Responsive Ad Slot

Hmasawnna Thar | 29 May, 2015

Friday, May 29, 2015

/ Posted by VIRTHLI HMAR
Tuolsung
Hmar Inpui inrawinain hnam tum tuma thuoituhai an inhmukhawm
-LRS Puruolte|Photo: Rama Ralsun
CCPUR: May 28, 2015, 4 PM khan VTI Auditorium, Rengkai, CCPur­ah Hmar Inpui, Gen. Hqrs. Inrawinain CCPur District sunga hnam tum tum a thuoituhai fe khawmin Manipur Tlangram biel a ADC election chungthu le MDC/ADC Election 2015 chungthuah “Tribe Leaders’ Interaction on the Status and Functioning of ADC (Manipur)” ti thupui hmangin ngaidan le thil um dan hai an hriltlang. Hi  huna hin Hmar Inpui (HI), Paite Tribe Council (PTC), Kuki Inpi CCPur (KIC), Gangte Tribe Union (GTU), United Zou Organisation (UZO), Simte Tribe Council (STC), Mizo Peoples’ Convention (MPC), Hmar Youth Assn. (HYA)/GHQ, Hmar Women Assn. (HWA)/GHQ, Hmar Students’ Assn. (HSA)/GHQ le hnam tum tum a thuoitu  hai an thang.       
  

Pu (Dr.) John H. Pulamte President, HI in thuhmahruoi le inkokhawmna sanhai a hril a, Pu Lalthalien Assembly Secretary, HI in Pathien kuoma tawngtainaa hun an hlan zoin hriltlangna tan a nih. Pu David Buhril Gen. Secy., HI in neiin hi hun a fekhawmhai kuomah lawmthu a hril a. Ei ram le hnam thuoitu dinga mipui innghatnahai ei ni leiin ei mawphurna a lien hle a nih. A pahnam, a chawi pawl hai chenin tuta ei ADC fe dan hi bu tak khuk a khukpui chi an nawh. Resolution la passed el thei naw inla khawm iengtin a thaw dim ei ngaituo a tul a nih tiin a hril. Hunkhar tawngtaina Upa Hmangzalien Vice President, HI GHQ in a nei zoin hun suk tawp  a ni a, zantieng ruoi an kiltlang.
  
Hi huna fekhawm hai chun Manipur­a tlangmi, tawng inhre paw haiin Forum pakhat indin ngei tha an ti thu hai an hrilin hiengang hun hi nei rawp tha an ti thu an hril. Manipur­a ADC chu cabinet in a nuom a ninga a siemfawm Sixth Schedule hnuoia mi nilo a ni leiin tlangmihai ta dinga hamthatna ieng tak tak a phuhruk nawna thuah sawrkar thlungpui intlun dan ding khawm hi thua hin an hriltlang.

Polling duty ding hai an suok tan
CCPUR: June 1, 2015 nia Manipur ADC 6 haia MDC election hung um ding le inzawmin   Churachandpur district­a polling station hmun hla deua duty ding hai chu zanikhan Tuibuong Peace Ground­a inthawk an duty­na hmun ding panin an suok tan. Zanita Polling personnel suok hai hi 7­Vangai DCC a Polling stations 16 a duty ding an nih. May 29, 2015 in 5­Thanlon DCC a polling station 12 a duty ding; 6­Parbung DCC polling stations 10 le 8­Senvawn DCC a polling station 9 haia duty ding polling personnel hai suok an tih.


Free Dental Camp an sunzawm pei
CCPUR: JC Dental Care chun an clinic kum 10 tlingna le inzawma hmun tum tuma Ha enkawl that a pawimawna hrilhrietna dinga ‘Oral Hygiene Campaign” an buotsai chu an la sunzawm zing a. Zanikhan Valpakawt/Varparkawn Community Hall­-ah Free Dental Check­up an huoihawt. Hi huna hin Dr Sangi, Dr Helhing Haokip le Dr Lalrotling han mi 71 an en a, Damdawi, tootbrush le mouthwash hai a thalwnin an sem nghal bawk. Dental assistants Nk. Hrieti le Pawli bakah volunteers Tv. Ropuilal le Nk. Lalhlimpui han Dentist pathum hai hi an thangpui.
  

