Responsive Ad Slot

Hmasawnna Thar | 25 June, 2015

Thursday, June 25, 2015

/ by VIRTHLI HMAR
Tuolsung
DSWO Office ­ah Tar pension sum sem tan
CCPUR: District Social Welfare Office (DSWO), CCPur chun zani 10:30AM a inthawk khan Tipaimukh Road­a an office hmuna IGNOAP hnuoia Tar pension sum an sem tan. Zanikhan CCPur A/C sunga mi Red le Blue Card Holders hai kuoma pension sum sem a ni a, kum 60­79 inkar mi hai kuoma pension sum sem hi thla 14 a mi Rs. 2800/­ pei le kum 80 le a chungtieng hai thla 11 a mi Rs. 5500/­ pei a nih.
  

Pension sum la ding mi an tam leiin nasa takin an innawrbuoi a, hi lei hin Inspector N. Thangzamuan, OC/CCPur Police Station le SI Sandy, OC/Women Police hai inrawinain Police le VDF han Social Welfare Office hi panin an duty. Tar pension sum hi July 8, 2015 chena sem ding a ni a, vawisun hin CCPur A/C hnuoia mi hai la sem sunzawm ning a ta, June 29­30 sungin Singngat A/C, July 1­2 sungin Henglep A/C; July 3­4 inkar in Thanlon A/C sung; July 6 in Samulamlan Block le July 7­8 sungin Tipaimukh A/C sunga mi hai sem ning a tih.
    


Damnawna leia mania sum va la thei lo ding hai chun DSWO kuoma application (hnina) peklut thei le verification thaw zo hnungah beneficiaries hai chu an in­a pek ding ti a nih.
            
Pension sum latu thenkhat la hrat tak anni laiin thenkhat chu taksa chau em em dam an ni leiin sawrkarin tar pension la hai ta dinga sem hadam dan lampui dap sien nuom a um. Tuta hma khan Imphal hmuna pitar pakhat chu a pension sum la dinga an tlar huna khaw hre lova tluin a lo thi der ta a nih.

PT tlan lai tluin damzo lovin a thi
CCPUR: Zani zingkar 6:20AM vel khan Khuga Dam, CCPur­a um 25­Madras Regiment um hai PT an tlan laiin PT tlan ve Sep. No.2618588Y Sep. Majji Sankara Rao chu BP Stroke leiin a tlu a, inrang takin District Hospital panpui a ni a, sienkhawm damzo lovin a thi tiin Police a inthawk ei thu dawngna chun a hril. A ruong hi Army han RIMS a post­mortem an thaw zovin Army han an lak nawk. Hi thina thua hin Police chun Unnaturral Dealth (UD) case No. 4/2015 CCP­PS U/S 174 CrPC an registered.

Wheelchair le hearing Aids semna
CCPUR/IMPHAL: Directorate of TA, Hills and SC chun June 25, 2015, 10:30AM a inthawk hin Directorate office­ah Wheelchair le hearing Aids semdawk a tum a, hnina (application) form   pe h ai chun hi directorate office­a hin ngaiven thei ning a tih tiin S. Minlianthang Vaiphei, IAS, Director TA & Hills a intahwk ei thu dawngna chun a hril. Hi huna hin Deparment Ambulance 2 hai khawm inhlanna a um nghal bawk ding niin ei thu dawngna chun a hril.

Scholarship Examination
CCPUR: Director of Education (S) chun Class V passed tuta Class VI inchuklai mek le Class VIII passed,tuta Class IX inchuklai mek hai ta dinga State Competitive Scholarship Examination, 2015 huoihawt a tum le inzawma CCPur district –a inthawk application peklut a um hai chu ZEO/CCPur Office in June 25, 2015 hin Imphal­ah zu pelut a tih. CCPur District a inthawk Class VI inchuk mi 132 le Class IX inchuklai mi 255 in application form an peklut.

