Hmar Martyrs’ Day Silver Jubilee, Mauchar Sinlung Hills, Mizoram ah ropui taka inser a nih

(Inbiekpawnna ṭhatnaw leiin a hun takan chanchin ei insuo theinaw leiin pawi ei titak zet) 

Aizawl, 21 May, 2015 (Virthli News): Ram le hnam ta dinga tlunglu lo chan ta hai hrietzingna ni  ‘Martyrs' Day’ vawi-25 na chu hmun dang danga Hmar nauhai hmang le inser ruolin Mauchar Sinlung Hills, Mizoram a khawm HSA Mauchar Unit huoihawtna hnuoiah tarik ni 13-16 May, 2015 sung khan kum danga lo thaw hlak ang bawkin Local Football Tournament buotsaiin ropuitak hmang le inser a nih. Tarik 13-15 sung khan local tournament boutsaiin Martyrs’ Day puol bika insukhlimna buotsai a ni a, hi tournament a hin Team sawm le pahni(12) an suok a, May ni 15 khan final ropui taka khel a nih. 'Mauchar football Club' chu a pakhatna niin, 'Eleven star football Club' chu a pahnina an nih. Hi baka hin NGO dang dang han Kêl (goat) inchawiin an inhnel bawka HSA Mauchar Unit chun Kelchal lien tawk tak an pet suok bawk.   

Martyrs’Day nipui ni tak May ni 16 (inrinni) hi ropui taka inser ani a, Community Hall mi 800/900 in lengna chu mipui inkenglo khawp rakin an fe khawm a nih. Hunser hi Upa Lalduhkima UPC (NE) in a hmanga, Martyr hai inzanna le sunna (Silent Prayer) hi Upa Vanlalhriata (PCI) in a hmang bawk.

Hi baka hin, NGO hrang hrang, HPC party le Club hrang hranga inthawkin Martyr hai inzana parṭhi inhli tirna nei a ni a, hnam ṭhuoituhai a inthawkin thu ṭha tak tak ngaithlak a ni bawk.                       

Hi hun hi HSA Sinlung Hills Jt. Hqrs. Asst. Gen. Secretary Tv. VL. Khawbung chun a hmang pui bawk. HSA Gen. Secretary chun thuhrilna neiin, Hnam inpumkhatna pawimaw zie dam, mani tawng hmang uor a ei ṭawng hin khawlai leng sienla, ei ṭawng hin lo lam fe sien, siemtu pathien ṭawng  mi pek, ṭawng mawi em em hi inzapui lo a hmang uor deu deu dingin mipui hai ancha,.

A hril peina a chun, hnam(tribe) pakhat eini ve na a hin tribe certificate Hmar tribe anga la seng dingin mipui le students fe khawm hai an cha bawk. "Hnam ta dinga martyr lo chang ta hai chu ko ko inla khawm ei ko kir chuong ta naw ding ana, an ni hai chun an iengkim inhlanin hnam ta dingin an thi a, eini dama la um hai khawm hin hnam ta dinga thil ṭha thisan ding tamtak ei nei a. Duamna, dawizepna, inthuruol nawna le a dang dang hai dam hi basan/thisan a tuta inthawka ṭhanghar thar dingin mipui fe khawmhai ancha bawk anih.

Thuhriltu dang Pu. Vanlallien HPC Party khawmin HPC Movement inṭan dan le Mizoram sorkar milo sawisak dan ta hai popo a hrila, hmar hai hi ei har thar ṭan meka tuta hma ang kha eini ta naw a, nuom nuoma sawisak mei mei thei ding eini ta nawh ti thu a hrila, a hun le ni tak hre naw inlakhawm ram chu ei la nei tho tho ding a nih. Chuleichun mipui hai khawm ṭhuoituhai thu, awia mani hmazawn senga ṭhangla thar dingin a fiel bawk.

HSA Tuivawl Block President Pu. JH. Chhuana khawmin Education pawimaw zie hrilin, hnam anga ei par suok theina ding pawimaw tak chu inchûkna ani leiin, inchûkna tieng mani nauhai seng ṭhang la pui dingin nu le pa hai an cha a, student's hai khawm inchûkna kawnga theitawp suo dingin a ngen bawk.                   

Tu kum Martyrs’ Day hi kum dang popo nekin mipui fe khawm an tam a, programme hi zing dar 10 ânthawka chawhnung dar 1:30 chen nei a ni a, thuhril ngaithlakna kawnga khawm mipui an fel hle a nih.