Responsive Ad Slot

Hmasawnna Thar | 20 June, 2015

Saturday, June 20, 2015

/ by VIRTHLI HMAR
Tuolsung
CDPSA hmalaknain District Toppers’ Award sem a nih
CCPUR: Churachandpur District Private Schools Association (CDPSA) chun zani 2:00PM  khan Salt Brook School Auditorium, Tuibuong, CCPur­ah 4th District Toppers’ Award Ceremony an hmang. Hi huna hin khuollienin C. Arthur, IAS, Chairman, COHSEM a thang a,  Guest of honour in Ch. Sharat, Secretary, BOSEM; Sarangajit Khundrakpam, Secretary,  COHSEM le  T. Goukhomang Simte, ZEO, CCPur hai special Guest in an thang.
    

Hi huna hin Chief  Guest le  Guest han BOSEM topper 3, CBSE topper 2, Class XII CBSE 3 (Science, Arts & Commerce), COHSEM a Topper 9 (Arts 3, Sc. 3 & Commerce 3) hai kuomah Appreciation Certificate inhlanna an nei.
    

Award dawngtuhai chu­
Class X (BSEM): 1. Nemneichoi Baite, St. Mary’s H/S marks 437 (87.4%); 2. J.C. Zolientluong, Young Learners School marks 437 (87.2%); 3. Salima Begum, CTHSS, marks 426 (85.3%).

Class XII: COHSEM/Arts
1. K. Lhingboi, Rayburn College marks 424 (84.8%); 2. Dimngaihnem, Rayburn College marks 419 (83.8%); 3. Chingngaihniang, Rayburn College marks 415 (83%)
Class XII: COHSEM/Science: 1. Henkholen Khongsai, Donbosco Hr. Sec. School, marks 416 (83.2%); 2. Manngaihnieng Khongsai, Rayburn, marks 404 (80.8%); 3. Ropienglien, Sielmat Chr. Hr.  Sec. School, marks 399 (79.8%).
    
Class XII: CoHSEM/Commerce: 1. Nengnunmoi Haokip, marks 364 (72.8%); 2. L. Jangminthang Khongsai, Rayburn, marks 360 (72%); 3. Jenny Niengneithiem, Rayburn, marks 359 (71.8%).
    
Class X: CBSE:
toppers­ Baby Vungbiaklun, St. Paul’s Institute,  (CGPA: 9.6); Joshua Thangbiaklal Ngaihte, St. Paul Institue  (CGPOA: 9.6).
    
Class XII: CBSE/Science:
Hatzozam, St. Paul Institute, d/o Mr Ginzamang T. Zomi & H. Esther Gangte, marks 455 (91%).
Class XII: CBSE/Arts: Jonathan F. Lalrinkima, St. Paul’ Institute, marks 475 (95%).
Class XII: CBSE/Commerce: Ankit Kumar Walia, St.Paul Institute, Marks 453 (90.6%).
            
BSEM Class X ­a 1st, 2nd le 3 han Rs. 10,000/­, Rs. 8,000/­ le  Rs. 6,000/­ lawmman an dawng a, CoHSEM hnuoia Arts, Sc le Commerce a han  Rs. 5,000/­, Rs. 3,000/­ le Rs. 1,000/­ an dawng a, CBSE hnuoia  mi han Rs. 3,000/­ seng a ni a, a dawngtlang han Rs. 3000 hi a zatnain an insem.

IGNOAP sum June 24 a inthawk sem ding
CCPUR: June 24­July 8, 2015 inkar, 10:00AM a inthawk District Social Welfare Office, Tipaimukh Road, Chiengkonpang­ah Indira Gandhi National Old Age Pension Scheme (Red & Blue) card holder hai ta dingin sum sem ning a tih. Sum an lak ding zat chu Kum 60­79 inkar han January, 2014­February 2015 inkar( thla 14) a mi, thla khatah Rs. 200/­ a rengin Rs. 2800/­ pei ning a ta; Kum 80 le a chungtieng han March 2014­January 2015 inkar thla 11 a mi, thla khatah Rs. 500/­ a rengin Rs. 5500/­ pei ning a tih. Pawisa sem huna hin Old Age Card, color passport copy 3, Voter I­Card (EPIC) Xerox copy, Aadhar Card Xerox copy bakah bank account book Xerox copy chawi ngai a tih.
    
