Hmasawnna Thar | 10 June, 2015

Tuolsung

Vawituk 8AM a inthawk Vote tiem tan a ni ding

CCPUR: June 1, 2015 nia Manipur­a ADCs 6 haia MDC election um le June 6, 2015 nia repoll neia um haia vote tla hai chu vawisun hin tiem ning a tih.

    

Churachandpur District a chun vawituk (June 10, 2015), 8:00AM hin DC/CCPur Office bul­a    District Training Centre (DTC)­ah Counting Agent han tiem tan an tih. Vote tiemna (counting) Hall 2 DTC Ground Floor le first Floor hai hmang ning a ta, Agent han table 12 seng hmangin  votes tiem an tih.

Counting Hall No. 1 (Ground floor) hnuoiah Polling Station 150 haia vote tla hai tiem ning a tih. Hi hmuna tiem ding hai chu 1­ Khousabung (13 Polling Station), 12­ Lanva (12 Polling Station), 13­ Kholmun (11 Polling Station), 14­ Tuibuong (15 Polling Station), 15 ­Hiangtam Lamka (12 Polling Station), 16­ New Lamka­ West (10 Polling Station), 17­New Lamka­East (18 Polling Station), 18 ­Zenhang Lamka (12 Polling Station), 19 ­Saikot (12 Polling Station), 20­ Sagang (10 Polling Station), 21­ Sangaikot (14 Polling Station) le 22­ Haopi Range (11 Polling Station) hai an nih.

    

Counting Hall No. 2 (First Floor) a chun Polling Station 140 haia vote tla hai tiem ning an tih. Chuonghai chu 2­Leimatak (14 Polling Station), 3­ Henglep(16 Polling Station), 4­ Chongkhojou (13Polling Station), 5­ Thanlon (12 Polling Station), 9 ­Ngazam (11 Polling Station), 10­Tuivai (8 Polling Station), 6 ­Parbung (10 Polling Station), 7­ Vangai (16 Polling Station), 8­ Senvon (9 Polling Station), 11 ­Lungthul (14 Polling Station), 23 ­Muallum (6 Polling Station) le 24­ Singngat (11 Polling Station)  hai an nih.

    

Counting Hall sung le puotiengah Mobile Phone, Electronic thil hrim hrim bakah Nawtchawk (match box) le meitawklung (lighter) chawi phal ninaw nih tiin District Election Officer, CCPur chun inhriettirna a siem.

UPF, India sawrkar le Manipur in SoO an keisei

CCPUR/ NEW DELHI: India sawrkar, Manipur sawrkar le UPF chun zani 2.30pm a inthawk khan Hotel Janpath, New Delhi hmuna June 8, 2016 chena dingin All India huopin SoO an suksei. Hi taka hin UPF hnuoia um popo hai bakah GOI aiawin Shambu Singh in suoi a kei a, Manipur sawrkar aiawin KT Vaiphei (Intelligene) in suoi a thaw.

    

Hi huna hin UPF political agenda hai khawm hun iemanichen sung zet hriltlang a ni a, chu zoin mipui lai a tam thei ang tak consultation nei a, chu zovah inhmukhawm nawk dingin an remti niin Calvin H., Convenor, JMB/UPF a inthawk ei thu dawngna chun a hril.

    

UPF a hin ZRA, KNF, ZDV, HPC (D), UKLF le KRA (U) hai an um a nih.

Singngat MLA in MDC candidate hai bu a fakpui

CCPUR: Pu Ginsuanhau, MLA 60­Singngat chun zani zantieng 2:00PM khan Lailam Veng­a a chengnain­ah 60­Singngat A/C sunga MDC candidate hai ko khawmin bu  a fakpui a, hlawtlingna le hlawsamna chu  election zie a ni a,  tling le tlingnaw khawma a tuor dan thiem seng dingin  hi huna thuhrilna a nei huna MDC candidate hai an fui. MDC election huna khan ditsak bik le thlawp bik candidate a neinaw thu hrilin MDC candidate hai le inthlawpa ram hmasawnna dinga theitawpa hma a lak ding thu a hril bawk.

