Tuolsung:
ADC CCPur hnuoia MDC election a pawimaw: Th. Chaoba
CCPur: June 1, 2015 nia Manipur Hill district 6 haia ADCs 6 haia MDC election um ding le inzawmin BJP Manipur Pradesh President Th. Chaoba inrawina hnuoia BJP member han zani 11:30AM khan Synod Hall, IB Road, CCPurah tuolsung chanchinbumihai an inhmupui.
Hi huna Th. Chaoba in thu a hrilnaa chun, ADC dang hai ang lovin ADC, CCPur hi MLA Assembly Constituency 6 hnuoia um a ni leiin tutum ADC electiona hin ADC CCPur in hmunpawimaw tak a nei a nih. ADC dang (ADC Chandel, Tamenglong, Ukhrul, Sadar Hills etc ) hai chu MLA Assembly Constituency 2/3 hnuoi chauva um vawng an nih tiin a hril. Manipura ADC 6 haia MDC seats 144 inchu dingin BJP party in 121, INC in 98, NPF in 86, Others in 11 le Independent candidate 191, a renga belkhawmin candidates 507 an um a. ADC/CCPur hnuoia BJP in seat 18, INC in 7, an inchu ding a ni a, a dang hai chu Independent candidate han an inchu ding thu hrilin CCPur mipui hai chu seats 18 lai 13 beka thlangtling dingin a ngen.
ADC election fel le thienghlim taka, mipui dit dan ang taka nei a ni theina dingin SoO group le SoO group hnuoia um lo Organisation hai khawm election sukbuoi lo dingin a ngen. Mipui ditdan ang ni lova SoO group le NonSoO group election huna tharum hmang an um chun election zo hnunga lo thei lovin an chunga action lak a ni ding thu a hril bawk.
Hmar Inpui thu rel thenkhat
CCPur: May 11, 2015 khan Hmar Inpui Executive Meeting nei a nih. Vawisuna DC, CCPur in Tribe/Domicile/Income Certificate chungthua meeting a ko a, Hmar Inpui aiawtu dingin Pu Hmangzalien,Vice President le Pu F. Doliensung, Joint Secretary hai an ruot. May 15, 2015 a Hmarkhawliena Hmar Inpui Assembly huna Hmar Inpui aiaw hrim hai bakah HWA a inthawk mi 2, HYA Gen. HQ a inthawk mi 1 le HSA a inthawk mi 2 hai fe le hung sengso Hmar Inpuiin a thei ang anga a ngaituo sa dingin an rel bawk.
Airtel Tower thautui supplytu thuoihmang
CCPur: Policea inthawk ei thu dawngnain a hril danin May 9, 2015, 8:30AM vel khan tu ti hrietlo han Vajing khaw bul laia Airtel Tower a hmang ding thautui supply motor (Bolero Pickup) MN05C2083 (white colour) chu an thuoihmang a, a sunga Diesel barrel 7 (225 litres seng umna) an lakpek bakah thautui supplytu hai mobile phone 3 lapekin an fena chin hriet lovin an tlang hmang. Hi thua hin Police han FIR No.46 (5) 2015 CCPPS U/S 392/34 IPC & 25(1C) A. Act an registered a, an suizui mek.
Fekhawm seng dinga inhriettir
CCPur: Hmar Martyr’s Day ni, May 16, 2015 zing dar 5:30 khin HPC Returneehai po po Saikawta Hmar Martyr’s Day lungdawah fekhawm seng dingin Secretary, HPC Returnees Welfare Association chun inhriettirna a siem. Chun, a nuom taphawt hi huna thang ve dingin hi Association chun fielna a siem.
CCPur SP in Churachandpur Times website a tlangzar
Tui|haphai: May 12, 2015, 12:00 PM khan Shri L. Mangkhogin Haokip, IPS, SP, CCPur in Churachandpur Times website (www.churachandpurtimes.com) chu a office chamber - ah tlangzarna a nei. Hi tlangzarna programme hi HYA GHQ thuoitu le HSA Tuithaphai Jt.Hqrs. thuoitu hai khawma an uop ve.
Pu Mangkhogin in tlangzarna a nei huna hin Churachandpur Times tlangzar theia a um hi CCPur District tading khawma hmasawnna le changkangna chikhat ani thu a hril a. Tulai khawvel a changkang ta leiin news update hai awlsam deua internet a hmu zung zung theia a um hi lawmum a ti thu a hril sa bawk a. Editorial Board hai khawm thei tawpa thang la a, news uptodate a sie zing dingin infuina a nei nghal bawk.
