Responsive Ad Slot

Hmasawnna Thar | 30 June, 2015

Tuesday, June 30, 2015

/ Published by VIRTHLI
Tuolsung
NEP thuah Consultation nei
CCPUR: Zani zantieng 1:00PM khan Mr Lunminthang Haokip, IAS, DC, CCPur inrawinain a office chamber­ah New Education Policy (NEP) thuah consultation meeting nei a nih. Hi huna hin Ms Mannuamching, CEO/ADC; T. Goukhomang, ZEO/CCPur; S. Khaikhopau Ngaihte, BO HQ DC Office; DIO/NIC/CCPur le SDOs hai an thang.
    

Hi huna an thurel thenkhat hai chu­ ZEO le CEO/ADC hnuoia Schools le khaw hming hai bakah govt. employee pakhat e­mail address June 30, 2015 chena peklut ding; ZEO & CEO in a huom (cover) lo khuo um hai SDO han meeting an neipui ding; NIC & CSC han village level meeting­na an upload ding; July 1­15, 2015 chena village level meeting nei ding bakah village level meeting­a question chu Manipur sawrkarin a siem ding tihai an nih.

Y. Ranjit Singh in Dist. Agriculture Officer
CCPUR: Mr Y. Ranjit Singh chun June 22, 2015 a inthawk khan R.K. Dorenchand Singh kuta inthawk charge lain District Agriculture Officer (DAO)/CCPur sin a chel tan a, zanikhan DC Office­ah official in an report. Mr R.K. Dorenchand Singh hi District Agriculture Officer, Imphal West sin chel dinga sawn a ni a, Y. Ranjit hi Agriculture Officer (Sugarcane), CDO/Imphal a inthawka hung sawn a nih.

Bank Officer sin a hmu
CCPUR/IMPHAL: Nk. Florence Lallungawi Amo d/o Dr Chaltonlien Amo, Chairman, Hill Areas Committee Manipur chun IBPS CWE PO/MT Exam fethlengin Bank of India­ah General Banking Officer sin a hmu a, kar hmasa lai khan Bank Of India Zonal Office, Guwahati hmuna an report a, a posting­na ding ruok chu hriet a la ni nawh. Nk. Florence Lallungawi Amo hi Lady Shri Ram College, New Delhi ­a B.Com (Hons) zo le National Institute of Fashion Technology (NIFT) a inthawk Masters in Fashion Management lo zo ta a nih. (Virthli news)

HPA in Governor an inhmupui
CCPUR/IMPHAL: ADC, CCPur hnuoia Hill Peoples Alliance (HPA) chun June 29, 2015, 11:00AM khan Manipur Governor Dr Syed Ahmed chu a office Chamber­ah an van hmupui. Hi huna hin HPA ADC chungthua Governor an titipui. Thu pawimaw tum tum an hrilpui hai lai  Manipur­a ADC 6 hai 6th Scheduled Provision hnuoia ADC a hlangkai ding; CCPur­a HPA in sawrkar an siem tumna thu;  ADC, CCPur hung sir dinga fielna thu ADC CCPur MDC pahni nominate ding thu hai a thang.

ZRO President in a hawng ding
CCPUR: Mr Thang Lian Pau Guite, President, ZRO chun Hiangtam Lamka Community Hall campus­a (L) General Tunkhopum Baite lim (statue) inthuta um chu June 30, 2015, 10:30AM hin hawng a ta, Go Sawm Khup, President, Zomi Innkuan, USA in tawngtainain inhlan a ta, hi zo hin General Tunkhopum inzanain par inhlanna um a tih. Statue hawng zo 11:30AM in YPA GHQ Hall, Hiangtam Lamka­ah programme hmang ning a ta, hi huna hin (L) Tunkhopum Baite sunna hun hmang ning a tih. Hi hun hin ZRO President bakah Thangso Baite, LS MP; Health Minister Phungzathang Tonsing; Vungzagin Valte, Parl. Secy; T. Manga Vaiphei, Chairman, MTDC; Ginsuanhau, MLA; Langkhanpau MDC; Lunminthang Haokip, DC CCPur; le Go Swam Khup han thuhrilna nei an tih.

