Responsive Ad Slot

Hmasawnna Thar | 6 May, 2015

Wednesday, May 6, 2015

/ Published by VIRTHLI
Tuolsung:
CCPur ADC a dingin 33 in Nomination paper an file nawk
CCPUR: June 1, 2015 nia Manipur­a ADCs 6 haia MDC election hung um ding le inzawmin CCPur District­a ADCC Vice Chairman thangin MDC ngir tum mi 33 in zanikhan Nomination paper an file. Nomination Paper file theina hun tawpna tak chu vawisun (May 6, 2015) hi a ni tah. Tipaimukh biela chun zani chen khan nomination paper file an la um nawh.


Nomination Paper file hai chu­ P. Khamliansang (Ind) in 5­Thanlon biela dingin RO/SDO Thanlon kuomah nomination a file a, 9­Ngazam biela dingin Independent candidate vawng T.Paukhanlian; H.Pauzalal le Khupzatawn Valte han nomination an file bawk.

RO/SDO Henglep –ah Mr Paolal Haokip in 3­Henglep biela dinga INC ticket­a ngir dingin a file a, ADCC Vice Chairman, Demmang Haokip (INC) in 2­ Leimatak biela dingin a file a.

RO/SDO Singngat biela dingin mi 8 in Independent a ngir dingin Nomination an file a, chuonghai chu 11­Lungthul biel­ah G.Suanchinpau; 24­ Singngat biela dingin Khamchinmang le Hausuanthang. 23­ Muallum biela dingin P.Thangpu; Zamneiching @ Grace Zamnu; Chinsuanlam; Paominlianthang le P.Thangkhanlun hai an nih.

RO/SDO CCPur­ah mi 19 in nomination paper an file a, chuonghai chu: 1­Khousabung –ah Letkhomang (INC); 12­ Lanva­ah L.Tualkhanhau (Ind); G.Thangchinlian (Ind); Pum Khen Cin (Ind); 14­ Tuibuong –ah Paokholal Haokip (Ind); 15­ Hiangtam Lamka ah G. Thangkhosuanmung(Ind); Thondouthang(Ind); Nengsuanmang (Ind); 16­ New Lamka West ah K. Chinkhansuan (Ind); Nianglian (Ind); Ginthianlal (Ind); H. Thangzamuan (Ind); 17­ New Lamka East ah Donglian (Ind); LK Mung Ngaihte (Ind); 18­ Zenhang Lamka ah P.Khamkhantuam(Ind); Lalzahau Samte (Ind); K.Ginkhozam (LJP); 19­ Zenhang Lamka ah V.Chinkhenpau (Ind) ; 22­ Haopi Range ah P.Kamkholal (Ind) hai an nih.

Dist. Hospital­ah Ambulance night duty
CCPUR: Mipui ta dinga thiltha le awlsam lem dingin DC, CCPur chun District Hospital, CCPur zui le zawm ding guideline khau tak a pek. Hi dungzui hin Zan huna Ambulance motor, driver le thautui mamawtawk duty a um zing ding; damnaw le Imphal panpui ngai um huna hmang ding Oxygen indaitawk a um zing ding; JSY/JSSK fethlenga Dist. Hospital­a nuhmei nau nei hai ta dinga damdawi mamaw tawk an sie zing ding bakah Doctor han nau nei hai an discharge huna transportation charge an pek nghal ding ti a nih.

LS election­a motor hmang man lak thei
CCPUR: 16th Lok Sabha Election, 2014 huna sawrkarin motor a hmang hai, hmang man la lalo han May 15, 2015 chenin District Election Office­ah an motor hmang (hired) man la thei an tih. Hi hun tiem sunga la lo hai chun khawhnungah motor neitu han iengkhawm sawisel thei tanaw ni hai tiin Election Officer/CCPur chun inhriettirna a siem.

