Tuolsung:
Mi 85 in Nomination Paper an lak
CCPur: June 1, 2015 nia Manipura Autonomous District Councils 6 haia Member of District Council (MDC) Election, 2015 hung um ding le inzawma Election Commission in Election Notification an suo angin Nomination Paper semdawk mek a nih.
Churachandpur Districta ADC constituency tum tum haia ngir tum mi 85 in zanikhan Nomination paper an lak. SDO/ Singngat in 11/Lungthul MDC biela dingin Nomination paper 2; 23/Muallum biela dingin Nomination paper 9 le Singngat biela dingin 5 a sem bawk.
SDO/Tipaimukh chun 6/Parbung biela dingin nomination paper 3; 7/Vangai biela dingin nomination paper 3 le 8/Senvawn biela dingin nomination paper 3 a semdawk.
SDO/Henglep chun 3/Henglep biela dingin nomination paper 1 le 4/Chongkhojou biela dingin nomination paper 4 a semdawk.
SDO/Thanlon chun 10/Tuivai biela dingin nomination 1, 9/Ngajam biela dingin nomination paper 6 le 5/Thanlon biela dingin nomination paper 6 a semdawk.
SDO/CCPur chun, 1/Khousabung MDC biela dingin Nomination paper 1; 12Lanva a dingin 5; 14/Tuibuong bielah ding 2; 15/Hiangtam Lamka a ding 5; 16/ New Lamka West a ding 4; 17/New Lamka East a ding 4; 18/Zenhang Lamka a dingin 8; 19/Saikawt biela dingin 2; 20/Sagang ah 2; 21/Sangaikot biela ding 2; 22/Haopi Range a dingin Nomination paper 7 a semdawk.
CCPur VDF le nu le pa meeting
CCPur: CCPur VDF Guardian Association chun May 3, 2015, 1:00PM hin Tuibuong Community Hallah meeting an ko a, hi huna hin CCPur districta VDF personnel 600 le nu le pa hai chu thang seng dingin Convenor Jamkholun Haokip chun inhriettirna a siem.
Hieng laizing hin April 30, 2015 nia Imphal East District sunga Muna Thumbuthong hmuna Police constable pakhatin Tata Magic Driver a vuokna thuah VDF hai intuma an umna chu VDF Central Committee chun a dem thu N. Rameshor Singh, Publicity Secy., AMVDFWA in zanikhan condemnation an suo.
Ei system ei thlakthleng a pawimaw: Health Minister
CCPur: SSPP Jt. Hqrts, Hiangtam Lamka in Hiangtam Lamkaa YPA GHQ Halla “Siamsin Conference –cumprize distribution, 2015” zania an nei huna zanikhan Health Minister Phungzathang Tonsing khuolienin a thang a, chief host in Kamsuanlun, EM; functional in Langkhanpau Guite, Chairman, ADCC; Guest of honour in M. Zouzamang, EM le Lal Hossan, EM hai an thang.
Health Minister chun, tu hma le tulai thil a danglam ta leiin students han lekha tha taka an inchuk a, an tiem theina dingin Kohran, Hnam thuoitu le Philanthropic Organisation thuoitu han ei system ei thlakthleng met a pawimaw ta thu a hril a. Student hai social thila hun an hmang rawn taluo lova lekha tiemnaa hun tamlem an nei dan ding ngaituo a pawimaw. Ei culture humhal chu ei mawphurna a ni a, lam khawm modified metin en a suk inhawi hlak tiin a hril.
ADC Chairman chun, student hai hi social activities tum tuma an thang ding hrim a nih, sienkhawm a pawimaw tak lekha tiem an theinghil ding a ni nawh tia hrilin hun hmangdik a pawimaw thu a hril bawk.
Training of Women on Nutrition & Healthy food
CCPur: Women Missionary Society (WMS), Rengkai, CCPur, Manipur chun May 3, 2015 (Pathienni), 12:30PM hin Rengkai RPC Biekinah “Training of Women on Nutrition and Healthy Food practices & Gender Issue related to women food Security” buotsai an tih. Hi huna hin Resource person in Nk. Priscilla Songate, B.Sc. Nursing, Guwahati; Mrs Lalthiengzo, Asst. HM, Govt. H/S, Rengkai; Mr S. Muana, FC, FNS & NABARD/ICDP hai thang an ta, thupui tum tum hmangin thu hril an tih.
