Interview with Pu Hmingchunghnung

Virthli (VT) le Pu Hmingchunghnung (HCH) Chairman, Sinlung Hills Developemt Council (SHDC)

hohlimna.

VT: Pu Hmingchunghnung hohlimna hun le thil a tlawm a zawng indawna hun i mi pek thei ding am?

HCH: Nei thei e, kei khawm’n tha ka ti zawng tak a nih.

VT: Tuta Sinlung Hills Development Council hin kumkhat ah fund iengzat am a hmu phak ta a?

HCH: Singlung Hills Development Council in sum a hmu dan chu hieng ang hi a nih;

1.      2010-2011 ah Rs 250.00 lakhs.          

2.      2013-2014 ah Rs 300.00 lakhs.          

3.      2014-2015 ah Rs 320.00 lakhs anih.

VT: Chairman sin i chel a inthawkin Development work/project iengzat am i sukpuitling taa?

HCH: Chairman sin ka chel a inthawk a development sin kan thaw chu a tam ve ta tho a, hang hril el seng an nawh, a langsar deu deu chu tuta kumthum liem ta sung khan sin dang dang zahni (200) choung kan thaw ta a . Ser (Velencia) 100 peia sem in Rs. 200 kan pek a, Rubber 150 pei a sem in In 100 kan pek bawk a, Rangva bundle 4 pei a semin In 410 kan pek a, chu hnunga chun a tul zuol In 20 vel hai kuomah kan pek bawk a, a sum ngirhmun en chun an thaw tha ve tho ah ka ngai.

VT: Biel hi te i kan hlak am? Chairman i chel a inthawkin vawi iengzat am i kan suok taa?

HCH: Biel hi Chairman ka chel hin ka fang hranpa ngai nawh, a tul bikna hmuna hai ka fe el hlak a nih. Election huna ruok chun ka sir suok phur hlak, a san chu biel bik neiin Council Member an um a, chuonghai chun an biel sung an ngaiven hlak lem a nih.

VT: SHDC hin Sinlung Hills a hin iengang takin am hma inlak a ti hi i mi hril thei ding?

HCH: SHDC hi ei neisun ani leiin, mipui harsa haiin an harsatna tamtak an inthlunna a ni a, mithi , damnaw, sikul kaina tienga harsatna tuok hai le insung thila harsatna touk hai chenin thei ang angin SHDC hin a sawmdawl ve hlak a, hril el seng lo khawpin kan thaw ve tho a nih. Hieng hai bak a hin SHDC sukpuitlingna dinga hin theitawpa hma lak a ni a, SHDC Business and Conduct Rules, Election Rules 2008 siem a ni ta a, chu Rules sirsan chun tuhin SHDC Members Constituency delimitation siemfel a ni ta bawk a , tuhin Electoral Roll siem fel a, election nei el thei ngirhmun-ah a ngir ta a nih.

VT: Ei Development Council hi ADC puitling Sixth Schedule hnuoia ngei hlangkai ani theina dingin hma lak i tum am? Or Hi chen a hin i lung a awi tawk am?

HCH: SHDC (Singlung Hills Development Council) hi SHADC (Singlung Hills Autonomous District Council) ah poung ni ta raw se tiin Mizoram Governor Pu. A. Palemanaban a kuoma khan kum 2000, 2001 lai khan ziekin ka pek a. Chu dungzui chun SHDC chungchang official observation a hung demand a, kha hunlaia SHDC Secretary Pu Lalkhumliana khan official chun Governor chun, SHDC area chu Sixth Schedule a Tribal area a sielut dingin instruction a pek a. Nisienlakhawm chu File chu bawzui hlei thei lovin a hlamzui ta a nih. Hi chena khawm hin ka lungril le ka dit dan chu hmu thei a niin ka hriet.

VT: SHADC hi a pieng taktak i ring am? A pieng theina dingin iengtin am hma la inla i nuomdam?

