Hmasawnna Thar | 8 April, 2015

Local:

Minister in Mission Indradhanush le JE campaign a hawng

CCPur: Dist. Task Force­Immunisation, CCPur huoihawtnain zani zantieng 3:00PM khan YPA  GHQ Hall, Hiangtam Lamka hmuna Mission Indradhanush & Japanese Encephalitis campaign hawngna hunser hmang a nih. Hi huna hin Health Minister Phungzathang Tonsing chun khuolliena \hangin Mission Indradhanush le JE campaign hi a hawng. Mr Lunminthang Haokip, IAS, DC, CCPur Guest of honour le  Dr O. Ibomcha Singh, Director, Health Services, Manpur le Dr. K. Rajo Singh, Director  Family Welfare Services hai Chief Host in an \hang.

Health Minister chun, December 25, 2014 Christmas nia India PM Narendra Modi in a lo hawng Mission Indradhanus hi natna chi 7­ Diphtheria; Whooping cough; Tetenus; Polio; Tuberculosis; Measles le Hepatitis B hai sukdamna ding  mission a ni a, mi \hen tam tak chun Christmas ni kher khera  iengleia hawng am a nia ti in an ngaimaw hle a, sienkhawm hriselna ding tiengpang a ni leiin ei lawm ding a nih. Indradhanush hnuoia natna chi 7  hai dona dingin sawrkar thlungpui in hi Mission a hung thaw dinga districts 201 hai lai CCPur, Chandel, Ukhrul le Tamenglong hai  khawm a \hangsa ve a ni thu, hi Mission thawna dinga thlang district haia hieng natna chi 7  hai \ha taka do  an ni ding thu, hmatieng district dang haia khawm thaw a la ni pei ding thu a hril.  Hriselna hi mihriem ta dinga thil pawimaw tak a ni a, mitinin hriselna a hun taka in check­up a \ul a, ei hriselnaw chun fak le dawn an hnik nawh. 

    

Hi Project a hlawtling theina dingin Health Workers hai bakah ASHA Worker han mawphurna lientak an nei  thu hrilin taima taka an sin thaw dingin a ngen.  World health Day a ni le inzawmin  hriselna dinga thil pawimaw  tum tum, kut sawpfai zing ding, thil suong hmin sa chau fak ding,  thlai hring a tam thei ang tak fak ding, Chi le Chini a tlawm thei ang fak ding le a dang dang hai a hril.   Health Minister chun  ASHA Worker 3­ Lal\hating of Saikot; Chinneilam of Thenmol le Lalmuanpui  hai kuomah Apprciation   hi huna hin an hlan.

    

Dr O.Ibomcha  chun, Indradhanush hin natna chi 7 hai a huom a, hi mission thar hi April­July sung In tin (door to door) campaign thaw a ni ding thu, naupang immunization thaw lo hai  a tam thei ang tak thaw a ni ding thu a hril.

    

DR VC Pau chun, hi mission thaw ve dinga ei district a \hang ve lawmum a ti thu hrila, chu laizing chun  district target 2014­15 4474 lai 3508 achieved in 70% a tling thu. Pregnant women district target 4922 lai 5400 achieved a ni  a, sienkhawm state report ah 18% chau achieved a ni chu pawi a ti thu a hril a, hi leia  Dist. 201 laia thlang vea um ei ni thu a hril.

World Health Day hmang a nih

CCPur: Zani 11:30AM khan World Vision India, Imphal Bal Swasthya Project huoihawtnain Health Worker Training School­ah “World Health Day Program” hmang a nih. Hi huna hin Dr F.  Thienkhogin, DACO khuollienin a \hang.

Dr. F. Thienkhogin in thu a hrilnaa chun, World Vision, Imphal Bal Swasthya Project in CCPur District­a inruithei leia naupang fahra mi 500 vel \hangpuina an pek thu, nu le pa han \ha taka an thlawpna leiin mi 500 vel enrolment thaw theia um a ni thu a hril a.  Kum 1947 –a Indopui pahnina (World War II) hun laia World Vision hi indin a ni thu, World Vision hi WHO hnuoia um  niin  India rama khawm fund tam tak a hung pek a, Manipur­ ah WHO chun  TB Deptt le HIV/AIDS deptt  kuoma \hangpuina a hung pek thu a hril. World Vision hmalakna chu lawmum a ti thu hrilin an hmalakna  mitinin \awng­\aipui hlak dingin a ngen.

