Hmasawnna Thar | 05 June, 2015

Tuolsung

J.Haokip Dist. BJP President in a hrilfie

CCPUR: CCPur District BJP President J. Haokip chun zani 11:00AM khan BJP Office­cum­Residence of 17­New Lamka East DCC candidate Rawlend Daikhanmang @ Dr D.K. Mang chengnain, Hebron Veng, N. Lamka hmuna tuolsung chanchinbu reporter hai an hmupui a, June 2 & 3, 2015 nia thil tlung thuah hrilfiena a siem.

     

June 1, 2015 khan Independent candidate M. Gouzamang Guite volunteers han Rayburn Polling booth sunga indiklo taka vote thlak an tum chu BJP agent han an hnawl leiin June 2, 2015 zan 7:10Pm khan Mr Guite volunteer 3 Joy Tonsing s/o Upa T. Khamzadou (Govt. Teacher presently posting at Tangnuam JB School), Khoizamuan s/o Rev. T. Ngulkal (UDC presently posting at DC Office, CCpur) le driver Haukhaihthang han party agent personal a attack thawin BJP Office­cum­Residence of BJP candidate, Daikhanmang @ Dr. DK. Mang chengnain an hlukhum a, Insunga um S. Khupkhanmung, Jojon le Thuamzalian hai chu an nuhmei le nauhai hmaah an vau thu D.K. Mang in a hril thu a hril. Chun, June 3, 2015, 9:30PM khawm khan SI Ginneithang inrawi Police le candidate volunteer han BJP Office­cum­residence DK Mang chengnain an va hlukhum nawk a, DK Mang a sangnu Khanching le a sangpa hai an vuok a, Khanching chu hospital­a enkawl hiel a ni thu a hril. Hi thil tlung hi BJP CCPur District chun nasa takin thiemnaw an changtir a, hi thil thawnaa inrawl sawrkar thawktu SI Ginneithang, Joy Tonsing le Khoizamuan le an rawi hai dan ang taka hremna an hmu theina dingin BJP chun a tul angin Central chena hma a lak ding thu a hril.

Polling station 6­ah Re­scheduled election nei

CCPUR:  June 1, 2015 nia MDC election nei huna vote thlak thei lova a umna 4­ Chongkhojou DCC hnuoia Polling Stations 6 haia chun zanikhan buoina um lovin vote thlakna nei zo a nih. po 4/5 Nungsai PS ah votes 76.8%, 4/6­ Santing PS ah 84%; 4/7­ Santing Chongchin PS ah 84.94 %; 4/8­ Saichang PS ah 71.18%; 4/9­ Lailong (S) PS ah 93.13% le 4/12­ Kawnpi PS ah 77% votes a tla tawl. A pumpuiah votes 72% a tla phak niin ei thu dawngna chun a hril. Chun, June 6, 2015 khin CCPur District sunga Tuilumjang, Dailon, Taithu, Parbung (A), Parbung (B), Parbung (C), T. Boljang, Khengjang, Tollen, Bijang, Lhangjol le Leisen Polling stations haiah repoll a um ding niin ei thu dawngna chun a hril.

DTO in May thla sung Revenue 10,77,280 an hmu

CCPUR: District Transport Office, CCPur chun May, 2015 thla sung khan Revenue Rs. 10,77,280 an hmu a, April­May, 2015 inkar sunga Revenue an hmu chu  Rs. 18,44,845 a tling phak a, challan in Govt.­ah an peklut.

     

Chun May, 2015 thla sung khan DTO chun motor tum tu m 156 an registered a, chu hai lai chun Heavy goods vehicle 1; Jeep 4; car 12; auto 1 le bike 137 a thang. April­May, 2015 inkar sung khan Medium Passenger vehicle 1, Van 1, Heavy goods vehicle 3, Light goods vehicle 3, Jeep 5, Car 26, Auto 9, Bike/Activa 232 an registered.

World Environment Day an hmang ding

CCPUR: FNS­ICDP/CCPur area, DD­RPC NEI chun vawisun June 5, 2015, 6:30AM a inthawk hin Jolzam Community Hall­ah World Environment Day­ 2015 hmang an tih. Hi huna hin khuollienin Rev. Dr V. Lalnghakthang, Gen. Secretary, RPC NEI thang a ta, Functional President in Mr Joseph L. Infimate, Manager, ICDP­CCPur Area, DD­RPC NEI thang a tih.

