a hung ni ding a nih. Dy. Speaker election hi Assembly tan ni July 21, 2015 hin nei ning a tih. Dy. Speaker ni lai mek Independent MLA Levi Rengma chu tukum April thla khan Parliamentary Secretary­a hlangkai a ni leia post hi hung ruok a nih.  Nagaland­a NPF sawrkar chun May 8, 2015 khan Opposition Congress MLAs 8 hai laia 7 hai chu an ministry­ah an laklut ta leiin Nagaland Assembly member 60 umna chu Opposition neilo an hung ni ta a nih.

Police battalion thar 17 indin ding
New Delhi: Central Assistance thangpuinain Union Home Ministry chun Jammu & Kashmir le Naxalites/Maoist helpawlhai chetna state haiah Police battalions thar 17 indin a tum a, hienghai laia battalion 5 chu Jammu & Kashmir state a ding ti a ni a, battalion 12 hai chu Maoist helpawl hai chetna biela ding ti a nih. Battalion pakhat peia hin Police 1,100 pei, a rengin Police 18,700 lak ding ti a nih.

Vyapam scam whistleblower Anand Rai sawn
Bhopal: Government doctor le Vyapam scam whistleblower Anand Rai chu senior BJP leader chunga complaint a thelut nikhat hnungin zanikhan a thawkna hmuna inthawk sawnhmang a nih.  Anand Rai chun senior BJP leader le Union Minister hlui Vikram Verma chuh Santosh Medical College, Bhaziabad hmuna a naunu MBBS inchukna dingin a thuneina a hmangsuol tiin CBI kuomah complaint a peklut a nih. Dr Rai hi Gandhi Medical College, Bhopal­a sawn a ni a, a nuhmei Gouri khawm government doctor tho niin ama khawm hi Mhow civil hospital, Indore a inthawk Ujjain district Hospital­a sawn a nih. Dr Rai chun, a thawkna hmun sawn a nina thua hi challenge­a Court an pun ding thu zanikhan a hril.
   
Hieng laizing hin Vyyapam scam whistle blower tho Ashish Chaturvedi chun a thawpui hai leh Madhya Pradesh CM Shivraj Singh Chouhan kuomah lekha thawnin Dr Rai le a nuhmei sawn an nina hi lakkir dinga an ngen ding thu a hril a, an ngenna sawrkarin a sukpuitling naw chun protest an nei ding thu a hril. CBI chun Supreme Court in Vyapam scam suitu dinga a ruota inthawk tuchena hin cases 12 an registered tah.

MP­ ah tuilien leiin mi 12 an thi
Sehore:  Madhya Pradesh­a Sehore district sunga Khanabadh village a chun ruosur leiin tui nasa takin a lien a, tui lienin sungkuo 3­a mi 12 hai chu a len hmang. Hieng sungkuo 3­a mi 12 hai hi an Lo tua an um laia tuilienin a len niin ei thu dawngna chun a hril. Mithi hai laia 8 hai ruong hmu a nitah. Madhya Pradesh Chief Minsiter Shijraj Singh Chauhan chun hi thil tlungna khuo hi a va sir a, thina tuok sunghai chu zangnadawmna Rs. 2 lakh seng pek an ni ding thu a puong. Hi thil tlungna hmun hi Chief Minister tlingna A/C huom sung a nih.

India rama Internet hmangtu an pung pei
New Delhi: India rama chun kum tin mobile hmangtu 27.8 percent in an pung pei ang bawkin internet hmangtu khawm an pung pei a, kum 2017 chena chun India rama internet hmangtu hi 503 milion an tling phak ring a nih tiin IAMAI le KPMG in ‘India on the go­mobile Internet Vision’ report an peka chun an zieklang. June 2015 chen khan India rama hin internet (wireline and wireless) hmangtu 350 million an ni a, kum 2017 chena chun mobile internet hmangtu hi 314 million an hung tling phak ring a nih. Kum 2014 chena khan India rama chun mobile internet hmangtu 159 million an um. 

Nuhmei suolluina thuah SP leader naupa man
Badaun:Uttar Pradesh­a Kadar Chowk hmuna nuhmei tleirawl kum 14 suolluina le inzawmin Samajwadi party(SP) leader Tekchand Pal naupa Omendra Pal le midang pahni hai chu zanikhan Police han an man. Nuhmei tleirawl hi July 18, 2015 zana an suollui a ni a, midang pahni man hai chu Narendra le Surendra hai an nih. Nuhmei tleirawl hi hmun fienriel pakhat­a thuoihmanga an suollui niin Police chun an hril.

FIFA Presidential Election Feb. 26­ah
Zurich: Khawvel football­a thuneitu insang tak FIFA presidential election chu February 26, 2016 khin Zurich hmuna nei ni dingin zanita FIFA thusuok chun a hril. FIFA hin members 209 an um a, hienghai hin FIFA President an thlang ding a nih. FIFA President ni lai Sepp Blatter chu a term 5­na dinga thlangtling a ni hnungin corruption thua officials 7 zet man an ni hnungin an ban nawk a nih.
   
FIFA presidential election­a ngir el theia hril hai chu Brazillian footbal great Zico le French football great Michel Platini hai an nih. Zico hin a ngir ding a sukchieng ta a, Platini chun chawlkar hni hnunga a sukchieng beisei a nih.