JC Dental Care neitu Dr Sangi chun, eini tlangmi hai hi  hawp le hmuom nasa taka ching ei ni  leiin Ha hriselna ei ngaipawimaw zuol theina dinga ngaituoa sawrkar thangpuina thang lova hiengang dental camp hi a buotsai a ni thu hrilin la sunzawm pei an tum thu a hril.
          
JC Dental hi Ha tiengpanga harsatna nei hai ta dinga eini tlangmi hai laia Private Clinic hmasa tak nia hriet a ni a, kum 2005­a kha an lo tan ta a nih.

LJP candidate in vote campaign
CCPUR: 18­ Zenhang Lamka DCC­ a Lok Jan Shaktu Party (LJP) ticket­a MDC candidate Ginkhozam chun zani 12:00 khan Zogal Memorial Hall Complex, Zoveng­ah public election campaign a nei. Hi huna hin LJP Manipur president Thangkhangin Ngaihte thangin LJP thuoitu hai khawm an thang tawl.
   

LJP President chun, mipuiin sum le pai nei le hausa candidate hai ei thlangtling hlak leia vawisun chena ei ramin harsatna a tuok thu hrilin LJP chu pawisa nei leia politics khel a ninaw thu a hril. Ei rama silaichawi pawl (UGs) hai sukbo an ni hmakhat ei ramah inremna, muongna le damna a um ngainaw ding leiin Ram Vilas Paswan chun parliament­ah nasa takin a khekpui a nih tiin a hril. Ginkhozam chun Constituency dang hai ang lo taka 18­Zenhang Lamka candidate han indemna le inhrilsietna an thaw naw chu lawmum a ti thu a hril.

May 29-a inthawk LPG supply a um naw ding
CCPUR: Assam Oil Employees/Workers Union tiemchin um lova an sinthaw chawlsana nuorna an nei leiin May 29, 2015 a inthawk India hmarsakbiel (NE) pumpuia chun bottling sin chawlsan a ni ding leiin thlaisuongna LPG supply a umnaw ding a nih. Hi thua hin Manager, Kim Joe Gas chun customer hai lo hrethiem ding le mipui hai chu mani hmang lai thlaisuongna Gas hai inret taka lo hmang dingin ngenna a siem.

Election Campaign a nei
CCPUR: 17­New Lamka (East) biela MDC election hung um dinga Independent Candidate Pu L.K. Mung chun zani zan khan YPA Hall, New Lamka hmuna Public election campaign a nei. Hi huna hin ei hlasakthiem Lalbieklien Khawbung le P.C. Lalawmpuii @ Emma Pachuau hai khawmin hla an sak a, mipui fekhawm an tam hle.

Free Uniform sem
CCPUR: Mr Kaikhanlian Guite, DI of School/CCPur chun zani zingkar 10:00AM khan Vimala Raina High School­ah student hai kuoma SSA 2015 fethlengin Free Uniform a sem. Vimala Raina H/S a student 644 in tukum hin SSA hnuoia free Uniform an dawng a nih.

Essay le Quiz Competition nei
CCPUR: Zani 9AM a inthawk khan CMO Mini­Conference Hall­ah District Health Society/CCPur le ZEO CCPur hai thangruola huoihawtnain Essay le Quiz Competition nei a nih. Hi huna hin Schools 5­ Phungkhothang govt H/S; Vimala Raina H/S; Rengkai Hr Sec School; Vungzagen Hr Sec School le Gandhi Memorial H/S haia Class X student hai an thang a, school 1 a inthawk student 2 pei an thang a nih. ‘Adolescene a time that matters’ ti thupu hmanga Essay ziek inelah student 10 an thang a, Health tiengpang thuah Quiz nei a ni bawk.

Headline:
Thoubal­ah Power MW400 pesuok thei ding Power project indin ning a tih­ Dr Jitendra Singh
IMPHAL: Zanikhan Union Minister for Development of North Eastern Region (DoNER), Dr Jitendra Singh in Secretariat, South Block, Imphal­ah Manipur sawrkara Officer lien hai an hmupui a, a Ministry hnuoia hmalakna fe mek le thil thaw ding hai a hriltlangpui. Chun, Dr Jitendra Singh chun tuta neka Manipur in Electric power a hmu that lem theina dingin Rs. 124 crore sengin Thoubal­ah Power MW 400 pesuok thei ding Power Project indin a ni ding thu, sawrkarin a ram mipui han nitin darkar 24 sung power an hmu theina dinga hma a lak thu, Thoubal Power Project hi kum 2 sunga zo fel le kum 2 hnunga hawng thei le hmang theia a um beisei a nih tiin a hril. Hi Project hi zo a ni pha leh Manipur mipuihai kuomah nitin electric darkar 18 sung a pek thei beisei a nih tiin a hril.
  