Free Medical camp nei
CCPur: Zani 10AM khan YPA Hall, N. Lamka hmuna 7Assam Rifles, Mrs Elwin Tombing Swante le Hebron Veng VA thangruol han One Day Free Medical Camp an huoihawt a, Col. Aditya Verma, CO 7AR chun Medical Camp hi a hawng. Hi huna hin Rev. Khen P Tombing, Chief CoOrdinator PCI(R) chun 16New Lamka East a MDC ngir tum Mrs Elwin TombingSwante ta dinga tawngtaipekna a nei.
Medical camp a hin 7AR a inthawk doctor 2 thangin Doctors 9 han damnaw mi 300 vel enin damdawi a thlawnin an sem bawk.
Suol thuphachawi tawngtaina
CCPur: Khawtlang, ram le hnam ta dinga suol thupha chawia Lalpa ke bula tawngtaina programme siem nawk a nih. May 3, 2015, 12:30PM in Muolvaiphei Youth Club Hall; May 4, 2015, 7:30PM in Saikawt Field; May 7, 2015 in Khawpuibung le Varparkawn Community Hall; May 10, 2015, 12:30PM in Thenmuol; May 10, 2015, 2:30PM in Ngurte Community Hall le May 11, 2015, 7:30PM in Muolbem. Hieng hun haia hin inhnikna nei taphawt thang dingin Ms May Rose chun fielna a siem.
Puitlingna film zawrna hai
CCPur: Puitlingna ti Film chu Ronald Store, Elares Zote Neitham le Jeny Dawr, Rengkai; Sumrolal dawr, Saikawt le Mariah Darngawn Hmar, Saikawt; Hminga Pharmacy, Muolvaiphei; Carolyn, Ngurte; Sielmat Stationary; Samuel Ralte, Imphal; Cindy Lalhrietpui, Khawmawi; ICI K|P, Bethel le Diamond Tusing/ICI KTP, Lamka hmun haiah inchawk thei a nih.
Awareness on Scholarship
CCPur: Zani 11:00AM khan District Administration, CCPur huoihawtnain Synod Hall, IB Road, CCPurah AwarenesscumInteraction prog. Of Manipur Scholarship nei a nih. S. Khaikhopau Ngaihte, MCS, BO/HQ chun, The Foundation Trust in Manipura inthawk naupang 6 kuoma Scholarship an pek ding hai lai CCPur Districta inthawk mi 2 an thang ngei a beisei thu, hi Trust hnuoia Scholarship hi Class 6 inchuklai, kum 12 mi, nu le pa annual income Rs. 1.8 lakh (Rs 15,000 per month) neka tam lo han an apply thei ding thu, Application ZEO/CCPur Officea hmu thei a ni thu le May 31, 2015 chena ZEO Officea peklut nawk ding a ni thu, students han essay 2025 words ziek an ta, Mumbaia expert han an en hnungah a hmu ding thlangsuok a ni ding thu S. Khaikhopau Ngaihte chun a hril.
Headline:
NE CM han Special Category state la sunzawm pei dingin PM an ngen ding: Gaikhangam
Imphal: Zanikhan Manipur Pradesh Mahila Congress in Congress Bhavan, Imphalah inkhawmpui an nei a, hi huna hin Manipur Deputy CM le Home Minister ni bawk Gaikhangam khuollienin a thang. Hi inkhawmpui hi All India Mahila Congress President Shoba Ojha, Manipur Social Welfare Minister A.K. Mirabhai le MLA thenkhatin an uop ve.
Hi huna Gaikhangam in thu a hrilnaa chun, India hmarsak biela states 8 hai Special Category State a sie an nina chu Centrea NDA sawrkarin a hung suktawp ta leiin fak le dawn, sum le pai thil haiah harsatna nasa tak ei tuok ding a ni leiin India hmarsak biela Chief Minister han hi thu hi an ngaimaw tawl hle a. Hi lei hin NE CMhai chu May 7, 2015 khin New Delhiah fein Prime Minister Narendra Modi zun hmupui an ta, NE biela states 8 hai chu Special Category Statea la sie sunzawm pei dingin ngenna an zu siem ding a nih tiin a hril. Gaikhangam chun NDA sawrkar chu nasa taka demin, NE biela harsatna intluntu ding an nih tiin a hril. Special category Statea sie ei nina a hung suktawp el chau ni lovin NLCPR, Special Plan Assistance le hamthatna ei dawng thil dang dang hai chu NDA sawrkarin a hung sukbo vawng a nih. Hieng a ni lei hin BJP inrawinaa Centrea NDA sawrkar chun NE biel hmangai ti thei an ni nawh tiin Gaikhangam chun a hril.