1st Quarterly meeting
CCPUR: June 30, 2015, 11AM hin DC CCPur inrawinain DC Office­a BRGF Resource Centre­ah District AIDS Prevention and Control Committee 1st quarterly meeting 2015­16 um a tih. Hi huna hin Annual performance 2014­15 (April­March) ennawnna, April and May 2015 sinthawna ennawnna ; Social Security/Benefit scheme chungthu le thu dang dang hriltlang an tih.
--------------------------------------------------------------------------------
Manipur Assembly Monsoon session inthung sunzawm ; Budget 2015­16  an passed
IMPHAL: Manipur CM le Finance cheltu Pu O.Ibobi Singh in Manipur Assembly Monsoon session tan ni June 26, 2015­a Assembly­a a phar Manipur State Buget 2015­16 chu zanikhan hun tawite hriltlang a ni hnungin Assembly in an passed.
    
Opposition MLAs han state budget chungthu hriltlang huna sawiselna an siem hai dawnin CM O.Ibobi Singh chun, Special category status hlip pek ei ni ta leia financial assistance tam tak cancelled a ni leiin tha taka ngaituo le hriltlang a ni hnunga state budget hi siem a nih tiin a hril a. Central­a NDA sawrkar in Special Category status a hung hlip leiin Manipur state thangin eini ang thoa central fund­a innghat states dang hai khawmin sum thuah harsatna an tuok ngei a ring thu; Special category hnuoia Central fund­a innghat North East state thenkhat chun thawktu hlaw pekna thuah harsatna an tuok mek a. Manipur­a ruok chu state sawrkarin financial discipline a maintain leiin tuchena hin thawktu hlaw pekna thuah harsatna ei la tuoknaw a nih tiin O.Ibobi Singh chun a hril.
            
Budget hriltlangna huna hin Opposition MLA Dr I. Ibohalbi, L. Ibomcha, Th. Shyamkumar le Samuel Raisom hai chun, Manipur CM in state budget Assembly a phar hin state economy chu a tha tawknaw ti an lang a, Unemployment chingfelna ding iengkhawm a thang naw tiin an hril. MLA L. Ibomcha chun, budget hi govt. department tam takin an harsatpha ding a nih tiin a hril a, Imphal area­a water pipe phumna dinga Rs. 10 crore chau bituka um chu tlawm a ti thu le NPF MLA Samuel Raisom chun, ADCs hai ta dinga Rs. 113.33 crore chau siea um chu tlawm a ti thu hrilin ADC han sum thuah harsatna an tuok ding a nih tiin a hril.

NSCN(K) leader Khumlo Abi  Anal man
IMPHAL: National Investigation Agency (NIA) chun June 4, 2015 nia India le Myanmar ramri Chandel District­a Paraolon hmuna 6­Dogra Regiment hai lambun le Army 18 zet kap hlum anni bakah sipai 11 in hliemna an tuok phanaa inrawlna neia intum NSCN (K) regional commander Khumlo Abi Anal chu zanikhan Chandel district, Manipur­ah man a nih tiin PTI report chun a hril. Khumlo Abi Anal (40) hi transit remand in New Delhi tieng thuoi a ni a, Police custody­a ni 9 sung la um phawt dinga ti a nih tiin NIA Director General chun a hril. NIA in hi case an lak hnunga mi an man hmasatak a la nih.

State sawrkarin hrietna a nei nawh
IMPHAL: Chandel district­a  NSCN(K) han Army hai an lambun zova Indo­­ Myanmar border­­a  Army han counter attack dappui an thaw huna helpawl 83 that an nih tia Times of India in a zieklangna le inzawma MLA Samuel Risom indawnna dawnin Manipur Dy. CM le Home minister Pu Gaikhangam chun, state sawrkarin kha thua khan iengkhawm hriet a neinaw thu;  Inlambunnaa khan NSCN(K), KYKL le KCP mi 60 vel an thang ri ng a ni a, kha huna khan NSCN(K) le KYKL cadre 1 ve ve an thi a, chu ti lo a hnunga sipai hai chetna leia helpawl thi dang  hrietna an neinaw thu Gaikhangam chun Assembly­ah a hril.