Hi huna hin World Vision chun naupang hai kuomah Assemese Mix packet 5 le Horlicks bawm 1 bakah puitling hai kuoma Multi Vitamins & Phingpui damdawi bottle 1 seng mi pakhat pei kuoma an sem.

KKL in \hangpuina thil an sem

CCPur: Kuki Khanglai Lawmpui (KKL) GHQ chun zanikhan KKL Complex, IB Road­ah  khuo iemanizata  kangmei suokin in a kang neitu hai  kuoma \hangpuina thil an sem a. Sungkuo pakhatah bufai bag 2, sil le bil bag 1 seng le Autorickshaw bahara dingin Rs. 200/­ seng an pek bawk.  KKL in \hangpuina thil an pek hai lai hin Leimataka In 1, Loilamkot a In 1, Ballei khuoa In 1, Thanggei village, Henglep Sub­Division a In 3, Tuilaphai khuoa In 1, G. Khomunnom a In 1, Singngat Thadou Veng­a In 2 le Tuinom khopi­a In 1 a kang  neitu sungkuo hai an \hang.  KKL chun \hangpui ngaihai kuoma \hangpuina  a la pek pei ding thu KKL President Kamthang chun a hril.

Clerk sin 1 a ruok

CCPur: Tipaimukh Road Transport Co­Operative Society Ltd. hnuoia Hmarbiel Counter Clerk Post 1 a ruok. Inhnikna neihai chun hnina lekha April 18, 2015 chenin Pu Lalneikung of Rengkai, Secretary, TRTCS kuomah peklut ding a nih. Interview April 20, 2015, 11:30AM in nei ning a tih. Counter Clerk dinga laka um chu thla khatah lawmmanin Rs. 3,000/­ pek ning a tih.

2­ Day Parental Training on Disability

CCPur:  SSA­RTE/CCPur hnuoia IED/SSA huoihawtnain zani 11:00AM khan Synod Hall, IB Road, CCPur­ah Children With Special Needs nu le pa hai ta dingin ‘2­day Parental Training on Disability’ \an a ni a, training hi T. Goukhomang, ZEO, CCPur in a hawng.

ZEO chun, RTI hnuoiah naupang kum 6­14 inkar hai chu school an kai ngei ngei ding le Class VIII an passed ngei na dinga sawrkarin hma a lak thu a hril a. Piengphunga ruolbanlo hai sawrkar chun hiengang naupang hai  mi enkawlpui a nuom a, Child with Special Needs tiin an buk nghe nghe a nih tiin a hril. Nu le pa training­a \hang hai chun a tam thei ang tak inchuk dawk dingin an fui tawl. Training sung hin mi 8 in training peng an tih.

Kum 2015­16 a dinga NYC

CCPur: Kum 2015­16 a dinga National Youth  Corps (NYC) ding ruotna April 13,  2015 sun dar 11 khin DC, CCPur Office­ah nei ning a tih. Inhnikna neihai ta dingin mani Original documents hai chawia  va \hang el ding a nih tiin DYC, NYK, CCPur chun inhriettirna a siem. NYCs  ni tasa, la ni nuom pei haiin DYC, NYK, CCPur inhmupui ding a nih.

NFCH meeting

CCPur: April 18, 2015, 12:00Noon khin  DC Office­ah DC, CCPur inrawinain  National Foundation for Communal Harmony (NFCH) meeting um a tih. Hi huna hin case 3/ 4 vel um hai hriltlang ning a tih.