Shoba Ojha khawmin hi huna hin thuhrilna a nei a, Parliament Session nawkah Women’s Reservation bill putlut le pasi a ni theina dingin All India Mahila Congress chun theitawp suoin hma lang a tih tiin a hril.
Smart Cities dinghai lei Bishnupur le Chandel
Imphal: Zanita Union Cabinet meeting chun India rama 100 Smart Cities indin dinga a tina hmun hai a sukfel tah. Smart City project hai lai hin Manipura Bishnupur le Chandel hai khawm a thangsa. Sawrkar thlungpui chun hi project thawnaa ding hin Rs. 6,000 crore hmang dingin riruong a siem. PM Modi hmalaknaa hi project hi thaw ding a nih.
Manipur Governor Moreh ah an zin
Imphal: Manipur Governor Dr K.K. Paul chu zanikhan Moreh ah a van zin a, Integrated Check Post (ICP), Trade Centre le Border Fencing hai a en zovin Trade Centre, Moreh ah minutes 10 vel Moreh town a hnam le pawl tum tuma thuoituhai an hmupui. ICP, Moreh chu Sept. 16, 2015 a hawng ni dingin Dr K.K. Paul chun a hril. Governor hi Chandel DC Robert Singh Kshtrimayum, Governor secretary le DC Chandel hlui Th. Chittarnjan, Assam Rifles le official dang dang han an zui.
NSCN(K) cadres 4 kap hlum
Imphal: May 1, 2015 zing dar 7:30 vel khan Tamenglong district, Nungba Police station huop sunga Kamning Chingah 9 Dogra Regiment le 27 Assam Rifles thangruol hai le NSCN(K) pawl an inkaptuo a, NSCN(K) cadres 4 kap hlum an nih. Kap hluma um hai chu Capt. Hiutingo of Mandiu, Tousem SubDivision; Capt. Gaileng of Bamgaijang village, Tamenglong Dist.; SS Corporal ve ve Tichulong s/o Sangamlung of Bamgaijang, Tamenglong le Chunthullung, s/o Dikimlakpou of Thiulon Village, Tousem SubDivision hai an nih. Kap hluma um haia inthawk AK47 Rifle 2, 9mm Pistol 1 le a mu iemanizat man a nih tiin Police thusuok chun a hril. Mithiruonghai hi zanikhan JNIMS Morguea postmortem thaw zo an ni hnungin an sunghai kuoma pek an ni tah.
ImphalUkhrul Roadah Bandh
Imphal: April 30, 2015 nia Gwaltabi village, Imphal East District a In 30 suksiet le a sunga thil um hai lak hmang a nina le inzawmin Gwaltabi khaw mipui han ImphalUkhrul Road ah bandh an thaw leiin nundan pangngai a sukbuoi pha hle. Bandh thawhai chun In suksetuhai hi man dingin an ngen a nih.
Khatkhati a inthawk Oil Tankers 378
Imphal: Oil Tankers 378 in zanikhan Khatkhati, Assam suoksanin Imphal an hung pan a, Imphal an hungtlung pha leh thautui harsatna a hung nep deu beisei a nih tiin ei thu dawngna chun a hril. Imphal khawpuia khawm thautui a la harsa zing a, mi tamlemin black in an inchawk niin ei thu dawngna chun a hril.
Imphalah khawm nomination file thei
Imphal: Jun 1, 2015 a ADCs 6 haia inthlangna hung um ding le inzawmin Imphal hmuna khawm nomination paper file thei dingin remruotna siem a ni a, nomination paper filena kawnga harsatna neihai chun nomination file thei an tih tiin Th. Chitra Devi, Secretary, State Election Commission chun a hril.
Death Certificate pek naw leiin
Imphal: Zani zingkar khan Death Certificate pek theinaw leiin Advance Hospital, Palace Compoundah thina tuok tiengpang lungsen han buoina an siem a, Hospital hmangruo iemanizat an suksiet. Khaidem Ongbi Sanayaima (65) w/o Ibomcha of Kongpal Khaidem Leikai a thi a, an khuo tieng a ruong phur an nuom nghal leiin death certificate an ngen a, a petu ding Doctor an um nawh an ti leia thina tuok tiengpang lungsena buoina hi an siem niin ei thu dawngna chun a hril.