    

Hi huna hin MDC candidates  Zamlunmung, Ginzamuan, Paominlianthang, Thangkhanlun, Chinsuanlam, Khaichinmang, Pumkhanmang, Nengchinlam, Thangkhongam le Tongkai & P. Sianzadong representative mi 2 hai tiemin candidate 11 an thang. A thang lo hai chu G. Suanchinpau,  Pumtulthang, Grace Zamnu, Hausuanthang hai an nih.

    

Hi huna hin Ginsuanhau chun candidates 15 han June 10, 2015 nia Vote tiem huna an hmang dingin sum iemanizat zatin a sem tawl.

Tuithapui vadung­ah a tla hlum

CCPUR: Zani zantieng 5:00PM vel khan Mr Remnalal (56) h/of Vungi of Muolvaiphei chu Rengkai Vengthlang lai Tuithapui vadunga Nga a man tumnaah changsuolin Tuithapui vadung­ah a tla hlum. Mr Remnalal hi kum iemanizat liemtaa kha Muolvaiphei, CCPur­a hung inpem a nih. Zantieng huna Tuithapui vadunga lenkhang keia Nga man rawp hlak niin ei thu dawngna chun a hril. Tui­thapui vadunga a tlak hnung hin tlawmngai pawl han tuia inthawk an laksuok a, sienkhawm an san hman tanaw a nih. A ruong hi vawisun Muolvaiphei thlanmuolah vuiliem ning a tih.

Dist. Level Science Seminar

CCPUR: Department of Sciene, ZEO/CCPur huoihawtnain July, 2015 thla sung khin 37th District Level Students Science Seminar 2015 um a tih. Hi huna thang nuom Class VIII­XII inchuklai hai chun July 15, 2015 chen khin ZEO/CCPur Office­ah hnina lekha peklut thei ning a tih. Science seminar huna hin “Harnessing Light Possibilities and Challenges” ti thupui hmangin written aptitude test nei ning a tih.

Headline

Degree Certificate tehlem thuah Delhi Law Minister Jitendra Singh Tomar man a nih

NEW DELHI: Aam Aadmi Party (AAP) thuoitu le Delhi Law Minister Jitendra Singh Tomar chu Certificate tehlem case le inzawmin zani zingkar khan Police han a chengna in a inthawk an va man a, thu indawn dingin Police station ah thuoi a nih. Zani  hmasa zan khan Mr Jitendra  Singh Tomar chunga hin FIR registered a nih. IPC Section 420 thangsain IPC Sections hran hran hmanga inhlemna ase siem khum a nih. Jitendra Singh Tomar hi a B.Sc. le Law Degree certificates hai chu a tehlem (fake) nia intum a ni a. A degree lakna hi Bihar state nia hril a ni leiin a suichieng dingin Court thupek angin Delhi Police hai chun New Delhi suoksanin Bihar an pan ta niin Delhi Police Commissioner B.S. Bassi chun a hril.

    

Delhi­a AAP sawrkar le Delhi Lt. Governor Najeeb Jung hai nasa taka an inbeituo laia Law Minister manna hi a hungtlung a nih. AAP thuoitu Sanjay Singh chun, sawrkar thlungpui chun Delhi sawrkar sukse le sukmuolpho tum zawngin tactics a hmang a nih tiin a sawisel. Hiengang bawk hin Delhi Deputy Chief Minister Manish Sisodia chun sawrkar thlungpui an tum. Delhi sawrkarin Corruption nuoibo dinga hma a lak laizingin sawrkar thlungpui chun Lt. Governor hmangin emergency lai ang elin thil a thaw a, Delhi Law Minister khawm misuol anga cheibawlin Police han an mantir a nih tiin Sisodia chun a hril. Delhi mipui han AAP chu corruption nuoibo dingin an vote tling a, corruption thawhai chu hla ninaw nihai. Anti­corruption lu taka Joint Commission ruot hi dan kal a ni a, hiengang post hi a um nawh tiin Sisodia chun a hril.

    

Hieng laizing hin Jitender Singh Tomar Law le a B.Sc. degree certificate hai chu a lem (fake) a nih tiin an man zova zanita Press Conference huna Delhi Police chun an hril. AAP in man ani hmaa inhriettirna pek ni lo anga an hril chu thu khel a ni thu hrilin June 8, 2015 khan hi thua hin FIR zieklut le Tomar khawm notice pek a ni thu Delhi Police chun an hril.