Headline:

Ceasefire  Agreement bawsetuhai chungah action lak ning a tih­ Kiren Rijiju

Itanagar: Zanita Itanagar hmuna Union Minister of State for Home Affairs, Kiren Rijiju in Chanchinbumihai an hmupuinaa chun, sawrkar thlungpui chun Ceasefire Agreement bawsietna hi a ngai thei naw hle a. Ieng pawl khawm nihai sienla Ceasefire Agreement bawsetuhai chungah chun action la pei a tih. Ceasefire puongna biel puotienga tu pawl khawm an um le an che ding a ni nawh tiin a hril. April 2, 2015 khan NSCN ni dinga ringhla han Tirap District,  Arunachal Pradesh­ah  Army an lambun a, Army Jawan 3 an thi  naw! tia  Chanchinbumi han an hrillang le indawnna an siem Kiren Rijiju in a dawnna a chun, ieng pawl khawm ceasefire  operation area puotieng an che ding a ni naw a, ceasefire dan kal a nih. Arunachal Pradesh hi Ceasefire Agreement in a huom naw leiin Arunachal Pradesh a hin NSCN pawl an  um le an che ding a ni nawh. Hi inlambunnaa \hanghai hi Myanmar tieng an lut leiin an chunga hmalak dan ding sawrkar thlungpuiin a ngaituo mek. Ceasefire Agreement an bawsiet pei  chun beilet ve ning an tih tiin a hril.

Tirap inlambunnaa \hang hai chungah action lak ni ngei a tih. Tu pawl khawm nihai sienla tharum insuona an tawpsan naw a, an inpe bawk naw a, an chetna an sunzawm pei chun inbiekpui ninaw nihai.  Tharum insuona an tawpsan a, an ralthuomhai leh inpe a, inbiekna dawkan an hung pan nuom  pha leh inbiekpui ning an tih. Tharum an insuo sung hin chu inbiek thil thei ninaw nih. Inpe hai sawmdawlna  pek le inbiekpui dan  ngaituo ning a tih. Ieng helpawl khaw nihai sienla Political level­ah inbiekpui ni tanaw nihai a, an biepuitu ding Interlocutor ruot an ni ta a, Interlocutor­hai chu hma la dinga hril an ni tah tiin Kiren Rijiju  chun a hril.

Hieng laizing hin Shambu Singh, Joint Secretary, Ministry of Home Affairs (NE) chun Arunachal Pradesh State­a  districts  12 dang haia khawm Armed Forces Special Power Act (AFSPA)  hnuoia sie an nih. Tuhin Districts 15 zet chu kum khat sung Disturbed Areas a puong an ni ta a nih.

Imphal:

Catholic School­hai khar nawk

Imphal: Zanikhan Imphal khawpui sunga Catholic Schools 5 Little Flower School; Catholic School, Canchipur; St. Joseph, Sangaiprou; Christ Joyti School, Mantripukhri le Nirmalabas  School hai chu ni dang ang bawka hawng nawk an ni a. Amiruokchu, first period zovin thupuong um lovin student­hai an intieng tirkir le  hieng School­hai hi khar nawk an nih. An thil ngen sukpuitling pek an ni hmakhat khar dinga vautu an um a, chuong hai  (anti social group) chun an  thu le hla lova Catholic Schools 5 hai hi an inkhartir nawk niin ei thu dawngna chun a hril.

Minister in Old Age Pension sum a sem

Imphal: Zanikhan Manipur Social  Welfare Minister A.K. Mirabhai Devei in kum 2 sunga  mi Manipur Old Age Pension (MOAP) hnuoia mi Old Age Pension sum a sem. Imphal East le Imphal West  District sunga  mihai chu April 10, 2015 in 1st Manipur Rifles Ground, Imphal­ah sem a ni ding thu le District danga mihai chu an District Headquarters senga Police Station haiah sem ning a tih tiin AK Mirabhai Devi chun a hril. Bank Account fe thlenga pension sum hi sem dinga ti a ni a, sienkhawm pitar le putar Bank Account hawng lo an um a, pension sum semnaah harsatna a um  leiin hun iemanichen chu official­hai sem dinga riruong nawk a nih tiin Minister hin a hril. Old Age Pension sum sem ding hi kum 2 sunga mi niin AK Mirabhai Devi chun a hril.

Motor eksiden leiin Tadubi­ah mi 2 an thi

Imphal: Zanikhan Senapati District sunga Tadubi­ah motor eksiden leiin mi 2 an thi a, mi \henkhat an hliem niin ei thu dawngna chun a hril.

