Responsive Ad Slot

Hmasawnna Thar | 18 June, 2015

Thursday, June 18, 2015

/ by VIRTHLI HMAR
Tuolsung
HPA in sawrkar siem dinga inzosa an ni thu DC kuomah an intlun
HPA in Asst. Leader dingin Pu Lal Hossan an thlangtling
CCPUR:  Churachandpur district ADC-a Independent-a MDC dinga thlangtling thar han an indin Hill Peoples’ Alliance (HPA) thuoitu pahni Langkhanpau Guite (HPA leader) le Genneikhup han zani zantieng 2:00PM khan DC/CCPur Pu Lunminthang Haokip, IAS an inhmupui a, Manipur sawrkarin Gazetted Order an suo hun huna District Council/CCPur a sawrkar siem thei dinga inzo saa um an ni thu le HPA-a MDC mi 17 hai hming an peklut.
            


DC/CCPur chun a Office-ah CEO/ADC CCPur a ko a, CEO thangin Manipur (Hill Areas) District Council Rules, 1972, Part II a Sl. No. 3 dungzuiin Governor in MDC thlangtling thar han formation of Dist. Council & oath taking ding thuah guidelines thangsanin Govt. a inthawk Gazetted order an suo hun huna oath taking nei dinga inzosaa um dingin an hriettir.
            
Hieng laizing hin zani zingkar khan HPA member han secret ballot hmangin HPA-a Assistant leader ding thlangna an nei a, Vangai MDC Pu Lal Hossan chu HPA Asst. Leader dingin an thlangtling.
            
HPA leader Langkhanpau Guite chun, HPA hi political party a ninaw a, grassroot level tribal issue hril theina ding platform pakhat a ni thu hrilin member dang HPA zawm nuom hai ta ding khawma kawt hawng zing a ni thu tuolsung chanchinbu reporter hai kuoma a hril.
            
HPA chun Acting Secretary in Genneikhup an hmang.

A umna hriet lovin an hmang
TUOLBUNG: Mr Vanlaltlang (45) s/o Upa HK Thuoma of Tuolbung village, Manipur chu June 8, 2015 a inthawk khan a umna chin hriet lovin an hmang a, a lo hmu hai chun Lalnunthang Songate, Mb. No. No.7308510533 annawleh rpc.parb@gmail.com a inhriettir dingin ngenna an siem. Mr Vanlaltlang hi buoina a nei leia kum 2014¬a kha Lunglei, Mizoram TNT hmuna va sie a ni a, hi hmuna inthawka inhmang a nih. A mal lai panser kutchal chen vel ding a um a, feet 5 le inches 4 a insang niin Ha hmai pahni um lo a nih.

SMDC list pelut dingin an hriettir
CCPUR: ADC/CCPUr hnuoia le Govt. Aided School haia Headmaster/Headmistress hai chu Academic Session 2015-16 a School Development and Management Committee (SMDC) list June 30, 2015 chena mani DI of School hai kuoma pelut seng dingin ZEO, Churachandpur chun an hriettir.

PTC in CWC meeting le member laklutna
CCPUR: PTC Central Working Committee chun zani 11AM khan PTC Office Conference Hall, Hiangtam Lamka-ah CWC meeting an nei a, CWC member thar hai laklutna le intiemkamna hun an hmang.

Bail-a insuo a ni lungawinaw thu a hril
CCPUR: MACR-CC Convenor Dr Nicky Thanga chun zanikhan tuolsung chanchinbumihai an pawlpui a, North Eastern Children Home, Rengkai Bethlehem Veng-a naupang 7 sawisak le suolluitu (molest & rape) a intum Timothy Changsan Judicial Custody-a inthawk bail-a insuo a nina thuah a lungawinaw thu a hril. Dr Nicky Thanga chun, Timothy hi nuhmei naupang 7 suolluitu, POSCO Act hnuoia man a ni a, sienkhawm District Session Court Judges le Doctor han iengti leia bail-a a suok an remti pek am a nia? Tiin indawnna a siem.
            