Nepal thangpuina dingin Rs. 60,000
Imphal: Regional Institute of Medical Sciences (RIMS), Imphal chun Nepal rama simkhawlei inhning leia harsatna tuortuhai thangpuina dingin Prime Minister’s R National Relief Fundah Rs. 60,000 an thawlawm ve.
AMWJU President dingin Shamjay bawk
Imphal: May 1, 2015 khan AMWJU President thar ding thlangna nei a ni a, President ni laizing Wangkhemcha Shamjai, Chief Editor, Kangleipakki Meira bawk thlangtling nawk a nih.Votes 134 a hmu a, an khingpui Ratneswori Goswami of Huiyen Lanpao in votes 69 a hmu. Standing Committee members 6 thlang an ni bawk.
Gwaltabi le Thawai ah Cr.PC 144
Imphal: District Magistrate, Imphal East chun Gwaltabi area sungah Cr.PC 144 a puong. Hi lai hmuna hin Gwaltabi le Thawai khawmihai an insukbuoi a, buoina suok nawk ding vengnaa Cr.P.C. 144 hi puong a nih. Order hi thuthar um nawk hmakhata ding ning a tih tiin District Magistrate thusuok chun a hril.
Regular RIMS Director ruot dingin
Imphal: Inner Lok Sabha MP Dr Th. Meinya chun, April 29, 2015 khan regular RIMS Dirctor ruot dingin Lok Sabha ah ngenna a siem bakah Kum 201515 a dinga Ministry of Health & Family Welfare a dinga Demands for Grants Rs. 33,152 crore siea um chu a tlawm taluo tiin a sawisel.
CAU VC in CM an hmupui
Imphal: May 1, 2015 khan Dr Moirangthem Premjit, Central Agricultural University (CAU) Vice Chancellor thar in CM O.Ibobi Singh an hmupui. Dr Premjit hi CAU VC palina le NE biel mi hi sin chel a pakhatna a la nih. Dr. Pramjit hi Moirang Phairembam Leikai, Moirang, Bishnupur district mi a nih.
Japan scholarship hni thei
Imphal: Japanese Universities (Under Graduate level) a Academic Session, 2016 a Japanese Scholarship hni nuom hai ta dingin hni thei a nih. Hi Scholarship hi College of Technology le Specialised Training Colleges a kai han apply thei an tih tiin Japanese Information Centre, Manipur thusuok chun a hril. Thu chieng lem http://www.inemb.japan.go.jp/education/education Guides.html. ah hmu thei ning a tih.
Manipur team in hrat tak nina
Imphal: T. Ao Memorial Football Tournament, 2015 final chu zani hmasa khan Nehru Stadium, Guwahatiah Manipur le Assam han an inkhel a, Manipur in Assam chu 43 a hnein hrat tak nina an chang. Manipur team in hrattak nina vawi 3 an lakna a ni tah.
Others:
Order of the Rising Sun Award
NEw Delhi: India rama civilian award insang tak Bharat Ratna award dawng tah Scientist hmingthang CNR Rao chu Japan Emperor in “The Order of The Rising Sun Award” an hlan. Hi Award hi Japan rama Civilian Award laia an sang tak a nih. Science tieng le IndoJapan Science Cooperation thil haia a sin thaw that leia hi Award hi inhlan a nih. Rao hin Research papers 1600 chuong le lekhabu 50 vel a ziek ta a nih.
NE Road project dingin Rs. 15,000 crore
Shillong: India hmarsak biela road project a dingin hungtlung ding Deember, 2015 khin sawrkar thlungpuiin Rs. 15,000 crore hung pesuok a tih tiin Union Transport Minister Nitin Gadkari chun zani hmasa khan Shillong hmuna a hril. Rs. 6,000 crore seng in Arunachal Pradesh ah road project thaw ning a ta, Nagaland le Meghalaya haiah Rs. 2,000 crore hmang le a dang po chu NE biela state dang dang haia hmang ning a tih tiin Gadkari chun a hril.
BRO sinthawah Defence minister a lawm nawh
TEzpur: India hmarsak biel sunga Border Roads Organisation (BRO) in lamlien an siemna kawnga an sinthaw hi duthu a sam naw hle tiin Union Defence Minister Manohar Parrikar chun a hril. Tuta inthawk chu kei ngeiin BRO sinthawna hi hung enfel pei tang ka tih tiin BRO sin lo thaw dan haia a lawm naw thu Manohar Parrikar chun a hril. Parrikar hi Union MoS for Home, Kiren Rijiju le May 1, 2015 a Tejpur, Assam a inzin an nih.