A sem dan ding chu­ June 24­ 27, 2015 sung CCPur A/C; June 29 & 30, 2015 in SIngngat A/C; July 1 & 2, 2015 in Henglep A/C; July 3 & 4, 2015 in Thanlon A/C; July 6, 2015 in Samulanlan block le July 7 & 8, 2015 in Tipaimukh A/C hnuoia mi hai sem ning a tih tiin ei thu dawngna chun a hril.

One Day Awareness Camp
CCPUR:  June 25, 2015 11AM a inthawk khin DIC, CCPur chun Central Hall, DIC, CCPur­ah furniture siemna tiengpangah (wood, cane & bamboo, steel etc) ni khat sunga dingin awareness programme um a tih. A thang nuom han passport thlalak copies 2, Voter Card, Aadhar Card etc chawi ding ti a nih. Thu chieng lem DIC, MSME Section, CCPur­ah ngaiven thei a nih.

Block level neighbourhood Youth Parliament
CCPUR:  NYK, CCPur le Muolvaiphei Youth Club/HYA thangruola huoihawtnain June 21, 2015 nia International Yoga Day 2015 hmang ding le inzawmin vawisun hin Muolvaiphei Community Hall­ah Block level neighbourhood Youth Development Parliament um a tih.  NYK, CCPur le Singngat Youth Club hai thangruola huoihawtnain vawisun hin hiengang programme hi Singngat­ah hmang ni bawk a tih.

Intl. Yoga Day ding thuah meeting
CCPUR: Zani 12:00 khan June 21, 2015 nia Internationl Yoga Day 2015 hmang ding le inzawmin Mr Lunminthang Haokip, IAS, SP, CCPur inrawinain DC Office­ah meeting nei a nih. Hi huna hin ZEO; CEO/ADC; DYC, NYK/CCPur; CCPur Dist. Private School Assn. President le Secretary hai an thang a, tuta tum hi International Yoga Day a vawikhatna ding a ni leiin School hai chu an thei dan dana hmanga thlalak DC office­a pelut dingin an rel.

SP in SI pahni a sawnkuol
CCPUR:  SP, CCPur chun zanikhan Police SI pahni hai chu an sin a sawnkuol a, hi dungzui hin SI Jamliankhup chu CCPur PS a inthawk in­charge OC Traffic dinga sawn a ni a, SI P.  Semkholal Zou chu CCPur PS a inthawk Addl. SP, CCPur office­ah thawk a tih.

Imphal
10th Manipur Legislative Assembly 11th Session June 26, 2015 a inthawk inthung tan ding; sitting vawi 11 um a tih
IMPHAL: Zanikhan Manipur Legislative Assembly Speaker le Chairman, Business Advisory Committee (BAC), Th. Lokeshore Singh inrawinain BAC, Manipur Legislative Assembly chun meeting an nei a, Manipur Assembly Budget Session hung um dinga thu ngaituo ding le rel  dinghai an hriltlang. Hi meeting chun 10th Manipur Legislative Assembly 11th Session chu June 26, 2015 a inthawka inthung tan a, Assembly Session hi July 10, 2015 chena inthung dingin an rel.
            
Hi Session sung hin Sittings vawi 11 um a ta, Session tan ni, June 26, 2015 khin Manipur Chief Minister le Finance chanvo chel bawk, O.Ibobi Singh chun kum 2015­16 full budget phar a ta, members han hriltlangin pass an tih. Chun, hi session a hin Bill dang dang Inpuiah putlut le hriltlang ning a ta, pass theia um hai pass ning a tih.

Wakf Board Chairman dingin Fajur Rahim
IMPHAL: Wabagai A/C MLA Fajur Rahim chu zanita Minority and other Backward classes Office­a election nei huna Wakf Board Chairman dinga thlangtling nawk a nih. Fajur hin votes 11 umah votes 7 a hmu a, Maulana Abdul Gaffar leh an inkhing a nih. WAkf Board chairman term hi kum 5 sung a nih

Manipur CM kum 67 a tling tah
IMPHAL: Manipur Chief Minister O.Ibobi Singh chu zani kha a kum 67 tlingna a ni tah. PM Narendra Modi chun O.Ibobi Singh hi a birthday a lawmpui thu, hriselna tha tak neia damsawt dingin ditsakna an hlan. Okram Ibobi Singh hi July 19, 1948 a pieng a nih.

Transport Department­ah sin a ruok
IMPHAL: Directorate of Transport, Govt. of Manipur hnuoiah post chi tu m tu m 17 (regular basis) a ruok. Hi sin ruok apply nuom han June 27, 2015 chenin hi Directorate a hin Application form lak thei le fill up zovin June 30, 2015 chena peklut thei ning a tih. Hi sin lakna dinga written test July 19, 2015 ah nei ning a tih.

