Hmasawnna Thar | 15 July, 2015

Tuolsung

HNU Vangai in lawmpuina ruoi an kilpui

CCPUR: July 14, 2015 khan HNU Vangai Block a khaw thenkhat a mi fe khawm han thawlawm (pawisa sum) dawl khawmin Vangai ADC biela MDC dinga thlangtling nawk Pu Lal Hossan chu a chengnain Nehru Marg, CCPur­ah MDC a tling lawmpuina neiin ruoi an kilpui. Hi huna hin HNU Vangai Block President le Secretary Pu Phirremthang le Puy Rodinglien han Pu Lalhossan hai nupa hi a hran ve vein Hmar Thangsuopuon an insiltir bawk.

Lawmpuina le lawmthu hrilna

CCPUR: Election Committee of Pu Lalhrillien, 19­ Saikawt ADC constituency huoihawtnain July 16, 2015, 11:00AM a inthawk khin Pu Lalhrillien ADC member a thlangtlinga a um lawmna le Pathien kuoma lawmthu hrilna programme huoihawt a tih. Hi programme a hin Dr Chaltonlien Amo, Chairman, HAC, Manipur; TN. Haokip MLA Saikawt A/C; Vungzagin Valte MLA Thanlon A/C (Parliamentary Secretary; Ginsuanhau MLA Singngat A/C; Langkhanpau Guite, MDC; Chairman HPA; John H. Pulamte, President Hmar Inpui le Upa Laldawnlien Varte, President, HYA General HQ han thuhrilna hun hmang an tih.

LATSEA in ngenna an siem

CCPUR: Lamka Traders and Self Employed Association (LATSEA) chun CCPur khawpu sunga tlangmi nilo mani in mi inhluotirtu hai chu an inhluotuhai hrechieng hmasa ding le mani in nuom nuom inhluotir lo dingin an ngen a; Domicile/residential proof/police verification/electric bill etc. chungthua khawm Department le Village Authority hai chu dan umsa zawma fimkhur dingin an ngen bawk. Ei district sungah an hung intanna hrietlo le tuolsungmi ni lo tam tak an hung lut ta leiin sumdawngna le security thilah invengnain mitin fimkhur dingin an inhriettir bawk.

Kelkang fe nuom hai ta dingin

CCPUR: “Ka hringna Pathien hring chak in a dang a char a nih ti tuhai ta dinga Kelkang fe nuom hai ta dingin August 1st Week khin Kelkang fe tum a ni a, mi pakhat kalman Rs. 2000/­ pei ning a ta, a fe ve theilohai khawmin a fe nuomhai kalman ding tum pek thei ning a tih tiin Ms May Rose, Rengkai chun inhriettirna a siem bakah Kelkang fe ding hin a nuom taphawt a fiel. Thu chieng lem Mob. No. 9862242768 ah ngaiven thei ning a tih.

MUEWS in Help Desk

CCPUR: Manipur University Eimi Welfare Society (MUEWS) chun Manipur University hnuoia MA/MSc/M.Com/MLIS le PG course tum tum inchuk nuomhai ta dingin CCPur, Motbung, Sadar Hills le Moreh haiah Help Desk­ cum­ Conselling Centre hawng an tum niin General Secy. MUEWS chun a hril. July 16, 2015 a inthawk CCPur District­a inthawk MU a PG course thaw nuom hai ta dingin CCPur Govt College­ah 10­2:30PM sungin Prospectus Rs. 350/­ le a chungtieng peka lak thei a ni thu a hril bawk.

Mid Day meal thuah ZEO in an hriettir

CCPUR: Mr T. Goukhomang, ZEO, CCPur chun ZEO le ADC, CCpur hnuoia Govt. School haia  Mid­day Meal sem dan ding Headmasters/ Headmistress le Principals hai inhriettirna pein Mid­day Meal bu le hme chu student class I­VIII han an hmu ngei ding, Mid­Day meal pelo School an um chun an chunga action lak a ni ding thu a hril. Chun, school naupang Class I­V han ni tina bu an hmu ding chu 100gm a ni ding, Mid­ Day meal fak lai thlalak concerned DI of School hai kuoma pelut seng dingin School thuneituhai an hriettir bakah Mid Day meal chungthua record en thei dinga sie zing dingin an hriettir bawk.

