Hmasawnna Thar | 16 June, 2015

Tuolsung

ATSUM in Hr. Sec. School hai an khar: HSA/TKSU/KSO in an hrietpuinaw thu

CCPUR: Tombing inrawi All Tribal Students’ Union, Manipur (ATSUM) chun sawrkara thil ngen chi tum tum an nei hai sukpuitling pek an ninaw leia an lungawinawzie suklangnain ROTO phase­IV na tanin zanikhan Manipur­a Higher Secondary School hai an khar. Churachandpur District­khawm ATSUM/CDSU chun zanikhan Rengkai Govt. Hr. Sec. School; Vungzagen Hr. Sec. School, Mata hai an khar. Rengkai Govt. Hr. Sec. School­a chun Primary Teacher training­a thang hai khawm an tir kir vawng niin ei thu dawngna chun a hril.

   

Hieng laizing hin HSA, TKSU le KSO chun, ATSUM(T) le CDSU in  ROTO Phase­ IV an fepui chu an hrietpuinaw thu le an pawmnaw thu zanikhan joint statement siemin an puong a.  HSA/TKSU le KSO functional area haia Govt. Hr. Secondary School hai chu nidang ang bawka kai dingin an inhriettir a. Rengkai Hr. Sec. School an khar chu an dem thu puongin sukbuoi nawk ta lo dingin an inhriettir.

SSC Exam Centre ding

CCPUR: June 21, 2015 khin Staff Selection Commission (SSC) huoihawtnain Delhi Police hnuoia SI, CISF hnuoia ASI sin hai lakna dinga Competitive Exam, 2015 um a tih. Churachandpur district­a chun Lamka College le CCPur College hai Exam Centre­a hmang ning a tih. Lamka College centre­ah candidates 477 le CCPur college­ah candidates 567 inthung an tih.  Hi exam­a dinga question paper hai chu zanikhan DC CCPur office a hungtlung tah. Exam hi 10AM­12:00 inkar sung nei ning a tih.

Yoga Demonstration nei ding

CCPUR: June 21, 2015, 7AM­7:30AM sung khin India ram pumpui­ah Yoga Demonstration nei ning a tih.  Hi le inzawm hin June 16, 2016 hin NYK/CCPur chun Tuilaphai Youth Club leh thangruolin Tuilaphai khuoah Block Level Neighbourhood Youth Parliament nei ning a ta, hi huna hin Yoga awareness, Sanitation & cleanliness, Skill development & Entrepreneurship hai nei ning a tih tiin zanita H. Doungel, Dist. Youth Coordinator, NYK, CCPur in tuolsung chanchinbumihai an hmupui huna a hril. June 17, 2015 in Sangang Khunou le Sangaikot, June 18, 2015 in Singngat Suangpehmun ah; June 19, 2015 in Lungthulien le Patpuihmun khuo haia nei ning a ta, June 20, 2015 in Chiengkonpang­ah leh  June 21, 2015 in Loktak Project­a NHPC Community Hall­ah NYK/CCPur; 54Bn. BSF; 32 Bn CRPF, Kendra Vidyalaya le Youth Club haileh International Yoga Day and Dist Youth Convention­cum­Yuva Kriti hmang ning a tih tiin  H.Doungel chun a hril.

PTC Office computer room meiin a kang

CCPUR: June 14, 2015 zing dar 9 vel khan PTC Office, Hiangtam Lamka ground floor­a Computer Room chu meiin a kang a, Computer printer 2, battery 2, computer set, external hard disc, stablizer thangin hmangruo chi tum tum le thlalak tar a um hai a kangsiet vawng. Electric short circuit leia kangmei hi suok ni dinga ring a ni a, thil a kangsiet hi Rs. 1 lakh chuong manhu ni dinga hisam a nih. Meiin a kangna hi zanikhan PTC CWC member han an inthielfai.

YMA Day le inzawmin Blood donation camp

CCPUR: June 15, 2015, 11:00AM khan Chingkawnpang Community Hall­ah YMA Chiengkonpang Branch chun STC/BSF leh thangruolin YMA Day le inzawmin Blood Donation Camp an huoihawt. Blood donation camp hi U.C. Hazarika, DIG/STC BSF in a hawng a, mi 50 velin thisen Unit 1 seng an pek. Thisen petu hai lai hin YMA Member 41 an thang a, chu lai chun nuhmei 4 an thangsa. Zani 7:30PM khan YMA Day lawmna programme hmang a ni a, hi huna hin Mangcha Thangzawm, President, GYMA; Kaiminlal, President, YMA Chiengkawn Branch le Sontinpau, Ex­President YMA chiengkawn Branch han thuhrilna an nei.