Sanjenthong Leilak August a zo beisei
IMPHAL:  Bawl lai mek Sanjenthong Leilak chu August thlaa zo thei dinga beisei a nih tiin official thusuok chun a hril. Tuhin leilak bawlna sin 100 ah 80 zo a ni ta bakah leilak bawlna ding hmangruo hai France a inthawk a hungtlung vawng ta a, tuhin an buktuo vel chau a bak ta tiin ei thu dawngna chun a hril.

IMC thawktu han thungbuma nuorna
IMPHAL: Zanikhan Imphal Municipality Council (IMC) hnuoia thawktu han 6th Pay Commission dungzuia hlaw pe dinga ngennain thungbuma nuorna an nei a, an Vice Chairman chu IMC Campus sunga a lut ding an dang a, zinga inthawk IMC Gate an khar ta ding niin an hril. IMC thawktuhai hin June 10, 2015 a inthawka kha an sinthawl chawlsana nuorna an lo nei tan ta a nih.

ADC member a nuhmei nominate dingin
IMPHAL: Rajya Sabha MP hlui B.D. Behring chun zanikhanManipur Governor kuomah Memorandum a pek a, A memorandum a chun, Manipur­a ADCs 6 haia nominated seats 2 seng um haia chun Member dingin Nuhmei ruot (nominate) dingin a ngen.

AR medical team in Rul i chuk an sanhim
IMPHAL:  Master RS Thuinganing (10) s/o Yangashung of Tolloi Village, Ukhrul chu Rul in a kut changtiengpang­ah a chuk leiin na takin a hliem a, 41 Assam Rifles Unit Hospital panpui a ni a, hi huna hin medical officer chun Rul tur thatna damdawi kapin an sanhim. Naupang hi a hung tha pei ta niin PRO Assam Rifles (South) chun a hril.

Others
Zu thalo dawn leiin mi 53 an thi
MUMBAI: Zani hmasa zan khan Mumbai khawpui huop sunga Malad an ti hmuna Zu thalo dawn leia mihriem thina tuok chu 53 an tling ta a, mi 9 Hospital ah enkawl mek anni a, an ngirhmun an rik hle a hril a nih. Hi thil tlung le inzawm hin Zu zawrtu Raju Fernandes  alias Langda chu Police han an man bakah Police8 an sin haia inthawk suspended le midang 3 man an ni tah tiin Rakesh Maria, Mumbai Police Commissioner chun a hril. Maharashtra CM Devendra Fadnavis chun inquiry thaw dingin thuneituhai an hriettir. Zu hi funte khatah Rs. 10­30 a zawr, a dawntu chu Rickshaw drivers, kutdaw le mi pasie hai an nih tiin Police chun an hril.

NEC meeting ah PM in NE CM­ hai
AGARTALA: PM Narendra Modi chun NEC meeting nawkah a thang ve ding thu le NE CM­hai an hmupui ding thu Tripura CM Manik Sarkar kuomah a lo hril. Manik Sarkar chun June 18, 2015 khan PM Modi an hmupui a, Special Category status chungthu an hriltlang. NEC meeting huna NE CM­hai an hmupui huna khawm hi thu bawk hi an hriltlang ding niin Manik Sarkar chun a hril.

Helpawlhai dona kawnga thangruol dingin
NEW DELHI: India rama ni 5 sung cham dinga hung inzin Tanzania President Jakeya Mrisho Kikwete le India PM, Narendra Modi han zanikhan New Delhi­ah inbiekna an nei a, helpawlhai dona a thangruol dinga remtina an nei bakah tourism, education le hydrography haia thangtlang dingin agreements an ziek.

Mimkeiin thlan 27 a suksiet
AIZAWL: Zani hmasa zingkara ruosur nasat leiin Aizawla Muana Veng thlanmuol chu mimin a kei a, thlan 27 lai zet a suksiet. Tlawmngai Pawl han thlan thar choin mithiruonghai chu an phum tha nawk a, hi sin hi zanikhan an zo. Thlan tam lem hi tulai hnai ela cho an nih tiin C. Laldina, SP, Aizawl chun a hril.

