HSA Imphal Annual Sports 2015 hlawtling taka hmang

Imphal, May 6,2015: HSA Imphal Jt. Hqtr. huoihawtna hnuoia Annual Sports 2015 chu THAU Ground, Imphal hmuna ni thum (3 days) sung aw dinga a buotsai chu April 30 khan tan niin, May 2 khan hlawtling taka hmang zo alo ni tah.

Hi sports sung hin event chidang dang hieng Football, Volleyball, Saihli per, Fakthei fak inel, 100m Race, Balloon Bursting, 3-legged race, Tug of War, Arm Wrestling, Badminton, Table Tennis, Shot Put hai nei a nih. Indoor Games hai hi zantin Hmar Community Hall, Lamphel hmuna nei hlak a nih. Football Senior a Children Home FC le Junior a Lanthunching Area in hrattak nina an lak ve ve a, Nuhmei Volleyball a Hmar Students MU haiin hrattak nina an lak bawk a nih. A sun a zan in mipui a entu an tam a, an hneltu hai le a huoihawt tuhai khawm an tha a fan in an hlimtlang hle thu dawng a nih.

Hi sports le inzawm a Prize Distribution le Pensioners' Felicitation chu Tarik 4 (Thawtanni) zan khan Hmar Community Hall, Lamphel hmuna nei niin hi huna hin Pu Dr. Chaltonlien Amo, Chairman HAC, MLA Tipaimukh A/C chu Chief Guest a hmang a ni a, Imphal sunga Pensioner iemanizat hai khawm'n hi hun hi an hung uop ve a nih. Mipui thahnem tawktak Hmar Community Hall, Lamphel sip rakin hi zan hin fekhawm a ni a, Sports sunga lawmman latu hai lawmman inhlan hai nei ani bakah Pensioner hai chawimawima inhlanna nei ani bawk a nih. 

Chief Guest a inthawk le Pensioner haia inthawkin student hai ta dinga infuina thucha thatak tak ngaithlak a ni baka Organising Committe a inthawkin report hai ngaithlak a nih. 

Rimawi tieng pang-ah Guest Artiste Nk. Emma Puii Pachuau (Lelte Chibil Awardee) le Nk. Christina Shakum (HSA Platinum Star) hai baka Local Artiste Nk. Catherine Lalremlien, Tv Nathanael Lalmalsawm, HSC Band, Apostis Band le Rabbar Band haiin mipui fekhawm hai chu an inawi hne hle bawk a nih. Prokram hmang zo a concert anga hun hmang zawm nghal niin mipui an hlimtlangin hun dittawk lo tak pum'n hi hun hi suktawp a nih.

Photo Credit: Lalbelsang Infimate