KWA in Heroin leh mi pathum an man

CCPUR: Khawmawi Welfare Association (KWA) volunteers hai chun June 14, 2015, 3­4PM inkar sung khan pasal pathum hai chu inruithei leh an man niin an hril. Mana um hai chu Mangneo (26) s/o Ngamthang, Kanan Veng khaw bula um (a kuta inthawk hin Heroin No. 4 funte 7 le World Yours (WY) mum 3, mobile phone pakhat le Res. 3085) man a nih. David Zote (42) s/o J. Batlien of Khawmawi (Heroin No. 4 Khaini bur chanve man) Engluaia (44)  s/o Lalmuanga of Thingkangphai (Limcee mum 5, syringe 1 le Rs. 640 man) hai an nih. Mangneeo le Engluaia hai hin inthlawpin David Zote hi inruithei an supply a, mi kuomah a zawr sawng hlak niin an hril. Hiengang thil thaw nawk ta lo dinga an hril hnungin Khawmawi Welfare Association chun an sung hai kutah an inhlan niin report an hung pek.

           

KWA hin kum 2013 a inthawka kha Khawmawi khaw sunga inruithei khapna sin an lo thaw tan, iemanichen an enthlak hnunga hieng mi 3 hai hi an man a ni a, Inruithei dodalna an la sunzawm pei ding thu, mitin an hmalakna thlawp dingin KWA chun an ngen.

Headline

NH­37 ah dan kala tax lakna hmun 10 ­ah;

Dy. CM le DGP kuomah Memorandum an pek

IMPHAL: National Highway No. 37 (Imphal­Jiribam Road) ah Police han dan kalin hmun 10 zetah tax an lak a, Truck pakahtah tax an lak hi a tlangpuiin Rs. 200/­ a inthawk Rs. 500/­ a nih. Chun, Jiriram ah CID personnel hai khawmin Truck pakhatah tax Rs. 50/­ pei an lak. Hi lei hin Truck khaltu le Police hai inkarah insel­inhalna a tlung rawp hlak tiin M. Anil Meetei, General Secretary, All Manipur Road Transport Drivers and Motors Workers Union chun Chanchinbumihai kuomah an hril.

    

Hi thil tlung le inzawm hin zanikhan All Manipur Road Transport Drivers & Motors Workers Union chun Manipur Deputy CM le Home Minister ni bawk Gaikhangam le DGP Manipur hai kuomah Memorandum an pek. An memorandum a chun NH­37 a dan kala hmun 10 zeta Police han tax an lak suktawp dinga an ngenna le Police le an inkara insel­inhalna hi a hung tawp theina dinga hma lapui dinga an ngenna hai an zieklang sa. Chun, Makru leilak a tha tawk naw leia siem that dinga an ngenna thu khawm an zieklang sa bawk.

Tax hi an peknaw chun Police kut an tuor pei a, chu chu nitina an thil tuok hlak a nih tiin M. Anil Meetei chun a hrillang sa. Tuta hma deu khan Dy. CM le Home Minister chun Police dan kala che an um chun mipuiin a kuoma report an pek theina dingin a mobile phone number khawm mipui hrietin a lo puonglang ta a nih.

Darkar 24 General Strike thaw an tum

IMPHAL: June 19, 2015 zanrila inthawk Manpur pumui huopin darkar 24 sung aw ding General Strike thaw an tum thu All Manipur Selected Special Employment Generation Programme (SEGP) Beneficiaries Committee General Secretary, Zakir Hussain chun zanita Manipur Press Club, Imphal­a Chanchinbumihai an inhmupui huna a hril. General Strike hin sakhuona thil le nitin mamaw thil phurtuhai chu huom sa naw nih tiin an hril bawk.

Union MoS Panchayati Raj a hung inzin ding

IMPHAL: June 17, 2015 khin Union Minister of State for Panchayati Raj, Nihal Chand Meghwal chu Imphal­ah hung inzin a ta, Top Dusara GP, Imphal East, Phayeng GP, Imphal West le Thoubal GP hai sir kuol a ta, Delhi tieng a kir nawk hmain Old Secretariat Conference Hall­ah Press Conference huoihawt a ta, June 18, 2015 in Imphal suoksanin New Delhi pan nawk a tih.