Churachandpur Times hi Monthly Magazine khawm insuo dinga buoipui mek a nih a; buoina dang a um naw chun tarik 16 May, 2015 Hmar Martyr’s Day programme ah tlangzarna nei ning a tih. Tlangzarna nei ani zo hin Pu Richard Laltanpui, President, HSA Tuithaphai Jt.Hqrs in Life Cafe ah lawmpuina in lunch a treat tawl leiin CT Editorial Board hai a chungah an lawm hle.
Headline:
Nepala Simkhawlei inhning nawkah mi 42 an thi, 100 chuong an hliem; India ramah mi 17 an thi
New Delhi: Zanikhan Nepalah Simkhawlei vawili an hning nawk a, Simkhawlei inhning hrat dan richter scale 7.3 a ni a, simkhawlei inhning tanna chu Mount Everest le inzawn, Namche Bazar niin US Geological Survey thusuok chun a hril. Simkhawlei inhning hun hi zani 12:35PM nia hril a nih. Zanita Nepala Simkhawlei an hning nawkna lei hin mi 42 an thi belsa nawk bakah mi 1,117 chuong an hliem niin Nepal Home Ministry thusuok chun a hril. April 25, 2015 a Nepal rama Simkhawlei inhning leia mihriem thina tuok chu 8,000 vel le hliemna tuok chu 18,000 vel ni taa hril a nih.
Chun, India rama khawm zani sun dar 12:35 vel khan Simkhawlei an hning nawk a, a hrat dan chu 7.1, 7.2 le 7.3 richter scale a tling phak nia hril a nih. Simkhawlei inhning hin Delhi, Gujarat, Bihar, West Bengal, Assam le Uttar Pradesh hai a sawi hning a, mi 17 in thina an tuok pha niin ei thu dawngna chun a hril. Thina tuok hai laia 16 hai chu Bihar le pakhat chu Uttar Pradesh mi an nih tiin News Agency (PTI) a inthawka ei thu dawngna chun a hril.
Simkhawlei inhning le inzawm hin PM Narendra Modi chun zanikhan High level meeting a ko nghal a, simkhawlei inhning ngirhmun ennawna le hmalak dan ding an hriltlang. Modi chun NDRF le top officials hai chu inralring zinga um a, a tul ang dungzuia hma la nghal dingin an hriettir.
Hieng laizing hin Cabinet Secretary Ajit Seth inrawina hnuoia National Crisis Management Committee chun zani zantieng khan Delhi hmuna meeting neiin simkhawlei inhning ngirhmun ennawnna an nei. Hi huna hin Uttar Pradesh, Bihar, Sikkim le West Bengal Chief Secretaries hai khawm video conferencing fethlengin an thurawn lak a nih.
Imphal:
CS rawiin high level meeting nei
Imphal: May 27,29, 2015 inkar sunga High Level Parliamentary Standing Committee on House Affairs (Rajya Sabha) team a members 31 Imphala an hung inzinna ding le inzawmin zani 3:30PM khan Manipur Chief Secretary, P.C. Lawmkunga inrawinain Manipur Secretariat (South Block) Conference Hallah high level meeting nei a ni a, Manipura Developmental projects chi tum tum Departments hran hran han an thaw mekhai ennawnna le hriltlangna an nei. Central team hin a hmuna fein projects sin u m hai en an tih. Central team hin May 29, 2015 zing dar 9 in Chief Secretary inhmupui an tih.
Nagaland CM khawm a hung thang
Imphal: June 1, 2015 a Manipura ADC election hung um ding le inzawmin NPF in zanikhan Election campaign Senapatiah an nei tan. Hi huna hin Nagaland CM T.R. Zeliang le NPF President, Dr Shurhozelie Leizeitsu hai khawm an hung thang.
KSO in ni 7 sung economic blokade
Imphal: KSO, Sadar Hills chun May 11, 2015 zanrila inthawk khan ni 7 sung aw ding Sadar Hills huom sungah Economic Blockade an thaw tan a, hi economic blockade hin May 18, 2015 zanril chen awng a tih. State sawrkarin an thil ngen a uksak naw leia an lungawi nawzie suklangnaa economic blockade hi an thaw a nih.
Manipur Governor dingin Dr Syed Ahmed
Imphal/New Delhi: President Pranab Mukherjee chun zanikhan State 5 haia Governor ding a ruot. Press Information Bureau (PIB), Govt. of India President Secretariat thusuok dungzuiin Jharkhand Governor ni lai mek Dr Syed Ahmed chu a term (hun la um sung po) Manipur Governor sin chel dinga ruot a nih. Chun Smt. Droupadi Murmu chu Jharkhand Governor dinga ruot a ni a, J.P. Rajkhowa chu Arunachal Pradesh Governor ding le Tathagata Roy chu Tripura Governor dinga ruot a ni a, V. Shanmuganthan chu Meghalaya Governor dinga ruot a ni a, Arunachal Pradesh Governor ni lai mek Lt. General (Retd.) Nirbhay Sharma, PVSM, UYSM, AVSM, VSM chu a term (hun) la um sung po Mizoram Governor sin chel dinga ruot a nih.