HCH:  SHADC hi mipui ei inthuruol huna ei hmu ding a nih. SHDC election hi nei phawt inla, chu huna chun mipui inthuruolna thatak nei inla, ei nuom thu a MLA pathum thlangtling el thei ngirhmun ah ei ngir pha chun, ruling party haiin an mi hmangai lei nilovin, an sorkar zui theina ding beiseina leiin, SHADC ah an puong el ding a nih.

VT: Iengleia SHDC office hi Aizawl a inthut lem am ana? Fe le hung, thilthaw awlsam lei ding chu a ni ka ringa, sienkhawm Aizawl a inthut hin iem hmasawnna a mi pek belsa a? A hmun ngeia um chil ding a ni lem naw maw?

HCH: SHDC hi Aizawl a inthut lem hin a sawrtu pawl tamtak an um a, Aizawl a SHDC Office hi Cell Office a ni a. Sakawrdai a SHDC Office hi Main Office a nih. Tuhin Sakawrdai a hin Office building ei la nei naw a, sawrkar a project siemin nawr mek ani a, Building a um phat chuh Sakawrdai Office hi suk changtlung lem ding a nih. Chubakah Sakawrdai hi Headquarters Office nisienlakhawm, Bank, Treasury Office Computer Network le thil tul hai a um phawt hma chun del chil ringawtin umzie ala nei thei naw leiin, Main Office nekin Cell Office ei la hmang tangkai tina chau a nih. Chun, Main Office Sakawrdai a um hi a changtlung hun a khawm Aizawl Cell Office hi chu ei mamaw zing tho ding a nih. ADC hai khawmin Liaison Office Aizawl ah an nei seng a nih.

VT: Nikum August ni 3, 2014 ni a Mizoram Home Minister R. Lalzirliana in Press Interview a neina a SHDC chungchanga Hnam inpumkhatna suksie thei le chibing inlakhran tumna anga a hril kha Mizoram sawrkar ngaidan ve le a thu fepui dan mek ani i ring am?             

HCH: SHDC hi Mizo hnam inpumkhatna suksie ding anga ngaitu chun an hriet naw tawp a nih. Choungang ngaidan a um chun, a hrilfie chu ei sin ding ah ka ngai. Sinlung hi Hmar biel am a nih an ti a ni chun Houpzo hming ani zie hi ei inhmutir ding ana, mimal ngaidan le sorkar ngaidan ah ka lo buoi ve ngai naw a, ka hril thei bawk nawh.

VT: Nikum lai bawka Home Minister in SHDC Chairman ta ding Quarter pek tum ani naw thu a hril kha te? Tuhin Quarter pek i ni ta am?

HCH:  Khuo le veng le In ka nei thu a hril kha, ka In ah ka um a, Quarter ka mamaw ka hril nawh.

VT: “Aw kan Hmarram' ti lekhabu kha ka lo tiem ve a, a ropui in lungril a tawk hle in ka hriet a. Kha lekhabu a thu bangkhai tamtak hmalakna ding um hai kha vawisun chen hin a la puitling zo naw zing el hi ei inhnik tawk ta naw lei a ni ding am?

HCH:  Aw kan Hmarram a ei hmabak lampui kha mipui hraw ding a ni a, ei hraw theina dingin SHDC a hin hma ei lak mek a nih. SHDC elected a ni hnunga mipui le thuoituhai hraw ding lampui hai kha ei bieching a tul hrim a nih. Ka damsung ngei a, hraw tluonsuok hi ka duthusam a nih.

VT: Ram suol na dingin people's movement hi a pawimaw i ti ve am? Ei movement hi people's movement a ni theinaw nasan hi ienglei am, a mihriem hai lei or hnam sipai hai lei?

HCH:  Ram suol suokna ding chun democracy ram ani ang hin People’s Movement a ngai a nih, ei hril ta ang khan election a umzie ei nei a ngai. People’s Movement ei nei theinaw nasan chu tamtak um a tih, hun in hung hril lem raw se.

VT: Sawrkar a ei nuor chang hin eini ang tho NGO hin an mi bei let ve pei hi ienglei am ni tak ata?