HYA in an lawmpui thu
CCPUR: Hmar Youth Association (HYA) GHQ chun kum 2015 a India ram le state tu tum le Central Board hnuoia Class X le Class XII result puonga um haia HYA member hlawtlingna chang hai po po an hlawtlingna a lawmpui thu a puong a, hmatieng peia Pathienin an hma thuoia malsawm dingin ditsakna an hlan a. Ei ram le hnam ta dinga ban pawimaw tak hung ni a, sietni le thatni haia khawm hnam beltlak le mihai ta dinga malsawmna ni thei pei seng dingin a beisei bawk. Tuta tuma hlawsam hai khawm nasa nawk zuola hma laa hlawtling ngei dingin ditsakna an hlan.

OC Traffic a chel tan
CCPUR:Traffic Officer in­charge (OC) thar dinga ruot Sub­Inspector Jamliankhup chun zanikhan a sin thar ding a zawm tan.

NOC laa pelut dingin
CCPUR: CMO/CCPur hnuoia thawktu hai chu June 2015 thla hlaw an lakna dingin Electricity Department­ah One Time No Due Certificate la pelut dingin CMO/CCPur chun an hriettir.

Headline
CM O.Ibobi Singh in AYUSH Hospital a hawng;
Economic Blockade tawpsan dingin CM in ATSUM a ngen
IMPHAL: Manipur Chief Minister O. Ibobi Singh chun zanikhan Directorate of Health Services, Manipur Campus sung, Lamphelpat ah AYUSH Hospital, State Family Welfare Training Centre le Building thar dang hai a hawng. Hi huna hin Health & Family Welfare Minister Phungzathang Tonsing, Hill Areas Committee Chairman Dr Chaltonlien Amo, Uripok A/C MLA L. Nandakumar, Ex ­Minister  Dr M Nara, Dr J. Suresh Babu, Principal  Secretary (Health) le Dr O. Ibomcha, Director Health Services Manipur hai khawm an thang.
    


Hi huna Pu O. Ibobi Singh in thu a hrilnaa chun, tuhin AYUSH Hospital ah damnaw khum 20 a um a, hun sawtnawte hnungah damnaw khum hi 50 suktling a ni ding thu, Jiribam le Moreh haiah i/c Food Safety Officer le thawktu danghai sie anni ding thu, District tinah Food Safety Officers (regular) lak tum a ni thu, MPSC Chairman u m naw leia sukpuitling a la ninaw thu, Bengali High School compound sungah Ramkrishna High School indin tum a ni thu, ADCs 6 haia Nominated MDCs dinghai ruot vat anni ding thu le thu dang danghai a hril.
            
ATSUM in hun tiemchin umlo Economic Blockade an thawna thu a hrilkainaa chun, ATSUM in economic Blockade an thawna san hi thil awm lo a nih. Meeting le inbiekna neia an thil ngenhai sukfel thei a nih. Sawrkar chun an thil ngenhai a bawzui a, State Cabinet khawmin Scheduled Tribe Commission indin dinga rel a remti diem ta a, tuhin hi Commission Chairman le Vice Chairman sin lakna ding chau a bak ta a nih. Thil po po hi vawikhat thil thua thaw zo vawng seng a ninaw a, sawrkar ngirhmun khawm an hrietpui ve a tul a nih. Hi lei tak hin an thil thawn hi thil awm lo a hung nina san a nih tiin O.Ibobi Singh chun a hril.

ATSUM Volunteers han Truck an raw
IMPHAL: Zani zantieng 1:40Pm vel khan thir phur Truck pakhat Imphal tieng pana hung chu Sapermeina hmuna ATSUM Economic Blockade bawsiea intumin ATSUM Volunteers han an raw niin ei thu dawngna chun a hril. ATSUM chun June 22, 2015 zanrila inthawk khan National Highways haiah hun tiemchin um lovin Economic Blockade an thaw tan ta a nih.

HSLC Compartmental Exam, 2015
IMPHAL: Board of Secondary Education Manipur (BSEM) chun HSLC Examination (Compartmental), 2015 chu July 6, 2015, 10AM­1PM inkar sunga nei dingin exam routine a siem. Hi dungzui hin Churachandpur District a candidate­hai ta dingin CCPur chu Exam centre­a ruot a nih. Private candidate­hai ta dingin Imphal Exam centre a ruot a nih.

