Responsive Ad Slot

Hmasawnna Thar | 11 June, 2015

Thursday, June 11, 2015

/ Posted by Simon Infimate
ADC CCPur Election­ah Independent an tling rawn tak:
Chairman le Vice Chairman hlui hai an la tling nawk
CCPUR: June 1, 2015 nia Manipur­a ADCs 6 haia inthlangna uma votes tla hai chu zanikhan district headquarters tinah tiem an nih. Churachandpur District­a chun MDC seats 24 umah hi thu ei sut chena hin seats 19 haia chun Independent candidates 14 an tling a, INC in seat 4 le BJP in seat khat an lak. Term hmasaa Chairman Pu Langkhanpau Guite (Ind) chun votes 10­ Tuivai bielah votes 3693­ ah votes 3691 hmuin thlangtling a ni a, Vice Chairman hlui Pu Demmang Haokip (INC) chun votes 6115 tla hai lai votes 3585 hmuin thlangtling a nih.
    
6 ­Parbung­ah Pu Lalhmangpui (Ind) chun votes 2030 hmuin tlinga puong a ni a, Pu Lalthathang in votes 1953, Pu Lalropieng in votes 318 le Lalthavel in votes 591 a hmu. 7 ­Vangai a chun Pu Lal Hossan (Ind) in votes 3992 hmuin thlangtling a ni a, ama hnaitu tak Pu Laltlangmawi (Ind) in votes 2430; Lalhmingthang in votes 152 a hmu. 19­Saikawt biela chun Pu Lalhrillien @ Hrila (Ind) chun votes 3623 hmuin thlangtlinga puong a ni a, ama hnaitu tak Pu Darsiemlien chun votes 3586 a hmuh. 8­ Senvawn biela chun – Pu Lalditdang in votes 767 hmu in a tling.Vula 662, J. Malsawm 449 an hmu.
            
Hi thu sut chena result la hriet thei lo hai chu 20 ­Sagang; 21 ­Sangaikot ; 23­ Muallum; 22 ­Haopi le 24 Singngat hai an nih.

INC
1. Demmang Haokip­ Leimatak DCC
2. Paolal Haokip­ Henglep DCC
3. Khaipao Haokip­ Kholmun DCC
4. Ngamhao Touthang­ Tuibuong DCC

BJP
1.  Seilenmang­ Khousabung DCC

INDEPENDENT
1.  Genneikhup ­Chongkhojou DCC
2. Jamchinthang­ Thanlon DCC
3. Lalhmangpui Fimate ­Parbung DCC
4. Lalhossan­ Vangai DC
5. Lalditsang­ Senvawn DCC
6. T. Paukhanlian­ Ngazam DCC
7. Langkhanpau Guite­ Tuivai DCC
8. G. Suanchinpau­ Lungthul
9. T. Khaikhomang­ Lanva DCC
10. T. Thangkhosuanmung­ Hiangtam Lamka DCC
11. Chintwanlian (CT Lian)­ New Lamka West
12. M. Gouzamang Guite­ New Lamka (East)
13. V. Khaikhanmung­ Zenhang Lamka DCC
14. Lalhrillien­ Saikawt DCC

Sinlung Express in Life Cafe­ah hla ruoi
CCPUR: Thu le hla suk hausa dinga indin ‘Sinlung Express’ chun vawizan (June 11, 2015), 6­8PM inkar sung hin Life Cafe, CCPur­ah hla ruoi an the ding a nih. Sinlung Express member hai chu­Edward TC Hrangate(vocals), Immanuel L Pulamte (bass), Thanga (guitar) le David Buhril (drums) an nih. Hmar FC Board haiin an ruot angin Sinlung Express chu Hmar FC thangpuina dingin August thla sung ‘Benefit Concert’ nei dingin Tuithaphai, Imphal, Hmarkhawlien, NC Hills, Guwahati, Shillong le Delhi khawpui haiah an fe ding niin ei thu dawngna chun a hril.

