Hmasawnna Thar | 17 July, 2015

Tuolsung

Saikawt MDC tling lawmna puithu taka nei; MLA 4 in an uop

CCPUR:  July 16, 2015, 12:00Noon khan  Election Committee of Pu Lalhrillien, 19­Saikawt  ADC constituency huoihawtnain Saikawt Youth Club Hall, CCPur­ah Saikawt MDC dinga Pu Lalhrillien thlangtlinga a um lawmna le Pathien kuoma lawmthu hrilna programme puithu taka hmang a nih. Hi huna hin Dr Chaltonlien Amo, Chairman, HAC, Manipur; TN. Haokip MLA Saikawt A/C; Vungzagin Valte MLA Thanlon A/C (Parliamentary Secretary; Ginsuanhau MLA  Singngat A/C han an uop bakah Pu Langkhanpau Guite, MDC; Chairman (caretaker) HPA;  Upa Laldawnlien Varte, President, HYA General HQ  hai khawma uopin thuhrilna hun an hmang ve. Anni baka hin MDCs Pu Lal Hosssan, Pu Lalhmangpui; Pu M. Gouzamang, Pu Khaipao Haokip; Pu Ngamhao Touthang le MDC dang thenkhat le hnam sunga Pawl tum tuma thuoituhai le Dr Rochunga Pudaite le Pi Mawii Puidaite hai khawmin an uop ve. Hun hawng tawngtaina Pastor Lalrohlu in a nei a, Pu Lalhrillien ta dinga tawngtaipekna Rev. Jessai Neitham, D/S, Saikawt Dist. EFCI in a nei.

    

Hi huna Pu Langkhanpau in thu a hrilnaa chun Pu Lalhrillien chu mipuiin an dit leia an thlangtling nawk a ni thu, a tling lo hai khawm a tuorpui thu a hril. Hill Peoples Alliance (HPA) hi party ni lovin tlangmi hai issue­a MDC han hma dawm tlangna dinga indin ‘Alliance’ a ni thu; Manipur­a ADC 6 hai Sixth schedule hnuoia siena ding chungthua central in Manipur sawrkar chu Chief Secretary fethlengin thu a hung pek ta a, September thla chena ADC hai Sixth Schedule hnuoia sie an ninaw chun ei MLAs hai leh inrawntlanga hmalak a ni ding thu le  Congress in umnaw hai sienkhawm HPA chun Congress MLA hai an thlawp pei ding thu a hril. HPA member han Pu Lalhrillien hi lawmpuinain an nupa in puon insiltirna le par inhlanna an nei.

    

Pu Laldawnlien Varte chun, ei ram siemthatna ding hin sawrkar chau ei nghak a ni chun iengtika khawm hmasawn ngai naw mani a, ei ram hmasawnna ding hin mipui hai chunga mawphurna an nghat lien hle a nih tiin a hril.

    

Pu TN. Haokip chun, a term hnina Pu Hrila MDC dinga thlangtling a ni chu a lawmpui thu hrilin malsawmna tam tak leh mipui ta dinga sin nasa lema a thaw ngei a beisei thu a hril.

    

Dr Amo chun, ei ram le hnam siemna dingin sinthaw tlangpui dinga MDC tam tak thlangtling thara an umna thua lawmum le lungmuong um a ti thu, ram le hnam hmangaina leia election a ngir, tlinglo hai khawm hnam hmangaina tawpsan el loa thang la zing dingin a ngen. Mipui palai dinga thlang MLA/MDC hai tuta neka an hrat lem theina dingin Kohran le mipui han an thlawp that a pawimaw thu a hril.

            

MDC lawmna programme hmang zo hin Saikawt khelmuol­ah biel sunga mipuihan  lawmna ruoi buthleng an kiltlang. MDC lawmnaa hin Bawng 4, Siel 1 le Vawk 6 that a nih.