Ram Muivah empanelled list­ah
IMPHAL: Ram Muivah, Additional Chief Secretary, Govt. of Manipur chu Union Government hnuoia Additional Secretary post chel dingin empanelled list­ah inthangtir a nih. Ram Muivah hi 1985 batch IAS Officer, Manipur cadre, University of Birmingham, UK a MBA post Graduate zo a nih.

Counter Blockade an thaw tan
IMPHAL: Meitei Youth Front, South East Asia chun ATSUM in June 22, 2015 a inthawka hun tiemchin um lova Economic Blockade an thaw tan dodalnain zanita inthawk khan Counter Blockade an thaw tan. Moidangpokpi­ah Imphal­a inthawka thil chi tum tu m phura Keithelmanbi pana fe Mini Truck suksiet a ni bakah Tata DI Mini Truck 5 khawm sukchawlin an thil phurhai an keithlak pek a, a hnungin Police han an va lakkhawm.

AYUSH entrance test result
IMPHAL: Directorate of Health Services, Manipur hnuoia AYUSH entrance test result a suok ta a, result hi AYUSH Directorate Notice Board le Department Website­ah hmu thei ning a tih.

Others
Parliament Monsoon Session July 21 a inthawk
NEW DELHI: Zanikhan Cabinet Committee on Parliamentary Affairs (CCPA) chun meeting an nei a, Parliament Monsoon Session chu July 21, 2015 a inthawk August 13, 2015 chena nei dingin an rel. Parliament Monsoon Session hi a tlangpuiin haptakar 4 nei a ni hlak a, tuta tum ruok hin chu haptakar 3 sung nei ning a tih. Lalit Modi chungthuah Parliament Monsoon Session boruok hi a sosang hle ring a nih. Lalit Modi chungthuah Congress party chun Rajasthan CM Vasundhara Raje le Union External Affairs Minister Sushma Swaraj hai chu inban dingin an phut a nih.

Assam­ah Helpawl 5 man an nih
GUWAHATI: Zanikhan Sonitpur district sunga hmun hran hran haiah helpawl 5 an man.  Hathibandhal village hmuna Army le Police thangruol han dappui an thawnaah ULFA cadre pahni hai Babul Das le Mohan Bora hai chu AK­56 Rifle 1, Hand Grenade 2 le silaimu iemanizat leh an man. Chun zani ma khan Army le Police han Kokajhar district sunga Karigaon area­a dappui an thawnaah Muslim Tigers Force of Assam (MFTA) cadre 3­ Shahidul Hosen, Akash Ali le Nazirul Islam hai chu Pistol 2 leh an man bawk.

ANLA C­in­C thangin ANLA 5 man
GUWAHATI: June 22, 2015 khan Assam Police han Pan Bazar, Guwahati­ah A’Chik National Liberation Army (ANLA) self­styled Commander­in­Chief Suber Sangma of Rongkhong, Karbi Anglong thangsain ANLA member 5 an man. Suber Sangma hi thu an indawn huna,  Bangladesh ramri zul, Garo Hills, Meghalaya sungah camp an nei thu, AK­47 Rifles 50­60, M­40 Rifles 4, 9mm Pistols 9, .32 Revolver 12, Grenades 15 le ralthuom dang dang tam tak an nei niin an puong.

Kum 3 hnungah Aizawl­ah Rel a tlung ding
AIZAWL: Tuta inthawk kum 3 hnungah Mizoram State khawpui tak Aizawlah Rel a tlung ta ding a nih tiin R.S. Virdi, General Manager (Construction), NE Frontier Railways chun June 22, 2015 khan Aizawl hmun ngeia a hril. Bairabi, Mizoram le Sairang, Mizoram inkara Rel lampui (broad gauge line), leilak 7 le hnuoiver 23 umna, km. 51 a sei chu March, 2018 a zo dinga target a nih tin R.S. Virdi chun a hril. A thei chun Rel lampui hin Myanmar insunthlangtir dinga riruong siem a nih.