VDF a hliemna tuor lovin a thi
IMPHAL: City Police station, Imphal­a attached VDF personnel Okram Athoi @ Mani (35) s/o O Lukhoi of Lilong Chajing Manang Leikai chu June 26, 2015 khan Alu Galli, Khwairamband Keithel hmuna an duty naah a ruolhai le an inselbuoi leiin an vuok a, a hliemna turzo lovin  a thi. Hi thil le inzawm hin a vawtu nia intum Suresh Singh chu Police han an man.
    
Athoi hi June 26, 2015 zantieng khan a VDF chanpui Somorjit le VDF tho midang pakhat han Allu Galli hmuna an va hmu a, Zu rui chattla nia an ring leiin Police personnel dang hai leh Police station­a thuoiin zan an inriektir a. Sienkhawm a hnungin RIMS panpui a ni a, a hliemna tuorzo lovin June 28, 2015, 5PM khan a thi a nih. RIMS a enkawl a ni huna hin Athoi hin a thiltuok chanchin a unu kuoma a lo hril hman a, hi leia a thil tuok hi hriet niin ei thu dawngna chun a hril. A thina le inzawma JAC indina um chun zanikhan City Police station­a OC chu Athoi hi ngaisaklo le Hospital panpui lova intumin a chunga action la dingin an ngen a, an thil ngen darkar 24 sunga sawrkarin a suipuitling naw chun helna an nei ding thu JAC chun an hril.

Tul lova silai hmetpuoktu VDF 4 man
IMPHAL: Imphal East Police chun zani sun dar 12 vela Checkon crossing laia Raja Dumbaj School bula Tata Truck an dap (checking) huna tul lova silai hmetpuoktu VDF personnel 4 an man.

Sawrkarin tuilam sukfai tumna a nei nawh
IMPHAL: Manipur CM le MAHUD chelsa Pu O.Ibobi Singh chun, state sawrkarin Imphal khawpui sunga tuiluongkawr (drainage) hai sukfai tumna a nei nawh tiin zanita MLA Shyamkumar indawnna dawnin Assembly­ah a hril.

Others
KNP­ah Samak pakhat that nawk
GUWAHATI: Assam rama Kaziranga National Park a chun zanikhan Burhapahar range­ah Park officials patrolling a fe han Samak pakhat thisa an hmu nawk. Samak hi a ki lakhmang a ni leiin dan lova sapeltu han an kap hlum ni dinga ring a nih tiin Park director M.K. Yadav chun a hril. Tu kum January thlaa inthawk hi park­a sapeltu han Samak an that chu 12 a tling tah. KNP hi UNESCO world heritage site niin sq. Km. 858 a lien a ni a, khawvela Ki khat chau nei Samak um hai laia 70% umna hmun a nih.

Pa hme leiin Mizoramah mi 2 an thi
AIZAWL: June 26 le 27, 2015 inkar hai khan Mizoram­a Saiha District sunga Niawhtlang khaw pakhata sungkuo pakhat hai chun Pa (Mushroom) an hme leiin mi 2 an thi. Pa hme leia thi hai chu sungkuo pa tak Zohmangaiha (32) le Lalchungnungi hai an nih. Pa an hme leia an damnaw leiin June 25, 2015 khan Saiha District Hospital­ah admit an ni a, Zohmangaiha hi June 26, 2015 khan a thi a, a nuhmei Lalchungnungi chu June 26, 2015, sun dar 12 vel khan a thi nawk a nih. An nau hai laia naupang tak kum khat mi khawm a nu nenetui a nek leia a damnaw pha leiin hospital­a hin enkawl mek a nih tiin ei thu dawngna chun a hril. June 20, 2015 khawm khan Keifang, Mizorama sungkuo pakhata mi 6 ha chu rama Pa ana hme leiin an lo damnaw ta bawk a nih.

