Responsive Ad Slot

Hmasawnna Thar | 20 March, 2015

Friday, March 20, 2015

/ Published by VIRTHLI
DC in PHED Tui sem dingin an hriettir
CCPUR: Churachandpur district/khawpui sunga khaw inthal leia tui thua mipuiin harsatna nasa tak an tuok le inzawmin Pu Lunminthang Haokip, IAS, DC, CCPur chun EE/PHED, Churachandpur chu khawpui sunga veng tum tum haia tui sem ( Mobile Water supply) tan dingin an hriettir. DC in Order an suo dungzuiin EE/PHED chun Mobile Tankers 8 hmangin Zone I; Zone-II in a huomna le Zone-III (Zenhang Lamka only) haiah thuthar um nawk hmapo daily basis in PHED, CCPur chun tui an sem ding a nih.

Churachandpur District a hin khawpui sunga inthawka km. tlawmte chaua hla Khuga Dam-ah tui intling puouin um sienkhawm khawpui sunga mipui tam lem chun tui thua harsatna nasa tak an tuok mek a nih. Hmun thenkhat haia chun a ni zawn dama tui a put leiin harsatna an nei nawh. Sienkhawm veng le mipui tam lem han tui thua harsatna namen lo an tuok zing a nih.

UZO President dingin Chinlunthang
CCPUR: United Zou Org. (UZO) GHQ hnuoia Zou Working Committee (ZWC) member dinga thlang thar mi 15 hai chun zani 10:30AM khan UZO President thlangna an nei a. Mr Chinlunthang chu kum 2015-17 sunga UZO GHQ President dingin an thlangtling a, Peter Kammang, Chairman, Zou Zump in sesamna an neitir. Outgoing UZO President S. Nengkhanthang chun President thar kuomah office files hai inhlanna a nei nghal. Mr Chinlunthang chun, plan le policy programme nei
lova hnam hi nuoma inthuoi el ding a ninaw thu, UZO term la um hi kum 2 chau nita sienkhawm mipui le thangruola sin tam tak thaw thei a la beisei thu a hril.

Quiz le Debate Competition
CCPUR: March 20, 2015, 11:00AM khin DC/Chairperson, RMSA/CCPur hmalaknain HQ veng-a DIET Centre-ah Govt. School-a Class IX le X inchuklai hai ta dingin Dist. Level Science Exhibition, Quiz le Debate competition um a tih. Debate topic-‘The success of students depends on teachers’ ning a ta, Sc Exhibition ah theme-‘Emerging trends of Science&Technology’ le Quiz,Debate le Science Exhibition haia lawmman 1st Rs.2000/-;2nd Rs.1500/- 3rd Rs.1000/-le consolation
ah Rs.500/- pek ning an tih. March 21, 2015 dar 11:00AM in Synod Hall IB Road-ah Dist Level Quiz Competition (Final round) um a ta, 1PM in lawmman semna um a tih.

Rukruhai an che nawk
CCPUR: March 18, 2015 chawhnung dar 1:30 vel khan Pumkhanmang (38) s/o (L) Ginkhanpau compound sunga inthawk Bajaj Avenger (Blue) MN02!/7689 chu rukru han an inruk hmang. March 15, 2015 khawm khan Biekin inkhawm karin N. Dongbiaklian In, Hebron Venga mi chu rukru han an rawk a, Rs. 30,000 an inruk hmang.

Special Drive an thaw
CCPUR: Zanikhan Traffic Police a OC KS Mung le VDF thangruol han CCPur Govt. College bul Tipaimukh Road-ah motor ke pahni nei helmet khum lo le Diesel Auto document kim lo hai checkin special drive an thaw a, Helmet khum lo le Diesel Auto document kim lo mi 28 an man a, TR5 Receipt katin Rs. 100/- seng an inchawi(fine) tir.

An inbiekrem tah
CCPUR: Zani hmasa zingkar 6:30AM vela Damkam Bazar phak hma meta Bike in a baw hlum Ms Mankhannuom (54) w/o Khamsuanmang Phiamphu of Muallum, tuta Lanva khuoa cheng mek sunghai le Bike neitu han zanikhan inbiekna an nei a, Bike neitu han Vawk 1 thatin Saipikhup puon in mithi an tuom a, motor neitu han mithi Rs. 1 lakh a ralin an inbiekrem.

