Hmasawnna Thar | 07 July, 2015

Tuolsung

HSLC Compartmental Exam

CCPUR: July 6, 2015, 10AM a inthawk khan Board of Secondary Eduacation Manipur (BSEM) hnuoia Class X/ HSLC Compartmental Exam 2015 nei a nih. CCPur district­a candidates hai chu Ebenezer Academy, New Lamka centre­ah an exam a, candidates 449 an thang a, candidates 4 an absent. Exam centre­a hin Police le VDF bakah Doctor, Nurse le Ambulance motor hai campus sunga an duty. Social Science, Science, Mathematics le English subject hai exam a nih.

Town Beautification meeting nei

CCPUR: July 6, 2015, 2:00PM khan DC Office­a BRGF Resource Centre­ah Town  Beautification thuah DC CCPur inrawinain meeting nei a ni a, hi huna hin CEO/ADCC; SDOs/BDOs; MDCs hai bakah Tuibuong­ Lanva inkar le Tiddim Road in a hrut khaw lal/Village A uthority member hai le Chairman, LATSEA hai an thang.  Hi huna hin Tiddim Road in a hraw khaw Lal le VA han an biel sunga nulla blockage um hai an sukfai ding; Tiddim Road zula dawr/dukan nei han mani dawr chit rawng an nal thar ding tiin  an rel.

UNLF le KYKL cadre  man

CCPUR:  Police­a inthawk ei thu dawngnain a hril danin, July 5, 2015, 10:00AM khan 7­Assam Rifles chun S. Boljang khuoah UNLF cadre Somorjit Singh @ Samu (42) s/o  Gourav Singh of Waikhurok, tuta S. Boljang a u m mek chu an man a, zani zingkar 12:30AM khan Police kutah an pek. CCPur Police chun FIR No.56(7) 2015 CCP­PS U/S 20 UA (P) A. Act registered in zanikhan CJM hmaah an inlangtir a, Court chun July 10,2015 chen Police Custody­a la um phawt dingin a rel.

   

Chun, zani (July 6, 2015), 9:00AM vel khan Khumujamba hmuna KYKL cadre N. Ningol Yanglem Ongbi Bijileta Devi @ Bem @ Simi @ Ibemchoubi (35) w/o Yanglem Sibash Singh of Khumujamba  chu manin Police kuta an peklut. Police chun FIR No. 57(7) 2015 CCP­PS U/S 20 UA (P) A.Act  an registered khum a, July 7, 2015 in Court hmaah inlangtir an tih.

Synod Book Room in Reduction Sale

CCPUR:  Synod Bookroom, CCPur Branch chun zani zingkar­a inthawk khan IB  Road, CCPur hmuna Reduction  Sale an thaw tan. Reduction Sale hi Rev. Vanmawia, Vice Chairman, Synod Book room in a hawng. Reduction Sale hun sung hin  English, Gospel, Stationary Items, lekhabu dang dang hai chu  5% ­ 80% discount a zawr a ni ding a nih. Reduction Sale hi July 11, 2015 chen aw ding a nih.

Winger a accident, thina tuok um lo

CCPUR:  July 6, 2015 zantieng 2:00PM vel khan Imphal­a inthawk CCPur pana hung tlan  passenger phurtu Winger MNO1W­4229 chu Torbung Bunglow lai Truck pakhat le an inpelnaah changsuolin lamthlang tieng a tlanliem a, passenger nuhmei pakhat a bawk (forehead) a hliem met a,  motor neitu han first aid an pek hnungin an infetir ti lo chu passenger dang thi le hliemna tuok an um naw a, motor ruok chu a se nasa hle. Winger hi zani zantieng 12:30 a kha Imphal­a intahwka hugn suok a ni a, passengers 7 an chuong a nih.

HSA  Donbosco  in Freshers Meet

CCPUR:  June 4, 2015 khan HSA Don Bosco Unit chun VTI Auditorium, Rengkai Muolhlum­ah   Freshers Meet an hmang. Freshers Meet huna hin TKSU, SSPP, ZSP, KZP, Zillai le MZP thuoituhai khawm an thang a. Freshers meet hmangnaa hin Pu Hrilla, MDC Saikawt le SDPO CCPur Immanuel Infimate hai chief guest le special invitees in an thang a,  Evan J. Lawmkung in Freshers hai ta dinga tawngtaipekna a nei a, zantieng ruoi an kiltlang.