Sin thaw tha lo hai chungah action
Imphal: Anganwadi Centre le ICDS centre hai chu a hmuna fe a an sinthaw dan hai enfel ning a ta, sin thaw tha lo centrehai chungah action lak ning a tih tiin Manipur Social Welfare Minister A.K. Mirabhai chun a hril.
Others:
Saphu kawra sumdawngtu mi 13 man
Chhindwara: May 10, 2015 khan Madhya Pradesh state a Balaghat district sunga Chhindwara hmuna Saphu kawra sumdawngtu mi 13 Forest Department han an man. Hieng sumdawngtuhai hin Saphu kawr hi Madhya Pradesh le Chhattisgarh state a sapeltuhai kuta inthawka kg. 1 ah Rs. 5001,500 a an inchawk, Kolkataah Kg. 1 ah Rs. 6,000 peia zawr, China rama chun kg. 1 ah Rs. 60,000 peiin an zawr hlak niin Chitranjan Tyagi, Chief Conservator of Forest chun a hril.
President in Nightingale Award a sem
New Delhi: India President Pranab Mukherjee chu ni 4 sung cham a Russia rama an zin zo hnungin zani hmasa zantieng khan dam takin New Delhi a hungtlung nawk tah. President chun khuolliena thangin International Nurses Day zanikhan a hmangpui a, sin thaw tha bik Nurses 35 hai chu National Florene Nightingale Awards an hlan tawl. Hi Award a hin pawisafai Rs. 50,000; Certificate le medal a thangsa. Florence Nightingale hi May 12, 1820 a pieng a ni a, a pieng ni hi International Nurses Day a hmang hlak a nih. Hi hma hin Nurses 306 in hi Award hi an lo dawng ta a nih.
Florence Nightingale Award dawng hai lai hin Manipura inthawk Yumnam Soroja Devi, Ms L. Chongnu Kom le Mizorama inthawk Ms Lallungmuani hai an thang.
Delhia ni 5 cham dingin Tajikistan Foreign Minister
New Delhi: Tajikistan Foreign Minister, Aslov Sirojidin Muhridinovich chu New Delhia ni 5 sung cham dingin zani hmasa khan New Delhi a hungtlung a, Union External Affairs Minister Sushma Swaraj le Defence minister Manohar Parrikar hai inpawlpuina a nei. India le Tajikistan hai chun defence le sumdawngna tienga an thangruolna chu a hma neka sukhrat an nuom thu an hril ve ve.
Assam sawrkarin DA 6% in s sukpung
Guwahati: May 11, 2015 khan Assam sawrkar chun an state sawrkar hnuoia thawktuhai le pensioners hai Dearness Allowances (DA) chu 6% in January 1, 2015 a inthawk tiem tan dingin a sukpung. Tuta DA an hmu chu 107% a ni a, 6% a sukpung ani nawk leiin DA an hmu ding hi 113% a tling ta a nih tiin official thusuok chun a hril.
Karnatakaah mi 5 vuok hlum
Chamarajanagara: Zanikhan Karnataka State a Chamaranagaraja district sunga Harale khuoah tu ti hriet ngailo han nupui 2 le nuhmei naupang pakhat thangsain mi 5 an vuok hlum. Vuok hluma um hai hi Tamil Nadu mi, inhlawfa an nih. Hlaw chungchangah inselbuoina a suok a, chu taka inthawka inthatna hi hung tlung ni dingin Police chun an ringhla thu an hril. A san chu thina tuok hai lai hin a contractor a thangsa a nih tiin an hril.
NHRC interim Chairperson dingin Joseph
New Delhi: May 11, 2015 khan National Human Rights Commission (NHRC) Chairman, Justice K.G. Balakrishnan hun a tawp ta leiin NHRC intericm Chairperson dingin NHRC member ni lai Justice Cyriac Joseph chun zanita inthawk khan NHRC interim Chairperson sin a chel tan ta a nih.
Assam Rifles post kap a nih
Kohima: May 9, 2015 zan khan helpawl ni dinga ringhla han Dimapur District sunga Chenmoho village a 5th Assam Rifles Post an va kap a, Assam Rifles hai khawmin an kaplet ve a, hun iemanichen an inkaptuo a, thi le hliem ruok chu an um naw niin Agencies thusuok chun a hril.