DTF­Immunization review meeting
CCPUR: Zani 11:00AM khan Mr Lunminthang Haokip, DC, CCPur inrawinain DC Office­a BRGF Resource Cente­ah Mission Indradhanush 2015 le inzawmin District Task Force­Immunization review meeting nei a nih. Hi huna Mission Indradhanush Round­I activities hai ennawn a ni a, May 7­14, 2015 inkar sunga Mission Indradhanush Round­II action plan an hritlang bawk.

Mi 2 thina thuah Police han FIR an registered
CCPUR: May 3, 2015, 11:30PM vel khan Tipaimukh Sub­Division sunga Patpuihmun­ah hmelhrietlo silai chawi pakhatin mi 2 a kap hlum a, mithiruong hai hi Police le Doctor han CHC Parbung­ah Postmortem an thaw tiin Police a inthawk ei thu dawngna chun a hril. Kap hluma um hai chu Darlienthang (19) s/o Thangkhumlien of Lungthulien le Lalbieklien (39) s/o Lalbuonthang of Salemveng hai an nih. Mi 2 kap hlumna thua hin Parbung Police han FIR No. 2 (5) PBG­PS U/S 302/326 IPC & 25 (1­C) Arms Act an registered. Mr Lalbieklien ruong hi zanikhan Tuithaphai, CCPur hung phurtlung a ni a, zani ma khan Lamka thlanmuolah vuiliem a ni tah.

Mega Free Eye Camp
CCPUR: District Health Society, National Program for Control of Blindness hmalaknain May 11, 2015, 10AM khin District Hospital Eye OPD­ah Mit nauleng var (cataract) le inzawmin Mega Free Eye Camp um a tih.

Inspire Award Competition
CCPUR: “Inspire Award Scheme” hnuoia Govt/Private Aided/Private Unaided School haia Class VI to X inchuklai hai ta dingin www.inspireawards­dst.gov.in fethlengin Inspire Award Competition, 2015­16­a thangna dingin Registration thaw thei a la nih. School tin hai chun May 20, 2015 chena Registration thaw thei an tih.

Handloom Mela nei
CCPUR: Zani 10:30AM khan B. Vengnom Community Hall, CCPur­ah Dist. Council Admn./CCPur huoihawtnain ‘Handloom Mela” nei a nih. Hi huna hin L. B. Sona, Chairman, ZC chun khuolliena thangin Mela hi a hawng. Hi huna hin Ms Mannuamching, CEO/ADCC; LB Sona le Th. Ibemcha Devi, Project Handloom, Dist. Handloom & Textile/CCPur han thuhrilna an nei a, EAC Cultural Troupe han lam an inentir.

Contract Teachers Emergency meeting
CCPUR: May 7, 2015, 3:00PM khin DSSS Mantripukhri, Imphal hmuna All Naga Students’ Association Manipur (ANSAM) le Kuki Students’ Organisation (KSO) GHQ inrawinain All Manipur Hill Districts Contract Bais Teachers 2006 batch Emergency ko a nih. Member hai thang seng dinga inhriettir an nih.

Headline:
Thla khat sunga Cash Incentive pek an ninaw leh Khuman Lampak Sports Complex Main Gate an khar ding
IMPHAL: Manipur Chief Minister O.Ibobi Singh in Jharkhand State­a 34th National Games nei a ni tuma Medal lahai kuomah Cash incentive pek ni dinga a lo puonglang ta chu tuchen hin pek an la ni ninaw a. Hi lei hin tuta inthawka thla khat sunga Cash Incentive hi pek an ninaw chun thla thara inthawk Khuman Lampak Sports Complex Gate pui tak (Main Gate) an khar ding thu le hi Complex sunga lut hi an dang tlat ding thu zanita 34th National Games, Jharkhand­a Medal latu han Manipur Press Club, Imphal­a Chanchinbumihai an inhmupuina huna an hril.

Manipur CM, O.Ibobi Singh chun 34th National Games Jharkhand­a nei a ni hunah mimala Gold Medal latuhai Cash incentive Rs. 5,00,000 seng; Silver Medal dawng hai Rs. 3,00,000 seng; Bronze medal lahai Rs. 1,00,000 seng le Group event a Gold Medal lahai player pakhatah Rs. 1,00,000 seng; Silver medal lahai Rs. 50,000 seng le Bronze medal lahai Rs. 5,000 seng pek ni dingin a lo puong a nih. Jharkhand­a 34th National Games neia um hi kum 4 a liem ta a, sienkhawm incentive money pek an la ninaw zing a nih.