Save the Girl Child workshop
CCPUR:  June 12, 2015, 2:00PM khin Bethesda School of Nursing, Muolvaiphei­ah Awareness program­cum - Workshop on “Save The Girl Child” um a tih. Hi huna hin Pu Lunminthang Haokip, IAS, DC, CCPur khuollienin thang a ta, functional president in Dr Thangchinkhup Guite, CMO/CCPur thang a tih.

A thlawnin Hepatitis C screening thaw thei
CCPUR: SHALOM OPD, I.B. Road­a chun Hepatitis C Screening a thalwna thawthei a ni bakah treatment la nuom hai ta ding khawmin mantlawm lemin damdawi ngaituo pek thei an tih. Hi thil hi tuta inthawk thla 3 sungin office hour sunga ngaiven thei ning a tih.

Class X le XII pass hai lawmpuina a nei
CCPUR: Mr Langkhanpau Guite, Ex­ Chairman, ADCC chun zani zantieng 1:00PM khan Cemetry Hall, YPA thlanmuol, Dorcas Veng, New Lamka hmuna 10­ Tuivai ADC sunga inthawka tukuma Class X le XII passed hai lawmpuina le hlawsam hai thlamuonna hun a hmangpui. Hi huna hin students 33 hai kuoma Solar Lamp inhlan an nih.

Imphal
ADC election vote tiem mek
IMPHAL: June 1, 2015 nia Manipur a ADCs 6 haia inthlangna votes tla hai tiem mek a nih. ADCs 6 haiah seats 144 a um a, candidates 12 khingtu um lova tlinga puong anni ta leiin inthlangna hi seats 132 haiah nei a nih. Seats 73 haia result puong a ni chenah Naga People’s Frond (NPF) in seats 24, Indian National Congress (INC) in seats 18, BJP in seats 15 le Independent han seats 16 an lak tah. Tuchena result dungzui chun party mala hrat filawr bik an umnaw ding niin an lang. Result hi tiem sunzawm pei a la nih.

Moreh ah bomb a puok
IMPHAL: Zani zantieng khan Chandel District a Moreh town ah bomb a puok a, mihriem thi le hliem ruok chu an um nawh. PLA chun zani hmasa khan Ukhrul le Myanmar inrina bulah sipaihai an inkaptuo a, anni pawl thi le hliem an um nawh tiin an hril.

Motor 3 Chingmeirong­ah an inbaw
IMPHAL: Zani chawhnung dar 1 vel khan Chingmeirong Khongnang Ani Karak, Imphal West District­ah motors 3, Tata Winger MN01F196 in Hyundai i10 Car MN04A­7029 a baw a, hi zo hin ISBT Chingmeirong tienga hung Tata Truck NL02G­9548 chun Car hi a hung baw nawk a, Car khaltu a hliem leiin Hospital panpui a nih.

NSCN (K) in thudiklo niin an hril
IMPHAL: Indian Army han Ukhrul le Chandel District tieng haia inthawka Myanmar inkara operation an thawnaah helpawl tam tak an kap hlum a, hienghai lai hin June 4, 2015 nia Paraolon, Chandel District­a 6­Dogra Regiment lambuntuhai khawm an thangsa tia an hril hi thudiklo a nih tiin NSCN(K) chun an hniel thu an puonglang ve. Indian Army thusuok chun helpawl hai chunga operation thawa an inkaptuonaah helpawl 38 an kap hlum ta thu le helpawl 7 an kap hliem niin an hril.

Class XII Compartmental Exam
IMPHAL: Council of Higher Secondary Education Manipur hnuoia Higher Secondary (Class XII)  Improvement/Compartmental Examination, 2015 chu July 3 & 4, 2015 (Theory & Practical) haiah nei ning a ta, Exam centres dinghai chu a hnungah la puonglang ning a tih tiin  Controller of Examination, Council of Higher Secondary Education, Manipr chun inhriettirna a siem.

