Responsive Ad Slot

Hmasawnna Thar | 04 March, 2015

Wednesday, March 4, 2015

/ Published by Ralsun Hmar
ZEO hlui le thar han charge an inhlan
CCPUR: Pu T. Goukhomang Simte chun zani 11:00AM khan ZEO, CCPur Office-ah Pu Lalsanglienkuta inthawk ZEO, CCPur charge a lak tan a, a sin a thaw tan nghal. Pu T. Goukhomang hi Pastor Khaipu Gangte in tawngtaipekna a nei.


Election Commission in NERPAP a tlangzar
Manipur a khawm CEO in in NERPAP tlangzar a ni thu a puong

NEW DELHI: Election Commission (EC) chun zanikhan India ram pumpui-ah National Electoral Roll Purification and Authentication Programme (NERPAP) a tlangzar. Hi NERPAP thiltum tak chu Electoral Roll fel lo le indiklo umlo dinga siem (error free) a nih. Hi NERPAP programme hnuoia hin vote neitu (electors) hai Electoral Photo Identity Card (EPIC) data chu Aadhar le thlungzawm a ni bakah electors hai thlalak quality thalema siem chu NERPAP thiltum lai a thang bawk.

Hi thila hin electors hai chun Election Commission internet websites a a inthawk National Voters Service portal fethlengin sms, e-mail, mobile application hmangin Aadhar number thun thei an ta, state call centres hai 1950 call in Aadhar number an thun/thlungzawm thei ding bakah Aadhar number le EPIC number hai hard copy in an peklut thei bawk ding a nih.

Hienghai baka hin Electoral Registration Officers han Special Camps, Voter Facilitation Centres, e-Seva centres le Citizen service centres hai hawngin Aadhar number lakkhawm le thunlutna sin thawng an ta, Booth Level Officers (BLOs) han electors hai details lakkhawmna dingin intin an sir ding, India ram pum huop (nation-wide) special camp chu April 12, 2015 in Electoral Registration Officer in huoihawt a tih.

NERPAP hnuoia hin hmun pakhat neka tama vote nei hai ta dingin mani ditthlang theina nei bawk an ta, hi thila ding hin Form-7 hmangin vote an nei nuomna constituency thlang thei an ta, Form 7 hi National Voters Service Portal annawleh
Electoral Registration Officer in Facilitation Centres, Special Camps le centre a hawng haia pelut thei bawk an tih. Hi thil hi August 15, 2015 chena zo hman tum a nih.

Election Commission of India in National Electoral Roll Purification and Authentication Programme (NERPAP) thaw dinga a tlangzar le inzawm hin Chief Electoral Officer(CEO), Manipur O Nabakishor khawmin zanikhan NERPAP tlangzar a ni thu hi a puong a. NERPAP hnuoia hin Commission chun multiple registration, hming, EPIC number a kawp a thuoa um hai sukbona dinga sin a thaw ding thu a hril.

In pakhatah Hand
grenade hmu
IMPHAL: Security Forces han zanikhan Moirang Police station huom sunga Minarjaan Bibi (30) w/o Mansur Ali of Kwakta Meena bazaar chengnainah China siem Hand Grenade an hmu. Minarjaan Bibi hi Kwakta Ward No.2 a Kwakta Gram Panchayat member ni lai mek a nih. Bomb hi Bishnupur Police a bomb disposal squad han va lain pawi tawklo dingin lo lai an sukpuok.


SSA hnuoia contract basis post 435 a ruok
CCPUR/IMPHAL: Sarva Shiksha Abhiyan, State Mission Authority, Manipur hnuoiah Contract basis-a thla 11 thawk ding post 435: Assistant Engineer (Civil) post 4; Architech Post 1; Section Officer post 1; System Analyst post 12; Data Entry Operator post 17; Accountant Post 2 ; Accountantcm- Support staff post 23; Subject Specific Resource Person (language) post 41, Mathematics post 41, Social Science post 31, science post 33; Cluster Resource person 225 le CWSN Resource Person post 4 a ruok. Inhnikna nei hai chun thu chieng lem le Application form www. manipureducation.gov.in le www.ssamanipur.nic.in ah hmu le download thei ning a tih. Application hi March 2, 2015- March 12, 2015 inkar sungin State Project Office- ah SC/ST hai ta dingin processing fee Rs. 50/- le General/OBC Rs. 100/- leh peklut thei ning a tih. Aplication form peklut theina hun tawpna tak chu March 20, 2015 ning a tih.