     

BJP le Congress chun Delhi law minister Jitendra Singh Tomar chu minister a ninaa inthawka inban ding le Delhi sawrkar khawm Law minister a ninaa inthawka ban dingin an ngen. Delhi Law Minister in fake degree case a nei leiin an ban a tul. Delhi CM Arvind Kejriwal in a hun takah action la sienla chu Tomar hin man a tuok naw ding a nih tiin Delhi BJP President Satish Upadhyay chun a hril.

    

Congress thuoitu le Union Law Minister hlui M. Veerappa Moily chun, Delhi law Minister in Law degree tehlem a nei hi chu thil vangduoithlak takel a nih. Danin ro a la hung rel ding a nih tiin a hril. Delhi law Minister in Law degree tehlem a nei hi a vangduoithlak a, hi hi ni naw nim AAP in hmutlang thei sawrkar le hmutlang thei party an ti chu!! Tiin Congress thuoitu Ajay Maken chun a hril ve.

    

Delhi Court chun ni 4 sung Police Custody­a um dingin zanikhan  a rel.

Imphal:

Mithiruong a hming hriet tah

IMPHAL: June 4, 2015 a Paraolin, Chandel district a helpawl han 6­ Dogra Regiment hai an lambun zo, June 8, 2015 a Libung hmuna mithiruong hmua u m chu a hming hriet a ni tah.  Police han mithiruong hi Keisham Rajen (28) s/o Khamba of Nongren Maning Leikai a nih tiin an hril. Rajen hin kum 10 liemtaa kha KYKL a zawm ta nia hril a nih. A ruong hi JNIMS Morgue­ah sie a ni a, a sunghai  khawma Rajen a nih ti an va fie tah.

Army han helpawlhai camp 2 an suksiet

IMPHAL: June 4, 2015 nia Paraolon, Chandel District­a helpawl han 6 ­Dogra Regiment an lo lambun leia Army 18 an thi a, Army 11 an hliema intahwk khan Army le Assam Rifles thangruol han helpawlhai man le tukdawl tumin operation an la sunzawm zing a. Zanikhan Manipur le Myanmar inkar le Nagaland le Myanmar inkar haiah helpawlhai camps 2 an suksiet pek a, helpawl khawm iemanizat an thi ring a nih tiin Major General Ranbir Singh chun a hril.    

Maggi noodles sample test dingin

IMPHAL: Manipur­a Maggi noodles, Wai Wai, Macaroni etc. sample hai chu Manipur stat puotienga test dinga thawn a ni a. Result hriet a ni hmakhat chu zawr khap hri a la nih tiin State sawrkar thusuok chun a hril.

Kum 14 mi suolluitu Court hmaah

IMPHAL: June 5, 2015 a nuhmei tleirawl kum 14 mi suolluitu le a suollui lai thla laa internet a zawrtu Rajkumar Birjit Singh (40) s/o Sanatomba of Yaishkul Hiruhanba Leikai chu zanikhan CJM, Imphal West hmaah inlangtir a ni a, Court chun Police Custody­a  la um dingin a rel.

L. Keivom in Memorial lecture a pek ding

IMPHAL: Vawisun June 10, 2015, 1:00PM hin Lamyanba Sanglen, near AIR Station, Palace compound­ah 15th Arambam Somorendra Martyrdom Anniversary & The 10th Arambam Somorendra Memorial Lecture um a tih. Hi huna hin Pu L. Keivaom, IFS Retd. chun “Ethnic Churning:Chikumi Style” ti thupui hmangin thu hril (Memorial lecture) a tih. Hi hun hi Mr Pradip Phanjoubam, Proprietor, Imphal Free Press in keihruoi a ta, Dr. Sohiamlung Dangmei, Dr. Ngamkhohao Haokip, Dr. Priyadarshini Gangte le Mr. David Buhril hai discussants ning an tih. Somorendra hi UNLF founder a nih.(input LRS)

Others

Lungin intang in Rashtrapati Bhawan Map

LUCKNOW: June 7, 2015 khan Moradabad Jail, Uttar Pradesh a intanghai chu dap an ni a, hi huna hin Saddiq Ali (25) of West Bengal kutah Rajpath le Rashtrapati Bhawan Map hai bakah  India le Bangladesh ramri zula BSF post hai lim (sketches), Cell phone memory card, Hindi, Mandarin le Bengali tawng haia lekha ziek hai hmu a nih. Saddiq Ali hi tuolthat leia kum 2011 a man le Moradabad jail­a khum tan a nih.