DIG, CISF thar dingin Surender Singh
NEw Delhi: Senior IPS Officer, Surender Singh chu Director General (DG), Central Industrial Security Force (CISF) thar dinga ruot a ni a. May 1, 2015 khan a sin thar hi a lo chel tan tah. Mr Surender Singh hi 1980 batch IPS Officer, West Bengal Cadre a nih. Hi sin a chel hmain Special Director, Intelligence Bureau (IB) a chel a nih.
PM in Meeting a neipui
New Delhi: Zanikhan PM Narendra Modi chun New Delhiah Road Transport, Shipping, Railways, Civil Aviation, Power, New & Renewable Energy ministries hai thangsain Infrastructure ministres hai meeting a neipui. Hi meeting a hin Union Finance Minister, Arun Jaitley, Road transport, Highways & Shipping minister Nitin Gadkari, Railway minsiter Suresh Prabhu le Coal, New & Renewable minister Piyush Goyal hai an thang.
Petrol le Diesel man a kaisang
New Delhi: April 30, 2015 khan Indian Oil Corporation (IOC) chun petrol le diesel man an kaisangtir. Petrol litre 1 ah Rs. 3.96 le diesel Rs. 2.37 in an kaisangtir. Khawvel pumpui huopa thautui man a kaisang le a tla hnuoi dan izira thautui man hi suksang le sukhnuoi hlak niin IOC thusuok chun a hril.
Sonia Gandhi in zanbu a fakpui ding
New Delhi: Parliament Budget session neia um mek zo hma deu, May 6, 2015 zan khin AICC President Sonia Gandhi chun Congress MPs le Party office bearers hai zanbu fakpui a tum. AICC President a nina angin Sonia Gandhi chun Budget Session le Winter Session zo zatin kum tin vawihni bek an party MPhai zanbu a fakpui hlak a nih. Hi huna hin zalen takin Sonia Gandhi, Rahul Gandhi le Congress MPs han titina an nei ding nia hril a nih.
Helpawlhai a hrana sie dingin
NEw Delhi: Helpawl mana um le lungina khum hai chu lungina intang midang hai leh siekhawm lova pindan hrana sie ta dingin Union Home Ministry chun states le Union Territories tina sawrkar hai an hriettir. Helpawlhai hin Case chite te leia lungin intang naran hai lungril le ngaituona an her danglam a, hel nuomna lungril an put nuom nia Central Security Agencies han report an pek leia hi thusuok hi Union Home Ministry in a siem nia hril a nih.
Samak thattu mi 9 an man
Biswanath Chariali: Zani hmasa zingkar khan Assam Police han Samak thatnaa thang mi 9 zet, Abdul Rashid, Abdul Kulam, Hanif Ali, Bulbul Hussein, Dilip Buragohain, Gautam Dutta, Kamto Tao, Charu Kora le Charu Topio hai chu Samak ki pakhat, Scorpio pakhat le Bike pakhat leh an man. Gautam Dutta hi Inspector, Arunachal Police (SB) sin thaw lai a nih.
Simkhawlei inhninga thi 6,600; April 25 a inthawk vawi 121 an hning tah
Kathmandu: Nepal rama simkhawlei inhning leia mihriem thina tuok chu 6,600 le hliem 14,000 an tling ta nia hril a nih. NDRF le NGO tum tum han sansuokna, sawmdawlna le mithiruong zawngna sin an la thaw zing. Kathmandu khawpuia chun power supplies le Communication network hai chu a hma ang deuthawa siemthat le pek nawk an ni tah.
April 25, 2015 a inthawk khan Nepala chun Simkhawlei vawi 121 zet an hning ta niin Lok Bijay Adhikari, Chief of National Seismological Centre, Kathmandu chun a hril. Chun, zani zingkar dar 3:55 le 5:55 khan simkhawlei vawihni an hning nawk a, a hmasa lem hi 4.2 richter sale a hrat le a vawihnina hi 4.3 richter scale a hrat niin NSC, Nepal chun a hril.