Khawpui sung Traffic Rule sukkhau

CCPUR: Churachandpur khawpui sunga traffic rules le regulation tha lema a um ditnain Traffic Police chun zanikhan khawpui sung hmun tum tum fangkuolin sin an thaw tan. Traffic Police­a OC S. Jamliankhup, SI inrawinain zanikhan New Bazar area lampui sira motor, side indik lova in nghat hai le lampui sira thil zawr tum tum hai chu an thil zawr na table hai lapekin Police Station­ah an phurlut bakah Tiddim Road zula foothpath hai thil zawrna dinga a chung turpouline inkhum hai khawm an lakthlak tawl. Hmatieng peia motor ke pahni nei Helmet khum lo le document dang dang chawi lo hai khawm an la dap pei ding niin Traffic Police chun an hril.

Suol dona an tan ding

CCPUR: New Lamka Vengnuam South YPA unit chun an biel sunga suol dona July 20, 2015 a inthawk tan an tum a. Ui inthlazal khapna bakah inruithei dang dang zawr hai khawm dap ning an ta, Ui inthlazal hai khawm an man pei ding a nih.

MU Admission Help Desk

CCPUR: Manipur University­a tlangmi hnam tum tum 14 thangna Manipur University Eimi Welfare Society (MUEWS) chun MU­ a Admission thaw nuom tlangmi hai hmakhuo ngainain zanikhan CCPur, Moreh le Sadar Hills haiah MUEWS Help Dest­cum­Counselling Centre hawng a nih. Centre pakhatah Prospectus 50 pei sie a ni a, CCPur Centre­a chun zanikhan a dit an tam leiin sem zo vawng a ni thu MUEWS Edn. Secy. Siamkhanmuan chun a hril. Zanita chang zo lo hai chu an hming le contact number hai lain a hungtlung nawk huna pek ning an tih. Centre­a hin entrance exam­a question hlui hai khawm Rs. 50 le a chungtieng peka hmu thei a nih. Form hi mania submit ding a ni a, B.Ed. a ding chu form semdawk a la ni nawh.

Headline

ILPS thuah All Political Party meeting nei;  

Bill thar thla khat sunga zo dingin an rel

IMPHAL: Manipur Chief Minister O.Ibobi Singh chun zanikhan Inner Line Permit System (ILPS) thuah All Political Party  meeting a ko a, meeting hi zing dar 9 a inthawk tan a nih. ILPS chungthuah mipui lungsen sukre dan ding le ILPS chunghanga Bill thar induong (draft) dan ding an hriltlang. All Political Party meeting chun ILPS thua  Bill thar chu thla khat sunga draft zo dingin an riruong bakah Bill thar draft­naa hin JCILPS thuoituhai khawm thang rawhai seh tiin an rel. Chun, Bill thar  draft­na ding le inzawm hin vawisun hin dan hremihai inrawnpui dingin an rel bawk.

    

O.Ibobi Singh chun, ILPS chungthua Bill thar hi state sawrkar chun an rang thei ang taka zo vat a nuom a, hi lei hin Bill thar draft­na sin thaw tan a ni tah tiin a hril. Bill thar draft­naa hin Media hai inrawnpui anni ta a, zingah dan hrie mihai inrawnpui nawk ning an tih tiin a hril. Bill thar draft­na thu hi state sawrkar chun a ngaipawimaw hle a, JCILPS thuoituhai le Manipur mipuihai khawm thlawp ding le Bill thar siem dinga hma lak tan a ni ta leiin ILP thua nuorna chi tum tum thawa um hai chu la tawpsan hri phawt dingin Manipur mipuihai a ngen.

    

Hieng laizing hin Student­hai chun Sapam Robinhood thatnaa thanghai hming mipui hrieta puonglang ding le hremna pe dingin state sawrkar an ngen bakah an thil ngen hi sukpuitling a ninaw chun Greater Imphal areas sunga Government Higher Secondary School­hai chu khar dingin inthina an siem.

            

Joint Action Committee on Killing Sapam Robinhood pawlin zanita darkar 12 bandh an thaw chun Manipur phairam biela thlawp a hlaw hle. Bandh thlawptu han Kiyamgei Pal Ahanbi hmuna bandh bawsie tiin Maruti Van ML04­B0787 an suksiet. Imphal East le Imphal West District sunga Bandh thlawptuhai hnawtdarna dingin Police han tear gas an kap khum a, mi 2 an hliem a, Swombung Hospital panpui an nih tiin ei thu dawngna chun a hril. Chun, hi thil tlaung le inzawma Chanchinthar lakhawm dinga fe Reporter pakhat Police han an vuok a, a hnungin reporter vawtu Police in ngaidam an hni leiin inthatrem niin ei thu dawngna chun a hril.

