Responsive Ad Slot

Hmasawnna Thar | 19 June, 2015

Friday, June 19, 2015

/ Posted by VIRTHLI HMAR
Tuolsung
KWOHR in Nepal thangpuina ding DC kutah an inhlan
CCPUR: Kuki Women Organisation for Human Rights (KWOHR) in Nepal rama simkhawlei hrat tak an hning leia harsatna tuortu hai sawmdawlna dinga thangpuina thawlawm an dawlkhawm Rs.1,60,809/­ chu zani zantieng 2:00PM khan DC CCPur kutah an inhlan.  KWOHR in thawlawm an hmu hai laia Rs. 41,609/­ chu Church level­a inthawka an hmu, Rs. 1,11,750/­ chu School & Office level­a an hmu le Rs. 7,450/­ chu mimal tum tum haia inthawka an hmu niin KWOHR President chun a hril a. Nepal­a simkhawlei inhning leia harsatna tuortu hai sawmdawlna dinga thangpuina thawlawm petu hai popo chunga press/media fethlengin lawmthu a hril. Thangpuina sum DC kuta inhlan hai hi DC Office chun Draft/Cheque in New Delhi­a Nepal Embassy­ah an thawn ding a nih.


ITI, Saikawt­ah trade tum tum inchuk thei
CCPUR: Academic Session 2015­16 a dingin ITI, Saikawt­ah trade tum tum­ Stenography (Eng), Dress Making, Carpentary le Welder hai inchuk thei a nih. Stenography a dingin Class XII passed, Dress making a dingin Class X passed le Carpentary le Welder a dingin Class VIII passed, kum 14­40 inkar ni a tul. Admission Form Rs. 40 pein June 30, 2015 chena lak thei le fill up zo hnungin June 30, 2015 chen maa peklut thei ning a tih. Selection test July 8, 2015 ah nei ning a tih.

CCCD, ICDP­RPC le JC Dental in Free Dental check­up
CCPUR: June 18, 2015, 6AM­8:30AM inkar sung khan CCCD, ICDP­RPC le JC Dental Care hai thangruola an hmalaknain M. Lhahvom Community Hall­ah “Free Dental Check­up” an huoihawt.
    

Hi huna JC Dental Care a inthawka medical team mi paruk hung hai chun Ha nawtfai dan inentirna, Ha tiengpanga harsatna nei hai uluk taka check­up thawin an mamaw dan izirin tooth­brush, tooth­paste, mouth­wash le damdawi chi hran hran an pek. Enkawl sunzawm ngai chi hai chu an hmalak dan ding le enkawl dan ding hrilhrietna an nei nghal bawk. Hi huna hin Child Centered Community Development (CCCD) program sinthawna sunga khuo 8 (Mualkot, Mualpi, Mualsan, Sumtukphai, M.Lhahvom, Vengnomphai, M.Shimuol le Bohlui) haia inthawkin naupang, thalai, nu le pa le upa tieng hai mi 150 chuong darkar hni le a chenve sungin check­up thaw annih. Hmun kilkhawr, sawrkara thangpuina tamtak dawng phaklo, khawsakna harsa tak tak hai lai hieng ang free dental check­up hung thawtu “JC Dental Care” chu an sin thaw that zie le lawm um anti zie inentirna’n CCCD­ICDP RPC hmingin memento inhlan anih.

State Teachers Award hni thei
CCPUR: Kum tina pek hlak State Teachers Award 2015 hmu thei dinga sinthaw tha hai chun hnina peklut thei hun a nih. Inhnikna nei hai chun ZEO/CCPur koma Bio­data, kum 5 sunga ARCs thangin lekhapawimaw tum tum hai July 20, 2015 chenin peklut thei ning a tih. Hnina pekluta um hai chu District Level Selection Committee in thlangsuok an ta, an thlang suoka um hai chu State Level Selection Committee kuoma an thawn nawk ding a nih. Thu chieng lem ZEO Office­ah kanchieng thei ning a tih.

Private School Toppers Award
CCPUR: Vawisun 1:00PM hin Churachandpur District Private Schools Association (CDPSA) chun Salt Brook School Auditorium, CCPur­ah ‘Toppers Award’ semna hun hmang an tih. Hi huna hin Mr C. Arthur, IAS, Chairman, COHSEM khuollienin thang a ta, Mr Ch. Sharat, Secretary, BOSEM Guest of honour in thang a ta, Special Guests in Mr Saranghajit Khundrakpam, Former Secy, COHSEM le Mr T. Goukhomang Simte, ZEO, CCPur hai thang an tih.