Mi 3 chuongna Coast Guard Vuongna an hmang

CHENNAI: Zani hmasa zan dar 9:23 a inthawk khan a sunga thawktu mi 3 chuongna, Indian Coast Guard Vuongna (Dornier Surveilance Aircraft) CG­791 chu a umna chin hriet lovin an hmang a, tuchen hin a umna hriet a la ni nawh. Hi vuongna hi Tamil Nadu Coast a duty laia inhmang a nih. Coast Guard Lawng 5, Navy Lawng 4 le Indian Aircraft han an zawng mek.

Army 1 ama le ama an kap hlum pal

JAMMU: Zani hmasa zingkar khan 28 Rashtriya Rifles a Rifleman Chander Mohan Sharma chun a duty­na hmun Garah Brahmana Village, Kupwara district­ah a silai a sukpuok pal a, a hliemna tuorzo lovin a thi. Chun, zanikhan Sopore Bus stand­ah sawrkar thawktu pakhat Md. Altaf Sheikh chu Bus nghaka a um laiin tu ti hrietlo han an kap hlum.

Assam­a district 6 ah tui a lien

GUWAHATI: Tulai hin Assam state sunga Districts 6, Barpeta, Sonitpur, Dhemaji, Kokrajhar, Bonggaigaon le Lakhimpur districts haiah ruo nasa takin a sur a, khuo 108 haiah tui a lien leiin mi nuoikhat velin harsatna an tuok pha bakah mi pahniin thina an tuok pha ta niin Nandita Hazarika, Deputy Secretary, Assam state Disaster Management Authority (ASDMA) chun a hril. Thina tuokhai hi Bongaigaon le Lakhimpu district a mi an nih.

RSS Chief Z+ Security pek

NEW DELHI: Rashtriya Swayamsevak Sangh (RSS) chief Mohan Bhagwat chu “Z+” VVIP security pek a nih. RSS headquarters le India rama an zinna taphawtah Central Industrial Security Force (CISF) han an veng zing ta ding a nih. A hma chun Maharashtra Police han an veng hlak a nih.

Odisha state­ah lum leia thi mi 40

BHUBANESWAR: Odisha state a chun khawlum taluo tuorzo lova mihriem thina tuok 40 an tling ta niin official thusuok chun a hril. Odisha state a khawlum zuolkaina hmun hai chu, Sambalpur, Hirakud, Jharsuguda le Bhubaneswar hai an nih. Non­official thusuok ruok chun khawlum tuorzo lova thi hi mi 159 an tling ta niin a hril.

Maoist helpawl 12 kap hlum

LATEHAR: Zani hmasa zan khan Jharkhand state a Latehar district sunga Bakoria village ah Police le Maoist helpawlhai an inkaptuo a, Maoist helpawl 12 kap hlum an nih tiin Jharkhand Police spokesperson, S.N. Pradhan chun a hril.

UP CM in Rs. 20 lakh ve ve pek dingin

LUCKNOW: June 4, 2015 nia helpawl han Paraolan, Chandel District, Manipur­a 6­ Dogra Regiment hai an lo lambun tuma Army Jawan 18 thihai laia thang ve Uttar Pradesh mi pahni, Havildar Jagveer Singh (39) s/o Shiv Shankar of Murad Gardh village le Sepoy Manjit Singh (26) s/o Rakesh Chand of Akhwana village hai chu zangnadawmna Rs. 20 lakh ve ve pek ning an tih tiin Uttar Pradesh Chief Minister, Akhilesh Yadav chun a puong.