34th National GAmes a khan Manipur a players 112 zetin Gold Medal, players 80 in Silver Medal, players 56 han bronze medal an dawng a nih. An cash incentive la hmu lo thu hi Prithviraj, Parliamentary Secretary (Youth Affairs & Sports) le Department of Youth Affairs & Sports thuneituhai kuoma an va hril rawp ta a, sienkhawm an thutiem vawisun chen hin an la sukpuitling naw a nih tiin Medal dawngtuhai chun an lungawinaw thu an hril.

Cabinet meeting nei a nih
IMPHAL: Zani zantieng khan CM O.Ibobi Singh inrawinain State Cabinet meeting CM’s Secretariat, Imphal­ah nei a nih. Cabinet meeting chun thil chi tum tum an rel a, an thu rel hai lai loneituhai hmang hman ngei dingin hnuoithatna (Urea) tonnes 15,000 sekkhawlsaa sie ding, Moreh­ah Border Haat hawng ding le Moreh­ah Mega Tourist Centre hawng ding, District Institution of Teachers Education (DIET) hnuoia post 113 lak ding tihai a thangsa. Urea hi Brahmaputra Valley Fertilizer Corporation Ltd. Namrup, Assam a inthawk Imphal­Jiribam Road­ah Urea phurlut ding.

Works Minister in a va en
IMPHAL: May 4, 2015 khan Manipur Works Minister Dr Kh. Ratan Kumar Singh in Rongpur, Silchar, Assam a Manipur Bhavan bawlna ding hmun (site) a va en. Manipur Bhawan bawlna ding hmun hi Bighas 24 a lien a nih. Barak Valley le Cachar District, Assam a um Manipuri­hai chun hi Bhawan hi bawl vat vat dinga hun sawttaka inthawka an lo ngen ta a nih. Hi Bhawan hi bawl vat a hung ni theina dingin CM Manipur kuomah ngenna hung siem ka tih tiin Dr Kh. Ratan Kumara chun hi laia Manipuri chenghai kuoma a hril.

Hnina lekha May 20 chena pek thei
IMPHAL: Manipur Child Welfare Commission Chairman sin lak tum a ni a, inhnikna neihai chun May 20, 2015 chen khin Directorate of Social Welfare, Govt. of Manipur­ah hnina lekha peklut thei ning a tih tiin sawrkar thusuok chun a hril.

Congress candidate hai an boycott ding
IMPHAL: May 15, 2015 chena an thil ngen State sawrkarin a sukpuitling pek naw chun ADC Election hung um dinga Congress Candidate­hai chu an boycott ding niin All Manipur Police Constable Male (AMPCM), 2013 pawl chun thusuok an siem. Police Constable (Male) lakna dinga kum 2013 a Written Examination neia um ta chu puonglang dingin AMPCP chun state sawrkar kuomah ngenna an siem a nih.

Moidangpokpi Ground­ah Public Curfew
IMPHAL: Vawituka inthawk hun hun tiemchin um lovin Meitei Youth Front, South East Asia, International Meitei Forum le local Clubs han Moidangpokpi Grazing Field area huop sungah Public Curfew an thaw tan ding thu zanita Press Club, Imphal­a Chanchinbumihai an inhmupui huna hieng pawl le Clubs thuoitu han an hril.

Postal Strike thul a ni tah
IMPHAL: Postal Department a thawktu han vawisuna inthawka hun tiemchin um lova an sinthaw chawlsana nuorna nei an tum chu sawrkar tienga thuneitu insanghai leh an inbiekrem ta leiin an nuor tumna an thul ta thu an puonglang.