New Delhi-a Kristien MPs han meeting an nei; Joint Front le Common Platform indin tha an tih
NEW DELHI: India ram states le Union Territories tum tuma Kristienhai suknawmnat, vau, inthi le an Biekin hai chen suksiet peka an um hlak chu Kristien MPs han an ngaimaw hle leiin March 17, 2015 khan Catholic Bishops Conference Office, New Delhi ah meeting an nei. Hi meeting a hin India rama Cardinals 4 um hai laia pahni Ivan Dias le Baselios Cleemis hai le Kristien MPs 19 an thang. Kristien MPs, hi meeting-a thanghai lai hin Rajya SAbha Deputy Chairman Prof. P.J. Kurien (Congress), Derrek O’Brien (TMC), Nagaland CM hlui Neiphiu Rio (NPF), Oscar Fernandes (Congress), Jose K. Mani [Kerala Congress (M)] le P.A. Sangma (NPP) hai khawm an thang. Kristien MPs 19 hai chun thla 10 liemta sunga India ram hmun tum tuma Kristienhai sukduda le hnawchepa an um chu an ngaimaw thu hriltlangin, India rama Kristienhai venghim dan ding ngaituo le thanglak tha an ti a, thla 3 dan peia meeting nei hlak ding le meeting nawk chu May, 2015 thla bula nei dingin thutlukna an siem. Meeting nawkah Kristien MP-hai ta dinga Joint Front indin, Common agenda paper siem, Kristien sakhuo zuitu Pawl hran hran hai kuomah an hmalak ding hrildar, Catholics chau ni lovin Kohran Pawl (denominations) han Common platfom an nei thei dan ding ngaituotlang an remtih. Hi meetinga thang Kristien MPhai chun Narendra Modi in Prime Minister a hung hela intahwk Kristienhai sukdudana a hung pung a, rawl insuo a, Kristienhai venghimna dinga hmalak tha an titlang.

Tuhin India rama Kristien MPs 25 vel an um a hriet a nih. AIADMK chun tuhin Kristien MPs 4 an nei. West Bengal a chun Kristien MPs le Kristien MLAs hai chun a ruolin Kristien, Kohran Pawl tum tuma thuoituhai regular takin an inhmupui rawp a, an harsatna le thil dang danghai an hriltlangpui hlak. Hiengang bawk hin Delhi a khawm Kristien MPs han thaw veng ei tiu ti chu Kristien
MPs meeting-a thanghai die le nuom dan a nih.

KYKL hotu thattua intum mi 2 Delhi Police han an man
NEW DELHI: Kum 2008 laia New Delhi hmuna um KYKL hotu O.Juge Singh @ Wongba Khummen thattu nia intum Satender Kumar @ Tinu (33) le Pritam Kumar (36) hai chu Dwarka, Delhi hmuna Delhi Poice han anman. Anni pahni hi kum 2011-a Raipur, Chhattisgarh hmuna mi pakhat Amanaka thttua intum le luman Rs. 15,000 ve ve neia sawrkarin a lo puong ta an nih tiin Joint Commissioner of Police (Crime) Ravindra Yadav chun a hril.

Union Minister a hung inzin ding
IMPHAL: Union Minister of state for Textiles, Santosh Kumar Gangwar chu Imphal-a zan khat riek dingin March 24, 2015 in Imphal hungtlung a nih. Minister hi Dr S.K. Panda, Secretary, Ministry of Textiles in hung zui a tih. Union Textiles minister Santosh hin City Convention Centre, Palace Gate-ah Apparell and Garment Making and Powerloom Estate bawlna ding lungphum a ta, Sericulture
and Geo-textile Scheme hawng a tih. Hi zo hin Tradecum- permanent Exhibition Centre, Lamboikhongnangkhong va sir a tih.

Manipur team in gold medal
IMPHAL: March 12-22, 2015 inkar sunga Thailand khawpui Bangkok a 1st World Martial Arts Council Games, 2015 a chun India team in gold medals 4 an lak a, hienghai laia pakhat chu Manipur mi, Senapati district a um a nih.

Kani kg. 2.730 leh pasal 2 man
IMPHAL: March 17, 2015 khan Wangoo Sandangkhong hmuna Kumbi Police station OC, Th. Joy Martin inrawina hnuoia Police han dappui an thawnaah Md. Rafique @ Ethem (30) s/o Md. Sarafad Ali of Irong Cheisaba Mayai Leikai le Md. Boycha (21) s/o Md. Abdul Mazid of Irong Cheisaba Mayai Leikai hai chu Kani kg. 2.730 leh an man.

