Hmar Inpui 7th Assembly Hmarkhawlien ah nei

Hmarkhawlien, May 15, 2015(Virthli News): Hmar Inpui (Hmar Supreme House) 7^th Assembly chu vawisun khan RPC Training Hall, Hmarkhawlien, Cachar hmuna nei a nih. Hi huna hin Hmar Inpui Region tin, HYA GHQ, HSA GHQ le HWA palai hai chu kimtakin an fekhawma Hmar Inpui President inrawina hnuoina rorelna le Hmar Inpui Assembly Secretariat thlangna hai an nei.

Assembly hin Barak Valley-a Hmar khuo le ramhai humhal le maksan hnunghai hluo kir nawk a ni theina dingin Hmar Inpuiin theitawpin hma la ding le hi le inzawma hmalakna report kimchang chu July 2015 bo hma ngeia peluta Hmar Inpui Executive Council hmasatak a ngaituo le bawzui ni ngei dingin an rel a nih.

Hmar Inpui Constitution (review), November 6, 2014 Special Assembly-in ‘in principle’-a a lo pawm tah chu Hmar Inpui 7^th Assembly (May 15, 2015; Hmarkhawlien, Cachar, Assam) hin hmang le zawm tan nghal ta dingin an namdet bakah Financial Rules & Policy chu Executive Committee buotsai dingin an rel a, Assembly nawka namdet ngei nisien tiin an rel bawk a nih.

Hi Assembly hin Hmar Inpui Constitution-a um angin 2017 Assembly (8^th Assembly) chena Speaker dingin Prof. Vanlalnghak, Shillong, Meghalaya le Secretary dingin Pu Lalthalien (Imphal, Manipur) hai chu lungruol takin an thlanga Deputy Speaker I chu Executive Committee ruot dingin an sie a; Deputy Speaker II le Deputy Secretary chu Barak Valley Region le NC Hills & Karbi Anglong Region haiin June 2015 bo hma ngeia anni hung ruot ding le Headquarter a an peklut dingin an sie bawk a nih.

Mizoram Hmar Welfare Association Vice-Chairman Pu Lalmuanpuia Punte in May 3-12, 2015 sunga Union Home Minister, Jt. Secretary (NE), Ministry of Home Affairs le central-a national party thuoituhai Mizoram, Manipur le Assam-a Hmar political issues dang dang le inzawma an inhmupuina thu hi huna hin report a pek a; Tv. Vanlallien Pulamte-in Cachar, Hailakandi le Karimganj districts, Assam-a Hmar hai Scheduled Tribe enlistment le inzawma hma an lo lakna hai report pekna a nei bawk.

Assembly rorel hi thataka zo a ni a, Assembly palai iemanizat fekhawm hai chu Hmarkhawlien ah la cham in zinga (16^th May) Hmar Youth Association, Hmarkhawlien in  Hmar Martyrs’ Day programme puithu taka a buotsai tum a chun an la thang ding a nih.