Helpawl hai chetna leiin NE­ah mi 721 an thi
NEW DELHI: India hmarsak biel (NE) a chun kum 2011 a inthawk May 31, 2015 chen kum 4 liemta sung khan helpawl hai chetna leiin Security forces thangin mi 600 chuongin thina an tuok tiin RTI hmanga indawnna Union Home Ministry chun a dawn. Union Home Ministry in RTI  hmanga indawnna a dawnnaa chun hi hun sung hin security forces thangin helpawl hai chetna leiin mi 721 an thi a, India hmarsak biel sunga Police network sukhratna dingin kum 3 liemta sung khan Home Ministry chun Rs. 812 crore a pekdawk niin ministry  chun a hril.
    
Kum 2012­13 le 2014­15 fiscal years sung khan Security Related Expenditure (SRE) scheme hnuoiah Assam in Rs. 374 crore, Nagaland in Rs. 169 crore, Manpur in Rs. 83 crore le Tripura in Rs. 81 crore an dawng a, Meghalaya chun Central fund Rs. 29 crore le Arunachal Pradesh in Rs. 73 crore an dawng tiin ei thu dawngna chun a hril.

PM in district tina khuoi vaina hmun
HAZARIBAGH: Prime Minister Narendra Modi chun zanikhan Jharkhand­a Hazaribagh hmuna Indian Agriculture Research Institute (IARI) bawlna ding lungphumna a nei. Hi huna PM in thu a hrilnaa chun India rama state tin hai chu district tinah hmun pakhat bek Khuoi vaina hmun dinga thlang dingin a ngen. Khawvel pum­a zawr inhawi em em Khuoizu tam lem ei tharsuok pawimaw a ti thu, bu le bal tharsuokna dinga thla 8 sung sin thaw hnunga hun awla Nga dil siem, bawng vai, Ar vai le khuoi vai hai hi thaw chi tak a nih tiin a hril.

July 7­ah Food ministers meet
NEW DELHI: Ruotui huntawk ei hmunaw ding nia an lang leia thil nitin mamaw man kaisang ding control dan ding ngaituo dingin sawrkar thungpui chun July 17, 2015 khin State Food Ministers meeting a ko. Meeting hi Finance Minister Arjun Jaitley inrawina hnuoia nei ning a ta, hi huna hin Food minister Ram Vilas Paswan le Agriculture Minister Radha Mohan Singh hai khawm thang an tih. Hi huna hin thil man kaisang ding control dan ding ngaituo ning a tih.

Khawvela thawktu hau hai lai Indian Railways
NEW DELHI: World Economic Forum in research a thaw dungzuiin Indian organisations pahni Army le railways hai chun thawktu 2.4 million neiin khawvela thawktu hau organisations hai lai an thang ve. Indian Railways chun khawvela thawktu hau tak niin inhril sienkhawm study report dungzui chun thawktu 1.4 million a nei a thawktu hau zawngah khawvela a 8­na in a thang a, Indian Armed forces chun thawktu 1.3 million a nei.
    
Research in a puonglang dana chun US Deparment of Defence chu khawvela thawktu hau tak niin thawktu 3.2 million chuong a nei a, People’s Liberation Army (Chinese military) chu pahnina niin thawktu 2.3 million a nei a, US supermarket giant Walmart chun tahwktu 2.1 million a nei a, a pathumna in a thang. MacDonald chu 4­na niin thawktu 1.9 million a nei a, UK’s National Health service le China National Petroleum Corporation in thawktu 1.7 million ve ve an nei a, China company dang State Grid Corporation of China chu 7­na niin thawktu 1.5 millon a nei.

Vantlang hmuna inzun mi 35 man nawk
AGRA: Government Railway Police (GRP) chun cleanliness drive thawa vantlang hmuna inzun mi 109 zet mana fine an inchawitir hnungin midang 35 manin an hrentang nawk. GRP a senior Superintendent of Police Gopesnath Khanna chun Swachh Bharat campaign hnuoia drive hi an fepui pei ding thu a hril. Mi 35 man hai hi darkar 7 sung hrentang anni hnungin intiemkamna le an thilthaw thuah ngaidam inhnina inziektir anni hnungin insuo zalen an ni a, mipui­vantlang hmuna an inzun nawk a ni chun fine chawi annawleh jail a khum anni ding a nih tiin Mr Khanna chun a hril.