Assam University VC an ban
Silchar: Assam University Vice Chancellor, Somnath Dasgupta chun a sina inthawka an banna lekha May 8, 2015 khan Union Human Resource Development Ministryah a peklut. Somnath Dasgupta chun a mimal thil leia inban niin Chanchinbumihai kuomah a hril. September, 2012 a inthawka Assam University VC sin hi a chel tan a nih.
Helpawl han CRPF 2 an kap hlum
RAipur: May 11, 2015 khan helpawl han Jammu & Kashmir a Anantnag district sunga Hatmulla hmuna CRPF picket an va kap a, CRPF personnel 2 an kap hlum. Kap hluma um hai chu Assistant SubInspector, Omkar Singh le Constable Tilak Raj hai an nih tiin zanita Police thusuok chun a hril.
Kum 10 lungin intang dingin
Aizawl: Kum 2014 a Champhai bula Melbuk an ti hmuna Methamphetamine mum 10,000, Rs. 100 lakh manhu vel le Customs pawlin an man Lalruatpuii Bawitlung (26) of Khawmawi, Myanmar chu Aizawla ND&PS Court a Special Judge, Lucy Lalrinthari chun kum 10 lungin intang ding le Rs. 1,00,000 chawi dingin zani hmasa khan thiemnaw an changtir.
Assam MLA intang hun suksei
Guwahati: Assam Congress MLA, Rumi Nath lungin intang hun ding chu Chief Judicial Magistrate, Kamrup chun ni 14 in a suksei nawk. Rumi Nath hi motor inru pawl hotupa, Anil Chouhan leh inzawmna an nei tia intumna leia April 14, 2015 a Police han an man a nih. Anil Chauhan hi international Carlifting racket kingpin niin Police chun an hril.
LS inthung vawihni sukchawl pha
New Delhi: Amethi Food Park cancelna le inzawmin zanikhan Lok Sabha ah sawrkarna cheltu le Congress memberhai nasa takin an insel a, inpui inthung khawm vawihni lai sukchawl pha a nih. Rahul Gandhi chun a biela um le indin dinga a lo riruong tasa chu cancel lova sukpuitling dingin ngenna a siem.
Thangpuina Rs. 20 lakh pei pek ding
Lucknow: Uttar Pradesh Chief Minister, Akhilesh Yadav le Air Marshal K.S. Gill hai chu zani hmasa khan CM chengnainah meeting an nei a, Uttar Pradesh sunga sipai, an dutyna hmuna thi hai chu ram le hnam ta dinga Martyra ngai ning an ta, an sung hai kuomah zangnadawmna suma thangpuina Rs. 20 lakh pei pek ning an tih tiin Akhilesh Yadav chun a hril.
Rel sunga bomb puokah mi 17 an hliem
Raipur: Zani zingkar dar 3:55 vel khan Kolkata khawpui sunga tuolsung Rel, Sealdah le Krishnanagar inkara tlan sungah bomb a puok a, mi 17 na takin an hliem a, RG Kar Medical College & Hospital panpui an nih. Coach 5 ah passenger 2 an inselbuoi a, an ni pahni sukpuok ni dinga ringhla a nih tiin Police chun an hril.
Delhi CM, Dy. CM le mi 4 Court hmaa inlang dingin
New Delhi: Prohibitory Orders an bawsiet leia Court hmaa inlang dinga ko an ni dungzuia an inlangnaw leiin Delhi CM Arvind Kejriwal; Deputy CM Manish Sisodia le AAP thuoitu 4 Sanjay Singh; Rakhi Birla; Somnath Bharti le Ashutosh hai chu Court in May 15, 2015 khin Delhi Metropolitan Court hmaa inlang dingin a ko tawl. Prohibitory Orders hi January, 2014 a an nuorna nei laia an bawsiet a nih.
LSC le Hill Town in Hmar Martyrs Final: Sielmat le Lenlai in Third Place an inchu ding
CCPur: Hmar Martyrs Trophy Saikawt khelmuola inkhel mek chun a vawrtawp a tlung mek a. Zanikhan semifinal inkhel zo a ni tah. Zanikhan Semifinalsah LSC chun Sielmat chu 10 a hnein LSC chu final an kai a, zani hmasa khan Hill Town FC chun Lenlai 21 a hnein Hill Town FC chu final an lo kai ta bawk. Final kai LSC le Hill Town FC han May 16, 2015 khin 12th Hmar Martyrs Trophy Final inkhel an tih.