Headline

Vyapam Scam boruok a sosang pei; Hi case le inzawmin mi 30 chuong zet an thi tah

NEW DELHI:  Madhya Pradesh­a Professional Examination Board scam  annawleh Vyapam Scam le inzawmin zani hmasa khan Jabalpur College­a Dean Sinthaw Dr Arun Sharma chu  Delhi­a Hotel pakahtah  a thisaa hmu nawk a nih. Dr Arun Sharma hi tuta hma meta Delhi­a Journalit thi  tah Akshay Singh, Professional Examination Board­a thawk lai sung hai inhmupui dinga fe a ni a, hi scam buoina chun zuol tieng a pan pei a, hi case le inzawm hin mi 30 chuong zet ringhla um taka an thi ta leiin ‘killer scam’ tia hril a ni bawk. Congress le AAP chun Vyapam Scam thu hi tha taka suizui (investigation) thaw dingin an ngen a, Trinamool Congress chun Parliament­ah an khekpui ding thu an hril.

     

Congress chun hi scam thua hin Madhya Pradesh CM Shivraj Chouhan, a nuhmei Sadhna Singh le Governor Ram Naresh Yadav han inrawlna an nei a nih tiin an intum bakah lawyers iemanizat hai chun Shivraj Chouhan  chu ban dingin an phut a, Supreme Court chun Shivraj Singh  ban dinga  ngenna thua hearing nei dingin remtina a nei ta a, hearing hi July 9, 2015 a nei ning a tih tiin Chief Justice HL Dattu le Justices Arun Kumar Mishra le Amitava Roy hai chun an hril.

   

Hi scam suitu Special Investigation Team (SIT) chun  Mr Yadav le a naupa hai chunga FIR an file   ta  bakah Governor chu a retires huna a chunga action lak a ni ding thu a hril. SIT chun Governor Ram Naresh chu hi case­a hin sukchiengna an nei ta thu a hril. Vyam Scam le inzawma thi hai lai hin  Governor naupa Shailesh khawm a thang a nih.

   

Vyapam Whistle­Blower Mr  Chaturvedi (26) chun hi case­a hin  that dinga vauna vawi 10 lai a hmu ta thu a hril a,  a mission leia thi ding khawm nisien a chawlsan naw ding thu a hril. Chaturvedi hi Court in Madhya Pradesh Police venghimtu pek dinga tulai hnai ela kha thu a lo pek ta a nih.

           

Hi case hi July 2013­a Pre­Medical Test (PMT) a thang candidate han tlinglo mi 300 chuong hai merit list­a inthangtir an nih tia  Public Interest litigation (PIL) an peklut le inzawma Madhya Pradesh High Court, Indore bench in Madhya Pradesh Medical Education Department (MPMED), Madhya Pradesh Professional Examination Board (MPPEB) le Medical Council of India (MCI) Notice a peka inthawka hung inirsuok a nih.

Imphal

Session nawka inthawk e­budget introduce a ni el thei

IMPHAL: Manipur Chief Minister le Finance incharge cheltu  Pu O.Ibobi Singh chun, Manipur  Legislative Assembly budget session  nawka chun ‘e­budget’ annawleh paperless budget introduce tum a nih tiin zanikhan Manipur Assembly­ah  Congress MLA R.K. Imo indawnna dawnin a hril.

   

Manipur CM O.Ibobi Singh chun, tuta Manipur  Assembly budget session fe meka hin state sawrkar chun  e­budget or paperless budget introduce hman tumin hma a lak a, sienkhawm a thaw hman naw a nih tiin a hril a. Imphal East le Imphal West districts haia DDOs 135 hai laia DDOs 65 hai chu computerized thaw vawng le hieng DDOs hai chun treasury Officers hai fethlengin e­payment khawm thaw a ni tah tiin Pu.Ibobi Singh chun a hril.

            

MLA R.K. Imo chun, state sawrkarin e­budget introduced sienla chu Rs. 15 crore vel sum a save pha ding a nih tiin a hril. E­budget introduced  hmasa tak chu Himachal Pradesh a nih.