India le Myanmar inkarah Spl. Commandos

IMPHAL: Zani zingkar khan Army chun India le Myanmar inrina, Ukhrul tieng side­ah helpawlhai beitu dingin Special Commandos 80 a tirdawk. Special Commando­hai hi Indian para troopers a mi, Leimakhong a inthawk Helicopter hmanga phur le India le Myanmar ramri zul panpui an nih tiin news agency chun a hril.

Combined Troops han helpawl 4 an man

IMPHAL: June 12, 2015 khan Red Shield Division a Army le Sekmai Police Outpost a duty Manipur Police Commandos thangruol hai chun sum dawl tum lai KRA(U) cadre 2, Pvt. Thanglunlal Chongloi @ Hopeson (20) s/o Tongkholen Chongloi of Kailenjang, Senapati district le Oinam Shyamsundar Singh @ Naoba (19) s/o O. Manoj Singh of Charhazari, Senapati District hai chu Kanglatongbi .22 Pistol le a magazine leh an man. Hi ni ma hin Sekmai Bazar­ah PREPAK (PRO) cadre W. Thanjal Singh (43) s/o Khomei Singh of Awang Posangdam Khunun, Imphal East District le Y. Sanaton Singh @ Ton (35) s/o Y. Ningthou Singh of Nilakuthi Awang Leikai, Imphal EAst district, UNLF cadre hai khawm an man.

Pukhri sungah Pistol hmu

IMPHAL: June 14, 2015, 2:30PM vela Awang Khunou Khoyum a cheng han Pukhri an inthielfainaah Pistol pakhat an hmu a, Patsoi Police station­ah an peklut.

Others:

AIPMT, 2015 a thara nei ding

NEW DELHI: May 3, 2015 a All India Pre­Medical Test (AIPMT), 2015 neia uma chun question leaked le thil indiklo tam tak a um tia sawiselna a um leiin zanikhan Supreme Court chun AIPMT, 2015 chu tuta inthawka haptakar 4 sunga a thara nei dingin a rel. May 3, 2015 a AIPMT, 2015 chu Supreme Court in a hnawl ta a nih. Hi test a hin students 6.3 lakh an thang a, test hi Central Board of Secondary Education (CBSE) in a huoihawt a nih. Hi test a thil indiklo thawtu hi students 44 an ni a, Haryana state a tlung nia hril a nih.

Petrol man sukpung; Diesel man sukhnuoi

NEW DELHI: Zanikhan India rama chun Petrol litre 1­ah 64 paise­a sukpung a ni a, Diesel man ruok chu litre 1­ah Rs. 1.35­a sukhnuoi a ni thung. Tuta tum hi May thla sunga Petrol man sukpunga a um vawi thumna a ni tah. May 15, 2015 khan Petrol man hi litre 1 ah Rs. 3.15 le diesel litre 1­ah Rs. 2.71 a sukpung a lo ni tah.

Maggi Noodles Rs. 320 crores man suksiet

NEW DELHI: Central Food Safety Regulator FSSAI in Maggi Noodles ban a puong khum ta leiin Maggi Noodles tuchena an suksiet ta chu Rs. 320 crore man a tling ta niin Maggi noodles siemtu Nestle company thusuok chun a hril.

BSNL in roaming free a thaw tan

NEW DELHI: Zanita inthawk khan BSNL chun incoming Calls a dingin free roaming (mobile) a thaw tan. BSNL hmang (subscribers) vaibelsie telin free roaming hi an tangkaipui ding niin Anupam Shrivastava, Chief Managing Director, BSNL chun a hril. Chun, India ram hmun tum tum haiah BSNL chun Base Transceiver station towers thar 5000 bawl a tum a, hienghai laia towers 1,250 hai chu Bihar state sunga bawl ning a tih tiin Union Telecom Minister, Ravi Shankar Prasad chun a hril.

Sipaibang han relay hunger strike

NEW DELHI: Sipaibang (Ex­servicemen) hai chun ‘One Rank One Pension’ Scheme an ngenna chu an dit anga sawrkar thlungpuiin a sukpuitling pek vatnaw leia lungawi lovin zanita inthawk khan Jantar Mantar­ah relay hunger strike an thaw tan a, sipaibang 500 an thang. PM Modi chun an thil ngen hi sukpuitling pek vat dinga thu a lo tiem tasa a nih.