Imphal-Moreh road ah X-ray vehicle scanner
IMPHAL: MLA L. Ibomcha in thu a putlut dawnin Manipur Dy. CM Gaikhangam chun, ni iemanizat liemtaa Imphal-Moreh Road-a Khudengthabi hmuna RD Minister Francis Ngazokpa le MLA Korungthang hai motor cheltang an nina chu state sawrkarin a ngaimaw thu hrilin motor cheltangtua intum Assam Rifles officer hrem dan ding ngaituo mek a nih. Imphal-Moreh Road-a check tam taluo leia inzinmi han harsatna nasa tak an tuok leiin sawrkar chun hi lampuia check post suktlawm dingin hma a lak bakah inzinmi hai ta dinga a hadam lem theina dingin X-ray vehicle scanner nei dan lampui a ngaituo a, sienkhawm chu thila dingin Rs. 50 crore vel a tul ding leiin sawrkar chun a la nei theinaw a, amiruokchu Home Affairs Ministry kuoma ngen a ni a, process a fe mek tiin Gaikhangam chun a hril.


Sendra le Chaoba Ching inkarah Cable cars
IMPHAL: Manipur CM O.Ibobi Singh chun zanikhan Manipur Assembly-ah Manipur Ropeways Bill, 2015 a phar. Bishnupur districta Sendra le Chaoba Ching inkarah experimental basis in Manipur-a cable cars hmasa tak thaw tum a ni a, PPP model a thaw ning a ta, hi thila hin sawrkar thlungpuiin 25% , state sawrkarin 15% le private partner in 60% thawng an tih tiin O.Ibobi Singh chun a hril. Sendra le Chaoba Ching inkara mi hi first phase ning a ta, a hnungah second phase in sawrkar chun Chaoba Ching – Karang inkar-a thaw a tum tiin a hril bawk. Tourism sukhmasawnna ding le Karang mipui ta dinga hi thil hi thaw tum a ni a, a model hi a hlawtling a ni chun tourism industry sukhmasawnna dingin state sunga hmun dang dang haia khawm sawrkarin thaw pei a tum tiin a hril.


YPA GHQ 62nd Anniversary
CCPUR: Zani 10AM khan Young Paite Association (YPA) GHQ chun Hiangtam Lamka-a YPA GHQ Hall-ah 62nd Anniversary an hmang. Hi huna hin Pu Lunminthang Haokip, IAS, DC, CCPur khuollienin a thang a, V. Gousiam, Founder Asst. Secy. YPA GHQ chu chief host in a thang.

DC, CCPur chun, Churachandpur District-in mipui inkhawmna ding Auditorium tha huntawk tak ei mamaw ta thu a hril a, harsatna tum tum ei tuok huna Pathien ringzo taka ama ei zui phawt chun mal a mi sawm ding a nih tiin a hril bakah Churachandpur District-a resource tam tak um hai hi tha takin hmang inla chu ei economy nasa takin a siem tha ding a nih tiin a hril.


DTO in Feb. thla sung motor 161
CCPUR: District Transport Office, CCPur chun February, 2015 thla sung khan motor 161 registration an thaw a, hieng hai hin Bike 122, Auto 2, Car 17, Jeep 6, Maxi Cab 1, Heavy goods vehicle 4, Van 8 le mini bus 1 a thang. Chun, April, 2014 a inthawk Feb., 2015 inkar sung khan DTO CCPur chun motor 1805 registration an thaw a, chu hai lai chun Bike 1335, Auto 81, Car 230, Jeep 70, Maxi Cab 19, Light Goods vehicle 14, Heavy Goods vehicle 18, Van 11, Medium Goods vehicle 13, Mini Bus 1 le others 13 a thang.

February, 2015 sung khan DTO CCPur chun Revenue Rs. Rs. 11,64,619/- an hmu bakah April, 2014- Feb. 2015 inkar sunga Revenue an hmu chu Rs. 13,41,3913/- a tling phak.