POSCO Act hnuoia man (arrested person) hai chu a tlawm takah kum 3 sung intang thei, thla 6 sung chargesheet file a ninaw chun bail-a insuo thei a ni thu a hril. Bail na dinga inrawl Judges le Doctor hai khawm MACR-CC chun nasa taka thiemnaw an chang thu a hril bawk. Timothy Changsan hi Feb. 25, 2015 a man, March 11, 2015 a Judicial Custody (Jail) a thun a nih.

Second Ignite Prayer programme
CCPUR: Women Prayer Fellowship, Churachandpur huoihawtnain June 20, 2015, 10AM-1:30PM inkar sung khin Salvation Army, Lamka Corps Hall, S.A. Road, CCPur-ah  “Second Ignite Prayer programme’ nei ning a tih. Inhnikna nei taphawt hi huna thang dinga fiel an nih.

Headline
NSA Advisor Myanmar-ah an zin:
Myanmar President le security tienga hotuhai an hmupui
NEW DELHI: National Security Advisor (NSA) Ajit Doval chu nikhat sung cham dingin zanikhan Myanmar ramah an zin. Mr Ajit Doval hin zanikhan Myanmar President U Thein Sein le sipai hotulien hai an hmupui a, hi huna hin Mr Doval hi Foreign Secretary S. Jaishankar in a tawiawm. Mr Doval hin President Sein, Commander-in-chief le Foreign minister hai an biekpui huna ram pahni hai security tiengpanga thawtlangna fepui pei le sukhrat zuol dan ding,  India-Myanmar border a sinthawtlangna le an ram pahni hai kara inlaichinna chungthu hai a hrilpui niin ei thu dawngna chun a hril.
            
June 4, 2015 nia Manipur-a Chandel district sunga Paraolin hmuna NSCN (K) helpawl han 6-Dogra Regiment hai lambuna sipai 18 zet an kap hlumna le inzawma Army han India le Myanmar ramri le Myanmar ram sunga operation an thaw hnungah Myanmar rama NE helpawl um hai hnawtdar le tukdawlna dinga hiengang operation thaw pei na dinga chungthu a Mr Doval hi Myanmar thangpui le thlawp ngen dinga Myanmar ram inzin niin ei thu dawngna chun a hril.
            
Hieng laizing hin Naga peace talks-a Interlocutor R.N. Ravi chuh NSCN (K) ceasefire a inthawk inhnukdawka peace talks neia um sukchawla a umna thuah Home ministry thaw suol a nih tia intumin Prime Minister’s Office (PMO) an tlun a, chu laizing chun Home Ministry chun, intelligence agencies a inthawk report a hmu danin NSCN¬K hai hin ceasefire agreement nei zawm pei an nuom tanaw niin a hril.
            
Tulai hnaia Minister of state for PMO le DoNER Jitendra Singh leh Nagaland le Manipur an inzin huna civil societies tum tum hai inhmupuia Nagaland le Manipur mipui hai ngaidan an lakkhawmnaa chun Naga peace talks neia um mek hi sunzawm pei tha an ti niin Ravi chun a hril a, minister hin a thil hmu dan PM Narendra Modi kuoma khawm a peklut ding niin ei thu dawngna chun a hril bawk.
            
India le Myanmar hai chun May 10, 2014 a kha security tienga thawtlang le an ram pahni haia security agencies hai chu thu inpektawn ding tia MoU an lo ziek tah, helna dotlang ding, ralthuom le drugs-a sumdawngna do tlang din bakah mihriem le ramsa thil haia sumdawngna hai dotlang ding ti hai MoU a hin a thang a nih.
            
NSCN (K) hin ceasefire agreement March 27, 2015-a kha an lo suktawp ta a nih.