A nauhai an lo nih

CCPUR: Zanikhan nupui pakhat chun naupang kum 3 le kum hni vel ding naupang pasal le nuhmeite hai an vakpui an vakpui leiin naupang thuoihmang tum nia ringhla leiin Thangzam Road bul, New Bazar lai an man a, Police kuta an peklut a. Police han thu indawnna an nei hunah naupang hai hi ama nau ngei an ni ti hriet a ni bakah naupang hai khawmin an nu a ni thu an hril.

    
Ei thu dawngnain a hril danin Nupui nu hi lungril tiengpang buoina nei met nia hriet a ni bakah a pasal in a vuok leia a nauhai thuoia CCPur tienga hung, zani hmasa zan khan Hotel pakhata riek an nih. Anni hi Bishnupur district mi an ni a, Police chun a hnungin nupuinu le a nauhai hi Meira Paibi kutah an inhlan.

Headline

Andhra Pradesh­a Pushkaralu Festival­a innek buoinaah mi 27 an thi;

Zangnadawmna Rs. 10 lakh seng pek anni ding

HYDERABAD: Zanikhan Andhra Pradesh State a Rajahmundry, Godavari vadung kamah Maha Pushkaralu Festival hmang a ni a, zingkar dar 7: 30 le zingkar dar 8 inkar vel chun Godavari vadung tuia inphum nuom an hung tam hle a. Pushkar Ghat­a lutna Gate­a lut hmasa inchuin thenkhat bangah an lawn kai a, innek buoina nasa tak a tlung leiin nuhmei 13 thangsain pathien bie dinga fe mi 27 an thi pha bakah midang 20 an hliem a, mithiruong le hliem hai chu Rajahmundry Government Hospital ah phur an nih tiin Vijaya Rama Raju,Sub­Collector, Rajahmundry chun a hril

    
Maha Pushkaralu Kut hi kum 12 dan peia nei hlak, Hindu sakhuo zuitu han “Kumbh Mela” ang hiela an ngaisang a nih. Andhra Pradesh Chief Minister Chandrababu Naidu chun thina tuok su nghai hi zangnadawmna Rs. 10 lakh seng pek anni ding thu a puong.

    
Opposition hai chun, Rajahmundry hmuna innekbuoina leia mi 27 zetin thina an tuok phana san hi TDP sawrkarin arrangement a siemtha tawknaw lei a nih tia intumin Chief Minister N. Chandrababu Naidu chu inban dingin an phut. APCC Chief N. Raghuveera Reddy le Rajya Sabha Member K. Chiranjeevi han zanita Indira Bhavan hmuna reporters hai an inhmupuinaah, hi thil tlunga thina tuok sunghai chu zangnadawmna Rs. 25 lakh seng pe dingin sawrkar an phut bawk.Opposition YSRC khawmin hi thiltlung hi Naidu an intum bawk.

            
Rajahmundry, Andhra Pradesh a Maha Pushkaralu Festival­a innek buoina leia thina tuok mi 27 sungkuo hai an tuorpui thu PM Narendra Modi, AICC President Sonia Gandhi le milien milal dang dang han an puong bakah hi thil tlung hin an lung a thawng hle thu an hril.

Darkar 12 sung curfew inthlazal

IMPHAL: Vawisun zing dar 5 a inthawk zantieng dar 5 chen, darkar 12 sung Imphal West le Imphal East district haiah Curfiew inthlazal nawk ning a tih tiin District Magistrate, Imphal West le Imphal EAst hai chun zanikhan thusuok an siem nawk. Zanikhan darkar 11 sung Curfew inthlazal a ni a, hi hun sung hin buoina suok hriet a ni nawh. Amiruokchu, ILP le inzawmin hmun hran hranah lampui dangna le thungbuma nuorna nei hmu ding an la um zing.