Ramdang jail-a India mi 6,200
NEW DELHI: Minister of State for External Affairs, V.K. Singh chun, rambung dang dang 72-a Jail haiah India mi 6,290 an intang mek a, anni lai hin Ngamantu khawm an thang tiin zanikhan Rajya Sabha hmuna a hril. India mi intang tamna tak chu Saudi Arabia a ni a, Saudi Arabia Jails-ah India mi 1,508 an intang mek niin VK Singh chun a hril.

Arsenicum Album 30 sem
IMPHAL: Zanikhan Directorate of AYUSH, Govt. of Manipur chun Swine Flu laka invengna damdawi Arsenicum Album-30 mum Lamlong Keithel Khurai hmuna an sem. Ni 2 liemta sung khan AYUSH chun mi 2000 vel kuomah hi damdawi hi an sem tah. Thangmeiband, Lamphel le Khurai hmun haiah khawm an lo sem tah.

Mission School-hai khar an la nih
IMPHAL: Manipur state khawpui tak Imphal-a chun Mission Schols 5 hai chu khar an la nizing. Helpawl le School Authority han inbiekremna an la nei thei naw leia Mission schools 5 hai hi khar an la nizing pha a nih.

Teacher Eligibility Test, 2015
IMPHAL: Board of Secondary Education, Manipur (BSEM) chun June 7, 2015 khin Teacher Eligibility Test (TET), 2015 buotsai a tum. Application Form lak thei hun le Application form fillup zo sa peklut theina hun nuhnung tak 08-06-2015 a nih. Paper I 10AM-12Noon inkar le Paper -II 1PM-3PM inkar a nei ning a tih. Thu chieng lem Board Office-a hriet thei a nih. Exam fee paper I or II (General) Rs. 500, Paper I&II a pahnin Rs. 1000. Paper I or II (SC/ST/Dissabled) Rs. 400/- le a pahniin Rs. 800/

Nagaland in CBI sui dingin a recommend
KOHIMA: Nagaland sawrkar chun March 5, 2015 nia Dimapur hmuna nuhmei suolluitua intum vuok le sawisak hlum a nina thu chu CBI suizui dingin a recommended tiin Nagaland CM T.R. Zeliang chun zanikhan a hril. Hi thil hi zani hmasa zana cabinet meeting nei huna an rel niin Mr Zeliang chun a hril. Nuhmei suolluitua intum Syed Farid Khan kha March 5, 2015 nia Dimapur Central Jail-a inthawk mipuiin va kei dawka, saruoka an chai hlum a nih. Farid Khan hi Assama Karimganj district a cheng a ni a, hi thil tung le inzawm hin tuchena hin Dimapur Police chun mi 55 an man ta a, midang hi tuolthatnaa inrawla intum 34 hai chu an thlalak thedara zawng mek an la ni bawk tiin Police thusuok chun a hril.

England-a inthawk Vawkte inchawk tum
AIZAWL: Mizoram sawrkar chun England a inthawk Vawkte 50, pakhatah Rs. 98,000 peia inchawk a tum. Vawkte hai hi Vawk lien chi White Yorkshire le pure breed Landrace pigs an nih. Tuta hma khan Canada a inthawk vawkte pakhatah Rs. 1.15 lakh man pei inchawk tum a lo ni ta a. Nisienlakhawm Canada a Swine Flu inleng leiin sawrkar thlungpuiin Security Protocol a mi pek nuomnaw a, chu leiin riruongna hi a hung hlawsam a nih tiin MNF MLA Lalruatkima indawnna dawnin March 18, 2015 khan Mizoram Animal Husbandary and Veterinary Minister C. Ngunlianchunga in Mizoram Assembly-ah dawnna a pek.

Nuhmei 2 meiin a kang hlum
AGARTALA: March 18, 2015 zingkar inhma tak khan West Tripura Fakhir Nura hmuna kangmei a suok a, Bishnu Das in chu a kang ut vawng. Hi kangmei suoka hin Bishnu Das nuhmei Shipra Nandi (30) le a tarpinu Manibala Nandi (60) hai a kang hlum. Das le Nandi naunu, kum 7 mi chu himin a suokdawk. In neitu Bishnu Das hi a tlan hmang leiin a In hi ama raw ni dinga ringhla a nih tiin Pradip Dey, SP, Sepahijala district chun a hril.