Great June Uprising le Unity Day
IMPHAL: United Committee, Manipur (UCM) le All Manipur United Clubs Organisation (AMUCO) hai huoihawtnain vawisun hin Manipur-ah 14th Great June Uprising and Unity Day, 2015 hmang ning a tih. Hi Day hmangna ding lei hin vawisun hin Imphal khawpui sunga motor inlawnvel dan sukdanglam ning a tih tiin Police thusuok chun a hril.

Vadilal Ice Cream’s bomber items man
IMPHAL: Food Safety Officer chun Vadilal Industries Limited, Gujarat in an siem Vadilal Ice Cream’s bomber items an man a, enfel (test) dingin Laboratory-ah an thawn. Zani hmasa khan Thangmeiband Lourul Purel Leikai a um naupang pahniin hi Ice Cream hi an fak leiin an damnaw pha a, Hospital panpi anni leia hi items hai hi man an nih.

Chandel DC kuoma Security Outpost an ngen
Imphal: Chandel District-a Paraolon, Challong, Kotal Khunthak le Thumtham khuo lal hai chun Chandel District Deputy Commissioner (DC) an inhmipui a, an khuo haiah security out-post pe dingin an ngen.

Ukhrul-ah NPF in sawrkar siem an tum
IMPHAL:  ADC, Ukhrul a chun NPF in sawrkarna siem tumin hma an lak. Ukhrul District sunga NPF ticket a thlangtling MDCs han zanikhan meeting an nei a, ADC Ukhrul a Chairman le Deputy Chairman ding thlangna an nei.

Governor le CM hai New Delhi-ah
IMPHAL:  Thaw ding tul an nei leiin Manipur Governor Dr Syed Ahmed le CM, O.Ibobi Singh hai chu New Delhi-ah an inzin a, tu hin New Delhi¬ah an cham mek. Sawrkar thlungpuiin inbiekpui a nuom leiin a hung ko leia New Delhi inzin an nih tiin ei thu dawngna chun a hril.

Disqualification case hearing July 20-ah
IMPHAL: MSCP ticket a thlangtling MLAs 5, a hnunga Congress party zawm hai case (disqualification case No. 1 of 2014) hearing chu July 20, 2015 a nei dingin June 16, 2015 khan Manipur Legislative Assembly Speaker’s Tribunal chun a rel. Hi le inzawma case nei hai chu, Nemcha Kipgen (Kangpokpi A/C), R.K. Imo (Sagolband A/C), K. Thamarjit (Keirao A/C); P. Brojen (Wangjing Tentha A/C) le Janghemlung Panmei (Tamenglong A/C) hai an nih.

Others
Ganja kak 3,00,000 vel suksiet
AGARTALA: June 16, 2015 khan Security Forces han Sepahijala district, Tripura hmuna Ganja kak 3,00,000 vel an suksiet bakah Ganja kg. 50 an man. Ganja kak mana um hi Bangladesh ram le inrina zula um a nih. Intelligence report an hmu dungzuia BSF le State Police han joint operation an thawnaa Ganja kak hai hi suksiet theia hung um a nih tiin Agency thusuok chun a hril.

AAP MLAs 21 han Criminal case
NEW DELHI: Delhi Police han thil um dan le fe dan an suizuinaa chun, Delhi Assembly a AAP MLAs 21 han Criminal case an nei ti an hmusuok. Delhi CM ni laizing le AAP lukhaitu tak Arvind Kejriwal chu Delhi Police han vawiruk zet Chargesheet an siem khum ta a, cases dang 2 chu an suizui mek niin Delhi Police chun an hril. AAP MLAs Criminal case neihai lai hin Delhi Dy. CM Manish Sisodia khawm a thangsa niin an hril.

Mumbai airport-ah drugs kg. 74 man
MUMBAI: Customs a Air Intelligence Unit (AIU) han zanikhan Mumbai International Airport-ah Tanzania nupui Chambo Fatma Basil chu drugs Methaqualone Kg. 74, Rs. 7.5 crore manhu leh an man. Chambo Fatma Basil hi Qatar Airways Flight a Dar Es Salaam, Tanzania via Doha pan tum a nih tiin AIU pawl chun an hril.