Others:
Delhi Law Minister thar dingin Mishra
NEW DELHI: Delhi Law Minister Jitender Singh Tomar chu Degree Certificate lem hmanga intum  a ni leiin zani hmasa khan man a ni a. Hi lei hin Law Minister a ninaa inthawk an ban ta leiin Delhi law Minister thar dingin Delhi Jal Board Vice Chairman Kapil Mishra ruot a nih. Kapil Mishra (34) hi Karawal Nagar A/C a inthawka thlangtling, MLA­a thlangtlinga a um vawikhatna a nih.

Tekin mi 3 a deng hlum, mi 50 an hliem
SILCHAR: Zani hmasa zantieng khan Cachar district, Assam a Udharbond an ti hmuna ruo nasa takin a sur a, Tekin a zui bawk leiin Tek tla chun Udharbond area sungah mi 3, Rezaul Haque Barbhuiya (17), Maidul Islam Barbhuiya (10) le Tahir Ahmed hai a deng hlum a, midang 50 Tekin a deng hliem tiin official thusuok chun a hril.

Chain Pulling System sukbo lo ding
NEW DELHI: Rela Chain pulling system chu sukbo ninaw ni a, la hmang sunzawm pei ning a tih tiin Railways thusuok chun a hril. Rel sungah emergency thila Rel tlan lai sukchawlna dingin a keichatna siem a ni a, hi hi chain pulling system ti a nih.

UP Minister le mi 4 hai chungah case
BAREILLY: Uttar Pradesh Dairy Development Minister Ram Murti Verma le a vengtu sipai 4 hai chu Journalist Jagendra Singh raw hlumtua intum le tuolthatna case siemkhum an nih. Jagenera Singh hi June 1, 2015 zantienga kha Minister, Ram Murti Verma in a ruoi misuol le a vengtu sipai 4 han an va raw hliem, a hliemna tuorzo lova June 8, 2015 zantienga thi a nih.

NCR­ ah districts 3 belsa a nih
NEW DELHI: National Capital Region (NCR) chu districts 3 belsa a nih. District 3 belsaa um hai chu, Mozaffarnagar district, Uttar Pradesh, Jind le Karnal, Haryana hai an nih. National Capital Region Planning Board (NCRPB) meeting nei a ni a, chu taka thutlukna an siem a nih tiin Union Urban Development Minister M. Venkaiah Naidu chun a hril.

Tomar Faizabad hmuna thuoi
FAIZABAD: Degree Certificate tehlem a hmang tia intuma Police han an man, Delhi Law Minister hlui Jitender Singh Tomar chu zanikhan Delhi Police han Faizabad hmuna an thuoi a, a certificate enfelna an va nei. Tomar chun, B.Sc degree chu Ram Manohar Awadh University, Faizabad hnuoia a lak le Law Degree chu Bhagalpur University hnuoia a lak a nih. Ram Manohar Lohia Awadh University chun tuta hma khan Tomar hi B.Sc. Degree hi a tehlem a nih tiin Delhi­ah report a lo thawn ta a nih. Tomar ruok chun a degree neihai hi a tehlem ni lo, a tak tak a nih tiin a hril. Court chun Tomar hi ni 4 sung Police custody­a um dinga a rel hri phawt a nih.

NCP President dingin Sharad Pawar bawk
PATNA: Nationalist Congress Party (NCP) chun zanikhan Patna hmuna National Convention an nei a, an party president ding thlangna an nei a, Sharad Pawar bawk an thlangtling nawk. Bihar Assembly election hung um dinga hin RJD, JDU, Congress le NCP hai chu thangtlang an ta, BJP chu iengkhawm lova sie an tum a nih tiin Sharad Pawar chun a hril.

Arunachal­ah NSCN (K) 2 an thi
ITANAGAR: June 9, 2015 khan Arunachal Pradesh a Romantic Point, Wakha town, Londing district­ah IED a puok a, NSCN(K) cadres 2 an thi a, midang 1 a hliem. Hieng NSCN(K) cadres 3 han  zing dar 3 vela IED pahni an kam zo hnunga IED a pathumna kam an tum laia  changsuolin IED hi a hung puok a nih tiin Kanubari A/C MLA, Ganriel D. Wangsu chun a thil. Thina tuok mi 2 hai laia pakhat chu Myanmar mi nia hril a nih.