Others:
PM China, Mongolia le Korea haiah an zin ding
NEW DELHI: PM Narendra Modi chu rambung pathum, China, Mongolia le Korea haiah May 14­19, 2015 inkar sung khin inzin a tih. May 14­16, 2015 inkar sungin Xian, Beijing le Shanghai khawpui hai sir a ta, May 17, 2015 in Mongolia tlung a ta, May 18&19, 2015 in South Korea ramah inzin a ta, an President, Park Geun­hye leh inbiekna nei an tih tiin External Affairs Ministry thusuok chun a hril.

Junior Engineer thuoihmang a nih
TURA: May 4, 2015 zing dar 8:30 vel khan Dambuk Aga, South Garo Hills, Meghalaya ah AK­47 Rifles chawi pasal pahni han a car sukchawlin Alladin Sangma, Junior Engineer, Border Area Development Organisation (BADO) chu an thuoihmang a, a nuhmei ruok chu Car sungah an maksan. Mr Sangma hi sansuok tumin Police le Security Force han theitawp suoin an zawng a, tuchen hin a chanchin le a umna hriet a la ni nawh.

Hnuoithatna dingin Zun a tha: Gadkari
MUMBAI: Union Transport & Highways Minister Nitin Gadkari chun, mihriem zun hi hnuoithatna tha tak a nih. Kei khawmin tin litres 50 kengah zun kan khawl a, New Delhi­a ka chengna in compound sunga thlai kan chingnaah kan hmang tiin May 2, 2015 a Nagpur hmuna a thuhrilna huna a hril. Mipuihai khawm hnuoithatna dinga an zun hmang ve dingin Mr Gadkari chun an fui.

India rama dung insang tak ft. 8 le inche 1
MEERUT: India rama mihriem dama la um hai laia dung insang tak chu Dharmendra Singh (35) of Pratapgarh, Uttar Pradesh a nih. A dung insang dan chu feet 8 le inche 1 a nih. Guiness World Records a dung insang taka record chu Sultan Kosen of Turkey a ni a, ft. 8 le inches 3 a insang a nih. Dharmendra Singh hin a dung insang taluo leiin sin le nuhmei ding a hmuzo naw niin a hril. A sum hmuna tak chu Show a thaw hlak a, enmanin mi pakhatah Rs. 10 pei a lak a, ni khatah Rs. 500­1,000 a hmu hlak niin a hril. Dharmendra Singh hi kg. 100 a rik a ni a, breakfast in bawngnene litre 1, Apple pum 2 le Artui 4 a fak hlak a, sunbuin dailuo hme le bu, roti­sabji le salad a fak hlak a, zanbuah chun bu tak fa lovin light­food a fak hlak niin a hril.

Kum 25 hnungah a sina inthawk ban
NEW DELHI: Haryana sarwkara Transport Dept. hnuoia kum 1990 a Checker sin thaw dinga lak, a sin thaw that le taimak leia kum 1996 le kum 2000 haia a sina inthawka vawihni zet promotion hmu tah, Khub Ram chu a sina lutna dinga Work Experience Certificate tehlem a peklut tia intumin a sina inthawk ban a nih. Kum 25 neka tam sawrkar sin a thaw hnunga ban a nih. Ban a ni huna hin Traffic Manager sin a chel a nih.

French Defence Minister a hung inzin ding
NEW DELHI: French Defence Minister chu vawisun hin New Delhi hungtlung a ta; New Delhi­a a cham sungin Indian Air Force (IAF) hmang ding Rafale Fighter Jets inchawkna ding chungthuah inbiekna nei ning a tih tiin Union Defence Minister, Manohar Parrikar chun a hril. India chun dollars billion 6 neka tam man, Rafale Fighter Jets 36 France rama inthawk inchawk a tum a nih.

Haryana CM in Nepal thangpuina dingin Rs. 5 crore
CHANDIGARH: Nepal a simkhawlei hrat tak an hning leia thina, hliemna le harsatna tuortuhai ta dinga thangpuina dingin sawrkar thlungpui fethlengin a state sawrkarin Rs. 5 crore a pek ding thu Haryana CM Manohar Lak Khattar chun zanita a birthday lawmna huna a puonglang. Khattar hi kum 61 mi a ni tah.