MP Fin. Minister le a nuhmei suom
NEW DELHI: Madhya Pradesh Finance Minister Jayant Malaiya le a nuhmei Sudha Malaiya hai chu zanikhan Rel sungah suom an ni a, rangkachak thi, nabe le sumfai iemanizat lakpek an nih. Mr Jayant Malaiya le a nuhmei hai hi Jabalpur- Nizamuddin Express train a chuong an ni a, AC compartment sunga suom an nih. Hi thil tlung le inzawm hin anni vengtu RPF personnel pathum hai chu an sina inthawk suspended an nih tiin Railway spokesman Anil Saxena chun a hril. Mr Jayant Malaiya le a nuhmei hai hi Delhi pan tuma Damoh hmuna inthawk Rel-a chuongkai an ni a. Malaya nuhmei Ms Sudha Malaiya chun, ‘ zingkar 4AM vel khan mi thenkhatin kawt an hung nawk a, ka va hawng
leh chem chawi pasal 4 hai chu hung lutin ka purse, rangkachak thi le kutsebi hai bakah ka pasal pawisa bag (purse) hai an lak a, ka kut khingtiengpanga kutsebi chu an lakdawk el theinaw leiin kutsebi ka bunna kutpar chu tan pek dingin an mi vau bawk a nih tiin a hril. Hi hi Railway
Minister Suresh Prabhu kuoma an intlun ding thu a hril. Hi thil tlung hi zanikhan BJP MP Pahalad Patel chun Parliament-ah a hrillang.

Sawrkarin CBI insuitir an peizing
NEW DELHI: Karnataka State a IAS Officer D.K. Ravi ringhla um taka a thina thu chu CBI insuitir dingin sawrkar thlungpui an peizing tiin zanikhan Union Home Minister Rajnath Singh chun Zero hour sunga indawnna a dawnnaah a hril. Hi thu hi karnataka CM Siddaramaih khawm inhriettir a ni ta tiin a hril. Hieng laizing hin BJP le JD(U) MLA han zanikhan Karnataka Assemblyah D.K. Ravi, IAS thina thu hi CBI insuitir dinga ngenin Inpuiah an khek. Inpuia rorelna a fe tluong thei naw leiin zanita dingin Karnataka Assembly inthung sukchawl a ni a. Lok Sabha a khawm BJP members han hi thu le inzawm hin inpui inthung an sukbuoi pha.

PM a minister-hai ramdangah vawi 111
NEW DELHI: June, 2014 a inthawk tuchena hin PM Narendra Modi le a minister-hai chu ramdang (foreign countries) ah vawi 111 an inzin ta a, Foreign inzin rawn tak chu External Affairs Minsiter Sushma Swaraj a ni a, vawi 19 foreign an zin ta a, a dawttu chu PM Narendra Modi a ni a, vawi 11 ramdangah an zin tah. Ramdang inzin rawn tak pathumna chu MoS External Affairs, Gen. V.K. Singh a ni a, ramdangah vawi 10 an zin tah. March 18, 2015 a Lok Sabha a AIADMK MP P. Sundaram in indawnna a siem Union Minister of state for Home, Gen. V.K. Singh in a dawnna a hieng thu hai hi a hril a nih.

Bihar-ah enruk thaw student 600 chuong hnawtdawk
PATNA: Bihar-ah Class-X final exam nei mek a ni a, enruk a hluor hle. Zani ringawt khawm khan enruk thaw students 600 neka tam hnawtdawk an nih. Students enruk ding supply-tu mi an tam hle a, candidate pakhat mi 4/5 in enruk ding an supply ang nia hril a nih.