    

Hi huna hin S. Muana, FC­FNS, ICDP/CCPur, DD­RPC NEI chun WED 2015 thupui “Seven Billion Dreams, One Planet, Consume with Care” ti thupui hmangin presentation peng a ta, khuollien le functional president han thuhrilna neiin Cider thing kak phunna hun hmang ni bawk a tih.

Fielna le inhriettirna siem

CCPUR: June 6, 2015 (Inrinni) 1:00PM­ 5:30PM inkar sung khin ICI Central Choir chun an rawngbawlnaa hmang ding Mini Bus Project a nei mek le inzawmin Banquet buotsai a tih. Tlawmngaia Coupon la ta le la lalo hai, ICI Central Choir rawngbawlna ditsaktu le thahnemngaipuituhai po po hi Banquet a thang dingin L. Hmingsang Joute, Chairman le Lalrosiem Thiek, Secretary, ICI Central Choir han hi Chanchinbu fethelng hin a tharin fielna le inhriettirna an siem.

A biel sunga MDC candidate hai bu a fakpui

CCPUR: Mr Vungzagin Valte, MLA/Thanlon chun zani zantieng 1:00PM khan Dorcas Veng, New Lamka­a a chengnainah a biel 56­Thanlon A/C sunga MDC candidate hai kokhawmin bu a fakpui. MDC dinga tling le tlinglo chu Pathien le mipui ditthlangna a ni a, MDC tling le tling lo ti um lova Thanlon A/C hnuoia mipui ta dinga sin thawtlang seng dingin candidate hai Vungzagin Valte chun a ngen.ADC biel dang ang lo takin tukum Thanlon biel mipuiin democracy dan taka vote an thlak nia hriet a nih tiin a hril.

DTF (Immunization) meeting a um ding

CCPUR: June 6, 2015, 10:30AM khin CMO Mini Conference Hall­ah District Task Force (Immunization) chun Mission Indradhanush, Round­3 meeting nei an tih. Hi huna hin CHC le PHC haia Medical Officer hai thang an tih. Meeting huna hin Mission Indradhanush Round­2 ennawnna, June 7­14, 2015 sunga Round­3 nei dan ding, Mission Indradhanush sinthaw dan nitina report pek thei dan ding le thupawimaw dang dang hriltlang an tih.

Imphal:Headline

Helpawl han Chandel District­ah Army­hai an lambun; Army 20 an thi a, 16 an hliem

IMPHAL: Zani zingkar dar 7:30 vel khan Imphal­a inthawka Km. 110 vela hla, Chandel District a Tengnoupal Police Station huop sunga um Moltuk khaw bulah Manipur phairam helpawl ni dinga ringhla han 6 Dogra Regiment hai chuongna motor 3 chu Automatic silai, Rocket Propelled Grenade (RPG) le IEDs hai hmangin an lo lambun a, Army 20 an thi a, Army dang 16 an hliem a, hliem hai laia 3 chu an hliem inrik hle niin Army thusuok chun a hril. Kum 1999 a Kargil War zo hnunga tumkhata Army kap hluma an um tamna tak la nia hril a nih.

    

Hliemhai hi Military Hospital, Leimakhong, Manipur le Divisional Headquarters Hospital, Jorhat, Assam le Guwahati hai panpui an nih. Helpawlhai hin Khukris khawm an hmang a, Army­hai chuongna motor­hai an raw a, an ralthuomhai khawm an lakpek ring a nih tiin ei thu dawngna chun a hril. Army­hai chuongna motor­hai lambunna hi Paralong le Charong Village inkar nia hril a nih.

    

Hi thil tlung an hriet le inruolin Union Defence Minister Manohar Parrikar chun Union Home Minister Rajnat Singh an hmupui nghal a, hmalak dan ding an hriltlang. Hi meeting a hin National Security Advisor Ajit Dovel le Army Chief General Dalbir Singh hai khawm an thang.