Darkar 19 General Strike tan

IMPHAL: Zani zanrila inthawk khan Joint Action Committee on Inner Line Permit System (JCILPS) chun Manipur pumpui huopin darkar 19 sung aw ding General  Strike an thaw tan. State sawrkarin JCILPS ngenna a ngaitha leia General Strike hi thaw a nih tiin Khumdram Ratan, Convenor, JCILPS chun a hril. Bandh hi vawisun 7PM chen aw ding a nih. Bandh hin medical services, water supply le essential services hai chu huom naw nih.

Imphal Eeast district­ah  Cr.P.C. 144

IMPHAL: District Magistrate, Imphal East chun zanikhan Imphal East District huop sungah Cr.P.C. 144 a puong. Hi Order hin September 6, 2015 chen huom a tih tiin Magistrate thusuok chun a hril.

7th Indo­Myanmar Regional Border  meet

IMPHAL: Maj. Gen. Min Naung, Commander North West Command inrawinaa  Myanmar military  team le civil officials mi 18 hai chu 7th Regional Border Committee meeting­a tang dingin zanikhan Mantripukhri an hungtlung a. Myanmar delegation team le Lt. Gen. Bipin Rawat, GOC  Spear Corps. inrawinaa Indian Army team  han meeting an nei mek. Myanmar le India ramri­a thawtlangna tha lem nei thei dan ding hai  hriltlang an ta. Indian Army han Myanmar Army le Myanmar Police Force hai training pek dan ding chungthu le ramria security ngirhmun hai hriltlang an tih tiin zanita PRO,HQ IGAR (South) thusuok chun a hril. Myanmar delegation team hin an kir nawk hmain  Bodh Gaya  bakah  City of Joy, Kolkata hai khawm sir an ta, July 10, 2015 in Myanmar tieng kir nawk an tih tiin thusuok chun a hril.

Security personnel 187 an inrawl; 7 ban

IMPHAL:  Kum 2012­2015 sung khan Police oranisation tum tum haia security personnels 187 hai chu thil suol (crimes) tum tum haiah an inrawl a. Hieng hai laia Police personnel 7 hai chu thiemnaw inchangtir anni leiin an sin haia inthawka ban an ni a, a dang hai chu suspended an nih tiin Manipur Home Minister  Gaikhangam chun zanikhan Assembly­ah a hril.

Manipur­ah motors 2.52 lakh a um

IMPHAL:  Manipur Transport Minister Dr Kh. Ratankumar chun, Maipur­ah motor 2.52 lakh a um mek a, motor neitu  thlakthlengnaa inthawk Transport Department chun tax a lak hlak tiin zanikhan Manipur Assembly­ah a hril. Imphal khawpui sunga traffic signal hai chu deparment in fund a hmu huna siemthat ning an tih tiin Opposition MLAs hai indawnna dawnin a hril.

District tinah Industrial Estate

IMPHAL: Commerce and Industries Minsiter Govindas Konthoujam chun, state sawrkarin  Manipur­a district tinah Industrial Estate  hawng a tum a, Handloom and handicraft artisans National le State  awardee kum 60­85 inkar hai chu tuta financial year sung hin pension Rs. 2000 seng pek a tum tiin zanikhan Assembly­ah a hril.

B.Sc. 6th Semester   Result

IMPHAL: Manipur University hnuoia B.Sc. 6th Semester Examination, 2015 result chu zanikhan puong a ni a, result hi Manipur University Notice board­ah en thei dinga tar a nih.

AMTUC le AMGEO in indefenite  Ceasework strike

IMPHAL:  All Manipur Trade Unions’ Council (AMTUC) le All Manipur Government Employees’ Organisation (AMGEO) a Joint Administrative  Council (JAC) chun  charter of demands points 26 an nei hai state sawrkarin July 18, 2015 chena a sukpuitling pek  naw chun  July 20, 2015 a inthawk  tiemchin umlo Ceasework strike an thaw ding thu zanita  Manipur Press Club hmuna Press Conference huna an puong.