Imphal­Silchar Road khawm an hmatienga zo fel tum a ni bakah Vuongna service tha  le tam lem infetir dinga sawrkarin hma a lak thu le Development sin chi tu m tu m thaw a ni ding thu hai Dr Jitendra  Singh chun a hril. Chun, Manipur CM O.Ibobi Singh in National Sports University indinna ding hmun le ram State sawrkarin a sukfel le lak ta thu DoNER Minister kuomah an tlun.
           
Dr Jitendra Singh hin State BJP Office khawm a va sir. BJP sawrkarin thlier bik nei lova development sin inang vawnga a thaw ding thu le ADC election hung um dinga hin BJP chu sawrkar siem thei khawpa an hung hrat ngei a beisei thu a hril. Dr Jitendra Singh hi May 27, 2015 a Imphal hungtlung a ni a, zanikhan Imphal suoksanin New Delhi a pan nawk  tah.

Central Team Bishnupur Dist. ­ah
IMPHAL:Central Parliamentary Standing Committee on Home Affairs, Chemical & Fertilizers  team­a member 16, P. Bhattacharya, Chairman, Parliamentary Standing Committee on Ministry of Home Affairs inrawina hnuoia mihai chu zanikhan Bishnupur District­ah an inzin a, District Sports Complex, Tourist Centre, Phubala,Loktak Lake, Industrial Estate, NEC le DoNER hnuoia sin thawa u m hai enna an nei bakah INA Complex, Moirang le INA Meuseum hai an en.

A thlakhat hlaw Nepal a dingin
IMPHAL: Langthabal A/C MLA, Karam Shyam chun a thlakhat hlaw Rs. 87,445 a inthawk Rs. 87,010 chu Nepal­a Simkhawlei inhning leia harsatna tuorhai thangpuina dingin a pek niin zani hmasaa a chengna in­a Chanchinbumihai an hmupui huna a hril.

Counseling proforma lak thei ding
IMPHAL: Kum 2015­16 Academic Session a B.Sc (Hort) Central Agricultural University (CAU), Iroisemba le NEC hnuoia inchuk nuoma AIEEA­UG­2015 a thang hai ta dingin Counseling proforma chu Rs. 200/­ (Rs. 150/­ for ST, SC&OBC) pein June 1, 2015 a inthawk Directorate of Horticulture, Sanjenthong a inthawk lak thei le fill up zovin June 16, 2015 chenin hi Directorate a hin peklut nawk ding a nih tiin Director, Horticulture & Soil Conservation, Manipur chun inhriettirna a siem.

Others
CBSE hnuoia Class X result puong
NEW DELHI: Central Board of Secondary Education (CBSE) hnuoia Class X Exam, 2015 result chu zanikhang puong a nih. Pasal nekin nuhmei an thjaw tha lem. Students 13.3 lakh an exam a, a pumpuia pass percent chu 97.32 a ni a, ni kum nekin pass pecent 1.55 in tlawm lem. Nuhmei pass percent 97.82 a ni a, pasal chu 96.98% a nih. Thiruvananthapuram region an thaw tha tak a, 99.77% an passed. Chennai in a dawt a, 99.03% a ni a, Delhi region 96.29% a nih. Hlawtling hai po po PM Narendra Modi in a lawmpui thu a puong.

India ram pumpuia bawngsa khap tum a ni nawh
PANAJI: India ram pumpuiah Bawngsa khap tum a ni nawh tiin BJP National President Amit Shah chun zanikhan Panaji hmuna a hril. Mipuihai dit dan BJP sawrkar chun enin thil thawng a tih. Union Minister of state for Parliamentary affairs Mukhtar Abbas Naqvi in “bawngsa fa nuomhai chu Pakistan ah fe rawhai seh” a ti hi a mimal ngaidan a ni a, Party president ka ni leiin hi thua hin comment ka pek naw a, pe bawk nawng ka tih tiin Amit Shah chun a hril.