    

Central Security Agencies hai chun Army­hai lambunnaa hin helpawl group tum tum, a bikin NSCN(K) le UNLF thangruol anni an ring thu an hril. Inlambunna a thang helpawl hi a tlawm takah mi 50 vel bek anni an ring.

            

PM Narendra Modi chun, “vawisuna ei thil tuok hi lungril neilo hai thilthaw a ni a, a lungzingtlak khawpel. Ei ram ta dinga hringna chen inhlantu ei sipaihai hmaah kunin inzana kan hlan’ tiin a hril. Dawizep taka thil thawtuhai hi man le hrem ngei ning an tih tin Union Defence Minister Manohar Parrikar chun a hril.

Motor eksidenah student 3 an thi

IMPHAL: Zani 1:30PM vel khan Singjamei Super Market lamthe­ah Tata Truck MN 06T­0322 in Dio Scooter a baw a, Schooter a chuong DAV School, Sangakpam student 3, Class XII inchuklai Thangminlal Baite (16) s/o Solet Baite of Laloiphai Housing Complex; Class X inchuklai Md. Tarique Hassan (16) s/o Abdul Hassan of Lilong Litan Makhong le Scooter neitu le Class X inchuklai Ningthoujam Becky (16) s/o Hiramani of Khurai Thangjam Leikai hai na takin an hliem a, RIMS panpui an ni laiin lamlakah an thi.

Polling stations 72 ah Repoll

IMPHAL:June 6, 2015 khin Manipur­a ADCs 6 hai hnuoia Polling Stations 72 haiah inthlangthatna (repoll) um a tih tiin State Election Commission thusuok chun a hril. Repoll hi Senapati district­ah Polling stations 18, Sadar Hills ah Polling stations 18, Churachandpur District­ah Polling stations 11, Chandel District­ah polling stations 10, Tamenglong district­ah polling stations 9 le Ukhrul district­ah Polling stations 6 hai niin ei thu dawngna chun a hril.

Sharmila New Delhi a tlung

IMPHAL: Court kona anga Court hmaa inlang dingin “Iron Lady of Manipur” tia ko, Irom Chanu Sharmila chu zani 2PM khan New Delhi a tlung. Sharmila hi vawisun hin Metropolitan Court, New Delhi’s Patiala House Court hmaah inlang a tih. Kum 2006 a Jantar Mantar, New Delhi a bungheia nuorna a nei le inzawma Court hmaa inlang dinga ko a nih. Manipur Student’s Association, Delhi chun Sharmila hi an lo hmuok. New Delhi­a a cham sungin Ms Sharmila hin Union Minister of State for Home Affairs, Kiren Rijiju an hmupui el thei.

Others:

India le US han Defence framework Agreement

NEW DELHI: June 3, 2015 zantieng khan India le US han kum 10 sunga dingin Defence Framework Agreement New Delhi­ah an ziek. Hi Agreement a hin Union Defence Minister Manohar Parrikar le New Delhi a hung inzin US Defence Secretary Dr Ashton Carter han suoi an thaw niin official thusuok chun a hril. Dr Carter hin PM Modi an hmupui a, US companies han Defence Manufacturing Sector tiengpangah India thlawpin Make In India ah kut an hung rawl ngei a beisei thu Modi in a lo hril.

Christian School suksiet a nih

KOLKATA: June 3, 2015 khan Abadalapur, Madhyamgram, North 24­Parganas district, West Bengal a Believers Church Missionary School chu suksiet a nih. Classrooms 4, officials le educational equipments hai suksiet a ni bakah Almirah sunga thil um hai dengdar a nih tiin Police chun an hril. Hi thil tlung le inzawm hin Police han man an la nei nawh.

Goa­ ah Delhi nunghak 2 suollui

PANAJI: June 1, 2015 zan khan Arpora, North Goa hmuna Tourist taxi khaltu le Delhi nunghak pasal 5 han an thuoihmang a, nunghak 2 hai hi an suollui bakah Taxi driver Abhijit Kochrekar chu Rs. 10,000 an laklui pek. Goa Polie han hi thil tlung hi an suizui nghal a, mi suolluitu le mi rawktuhai, Ajay Kusbas (39) of Arpora, Jeevan Pawar (26) of Karwar, Nadeem Khan (28) of Rajasthan, Trebor Joseph (27) of Mumbai le Kamesh Chowdhury (21) of Hyderabad hai chu June 2, 2015 khan an man.

