Responsive Ad Slot

For One Life Saikawt Youth Centre Project

Wednesday, June 24, 2015

/ Posted by VIRTHLI HMAR
For One Life hai hi tuhai am an nia?

For One Life hai hi Christian Non-Profit Organization/NGO, America rama innghat, ruolcham tlawmte hai indin a nia, India ram abiktakin ei ram delna hmun hai hung fangin naupang le thalai tamtak thangpui ngai, inchukna tieng le hunawl hmangna ding duduk le mumal ei nei naw zie hai hung hmu in, anni hai thangpuia hmalak tumna lungril neiin an ram America tieng an thei ang ang in fund raising na chitum tum hieng softball tournament, volleyball tournament, Golf tournament hai neiin hienga sum an hmu hai hi ei rama an project haia an hmang a nih. For One Life hai hin India ram a chau naw khawm rambung dang danga hieng naufahra, naupang le thalai hai ta ding hin project dang dang an neia, ei ni ei rama an project zo tah le an nei mek ei hang hriet thei hai chu Parbung PMS School Building, Muolhoi PMS Building, Peter Lalthasang Memorial Scholarship, Northeastern Children’s Academy, Life Café, Rengkai le nikum laia nei tan Children’s Retreat Churachandpur (CRC) le a dang dang hai an nih. For One Life a hin Hmar tlangval Tv. Jospeh R Joute khawm, India rama FOL Director nina sin chel’n a thang a nih.


Saikawt Youth Centre

Churchandpur a naupang le thalai hai an talent le hunawl hai thataka an hmang thei na ding tiin For One Life hai chun Saikawt khuoa Youth Centre siem dingin hma an lo lak naw mek ta a nih. Hi Youth Centre a hin Football Stadium mi 7000 bawr inleng theina ding, Multi-Purpose Gymnasium (indoor stadium) mi 2500 inlengna ding, café/press box le inkhawmna ding Chapel (Biekin) hai chen an bawl tum a nih. Hi hmuna hin children’s retreats, church conferences, concerts le local events hai chen um theina dinga riruong ani bawk a nih.

For One Life haiin an riruong dan chun Saikawt Youth Centre hi phase 3 vela bawl/siem an tuma, a Phase 1 a hin Gymnasium, Stadium le Cafe/ Press Box hai an siem tuma, a dang hai chu a Phase danga siem pei dinga ti a nih. Phase 1 a sum sengzat ding an hisap dan chun India pawisa Rs. 4.3 crores lai zet a tling a nih.

Saikawt Youth Centre Initial Development Summary
Size of Development Area – 5.96 acres
Phase 1 Gymnasium Capacity – 2500 people
Phase 1 Stadium Capacity – 7000 people
Phase 1 Cafe/Press Box Capacity – 70 people
Cost to complete Phase 1 – INR 4,32,36,000/- (US$ 686,400)

Hi Saikawt Youth Centre le inzawm hin liemtah February 2015 khan America ainthawk Engineering Ministries International ami engineer le architect mi pasari hai chu Saikawt hmun ngeia hungin hi Youth Centre bawlna ding hmun hai enfelna an lo nei taa, project detailed reports/concepts hai iengkim an zofel vawng taa sin khawm an thang vat beisei a ni tah.

Hienga ei rama malsawmna hung keiluttu hai abiktakin ei Hmar hmun haia thiltha inthut thei dinga hmalatu hai hi inpak an um in chawimawi an phu hle a nih. Ei ram le hnam, sungkuo, naupang le thalai tamtak hai ta ding chun malsawmna intluntu ani mek tah. An rawngbawlna/hmalakna hai chawkbuoi thei zawnga hma lo latu ni lovin an rawngbawlna hai ei theina kawng kawnga thangpuitu ni tum tlat lem ding a nih.

Saikawt Youth Centre an bawl dan ding riruong um chu a nih.


Don't Miss
© all rights reserved
made with by Simon L Infimate