Boruok lum leia thi mi 1,345
HYDERABAD: Zani hmasa khan Andhra Pradesh le Telangana state haiah boruok lum taluo tuorzo lovin mi 218 an thi belsa nawk leiin tulai hnai ela hieng state pahni haia boruok lum  tuorzo lova mihriem thina tuok chu 1,345 an tling tah. Telangana ah hi ni hin mi 97 le Andhra Pradesh ah mi 340 an thi nia hril a nih. Jharkhand state a khawm khawlum tuor zonaw leiin mi 11 an thi ta niin ei thu dawngna chun a hril.

LS MPs 542 laia 298 han an fund hmang lo
NEW DELHI: 16th Lok Sabha fe meka MPs 542 um laia 298 han May 15, 2015 chen khan an Local Area Development Fund (Member of Parliament Local Area Development Scheme­ MPLAD) chengkhat khawm an la hmang naw nin India Spend in data t arlanga chun zieklang a nih. NDA sawrkar kum khat a tling ta a, Lok Sabha MPs, an local area development fund la hmang der lo hai lai hin Union Home Minister Rajnath Singh; Chemical & Fertilizers Minister Anand Kumar; Law Minister D.V. Sadananda Gowda; Minister for Micro, Small and Medium Enterprises Kalraj Mishra; Water resources minister Uma Bharti; AICC President Sonia Gandhi;  BJP thuoitu hlun Murli Manohar Joshi le Samajwadi Party Chief Mulayam Singh Yadav hai an thangsa. PM Narendra Modi khawmin 16% chau a la hmang. Lok Sabha MPs 298 han an MPLADS fund an la hmang lo hi Rs. 5 crore (over USD 780,000) a nih.

Assam­ah Mega Food Park hawng
GUWAHATI: Zanikhan Union Minister for Food Processing Industries, Smt. Harsimrat Kaur  Badal in Nalbari, Assam­ah Mega Food Park a hawng. Hi Food Park indinnaa hin Rs. 50 crore hmang ding le sin nei lo mi 6,000 velin sin an nei pha le loneitu 25,000­30,000 han hamthatna an hmu pha beisei a nih tiin Mrs Kaur chun a hril.

GNLA cadre 1 kap hlum a nih
SHILLONG: Zanikhan Meghalaya State a South Garo Hills district a Dokujok village­ah Security Forces le GNLA pawl an inkaptuo a, GNLA cadre 1 kap hlum le a kuta inthawk carbine 1 le a mu iemanizat hmu a nih tiin Abraham T. Sangma, Addl. SP, South Garo Hills chun a hril. Zani hmasa khawm khan West Garo Hills ah GNLA han IED an sukpuok leiin mi 8 an hliem.

Biekin chimin mi 3 a del hlum
TIRUNELVELI: Zani hmasa zan khan Tamil Nadu state a Tirunelveli District sunga St. Peter’s Church, Tirunelveli bawl lai mek chu a chim a, mi 3 a del hlum a, midang 12 an hliem a, Palayamcottai Hospital panpui an nih tiin Karunakaran, District Collector, Tirunelveli chun a hril. Thi le hliem hai hi Biekin bawlnaa sinthawtu vawng an nih.

Chidambaram in a lawmpui
NEW DELHI: Tripura Cabinet meeting in Tripura state pumpuia Armed Forces (Special Powers) Act, 1958 zama um hlip dinga thutlukna an siem thei ta chu Union Home Minister hlui P. Chidambaram chun a lawmpui thu a hril. Mihriemna le mihriem lungril varna dinga hnena a nih  tiin a hril. Tripura state hi Feb. 16, 1997 a inthawka AFSPA hnuoia sie a nih.

MGNREGA worker­hai social security schemes­ah
NEW DELHI: MGNREGA hnuoia sinthawtuhai (workers) po po chu indin thara um Social Security Schemes 3, Pradhan Mantri Jeevan Jyoti Bima Yojana; Pradhan Mantri Suraksha Bima Yojana le Atal Pension Yojana haia zieklut le Pradhan Mantri Jan Dhan Yojana hnuoia Bank Account inhawngtir seng dingin sawrkar thlungpui chun state sawrkarhai an hriettir. Chun, MGNREGA hlaw hrim hrim bank fethlenga sem seng ta dingin Union Rural Development Ministry chun state tin hai an hriettir bawk.