Passenger bus rawla tlanliem raw a nih
IMPHAL: March 1, 2015 zana Chandel district-a Liwa Khullen Sarei village-ah Chandel le Imphal inkara service Memory Travel passenger bus MN-01 1742, changsuola rawl feet 20 vela insanga tlan liem chu zani hmasa zan khan tu ti hrietlo han an raw. Hi Bus eksiden-a hin mi 8 an hliem a nih. Iengleia Bus hi raw am a nia ti hriet a la ni nawh.


HYA in ngenna a siem
CCPUR: Hungtlung ding March 7, 2015 hi HYA indin champha a ni a, hi le inzawm hin khawtina HYA Branch hai chu mani thei ang tawk senga thiltha thawa inser nisien tiin zanita HYA Gen. HQ Executive Committee inthung chun an rel a. Hi lei inzawm hin HYA Branch tin hai chun mani remchang ang peiia lampui/nulla/sukfai annawleh thangpui ngai hai thangpuina nia inser le hmang seng dingin a fiel.


Manipur University of Culture Bill pass
IMPHAL: Manipur Assembly session fe meka chun zanikhan The Manipur University of Culture Bill, 2015 Bill chu reservation provision iengkhawm um lovin passed a nih. Hi bill hi Manipur CM O.Ibobi Singh in Assemblya a phar a ni a, hriltlangna huna MLA Samuel Risom in bill-ah tribal hai ta dingin provision iengkhawm a um nawh tia a hrilna thua CM chun hrielfiena siemin, Manipur state a hnam tin ta ding a ni leiin reservation chu makmaw a ni a, hi lei hin billah inchuonsa a ni naw a ni a, university indin a ni huna guidelines le reservation chu automatically in a um ding a nih tiin a hril.


Manipur Assembly ni 2 a keisei
IMPHAL: Manipur Assembly Session fe mek zanita tawp dinga ti chu Manipurt regulation of visitors and tenants’ (MRVT) Bill, 2015 Assembly-a phar a ni theina dingin keisei a ni a, Yoashang festival zovah Assembly inthung hi tan nawk dingin zani hmasa zana Cabinet meeting chun an rel. MRVT Bill, 2015 hi Assembly session inthung nawk March 13, 2015 in phar ning a tih tiin Manipur CM O.Ibobi Singh chun a hril.


April-ah Rahul Congress Prez. a hlangkai el thei
NEW DELHI: Congress chun Parliament inthung chawl lailawk hun March 28 le April 15, 2015 inkar sung khin AICC Session nei an Ntum a. AICC Session nei huna hin Rahul Gandhi chu Congress President-a hlangkai ni el theia hril a nih. Lok Sabha election-a Congress nasa taka an tlakhnuoi le chet siet hnung khan party lu chunga thua ditdan dang dang a hung um tan a, party member thenkhat chun Sonia keithuoina hnuoia um tha tiin an la nuom a, thenkhat ruok chun Rahul Gandhi party president-a hlangkaina sukhnuk hin party ta dinga thilthanaw lem a hung intlun
an ring thu an hril thung.

AICC General Secretary Digvijay Singh le Veteran MP Kamal Nath hai chun
Rahul chu Party president-a hlangkai nghal an nuom a, Sonia le Rahul (two power centres) um chun Congress sunga harsatna an tlung a nih tiin an hril. |henkhatin Rahul in Congress President a chel hmain ‘working president’- a la sie tha an ti a, sienkhawm Sonia chun hnawlin party sunga thuneitu pahni um anga inlang chu siemfel pawimaw a ti thu a hril.


Pherzawl ADC function-na dinga bawzui zing a nih: Dr Amo to Virthli
CCPUR: Virthli Social networking Site in Tipaimukh A/C MLA le HAC Chairman Dr Chaltonlien Amo interview an thawnaah, Dr Amo chun, Manipur CM in Pherzawl a Additional Depty Commissioner (ADC) Office a hawng kha a function theina dingin staff tul ding zat, office hmangruo ding le sum hmang tul zat le a tul dang dang hai ziek le thua bawzui zing a nih tiin a hril. HSLC Exam Centre nei CM le Education Minister han an mi phal pek khawm thil tul Exam hall, question paper le answer paper hai siena ding bakah security le tul dang haia dingin hma lak sunzawm zing a ni a, Hr. Sec. School hawng nisien a kai ding an um dim ti ngaituo a tul bawk tiin a hril. Tuiruong leilak dawna chungthua chun, Tuiruong pang Taithu tieng le Patpuihmun tieng foundation hmun cho zo vang a nita a, thir hai khawm truck in vawi tam a hmun a thak tlung tah tiin Dr Amo chun Virthli a hril bawk.