Mimkei leiin Meghalaya­ah mi 4 an thi

SHILLONG: June 13, 2015 zantieng khan Meghalaya state a East Jaintia Hills district­a NH­44 a Ratacherra an ti hmuna mimkei a tlung a, mi 4 in thina an tuok pha a, midang 2 an hliem. Mihriem chengna in thenkhat a suksiet bawk. Thi le hliem hai hi lampui sira thingpui dawra thingpui dawna an chawl laia mimkei hung tlung thut leia thi le hliemna tuok an nih tiin Police chun an hril.

Safety Valve puokdarah Engineers 3 an thi

SHIMLA: Zani hmasa zan dar 8:30 vel khan Himachal Pradesh a Lahaul Spiti district, Kaza Sub­Division sunga Rong­Tong Power Project a Safety Valve a puokdar leiin Engineers 3 a hmuna an thi. Engineers 3 thi hai laia Assistant Engineers ve ve, Vijay le Sanjay hai chu Himachal Pradesh State Electricity Board hnuoia thawk le engineer pakhat dang Dinesh chu  Noida hmuna private company hnuoia thawk a nih.

Manipur mi drugs leh man

KOHIMA: June 14, 2015 khan Kohima, Nagaland­a Manipur pana hung passenger Bus pakhat sukchawla Kohima Police han an dapnaah Ajmal Khan (23) of Lilong Haoreibi, Thoubal District, Manipur chu drugs Spasmo Proxyvon mum 76,000 le N­10 mum 20,600 leh dapdawkin an man. Drugs mana um hi Rs. 15.80 lakh manhu vel niin Police chun an hril.

BBIN han motor Vehicle Pack

THIMPU: Zanikhan Bangladesh, Bhutan, India le Nepal (BBIN) rama Transport ministers han Thimpu, Bhutan­ah meeting an nei a, hieng rambung 4 hai inkara harsatna um der lova motor­hai an service theina dingin Motor Veihcle Pact an ziek. Union Cabinet in hi thil hi June 10, 2­15 a kha a lo remtipui a ni tah. Motor Vehicle Pact ziek a ni ta lei hin rambung 4, Bangladesh, Bhutan, India le Nepal rama motor le passenger hai chun ramri kan le inlawn velna haiah harsatna an tuok tanaw ding a nih.

Enruk thaw an tam leiin exam cancelled

SAMASTIPUR: June 12, 2015 a Bihar state a Samastipur hmuna B.Sc. III Year Examination neinaah enruk thaw an tam taluo leiin exam hi cancelled le June 29, 2015 ah a thara exam nei lem dingin Darbhanga University chun thusuok a siem. Tu kuma HSLC exam a khawm khan enruk a hluor hle a, enruk ding supply­tu hai chu exam neina building bangah an kawp fer fur el a nih.

Rel suom hlaktu mi 7 man

CHENNAI: Government Railway Police (GRP) han Uttar Pradesh, Tamil Nadu le Andhra Pradesh state haia Rel suom hlaktu, misuol 7 zanikhan an man. Chennai, Jolarpet, Erode, Salem,  Changalpet, Tamil Nadu; Ongole, Yerragentla, Kaddappa, Renigunta, Andhra Pradesh le Uttar Pradesh state sunga hmun hran hrana Rel suomnaa thang hlak an nih tiin GRP thusuok chun a hril.

Dr Ambedkar chengna in inchawk tum

LONDON: Kum 1921­22 laia London School of Economics (LSE)­a a kai laia Dr B.R. Ambedkar lo chengna hlak In chu Maharashtra state sawrakrin inchawk a tum. Hi In hi pound 4 million vel manhu ni dinga hril a nih. Hi In hi London hmartienga Chalk Farm area sunga um a nih a. Sale process a fe mek a, zo fel tep a ni tah tiin Maharashtra Social Justice & Special Assistance, Rajkumar Badole in a hril.