Mizoram Assembly Session July 7 ah
AIZAWL: Mizoram Governor Lt. General (Retd) Nirbhay Sharma chun 7th Mizoram Assembly session a vawirukna chu July 7, 2015 a inthawka inthung tan dingin a ko. Hi Session sunga thu rel dinghai chu Assembly Speaker Hiphei inrawinain Business Advisory Committee in tuta thla sung hin inthungin rel an tih tiin S.R. Zokhuma, Additional Secretary, Mizoram Legislative  Assembly chun a hril. Hi Session a hin state regular budget Mizoram Finance Minister Lalsawta in a phar beisei a nih tiin F. Vanlalruata chun a hril.

Dawi thawa intum nupui vuok hlum
VADODARA: June 5, 2015 zan khan Khandwaniya village­a chun hmeithai pakhat Kapuriben Rathwa (50) chun dawi a thaw tia intumin mipui hawn khatin an hreiin an tuk hlum. Hi thil tlung le inzawm hin Police chun mi 7 an man ta niin zanita Police thusuok chun a hril. Khaw mipui hai chun, hi nu hin dawi hmangin an nau hai a that hlak tia intuma an that niin an hril. Mana u m hai chu Rasul Rathwa, Dhulia Rathwa, Khumtiya Rathwa, Fatehsingh Rathwa, Hitesh, Popat Rathwa le Ashvin Rathwa hai an nih.

Kap hlum hai lai 2013 a CRPF phinga bomb thuntu
KOLKATA: June 8, 2015 zana Palamu district, Jharkhand state a Jharkhand Police han Moist helpawl 12 an that hai lai khan kum 2013 a CRPF pakhat phing sunga bomb thuntu pakhat a thangsa niin official thusuok chun a hril. A phing sunga bomb thun le thuoi khuma um chu Constable Babulal Patel (29) a nih. CRPF Constable Babulal Patel phing at thler a, a sungah bomb 1.5kg thuna thuipingtu hi Maoist Commander Anuraq Yadav @ R.K. niin ei thu dawngna chun a hril.

Natl.Cancer Institute Haryana­ah
CHANDIGARH: India rama National Cancer Institute hmasa tak ding chu Jhaijan District, Haryana stae a Badhsa hmuna indin ning a tih. Hi Institute indinna ding hin sawrkar thlungpui chun Rs. 2,035 crore a sanctioned ta a, ram acres 32 a lienah bawl ning a ta, thla 45 sunga zo dinga riruong a nih tiin Haryana Chief Minister Manohar Lal Khattar chun a hril.

Gorkha han ST le Autonomous Council
NEW DELHI: Assam state a Gorkha chenghai chun Scheduled Tribe (ST) le Autonomous Council an ngen. June 9, 2015 khan Asom Gorkha Sammelan thuoitu han New Delhi­ah DoNER Minister Dr Jitendra Singh an inhmupui a, hi huna hin Memorandum an pek niin Asom Gorkha Sommelan thusuok chun a hril.

Cabinet in Telangana NH­163 Four Lane dingin
NEW DELHI: Cabinet Committee on Economic Affairs chun, Telangana state­a National Highway – 163 a Yadgiri­ Warangal section chu four lane­a siem dingin remtipuina a nei ta a, hi lampui four lane­a liena siemna dinga hin Rs. 1905 crore seng dinga riruong a nih. Yadgiri­Warangal sector four lane­a siem tumna san tak chu Telangana a infrastructure siemthat, lampuia inzin hun sung suktawi le traffic intar tak sukthawl lemna ding a nih. Hi lampui four lane zo a ni pha Hyderabad a inthawk Warrang inkar chu four lane­a liena siem ni nawk a tih. Hi thil hi National Highways Development Project (NHDP) Phase­IV hnuoia thaw ning a tih.