Rangkachak kg. 11 mana um dareng­a thlakthleng
NEW DELHI: Indira Gandhi International Airport (IGIA)­ a inthawk hun hran hran haia vuongna passengers haia inthawka man rangkachak tlang kg. 11kg zet chu Departmental committee kuoma pek tuma a bawm hawng a ni huna rangkachak hai hi dareng­a thlakthleng an nih ti officials han an hmusuok. Rangkachak mana um hai hi Rs. 3 crore vel manhu a ni a, tuhin suizui mek a nih. Hiengang thil hi a tlung vawikhatna a ni tanaw a, January 16, January 20, April 30 le December 23 2014 hai khawm khan a lo tlung ta a, cheng nuoitel manhu ding rangkachak man hai chu dareng­a thlakthleng an ni ti hmusuok an lo ni tah.

Maharashtra CM US ah an zin
MUMBAI: Maharashtra Chief Minister Devendra Fadnavis chu official thil le inzawmin zanikhan US a pan. Mr Fadnavis hi karkhat sung cham dinga US inzin a ni a, Industries minister Subhash Desai; Chief Secretary Swadheen Kshtriya; CM’s Office­a Principal Secretary Pravin Pardeshi hai khawmin an zui. Mr Devendra Fadnavis le a hnungzuitu hai hin Microsoft, General Motors, Google, Amazon le Citibank cimpanies hai an inhmupui ding bakah Fadnavis hin New York, Detroit le San Francisco haia businees meeting haiah thu a hril ding a nih. Chun, July 3, 2015 nia Los Angeles hmuna 17th Brihan Maharashtra session­a khawm Mr Fadnavis hi a thang ding niin official thusuok chun a hril.

Myanmar mi Heroin leh man
AIZAWL: June 28, 2015 khan Aizawl khawpui­ah Mizoram Excise and Narcotics department officials han Myanmar mi pathum hai chu pakhat Heroin grams. 54 leh hmun hran hranah an man. Chun, YMA chun drugs a sumdawngtu ni dinga ringhla Heroin grams 5 le an man chu zanikhan Excise and Narcotic Department kutah an inhlan.

Mizoramah BSF Post thar 49
AIZAWL: Ministry of Home Affairs chun Mizoram­ah Border Security Force (BSF) border outpost 49 siem belsa a tum a, border post thenkhat chu Mizoram khawthlang tiengpanga India le Bangladesh ramri haiah bawl tan mek a nih. BSF Border outpost pakhat pei bawlna dinga hin  Rs. 500 lakh seng dinga riruong le Oupost 49 bawlna dinga sum hmang dinga riruong chu nuoi 42,000 a nih. Chun, border outpost bawlna ding hin ram 5 acre pei hmang dinga riruong a ni bawk a, tuhin border outpost 13 chu bawl el thei dinga ramri sukfel a ni ta a, outpost bawlna sin chu Engineering Project India Ltd. le National project Construction Corporation (NPCC) in thawng an tih.
    
Border outpost baka hin ‘border flood lighting’ hnuoiah ramri zulah Diesel Generator hmangin sukvar vawng tum a ni a, tuhin a hrui ding keizam mek a nih. Bangladesh sawrkar khawmin India le ramri­ah hin, Border Guards Bangladesh (BGB) border outpost 40 siem belsa a tum bawk. Hi thil hi dan lova Bangladesh a inthawk hung lut ruk tum hai dangna ding le phalna nei lova sumdawngna dang dang hai dona dinga thaw tum a nih.

NDFB(S) 4 man, helpawl 2 kap hlum
SHILLONG/TURA: Zani hmasa zingkar khan Meghalaya Police han East Jaintia Hills district­a    Byndihati hmuna dappui an thaw a, hi huna hin National Democratic Front of Bodoland (NDFB­S) cadre 4 le a supply­tu hai chu Gelatin tluon 144 le Detonators 126 leh an man niin SP Spill Thamar chun a hril.
    