Indian Hockey Coach Paul Van Ass ban
New Delhi: Indian Hockey Chief Coach Dutch mi Paul van Ass chu chief coach sin a thawa inthawka thla 5 hnungin ban a nih. Hockey India chun ban a nina san a puonglang nawh. Paul van Ass hin tulai hnai ela Antwerp, Belgium hmuna Hockey World Cup league Semi­finals nei huna India team performance report a peklutnaw bakah Hockey India (HI) President Narinder Batra leh an inmil beknaw nia hril a nih.
---------------------------------------------------------------------------------------------
VAWISUN THUPUI
Ka ko cheu a, in ngaisak nawh a, Ka ban ka pharsuok a, tukhawma in ngaisak nawh a, Ka thurawn chu iengkhawm loah in siem a, Ka kawkna a ieng khawm chu in ngai naw leiin, Kei  khawm in lunginzing nia chun innui ka ta, In titna hung pha khawm chun nuisan ka tih, In tina chu thlipui angin, In lunginzingna chu thlivir angin a hung a, Rimsikna le tuorna chu in chungah a tlung pha chun; Chun, kei chu mi hung ko an ta, nisienlakhawm, dawn naw ningah; Nguntakin mi hung zawng an ta, nisienlakhawm, mi hmu naw ni hai. ­Thuvarhai 1:24­28

Editorial: Nauhai le nu le pahai inkar

Tienlai khan sapramah khun naupang pakhat hin banga thil a ziek rang nei nuoi el a, a nu chun a hal hrep el a, inthlahrung takin hmun kilkhatah hin nuorput, hlimlo le inhmur bet butin an thung ta zing el a. A nu chun a naupa nuor chu thlem lungawi tumin a thil ziekrang thuah a lungsenna chu a bo ta thu a hril a, a nuorna suklungawi nawk tumin fiemthu dam thawin, fak thei inhnik hnik a pek bakah thil thar inchawk pek dingin a thlem a. Amiruokchu, naupang nuor chu a thlem lungawi thei chuong naw a, naupang chu a um pangngai  chun a um ta zing el a. A nu chu a lungril takin inhawi a ti thei nawh. Thaw dan ding hrie lovin a tosan ve ta a.
   
Darkar iemanizat a liem hnung chun a pa fena nei chu in a hung tlung a, an bang fai em em le rawng mawi taka nal, hmelhem taka ziekrang chu a hung hmu ve ta ngei a. Hi hi tu ziek am ana? a va mawi em em ngei de aw!” a ti a, naupang chun hlim em em, phur tak le inti thei em emin, ‘keia ziek” a lo ti a; a nu halna chu a theinghil a, a hma ang bawkin hlim em emin an hnel nawk ta a, an sungin hlimtlang takin an um nawk ta a.
   
Hun iemanichen chu naupang hlim taka an hnel hnung chun a pa chun bawia la hung ta tiin a ko a, an riekna pindanah a thuoi lut a, a pa chun, ‘bawia i thil ziek hi a mawi taluo, sienkhawm i ziekna hi a ziekna hmun ding a ni naw leiin a ziekna hmun ding hril ka ti che a ti a; lekhapuon  le a ziekna hmangruo ziekhmawl a pek a, an ziektir ta a. Chu naupang chu a hlim em em a, milim ziek a hung ni ta a. Hi naupang hi a hung inthanglien pei a, ei Lalpa Isu Krista le an chuktir han zanbu nuhnung tak  an kil lai lim ‘The bond Supper annawleh ‘ The Last Super’ ti ziektu Michael Angelo hi a hung ni ta hiel a nih.
   
A pa khan hal ve hrep ta sienla chu Michael Angelo hi milim ziek thiem a hung ni ring a um nawh. Hi thil hin ngaituona sei takel le inchuk ding tam takel a mi pek a nih. Nauhai ti anga an um naw changa tawngbau mawi lo tak taka hal nghal el dam, pa’n nauhai a hal laia nu lungsen taka lo thang a, lo hal ve dam, nun nau a hal laia pahai lo inrawl ve a, kut chen lo thlak el a that nawzie dam, lungsen tawngkhawng laia nauhai hal le zil a that nawzie dam, lungsen bek bek laia insum thei tulzie le a thatna dam, ngilnei tak le zaidam taka nauhai zilna pek le inchuktir a tulzie dam, vawikhat thil suksuolna leia inhal hrep a that nawzie dam, an thil suksuol a that nawzie hrilfie hmasa loa a pawng a puia inhal el a that nawzie hai hi chanchin a inthawk hin inchuk thei a nih.
   
Nauhai le nu le pa hai inkar hi an hlat a, inlaichinna a that a tul khawp el. Sociologist le Psychologist hai chun, nau han nu le pa an dodalna san le thalai han nu le pahai an dodalna hin sietna chi tum tum, thina chen an tlun thei an tih. A san tam takel umin an hril. A san an hril hi a tam ang reng hle a, tu ela ziek seng ding a ninaw leiin thenkhat chu, nau han kut an tuor ngun  taluo pha pha hmangai lo le ngaisak lo niin an inngai a, hriet hlaw (attention pek) an nuom lei, khawsawtna le mal ngawi ngawia inhrietna an nei lei dam niin an hril.
           

Psychologist­hai khawmin thurawn tha tak tak an nei a, zuk hril el seng a ninaw a. Thenkhat chu insungkhurah pawimawna le an thurawn ngaisak ve ding, hi thil hin an pawimaw ve a, inza an hlaw ve a nih ti an hriettir thei. Nu le pa hai, pi le puhai entawntlaka um, chet le tawng a nunpui ding. Nauhai kutthlak chawr chawr lo ding, tawngbau tha lo hmanga zil lo ding, hmangaina tak tak neia hal ding le inchuktir ding, chuong naw chun pangngaiah an nei nuom. An harsatna hrietpui le hrietthiempui ding, khap bur le kal tlat (refusal) a tha lem naw a, an rem thei dan le a lampui zawng ding tihai a nih.
Don't Miss
© all rights reserved
made with by Simon L Infimate