Natl. Harmony award
CCPUR: National Foundation for Communal Harmony hnuoia National Harmony Award category pahni – Individual le Organisation kuoma pek a ni ding a ni a, Individual award Rs. 5 lakh le Organisation Rs. 10 lakh ning a tih. Thu chieng ZEO Office­a en thei ning a tih.

Inf. Sample pelut dingin
CCPUR: Director of Health Service, Manipur chun CCPur district sunga Private Health Institution (Hospital/clinic/Diagnostic Centre/Dental Clinic/Nursing Home) hai chu requisite information sample an hmatienga CMO Office­a pelut dingin an hriettir. Sample pekluta um hai CMO/CCPur in Director of Health Services, Manipur kuomah a peklut nawk ding a nih.

BJP Mahila Unit hawng
CCPUR: Zani zingkar 10:30AM khan Ex­Sub K. Pumkhosiam chengnain, Zenhang Lamka, CCPur­ah BJP Mahila Unit hawngna le member hai tawngtaipekna Pastor MT Khanlal, Local Pastor, EBCC Zenhang Lamka in a nei.
    

Hi huna Pu V. Hangkhanlian, Ex­Minister, BJP Exe. Member Manipur State BJP in thu a hrilnaa chun, factor tum tum leiin tuta tum MDC election­ah BJP chun result duthusam an  neinaw a, MDC 1 an nei chu a tawpna ni lovin a bul intanna chau a ni thu a hril. BJP chau ni lovin party tinin India Constitution thangsanin sakhuo zalenna an fepui seng a, tulai mi thenkhatin BJP anti­Christian, Bawng that khaptu tia an dem hi an hrietnaw lei a nih tiin a hril. Manipur­ah BJP chun district level in MLA le MP hai neinaw sienkhawm Central­a sawrkarna siemtu an ni thu a hril.
    
Hi huna hin J. Haokip, President, BJP CCPur District le Tinkhonei Haokip, President, BJP Mahila CCpur District hai khawmin thuhrilna an nei ve.

Jolzam khuoah training
CCPUR: Vawisun 2:30PM hin Food and Nutrition Security (FNS), Devpt. Dept. RPC­NEI huoihawtnain Introduction and Promotion of HYV Seeds, saplings and Animal Husbandary training um a tih. Hi huna hin Rev. Edwin Darsanglur, Director, DD­RPC NEI khuollien in thang a ta, Mr Joseph L. Infimate, Manager, ICDP/CCPur. DD­RPC NEI chu Chief host in thang a tih.

Headline
International Yoga Day hmangna pui tak New York­ah;
Dubai­ah M.C. Mary Kom khuollienin a thang ding
NEW DELHI: International Yoga Day hmangna hmasa tak chu June 21, 2015 khin khawvel pumpuiah nei ning a tih. United Nations (UN) huoihawtnain June 21,2015 khin UN Headquarters New York­ah puithu takin International Yoga Day hmangna pui tak (main event) nei ning a tih. Hi Day hmangna hi Union Minister of State for External Affairs, Sushma Swaraj in inrawi a tih. 1st International Yoga Day hmangnaa hin UN Secretary General le rambung tum tum 192 a thuoituhai thang an ta, rambung hran hrana inthawka fekhawm mi 30,000 velin a ruolin Yoga thaw lai inentir an ta, Live in TV haiah insuo ning a tih. Chun, International Yoga Day hi rambung tum tum khawpui 256 haia khawm puithu takin International Yoga Day hi hmang ni bawk a tih.
            
Dubai khawpuia Indian Consulate khawmin puithi takin June 21, 2015 khin International Yoga Day a vawikhatna huoihawt a ta, hi huna hin Indian Olympic Medallist Boxer le World Boxing (Women) a vawina zet Champion lo ni ta M.C. Mary Kom chu khuollienin thang a tih. Hi huna thang ding hin M.C. Mary Kom chun June 20, 2015 khin New Delhi suoksanin Dubai pan a tih. International Yoga Day hi Al Wasl Football Club, Dubai ah hmang ning a ta, United Arab Emirates (UAE) mi 15,000 vel le India mi 100 chuong thang an tih. Schools 72, Cultural Organisations 88, big Corporate Companies le Embassies/Consulates hran hrana inthawka hung han Yoga inentir an tih.