Others:

R. Buhril Adviser, Inter State  Council

New Delhi: Zani hmasa khan Modi sawrkar chun a sawrkar hnuoia Additional Secretary Level Officer­hai sin chel a sawidanglam tawl. R. Buhril, IAS chu Adviser, Inter State Council sin chel dinga ruot a nih. Nilan Squhney chu Secretary Central Vigilance Commission; Alok Kumar chu Additional Secretary, NITI Aayog; Amarjeet  Sinha chu Additional Secretary, Ministry of  Rural Development, Anuradha Mitra chu Additional Secretary, Ministry of Defence, M.R. Dalawai chu Additional Secretary, Department of Agriculture & Cooperation le Nutan Guha Biswas le T. Vijayakumar hai chu Additional Secretary, Women & Child Development Ministry dinga ruot an nih.

NSCN­Reformation Or NSCN­R tia ko

Dimapur: Y. Wangtin \huoina hnuoia NSCN group chun an pawl hming dingin NSCN­Reformation Or NSCN­R tiin an hming ding an phuok tah. Hi lei hin Wangtin \huoina hnuoia NSCN pawl chu NSCN­Reformation or NSCN­R tia ko an ni ta ding a nih. Mon hmuna Joint Council meeting an nei a, chu taka hi hming hi an phuok a nih. An ni pawl hi NSCN(K) a inthawka ban, Y. Wangtin le P. Tikhak \huoina hnuoia mi an nih. An sawrkar hming  dingin Government of the People’s  Republic of Nagaland or GPRN ti an inbuk.

Helpawla intum mi 5 kap hlum

Hyderabad: Helpawla intum pasal 5 hai chu Hyderabad Court hmaa inlangtir dinga Warangal District, Telangana a inthawka motor a phur an ni laiin zanikhan lamlakah tlan hmang an tum leiin a vengtu Police han an kap hlum. Hi thil hi Aler le Jangaon inkara  tlung a nih. Hieng mi 5 hai hi  kum 2010 a man, Warangal Central Jail­a khum an nih. Mi 5 hai laia pahnihai chu dan puoa hnawl students Islamic Movement of India (SIMI) members an nih.

An thil fak ngeinaw leiin labours 14 an thi

Shillong: April 5, 2015 khan Dhubri district, Assam mi 14, in bawlnaa sinthawtu (labours) hai chu an thil fak ngeinaw leiin an Manager rawiin Saipung, East Jaintia Hills, Meghalaya hmuna an camp sungah an thi vawng. Labour hai hin ramhnuoia thei lain  Chutney in an siem a, zantieng bu an fak huna an hme seng niin ei thu dawngna chun a hril. Mithiruonghai hi April 6, 2015 zingkar khan hmu an ni a, an hminghai ruok chu hriet a la ni nawh.

ISRO Director tharin Annadurai

Bengaluru: Indian Space Research Organisation (ISRO) Satellite Centre, Bengaluru Director thar dingin Mayilsamy Annadurai ruot a nih. Mr Annadurai hi ISRO Outstanding Scientist le Director a hlangkai a ni hma hin Programme Director, Indian Remote Sensing Sattelites and Small Satellite system sin lo chel a nih.

Kel that khawm a khap el thei

Mumbai: Maharashtra a BJP  sawrkar chun Bawng that chau ni lovin Kel that khawm a khap el thei niin an hril. Zani hmasa khan Bombay High Court chun Maharashtra Animal Preservation (Amendment) Act hnuoia iengleia Maharashtra a BJP sawrkarin bawng that chau a khap am? tiin Maharashtra a BJP sawrkar chu  indawnna a pek a nih.

IIM, Shillong 6th Annual Convocation

Shillong: Zanikhan Mayurbhanj Complex, Shillong­ah IIM, Shillong 6th Annual Convocation nei a ni a, Management inchuk students 150 an graduate.  Students 119 in Post Graduate Diploma in Management (PGDM) le Students 31 in Post Graduate Programme for Executive  Diploma an dawng.