Ni 15 sung Maggi zawr lo dingin

NEW DELHI: Delhi sawrkar chun ni 15 sung Maggie Noodles zawr khapna thupek an suo. Siem thara um Maggi Noodles hrim hrim enfel (test) hmasa phawt ning a tih tiin Delhi Health Minister, Satyender Jain chun a hril. Hi khapna thupek hi Delhi sawrkar chun Nestle Company kuomah an hriettir nghal. Maggi Noodles a MSG pawl ding bak pawl a nih ti hi Uttar Pradesh a inthawka hrietsuok tan a nih. Hi Noodles hi Kolkata hmuna test thaw a nih.

Laboratory test thaw dingin

NEW DELHI: Nestle Company siem Maggi Noodles chun tulai hin ringhla a hlaw hle. Delhi, Bihar le Uttar Pradesh hai bakah Andhra Pradesh, Telangana le Puducherry states le UT sawrkar hai chun an ram huop sunga Maggi Noodles um hai chu Laboratory test dingin an thawn sup sup tawl. Maggi Noodles hi a tlangpuiin Central Food Technological Research Institute, Mysore a test dinga thawn an nih.

Kum 10 lungin intang dingin

PATNA: Bihar a Parihar A/C a BJP MLA Ram Naresh Yadav le MP hlui 2, Nawal Kishore Rai (JD­U) le Anwarul Haq (RJD) hai thangsain mi 14 hai chu zanikhan Fast Track Court, Sitamarhi chun kum 10 sung lungin intang dingin an chungthu a rel. Hieng mi 14 hai hi kum 1998 a Sitamarhi Collectorate hlukhumna le inzawma Police han mi 5 an kap hlumnaa mawphurtua intum an nih.

IAS Officer suspended

LUCKNOW: Senior IAS Officer, B.K. Singh chu a sina ringum lo le sin ngaithaa intumin UP Chief Minister Akhilesh Yadav chun a sina inthawk a suspended. Yamuna vadung­a dan phal lova Leingawi lakna thuah complaint um le inzawmin Mr Akhilesh Yadav chu zanikhan Fatehpur district­ah a van zin a, thil undan a va enfel bakah hi chungthua investigation thaw dingin district officials hai an hriettir. 

Passport tehlem leh Mizo nuhmei 2 man

KOLKATA: Haptakar hni liemta khan Passport tehlem hmanga Singapore inzin tum Mizo nuhmei pahni International Airport, Kolkata­ah man anni a, Barrakpore Jail­ah sielut an nih tiin ei thu dawngna chun a hril. Passport tehlem siemnaa hin Global Talents Agency, Aizawl inrawlna a neia hril a nih.

PM kuomah Special Category status

NEW DELHI: Zani hmasa khan NE biela Chief Ministers han Prime Minister, Narendra Modi kuomah Special Category status pek an nina chu la sunzawm pei ni raw seh tiin ngenna an siem. Hi huna hin NE biela states 8 a CMs han a hran sengin PM kuomah Special status Category state an nina chu la sunzawm pei ni raw seh tiin ngenna an lo siem ta bawk.

Khawlum leiin Telangana­ah Ar nuoi 50 an thi

HYDERABAD/VISAKHAPATNAM: Khawlum taluo leiin Telangana state a chun haptakar hni liemta sung khan Ar nuoi 50 chuong an thi tah. Pradeep Rao chun Ar 2,00,000 chuong ka vai a, ni khatah 30,000 dam an thi hlak tiin a hril. Hi lei hin Telangana le Andhra Pradesh ah Arsa man a kaisang pha.