14th Great June Uprising Unity Day
IMPHAL: Zanikhan AMUCO le UCM hai hmalaknain Kekrupat, Imphal­ah 14th Great June Uprising Unity Day ursun le buoina um lova hmang zo a nih. Hi Day hmangnaa hin Deputy CM Gaikhangam; Commerce & Industries Minister Govindas Konthoujam le Ng. Bijoy, MLA hai khawm an thang. Hi Day hmangnaa thang hai chun Manipur ram humhimna dinga hringna lo inhlan ta mi 18 hai thlanah par an inhlan tawl.

DESAM member­hai Court hmaah
IMPHAL:  Zani hmasaa St. Joseph’s School, Sangaiprou a Zirtirtu pakhat vuokna le inzawma Democratic Students Alliance of Manipur (DESAM) President M. Angamba thangsaa DESAM members 16 mana um hai chu zanikhan Chief Judicial Magistrate (CJM), Imphal West Court hmaah inlangtir anni a, June 23, 2015 chen Police Custody a um phawt dingin Court chun a rel hri.

Online a Army lakna tan ding
IMPHAL: July 1, 2015 a inthawk khin Army Officers, Junior Commission Officers (JCOs) le Other ranks (DR) lakna sin chu online a tan ning a tih tiin Press Information Bureau (PIB), Defence Wing, Imphal thusuok chun a hril. Online­a Army laknaa thang nuom hai chun website thar, www.joinindianarmy.nic.in ah ngaiven el ding a nih. Website thar hi zanikhan Vice Chief of Army Staff Lt. Gen. Philip Campose in South Block, New Delhi hmuna a tlangzar.

Darkar 24 General Strike
IMPHAL: All Manipur Selected Special Employment Generation Programme (SEGP) Beneficiaries Committee a an General Secretary, Zakir Hussain chun, an thil ngen nawrnain June 19, 2015 zanrila inthawk Manipur pumpui huopin darkar 24 sung aw ding General Strike an thaw tum niin Manipur Press Club, Imphal­a Chanchinbumihai an hmupui huna a hril.

Others
Smokeless tobacco fa rawn tak Nagaland
KOHIMA: India rama dumkhu hawp rawn tak le duma siem thil fa le hmuom rawn tak chu Mizoram anni a, a dawttu chu Nagaland anni a, a hawp, a fa le hmuom tlawmna tak chu Goa an nih. Chun, Smokeless tobacco thaw rawn tak chu Nagaland a nih tiin Dr N. Savino, Additional  Director (Dental), Health & Family Welfare, Govt. of Nagaland  in June 17, 2015 nia District Level Coordination Committee on Tobacco Control meeting an nei huna a hril. Nagaland a smokeless tobacco thaw chu pasalhai lai mi 100 ah 53 le nuhmeiah 37% an nih tiin Dr Savino chun a hril.

Smokeless tobacco fa rawn tak Nagaland
KOHIMA: India rama dumkhu hawp rawn tak le duma siem thil fa le hmuom rawn tak chu Mizoram anni a, a dawttu chu Nagaland anni a, a hawp, a fa le hmuom tlawmna tak chu Goa an nih. Chun, Smokeless tobacco thaw rawn tak chu Nagaland a nih tiin Dr N. Savino, Additional  Director (Dental), Health & Family Welfare, Govt. of Nagaland in June 17, 2015 nia District Level Coordination Committee on Tobacco Control meeting an nei huna a hril. Nagaland a smokeless tobacco thaw chu pasalhai lai mi 100 ah 53 le nuhmeiah 37% an nih tiin Dr Savino chun a hril.

Kelkang ramah mithiruong hmu
AIZAWL: Zani hmasa khan Kelkang khuo a inthawka km. 5 vela hla ramhnuoiah mithiruong hmu a nih. Mithiruong hi a lo se ta hle a, a hmela inthawk chun t um a na ti hriet thei a ni ta nawh. Amiruokchu, Kelkang harna va siem ve, April 24, 2015 nia a tlungna in a inthawka suokdawka inlawi ta lo, Zuangtui Veng mi Hrangliantawna (55) ni ngeiin a thuomhnaw inbela intahwk hriet theiin a u m. Khawtlangin ni 7 zet an zawng a, an hmu zonaw hnungin an tawpsan a, a hnungah Kelkang khaw mi, ramsuoka fe in a hmu a nih.