ECI in Pol. parties 6 Show Cause notice
NEW DELHI: Kum 2014 Lok Sabha election a an party candidate-hai sum hmangzat (expenditure statements) an peklut naw leiin Election Commission of India (ECI) chun Political parties 6- Aam Aadmi Party (AAP), Jharkhand Mukti Morcha (JMM), Haryana Janhit Congress (HJC), National People’s Party of Manipur (NPP), Peoples Party of Arunachal Pradesh le Kerala Congress (M) hai chu zani hmasa khan Show Cause Notice a pek a, ni 20 sunga ECI a expenditure statements an peklut naw chun an party recognition a hlippek annawleh a suspend ding niin thupek khau tak an pek. General Election a ngir ve party hai chu ni 90 sunga an sum hmang pelut dinga ECI in Political parties hai po po rules dungzuia inhriettirna a peksa an nih. Hieng Political parties 6 hai hi ECI in October 22, 2014 le November 28, 2014 haia a vel vela inhriettirna a pek tasa, tuchena la pelut lo an nih.

Alu chingtu mi 10 an inthat
KOLKATA: March 1, 2015 a inthawka vawisun chen hin West Bengal a Alu chingtu mi 10 hai chu beidawngin anni le anni an inthat. An Alu bil siem a hlawsam a, a pung umin sum an puk rawn si a,
a thungna ding an neinaw leia beidawnga inthat an nih tiin ei thu dawngna chun a hril. Alu chingtuhai hi Kumthu hlo le tur dawna inthat an ni tawl.

Prasad fak leiin mi 3 an thi
BARPETA: March 16, 2015 khan Assam state a Barpeta district a Patbaushi khuo a sakhuo thila inkhawmna hmuna Prasad fak leiin mi 3, Purabi Das (22), Animika Das (10) le Bhanu Das (45) han an thi pha a, midang 550 an damnaw pha a, Fakhruddin Ali Ahmed Medical College (FAAM) care Unit panpui an ni a, mi 450 hai chu tuchen hin FAAMC Hospital- ah enkawl an la nih.

Assam-ah mi 1 detonator le Gelatin leh man
GUWAHATI: Zani hmasa zan khan Assam State a Goalpara district sungah Security Forces han detonators 100, Gelatin tluon 56 le fuse wire leh pasal pakhat an man.

WB-ah Bank suom, Rs. 94 lakh lak
KOLKATA: West Bengal a chun zani hmasa zan khan English bazaar-a ICICI bank building hnungtieng kawtkhar suksiein an rawk a, strong room sunga lutin Bank-a pawisa Rs. 94 lakh
vel ding an inruk hmang niin zanita Police thusuok chun a hril. Bank thuneitu hai chun strong room-a hin Rs. 2 crore vel a um niin Police kuoma complaint an peklutnaah an zieklang. Hi thil tlung le inzawm hin Bank vengtu (guard) chu thu idnawnna nei a nih.

BSF han satel 97 zet an man
KOLKATA: India le Bangladesh inrina bula Kalanchi Border Outpost a duty BSF han March 18, 2015 khan Smuggler pakhatin Bangladesh a phurlut a tum Satel 97 chu hnawtin an man. Smuggler
ruok chu man hman lovin a tlan hmang. Satel hi international market rate a chun Rs. 58 lakh manhu a nih. Jan. 29, 2015 khawm khan Kalanchi hmuna bawk BSF han Satel 185, Rs. 1.11 crore manhu an lo man ta bawk.

Helpawl han mi 22 an kap hlum
TUNIS: Zani hmasa khan Tunisia rama Museum pakhat helpawl han an kap a, ramdang khuolzinmi 17 thangsain mi 22 an kap hlum. Thina tuokhai lai hin Tunisia Police 2 le helpawl 2 an thang a hril a nih. Japan mi 3 thina tuokhai lai an thangsa tiin an PM Shinzo Abe in a hril. India sawrkar thangsain khawvel rambung hran hrana sawrkar han hi thil tlung hi an dem a, a thawtuhai thiemnaw an inchangtir.

Pakistan-ah mi 3 khai hlum nawk
RAWALPINDI: Zanikhan Pakistan a Rawalpindi Jailah mi 3 khai hlum nawk an nih. Khai hluma um hai laia pasal pahnihai chu unau an nih. March 18, 2015 khan mi 9, March 17, 2015 khan mi 12 khai hlum an lo ni ta bawk. Kum 2015 sunga Pakistan-a mi khai hluma um tapo chu 51 an tling tah.

Swine Flu leia thi 1,809 an tling tah
NEW DELHI: India rama hmun hran hranah Swine Flu leia thi mi 42 an um belsa nawk leiin tuchena India rama Swine Flu leia thi chu 1,809 an tling ta a, hi natna invawi mi 31,000 an tling ta bawk tiin Union Health Ministry thusuok chun a hril. Swine Flu natna hri hi tuta inthawk haptakar 2-3 sungin sukkiem thei a hung ni beisei a nih tiin Dr Randeep Guleria, Head of Pulmonary Medicine Deaprtment, AIIMS chun a hril.