Curfew darkar 13 inthlazal

IMPHAL: Curfew puonga umna Imphal East le Imphal West district haia chun vawisun hin darkar 13 sung, Zing dar 5 a inthawk zantieng dar 6 chen Curfew inthlazal a nih tiin hieng district pahni haia District Magistrate­hai chun zanikhan thusuok an siem nawk.

AR han Rul chuk an sanhim

IMPHAL: 41 Assam Rifles chun July 14, 2015 khan Shirui village, Ukhrul district­a Rul in a chuk leia inrik taka um H. Ngalangzar (84) chu an Unit Office­ah Rul tur thatna damdawi kapin a hringna an sanhim niin zanita PRO Assam Rifles (South) thusuok chun a hril.

Pharmacy Part­I exam result

IMPHAL:  Manipur University hnuoia Pharmacy Part­I Examination, 2015 result puong a ni ta a, result hi Controller of Examination­ah hriet thei ning a tih.

Monsoon Session­ah Bills thar 8

NEW DELHI: Parliament Monsoon Session hung  um dingah NDA sawrkar chun Bill thar 8, GST Bill, Negotiable Instruments (Amendment) Bill, 2015; SC & ST (Prevention of Atrocities) Amendment Bill, 2014; Delhi High Court (Amendment) Bill, 2015 le The Electricity (Amendment) Bill, 2014 hai thangsain putlut a tum. Pending Bills 11 a um bawk. Parliament Monsoon Session hi July 21, 2015 ­ Autust 13, 2015 inkar sunga nei dinga ti a nih.

JNV CCPur in National Award an dawng

NEW DELHI:  Ministry of Parliamentary Affairs huoihawtnain zani hmasa khan New Delhi­ah 18th  National Youth Parliament competition for Jawahar Navodaya Vidyalaya (JNV) nei a ni a, hi competition a hin JNV, Tuinom, CCPur, Manipur in lawmman pakhatna an lak a, Running Parliamentary Shield le Trophy an dawng. Hi inelnaa hin JNV hran hran 64 an thang. JNV Tuinom, CCPur a inthawka 18th National Youth Parliament Competition 2014­15 a zu thanghai chu Mr. Ebenezer Thangzoulian s/o Kaizalam Tungnung le Mr. Muanlian s/o Upa S. Nangkhanlal of Zomi Colony hai an nih.

NSCN(K) cadre 2 AR han an kap hlum

KOHIMA: July 15, 2015 zan khan Assam Rifles patrolling­a fe hai chu NSCN(K) helpawl han Phek district­a Meluri hmuna an lo kap a, inkaptuona tlungah Assam Rifles han NSCN(K) cadre 2 an kap hlum a, pakhat hringin an man niin Kohima­a Assam Rifles official thusuok chun a hril. Inkaptuona hmuna hin AK­47 Rifle pakhat le rifle dang hmu le man a nih.  Tuta thla bul lai khan School naupang pahni thuoihmang an nina le inzawma Assam Rifles hai hi patrolling­a fe an ni a, chu huna hi thil hi tlung niin ei thu dawngna chun a hril. School naupang pahni hai hi an thu le hla lova Helpawl­a thang dinga thuoihmang ni dingin security forces hai chun an ring a nih.

HIV/AIDS inrawi a sukdam niin a hril

GUWAHATI: Assam state khawpui Guwahati a inthawka km. 20 vela hla, Sonapur an ti hmuna Institute of Applied Human Genetic Engineer neitu, Dr Baruah (Cardiac Surgeon) chun HIV/AIDS invawi a sukdam thei thu le kum 7/8 liemta sung khan HIV/AIDS a damnaw mi 86 zet a sukdam ta niin July 15, 2015 khan a puong. Damdawia a hmang chu Himalayan region­a ramhnuoia inthawka a lak hlohna (medicinal plants), fak thei niin a hril. Kum 18 liemtah khan Dr Baruah hin Vawk lung mihriem lungah an buk (transplant) leiin lunginah ni 40 a lo intang pha ta niin ei thu dawngna chun a hril. A damdawi hmingah Baruah Biological Combat Genes an buk niin a hril.