UP a Hotel kangah mi 13 a kang hlum
PRATAPGARH: Zani zingkar dar 4:30 vel khan Uttar Pradesh a Pratapgarh khawpui huop sunga Babaganj an ti hmuna Goyal Residency Hotel­ah kangmei a suok a, mi 13 a kang hlum a, midang 10 in hliemna an tuok a, Hospital panpui an nih. Hi Hotel hi building sawngli a ni a, a kang siet vawng ang a nih. Kangmei hi electric short circuit leia hung suok ni dinga ring a nih. Meiin a kang hlum hai lai hin Dr Basant Narain (35), Om Prakash (35) le Journalist Manoj Sharma (30) hai an thangsa. Pratapgarh hi Lucknow a inthawka Km. 170 vela hla a nih.

AIPMT, 2015 exam hun ding SC in suksei a remtih
NEW DELHI: Central Board of Secondary School Education (CBSE) in Supreme Court kuoma All India Pre­Medical Test (AIPMT) exam a thar a nei hun ding suksei dinga a ngenna chu Supreme Courty in zanikhan a remti pek a, result ruok chu August 17, 2015 chena insuo hman dingin CBSE an hriettir. AIPMT Exam ah thil indklo a um leia Supreme Court in AIPMT, 2015 exam chu June 15, 2015­a a hnawl le a thara exam buotsai tha dinga SC in CBSE an hriettir a nih.

Nagaland­ah IEDs 30 phurlut
KOHIMA: Tulai hnai el khan Nagaland sungah Improvised Explosive Devices (IEDs) 30 phurlut le IEDs 6 hai chun Kohima an tlung tah tiin Intelligence report in a hril tiin IGAR (North) Major General M.S. Jaswal chun a hril. Hi lei hin Major General M.S. Jaswal le Nagaland a um Security Forces hai chun Nagaland sawrkar chu Myanmar le an inrina Km. 3 biel huop sungah Curfew zam dingin an ngen. Hi thil hi  helpawlhai inlawn vel dangna dinga thil tul a nih tiin an hril.

Pakistan in India Ngamantu 113 an suo
NEW DELHI: Zani hmasa khan Pakistan chun India Ngamantu 113 an suo. India khawmin haptakar khat liemta khan Pakistan Ngamantu 88 an suo zalen ve. Ramzan Kut lei le rambung pahni hai inkara boruok tha lem a hung um theina dinga hi thil hi thaw a nih. PM, Narendra Modi chun Pakistan PM Nawaz Sharif chu Ramzan chibai a buk.

Rahul Gandhi kum 45 a tling tah
NEW DELHI: AICC Vice President Rahul Gandhi chu zanikhan kum 45 a tling tah. PM Narendra Modi chun Rahul Gandhi birthday hi a lawmpui thu a hril. Rahul Gandhi hriselna ding le damrawtna dingin ka tawngtaipek a nih tiin Modi chun a hril. A birthday lawmpuinaiin Congress workers le ama ngainatu tam tak chun zanikhan a chengna in tuolah rawpuok le rawtek hai an raw bakah par an va sie tawl. 12, Tughlag Lane –a a chengnain ah party supporters han Cake kg. 45 a rik an va chawi a, Rahul hi a birthday an va lawmpui.

Nuhmei suolluitu thi dinga thiemnaw inchangtir
SEHORE: Zanikhan First Additional Session Judge, Alka Dube chun nuhmei naupang kum 8 mi suolluitu Ramesh Verma (30) chu thi dingin thiemnaw an changtir bakah Rs. 4000 chawi dingin a chungthu a rel. Ramesh Verma hin Jan. 4, 2014 khan Nipania khuoah nuhmei naupang kum 8 mi a suollui nia intum a nih. Sehore hi Madhya Pradesh state a um a nih.

Bihar in Helicopter a ngen
PATNA:  Bihar sawrkar chun an state­a Assembly election hung um ding le inzawma Maoist helpawlhai tukdawlna dingin sawrkar thlungpui chu Helicopter pe dingin a ngen bakah Maoist hai beitu dingin Paramilitary forces battalion 2 a ngen. Bihar Police chun Helicopter a neinaw leiin Maoist hai chunga operation thaw hunah a thenum Jharkhand state a inthawk Helicopter a hire hlak a nih. Hi lei in state home department officials hai chun Maoist hai tukdawlna dingin Chhattisgarh, Odisha, Andhra Pradesh le Jharkhand hai angin Bihar khawmin Helicopter a mamaw a nih tiin a hril. Bihar a chun tuhin central paramilitary forces battalions 24 an um mek a nih.