ATM rawktu pasal 3 man an nih
HYDERABAD: SBI, Hyderabad ATM le UBI ATM hai rawka Rs. 1.49 crore inrutu pasal pathum­ M. Sudheer Kumar (24), G. Ashok (26) le G. Manoj (24) hai chu Nacharam Police han Rs. 73 lakh leh an man. M. Sudheer Kumar hi zu a du lei le gambling an hnik leia B.Tech zo lova um, ATM an rawknaah Rs. 1.14 crore chang a, thla 4 sungin Rs. 1 crore vel a hmang zo hman. 5 Star Hotels haiah a um a, gambling (Horse Racing) inkhela nunnuom chen a nih. Man a ni huna khawm hin online poker game inkhel lai mek a ni a, tuta a kuta inthawka Rs. 57 lakh man a nih. Mi turu takel chu a nih. Stamp tehlem a sumdang hausa Abdul Karim Telgi khawm khan Mumbai Bar girls hai a lengnain Rs. 93 lakh a hmang ve a hril a nih.

LLM Exam­ah enruk a tum leiin IG man
KOCHI/KOZHIKODE: May 4, 2015 khan LLM Exam­a thang T.J. Jose, Inspector General, Thrissur Range, Kerala chu enruk a tum tia intumna leiin man a nih. T.J. Jose ruok chun ka enruk nawh tiin intuma a umna hi hnawlin LLM Examination a hin a la thang pei ding niin a hril. Kerala Home Minister Ramesh Chennithala chun, hi thil tlung hi Kerala Police hai sukmuolphona a ni a, T.J. Jose, IGP hi Compulsory Leave inrang taka la dinga inhriettir a nih tiin a hril. Hi thil tlung suichiengtu dingin Shankar Reddy, Additional DGP (North) ruot a nih.

Papua New Guinea­ah simkhawlei
KOKIPO: Zanikhan Papua New Guinea ramah simkhawlei hrat takin an hning a, thil tawkpawi a nei thu ruok chu hriet a ni naw a, Tsunami ruok chu an umtir el thei nia hril a nih. Simkhawlei inhning hrat dan hi richter scale 7.4 niin US Geological Survey report chun a hril. Haptakar liemta khawm khan Papua Guinea hi simkhawlei inhningin vawihni a lo sawi ta a nih.

Republican President candidate ni nuom mi 6
WASHINGTON: Kum 2016 a US President thar thlangna hung um dinga chun Republican Party a inthawka Presidential candidate ni nuom mi 6 an um ta a, chuonghai chu, Dr Ben Caqrson, business executive Carly Fiorina le Arkansas Governor hlui Mike Huckabee; Republican Senator Rand Paul (Kentucky), Ted Cruz (Texas) le Marco Rubio (Florida) hai an nih. An ni 6 baka hin Florida Governor hlui Jeb Bush le Wisconsin Governor ni lai mek Scott Walker hai khawma Republican Presidential canidate an inchu el theia hril a nih. Democrats a inthawk chun Presidential candidate inchu tum mi 2 chau an la um hri a, chuonghai chu US Secretary of State hlui Hillary Clinton le Vermont a Independent Senator, Bernie Senders hai an nih.
-------------------------------------------------------------------------------------------------------------------
VAWISUN THUPUI
Rorelna tha chu suksuok unla, mitinin mani unau chungah zangaina le lunginsietna inlangtir raw se. Zekaria 7:9

Editorial:
Phurrik

Mihriem hringnunah hin ei tum hrim khawm ni lovin thil ieng ienga mani tawng nawl nawl hi a u m ve a. A then chu nuizat um dam, chet suolna dam, inzakumna dam, muolphona dam, lawmna dam, lungngaina dam, hlimna dam, suosalna dam le lungril tawk em em el chi dam ei tuok seng hlak awm ie. Hiengang bawk hin phurrik takel ei nei seng ring a um. Amiruokchu, ei phurrik tuokhai chu inang tawl naw nih. Kei ngei khawm ka hun le ka thil tawng hai ka hang thlir kir a, ka nun tawk em em le theinghil thei lo ka nei nuol el. Hieng ka thil tuokhai hi ka ta dinga inchuktirtu tha an lo ni leiin pawitina nekin tawnhrietna tha tak niin ka hriet.