Bank-a pawisa sielut rawn khuo 3
AHMEDABAD: Gujarat state a khuo 3, Baladia, Madhapar le Kera hai chu India ram sunga Nationalized Banks haia pawisa sielut rawn tak an nia hril a nih. In 1,292 umna Baladia khaw mipuiin bank-a pawisa an sielut chu Rs. 2,000 crore, In 7,630 u mna Madhapar khaw mi han bank-a pawisa an sie chu Rs. 5,000 crore le In 1,863 umna khuo Kera chun bank-ah Rs. 2,000 crore an sielut phaka hril a nih. Hieng khuo 3 a chenghai laia a zatve chu non-resident Indian (NRI) an nih.

Khawlaidunga chilsakhai inchawitir dingin
MUMBAI: June 16, 2015 a Maharashtra state cabinet meeting chun Mumbai khawpui sunga khawlaidung annawleh kawtthlera chilsakhai man anni chun Rs. 1000 pei a vawikhatnaah inchawitir ding le ni khat sung public hospital or Govt. office insukfaitir (community service) ding, a vawihnina a manhai chu Rs. 3,000 inchawitir ding le ni 3 sung community service inthawtir ding; a zawna hi khapna bawsehai chu Rs. 5,000 inchawitir le ni 5 sung Community Service sin inthawtir ding tiin an rel.

Customs han rangkachak 9.5kg leh mi 1 an man
PANAJI: Zani zingkar dar 4:30 vel khan Goa International Airport, Dabolim ah Commissionerate of Customs hnuoia Air Intelligence Wing (AIW) han Shaheen Hussain Gadkar of Bhatkal, Karnataka chu rangkachak 9.5 kg leh an man. Rangkachak mana um hi Rs. 2.65 crore manhu vel nia hril a nih. June 11, 2015 khawm khan Bhatkal mi tho, Sajeed Ahmed Ekkier (44) chu hi Airport maa hin rangkachak 7.707 kg, Rs. 2.15 crore manhu leh man a lo ni ta bawk tiin Commissionarate of Customs thusuok chun a hril.

Meghalaya ah mi 12 in thina an tuok tah
SHILLONG: Tulaia ruo inzawmzata a sur leia tuilien, mimkei le Tek tla leia Meghalaya state a mihriem thina tuok chu 12 an tling tah. Meghalaya CM Mukul Sangma chun tuilien leia harsatna tuortuhai chu sawmdawlna an thei ang anga pe seng dingin Department tum tum hai an hriettir. Tuilien, mimkei le Tek leia thina tuok sunghai chu zangnadawmna Rs. 2,50,000 pek anni ding thu Meghalaya sawrkar chun a puonglang.

Detonators saiip 7 leh driver man
DUMKA: June 16, 2015 khan Dumka district a Jermuneli Police station bulah SUV Car Police  han sukchawla an dapnaah, Car sungah Detonators saiip 7 dapdawkin Car driver leh an man niin Ashok Kumar Singh, Deputy Superintendent of Police, Dumka district chun a hril Detonator hi Naxalites pawl hratna Koderma district-a phurlut tum niin DSP chun a hril.

HDFC Bank-ah pawisa lem Rs. 1 crore chuong
GURGAON: Haryana-a Golf Course Road, Gurgaon-a HDFC Bank chest a chun India pawisa lem Rs. 1,04,76,000 zet hmudawk a nih. Hi le inzawm hin Chest manager Umesh Sharma chun Sushant Lok Police station-ah FIR a thelut bakah pawisa note lem hai hi a peklut sa nghal. Hieng pawisa lem hai hi kum 1 vel liemtaa inthawka kha HDFC bank tum tum 100 vel haia inthawka lakkhawm an ni a, Chest hawnga enfel le tiem a ni huna pawisa lem an nih ti hi hmusuoka hung um a nih.

