Responsive Ad Slot

Autonomous District Council hi iengleia siem am a ni a? Part- II

Wednesday, July 22, 2015

/ Posted by VIRTHLI HMAR
-LRS Puruolte

India sawrkarin hmar-sak State a Tribal-hai dawmsangna le hmasawnna dinga mania an inenkawl vena dinga a siem, Sixth Schedule hi a hming chu ei hriet deu fur ring a um. Sienkhawm, a umzie indik tak le a thil tum  tak hi a hriechieng lo ei la tam hle niin a’nlang. Hi inenkawlna (Provision) hi Tribal ei ni leia ei dawng ngei ngei ding (right) ni ah ei ngai hmak el thei.  Amiruokchu, Mizoram entirna-in hang hmang el inla; Mizoram UT a lo ni a (a hnungin State), Aizawl le Lunglei District hai Autonomous Council a lo ni ve ta naw chin a hin indik tak chun an nuom ang angin an chang ve thei ta naw a nih! Central sawrkarin fir taka a la hrut naw leia Sixth Schedule anga la um ve mei mei a nih ti hi hriet a va hunin, a va hang ṭha de.

Autonomous District Council hi Sixth Schedule enkawl ding Tribal Area an ni a. Indian Constitution Sixth Schedule ei en chun Paragraph 1-na, Sub-Para/Clause (1)-na a chun Sixth Schedule enkawlna nei thei ding chun Autonomous District Council ni a ngai thu chieng takin an ziek a, Sixth Schedule enkawlna nei thei dinghai chu Paragraph 20-na ah ziek tlar hai an ni thu khawm a’nzieksa bawk. Sixth Schedule Paragraph 20-na a chun hiengang hin a’nziek a nih. (Pathien mi pek Hmar ṭawnga inlet sawng chun) –

Sixth Schedule Paragraph 20: Tribal Area- (1) Hieng Area table a mi, Parts I, II, (IIA) le III a mi, a hnuoia ziek tlar, hieng State Assam, Meghalaya, Tripura le Mizoram sunga mihai hi Tribal Area chu ning an tih… tiin a’nziek kuou el a nih. Chutaka ziek tlar Tribal Area hai chu hieng hai hi an nih: (A’n ziek dan ang char-in)

TABLE

PART – I:
1.  The North Cachar Hills District
2.  The Karbi Anglong District

PART – II:
[1. Khasi Hills District
2. Jaintia Hills District]
3. The Garo Hills District

[PART – II A Tripura Tribal Areas District]

PART – III
[1. The Chakma District
2. The Mara District
3. The Lai District]

Meghalaya State pumpui hi Sixth Schedule hnuoia um a nih a. India rama anni chauh hi an nih awm hienganga Sixth Schedule hnuoia um State chuh.

Eini Tribal/tlangmihai hriet dinga pawimaw em em: India Constitution Sixth Schedule in Tribal Area a ziek tlar hai laia hin eini tlangmihai bubitna le India rama State ei nei ve sun Mizoram a Aizawl le Lunglei District dam hi an ṭhangsa ve der nawh! Tuta an inenkaw dan hi a ṭhalem am a ni ding?! Chuleiin tuhai amaniin, “A mihriem chenghai Tribal ei nih phawt chun Tribal Area a ni el” an ti awlsam et el hlak lei ringawtin ei ni thei chuong nawh! Central sawrkarin a mi la ngaithiem hri phawt leiin Tribal Area ei la ni amani ei ti thei mei mei lem chauh a nih. Ei tarlang ang hin chiengtakin Constitution in a ziek a nih. Hmatieng hun ah iengtik ni amani chu hriethiemna a mi hung nei ta da’l thei. Chuleiin, hrietthiemna lei ni ringawt loa a dan indik tak anga Tribal Area ni dinga Autonomous District Council (ADC) ei nei vat dan ding ei ngaituoa, ei um vat le ei in siem vat a ṭul ta hle.

Central sawrkar hrietpui a District Council ei nei le ei ni si naw chun Tribal Area ei ni thei naw dan a um ve leiin ei ngirhmun hi a derthawng ve tlatna lai a umin a’nlang. Central sawrkarin tuhri hin mi la ngaithiem mei mei sienkhawm tu amani che thei deuin Court ah amani a mi khing vai chun ei sie thei zing! Entirna’n- Tuta hma deu met khan Mizoram a thiltlung pakhat a lo um ta kha, a lo hrie khawm ei um ring a um. Mizoram Sawrkarin Inchûklaihai nawrna nasatak um leiin  Doctor inchûk dinga a thlang (Select) tahnung, ei unau vai hai a thlakthleng nawk vai rawk a. Court-ah an hei inkhing meu chun leh… an hne der naw chu a ni kha!!...  District Council ei nei vat naw chun thil pawi thei a tam taluo ti ei hriet thar a ṭul hle. Muongloin hma la vat vat ei tiu. Dan hi ngai pawimaw ding a nih. Tulai hnai a Central sawrkar thusuok dungzuiin hun sawtnawte, Parliament Monsoon Session hung um dinga hin Bill Putlut a India Constitution hnuoia Sixth Schedule chu siemṭhat (Amendment) thaw tum a ni thu ei hriet a. Hi hun a khawm hin Assam, Meghalaya, Tripura le Mizoram haia ADCs, Sixth Schedule hnuoia um mek Village Councils le nuhmeihai tadinga seats 33 percent reservation siemna ding thu khawm a ṭhangsa a nih. Mipui mawphurna a lien hle.
Don't Miss
© all rights reserved
made with by Simon L Infimate