Intl. Day of Yoga hmang lo dingin
AIZAWL: Mizoram Kohran Hruaitu Committee (Mizoram Church Leaders Committee) or MKHC chun Mizoram state sunga Kristienhai chu International Day of Yoga chu hmang lo dingin ngenna an siem. International Day of Yoga hi June 21, 2015 (Pathienni) taka hmang dingin India sawrkar chun a puong a nih. Hi Day dodalna a ninaw a, Kristienhai ni pawimaw le ni thienghlim a hmang hlak Pathienni kher khera hmang dinga rawtna um hi an dodal leia hi ngenna hi an siem a nih. April, 2015 a BJP National President Amit Shah Aizawlah a hung inzin tum khan MKHC chun Memorandum an lo pek a, December 25 (Christmas) ni tak “Good  Governance Day” a hmang le puong bakah Good Friday ni tak, April 4, 2015 a  Supreme Court le High Court a Judge­hai ta dinga meeting kova um an dodal le dit nawzie an Memorandum­ah an zieklang.

Loneitu inthat sunghai an hmupui
FATEHGARH SAHIB: AICC President Rahul Gandhi chu zanikhan Punjab a Daduwal village ah a van zin a, haptakar liemtaa beidawng leia loneitu mani le mani inthat sunghai an hmupui tawl. Rahul Gandhi chun loneitu, mani le mani inthat sunghai lusunna a tuorpui thu le an party in a thei ang anga thangpuina an pek ding thu a hril tawl. Daduwal village a hin June 10, 2015 khan Surjit Singh (60) chu a loneinaah a hlawsam letder leia beidawngin tur tawnin ama le ama an that a nih.

Khuo inthalna state a chenghai ta dingin
NEW DELHI: MGNREGA hnuoia kum khata ni 100 inhlawna pek hlak chu khuo inthalna state a chenghai ta dingin ni 150 a siem pek ning a ta, hi thila sum seng chu sawrkar thlungpuiin tum a tih. Hi thil hi MGNREGA hnuoia ni 100 inhlawna neizo tahai chauin dawng thei an tih tiin NDA sawrkar thusuok chun a hril. Hi thil hin loneituhai harsatna nasa takin a phuruk beisei a nih.

Pawisa note tehlem leh pasal 1 man
SILCHAR: June 15, 2015 zan dar 10:30 vel khan CRPF han Nurul Huda Mazumdar (40), s/o Fazal Huda Mazumder of Chechri village, Cachar district, Assam chu pawisa note lem 5, dollars maktaduoi khat hu vel le pawisa notes lem 4, dollars 100 hu vel leh an man a, Borkhola Police station­ah an peklut niin J.K. Verma, Assistant Commandant, CRPF E147 Bn. chun a hril.

BPL student­hai admission fee
GUWAHATI: Government Colleges le Goverment Aided Colleges haia HSLC passed BPL student­hai admission fee chu state sawrkarin pekkir (reimburse) a ta, State sawrkar chun sin ruok a tharin siem thei ta naw ni a, nisienlakhawm sin ruok um tasahai ruok chu a hluotu ding lak ning an tih tiin zani hmasaa Guwahati hmuna Press conference huna Assam CM Tarun Goboi chun a hril.

Pawisa note tehlem leh pasal 1 man
SILCHAR:  June 15, 2015 zan dar 10:30 vel khan CRPF han Nurul Huda Mazumdar (40), s/o Fazal Huda Mazumder of Chechri village, Cachar district, Assam chu pawisa note lem 5, dollars maktaduoi khat hu vel le  pawisa notes lem 4, dollars 100 hu vel leh an man a, Borkhola Police station­ah an peklut niin J.K. Verma, Assistant Commandant, CRPF E147 Bn. chun a hril.

Thil inbawk kg. 8 zet a rik at thlak
KOLKATA: June 1, 2015 khan SSKM Hospital a Doctors han Rahul Mallick (18) of Amta, Howra ring le a phing inkara thil inbawk operation an thaw a, kg. 8 zeta rik an at thlak pek. Rahul hi dam tieng a pan pei leiin June 13, 2015 khan Hospital­a inthawk insuoktir le a inah an enkawl ta niin a at tu Doctors han an hril. Kum 3 zet el a taksaa thil inbawk hi at thlak lovin a um a, inthuok harsa a hung ti leia Operation hi thaw a hung tul ta a nih.

Ruotui 3718.6mm a tlaa record
SOHRA: Khawvela hmun hnawngna tak Sohra or Cherrapunjee, Meghalaya hmuna June, 2015 thla sunga ruotui tla zata record chu 3718.6mm a tling phak a, kum 13 liemta hnunga hi lai hmuna ruotui tlak tam nawkna hmasa tak a nih tiin V. Kumar Singh, Head of Meteorological  Office, Sohra, Meghalaya chun a hril. June 1, 2015 a inthawk khan nitinin hi lai hmuna hin ruo a la sur zing niin Sohra hmuna cheng hai chun an hril.