Kum 65 miin nau inphir 4 a nei

BERLIN: German mi, nuhmei kum 65 tling ta le nau 13 zet nei ta hnung bakah tu khawm 7 zet nei ta bawk Ms Annegret Raunigk chun June 6, 2015 khan Berlin Hospital­ah nau inphir 4 a nei niin RTL TV in a puong. Naute 4 hai laia 3 pasal le nuhmei 1 an nih. Khawvel pumpuia nuhmei nau inphir 4 neihai laia a upa tak a nih. Ukraine rama artificial insemination procedure hmanga nau hi a pai nia hril a nih.

--------------------------------------------------------------------------------------------------------------------

VAWISUN THUPUI

“Kei a mi kalzawnga in um a, ka thu in pawm naw chun, in suolhai zirin a let sariin in chungah hremna intlungtir ka tih. Leviticus 26:21

Editorial: Inlang lova thupruk a um thei nawh

Scientist­hai chun khawvel leilunga thil um hrim hrim hi a bo annawleh a ral hmang el naw a, thil dangah an siem an siem danglam el a nih tiin an hril. Lekha ei rawhmang hin lekha a ni theina chi hran hran chu boruok (carbon dioxide) a dam, lekha vam (ash/carbon) a dam le thil dang dangah an siemna annawleh an letna po po hi lekha a ni laia a rikna leh khan a lan ang thlap niin fiena an nei ta thu an tarlang. Ei awi le ei awinaw chu thu dang nisienla, scientist­hai thil hmusuok dan a ni tlat.

   

Mihriem khawsakna phung khawm hi hiengang deuva um dinga ngai a ni a; fakrukna ei ti rawp khawm hi, thil dangah a hung inlang suok tho tho hlak. A tira lekha pawisa kha Car le building tha le ropui tak takin a hung inlet, a hung insiem annawleh a hung inthlakthleng hlak a nih. Pawisa hi fakruka a um lai chun a hmel hmu theiin an lang ngainaw a, sienkhawm a hnungah mipui hmu thei dingin a hung inlang ta hlak a nih.

   

Fakruk, hlepruk le thamna pawisa a ni mieu leiin a tirah chun midangin an hmu thei nghal el naw bakah an hriet el ngai nawh. A hung sawt deu deu a, fakruk le thamna nana chu thup hmang seng a ni ngai nawh. Miin ‘ka fakruk, ka hlepruk, thamna ka lak” ti ngai nawhai sienkhawm, an khawsak dan phung a inthawk a hung inlang suok a, a tawpah iengti kawng zawng bekin amani hrietsuok a hung ni hlak. Inlang lo ding le hriet suok lo dinga ti kha lo thei lovin a hung inlang suok luou el hlak a nih.

   

Ei ramah hin sawrkar thawktuhai chau hi fakruk thawtu anni nawh. Politicians le thil dang dang haia sinthawna nei, a chin tak le a lien tak hai inkarah fakrukna le thamna hai hi a um hlak niin an lang. An thla hlaw le an ngirhmun le inphu lovin an hung che lien a, an fakruk hi midang hung hre hai sienkhawm pawitina an nei tanaw niin an inlang hlak. Chu umzie chu, mipui inzana an neinaw a, khawtlang an inza naw a, sawrkar tina an nei nawh tina tluk a nih. A khaikhawm nan, an mihriem chanpuihai inzana an nei nawh tina a nih.

   

Hienganga farutu hai hin an fakruk hi mipui sum, mipui thil a nih ti hriezing sia, langsar taka fakruk an rin naw le an ngam hin mipui an cho a nih ti thei a ni bawk. Thamna la le fakruk thawtuhai chu ngaizawm thei dingin vangduoina le hriselnawna hai khawm an tuok el hlak niin an lang.

           

Inlang lova thupruk thei thil a um thei nawh. Thil indiklo le suolna chi tum tum thawhai khaw hi thupruk thei tak tak a um meu nawh. A tirin hriet ninaw sienkhawm kum iemanizat hnungah hriet a hung ni nawk el hlak. Ei Pathien hin thil indiklo le suol hi a theidain a ditnaw em em a. Mani hamthatna ding ti leia indiklo taka thil thaw hlak hai khawm hriet suok anni ta a, thenkhat khai hlum, thenkhat damsung lungin intang dinga hrem le inchawitir dam an nih. Thil hrim hrim hi inlang ta lo ding le hriet suok ta lo dinga thup sawng thei a um nawh. Lei tinreng Pathien hmaah an lan puong ding a nih ti hi hriet tlat dinga tha a nih.