HWA Jiribam Unit election nei dan ding

JIRIBAM: Pi JL Sawmi GP, Pi Chongtuozing GS le Nk Sharon Asst. GS HWA, GHQ thuoituhai chun HWA, Jiribam Unit Interim Election neia indin dan ding ngaituoin hi lai biela cheng Hmar nuhmeihai an inhmupui a, hun sawtnawte ah Election nei ning a tih.

            
Chun, July 13 khan Hmarkhawlien ah NC Hills & Barak Valley laia HWA thuoituhai leh meeting an neia, Constitution Review­na nei le in ang tlang a mani a roinrel thei dingin thutlukna an siem. LRS Puruolte 

Manipur Assembly Special Session

IMPHAL: Vawisun 10:00AM a inthawk hin 10th Manipur Assembly Special Session nei ning a ta, members han Manipur Regulation of Visitors, Tenants and migrants Workers (MRVTMW) Bill, 2015 hriltlangin MRVTMW Bill, 2015 hi hnukkir dingin an rel ring a nih.

MSPDCL le PSSC han MoU an ziek

IMPHAL: Electric lahai kuoma electric tha lema pek a hung ni theina dingin Linesmen le meter readers hai training pek dingin Manipur State Power Distribution Company Limited (MSPDCL) le Ministry of Skill Development & Entrepreneurship (PSSC) han Memorandum of Understanding (MoU) an ziek. Hi MoU zieknaa hin CM O.Ibobi Singh; PHED Minister I. Hemochandra; P.C. Lawmkunga, Chief Secretary, Manaipur; Dr J. Suresh Babu, Principal Secretary (Power), Dr Suhel Akhtar, Principal Secretary (Labour), Vinod Behari, CEO, PSSC le mi dang dang hai an thang.

Moreh­ah Career Guidance­cum­Facilitation

MOREH: July 11, 2015 khan 11 Assam Rifles of 26 Sector Assam Rifles chun KSO, Moreh thangpuinain Hill Tribal Council Conference Hall, Moreh, Manipur­ah Career Guidance­cum  Facilitation programme an buotsai a, hi huna hin Moreh town sunga Schools le Colleges haia inthawk students 84 an thang tiin zanita Assam Rifles thusuok chun a hril. Hi huna hin Indian Army le Assam Rifles haia nuhmei le pasal hai ta dinga lut thei dan lampui hai student hai hrilhrietna an nei.

    
Chun, July 13, 2015 khan 24 Assam Rifles chun Chandel district­a Kwatha village­ah Women Society hai inpawlpuina an nei bawk.

Tripura in plastic bags hmang a khap

AGARTALA: Environment Protection Act 1986 le Plastics Waste (Management and Handling) Rules 2011 dunguiin Tripura State sawrkarin an ramah plastic bags hmang, zawr, siem, laklut le sekkhawl a khap. Hi dam bawsie hai chu Rs. 100­Rs. 1,000 chen inchawitir thei ning an ta, a vel a vela hi khapna dan an bawsiet chun Rs. 1,00,000 inchawitir thei annawleh kum 5 lungin intangtir annawleh a pahniin hremna hi pek thei ve ve an nih tiin Amitava  Debroy, Chairman, Tripura State Pollution Control Board chun a hril.