Congress Chief Minister’s Conference

NEW DELHI: Zanikhan AICC Presient Sonia Gandhi inrawina hnuoiah Congress Chief Ministers Conclave tan a nih. Hi huna thu hriltu tak chu PM hlui Dr Manmohan Singh a nih. Tuhin India rama states 9 haiah  Congress party in ro an rel mek a, chuong state hai chu,  Arunachal Pradesh, Assam, Meghalaya, Mizoram, Manipur, Karnataka, Kerala, Uttarakhand le Himachal Pradesh hai an nih. Assam le Kerala hai hi kum thara Asembly Election nei ding an nih.

NGOs 4470 hai licence cancelled

NEW DELHI: India sawrkar chun zanikhan dan an bawsiet leiin NGOs 4,470 hai chu foreign­a inthawk sum hmu thei lo dingin Foreign Contribution Regulation Act (FCRA) hnuoia an licence a kansel. NGOs licence kansel­a um hai lai hin Supreme Court Bar Association le Escorts Heart Institute hai khawm an thang. Licence kansel peka um an lar deu dang hai chu­ Panjab University, Chandigarh, Gujarat National Law University, Gargi College, Delhi, Lady Irwin College Delhi, Vikram Sarabhai Foundation le Delhi Deputy Chief Minister Manish Sisodia in an din Kabir hai an nih. Annual returns le a dang dang hai an pek naw leia an licence hi kansel a nih.

Ganja 18,928 kg dapdawk a nih

CHANDIGARH:Zanikhan Haryana Police han Kurukshetra district sunga In pakhat an dapnaah Ganja kg. 18,928, international market rate­ah Rs. 2 crore manhu, tuolsuok Pistol 2, a mu 21, Red Beacon light, Haryana le Punjab number plates 5 dapdawkin an man niin Haryana Police spokesman chun a hril. A hnungah Weighing machine le packaging material hmu belsa a ni bawk.

ISRO in Space Pioneer Award a dawng

BENGALURU: Low­cost Mars Mission hlawtling taka a thawna le inzawmin US National Space Society chun Indian Space Research Organisation (ISRO) kuomah Space Pioneer Award an hlan. Award hi May 20­24, 2015 inkar sunga Canada hmuna Toronto khawpuia 34th Annual International Space Development Conference nei huna inhlan a nih. ISRO in Mars mission first attempt­a a hlawtling nghalna leia hi Award hi National Space Society (NSS), USA in an hlan a nih. Tuchena hin khawvel rambung dang US, Russia le Europe han Mars mission hi an lo puitling ta a, hieng rambung hai lai hin India (ISRO) khawm a thang ve phak ta a nih.

S.Korea rama MERS leia thi mi 7

SEOUL: South Korea rama chun Middle East Respiratory Syndrome (MERS) natna leiin mi 1 a thi belsa nawk leiin tuchena hi virus leia mihriem thi chu 7 an tling tah. MERS natna hri invawi thar mi 8 hmu belsa anni a, hi lei hin tuchena South Korea rama MERS natna invawi umzat chu 95 an tling tah. Middle East sunga hi natna hri leia mihriem thina tuok chu 445 an tling ta bawk.

China ramah mi 4 kap hlum

BEIJING: Zani zingkar khan Hibei Province, China ramah pasal kum 55 mi velin silai a kap hrut a, hi thil tlunga hin Police officer 2 thangsain mi 4 kap hlum an ni bakah midang 5 kap hliem an nih.

---------------------------------------------------------------------------------------------------------------------

VAWISUN THUPUI

Thlarau thang naw chun taksa chu thi a nih, chuong  ang bawkin thilthaw thang naw chun ringna khawm chu a thi a nih. ­ Jacob 2:26

Editorial

Mob Rule or Culture

June 6, 2015 zingkar khan Thoubal District a Heirok Police station a inthawka Km. 2 vela hla, Amurei Macha Loukol hmuna Ningthoujam Rebika Devi (25) d/o (L) L. Ingo of Heirok Part­III Tomal Makhong chu a thisaa hmu a ni a. Rebika Devi thina thua hin a khaw mihai lungril a hung himaw a, suollui hrep hnunga that ni dinga ringhlana a hung pieng a. Chuongchun a khaw mihai lungsen a hung zuol sau sau a, hi tuolthatnaa inrawlna nei ni dinga an ringhla pasal 3, Tekchem Yaima (24) s/o T. Shyam Singh; Ningthoujam Bishe Singh le Koknagang of Wangjing Tekcham Leikai hai in chu raw a hung ni ta a. Hi tuol thina thua hin dan  zui lovin mob rule hmang tan a hung ni ta a nih.