ATM rawk, Rs.4.87 lakh lakhmang

BATALA: Zani zingkar inhmatak khan Punjab­a Batala district sunga Qilla Lal Singh Village­ah Punjab and Sindh Bank ATM chu rukru han an rawk a, ATM a inthawk Rs. 4.87 lakh an lak hmang. ATM an rawk hma hin a rawktu han ATM cabin sunga inbun CCTV camera pahni hai chu thil an kap khum (sprayed) niin Batala Police chun an hril. Hi thil tlung le inzawm hin Bank Manager Surinder Kumar chun camplaint a pek a, Case registered a nih.

Rimsi taka kum 5 lungin intang dingin

ITANAGAR: Bake Kepo, Rouwa village, Kurung Kumey district, Arunachal Pradesh chun  Naharlagun a sumdawngtu Pawan Kumar Jain chu Rs. 10 lakh a ngen leiin Chief Judicial Magistrate, Hirendra Kashyap chun zani hmasa khan rimsi taka kum 5 sung lungin intang ding le Rs. 10,000 chawi dingin thiemnaw an changtir.

Vajpayee Zoological Park indin tum

BALLARI: Karnataka­a Hampi Kannada University bul lai Kamlapur hmuna chun Rs. 34 crore sengin Prime Minister hlui Atal Behari Vajpayee hming chawiin Zoological Park indin tum a nih. Hi thilthawna ding hin Zoo Authority, Karnataka chun hma an lak mek a, state sawrkar chun ram hectares 142 a sanctioned ta bawk niin official thusuok chun a hril. Hi Park indin ding hi kum 2011­ a state BJP sawrkarin an lo remti ta a nih. Rs. 20 crores sanctioned a ni ta a, chu laia Rs. 9 crores hmang a ni tah. Hi park a hin Zoo um a ta park va sirtu khuolzinmihai en thei dingin Sakei, Savawm le Sakhi hai khawm sie ning an tih tiin official thusuok chun a hril.

FIFA ranking­ah India 141 na a nih

NEW DELHI: FIFA in world football ranking an suo thar taka chun India chu position 141­nain a thang. A hma chun world ranking 147­na a ni a, Asian countries ­a 22­na a nih. Asian countries­a FIFA ranking insang tak chu Iran niin a 41­na a ni a, a dawttu chu Japan le South Korea hai niin ranking 52­na le 58­na an nih. World Champion Germany chun top 1 a la hau pei a, Belgium chu No. 2 a kai a, World Cup runner­up Argentina chu 3­na a ni a, Five time world champion Brazil chu 5­na le le Colombia chu 4­na an nih. Netherlands (6), Portugal (7), Uruguay (8), France (9) le 2010 World Cup champions Spain chu a 10­na a nih.

Kolkata­Agartala via Dhaka Bus vailiem

KOLKATA: West Bengal Chief Minister Ms Mamata Banerjee chun zanikhan Kolkata­Agartala Bus service via Dhaka chu a vailiem. Hi thil hin India le Bangladesh ramhai inkara inlaichinna tha lem a hung intlun ngei a beisei thu Ms Mamata Banerjee chun a hril.

Netherlands PM a hung inzin ding

NEW DELHI: India rama ni 2 sung cham dingin Netherlands PM Mark Rutte chu vawisun hin New Delhi hungtlung a tih. Mark Rutte hi Minister 2 le sumdawngtulien thahnemtawk takin hung zui an tih. Rutte hung zuitu dinghai lai hin an Agriculture minister Sharon Dijksma le an Foreign Trade Minister, Lillianne Ploumen hai thangsang an tih.

---------------------------------------------------------------------------------------------------------

VAWISUN THUPUI

Thil siem ama mithmua inlang naw hrim hrim a um nawh. Ei chanchin ei intlunna ding mithmua chun iengkim saruok le inhawng sain a um lem a nih. ­ Hebrai 4:13

Editorial

Fak le dawn fimkhur ding

Khawlum chun re nekin zuol a pan pei a. Ei ni lai khawlum leia thina tuok hiel la um naw inlakhawm, India ram sung, a bik takin Andhra Pradesh, Telangana, Odisha le Jharkhand State haia chun khawlum hi a zuolkai bik a, boruok lum taluo tuorzo lovin Andhra Pradesh ah mi 1677, Telangana­ah mi 542, Odisha ah mi 25 le Jharkhand­ah mi 11 in thina an tuok ta thu hriet a nih. Khawlum taluo tuorzo lova mihriem thina tuok ei hriet thei chinah 2255 an tling ta a nih. Khawlum leia mi hieng zat zatin thina an tuok ta laia eini lai thina tuok em ei la um naw a, lawm a um takzet a, mihai neka ei vangnei le hamtha ei nih ti inla ei hril suol ring a u m nawh. Ei vangneizie hi hrie a, Pathien kuoma lawmthu hril rawp ding ei nih.