Saipui le a te Court hmaa inlangtir
HAILAKANDI: June 17, 2015 khan Hailakandi Court, Assam hmaah thil um zen zen lo le thil danglam takel Saipui le a te hai chu inlangtir an nih. Saipui le a te hi a neitu tak chu Bangladesh mi a ni a, sienkhawm hi lai biela cheng han a neitu an inchu a, hi leia Court hmaa inlangtir an nih. Chief Judicial Magistrate (CJM), Hailakandi chun hi thua hearing nawk chu June 23, 2015 ah nei nawk dingin an rel.

Narendra Modi Mobile App hawng
NEW DELHI: June 17, 2015 khan Prime Minister Narendra Modi chun “Narendra Modi Mobile App” a hawng tan. Narendra Modi Mobile App hi Play store a inthawka download thei a nih. PM le mani ngaidan inhriltuo nuom hai le rawtna chi tum tum pe nuomhai chun hi taka inthawk hin peklut thei a ni ding a nih.

US a Biekin sungah mi 9 kap hlum
WASHINGTON: June 18, 2015 zan dar 9 vel khan Emanuel Methodist Episcopel Church, Charleston, South Carolina, US sungah pasal kum 20 mi bawr vel, mingo a va lut a, silai a va kap hrut a, Biekin a inkhawm mi 9 a kap hlum. Kap hluma um hai lai hin hi Biekin Pastor, State Senator Clementa Pinckney (41) khawm a thangsa. Hi Biekin hi midum (black) hai biekin a ni a, mithihai hi mihang vawng an nih. Charleston Police Chief, Greg Mullen chun, hi thil tlung hi “hate Crime” a nih tiin a hril.
BEL CHIENG DAWLLO THU INSUO DAWNLETNA
Date 18. 2015 (Ningani) a Rev. (Dr) Nicky Thang’an, kei Timothy L. Changsan, North Eastern Children’s Home Administrator, Judicial Custody (Jail) a inthawka bail­a ka suok le inzawma local news, Hmasawnna Thar, Manipur Express, Lamka Post le a dang dang a belchieng dawllo le intum lo ding intum khawma indiklo taka baila suok nia a hril le, ka naupanghai 7 (pasari) chuong suksiet (rape) a a hril hi thu indiklo a nih ti ka puonga. An mi hekna hi thu khel a nih ti le dan indik taka insuo ka nih ti hi mipui mi hrietpui ka nuoma. Hi thu hi IN THE COURT OF SPECIAL JUDGE (POCSO) Churachandpur a inthawka thu fel taka hrechienga a thu hung insuo hai hi, ama Rev. (Dr) NIcky Thang’an a hung sukdik nawk naw a ni chun, IPC Section 500/501 le 502 hai hmanga Court­ah ama an hril fel tul a tih.

MIPUI HAI LO HRIET DINGA THU DIK CHU HI HI A NIH
Date 25 Feb., 2015 (5:30PM) in ka naupang hai 2 (pahni) in ka chunga complaint an siem leiin Police hai manin ka uma. Complaint thawtu naupang hai le inruolin ka naupang hai 5 (five) witness ding tiin Police han an thuoi sa ve a. IPC Section 354, 376 (C) 506, IPC & 6,8,10  POCSO Act date 25/2/2015 Case a man ka ni a. Medical check (forensic) hai thawa nasa taka dawp ka ni hnungin Judicial Custody­ah ni 92 (days) ka um a. Chu hnung chun Special Judge (POCSO) Churachandpur kuoma bail ka ngenna angin bail a insuo ka nih a. Hi thu le inzawma  Rev.(Dr) Nicky Thanga’n thu belchiengna nei loa Doctor hai le Special Judge (POCSO)  Churachandpur hai thiemnaw an hang inchangtir el hi thil indiklo tak a ni a. Hieng ang cho Hotu ei nei hi hnama ei vangduoina pakhat nia ka hriet leiin pawi ka ti hle a nih.
    
Hi thu le inzawma thil chieng lem hre nuomtu hai po po chun a khing tieng tienga thu la khawmin, thil hrilin thu thedar chau hlak ni ta sien ka nuom hle a. Thu chieng hre nuomtuhai ta dingin iengtik lai khawm indawn thei zing ka nih.