BSP MP hlui driver guard in a kap hlum
DEORIA: Uttar Pradesh a chun zanikhan BSP MP hlui Gorakh Prasad Jaiswal a driver Mohammad Yaseen chu Gorakh a bodyguard Yogendra Pal Singh in a kap hlum. Mohammad Yaseen le Yogendra Pal hai hi an inselbuoi a, chu huna hi thil hi tlung niin SP Manoj Kumar chun a hril. Hi thil tlung le inzawm hin FIR registered a ni a, mi kap hlumtu khawm hi a hnungin Police han an man.

CNR Rao kuoma Japan Civilian Award insang tak
NEW DELHI: Indian Scientist inlar le India rama civilian chawimawina insang Bharat Ratna lo dawng tah CNR Rao chu zanikhan Japanese Ambassador to India Takeshi Yagi chun Japan civilian chawimawina insang ‘Order of the Rising Sun, Gold and Silver Star’ le certificate an hlan. Rao hin an ram pahni hai ta dinga Science and technology tienga a thaw hlawk leia hi chawimawina hi an hlan a nih. Rao hi honorary doctorates 70 vel dawng ta le ‘Linus Pauling Research Professor’ le  honorary president, Jawaharlal Nehru Centre for Advanced Scientific Research, Bangalore ni lai mek a ni a, research papers 1000 chuong le lekhabu 36 a ziek ta a nih.

China in Electric vuongna hmasa tak a siem
BEIJING: China chun khawvela a hmasa tak ding Electric vuongna a siem niin official media thusuok chun a hril. Hi vuongna hi a hmingah BX1E ti inbuk a ni a, Liaoning province­a Shenyang Aerospace University le Liaoning general aviation academy in an design a nih. A thla (wing) chu 14.5 metre a sei  niin metres 3,000 a insanga vuong thei le thilrik kg. 230 a rik phur thei; full charging in minutes 45 a inthawk darkar khat sung vuong thei ding le darkar khatah km. 160 chena hrata vuong thei niin Xinhua news agency report chun a hril. Hi vuongna hi pilot training na, khaw thlirna le sansuokna thil haia hmang thei ding a ni a, zani hmasa khan Liaoning Ruixiang Genral Aviation Co.Ltd. chun hiengang vuongna 2 a zawr taa, a man chu pakhatah Yuan maktaduoi 1 (US dollar 163,000) a nih. Tuchena hin order 28 an hmu tah.

Tuolsuok silai 56 zet man
HYDERABAD: Zani hmasa khan Andhra Pradesh Special Police han Chittoor district sunga   Tamballapalle an ti hmunah tuolsuok silai 56 zet an man a, a neituhai ruok chu man an ni nawh. Hieng silaihai hi tuolsung mihai ta ni dinga ringhla a nih tiin G. Srinivas, SP, Chittoor chun a hril.
-------------------------------------------------------------------------------------------------------
VAWISUN THUPUI
Chuongchun, an kuomah, “Ei chan a sietzie hi in hmu a, Jerusalem a ram ti dam, a kawtkharhai khawm a kang ti khawm in hriet a; thaw ro, hrilsiet ei ni ta nawna dingin Jerusalem kul hi inngir nawk ei tiu,” ka tih a. ­ Nehemia 2:17

Editorial: Ei lampui hraw sut ngun

Mihriem hai hin ei nitin hringnun lawng khalna kawngah ditthlang ding tam tak ei nei. Mihiem hai hi mi hran, lungril hran le ngaituona dang dang nei ei ni ang bawkin ei dit dan le ditthlangna khawm inangnaw nuol a tih. Mi tam tak chun hun tawite sunga inhawitirna ei thlang hlak. Sienkhawm, chu dit thlangna ngei chun sawtnawte hnunga a mi vuok nawk hlak. Thenkhat ruok chun ditthlangna nghet le hmathlir sei tak neia an hringnun lawng khala dit an thlang leiin rinumna chitinreng an tuor muolsuo hnungah inhawitirna le hadamna tluontling an hmu hlak. Hi lei hin mitinin ei lampui hraw mek le ditthlangna indik lampui ei hraw theina dingin lungril fim tak le ngaituona fel tak neia ditthlangna tha le indik ei thlangfuk theina dinga ei hringnun  hmang dan ei ennawn a, ei insut rawp nuom a um.
    