Dist. Jail Diphu a intang mi 4 an tlan hmang
DIPHU: June 22, 2015 zan khan Karbi Anglong district, Assam a District Jail, Diphu a intang hai laia mi 4 hai chun bedsheet hmangin an intangna huondai lawn liemin an tlan hmang. Hi thil tlung hi Jail vengtu han zingkar khawvar hnungin  an hrietsuok chau. Lungin a inthawka tlan hmang hai hi Karbi People’s Liberation Tigers (KPLT) pawla mi vawng an nih. District Jail, Diphu hi mi 260 intangna dinga siem a ni a, sienkhawm intang 569 sie an nih.

Zurui puma motor khal hai hremna
NEW DELHI: Road Transport and Safety Bill chu dan (Law) a hung ni a, hi dan hi hmang a hung ni pha leh Zurui puma motor khaltu (driver) hai hremna a rik hle ta ding a nih. Tuhin Zurui puma motor khal hai chu Rs. 2,000 inchawitir or thla 6 lungin a khum (a vawikhatna) a ni a, dan thar hmang a hung ni pha ruok chun Rs. 1,00,000/­inchawitir (a vawikhatna) anni ta ding a nih. Zurui puma driver man nawna u m hai chu Rs. 3,00,000 chen inchawitir thei an ni ding a nih.

PM in flagship schemes 3 a hawng ding
NEW DELHI: PM Narendra Modi chun vawisun hin Flagship Schemes 3, Smart Cities Mission, Atal Mission for Rejuvenation and Urban Transformation (AMRUT) le Housing for All hai hawng a tih tiin zanikhan Union Urban Development minister M. Venkaiah Naidu chun New Delhi a reporter­hai an hmupui huna a hril. AMRUT Mission a sum seng dinga riruong chu Rs. 50,000 crore a nih.

Sawrkar thawktuhai a hun taka kai dingin
NEW DELHI: Department of Personnel and Training (DoPT) chun sawrkar thlungpui hnuoia Ministries tina thawktuhai chu an office seng a hun taka kai a, tin hun hma a tin lova a hun taka tin hlak dingin an hriettir. Office kai inhnu le office tin hun hmaa tin hai chunga Disciplinary Action lak ning a tih tiin DoPT chun thusuok a siem. India ramah sawrkar thlungpui (Central Government) hnuoia thawktu umzat hi nuoi 48 vel niin DoPT thusuok chun a hril.

Shillong­a nuhmei upa tak a thi
SHILLONG: Meghalaya state khawpui tak Shillong a nuhmei hring dama la um hai laia a upa taka record, Kiemsimai Kharmawlong chu kum 115 mi niin June 22, 2015 khan a thi. Tu 4, tusawng 19 le tusawng nawk 70 a nei hman a, kum 2013 a Meghalaya Assembly election a khan vote a la thlak niin ei thu dawngna chun a hril. A ruong hi vawisun vui liem ni chau a tih.

Mizoram Assembly session July 7­ah
AIZAWL: Ni 3 sung aw ding Mizoram Assembly Session chu July 7, 2015 a inthawk tan dingin Mizoram Governor Lt. General (Retd) Nirbhay Sharma in a ko. Business Advisory Committee (BAC) meeting chun Assembly session hi July 9, 2015 chena nei dingin a rel. Hi session a hin full budget ni lovin Mizoram Finance Minister Lalsawta in Vote on Account bawk Assembly session ah a phar ding niin S.R. Zokhuma, Additional Secretary, Mizoram Assembly chun a hril. Session tan niin Brig. T. Sailo thi sunna hunser hmang ning a tih.

Rangkachak kg. 17 leh Nepal mi man
NEW DELHI: June 20, 2015 khan New Delhi Railway Station­ah Bhutan mi Kinle Dorje chu rangkachak kg. 17, Rs. 4.42 crore manhu leh Directorate of Revenue Intelligence (DRI) Officials han an man. Bhutan mi rangkachak le mana um hmasa tak a la nih. Rangkachak hi kg. 1 peia siemin a kawnga a khitde, China mi pakhatin pawisa hlaw dinga an phurtir niin Dorje hi DRI han thu an indawn huna an puong.