Sd/­ Timothy L. Changsan.
---------------------------------------------------------------------------------------------------------------------
VAWISUN THUPUI
Hrattak le huoitakin um rawh; ti naw la, zam bawk naw rawh, Lalpa i Pathien chu i fena taphawtah i kuomah a um pei ding annawm,” tiin, a hril a. ­ Josua 1:9

Editorial: Inlaichinna tha

Pathien thil siem hai po po hin inlaichinna tha ei nei a tul a. A bik takin mihriemhai hin inlaichinna tha ei mamaw zuol. Sungkuoah khawm inlaichinna tha a umnaw pha pha sungkuo kawidar a hung ni hlak. Sungkuoa inlaichinna a hung tha tanaw chun inbiektuo, inrawntuona le insirpawna hai a hung um thei ta naw a, inhrie ngailo ang elin unau le unau kar khawm a hung inhlat hlak. Chuongang sungkuo hai chu tu inhnar khawm anni ngai naw a, mihai nuisaw le hmusit an hung ni hlak. Sungkuo inlaichinna nei tha hai ruok chu mihai inhnar, entawn le inza an hung ni hlak. Inlaichinna tha ei nei theina dinga hma ei lak sup sup nuom a um.
    
Inlaichinna tha a um naw pha chun hnam le hnam, ram le ram khawm an indo hlak. Indo hlak hai hrim hrim hnam le ram hmasawn an um ngai nawh. Ram hmasawn le hnam hmasawn ei tihai khawm hi an chanchin ei hang sui chieng zet chun inlaichinna tha tak nei an lo nih. Ram hmasawn le hnam hmasawn ni ei nuom chun a sunga cheng hai ei inrem a, inlaichinna tha ei nei ngei ngei ding a ni tawp el a nih. Muslim rambung tum tum le Africa khawmuolpui sunga chenghai chanchin hi ei hriet seng a, anni le anni an indotuo leiin an changkang ding le  hma an sawn ding anga hmasawn thei lova umin, ram nelumlo an nih.
    
Kohran le khawtlanga khawm inlaichinna tha a um naw pha pha chun indemna le insawiseltuona a hung suok a, Kohran le khawtlang tha, hlim le hrat nekin khawtlang inhawilo, kohran inrem lo a hung rasuok hlak. Kohran hlim le Kohran hring ni ei nuom a ni chun inlaichinna tha ei siem a tul. Inlaichinna tha a um naw pha pha Kohran khawm a tawlin a hung tawl ngawi ngawi a, khawtlang khawm mihai ral en le hmusitin a hung um hlak.
    
Ram pakhat le hnam pakhat sunga khawm inlaichinna tha a hung um theinaw pha pha chun inngaidamtuo, inhrietthiem le inrem diel diela khawsa tlang chu a thei naw a, Court chen tlunga, inhek hiel khawm ei ngam hlak. Mihriem inlaichinna a hung se pha Court a inkhing ei tum el hlak hi chu a tha pa tak a ni ring a um nawh. A thei hram chun inrem dan ngaituo lem inla nuom a um. A muolpho le a hmingse ding chu midang an ninaw a, ei ni tho ei hung ni ding a nih.
    
Khawvela rambung tum tuma sawrkar hran hran hai khawma inlaichinna tha nei hi an ngaipawimaw hle. Ram hausa le hmasawn tahai chun an ram chau ngaituo lova rambung dang dang hai thangpuina an pekna san khawm inlaichinna tha neipui an nuom lei a nih. Hi lei hin ram changkang le var hai chun foreign policy an ngaipawimaw hle hlak. India sawrkar khawmin a ngaipawimaw a, a bul hnaia um rambunghai chau ni lovin khawvela ram ropui le thil thaw thei hai leh inlaichinna tha siem tumin ei President, ei PM le Union Ministers hai rambung tum tumah inzing utin an inzin pha hlak a nih.
            
Hnam le ram khawm ni lo, laibung le unau kara intheidana le hmelma ena inen nuomna lungril ei la put sung hin chu hmasawnna le changkangna thil hai chu ei ta dinga thil harsa takel, thil thei lo, vana ra an ti ang hi hung ning a tih. Hi lei hin mitinin inlaichinna tha hi ngaipawimaw a, inlaichinna tha nei dinga lungril tha le thienghlim ei put nuom a um. Insekhek le inhektuona hai hin thiltha min tlun ngai bawk naw nih.
Don't Miss
© all rights reserved
made with by Simon L Infimate