---------------------------------------------------------------------------------------------------------------------
VAWISUN THUPUI
Chuleiin, in lungril ser chu tan naw unla, kawmaw ta nawr ro. Lalpa in Pathien chu pathienhai Pathien, hotuhai Hotu, Pathien ropuitak, hrattak, tiumtak el, tukhawm ditsak bik nei lo, thamna khawm la ngai lo a ni sih a. Deuteronomy 10:1617
Editorial:
Blacka zawr le inchawk
Sawrkar thil khap le inruk sa, a ruka rala zawr annawleh sumdawngna hai hi thil indiklo le suol a nih ti ei hriet seng. Amiruokchu, tulai khawvela inlar em em el, suol ni lo ang ela ei thaw le ei fepui zing chu thil khap zawrna (black marketing) hi a nih. Sumdawngna ding khawma a hlawk tak a ni leiin thil khap zawrna hi do le sukrem tumna tak tak a um naw niin an lang. Tulai hin Manipurah thautui, a bikin petrol le diesel a vangin a harsa em em el. Nisienlakhawm, black marketa chun dit le nuom zat zat inchawk theiin a umzing el a nih. Sawrkar khawma a dang hne naw niin an lang. A zawrna hmun, Oil Pump haiah inchawk ding a um si naw leiin petrol tak lem hi chu inlirthei neitu tam lemin blacka zawr hi ei inchawk a ni deu tak awm ie.
Kristien tha le piengthar ka nih ti thei lovin petrol chu blackin ei inchawk sup sup el a ni hi! Kristien tha le piengthar ka nih ti inla, black marketa mi inchaw naw inla hlak ei motorhai hmang thei lovin ei um el ding a ni si leiin, blacka petrol zawr chu hnar ngam lo le do ngam lovin ei inchawk pei el chu a nih. Ei ram hi black market in a mi thunun pei ta ding niin an lang. Blacka thautui zawr chu suola khawm ei ngai naw a, inzakna chang khawm ei hriet chuong nawh. Ei Pathien hin iengtin takin am a mi ngai ding chu!
Blacka thautui zawr chu a hlawk hle a, mi tam takin fak hmuna le fak zawngnain an hmang ta hrim a nih. Ei ram, a bikin Churachandpur town sunga ngei khawm blacka thautui zawr leia hausa, hmun le hmang inchaw, motor inchaw le building bawl tam tak ei um tah. Thautui black a zawrhai chau blacka sumdawng an ni nawh. LPG, ration bufai, ration Chini le thil dang dang blacka zawr leia hausa le khawsa thei mi tam tak an um bawk. Chun, inruk sa, thil chi tum tum inman deu deu a zawr khawm a pung deu deu a, an chaw nuomhai ta ding chun inchawk theiin a um zing. Motor inruk sa khawm zawr an hawi leiin motor inhmang thu hi Chanchinbu haiah tiem theiin a um inzing ut el a nih.
LPG thangsain thautui chi tum tum, ration bufai le chini hai blacka zawr theia a umzingna san hi Agenthai, a dealerhai annawleh a phurtu driverhai thil indiklo thaw a ni le inruolin a mamawtu han an mamawna an sang em leiin, thuneituhai kuoma report nek chun inchawk ding a um nana na chun, an inchawk naw thei naw niin an lang a; nghei nek chun pawisa seng lo tam lem sienkhawm dan bawsetuhai chu lo inthuruolpui el a ngai hlak tina a ni a, tlaksamnain dan bawsietna a hung rasuok a ni deu tak.
Ei state sarwkar khawma blacka LPG, Petrol, Diesel, ration bufai le Chini zawrtuhai khawm man le hrem ding an ni thu hi a hril bakah action lak a ni theina dingin Order khawm an suo ta hlak. Amiruokchu, heing thil hai blacka zawr a ni dan a hang sui tak tak pha chun a kangkai ding an tam a, ieng taluo thaw thei lovin a tawp nawk el hlak niin an lang. A kangkai ding hi hrillang naw inlakhawm ei hriet thei seng ring a um.
Black market ei ti hi ei dit nawa chu corruption le thamna ei ti ang tho a ei ram le ei hnam suksetu pakhat a nih. Hiengang bawk hin Cancer natna le AIDS natna hri hai khawm ei dit nawh. Amiruokchu, ei thu le hla lovin hieng natna hri hai hin a mi man pha chun damna tak tak hmu thei a ni ta ngai naw ang bawk hin Black market, corruption le thamna hripuiin ei ram, ei hnam a bawse a, an taldawk thei tanaw a nih. A sansuoktu ding sawrkar le mipui hai hlak chu hiengang hi ei ngirhmun a ni si a.