ULFA (I) in Hindi tawng hmang mi 2 an kap hlum

GUWAHATI: July 14, 2015 zan khan ULFA (I) pawla mi han Assam state a Pengeri, Tinsukia district­ah Hindi tawng hmang Nandlal  Shah le a naunu Kajol hai an kap hlum bakah an sunghai mi 3 an kap hliem niin Police chun an hril. Mi kap hlumtuhai hi Myanmar a inthawka hung, Myanmar a training zo sa niin ULFA (I) cadre mana um Kanu Khonikar chun a hril.

Christian school rawk, mi 2 an thi

NEW DELHI:  July 15, 2015 khan Delhi United Christian School, Baptist Church bul, Civil lines, New Delhi a mi chu rawk a ni a, Principal Darwin Pershad office pindan sunga Rs. 24,000 le Mobile Phones 6 inruk hmang a ni bakah hi school security guard Sunil Kumar (30) le a sangpa Anil (22) hai chu school compound sungah a thisaa hmu an nih. Kumar le Anil hai hi an kut le ke hai hrui le bedsheet a khit a ni bakah an luah satna be inthuk tak hmu theiin a um. Hi thil hi 2:00AM vela tlung le zing dar 7:30 vela that an ni thu Police kuomah report pek a nih.

Pakistan sipai han civil mi 4 an kap hliem

NEW DELHI: Zanikhan Pakistan sipai han Ceasefire bawsiein J&K a R.S. Pura Sector, Jammu district a Border Outpost 5 an kap nawk a, Civil mi 4 an kap hliem nawk. Chun, Pakistan chun a vanboruok sunga dan kala vuong Indian Spy Drone an kapsiet niin an hril a, sienkhawm India chun thudiklo a nih tiin a hniel. Hieng thil hai lei hin India le Pakistan inkarah boruok a lum thar hle. Pakistan in Ceasefire inzing uta a bawsietna lei hin Home Minister Rajnath Singh chun zanikhan External Affairs Minister Sushma Swaraj le Defence Minister hai inhmupuiin Jammu & Kashmir­a law & order ngirhmun an hriltlang. Hi huna hin National Security Advisor Ajit Doval khawm a thang.

Nuhmei pasal zalpui tum man

NEW DELHI:  Zanikhan pasal pakhat a thu le h la lova zalpui tumtu Renu Lalwani (32) chu South Delhi­ah Delhi Police han an man. Hi thil hi July 15, 2015 nia Saket area a tlung a nih. Pasal a zalpui tum hi Autorickshaw driver Umesh Prasad (41) niin Police chun an hril.

NBT Director dingin Rita Chowdhury

NEW DELHI: Sahitya Akademi Award winning writer Rita Chowdhury chu sawrkarin Director, National Book Trust (NBT) dingin a ruot. August, 2014­a hi sin cheltu M.A. Sikander a sina inthawk a pension hnunga NBT Director um ta lo a nih. Ms Rita Chowdhury hi Asom Gana Parishad (AGP President hlui le tuta BJP zawm tah Chandra Mohan Patowary nuhmei a ni a, Cotton College, Guwahati­a Political Science Professor sinthaw lai mek a nih.

Van kangah nupui 6 a kang hlum

CHENNAI: Zani hmasa zan khan Tamil Nadu state a Naranapuram­Menampatti Road­ah Van pakhat a eksiden a, lamthlangah an letthla a, a kang leiin a sunga chuong  nupui 13 hai laia 6 a kang hlum a, nupui 7 a kang hliem. Hliem hai hi Government Hospital­ah Admit an nih tiin Police thusuok chun a hril.

Mimkei leiin mi 3 an thi

ITANAGAR: July 15, 2015 zingkar inhma tak khan Arunachal Pradesh state a Sappa khuoah mimkei rapthlak takel a tlung a, In pakhat a vurkhum leiin sungkhata nupa tuokkhat le an naupa kum 3 mi, an rengin mi 3 hai chu a vur hlum. Thina tuokhai hi Sonitpur district, Assam mi an nih. Arunachal Pradesh CM Nabam Tuki chun thina tuok sunghai zangnadawmna Rs. 4,00,000 seng pek dingin a puong.