    

Hi thina thua buoina fe pei hin Heirok le Wangjing mipuihai inkarah inhrietthiemnawna nasa tak a hung irsuok a, hieng khuo pahni mipuihai chu an hung inbeituo el ta a, buoina suok chingfel tuma va ve Education Minister M. Okendro le Heirok A/C MLA P. Brojen hai khawm chu mipui  han inzaa an thu lak nekin zani hmasa khan lungin an lo deng el bakah Education Minister M. Okendro security escort motors 3 zet an lo suksiet nawk a, mob rule chu a la fe pei el a nih. Hi thil tlung hi thil pawi tak a ni el bakah thil inzakum a nih. Dan hmanga ro rel neka mob rule a Manipur mi han ro ei rel pei el hin thiltha nekin thil­thalo an tlun lem hlak a nih.

    

Ei ramah Gun Culture ei insukhmu a, Gun Culture a that nawzie tuhin chu ei hrietchieng tah. Amiruokchu, ei bansan thei ta si naw leiin a ram mipui han sepui ruo tuor an hril ang elin iengkhawm hril thei lovin ei tuor tlawk tlawk el a ni hi! Thenkhat lem chun Gun Culture chu fakzawngna le sumdawngnain ei hmang am an ta aw ti thei hielin a hung u m ta a nih. Mob rule or Mob culture ei ti khawm hi dan kala rorelna a ni leiin ei society in nasa takin a sietpui ta a, ei bansan naw a, ei fepui pei a ni chun nasa taka sietpuiin ei la tuorhla ding a nih.

    

Nuhmei suolluitu le tuolthattu hai chu dan bawsie anni leiin an phutawk dan anga hremna pek ngei ding an nih. Amiruokchu, dan palzut le bawsiea mob rule or culture anga mipui ei hang che el hlak hi thil indik a ninaw a, dan kal ei nih ti hriet ding a nih. Khawtlang chu misuolhai dona kawngah thangruol ding hrim ei nih. Dan angin misuolhai chu manin Police­ah pelutin report pe hlak ei tiu. Mipui hai hi dan kengkawtu le roreltu ding ei ninaw a, ei ramin dan a nei a, roreltu khawm a nei a, chuonganga mawphurna neituhai chun ro an rel le hma an lak chu an thaw ding le an mawphurna a nih.

    

Mob rule or Mob culture ei hmang uor taluo leiin a tuor lo ding le a suksuol lo hai chenin an tuor pha hlak hi thil pawi takel a nih. Heirok a Rebika Devi thina le inzawma In 3 rawa um hai laia in Pahnihai chu inrawlna nei ve der lo le suolna nei ve der lo anni leia Heirok le Wangjing mipui lungsenna le inbeituona hi a zuolkai niin an lang. Mob rule hmang lovin dan hmanga rorel nisienla chu hi thina thua hin hieng lawma buoina hi a tlung ring a um nawh. Ei ramah mob rule ei hmang uor po leh harsatna lien lem ei tuok pei ding a nih.

    

Mob rule hi phairam biela a hluor zuol bakah an tanna khawm niin an lang. Mob Rule hi a hung indar lien pei a, tlangram biela chenghai khawm a hung kangkai ta a nih. Tlangram biela khawm mob rule hi hmang ve a hung ni ta hi a pawi bek bek el a nih. Pathien hring le Pathien tak  nei le bie intihai chun mob rule hi chu hmang ve naw hram inla nuom a um. Amiruokchu, ei dang hne tanaw niin an lang. Tlangram kilkhawr haia chen khawm mob rule ei hmang ta leiin election hun haia khawm Repoll ei nei pha ta rawp el a nih. Mob Rule hi dan kal le suol a ni leiin thaw lo le bansan ding a nih.