Assam ta dingin DoNER in Rs. 200 crore
GUWAHATI: Union Ministry for Development of North Eastern Region (DoNER)chun zanikhan Assam state ta ding bikin Rs. 200 crore le NE state pumpui ta dingin Rs. 125 crore a sanctioned. Rs. 200 crore hi Assam state sunga Water Supply le Roadways thawnaa hmang ning a ta, Rs. 125 crore hi India hmarsak state haiah organic farming siemnaa hmang ning a tih tiin Union DoNER Minister Jitendra Singh chun zanikhan Guwahati­ah a hril.

Jharkhand PCC General Secy. a thi
RANCHI: Mr Sailesh Sinha (54), General Secretary, Jharkhand Pradesh Congress Committee (JPCC) chu damnawna leiin zanikhan Hospital­ah a thi. Sailesh Sinha hi thuoitu fel le hrat, Congress policies hnesaw taka fepui hlak mi a nih tiin Congress thuoitu hlun, Gulfam Mujibi chun a hril. Jharkhand CM Raghubar Das le JPCC President Sukhdeo Bhagat le thuoitu dang dang han Sinha thi hi pawi an ti thu le a sunghai an sunpui thu an puong.

Cabinet Secretary thar ruot ding
NEW DELHI: Tuta Union Cabinet Secretary Ajit Seth term chu June 13, 2015 khin a tawp ta ding a ni leiin sawrkar thlungpui chun Cabinet Secretary thar ruot tumin hma a lak mek a, tuta haptakar sung hin a puonglang hman el thei. Union Cabinet Secretary ni nuoma hril hai chu Union Power Secretary Pradeep Sinha, 1977 batch IAS Officer, Uttar Pradesh Cadre le Rajiv Mehrishi, Union Finance Secretary sin chel mek hai an nih. Mehrishi hi 1978 batch IAS Officer,  Rajasthan cadre a nih.

BNP thuoitu lunginah sielut
SHILLONG: Bangladesh Nationalist Party (BNP) thuoitu le Bangladesh Minister hlui Salahuddin chu zani hmasa khan Court hmaah inlangtir a ni a, Court in a rel angin ni 14 sunga dingin lunginah sielut a nih. Salahuddin Ahmed hi passport le Visa nei lova India rama a hung lut leia Foreigners Act hnuoia man le case registered khum a nih. Shillong a man a ni a, a awmna a ti leiin NEIGRIHMS­ah hun iemanichen enkawla um a nih.

Modi le Hasina han “Border Haat” an hawng ding
AGARTALA: India PM Narendra Modi chu June 6&7, 2015 khin Bangladesh khawpui Dhaka­ah inzin a ta, India le Bangladesh inrina zulah Bangladesh PM Sheikh Hasina le India PM Narendra Modi han a ruolin “Border Haat” hawng an tih tiin official thusuok chun a hril. India le Bangladesh inrina zula Border Haat a palina ding a nih.

Nepal­ah simkhawlei vawili an hning nawk
KATHMANDU: Zanikhan hrat rak lovin Nepal­ah simkhawlei vawili zet an hning nawk. Zing dar 5.29 in richter scale 4.0 a hratin an hning tan a, hi zo hin 4.2 richter scale, 4.0 richter scale le 4 richter sale a hrat haiin an hning nawk a, thil tawkpawi ruok chu a nei nawh tiin National Seismological Centre (NSC) chun a hril. April 25, 2015 a richter sale 7.9 le May 12, 2015 a richter scale 7.3 a Nepal rama simkhawlei inhning leia thi kha mi 9,000 an tling tep ta a, mi 21,000 neka tam an hliem a hril a nih.
---------------------------------------------------------------------------------------------------------------
VAWISUN THUPUI
Eselna le inngaihlut leia iengkhawm thaw loin, mi tinin inngaitlâwmtakin mani nekin mi dang tha lemah ngai seng raw hai se.  Philippi 2:3