Chun, June 28, 2015 khan North Garo Hills­ah Assam­a posting Dogra Regiment le Police thangruol han Tura­a inthawk km. 105 a hla Radigre hmuna dappui an thawnaah Achik Matgrik Elite Force (AMEF) 2 an kap hlum. Dappui thaw huna AMEF cadre ni dinga ringhla hai hi chawl dinga thu pek an ni a, sienkhawm an tlansiet malama silaia an kap leiin inkaptuona a tlung a, chu huna an kap hlum niin SP, NGH, Ramesh Singh chun a hril.

MPPEB scam   a intum mi 2 an thi
BHOPAL: Madhya Pradesh Professional Examination Board, MPPEB scam­a inrawlna neia intum mi 2 hai chu Gwalior le Indore hmun haiah an thi nawk. Hi scam case le inzawma inrawlna neia intum tuchena thi chu mi 25 an tling tah. Hi Scam case a intum zani hmasaa thi hai chu Dr Rajendra Arya (40) le Narendra Singh Tomar hai an nih. Dr Arya hi June 28, 2015 a kha Gwalior­a Birla Hospital­a thi a ni a, Tomar hi Indore jail sunga ringhla um taka thisaa hmu a nih. Tomar thina thua hin City Superintendent of Police Ajay Jain chun magisterial inquiry thaw dingin order an suo.

Zu sen Rs. 52.40 lakh manhu ding man
VADODARA: June 28, 2015 zingkar khan Godhra taluka police station­a inthawka km. 22 a hla Matwala hmuna motor hran hran 4 haia inthawk Zu sen Indian Made Foreign Liquor (IMFL) Rs. 52.40 lakh manhu, Truck  Rs. 15 lakh manhu, Car pahni Rs. 8.50 lakh manhu le Tractor Rs. 6 lakh manhu, a rengin Rs. 81.90 lakh zet manhu chu Police han mi 2 hai leh an man. Mana um hai chu Kamlesh Charan le Jagdish Charan hai an nih. Kamlesh le Jagdish hai hi Under Section 66B, 65I, 117B le 81 hnuoiah case siem khum an nih.

India­ Myanmar border­ ah ITBP/AR
NEW DELHI: Tulai hnaia India le Myanmar inrina Manipur­a Chandel district sunga  NSCN(K) han 6­Dogra Regiment hai an lambun a, Army 18 zet an thatna le inzawm khan  sawrkar thlungpui chun India le Myanmar ramri km. 389 a sei vengtu dingin Indo­Tibetan Border Police (ITBP) annawleh Assam Rifles a hmang el thei a hril a nih. June 4, 2015 nia Chandel district, Manipur­a Paraolin hmuna NSCN (K) han Army hai an lambun huna khan Army 18 an thi bakah Army iemanizat an hliem a nih.

French Ambassaor Nagaland an zin el thei
DIMAPUR: India rama French ambassador Francois Richier chu Nagaland Chief Minister T.R. Zeliang in a fiel angin Nagaland­ah a hung inzin el thei tiin ei thu dawngna chun a hril. Zeliang chun Richier hi June 28, 2015 khan New Delhi hmuna an hmupui a, Reicher chun Nagaland­a  solar, cable car transportation le lamlien, thautui, gas le piggery sector haiah hung invest a nuom thu Zeliang hi a hril.

Delhi Colleges haiah Free Wi­fi
NEW DELHI: Delhi­a Aam Aadmi sawrkar chun Delhi Universities hnuoi Colleges haia chun tukum kum tawp chena hin internet a thlawna hmang theina free wi­fi services sie vawng a tum.  Hi thila hmang ding hin AAP sawrkar chun Rs. 50 crore a bituk. Hi services hi Goverment websites hai chu limit um lovin a thlawna hmang thei ding le a dang hai chu limit um ning an tih tiin Delhi Dy. CM Manish Sisodia chun a hril.