Helpawl khawingamtu hai ta dinga inenfiena ding
NEW DELHI: Minister of State for Information and Broadcasting Rajyavardhan Singh Rathore chun, zani hmasa laia India sipai han Myanmar ram sunga helpawl hai tukdawlna runpui an thlak chu suongum a ti thu a hrilin hiengang hin tuta hmain India sipai hai an la che ngainaw thaw le sawrkar hmalakna chu huoisen thlak a ti thu a hril. India sipai hai hmalakna hi thenum rambung, firfieka che hlak khawingamtu popo ta dinga inennawnna ding a nih tiin a hril.
    
Congress party khawmin sipai hai chetna chu inpakum an ti thu an hril a, tuta hmaa India sipai han an huoisenna an inlangtir ang kha tu tum hin an hung inlangtir nawk ta a nih tiin Congress spokesman Randeep Singh chun a hril.
    
Hieng laizing hin Myanmar rama NE helpawl um hai tukdawlna dinga joint operation thaw a ni theina dinga lampui dap dingin National Security Advisor Ajit Doval thu Myanmar rama an zin ding niin ei thu dawngna chun a hril. India le Myanmar hai chun nikum May ni 18 khan security tienga thawtlangna ding le information inpetuo dingin MoU an ziek a nih.

Hmaituom mi 3 in company thawktu an suom
RAJKOT: Gujarat­a Rajkot khawpuia chun zani hmasa khan Ambaji Enterprise finance company a thawktu Sunil Lalwani (30) chu Bike a chuong hmaituom pasal pathum han an suom a, an sun hliem hnunga Rs. 17 lakh an lakpek hnungin an tlan hmang san niin zanita Police thusuok chun a hril. Sunil Lalwani hi na taka a hliem leiin hospital­a enkawl a ni a, hi thil tlung thua hin Police chun case an registered. Lalwani hi Ambaji Enterprise a kum 8 zet lo thawk tah, Panchnath party ram bul hnai laia Punjab National Bank­a inthawk pawisa a laksuok hnung, Scooter­a chuonga an company office umna Dhebar road pana a fe mek laia pasal 3 hai hin an lo suom a nih.

Kan University­a inthawk a graduate nawh: RML University
FAIZABAD:  RML Awadh University chun, fake degree case leia mana um le Delhi Law Minister­a inthawka inban tah Jitender Singh Tomar chu kan University­a inthawk a graduate a ni nawh tiin an hril. Tomar hin hi Unvirsity­a inthawk graduate niin inhril sienkhawm chuongang record hmu ding a um nawh tiin zanikhan an hril. Pasal pakhat Pradeep Kumar in RTI hmanga Tomar certificate hai enfel dinga ngenna a siem le inzawma hieng thil hi hung suok a nih.

Pasal pakhat Kal sunga inthawk lung 420 atdawk
BEIJING: China rama Zhejiang province­a Dongyang Prople’s Hospital­a chun zanikhan doctors han pasal pakhat Kal (kidney) an at a, a Kal sunga inthawk Lung 420 zet an at dawk. Kal ata um pa hming hu He Dong (55) a ni a, operation thawnaa hin darkar 2 sung deuthaw hun an hmang. Dang hi Tofu du em em a ni a, doctor hai chun tofu hi du hle sienkhawm a hma anga fa rawn ta lo dingin thurawn an pek.
-----------------------------------------------------------------------------------------------------------------------
VAWISUN THUPUI
Pathien kuoma a mi thuoi theina dingin Krista chun suolhai leiin vawikhat a tuor bawk sih a, tisaa sukhlumin a u m a, thlaraua ruok chun sukhringin a um tah.­ 1 Peter 3:18

Editorial
Tling leh lawm dan thiem ding

Manipur mipui han nghakhal taka ei lo tung ADC election a voters tlahai chu tiem le result hriet a ni ta a. Tling dinga inring ve tam tak an tlingzo tanaw a. Vote tiem nia ei ngirhmun chu an ang tawl naw hle. Thlangtlinga um hai chu an hlimin an lawm hle. Amiruokchu, a tlingzo tanawhai ta ding chun lungril a na hle ring a um. Hi lei hin lungril puitling tak put a tul hle a nih. Election a hlak chun a pakhatna, thlangtlinga um ti lo hai, a pahnina le a pathumna hai chu umzie neilo le hlutna um ta lo a hung ni el ta si leiin mani chan sengah tuor thiem tul a tih. Mani chana tuor thiem hai mi vangnei ning an ta, a tuor thiemnaw naw chu a chaw ding an hung ni el ta ding a nih. Hi lei hin tling dan, lawm dan le tling lova um dan khawm ei thiem seng a tul ding a nih.
    