Chun, May 14, 2015, 3:00 PM khin Semifinalsa tla Lenlai le Sielmat han Third Place inchu/inkhel an tih.
---------------------------------------------------------------------------------------------------------------------
VAWISUN THUPUI
Ngilneina le rorelna thu chu hlain sak ka ta, Aw Lalpa, nangma inpakin hla sak ka tih. Kawng tha faimkima chun vartakin um ka ta, Aw iengtik am ka kuomah hung i ta? Ka in sungah lungril tha famkim putin um ka tih. Sâm 101:12
Editorial:
Competitive Exam-ah a hung inlang ding
Council of Higher Secondary Education, Manipur (CoHSEM) hnuoia ClassXII Examination, 2015 result chu zani hmasa khan puonglang a ni a. Kum 5 liemta sunga pass percentage inhnuoi tum tak a la nih. Kum 2011 a pass percentage chu 75.67, 2012 ah 82.86; 2013ah 81.44; 2014 ah 76.89 le 2015 ah 61.11 pass percentage an nih. Manipur Eduation Minister, Moirangthem Okendro chun pass percentage tla hnuoi hi Class XIi exama studenthai thaw sietna lei a ni naw a, education quality insang lemna lei a nih tiin a hril (comment) a. Minister thu hril umzie chu kum dang hai nekin enruk thaw an tlawm lem a, exam a thienghlim lem bawk a tina niin an lang.
Education Minister thu hril hi an dikna chin khawm um mei a tih. A lo indik tak tak a ni chun lawm um hleng a ta, ei hmasawnna pakhat ning a tih. Ei state a education quality an sang tak tak a ni chun Competitive Examah a hung inlang ding a nih. Competitive Exama hung inlang dan ding chu hunin a la hung hril ding a nih. Education Minister thu hril hi mithiemhai hriltlang dinga tha a nih. Inchukna quality tha chu ram thuoituhai, nu le pahai, studenthai dittlang le ei ramin a mamaw em em el a nih.
Lekha inchukna hi a pawimaw ti ei ram thuoituhai hin an hrietchieng hle a, sienkhawm tuchen hin inchukna chungchangah Manipur hi ei la zan fe deu amani ti dingin a la um. Inchuklai han quality education tha an nei theina ding chun kalphung nghet ve tlet tlawt ei nei a ngai a. “Inchuk nasa unla, ram sung le puotieng sin insang thaw thei dingin thang la ro” tia infui ei taimak vieu laiin, ei rama inchuklaihai hi chuongang sin insang thaw phak khawpin inchukna quality tha ei pek am ti hi inenfie ve a ngai. Inchuklaihai chau ni lovin ei ram thuoituhai le pawl hran hrana thuoituhai khawmin Competitive mind an nei ve a ngai bawk a nih.
All India Service le Central Services hran hrana inziek tling ve thei dinga thang lak a ngai nasatzie hriechiengtuhai chu tuta sawrkar sin thawtu ei officer lienhai hi an ni ngei ring a um a, inchuklaihai mamaw le an ta dinga thil pawimaw hriechiengtu an ni bawk awm ie. Iengleia All India Service le Central Service tienga inhlangkai thei hi tlawm ta vieu am ei nia ti khawm hi ei sawrkar le ei mithiemhai hin sui chieng ve hai sienla nuom a um hle.
Ei hril ta angin ei ram thuoituhai khawmin competitive mind hi an nei ve a ngai takzet a nih. A bikin All India Serviceah state danghai an lut rui rui laia ei ni ei inlang ve mang naw a ni chun, a khawlam ei thaw suol a, iemana ei thangmawbawk tia ei indap ve ruoi a hun ta takzet a nih. State dang ei la el phak naw a ni khawmin, ei state sunga khawm, “ tu sawrkar laiin am All India Service (IAS, IPS, IFS etc) ah Manipur nunghak le tlangval inziek tling an tam tak? “ ti dam hi sawrkarna cheltu han inelnain hmang phak ve hai sienla chu hma ei sawn pha ngei ring a um.
Bank le Central Service dang dang haiah chun ei nunghak le tlangval hai a mawi le a awm tawkin an inziek tling hlak a, lawm a um, sienkhawm duthu a sam naw a, lawmna a la kim thei nawh. Kum tinin ei nunghak le ei tlangval hai hi a mawitawk All India Service a hin inziek tling rawp hai sienla ti chu ei duthusam a nih. Ei mihausahai khawm hin Competitive mind an nei a, an sum le paihai ram le hnam ta dinga an invest thiem huna chun, India rama a se tak ei hauna hi a tha tiengin ei inkhum mawi thei ngei ring a um.