Churachandpur Private University indinna ding thua chun, siemthat tul le pei le belsa tul dam a um leiin Bill pass a la ninaw a, Feb. 25, 2015 a Select committee in hmun 5/6 vel University hmun ding an enkuol thu, University indinna dingin ram acres 100 neka chin lo, 200/300 acre vel a lien mamaw a ni a, hi lei hin Committee hai chun lawilen inhawi Imphal Airport hnai main road hnai tieng an lunglut deu niin Dr Amo chun Virthli a hril bawk.


Mizoram-ah Swine Flu screening
AIZAWL: Mizoram sawrkar chun February 2, 2015 a inthawk khan Mizoram le Assam inrina Vairengtea National Highway-54 ah Swine Flu (H1N1) invawi hai dapsuoknadingin screening a thaw tan niin Dr Pachuau Lalmalsawma, state Integrated Disease Surveillance Programme (IDSP) chun a hril. A tul chun Myanmar-a inthawka Mizoram hung lut hai khawm Zokhawthar le entry points dang haia khawm screening hi thaw ning a tih tiin Pachuau chun a hril. Lengpui Airport, Mizoram-a chun Februarty 23, 2015 a inthawk khan screening hi thaw tan a ni a, sienkhawm tuchena hin case thar hmu nawk a la ni nawh tiin a hril. Mizorama hin Delhi-a inthawk Mizorama lut nuhmei pakhat Swine Flu an vawi ti hmusuok a lo nitah.


PM in Parliament Canteen-ah sunbu a fak
NEW DELHI: Prime Minister Narendra Modi chun zanikhan Parliament canteen surprise visit a thaw a, hi huna hin a parliamentarians chanpui haileh sunbu an fak. Parliament canteen hi Indian Railways in an enkawl, Parliament building sawngkhatna (first floor) a um a nih. Canteen thawktu hai chun PM a va lut thut chu mak an ti hle a, PM hi MP dang pahni sunbu faa lo um hai umna hmun a pan a, canteen in-charge BL Purohit chun Pu Modi chu iem fak nuom a nei an dawn a, PM chun, a hran (special) taka a fak ding siem a tulnaw thu le a um ang ang pe dingin a lo hril a. Tui dawnin thei thenkhat a fak a, a fak man chu Rs. 29 a ni a, PM Modi chun Rs. 100 a pek a, thawktu han Rs. 71 an letkir nawk. Canteen- a PM a va lut huna hin MPs 25-30 vel an um a nih. Canteen in-charge Purohit chun inchiktlaka a ngai leiin PM hi suggeston Book-ah thil an ziektir. Modi hih India PM hai laia hi canteen dawr hmasatak tu la nia hriet a nih. Rajiv Gandhi chun Prime Minister a ninaw lain canteen a hin vawikhat a lo lut tah tiin report chun a hril.


BJP in LS election-ah Rs. 712 crore an seng
NEW DELHI: Lok Sabha election 2014 a khan BJP chun poll campaign-na le thil dang dangah Rs. 712 crore an seng tiin Association for Democratic Reforms (ADR) report chun a hril. ADR Report dungzui hin Congress chun Rs. 486.21 crores an seng a, NCP chun Rs. 64.48 crores an seng. Kum 2004- 2014 inkar sunga National parties hai fund dawldawk chu 418% in a pung a, an sum hmang ruok chu 386% in a pung thung.

Lok Sabha Election 2014 a khan BJP in donation an hmu rawn tak a, Rs. 588.45 crore an hmu a, Congress in Rs. 350.39 crore, NCP in Rs. 77.85 crore le BSP in Rs.
77.26 crore an hmu a, CPI chun hi hun sunga fund an khawndawk chu Rs. 9.52 crores niin an hril.


Jail-a intang tlansuok a tum leiin kap hliem
SHILLONG: Zani hmasa khan a chungthu rel lai mek jail intang Suresh Chettri (39)  chu Court hmaa inlang dinga thuoi a ni huna tlanhmang a tum a. Sienkhawm, Police han inrang taka hma lain an kap hliem hnungin an mankir nawk. Mr Chettri hi rukrukna case tum tuma inrawlna nei a ni a. Ama le midang 28 hai Court hmaa inlangtir dinga thuoi an ni huna Chettri hi tlanhmang tum a nih. Police han a kea an kap hliem leiin Shillong Civil Hospital-ah enkawl a nih.