Ballot paper-ah candidate-hai thlalak
NEW DELHI: Vote nei han an vote nuom an thlier hran theina dingin Election Commission chun ballot paper haiah candidate-hai thlalak inchuon sa ta dingin thusuok a siem. Hi thu hi states
le UTs tina Chief Electoral Officers (CEOs) hai khawm Election Commission in an hriettir tawl tah. May 1, 2015 hnunga inthawk hi thil hi hmang tan ni dingin Election Commission of India (ECI)
chun a hril. Constituency pakhata candidae-hai lai hming inang an um hlak a, vote nei mipui an buoi nawna dinga Postal ballot papers le ballot papers haia candidatehai thlalak inchuon sa hi ECI in a hung rawt a nih.

Astra Missile hlawtling taka ensin
BALASORE: March 17, 2015 khan Integrated Test Range, Chandipur, Odisha Coast a inthawk Sukhoi-30 indona Vuongna a inthawk Astra Missile hlawtling taka ensin a nih. Astra Missile hin km. 80 a hla a kap phak a, ralthuom kg. 15 a rik phur thei, 3.8 metre a sei a nih.

Naute lung a awm puotienga um
DINDORI: March 18, 2015 khan Sushma (22) s/o Basant Padmakar of Lutgaon chun District Hospital, Dindori ah nau nuhmeite a nei a, a naute lung (Heart) chu a awm puotieng a um tlat el. Hi naute hi District Hospital a enkawl el thei chi a ninaw leiin Jabalpur Hospital Government Hospital tieng thawn a nih. Naute hi an rang thei anga operation thaw a tul ding a nih tiin Dr G.K. Samad chun a hril.

Odisha ah mi 6 Tekin a deng hlum
KHURDA: Zani hmasa a Odisha state, Khurda district sunga Jaripada hmuna Cricket inkhelna hmuna Tek a tla leiin Cricket inkhel lai mek mi 6 Sheik Mukhtar (14), Bibhuti Parida (19), Rahul Nayak (15), Ajit Behera (15), Sharukh Khan (20) le Santosh Pradhan (15) hai chu Tekin a deng hlum. Odisha CM Naveen Patnaik chun mithi sunghai zangnadawmna Rs. 1,50,000 seng pek ni dingin a puong. Tek tlak hun hi 3PM vel a ni a, midang 10 an hliem a, hliem 3 hai chu an hliem inrik a hril a nih.

CDSA in Hill Dist. Sports meet-a dingin players 23
CCPUR: April 13-18, 2015 inkar sunga Tamenglong playground- a 2nd Hill District Sports Meet-2015 um dinga CCPur District aiawa thang dingin CCPur District Sports Association (CDSA) chun palyers 23 a thlangsuok a, thlangsuok laia thang players hai chu March 21, 2015, 8AM in CDSA Office, CCPur-ah an playing kits hai leh in report dingin Gen. Secy. CDSA chun an hriettir. Manager dingin Thangchinhau, Treasurer, CDSA; Asst. Manager in Francis Mang le Coach in Haopu Neishial hai ruot an ni bawk. Players hai chu Kenneth (ZFC); Hahau(HSC), Sonlian (LSC); Thangginbiaksang (ZFC); Thuaisang (SCL); Jouva ( RACC), Mangkholien (ZFC); Manu (ZFC); Paoliankhup (BYC); Letkhotinthang (AFC); Hausonpau (ZFC); Ngulkhosiam (ZFC); Seiboi (JSYC); Mara (ZFC); Danny boy (MSYC); Benjamin (AOFC); Letminthang (SCL); Helun (Zalen FC); Lalrintluanga (ZFC); Paokhosei (SCL); Haokhosei (GSC); Muanlal (TUFC) le T.K. Chon (GYC) hai an nih.