Mithun in Rs. 1.2 crore a pekkir
KOLKATA: Saradha Group of Companies-a brand ambassador a ni leia Rs. 1.2 crore company in an pek chu Trinamool Congress MP le Actor Mithun Chakraborty chun Enforcement Directorate (ED), Kolkata kutah a pekkir. Saradha companies hi sin thaw thei ta lova case nei lai mek a nih.

Egypt Prez. hlui damsung lungin intang dingin
CAIRO: Egypt President hlui Mohammed Morsi chu Palestinian Islamist Group Hamas, Labanese Hezbollah le Iran ramhai ta dinga enthlatu sinthawa intumin June 16, 2015 khan Egypt Court chun damsung lungin intang dingin thiemnaw an changtir. Chun, cases chi hran hran 16 haiah Morsi hi thi dinga thiemnaw inchangtir a nih.

China ramah millionaire sungkuo makteduoi 4
BEIJING: Kum 2014 chen khan China ramah millionaires sungkuo maktaduoi 4 an um a, khawvel pumpuia millionaire sungkuo tamna tak dawttu (a pahnina a ni a), a pakhatna chu US a nih tiin US a innghat Research Firm Boston Consulting Group (GCG) report chun a tarlang. US-a chun millionaires sungkuo maktaduoi 7 an um. Japan chu a pathumna niin millionaires sungkuo maktaduoi 1 an um niin BCG chun a hril.

Japan in vote thlak thei kum a sukhnuoi
TOKYO: Japan sawrkar chun zanikhan an rama vote thlak thei kum zat chu kum 2 in a sukhnuoi. Hi dungzui hin a hmaa kum 20 le a chungtieng han vote nei thei hlak chu tuta inthawk chun kum 18 le a chungtieng han vote an thlak thei ta ding a nih. Hi dan thar dungzui hin thalai vote nei thei 2.4 million velin pung an ta, kum 2016 a Upper House election hung um dinga hin hieng vote nei thar hai hin a vawikhatna dingin vote an thlak ve thei ta ding a nih.
------------------------------------------------------------------------------------------------------
VAWISUN THUPUI
Thil inthuphai chu Lalpa ei Pathien ta a na, thil suklanghai ruok chu hi dan thu po po hi ei zawm theina dingin eini le ei thlahai ta kumkhuo ding a nih. - Deuteronomy 29:29

Editorial: Suspended animation a um inlau a um

Manipur ADC election 2015 result dungzui chun buoina le harsatna um der lovin Ukhrul district a chun NPF in sawrkarna an siem thei a, hiengang bawk hin Sadar Hills a khawm Congress in sawrkarna an siem thei a. District dang hieng Tamenglong, Chandel, Senapati le Churachandpur  haia chun party mala sawrkar siem thei ding ngirhmuna um an um der naw leiin thangruol  sawrkar a hung um a tul niin an lang. ADC election result dungzui chun ADC tam lema sawrkarna siem thei ding chu Manipur a sawrkar chel lai mek Congres party niin an lang. BJP in ADC 6 haiah selkaltu pawla an um ding thu an puonglang hi indik taka an fepui tak tak chun Ukhrul district ti lo, District dang haia chun Congres party bawkin sawrkar an hung siem ring le beisei a um.
            
Ei hriet ta angin Sadar Hills a chun Congress party bawkin sawrkar an hung siem ding a nih ti chu a chieng sa a nih. Hi baka hin Tamenglong, Chandel le Churachandpur District haia khawm Congress party inrawi le thuoina hnuoiah sawrkar siem a hung ni ring a um. Tamenglong a chun Congress in MDCs 10, NPF in MDCs 8, BJP in MDC 5 le Independent 1 an um a. BJP sawrkar siemnaah thang an tum sinaw leiin sawrkarna siem thei dinghai chu Congress, Independent le nominated MDC hai an hung ni ding a nih. Congress in MDC 10 an nei sa a um a, nominted MDC 2 hai khawm Congress mi le sa an hung ni ding leiin Independent MDC pakhat thangsain MDCs 13 an hung tling ta ding a ni leiin sawrkar siem theina chance an hung nei ding a nih.
            