Mobile Phone dit leia a that

AIZAWL: July 7, 2015 zing dar 9 vel khan North Serzawl le Chhanchhuanakhawpui village Tuituong vadung kama lo tua riek nupa tuokkhat Lalrinchhana (45) le a nuhmei Laizuimawii (40) of Chhanchhuanakhawpui village hai chu a thisaa hmu an ni a. Hi thil tlung le inzawma man tleirawl pasal kum 16 mi chu Juvenile Justice Board members han thu an indawn a, Mobile phone inchawk a nuom leia nupa tuokhai hi a that niin an puong. Nupa tuok hai hin NLUP scheme hnuoiah Rs. 66,000 an dawng a, Rs 30,000 an hmang ta a, Rs. 36,000 hi lain a fe hmang san a nih tiin C. Laldina, SP, Aizawl chun a hril. Lalrinchhana hi a makpa a ni a, silaiin a kap hlum a, a unu (step sister) Lalzuimawii hi thinghera a vuok hlum niin tuolthattu hi an puong tiin Board members han an hril.  Chun, Hrei hmangin a uhai hi a sat hliem bawk.

Zu tha lo dawn leiin mi 2 an thi

MEERUT:  Uttar Pradesh state a Muzaffarpur district sunga Bahadurpur khuoah July 13, 2015 zan khan mi 4 in Zu an dawn a, an zu dawn hi a thanaw leiin an damnaw pha a, Hospital panpui an ni hnungin July 14, 2015 khan mi 4 hai laia pahni an thi a, pahni danghai chu Hospital­ah enkawl mek an la nih tiin Jinendra Upadhyay, Deputy Commissioner (Excise) chun a hril.

Unau 2 gas thalo hip lut leiin an thi

MUZAFFARNAGAR: Zanikhan Shamli district a Khodsama khuo a cheng Rajiv (28) chu an Well sunga tui pump dawkna khawl a siet leia siemtha dinga a lut huna a suok tanaw leiin a upa Sandeep (30) chun sansuok tumin Well sungah a zu lut ve a, sienkhawm hung suokdawk thei ta lovin an pahni in Well sungah an thi ve ve. Mithiem han Well sung an hang enfel chun gas thalo putsuok an hiplut leia thi an nih ti an hrietsuok.

Customs Officer man thei kuoma lawmman Rs. 25,000

JAIPUR: Sushil Kumar Pareek, Assistant Commissioner (Custom) man theituhai chu lawmman Rs 25,000 an pek dign thu CBI in zanikhan an puong. Sushil Kumar hin thamna Rs. 2,00,000 a lak zoa tlan hmang a nih tiin CBI Inspector Narendra Singh chun a hril.

Nunghak le tlangval an ringah an inat

AGRA: Zanikhan Taj Mahal bul Agra hmuna nunghak le tlangval inngaizawng hai chu an nu le pa han innei an phalpeknaw  leiin inthat tumin blade hmangin an ring­ah an inat pek ve ve a, sienkhawm inrang taka hospital panpui an ni leiin an thi naw a, an hung tha pei ta niin a enkawltu doctor hai chun an hril. In at hlum tum hai chu Rajveer Singh (25) le Shabnam Ali (18) hai an nih.

    

Rajveer le Shabnam hai hi forest official han an va hmu a, inrang taka hospital an panpui leia damsuok an ni a, Rajveer chun Shabnam le hin innei ngei an nuom a, sienkhawm an nu le pa han an remti peknaw leia hieng thil hi an thaw niin a hril. An pahni hin attempted murder case siemkhum ni el theiin Police chun an hril.