Editorial:
NERPAP
India rama Electoral Roll inhnawk takel phitfai tumin Election Commission chun zanikhan India ram pumpuia thaw dingin National Electoral Roll Purification and Authentication Programme (NERPAP) a lo tlangzar tah. Hi NERPAP thil tum tak chu India rama Electoral Roll-a thil indiklo hai sawpfaina dinga Electoral Roll-a um hai popo Electoral Photo Identity Card (EPIC) le tulaia inlar em em, a bova ei um thei ta lo hiela ngai Aadhar number le thlungzawm a nih. Voter indik tak le mi pakhatin hmun pakhat neka tamah vote an nei thei nawna dinga Aadhar number le thlungzawm hi Election Commission in a tum a nih. Electoral Roll le Aadhar Number thlungzawm a ni huna chun Election huna polling booth haiah Election Commission chun biometric reading machines inthut sang a ta, vote thlaktu ding hai chu vote an thlak hmain an dik le diknaw enfel hmasa vawng a ni ding a nih.

Electoral Roll indiklo hai phitfaina ding el khela Election Commission chun tu hnung kum la hung um pei dingah internet hmanga election huna vote thlak a la hung ni theina ding lampui nia a hriet leia Aadhar Card le Electoral Photo Identity Card (EPIC) hi thlungzawm dinga hma a lak a nih. Chief Election Commission H.S. Bhrahma in a hril dan chun, tuta India rama electoral Roll-a duplicate um chu 10-12 percent vel niin a hril a, Voter tam takin Constituency pahni-pathum ah vote an nei a, chuong vote pakhat neka tam nei han vote an nei nuomna constituency an thlang theina dingin hun pek ning an ta, an thlangna constituency ti lova an vote hai chu pei a ni ding thu February 27, 2015 khan NERPAP nationwide drive nei ding le inzawmin new Delhi hmuna a hril.

Hienganga Election Commission in Electoral Roll le Aadhar thlungzawm a hung tuma hma a hung lak nasan chu ei rama Electoral Roll-a thil indiklo tam tak um inthielfaina kawnga a beidawng thawkkhat lei a ni ngei ring a um, ninaw sien chu sum tam tak le tha tam tak sengin hiengang thil hi a hung rawt dawk ring a um nawh. Hi thil hi a taka sukpuitling a ni phawt chun election huna thawluina le vauna hmanga vote inthlaktirna a um a ni ngawt naw chun tulai election huna pakhatin vote pakhat neka tam an thlak hlak chu tienlai an chang ta ding a nih. Asan chu Aadhar Card ei neina dinga khan ei kutpar popo zie (finger print) le mitmu tha taka lak a ni a. Kha data hmang khan election huna electors/voters hai identify-na dingin biometric reading machines hmangin ei nina indik tak mi hrilin, midang vote thlak ei lo tum a ni khawmin hnawl ei ni pei ta ding a nih. Kutzie (finger print) inang hlak chu ei um awm si nawh. Pathienin khawvel mihriem hieng zozaia siem lai hin hmel inang deu dam le piengzie inang deu dam khawm ei lo um thei. Sienkhawm kutzie (finger print) inang ruok chu ei um nawh. Hi tak hi tulai khawvelin security thil haia khawm a hmang tangkai mek chu a nih. Pathien thilsiem hi a ropui ngawt el.



Hieng laizing hin eini lai chu Aadhar Card nei lo khawm tam tak ei la um a, tuta Aadhar le Voter ID number thlungzawm dinga Election Commission in hma a hung lak hi iengtik am a takchang ding ti ruok chu hril a la harsa hmel hle. Aadhar Card el khelah voter tam tak Identity Card (EPIC) la nei lo ei um bawk leiin harsatna pakhat chu sawrkarin a mi siem belsa pek nawk phawt ding chu a nih. Thiltha lem dinga sawrkar hmalakna hi mipui hai khawma ei thlawp a tul a, chuongang bawkin implementing agency/department hai khawmin feltak le kim taka thaw a ni theina dinga taima taka hma an lak nuom a um.


Don't Miss
© all rights reserved
made with by Simon L Infimate