ADC election result ei hriet ta a. A bik takin thlangtlinga um han tling le lawm dan ei thiem nuom a um. A tling lo hai hmusit, esel le deusaw zawnga um lo hram hram ding a nih. Election ei ti hi ei pahai ro a ninaw a, tling chang le tlingnaw chang a um hlak ding hrim a nih. Tling ta lei ela mihai nakhel le theida zawnga thlangtlinga ei umna ei lawm pal hlau chun mihai dem le sawisel hlawng ei ta, ei Pathien dit dan khawm ninaw nih ti hi hriet tlat ding a nih. Hi lei hin election a tling dan le lawm dan hi ei thiem tum seng ding a nih.
    
Chun, election lai khan thang a na hle. tawngbau thanaw le intheida theina ding thil dam ei lo hril thei. Election ei zo ta leiin khangang thil hai po po kha theinghil seng ta ding a nih. Politics a hin  ruoltha le hmelma ti a um thei tak tak nawh ti hi hriet ve zing ding a nih. Tuta tuma eletion a khan ei lo thangtlang naw khawma election nawka chu thangtlang ding dam ei la ni tawl si leiin, inhmelma en a inen chi ninaw nih. Election leia ruoltha le sungkhat nisi, hmelma ena inen hiel dam ei lo um pal a ni chun thiltha lo a ni leiin inngaidamtuong ei tiu.
    
Inthlang ram, democracy ram ei ni a, mipuiin ei aiaw ding ei thlang a, chuonghai chun mipui aiawin ro an hung rel a, chu chu mipui sawrkar ti a nih. Mipui sawrkar siem dingin mipui han ei vote ei thlak a, votes tla hai khawm tiem a ni ta a, mipui aiawa ro reltu dinghai khawm ei hriet ta a, party amanih sungkuo amanih, annawleh mimal ta dinga sawrkar ni lova  mipui sawrkar  a hung ni ngei hi  mipuihai lo beisei a nih. Mipui sawrkar  hi ei ram le ei hnamin a mamaw ngawi ngawi a nih. Party sawrkar annawleh sungkuo sawrkar a ni chun ram le mipui han an tuor nasa hle hlak. Hieng a ni lei hin mipui aiaw dinga thlang thar han mipui sawrkar indin ngei dinga hma an hung lak nuom a um.
    
Tuta tuma ADC election a hin party tum tum le candidates han tum dang nek takin thang an lak nasa a. Election a ngirhai khawm a tam lem chu thalai an tam lem a, an nuom a ni phawt chun ei ram inthuoi dan khawm an thlakthleng thei beisei a u m. Sawrkar thar hung pieng ding hi mipui sawrkar ni ngei sienla ti chu mipui dit dan a ni a, mipui sawrkar a hung ni ding am tiin an lo thlir thup a nih.
    
Ei ramah thalai politics invawi an hung tam ta hi lawm a um a, tukhawmin sawrkar siem hai sienla, ei mi dit le thlangtlinghai anni amani, an ninaw amani khawm lo nihai sienla, a neitu, a chawngpua ei inngai thei seng sawrkar hung ni ngei sienla nuom a um. Inthlierbikna sawrkar hi chu ei ram le hnamin a mamaw ta naw a, bo hmak ta sienla nuom a um. Mipui neka mimal pakhatin ngaipawimaw a hlaw lem hlakna sawrkar dam a lo um ta hlak a, chuongang sawrkar chu um tanaw hram sien nuom a um hle.

Don't Miss
© all rights reserved
made with by Simon L Infimate