Tulai khawvel ei hang thlir a, ditthlangna indiknaw leia lampui hraw mumal thei lova petek ei tam hle. Nunghak­tlangval, hmeltha le lekha thiem tak tak, ram le hnam ta dinga ban pawimaw, insung tungding theitu ding tam tak ditthlangna indiklo leia ram le hnam, insung le khawtlang ta dinga phurrik inchang mek ei pung pei a. Hi hi ei ram le hnam, ei insung le khawtlang ta dinga hmasawnna daltu  a ni mek a nih.
    
Thalai hai chau ni lovin, nu le pa hai khawmin fak le dawn le sum le pai ei zawngna kawnga hin lampui indik hraw dinga ditthlangna indik ei thlangfuk theina dinga ei inennawn rawp a tul. Khawvel a danglam ta a, mani hun lai le tulai hun tekhi rawp hin umzie a neinaw a, khawvel thiemna le varna an sang ang peiin suolna khawm nasa takin a pung pei a. Hi lei tak hin nu le pa hai ta dinga tu hma thang hni/thum liemtaa nau le te ei enkawl dan kha tulai huna dingin applicable a ni tanaw ding a nih ti hriein. Kohran hai khawmin ei inenkawl dan le inkeihruoi dan ei ennawn rawp thil tul ning a tih. Insung khawsakna le fakzawngna kawnga sin tul lei chu thu dang nisien. Mani inhawitirna hnawta nau le te hai inthlada nu le pa tam tak ei um. Chu chu khawhnunga a mi vaw taptu an hung ni rawp hlak. Hi lei hin ei nitin nun hmang danah nu le pa hai khawm ei inennawn rawp a tul.
    
Mihriem a tunga lawn taphawt duthusam chu a mi khittu um lova zalen le inhawi taka um a nih. Amiruokchu, chuong inhawitirna lampui ringawt hnawta hun ei hmang a ni chun a tawpa tuortu ding chu mani tho ei nih. Isu Krista khan ama inhawitirna dingin Pa thu selin ditthlangna indiklo lampui lo hraw sien chu ei ni suola thi dinga thiemnaw inchangtir mihriem hai ta dingin sandamna lampui um naw nih. Hi khawvela ei cheng sunga ei hringnun lawng chit ei khalnaa hin tawite inhawitirna ditthlangna am ei thlang ding? ditthlangna indik Isu Krista lampui hraw ang? Hremhmun lampui chu inhawitirna tehlem niin a tluong a, Vanram lampui ruok chu inkhaw le harsa tak a ni a, sienkhawm a tawpna chu chatuon damna a ni thung. Hiengang bawk hin ei Pi le pu Evi le Adam a inthawk suola tlu mihriem hai hi suol le tha kara lengin ditthlangna nei thei dingin Pathienin a mi siem ei ni a. Chu ditthlangna dungzuiin mihriem hai hin hringnun ei hmang a nih.
    
Mimal chau ni lovin a hnam ang zawng khawma ei lampui hraw hai ei inennawn rawp a tul. Mimal ham­thatna dinga thenkhatin ram le hnam an thuoi pha pha ram le hnamin buoina le harsatna a tuok hlak. Hnam thuoitu hai khawmin mani mimal ditthlangna le tha tidan el ni lovin, a lo harsa deu a ni khawmin thuok suk fuol a, lungril lien tak puta mipui ei thuoi a tul chang um a ta, mani mimal ngaidan le ditdan ei fepui chang khawm um a tih. Insung pakhat chau hman enkawl thiem an tak laiin mitin chitang hai chunga hnam anga roreltu le hotu le thuoitu hai ta ding chun rorel an tak dingzie chu hril lova hmang ning a tih. Sienkhawm, sir tina inthawk inkhia ditthlangna indik lungvar hmangtu hotu chun ram le hnam hmasawnna an tlun ngei hlak.
    
Ei ram le hnam, ei khawtlang, insung hmasawnna ding hin lampui indik hrawa, ditthlangna indik ei thlang fuk theina dingin inhawitirna tehlem hnawt lova rinum tuor huom dinga ei lampui hraw ei ennawn hi a tul takzet. Khawvela mi ropui le thilthaw thei tak tak hai khawm hi an hringnun ei sut chun, tuorsel taka rinumna tinreng an tuor muolsuo zo hnunga hung ngirsuok vawng an nih. Mitinin ei nitin nun hmangna kawnga ei ennawn rawp a, an dik nawna lai sukdik dinga ei insiem thar zing hi ei ta dinga malsawmna, hadamna le inhawitirna min tlun tu ding a nih.

Don't Miss
© all rights reserved
made with by Simon L Infimate