TMBU­ah Tomar application hmu a ni nawh
BHAGALPUR: Fake degree certificate case­a man le jail­a intang mek Delhi Law Minister hlui  Jitendra Singh Tomar in degree a lakna nia a hril le Registration number neina Tilka Manjhi Bhagalpur University (TMBU) a chun a application form hmu a ni nawh tiin hi case suitu Police  team chun an hril.
    
Delhi Assistant Commissioner of Police (ACP) Pramod Singh Kushwaha inrawinaa member 15 umna police team chun zani hmasa khan Bhagalpur­a fein suizuina sin an sunzawm a, hi huna hin hi university a examination departments le inzawm sections 5 hai chu an enfel vawng bakah TMBU a controller of examinations hlui Rajendra Prasad le RR Podder hai khawm thu indawnna an nei a, Tomar in degree a lakna nia a hril hun laia Vice Chancellor sin lo cheltu khawm thu indawnna nei an tum. Tomar hi bail a ngenna hnawlpek a ni hnungah ni 14 sung jail­a intang phawt dinga Court in a rel a nih.

WB in Nepal kuomah thangpuina USD 500mn
KATHMANDU: Nepal rama simkhawlei hrat tak le rapthlak takel an hning leia harsatna tuortuhai thangpuina ding le thil a suksiethai siem thatna dingin World Bank (WB) chun Nepal kuomah thangpuina US dollar maktaduoi 500 peng a tih tiin Jim Yong Kim, President, World Bank chun zani hmasa khan a puong. US dolalr maktaduoi 200 chu thil a suksiet hai siem that le i ndin thar nawkna ding, US dollar maktaduoi 100 chu Nepal­a Bank­hai sukhrat nawk zuolna ding le US dollar maktaduoi 200 dang chu Nepal World Bank Projects haia dinga hmang ning a tih tiin World Bank thusuok chun a hril.

Thamna Rs. 3,000 a lak leiin ASI man
LUDHIANA: June 22, 2015 khan Dehlon Police station, Punjab a Assistant Sub­Inspector (ASI) sin chel lai (Punjab Police) Sawinderjit Singh chu thamna Rs. 3,000 a lak leiin Vigilance Bureau han an man. Thamna hi Surinder Singh of Jassowal Village in a pek ding hi Senior SP, Vigilance Bureau kuomah a hriallawk leia thamna Rs. 3,000 a lak lai taka man theia um a nih.

Pakistan a khawlum leia thi mi 1200
KARACHI: Pakistan rama Sindh Province a khawlum chun zuol tieng a pan pei a, khawlum tuorzo lova thi an la u m pei a, tuchena Karachi khawpuia thi chu mi 100 le hmun danga thi chu 200, an rengin mi 1200 an tling ta niin ei thu dawngna chun a hril.

Kerala Ayurveda brand ambassador dingin Steffi Graf
THIRUVANANTHAPURAM: Tennis legend Steffi Graf chu God’s Own Country Kerela state a Ayurveda Brand ambassador dingin Cabinet in a ruot tiin Kerala Chief Minister Oommen Chandy chun a hril. Steffi Graf (46) hi German tennis player le world number one hlui a ni a, Grand Slam single titles 22 zet lo la ta a nih. Ayurveda brand ambassador­a ruot tumna le inzawm hin Kerala Tourism department chun Graf hi biein an fiel a, an fielnaa pawmpek a nih. Graf hi kum 1999 khan tennis khel a chawlsan a, pasal­a world no. 1 hlui tennis player tho Andre Agassi leh October, 2001 khan an innei a nih.
--------------------------------------------------------------------------------------------------------------
VAWISUN THUPUI
Tukhawm a lei le a bau veng tha chun, Buoinahaia inthawkin a lungril chu a veng tha a nih. Mi chapo le mi uong chu a hming chu Hmusittu a na, Inphuloin chaponaah sin a thawh a. ~ ­Thuvarhai 21:23­24

Editorial
Mani hlutna hrieseng ei tiu

Mani seng hi hang inen inla, khawvela mihriem hieng zozai hai lai hin ei inangpui hrim hrim an um nawh. Mithiemhai chun khawvela mihriemhai po po hi inang tukhawm an um naw a, inphirhai khawm inang an um nawh tiin an hril. Chuong a ni chun mani seng hi khawvela Pathienin hmel inangpui nei lova a mi siem seng a ni leiin mihriemhai hi hlu takel ei nih. Mi han an mi ngaihlu naw khawma mani bek hi inngaihlu ding le ei hlutzie hi hriet ding a nih. Hi taka inngaihlu ding ti hin chapona a kawk der nawh. Mi chapo ei tihai chu a chidang an nih.
    