            

JAC a Secretary Purujit Lairikyengbam chun, July 3, 2015 khan Manipur CM O.Ibobi Singh kuomah Ultimatum an lo pek  ta niin a hril. An thil ngen hai lai Central Employees hai anga ACP modified scheme sukpuitling ding, thawktu nauhai educational allowance pek ding le transport allowance pek ding; pensioners le family menbers hai  medical allowance thla khatah Rs. 500/­ fixed ding le pensioners le family members hai  medical re­imbursement thaw pek ding ti hai a thang.

Others

HPC(D)  rawtna Mizoram in a hnawl

AIZAWL: Mizoram Home Minister R. Lalzirliana chun, HPC(D) han intiemkamna (condition) neia inbiek dingin Mizoram sawrkar an fiel a, sienkhawm Mizoram sawrkarin a hnawl tiin July 3, 2015  zana  Bawngkawn Police station­a Chanchinbumi thenkhatin an inhmupuina huna a hril.

   

Lalzirliana chun, tulai hnai khan H. Zosangbera inrawi HPC(D)  chun Indian Constitution­a Sixth  Schedule hnuoiah  Mizoram sawrkar, HPC(D) le sawrkar laipui aiaw hai thanga  inbiekpui  dingin Mizoram sawrkar a fiel niin a hril a. Tuta hmaa inbiekna haia khawm condition uma inbiekna nei a la ni ngainaw thu hrilin HPC(D) in intiemkamna nei hmasaa inbiekna nei dinga rawtna an siem hi Mizoram sawrkarin a hnawl a nih tiin a hril. Intiemkamna nei hmasa lova inbiek ruok chu iengtik lai khawm Mizoram sawrkar an pei zing a nih tiin Lalzirliana chun a hril.

BJP in NE a States in­charge dinghai a ruot

NEW DELH/SHILLONG:  BJP chun India hmarsak biela an party sukhrat zuol tumna leiin NE­a states in­charges Secretaries ding a ruot. IGP hlui  Farooq Khan chu Nagaland­a  Minority Morcha  and Party affairs chanvo pek a ni a. Mahendra Singh chu Assam in­charge pek a ni  bakah Assam­a inthawka Lok Sabha MP Ramen Deka chu Arunachal Pradesh in­charge pek a ni a, Madhya Pradesh­a Lok Sabha MP Prahlad Patel chu Manipur; BJP National Spokesperson Nalin Kohli chu Meghalaya in­charge le Pawan Sharma chu Mizoram in­charge le Sunil Deodhar chu Tripura  in­charge pek a nih.

KHCF Biekin  hawng le inhlanna

KOLKATA: July 5, 2015, 12:50PM khan Kolkata Hmar Christian Fellowship (KHCF) Biekin hawngna le inhlanna Christ Love Presbyterian Church, Ashram, Kalikapur, Kolkata hmuna nei a nih.  Biekin hawngna le inhlanna Pu Rawmtawnlien Hmar in a nei zovin mipui han thutiemna an nei a, hi zo hin mipui tawngtairuolna nei a ni bawk.

   

Pu Lalrothang Tusing chun, Kolkata Hmar hai hi inkhawmna Biekin nei loin hun sawt tak  tak Biekin nei loin an  um hlak a, remchangna hmun peia inkhawm el hlak an ni thu, Christ Love Presbyterian Church han inkhawmna dinga Biekin inhmangtir an remtina thuah lawmthu a hril. Hi huna hin Pu Henlallien Songate chun “Khawvel po poah fe unla, Thilsiemhai po po kuomah Chanchintha hril ro” (Mk. 16:15) ti thupui hmangin Pathien thucha a hril a. Nk Lalzarzo Sellate a’nthawk inpakna hla mawi takel ngaithlak a nih. -Alan  Famhoite

SIIB in Immigration Officer hlui an man

KOCHI: Customs­a Special Investigation and Intelligence Branch (SIIB) chun kum 1 chuong liemta sunga Cochin International Airport fethlenga rangkachak kg. 1,500 vel ding tawlrukna thuah Cochin International Airport Limited (CIAL) a Immigration Officer hlui Jibin K. Basheer chu July 5, 2015 khan an man. Ama baka hin a unaupa Nibin K. Ratheesh (25) le a pa Basheer (52) hai khawm an mansa. Official thusuokin a hril danin Jibin hin CIAL terminal fethlenga rangkachak tawlrukna dinga hin Rs. 8 crore commission a hmu niin a hril a, a sum hmu hin shopping complex le motor hai khawm an chawk niin SIIB official hai chun an hril. Rangkachak hai hi airport­a inthawk kawnghren (special belt) hmangin a suokpui hlak nia hril a nih.