---------------------------------------------------------------------------------------------------------------------

VAWISUN THUPUI

Chun, Kristain a hmangai cheu a, riminhnik dinga Pathien kuoma thil inhlana ding le, inthawinaa ei aia An pek ang bawk khan, hmangainaah um ro.        - Ephesi 5:2

Editorial: Inthlasawng thei

Natna hri chi hran hran, mak le danglam tak tak an leng hlak a. Hieng natna chi tum tum hai lai hin inthlasawng thei le thei lo a u m ti chu a hretu seng ei nih. Natna hri hi boruok, tui, fak le dawn, sil le bil, injection­na thim, thisen, nuhmei le pasal inpawlna, infawp le thil dang dang haia inthawka inkaisawng le inthlasawng thei khawm  a ni thu mithiem, a bikin doctors han an mi hril rawp hlak. Hi lei hin mani thei ang tawk sengin ei inveng fimkhur hle hlak. Tulai hin thiemna le varna a hung insang pei a. Mithiem filawr le research thawtuhai chun hmangaina, ringumna, taimakna, depdena, indikna, khel hril hrat le a dang dang hai khawm hi inthlasawng thei niin an hril ta tlat el. Awiin awinaw inlakhawm an dikna chin a um niin an lang. A bikin hi thil hi nuhmeia nekin pasalah a um nuom lem niin research thawtu han an hril.

    

Mithiem han research an thawna chun nuhmei le pasal innngaizawngna laka ringum lova, midang a ruka lo kawp ching hi inthlasawng thei niin an hril a, a bik takin pasalah a ni nawk zuol niin an hril. Czech scientists han research an neinaa inthawk “Like father like son” tia hrila lo um hlak hi an dik ngei ti an suisuok. Hmangaihai laka ringumnawna hi pasal le nuhmeiah a um ve ve a, sienkhawm pasal chu a puitling hmaa a pa a ringum naw a ni chun a puitling hnungah a pa ang bawka ringum lo ve elna risk an sang lem niin an hril.

    

Research hi Charles Unviersity, Praque­a scientists han an nei a ni a, nupa tuok 86 haiah researh hi an thaw a, an hotupa Jan Havlicek chun, “Naupanghai hin an inthang laia anni huol veltu boruok um dan hi an inchuk uluk hle a, a bikin an pa hai khawsak phung chu a tha zawng le a thanaw zawng khawma zui ve el an awlsam bik a nih tiin an hril. Hi thu hi an dik le an diknaw pa hai ta dinga sui chet chet dinga tha hlie hlie a nih.

    

Research thawtuhai chun hmangaihai laka ringum lo hi kawppuihai laka lungawi naw lei le dit khawp hmunaw lei a ni khernaw niin an hril. Jan Havlicek chun, “pasalhai chun an nuhmeihai an hne lei khawm ni chuong lovin, nuhmei pasalna hmang an nuom le a thei tam ni an nuom lei ringawt khawmin kawppuihai lakah ringum lo el nuomna an nei hlak. An pahai hiengang zanga ringum lo an lo ni lem chun ringum lo ve el theina risk an nei insang lem hlak tiin a hril. Hi research chungthu hi European Human Rights Behaviour and Evolution Association conference­ah a hril a nih.

    

Hi lei hi a ni dim, tienlaia ei pi le puhai khawm khan tekhi thu chi hran hran an lo hril hlak.  Entirnain ‘Siel rangin siel rang bawk a hring hlak” ti dam, “Sunhlu kungah thei dang a ra ngai nawh” an lo ti hlak. Nauhai chun hmel chau ni lovin nundan le thil dang dang haiah Pa annawleh Nu hai chu sunna annawleh angna tak ei lo nei hlak a ni awm ie! Hi thil hi a tha nawzawng ni lovin a thazawngin inthlasawng thei inla nuom a um ngei el.

            

Pa tha, nu tha, mi puitling, pa taima, nu taima, pa ringum, nu ringum, pa indik, nu indik, pa titak, nu titak, pa depde ni lo, nu depde ni lo, pa le nu khelhlip lo ei lo ni hlak seng am aw! ti hi insut seng inla nuom a um. Ei pienga inthawka ei puitling chena ei nun khal dan hi hang ngaituo chet chet inla, pa le nu tha ni tluonsuok zak, nauhai entawntlak le nauhai um dan dinga ei dit angin ei lo khawsa hlak am? Nauhai entawntlak nu le pa um ngei ei tih. Amiruokchu, a tam lem hi ei ni dal el thei a ni aw!