CLAT a hlawtling

NEW DELHI:  Nk.  Esther Chonglienpui Hmar d/o (L) Harmon Hmar & Pi Judith Hmar, Delhi chu All India Common Law Admission Test (CLAT) ah hlawtlingna changin National Law University, Gandhinagar, Gujarat hmuna inchuk dingin Admission a a thaw fel tah. Nk.  Esther hi lekha thiemthei takel, Class XII khawm Holy Child Auxilium School, Vacant Vihar, New Delhi­a inthawk 91.25% zet hmua lo zo a nih. (Virthli)

JD(U) MLA case siem khum

PATNA: Kum 7 liemtaa suolthatna case le inzawma man le lungina khum JD(U) MLA Anant Singh chu Chief Judicial Magistrate, Kotwali hmaah Police han case an siem khum. January 3, 2008 khan Sanjay Singh kap hlum a ni a, hi thina thu le inzawma Bihar JD(U) MLA Anant Singh hi man le Beur Jail­a khum ve a nih. Hi case le inzawm hin mi 8 man anni tah.

July 15 in PM in NE CM­ hai

NEW  DELHI: PM Narendra Modi chun July 15, 2015 zantieng New Delhi hmuna NE Chief Ministers hai meeting neipui a tih. Hi lei hin President Pranab Mukherjee in in July 15, 2015 nia Iftar dinner a buotsai dingah PM Narendra Modi chu a thang ve theinaw ding niin ei thu dawngna chun a hril.

Maoist han Police 6 an thuoihmang

BIJAPUR: Zani hmasa zantieng khan Chhattisgarh a Bijapur district sungah Police 6 Maoist an thuoihmang a, tuchen hin an umna hriet a la ni nawh. Maoist helpawlhai chun silai leh chuktuoin Bus le a sunga chuonghai vengtu Assistant Police Constable 1 le motor cycles a chuong Assistant Constables 5 hai chu sukchawla an thuoihmang a nih tiin Police thusuok chun a hril. Haptakar khat liemta khawm khan Sukma district­ah Police pakhat Maoist helpawl han an thuoihmang a, tu chen hin a umna hriet a la ni nawh.

India Ngamantu 4 man an nih

THALAIMANNAR: Zani zingkar khan Sri Lanka Navy han Thalaimannar bul, Tamil Nadu ah India Ngamantu 4 hai chu Ganja kg. 165 phura intumin an man. Mana um hai hi Department of Custom kutah pek an nih. Hi hma met khawm khan hiengang case a intumin India Ngamantu 4 hai chu Sri Lanka Navy han an lo man ta bawk a nih.

Maoist cadre 11 ralthuom leh an inpe

VISAKHAPATNAM: Zani hmasa khan Maoist helpawl 11 hai chu ralthuom leh Koya Praveen, Rural SP, Visakhapatnam hmaah an inpe. Maoist cadre inpehai hi tuolthatna le mi suomnaa thang hlak an nih tiin Koya Praveen chun a hril. Ralthuom an inpeklutpui hai chu tuolsuok silai vawng an nih.

Tomar in bail a ngenna Court in a hnawl

NEW DELHI: Degree certificate lem leia man Delhi Law Minister hlui Jitender Singh Tomar in bail a ngenna chu Additional Chief Metropolitan Magistrate Tarun Yogesh chun zanikhan a hnawl pek. Tomar hi July 20, 2015 chena judicial custody (Jail) a um dinga intang mek a nih. Insuo a ni chun evidence hai a sukchingpen  ringhla a ni leia Delhi Police han an ringhla leia bail a ngenna hi hnawl pek a nih. Tomar chun a case hi suizui a ni ta leiin jail­a um tul tanaw nia hrila bail hi a ngen a nih. Tomar hi June 9, 2015 nia kha Bar Council of Delhi in a Law degree a lem (fake) a nih tia complain an peklut leia man a ni a, June 22, 2015 khawm khan Tomar in bail a ngenna hi hnawl pek a lo ni ta bawk a nih.

Dawr 6 raw, dawr 40 suksiet

BYRNIHAT: July 13, 2015 khan Meghalaya le Assam state inrina, Meghalaya state huop sunga 15th Mile an tina hmuna Karbi mi 300 thangruol han Dawr 6 an raw bakah dawr 40 an suksiet. Muslim mi han Karbi mi pakhat an vuok a, hi thil tlunga hin Muslim mihai an bei let ve a, hi taka Police han Muslim mihai an tan lem nia a hriet leia Karbi mihai lungsena hi thil hi an thaw nia hril a nih.