Kum 2 vel liemta a thingtlanga kan inzin tumin khuo pakhat­a kan chawlna in a nupa lo fe hi an hungtlung a. An nu lem phur chu ka hei dawmthlak pui a, ka ring nekin a lo rik leiin ka che buoi tep a, inrang takin tuongah kan nghat chawr el a ni kha tie!. Ka lungrilin ka phur sin a, a lo a inthawk chun in ka phurtlung naw dingzie ka hrietchieng hle. An pa thil phur lem kha chu a va rik awm ngei de aw, kei lem hin chu phur chu hril lo, a dawm khawm ka dawmkang zo ka ring der nawh.

Ka ngaituo zui a, hiengang mihai sin inrimzie ka hmu hin mani thlai thar zawrhai, meihawl le thing ti ding rik em em a phur hai thil zawr hi a man suktlawm annawleh sukhnuoi dinga ngen hi chieng rawp chi a va ninaw ngei de! ti chu ka lungril hnetu a hung nih. Ngaituona dang a mi pek nawk pakhat chu, kha hai nupa kha an phur chu a rik ngei el. Amiruokchu, hang chawl hadam an ta, lungril sawlna nei lovin an nun kha hlim taka an hmang ngei ka ring tlat. Mi inhnar um chu an va ni ngei! Taksa ta dinga phurrik chu hadam thei a ni a, mihriem lungrila phurrik um ruok hi chu hadam theina a um nawh.

Mihriem ni ve si, phurrik neilo hi um an tim maw? phurrik neilo mihriem an um chun mi vangnei tak an nih. Mihriem invet biling nilo hai ta ding ruok hin chu phurrik ei nei seng ring a um. Phurrik nei hi nu le pa hai chauin ei nei an naw a, ei nauhai, tleirawl, nunghak le tlangval hai khawmin phurrik nei hlak an tih. Amiruokchu, phurrik ei ti ruok hi chu inang naw nih. Ei hril ta angin thil rik phur leia sawl chu hadam thei a nih. Amiruokchu, sungkuo a phurrik dam, mimal phurrik dam, hnam, khawtlang le kohran thila phurrik takel um hai ruok hi chu hadampui an tak a, taksa le lungril a fak siet hne hle chu a ni hi!

Phurrik bo hlak chu ei um nawh. Mirethei, mihausa, milien, mimal le mi ropui hai khawmin phurrik an nei seng. Phurrik an nei dan chu inang naw nih. Amiruokchu, phurrik hi chu mitin ta dingin a rik bek bek el a ni hi tie! Sakhuona tienga rawngbawltu, Kohan Upa le Pastor hai khawmin phurrik chu an nei ve tho. Kohran Upa le Pastor nauhai po po an tha vawng kher nawh. Suolnaa turu tak tak nau an nei ve ti khawm ei mitin ei hmuin ei nakawr khawmin a hriet seng. Phurrik neilo mihriem ni hi nuom a va um ngei de maw!

Manipur tlangrama June 1, 2015 a MDC election hung um dinga khawm hin Political party thenkhat le MDC a ngir tum hai khawmin phurrik an nei a nih ti chu Chanchinbu tiemtu hai chun ei hriet ring a um. Politician­hai phurrik hi state le sawrkar thlungpui khawmin an hrietpui. Amiruokchu, Politicians le MDC ngir tum hai phurrik hi an hlipkieng thei bik el naw niin an lang. Zalen, thienghlim le ralmuong taka inthlangna nei chu tuta ei boruok tuok le fe meka thil thei lo ni dingin an lang. MDC ngir nuom ngawi ngawi, ngir lo dinga vauna hmu, tap tlawk tlawk khawm an bo bik nawh.
Don't Miss
© all rights reserved
made with by Simon L Infimate