Tihar Jail­a intang 2 an tlansuok, 1 mankir
NEW DELHI: June 27, 2015 zan khan Tihar Jail­a intang mi pahni Saizan (19) le Javed (18) hai chu Jail­a inthawk an tlansuok a, Saizan hi man nawk a ni ta a, Javed hi man tuma zawng mek a la nih. Delhi Lt. Governor Najeeb Jung chun zanikhan magisterial inquiry thaw dingin order an suo a, inquiry hi chawlkar hni sunga zo ding le report pe dingin an hriettir.

Bangladesh­ah tuilien le mimkei leiin mi 23 an thi
DHAKA: Bangladesh a chun zani hmasa khan ruosur nasat leia tuilien le mimkei nasa tak tlung leiin mi 23 in thina an tuok a, hmun inhnuoina hmuna cheng mipui hai chu hmun himna hmuna insawntir an nih. Tuilien hin Cox’s bazar le Bandarban district hai a chim leiin mi tam takin harsatna an tuok pha  mek a nih.

US a in pakhat chunga vuongna a tla thla
PLAINVILLE: US a chun June 28, 2015, 5:45PM khan Vuongna chin Beechcraft BE 36 vuongna chu Plainville hmuna in pakhat chungah a tla thla a nasa takin a kang a, a sunga chuong mi 3 hai chu an thi vawng. Hi vuongna hi Pensylvani­a Lancaster airport­a inthawka vuongsuok, Massachusetts­a Norwood Memorial Airport pan a nih.
---------------------------------------------------------------------------------------
VAWISUN THUPUI
Unauhai, inhrilse tuo naw ro. Tukhawmin a unau a hrilsietin amani, a unau a sawiselin amanih, Dan a hrilsietin Dan a sawisel a nih; nisienlakhawm,  Dan i sawisel chun Dan zawmtu i ni nawh a, roreltu i ni lem.~ Jakob 4:11

Editorial: Hun hmang dik le hmang thiem

Sap thuvar ‘hun le tuiluongin tukhawm a nghak nawh’ ti hi a hrenaw mang ei um nawh.  Amiruokchu, hun hlutna ei la hriet tawknaw lei amani ding eini rawi a bik takin Zohnathlak hai hin hun hmang indik hi  harsa ei la ti khawp el. Thenkhat lem chun hun hi mani ta, mani nuom dan dana sukchawl le infetir thei anga inngai ni awm takin ei inret naw hle. A nina taka chun ‘Hun’ fe mek keingir thei khawpa ropui le thil thawthei khawvelah an um naw a, hun kei ngir thei khawpa hrat an um naw bawk. Jim Robin chun, ‘hun hi pawisa nekin a hlu lem. Pawisa chu tam tak i nei thei a, sienkhawm ‘hun’ ruok hi chu mi neka tam i nei thei nawh a lo tih. Pawisa hmang ral ta chu lamdawk nawk thei a ni a, sienkhawm hun liemta ruok chu hmukir thei a nita nawh. Tui hi a luong zing a, a pangngai luongzing ruok chu a ni nawh. Hieng ang bawk hin ‘hun’ hi a pangngai zing a ninaw a, hun thar a hung inherdawk pei a ni lem. Khawvela thil hai hi siemthar (recycle) nawk thei a ni a, sienkhawm ‘hun’ ruok hi chu recycle thei a nita nawh. Hi lei hin hun hi a hlu hle a nih.
    
Khawvel nghawr hning thei khawpa mani inthunun thei, ral rel thiem le mi huoisen sipai General Nepolean Bonaparte kha ei a hrenaw mang ei um ring a um nawh. Kum 1815 aWaterloo hmuna France sipai hai British sawrkar le a thangruolpui han nasa taka an bei hrawn laiin chawl a nuom tlat el a. A har suok meu chun a lo inhnu ta a, hnena chang nawk ngei dinga ring France chu a tlawm ta duoi duoi el a ni kha! Tulai khawsakna kawnga mamaw le tul a pung tuol tuol a,  mitin mani sinah ei buoi seng leiin, hun awl nei thei ei tlawm deu deu a, hunawl ei la haunaw pei ding a nih. Hieng a ni lei hin ei hun hai ei hmang thiemnaw a ni chun mi hnung hnawt ei ni pei ding a nih. Hun hmang dik le hun hmang thiem hi inchuklai hai ta ding chau ni lovin mitinin ei pawimaw.
    