Supreme Court in report pe dingin

NEW DELHI: Manipur­a ‘Fake Encounter cases” chungthuah Supreme Court chun sawrkar thlungpui, National Human Rights Commission (NHRC) le Manipur State sawrkar  hai chu report kimchang pe dingin an hriettir. Fake Encounter cases 62 zet chu tuchen hin FIR khawm siem la ni lo niin Supreme Court chun a hril. Hi thua hin PIL file a ni a, hearing August 3, 2015 khin nei ning a tih.

Bihar sawrkarin Land Bill kal an tum

PATNA: PM Narendra Modi chun vawisun hin Niti Aayog meeting a ko a, Chief Minister­hai po po thang dinga fiel an nih. Hi meeting a hin NDA sarkar chun Land Acquisition Bill hriltlang dingin putlut a tu m a, hi Bill hi an kal tlat ding thu Bihar sarkar chun a puong. NDA sawrkar chun hi Bill hi Parliament monsoon Session hung um dinga hin pasi a nuom a nih.

Beiphit herna khawl puokdarah mi 5 an thi

MUNGER: Zani hmasa khan Bihar State a Munger district sunga hmun pakhatah beiphit herna khawl a puokdar a, mi 5 an thi pha a, midang 2 na takin an hliem. Thi le hliemhai hi kum 8, kum 9, kum 11, kum 12 le kum 15 mi an ni tawl. Thi le hliem hai hi khawl bula ngir an nih. Hliem phani hai hi Begusarai Hospital panpui an nih tiin Varun Kumar Sinha, SP, Munger chun a hril.

IPS Officer Thakur Suspended a nih

NEW DELHI: Uttar Pradesh Chief Minister hlui le Samajwadi party (SP) President Mulayam Singh Yadav Court­ah a khing leiin Uttar Pradesh sawrkar chun service rule le discipline tlasam tiin senior IPS Offier, Amitabh Thakur chu a sina inthawk a suspended. Thakur ruok chun dan hmangin hma a lak pek ding thu a hril. Nuhmei suolluia an min tumna hi thukhel a ni leiin lungin a intang dinga ti ka lo ni khawma bail­a suok hni nawng ka tih tiin a hril.

CSK le RR kum 2 sung suspended

NEW DELHI: M. Dhoni inrawi Chennai Suaper Kings (CSK) le Rajasthan Royals hai chu Supreme Court in an din Committee chun 2013 betting scam thuah top officials pahni Gurunath Meiyappan le Raj Kundra hai an inrawl leiin kum 2 sung Indian Premier League (IPL) a thang thei lo dingin a suspended. Meiyappam hi CSK neitu le Kundra hi Rajasthan Royals (RR) co­owner a ni a, anni pahni hi BCCI hnuoia matches haia thang thei ta ngailo ding (life term) suspended an nih.

----------------------------------------------------------------------------------------

VAWISUN THUPUI

Thil po po nekin lungril hi an khel a; a se bik rieu a, tuin am hre thei a ta? Kei Lalpa hin lungril chu ka zawng suok hlak a, mi tin chu a thilthawhai ra ang p ei le, a lampuihai ang peia pek dingin an inthununna chu ka fie bawk a. ~Jeremia 17:9­10

Editorial: Dan hmanga rorelna a pawimaw

July 11, 2015 zan dar 6:10 vel khan Police Commando City Unit han Imphal Municipal  Council (IMC) Ward No. 12 a Councillor Ahanthem Ramakanta (53) s/o A.Ruhikanta of Keisamthong Ahanthem Leikai chengna in bulah ILP le inzawma nuorna neihai chu an vuok a, hi thil tlung a hmu le a hriet leiin IMC Councillor chu hi lai hmuna hin a va fe a, Police hai chu an mi vuok hai tawpsan dingin a va khap lein an lo vuok bakah IMC Councillor a ni thu a hril hnung khawmin Police station­ah an thuoi a, darkar khat lai an hrentang el hi ngaitha el chi niin an lang nawh. Ei state a roreltu Police anni ta a ni?