Bihar­ah  Rs. 1 lakh crore package

New Delhi: Assembly election nei ding Bihar chu Narendra Modi sawrkarin Rs. 1 lakh crore package pek a tum. BJP chun Bihar Assembly  election hung um dinga hin hrat filawra sawrkarna siem a tum a, hi leia hi Bihar mipuihai suklawm a tum nia hril a nih. Tuhin Nitish Kumar CM nina hnuoia JD(U) chun Bihar­ah sawrkarna an chel mek a nih.

Lungin intangin a hlaw a lakzing

Kolkata: Multi­Crore Saradha Scam a inrawlna neia intum leia man le December, 2014 a inthawka Alipore Central Jail a intang ta chun thla tin a hlaw a la lakzing. Lungin a intang si, thla 3 hlaw  la ta hi West Bengal Transport Minister, Madan Mitra a nih. West Bengal­a Cabinet minister­hai thla khat hlaw chu Rs. 7,500 le minister of state/Parliamentary secretaries hai hlaw chu Rs. 7,300 nia hril a nih.

Thingraia sumdawng mi 20 kap hlum

Tirupati: Zani zingkar inhma tak khan phalna nei lova thingraia sumdawngtuhai le Police le Forest personnel \hangruolhai Seshachalam Forest, Chittoor district hmuna nasa takin an inkaptuo a, thingraia sumdawng mi 20 kap hlum an nih. Andhra Pradesh state a Police le thingraia sumdawngtuhai inkaptuonaa chun  a la nasa tak niin Kanta Rao, DIG, Special Task Force chun a hril.

assenger mawngkuo­a thup rangkachak man

Mangaluru: Zani hmasa khan Mangalore International Airport, Kenjar­ah Jet Airways a Dubai a inthawka hung chuong passenger pakhat Sabir Berka (19) in a mawngkuoa a thupruk rangkachak 585.300 grams, Rs. 15,71,944 manhu chu Customs Officers han dapdawkin an man. Sabir  Berka hi Kasagad, Kerala hmuna cheng a nih.

Ni 4 sungin loneitu 30 an thi

Lucknow/Chandigarh: Ruotui tam le rielin an thlai ching hai nasa taka a suksiet leiin  ni 4 liemta sung khan Uttar Pradesh, Haryana, Punjab le Madhya Pradesh state haiah  beidawngin loneitu 30 lai zet anni le anni an inthat niin ei thu dawngna chun a hril. Sawrkar  ruok chun loneitu 30 hai  thina thu hi a hrietpui naw thu a hril.

Delhi­a misuol turu man a nih

New Delhi: Delhi khawpuia misuol turu, tuolthatna, tuolthat tumna le sum inlakpekluina haia cases dawrzawn tel nei le ‘Most Wanted’ a puong Neeraj Bawana chu zani zingkar inhma tak khan Delhi Police a Special Cell han an man. A unaupa Rajesh Bawana chu ni kum khan man a ni ta a, a nu le a unaupa dang hai chu tulai hnai el khan IGI Airport, New  Delhi­ah man an lo ni ta bawk.

Sipai  1,700 a hawnpuia phumna thlan

Baghdad: Sipai 1,700 a hawnpuia phumna (mass graves) ni dinga ringhla Iraq rama hmu le cho mek a ni a, mi 12 ruong hmu a ni ta  tiin ei thu dawngna chun a hril. Hi thlan hi US Army hai inkulna bul hnai, Tikrit a  Camp Speicher a inthawka hla rak lova um a nih. June, 2014 hun lai vel khan hi lai hmun hi Islamic State group  helpawl han an thu hnuoia an sie le sipai tam tak thata hmun khata an phumna hmun ni dinga ringhla a nih. Tuhin hi lai hmun hi Iraq Army han an lakkir le an thuhnuoia an sie nawk ta a nih.