Politicians le Officers khawm ni inla, hun hmang ei thiemnaw a ni chun ei ram le hnamin hma sawn ngainaw nih.  Programme le thilthawna dang dang haia dingin hun ei bituk rawp hlak. Sienkhawm darbi ei bituk hun chara programme tan hi chu eini lai hmu ding a vang khawp el. Hang ti bik inla, Hmar hnam sungah tuchena hun hmangdik tak chu Hmar Literature Society Manipur (HLS­M) hai niin ka hriet. Anni hin chu a darbi an ruot indik takah an tan tlangpui hlak. Hi lei hin programme va simtu hai ta dingin a varzang hle hlak.
    
Officer, Politicians annawleh ienganga minister lien le ropui khawm ni inla, programme ilo vela khuollien ding amania fielin ei um a, thang dinga intiem ei ni chun a hunbia tlung hman ngei dingin hnawt hlak inla a tha. Thenkhatin nghak ngaia um hi insuk milien naa ei ngai ni awm fahrana nghak ngaia um zing zing dam hi inzak nachang ei hriet ahuntah.Manipur­a Churachandpur district­a politicians hai laia hun hmang dik taka hriet chu Saikawt A/C MLA Pu T.N. Haokip hi nia hriet a nih. Kawng tam takah demna ding a lo um a ni thei, sienkhawn hun hmang dik kawnga chu Pu Haokip hi ei Politician hai entawn dinga tha a nih. M. Scott Peck chun, mani hun hlutna hre lo hai chu mani hlutna (value) hrelo an nih tiin a hril.
    
Mi tam takin hun hmang dik nachang ei hrietnaw nasan nia inlang chu ‘hun’ hlutna hi ei hriet tawknaw lei niin an lang. Khawvela thil hlua ngai Lunghlu, rangkachak le a dang dang hai hi a hlutna le a man tamna ei hriet leiin a nei zo hai khawmin ei dengthang mei mei ngainaw a, tha takin ei enkawl hlak. Hiengang bawk hin ei hun hi a hlutna chieng takin hre inla chu tu ang mei mei hin ei hmang ral ring a um naw a nih. Hun ei indainaw deu deu ding a ni leiin mitin a tu el khawm ni inla, programme siemtu annawleh huoihawttu hai khawmin hun hmang dan ei thiem a, hun hmang indik hi ei inchuk a, ei insukhmu pei a tul. Hun biktukah ei tlung naw annawleh ei tannaw khan hun fe pei chu ei chelngir a ni nawh. Hun ei hmang diknaw kha mi thenkhatin an lo tuor thei a nih ti hi ei hriet tlat a pawimaw.
    
Hun hi a hausa le pasie, mitin ta dinga Pathienin ang khata a mi pek a ni a, milien­­milal, MLA, Ministers hai khawm, mi naran le mi rethei hai nekin Pathienin hun a mi pek rawn bik naw a, an ta dingin hun hi a fe muong bik nawh ti an hriet nuom a um. Khawvel mihriem ienganga thilthaw thei le mi var, mi ropui hai khawmin hun hi second khat khawm an thuneina le thilthawtheina hmangin an chelngir thei nawh. Ei ram le hnam, ei khawtlang, insung, kohran le mipui mimir siemtahtna dingin tu hun hi a pawimaw. Hun bituk ei bawpel rawp hlak leiin harsatna ei tuok hlak. Football inkhelnaah ball pet goal ding chun a khelmuola lutchil a ngai ang hin. Rala inthawk thlir chun ei goal thun ngainaw manih. Ei lutchil a ngai. Chu ding chun mani seng in siemthar ei tiu. Hun ei hmang indik a, ei hmangthiem hmapo chu ienganga changkangin inngai inla khawm hmasawnna hmu ngainaw mani. Hun hmang diklo le hmang thiem lo ram hmasawn le changkang an um ngai nawh. Hmasawn ei tum a ni chun hun hi hmang dikin hmangthiem tum seng ei tiu.

Don't Miss
© all rights reserved
made with by Simon L Infimate