Editorial
Assembly Constituencies 3-a byelection ei hmabak

June 1, 2015 ah Manipur tlangram districts 5 huop sunga ADCs 6 um haiah MDC election nei dinga Manipur sawrkar le a mipuihai ei inphu sup sup laizingin Manipur Legislative Assembly Speaker chun Indian Constitution 10th Scheduled­na hnuoiah Manipur­a Trinamool Congress MLAs 3, Khumukcham Joykishan of Thangmeiband A/C; Oinam Lukhoi of Wangoi A/C le Th. Bihwajit of Thongju A/C hai chu MLA an ninaa inthawk a disqualified tawl a. Hi thil hi Manipur politics a ding chun chanchin tharlam hlawk a nih. MLAs 3 disqualified­a an umna hin Manipur mipui le politician hai na a ver hle niin an lang. Politician­hai chu ngaituona sei tak a pek ngei ring a um.
  
Ei hriet seng angin Trinamool Congress ticket in 10th Manipur Legislative Assembly election a khan mi 5, Th. Shyamkumar (Andro A/C); K. Sarat (Konthoujam A/C); Dr I.Ibohalbi (Oinam A/C); (L) Maibam Kunjo (Hiyanglam A/C); Kh. Joykishan (Thangmeiban A/C) le Th. Bishwajit hai chu All India Trinamool Congress (AITC) ticket­a thlangtling an ni a. Amiruokchu, thlangtlinga an umna party suoksana Manipur pradesh Trinamool Congress (MPTC) ti hmingchawia party thar an hung indin leia hieng MLA 3 hai hi disqualified a hung um pha an nih. MPTYC a hin Th. Joykishan chu an President a nih.

Speaker chun hieng MLAs 3 hai hin provision 2(i) (a) of the Tenth Schedule of the Constitutio le  Article 19(2) an bawsiet leia disqualified an nih tiin a hril. Speaker chun dan anga ro a rel le thil a thaw a ni leiin theida le hnam zawnga lak thei ding a ni nawh. Disqualified a um hai khawma dan kalin an che leia hiengang thil hi an tuok pha a nih ti hi an pawm thiem a tul. Rule chu rule in a fe hlak ti le rule zui lova bawsie a ni chun an tuor ding a nih ti chu hieng MLA­hai hin an hriet seng ring a um. Amiruokchu, Politics thila hamthatna dawng le chang an nuom leia an umna Party suoksana party thar hi an indin a ni el thei.

Hieng MLA 3 haiin disqualified an tuokna san pakhat dang chu an duamna le hamthatna an hnawt lei a nih. An tlingna party inzain lungawi takin um hai sienla chu hi thil hi tuok naw nihai. Mihriemhai hi duamnain suokah a mi siem pha chun ei ta dinga tha le tha naw ngaituo thei lo hiel khawpin ei lungril a sukvet a, a tawpah ei chang chu hlawsamna le channa a hung ni hlak. Chun, thlangtlinga um hai hin mani hmakhuo ding chau ngaituo lova thlangtlinga an umna party le a thlangtlingtu hai an inza a pawimaw em em a nih. Inza nihai sienla chu an party thar indin hma hin an biel mipuihai an rawn ring a um.

Tuhin Manipur MLAs 5 danghai hmakhuo ding chu hriet a la ninaw a, Speaker kutah a um a nih ti inla a suol ring a um nawh. Amiruokchu, hieng MLAs 5 hai hi chu sawrkarna chel mektu party zawm anni leiin disqualify em anni dim chu maw?Dan anga ro rel a hung ni chun disqualify chu an hmabak ve niin an lang. Manipur mihai chun hieng MLAs 5 dang hai hmakhuo ding hi hriet kar an nghakhla ngei ring a um.  

Dr A. Borababu Manipur Assembly Speaker a ni lai khan MLAs 3 disqualified an ni a. Hi hnunga Manipur­a MLAs disqualified a an um nawkna hmasa tak chu ta tum hi a nih. MLA tling hi an tak a, sum seng a tam vei leh iengleia MLA thenkhat disqualify thei dinga an um el hlak am ning a ta? Dan le dun hre lo hlak chu an niawm si naw a. 10th Manipur Assembly term hi a sawt tanaw a, kum khat vel chau a um taa chu lo thei lovin Assembly Constituencies 3 haia chun byelection ei hmabak a nih. Sawrkar le in candidate nuomhai ta ding chun sum seng a tam  nawk ding a nih.



Don't Miss
© all rights reserved
made with by Simon L Infimate