-------------------------------------------------------------------------------------------------------------------

VAWISUN THUPUI

Chuleiin, nangin an kuomah, Lalpa chn, hieng hin a tih tiin hril rawh: Sipaihai Lalpa chun, ka kuomah hung kir ro, a tih; chuongchun, in kuomah hung kir veng ka tih, sipaihai Lalpa chun a tih.   ­ Zekaria 1:3

Editorial:

Tuilien le thlipui  laka lo inveng lawk

|hal hun a tawp a, fur hun a hungtlung a. Khaw in\hal leia tui harsa em em el kha ruosur leiin a hung re ta a. Thil lawmum takel a nih. |hal hun le fur hun hai siemtu ei Pathien hi a thil siem hai chungah hin a \ha ngei el. Tuta neka tam lem le hrat lemin ruosur le thli hrang  a la hung um pei ding a ni leiin tuilien le thlipui hrang ding lakah mani thei dan dana ei lo invenglawk hi thil \ul le pawimaw a nih. Sawrkar le mimal khawmin invenglawk theina  chin ei nei seng leiin tuilien le thlipui hrang laka ei inveng theina dinga insingsat hun a nih. Invenglawk na nana chun invenglawk naw nek chun ei tuor a nep lem ding a nih.

Ei inchung kilna a la nghet \ha am, ei electric lakna hrui a fe dan an dik a, a khitna annawleh a kildena hai a nghet \ha tawk am ti hi  in tinin ruopui vanawn le thlipui  laka ei tuok le tuor hmaa lo enfel a, siem \hat \ul hai lo siem \hat hi ei mawphurna seng a nih. Ei lo invenglawk naw leia siet tuok thei ve ei ni seng leiin siet ei tuok hmaa lo invenglawk chu ei \hattlang sengna ding a nih. Pa inrep khip khep hai chun hril ngai lovin an insunga siem \hat \ul hai an lo siem \ha hlak.

Tuilien, thlipui, riel le  \ek hai leia lo invenghim hmak chu thil thei ninaw nih. Amiruokchu, ei lo invenglawk a, siem \hat \ula inlang hai ei lo siem \ha chun ei tuor a nep thei ngei ring a um. Siet ei hang tuok meu hin chu an hnu tieng a lo ni ta hlak. Chuleiin, an hnuk siet  hmaa ei lo inralring le siem \hat \ul hai ei lo siem \hat hi chu ei mawphurna a nih. Ei lo invenglawk a, siem \hat \ula  ei hmu le ei hriet hai ei lo siem \ha a, ruosur lei le thlipui leia siet ei lo tuok  pal khawmin ei khuo le veng hai lunginsiet le \hangpui nuom khawm  hlawng ei tih.

Ei rama hin Concrete building hlui le \awp tak tak hmu ding a um nuol ta a. Thlipui hrat dawlzo  ta lo ding le dang hne ta lo ding rangva In le Ngaidi In tam tak a um bawk. Hieng hai hi endik a, a \ul anga hmalak vat vat a ngai ta hle a nih. Tulai hnaia thlipui hrang leia thina le  hliemna tuok a tam lem hai khawm hi in chim le bang chim lei a nih ti chanchinbu tiemtu  han ei hriet seng ring a um. Building  hlui la ni lo khawm derdep taka bawl building hi a um nuol a, hiengang building hai hi sawrkarin endikin a \ul chun \hiek nghal dingin a neituhai thu pe  el sienla chu thina le hliemna  hai laka ei himna a ni ngei ring a um.

Churachandpur town le a se vel haia khawm hin concrete building hlui ta em em el, a guarantee bo ta ti hriet ngawi ngawi hmu ding a um nuol. Hieng building hai hi a him tanaw leiin an hma thei angin  state PWD  in mihriem chengna dinga him ta lo (unsafe for living) tiin Certify ta sienla thina le hliem theina laka ei himna ding ni ngei a tih. Ei state sawrkarin mihriem chengna dinga him ta lo building le in hai hi chu \hiek dinga Order an suo ngam nuom a um khawp el.

Mimal in le building chau ni lovin sawrkar building khawm \awp le hlui tak takel, a sunga cheng la um zing hmu ding a um nuol. Hiengang building­hai lem hi chu Disaster Management Authority han bawzuiin  an rang thei anga \hiek dingin Order insuo el sienla nuom a um. Vai rama chun hiengang  building hlui, \hiek dinga ti tasa \hiek lova a sunga la cheng lui rawp hai chunga action an lak hlak ti chanchinbu haiah  ei tiem hlak. Ei state sawrkarin hieng tiengpang hi ngaimaw ve sien nuom a um ngei el.