    

Khawlum leiin thina em tuok naw inlakhawm natna chi tum tum invawi theina a ni leiin mitin fak le dawnah ei fimkhur zuol nuom a um. Khawlum leiin tui dei, theitui dei, Icecream, barap le thil dang danghai ei dawn tamin ei fak rawn hle. Hieng ei thil fak le dawn hai hi mihriem hriselna tawkpawi thei anni am ti hi fimkhur taka ei en le suizui nuom a um. Fak thei le dawn thei siemna haia hin lo thei lovin tui hmang a ngai a, chuleiin fak thei le dawn ding thil siemtu han khawlai tui am an hmang hlak a ti indawn le suizui thiltha a ni ngei ring a um.

    

Fak thei le dawn thei ding zawrna hotel, restaurant le dawr haiah luta fak thei le dawn thei thilhai ei fak le dawn chang khawmin ei fimkhur nuom a um. Thil zawrtuhai chun an sum hmuna ding ani phawt chun a hlui deu ta le a thing ei tihai ang chi khawm hi zawr an pawiti ngai nawh. Chuleiin, inphalam der lova iengtika siem am an na? ti hi indawn ngei ngei ding a nih. Chu taka an lung a sen a ni chun inselpui chuong lova fe hmang san el hlak ding a nih. Hriselna hi ngaipawimaw hle ding a nih.

    

Tulai hin Manipur chau ni lovin India ram state tum tum haiah Magie noodle chungchangin hril a hlaw hle. Hi thil khawm hi ngaitha chi niin an lang nawh. Maggi hi Nestle Company siem, fak thei inhnik le mihai fak uor a nih ti chu ei hriet seng ring a um. Maggi noodles siemnaa hin mihriem hriselna tawkpawi thei, high lead Monosodium Glutamate (MSG) pawl ding neka tam pawl a nih ti hmu le hrietsuok a ni leiin sawrkar thlungpui le state tum tuma sawrkarhai chun hi thil hi an ngaimaw a, zawr lo ding le fak lo dingin thusuok an siem hiel a nih. Hieng a ni lei hin ngaitha el chi ninaw nih.

    

Imphal khawpui sunga ngei khawm Nestle Company siem ve ve, Maggie Noodles le bawngnenephit MAN PRO 3 (baby Milk Powder) le theitui (Frooti) haiah chun mihriem hriselna tawkpawi thei ding thil a um tia hril le hrietsuok a ni leiin ei state sawrkar chun hieng thil hai hi a ban (khap) a, tulai hin mankhawmna sin thaw mek a nih. Hi thil hi Imphal khawpui sunga chau ni lovin Manipur pumpui huopin ei State sawrkar hin thaw sienla nuom a um.

            

Thil ei inchawk hrim hrimin ieng huna siem am, ieng company siem am, expiry date ieng hun am a ni a tihai en ngei ngei a inchawk hlak le cash Memo lak ngei ngei hlak ding a nih. Hienganga ei thaw rawp chun dawrkaihai hi hung fimkhur pha veng ei ta; chu khela a fatu le a dawntu han natna an lo tuok pal khawmin a thlawnin ei tuor naw ding bakah case ei siem thei pha ding a nih. Ei ramah Myanmar a inthawka hung thil chi tum tum, a bik takin naupang fak thei a tam hle a. Hieng thil hai hi iengtika siem am, expiry date ieng chen am ti le ieng company siem am ti hrietlo, ei zawr nasain ei fak nasa hle a. Hi thil hin mihriem hriselna iengang in am a tawkpawi ding ti vawisun ni chen hin ei la hriet nawh. La fak pei dinga tha chu niin an lang nawh. Fimkhur thilah fak lo a tha ring a um.