 Prachanda India a hung inzin ding

KATHMANDU: Unified Communist Party of Nepal (Maoist) chairman Pushpa Kamal Dahal  ‘Prachanda’ tia hrietlar chu India sawrkar fielna angin July 14­18 sung khin India rama a hung inzin ding a nih.

Moreh­ah AR han Children’s Summer Camp

MOREH:  26 Sector Assam Rifles­a 11­Assam Rifles chun  June 29­ July 3, 2015 inkar sung khan  Moreh Ward No. 9 a Mother Teresa Missionary Charity Home­ah Children’s Summer camp an buotsai. Hi huna hin fashion show khawm nei a ni a. musical concert, pipe le Jazz band display hai nei a ni bawk. Charity Home­a um hai chu lekhabu le study materials hai pek le free medical camps hai huoihawt le barakhana khawm nei a nih tiin PRO,HQ IGAR (South) thusuok chun a hril. Missionary charity Home le tuolsung mi hai chu an lawm hle.

 Tangkaruo kg. 8.5 leh nupui  man

KOLKATA:  Border Security Force (BSF) chun July 4, 2015 khan nupui kum 64 mi Jahinna Biswas of Machpara village chu Gede railway station, Nadia hmuna Tangkaruo (silver) kg. 8.5,  Rs. 300,000 manhu leh an man a,  Krishnagunj police station­ah an peklut.  South  Bengal  Frontier a BSF chun kum 2015 fe mek sung hin  Tangkaruo kg. 113.165, Rs. 35,35,231 manhu deuthaw ding leh mi 15 an man ta niin an hril. Chun, July 5, 2015 khan Doha hmuna international airport­ah pasal kum 35 mi chu rangkachak kg. 3, Rs. 1 crore manhu ding leh an man.

Inruk motor le  Pistol leh mi 2 man

ETAH: Uttar Pradesh­a  Dhumari village crossing a chun  zanikhan Police han Scorpio an dapnaah country made Pistol 1 le a mu leh an man  niin Police chun an hril a, Scorpio khawm hi inruk sa niin an hril bawk.  Scorpio motor  a hin mi 4 an chuong a, chawl dinga thu an pek hnung khawma chawl lova an tlan lui bakah silaia an kap leiin an hnawt a, Dhumari  Crossing hmuna an va man a nih.  Hi motor­a chuong 2 hai chu an tlan hmang hman a, mi pahni Pankaj le Girish hai chau an man a nih.

Sex determination test leiin Ex­MLA man

INDRI: Haryana­a chun  Indian National Lok Dal (INLD) MLA hlui Dr Ashok Kashyap chu  Indri district­a Karnal hmuna a Clinic­ah  nu sunga um naute nuhmei le pasal enna  (sex determination test) a thaw tia intumna leiin Haryana Health Department le Police  a special team han an man. Dr Ashok hi  Pre­Natal Diagnostic Techniques (Regulation and Prevention of Misuse) Act.  Bawse­a Ambala district mi nuhmei naupai pakhat, a naupai nuhmei am pasal enna (test) a thaw lai meka an va man a nih. Test thawna ding hin Dr Ashok chun Rs. 13,000 a lak niin a va mantu  hai inrawitu  Medical officer Dr Rajendra chun a hril.

Pak. in Ceasefire a bawsiet nawk; BSF jawan 1 a thi

JAMMU: Pakistan Rangers hai chun zani hmasa khan Jammu and Kashmir­a  Line of  Control (LoC) a  Nowgam le Macchil section hai Ceasefire bawse in an hung kap nawk a, BSF hai khawmin an kap let ve leiin nasa takin an inkaptuo a, BSF Jawan pakhatin thina a tuok niin ei thu dawngna chun a hril. Kap hluma um BSF Jawan hi 119 battalion­a mi a nih. Police le Army chun South Kashmir­a Shopian forest­ah uniform ha hmu an ni leiin dapppui nasa takin an thaw zing bawk.