Senapati a chun NPF in MDC 11, BJP in MDC 8, INC in MDC 1 le Independent in MDC 4 an nei a, BJP sawrkar siemnaah thang an tum naw leiin sawrkar siem theitu ding um sun chu NPF le Independent an nih. Congress chun MDC 1 chau an nei a, nominated MDC 2 hung neihai sienkhawm Congress chun sawrkar siem theina chance an nei nawh. Hieng a ni lei hin ADCs 6 umah NPF chun ADCs pahniah sawrkar an siem thei ding a nih ti chu a hung chieng ta a nih. Chandel a khawm sawrkar siem thei umsun chu INC le Independent hai an nih. Hieng a ni lei hin iengang khawma thil hung invirkuol sienkhawm ADC 6 um hai laia ADC 3, Tamenglong, Chandel le Sadar Hill haia chun Congress inrawina le thuoina hnuoiah sawrkarna a hung um ding a nih ti chu a hlimthla an lang chieng hle.
            
Churachandpur District a chun sawrkar siemtu ding hi ieng Party am hung ning an ta ti hi hril harsa takel a nih. ADC, CCPur hnuoia MDC seats 24 uma chun INC 5, BJP 1 le Independent 18 an tling a, Independent a tling MDC pakhatin Congress a zawm nia hril a ni a, chuong a hung ni chun tu hin Congress chun MDCs 6 an nei mek a, nominate a hung um ding MDC 2 hai khawm Congress mi le sa bawk an hung ni ding leiin Congress party in MDC an neizat chu 8 an hung tling ta ding a nih. Amiruokchu, hieng khawm hin Congress party chun sawrkarna a la siem thei chuong naw a, sawrkar a hung siem theina ding chun Independent MDCs 17 han a chabi an kawl ve tlat a nih.
           
Churachandpur District a chun Congress party le Independent MDC-hai an inbiekrem thei naw chun sawrkar siem thei lova a hung um chun ADC, CCPur chu Suspended Animation in a hung um el dim maw? ADC, CCPur hmakhuo ding hi hrietthiem le hril thiem an tak hri a nih. Sawrkar siem theitu an um naw tlat chun Suspended Animation chu a hung ni el dim a nih! Kum 2013 a Delhi Assembly Election a khawm khan sawrkar siem thei khawpa party mala hrat filawr an um naw a. Amiruokchu, Congress in puotienga inthawka an thlawpnain AAP in sawrkarna an siem a, sienkhawm Congress party leh inhrietthiemnawna an hung nei a, Congress party in AAP sawrkar an thlawpna an hnukkir leiin ni 47 sawrkarna an chel hman tawng a, chu zova Delhi AAP sawrkar a hung tluse ta a nih. Hi hnung hin Lt. Governor, Delhi in sawrkar siem thei ding a zawng a, a siem thei an um naw leiin Delhi Assembly chu Suspended Animation¬a hung umin, Delhi  chu President Rule a sie le thla 6 liem hma deuin a tharin Assembly election an hung nei ta a ni kha!
            
ADC, CCPur hin Delhi Assembly thil tuok ang kha tuok ve naw nih ti thei a ni nawh. Hieng a ni lei hin ADC/CCPur hnuoia MDC-hai chun fimkhur le uluk taka Consitutional expert le legal expert hai an inrawnpui chu thil tul makmaw a nih. Election a sum seng tamzie le a hau intakzie kha hriezinga kalpen a tul a nih. Suspended animation a um hi inlau um takel a nih.
Don't Miss
© all rights reserved
made with by Simon L Infimate