HCH:  NGO in an mi bei hi chu Sinlung takin thil ei thawzie an la hmu fie naw a , Hmar bing takin ei thaw an sawn lei ni takin ka hriet.

VT: Sinlung Hills Development Council term kha Mizoram Governor in iengleia kum 2 sung a dingin a hung pawtsei thut el am ana? Tukum 31st May 2015 hi kum 2 pawtseia um kha a bo nawk na hun ding ni awm in ka hrieta, term bo zo a hin Sawrkar'n a hung pawtsei nawk i ring am annawleh thataka election neia inthlang?

HCH:  Hel boruok um zing hin inthlang puong an noum naw niin ka ring a, hel borouk i zirin inthlang chu puong el thei zing ani bawk a, hun in la hril pei a tih. Inthlang chu ei inthlang tho tho ding ana, a hun chu hril ala harsa deu a ni hi.

VT: Hmar Martyr’s Day hung intan dan tak hi i mi hril thei ding?

HCH:  May 16, 1989 kha hnam ta dinga HPC Volunteer hai thini hmasatak a ni a. Kha ni khan Moinarkha, Cachar, Assam ah M.A.P. le HPC Volunteer (HVC) inkap tuoin, Puhai Lalhuoplien le Lienhmingthang in hnam tadingin hringna an chan na ni a ni a. Hi ni sirsan hin 1990 a inthawk khan Hmar Pasaltha Ni tiin (Hmar Martyr’s Day) ei lo hmang tan ta a nih.     

VT: SHDC hmalakna/inrawina hnuoia Martyr's Day hi phuisui taka inser dan dinga hmalakna in nei am?

HCH: SHDC hnouia khuo umhai hin Hmar Martyrs’ Day hi phusui taka an hmang hlak theina dingin SHDC Fund a hin Important Days’ Fund siem a ni a, chutaka inthawk chun khawtin hai thangpuina pek hlak a nih, chubaka chun Hmar Pasaltha Trophy hi SHDC in mawphurna lain tuta hma neka puisui lema insuo a ni hlak a, tukum hin sawrkar a inthawk fund a la um naw leiin khawtin mani intum chawpa hmang dinga ngen / inhriettir a ni a. Hmar Pasaltha Trophy khawm la chawl hri phawt dinga ti a nih. Sum um huna a hma neka phuisuia hmang pei tum a nih.

VT: Hmar Martyr’s Day Flag chungchang a hin hmalakna le ngaidan iengang am in lo nei ta hlak a?

HCH: Hmalakna le ngaidan kan la nei hran nawh, ursun lema hmang dinga flag nei chu thang a tih.

VT: HPC hi Election Commission of India hrietpui Political Party a ni si a. Iengleia Mizoram a ei biel sung ngei ngei a MLA Election hai ah HPC Party hmingin in Candidate ei um ngai naw am a na? VC a hin Seat khawm ei inchu bek naw niin an lang a ienglei am a ni a?

HCH:  HPC hi registered Party a ni a, Recognised Party ala ni nawh. Election tling naw chu party sung hratnaw lei le inthuruolnaw lei a ni a, ei hratnaw leia candidate nei ngam ngai lo ei nih.

VT: Sinlung Hills mipuihai incha nuom dam i nei am?

HCH:  Mipui kuomah kan cha nuom tak chu, Ei politics hmathlir hai biechieng ding le a hlawtling theina dinga inthuruolna nei tum nachang hre dingin kan cha nuoma. A tawp tak a chun, Pathien thanglovin iengkhawm ei thawthei naw zie hi hmu chieng a, Pathien malsawm tlak lungril tak tak  put senga hma mi la pui dingin ka fiel nuom bawk a nih.

VT: Lawm a um takzet i hun intep tak kara hohlimna hun imi siem pek leiin.

HCH: Kei khawm ka lawm takzet a nih, hiengang hohlimna Virthli’n in hung buotsai hih, Virthli damzing raw se!