Rambung 5 sir dingin PM an zin suok

NEW  DELHI: Prime Minister Narendra Modi chu Russia le Central Asian rambung 5 hai sir dingin zanikhan New Delhi suoksanin an zin. PM Modi hi zanikhan Uzbekistan a tlung a, vawisun hin Kazakhstan tlung a tih. PM hi  July 9 & 10, 2015 haia Russia rama Ufa hmuna BRICS summit le SCO summit haia thang a ta, July 11, 2015 khin Turkmenistan tlung a ta, July 12, 2015 in  Kyrgyzstan le July 13, 2015 in Tajikistan hai hai an zin ding a nih.

Hema Malini in thangpuina a pek ding

MUMBAI: July 2, 2015 nia a chuongna Mercedes Car in Maruti Alto Car a baw leia thi le hliemna tuok hai  chu thangpuina a pek ding thu  BJP MP Hema Malini (66) chun a hril. Hema Malini khawm hi a hliem a, Jaipur hospital­a enkawl le surgery thaw a ni hnungin Inrinni khan Hospital a suok ta a, chartered vuongnain zanikhan Mumbai a tlung. Ms Hema Malini hi a naunu Esha Deol le a makpa Bharat Takhtani han an hung zui. Rajasthan­a Dausa district­a Hema Malini chuongna Car in Alto Car a baw huna khan Alto car a chuong nuhmei naupang kum 4 mi a thi bakah hi car a chuong mi 5 hai chun hliemna an tuok a nih.

---------------------------------------------------------------------------------------------------------------------

VAWISUN THUPUI

Ti naw ro, kei in kuomah ka um sih a; lunginzing naw ro, kei in Pathien ka ni sih a; sukhrat ka ti cheu a, a nih, thangpui  ka ti cheu, a nih, ka felna kut changtiengin chel zing ka ti cheu. ­ Isai 41:10

Editorial: Pasaltha tam tak tlung phak naw naah Ira  Singhal

India rama inelna (Competition) insang tak le sin inzaum, Indian Administrative Service (IAS), Indian Foreign Service (IFS), Indian Police Service (IPS) le Gruop A & B sin hai lakna dinga Union Public Service Commission (UPSC) in kum tina a huoihawt hlak Civil Services 2014 final result chu July 4, 2015 khan puong a ni a. Piengphunga ruolbanlo ‘62 per cent locomotor disability’ Ms Ira Singhal chun Topper nina a hung hau ta hlau bakah  a pakhatnaa inthawka  a palina chen chu  nuhmei in an lak vawng a nih. Ira hi piengphunga ruolbanlo  Civil Services exam­a topper nina hau hmasatak a la nih. Mi danghai hlawtlingna lawmpui an um ruol ruolin Ms Ira Singhal hlawtlingna hi lawmpui a um zuol hle. Piengphungah ruolbanlo nisienkhawm pasal tha tam tak tlung thei  naw le an thlung phak nawna hmunah Ms Ira  Singhal hin hnena hlado an sam a nih. Hmun phittu dinga tlingna nei lo kha IAS Officer a kai der el a nih. Lawmpui a um takzet.

    

Ms Ira Singhal hi ‘Scoliosis’ leia piengphunga chun ruolbanlo a sienkhawm a thiemna le varna ruok chun mi a kh<m  hle. Tukum Civil Services Exam­a a hlawtling el chau ni loin kum 2010 khan  Civil Services Exam­a thangin  Indian Revenue Service (IRS) a hmu a, sienkhawm piengphunga ruolbanlo a ni leiin Department of Personnel and Training (DoPT) le Central Board of Customs and Excise chun hnawlin posting an  lo pek nuomnaw a nih. Amiruokchu, Central Administrative Tribunal (CAT) fethlenga a bei hnungin Singhal hin February 2014 khan hnena changin Indian Revenue  Service (Customs & Central  Excise), Govt. of India hnuoia Assistant Commissioner sin chel lai a nih. Hiengang harsatna tam tak a tuok hnung khawm hin Ms Ira Singhal chun  piengphunga ruolbanlo a nina chu a thil tum le beiseina sukpuitlingna dinga dodaltu le suonlama hmang a tum naw a, IAS Officer ni ngei tuma nasa taka an puocha hnungin hlawtlingna changin, ‘medical le physical ground a chun  IRS chau ni lovin clerk le hmunphittu (sweeper) ni khawm ka tling naw a, sienkhawm dan chun IAS ka ni a mi phal a nih tiin Singhal chun a hril. A hlawtlingna hin nuhmei hai, a bik takin ruolbanlo hai chunga ngaidan le ei hmudan hai a hung thlakdanglam ngei ka beisei tiin Singhal chun a hril.