Mi ama le ama an ngaihlu thiem a, a thaw ding a thaw a; thaw lo ding a thawnaw chun mi tha, mifel le mi changkang a nih. Annawleh miin dawn lo ding a dawn naw thei a, fak lo ding fa lova a um thei chun mi hrisel tak hung ning a ta, mihai dem le hmusit ni thei naw ni a, mi changkang hung ning a tih. Hi hi hmasawnna sirbi a nih. Thaw lo ding thaw, dawn lo ding dawn, hip lo ding hip, hawp lo ding hawp hlak hai chu addict an hung ni hlak. Chuongang mihai chu mi changkang anni ngai nawh.
    
Tlangval pakhat zu he deu hi kum la tam lo deuin a thi a. Zan huna khawsawt le lusun tuorhai lengpuina lengkhawm huna a pa chun thu a hril a. Bawngnene hi taksa ta dingin a that em em vei leh, ka naupa hin a dawn nuom ngai der naw a, a taksa ta dinga tha naw em em el Zu a du lem lei le a dawn rawp leiin hiengang hin a thi ta a nih, a pawi khawp el. Nangni dama la um nunghak le tlangval hai hin chu Zu le Drugs hung thaw ngai der naw ro tiin ama thlamuong le hnemtu dinga fekhawm thalaihai chu thahnemngai takin an fui tawl. Thalaihai hin ei hlutzie hi hrietchieng tum ei tiu.
    
Value system ti hin hril a hlaw hle a, vawisun chen hin hril a la ni rawp hlak. Thalaihai laia rawngbawltu le thuhriltu hai lem chun an hril uor hle awm ie. A ni khawp el, ei tulai huna hin ngaihlut lo ding hi ei ngaihlu ta niin an lang a; ngaihlut ding le dingnaw hi ei inchuktir le ei inhrilhriet a tul ta takzet a nih. Ngaihlut ding indik tak ei ngaihlu thiem ding chun mihriemhai hin ‘mihriemhai hlutna” ei hriet hmasak a tul a. Hi taka khawm hin mani seng inngaihlut hi a bul tanna ding niawm tak a nih. Mitin hin mani seng hi inngaihu thiem seng inla chu tulaia ei thil ching tha lo em em el, Zu le inruithei chi tum tumhai hi ei bansan thei ngei ring a um.
   
Mihriemhai hi Pathien angpuia siem ei ni a, ei hlu ngawi ngawi el a nih. Mi laia mawilo baksaka kuva sen hem huma, mi laia dumkhu hawp, sada le khaini hmuom, tuibur hmuom puma tawng pur pur dam, mihai thangpuina beiseia invir invir dam, an dik le mawinaw khawm dawn lova hmelhriet thil thaw thei hai zar zo tum tlat dam, sunghai thawsa ring tlat dam hi inzak a um a nih. Hlutna nei ve si ta ding chun changkang san dai ding a nih.
    
Mitin hin ei hlu a nih ti hi hriet zing ding a nih. A thi tahai hi an um tanaw sawng pei a ni a, angpui le tlukpui amani hlak a um si nawh. Mani le mani ei inngaihlu thiem naw leia fak le dawn thanaw tak tak leia mani insuksiet ta ei va tam ngei de! Ei hringna hi a hlutzie ei hrietlawk naw leia mani le mani inthat el khawm ei tam taluo tah. Mani inngaihlu thiem mi, midang inza thiem mi le mi insum thei hai chu khawsakpui inhawi tak an nih. Mani hlutzie hriezingin midang khawm an hlu ti hi hriepui pei ei tiu.


Don't Miss
© all rights reserved
made with by Simon L Infimate