    
Mipui aiaw dinga mipuihai thlangtling hai chen inzana nei der lova an vuok ngam chun mi naran le mimawl hai chunga lem chun iengang lawmin am Police­hai hi nunrawng an ta? Police­haiin mipui an hmusit a, mipui iengah an ngai nawh ti a sukchieng hle. Mipui aiaw dinga thlangtling hai chen vuok anni ta hnung khawma Manipur state sawrkar chu a la to vang vang el a nih. Hi thil tlung hi mipui han ei topuiin ei en liem el ding a ni? Ni lo e, dan kala che hai hi dan anga hrem anni ngei theina dinga ei chet a hun a nih. Ei aiawtu dinga ei thlanghai thlawp le thangpui hi mipui mawphurna a nih.

    

Thil hote tea bandh le blockade ei thaw nek chun thil indiklo thawtuhai hrem anni theina ding chun a tul leh bandh, a tul le economic blockade le helna chi hran hran mipui han ei thaw ngam naw a ni chun ei thuoitu dinga thlangtlinga um hai hin an la tuor thlawn pei el ding niin an lang. Ei state sawrkar hi sawrkar tha nisienla chu hi thil tlungah hin totawkin um tanaw ni a, dan kala che Police hai chungah hin action a lak ta ngei ring a um. A umzie tak chu a tawi zawngin ei ramah dan hmanga rorelna (Rule of La) hmang a ninaw lei a nih. Ei state sawrkar hin iengtik am Rule of Law hi a hmang ding chu maw!

    

Khawvela mihriem pieng taphawt mihriem ei nina anga dikna (Birth Right) ei nei seng a. Hi dikna hi khuo rel  niphungin a mi pek hi ieng dan hmang khawmin suktawp thei a ni nawh. Hieng a ni zing lai hin ei nitin nunah le ei khawtlangah le ram inrelbawlna hrim hrimah dan palzutna hmu ding a tam hle hlak. Ei indikna chanvo khawm hmang thei lo khawpa khuopdea ei um chang a um rawp el, thil pawi tak a nih. Ei ram thuoituhai chu hril lo, khawtlang thuoituhai lai khawm thuneina hmang suol ching, dan hnuoia leng anni intheinghil thak khawpa thuneina hmang suol, thil thaw thei le hrat nia inngai leia dan pawisa naw lui thak khawpa khawtlang le mimal chunga lalna hrawt ching hmu le hriet ding an la um rawp el.

    

Hieng a ni lei hin mitin elin ei indikna chanvo ei hriet a, ei mawphurna ngaipawimaw a, ei hlensuok ngei ngei a tul a nih. Ieng mi le ieng pawl khawm ni inla, dan ei inza le ei ngaipawimaw a tul. Hi kawnga hin hmalatu tak ding chu Judicial Branch hi an nih. Judiciary sin tak chu dan humhim a ni leiin Law & Order enkaina kawngah hin na an sit deu a tul a nih.

            

Khawvela thiemna le varna a hung insang pei a, hi le inmila dan hrietna tiengpanga khawm hartharna ei chang a tul a nih. Police hi an nuom nuoma mi vaw theitu an ni nawh ti hi hriet a tul. Ei tosan pei chun tu ta nek hin lu an ling deu deu ding a ni leiin dan hmanga ei khing ngam a hun ta a nih. Chuong a ninaw chun insiem tha ngainaw nihai. Hiengang bawk hin state sawrkar khawm dan kala a che a, a mipuihai harsatna le thil ngen a ngaisak naw chun dan hmanga mipui han ei chet khum ve a tul a nih. Dan hmanga rorelna hi a pawimaw a nih.