   

Kum 2014 Civil Sevices  Exam kha Centre tam le candidate exam petu an tam tum tak la niin UPSC chun a hril a. Piengphunga ruolbanlo in Topper nina a hau el khelah  Nuhmei vawngin Top 4 chen an hang hau khan a bik takin  ei society a bikin nuhmei naute dit lova pasal ditlemna Hindu society sungah nuhmei hai chunga an ngaidan hung thlakdanglam ngei sien nuom a um a, chu chu Ms Ira Singhal beiseina khawm a ni hrim a. Tuta tum Civil Services exam chau ni lovin competitive exam dang dang le Board exam haia khawm nuhmei hai chu a hnuoihnung ni lovin a sipzum changtu an hung ni pei el ta hin ei society­ah nuhmei hai an duoi tanaw zie an lang chieng hle a nih.

   

Tulai khawvel insung tin ei hang thlir a, insung tamlem kei ngirtu chu nuhmei an ni lem tanaw mani aw ti thei dingin a um bawk. Ei ni lai nu le pa tam tak lem chun nau pasal hi inhnarna hlekte khawm an neinaw thu an hril rawp hlak a. Nau pasal an inhnar naw nasan um ngei a ta, chu tieng chu ei ngaituo zawm ding nisienla.  Pasal han thang ei lak nasat a tul ta hle ti ruok chu an lang chieng hle a nih. Mi tam tak chun pasietna lei dam le thil dang dang  ei suonlam rawp hlak. Kawng khata indikna chin um sienkhawm tumna tak tak nei hai ta ding chun hlawtlingna kawt hi an hawng zing a nih ti Ms Ira Singhal a inthawk hin hriet thei a nih. DoPT le Central Board of Customs and Excise in an hnawl hnung khawmin lunghnuolna nei lovin IAS Officer ni a tumna chu a bansan chuong naw a. Hnawl a ni kum 2010 a inthawk khan IAS Officer ni ngei dinga inbuotsaina hi a tan a ni a, a tumruna le tuorselna hi ngaisang a um takzet a nih.

   

Exam dang dang haia pasal neka nuhmei an hung thaw tha lem zat zat pei elna khelah a bik takin eini tlangmi hai lai  Civil  Services  Exam­a tling ei vang phar el ta hin ngaituona a suksei hle. Tu tum khan eini tlangmi a tling phak ei um der nawh. Tumruna, tuorselna,  le teireipeina ei tlasam  deu ta mani ding maw! Annawleh tulai khawvel technology hin ei ngaituona a keipeng nasa taluo lei a ni dim!  Mi han hlawk taka an hmang hi ei ni rawiin ei tlakbal pui a ni el am. Information Technology boruokin a mi hung hneng chara inthawk hin lekha tiem ei inthlada nasa hle. Lekhabu tiem neka tulai thalai hai hun hmang rawn na tak chu Mobile sik ret ret a nih. Ei thluok hi a thanaw bik a ninaw a, tumruna, tuorselna, teireipeina le hun hmang dan ei semruol thiemnaw lei ni ngei dingin an lang. Hieng a ni lei hin ei lo innghil a ni khawmin tho har zai rel tang ei tiu. Sawrkar hriet le ngaisaka ei um theina dingin thalai lekhathiem tak tak hai hin tumruna, tuorselna, teirei peina le insumtheina ralthuom haia inbelin hma pu thar nawk seng ei tiu. Central le State sawrkar hnuoia ngirhmun pawimaw cheltu ei tam po leh sawrkar chu ei thuhne el ding a nih. Pasaltha ni hi tulaia ding chun ralthuom chawia rawl rala chet a tul nawh. Pasal­tha chun thaidawp hai boralna hmuna hnena hlado an sam hlak.

-----------------------------------