Editorial
Tulai rukru le tienlai rukru

Tulai hin Churachandpur town le a se vel haiah rukru an huongintau nawk ta hle ti chu tuolsung chanchinbu tiemtuhai chun ei hriet seng ring a um. Haptakar liemta khawm khan Zoveng le Light House Lane lai dawr pahni rawk, Chiengkawnpangah in pakhat rawk le Activa motor inruk hmang a nih. Tuta haptakar sung khawm hin Zion Veng, New Lamka ah Bajaj Avenger motor inrukhmang le Hebron vengah In pakhat rawk a nih. Hieng hai baka hin Ar inru, Varak inruk, Gas Cylinder inru le thil dang dang inruk a um ti thu hriet a nih. Hi lei hin mitin rukru laka ei inveng fimkhur zuol nuom a um. Rukruhai hin chet nuom hun le huongintau hun an nei am a ni aw ti theiin a um hlak.

Tulai rukru le tienlai deu rukruhai hi an chet nuom dan le an thiemna hai inthlau takel a ni tah. Tienlai deu khan chu rukru hi sun var lai an che ngai bek nawh. Tulai ruok hin chu chet hun bik an nei ta nawh. Sun var lai le zana khawm thil inruk pawi an ti ta nawh. Tienlai khan chu “Rukru hnawt lovin an tlan” ti a ni hlak. Tulai ruok hin chu hriemhrei le ralthuom bo le makhata rukru hnawt ngam chi an ni ta nawh. Rukru han a hnawttu le thil an inruk lai hmuhai chu an vuok hlum ngam ta a nih. Tulai rukru le tienlai rukru hai hi inthlau takel an ni tah.

Tienlai rukruhai kha chu an mawl bakah thil thiem an neinaw a, an sulhnung suizui theiin a um hlak. Tulai rukru hai ruok chu thil thiem an hau a, an kut hnung zuizui hlei thei lovin a um ta a nih. Tienlai rukruhai kha chu an chet ri a na leiin a chang chun an ri hriein ei hnawt a, ei man thei chang khawm a um hlak. Tulai rukruhai ruok chun ri an nei meu ta nawh. Tala lien tak tak khawm riboin an hawng thei a, an inruk nuom po an inruk zovin dawr annawleh in kawtkhar chu tha taka kalin an maksan hlak. Tienlai rukruhai ruok khan chu dawr le In an rawk hai hrim hrim hmu thei dingin inhawng huouin an maksan hlak.

Tienlaia rukruhai khan mi thil inhnar lei dam, retheina lei dam, fak ding tlasam lei damin ruk an inruk hlak. Tulai rukruhai ruok hi chu a tlangpuiin drugs addict, mi thabo, awlsam taka sum hmusuok le nei tum bakah misuol (Gang) an ni tl;angpui. Motor inruhai hi misuol (Gang), inzawmpui nei tha an ni nuom. Phingtam lei, fak ding tlasam lei, mi thil inhnar lei haia thil inru hlak hi chu an tam ta naw a, vangkhatte an ni tah. Hieng a ni lei hin drugs dona kawng, suol hrim hrim dona kawng bakah drugs addict- hai le misuol han an thil suksuol an sim theina dinga hma ei laktlang a tul ta takzet a nih. Tienlai rukruhai khan chu sakhuo Biekin, a bikin ei ni lai chu Biekin rawk ngam an um ngai der nawh. Tulai rukruhai ruok chun pawitina an nei der ta nawh. Biekin rawk, Kohran pawisa, Kohran bu le Kohran thil inruk khawm intimna le pawitina an nei der ta nawh. Remchanga an hriet le an tuokfuk taphawt an inrukin an lak nuom an tah. Thenkhat lem chun nuhmei puonbil, kekawrte, Bra le a dang dang tuola ema um hai khawm inruk pawi an ti ta nawh.

Rukruhai hin an thil inruk hai hrim hrim inman takin an zawr hlak. An thil inruk sa hai lo inchaw pek peitu ding, inzawmpui tha tak an nei leia thil an inruk le an thil inruk hi an bansan nuomnaw le an sim nuom naw niin an lang. Thil inruk sa inchawtuhai hi rukru leh danglamna an neinaw a, rukru chi khat an nih. Hi lei hin rukruhai thil inruk sa inchaw hlakhai hi chu rukru ang thova ei hrem hi ei thaw dan dinga tha ni awm tak a nih. Kohran pawl tum tum hai khawmin nuhmei inruhai chau Kohrana inthawk hnawtdawk ta lovin rukruhai khawm ei hnawtdawk ngam a tul ta niin an lang.


Don't Miss
© all rights reserved
made with by Simon L Infimate