Hmasawnna Thar | 06 March, 2015

Nirbhaya Film chungthuah sawrkar thlungpuiinBBC kuomah legal Notice a pek

NEW DELHI: Nirbhaya documentary Film “India’s Daughter” ti hmingchawia siem insuo lo dinga a ngen le thurawn a pek chu bawse a BBC in March 4, 2015 zantienga United Kingdom a an suo leiin sawrkar thlungpui chun zanikhan BBC kuomah Legal Notice a pek. Union Home Minister Rajnath Singh chun, hi thil hi a ngaimaw hle thu a hril. Tuhri hin chu hi chungthua hin comment ka la pek nuom nawh. Channel po po hi film hi insuo lo dina hril vawng le an video sharing website YouTube khawm hi documentary film hi peihmang dinga ngen a nih. Amiruokchu, BBC in a hung insuo ta leiin thaw dinga ti chu Union Home Ministry in a hung thaw pei ding a nih. Hi thu hi Information & Broadcasting Ministry le External Affairs Ministry hai khawm hril le inbiekpawna neipui vawng a ni ta tiin zanikhan Rajnath Singh in Reporterhai kuoma a hril.

“India’s Daughter” ti documentary film hi December 16, 2012 zana Delhi khawpuia Bus pakhat sunga pasal 6 zetin nunghak kum 23 mi, Doctor inchuklai Nirbhaya an suol hrawn chanchin a nih. Nirbhaya hin damzo lovin a thi pha hiel a nih.

Thupek an hmu angin BBC chun hi film hi India rama an insuo naw ding thu zanikhan an hril. ‘An leh hi film Shooting thaw theina dinga phalna petu chu tu am a na? Tu am a mawphurtu ding le dem ding an na? kan term sunga phalna pek a ni nawh’ tiin Home Minister chun a hril. Hi film a hin Bus khaltu le nunghak suolluinaa thang tangin a intang mek interview thawna hai khawm a thang niin ei thu dawngna chun a hril.

407 Truck eksiden-ah mi 4 an hliem

CCPUR: Zani zingkar 9AM vel khan Leijangphai khuo bul lai 407 Truck MN01 7157 Leingoi phurtu chu a brake failed leiin a eksiden a, mi 4 hai chu na rak lovin an hliem tawl. Hliem hai chu- Lammuanlal (27) s/o Khamkhothang of Pamzal, Thanggolian (23) r/o Daimin of Sainouzang, Goumalsom (12) s/o Haulianthang of Milongmun le Thangzamuam (23) s/o Kampu of Sainouzang hai an nih. Truck hi Tallian pana tlan a nih.

State Level Chapchar Kut

CCPUR: Vawisun March 6, 2015 hin Young Mizo Association, Chiengkawn

Branch mikhuolnain Chiengkawnpang Community Hall-ah 3rd State Level Chapchar Kut, 2015 hmang ning a tih. Hi huna hin Pu T. Dongzakai Gangte, Chief of Hill Town chu Kut PA in thang a tih.

Zing dar 10:00AM –a Cultural programme a chun Pu Nehthang, Member, ADCC khuollienin thang a ta, T. Kammuanlal, MCS, Asst. Commissioner, CCPur le CV Duhawma, Vice President, GYMA(M) hai chu guest of honour le functional president in thang an ta, thuhrilna hun hmang bawk an tih. Cultural programme a hin Gangte Lam bakah cultural dance tum tum inentirna um a tih.

Zan 6:00PM Chapchar Night a chun Pu Genneikhup Vaiphei, EM, ADCC khuollienin thang a ta, S. Thienlaljoy Gangte, MCS, SDO, CCPur le ST Solomon, Chief of Chiengkawnpang hai chu guest of honour le functional president in thang an tih. Hlasak thiem tum tum han hla sakin hun hmang ning a tih.

Aninpang le Dawlhro hme leia buoi hai an tha pei

PARBUNG: March 3, 2015 nia Parbung-a Pu Zothansang hai sungkuo mi 5 Aninpang le Dawlhro an hme leia buoisie hai chu that tieng an hung pan pei ta a, an pa tak Pu Zothansang chu a har ta a, midang hai khawmin khawmuol hrein an hung har met met tawl ta a, zani (March 5, 2015, 4:30PM chena khan chu Parbung Hospital-a um le enkawl an nih ti khawm an inhriet tah. “Aninpang” hi ramhnuoia hna chikhat hme chi a ni a, Dawlhro le an but a nih. tiin Pu Lalnunthang Songate of Parbung a inthawk ei thu dawngna chun a hril.

Talent Search Exam result en thei

CCPUR: November 2, 2014-a Rengkai Govt. High Schoo-a Class X inchuklai hai ta dinga State Level National Talent Searh Examination (SLNTSE), 2014-15; Class IX student han State Talent Searh Examination (STSE), 2014-15 le Class VII student hai ta dinga National Means-cum-Merit Scholarship (NMMS) Examination, 2014-15 neia um result chu en thei dingin ZEO Office Notice Boardah tar a nih.

NEIGRIHMS a MBBS seat sukpung dingin

SHILLONG: Meghalaya Chief Minister Dr Mukul Sangma chun, North Eastern Indira Gandhi Regional Institute of Health & Medical Sciences (NEIGRIHMS) thuneitu hai chu NEIGRIHMS-a MBBS inchuk thei zat seats 50 ni mek chu seats 100 a sukpung dingin a ngen. Hi thu hi zanita NEIGRIHMS in 3rd Annual Day an hmangna huna Mukul Sangma in a hril a nih. A sawrkar chun Megha Health Insurance Scheme fethlengin Human Development Index siemt thatna dingin theitawpin hma a lak a nih tiin a hril bawk.

Naga nuhmei suolluitu Bangladesh mi mipuiin an sawisak hlum

DIMAPUR: February 23, 2015 nia Nagaland-a Dimapur hmuna Naga nuhmei pakhat suolluitu Syed Farid Khan (35) chu mipui lungsenin zanikhan an tangna Jaila inthawk va keidawkin an sawisak hlum. Syed Farid Khan hi Police han an man hnunga jail-a an khum a ni a. Mipui lungsen fekhawm hai hin Jail an va hlukhum a, Jail lutna gate pahni an suksiet a, jail vengtu security hai chun mipui lungsen fuonkhawm hai chu dang ngaina hre lovin an en tawp el niin senior Police official pakhat chun a hril a. Hienga mipui lungsen chetna hi jail-a intang dang han remchanga la in jail-a intang lai mek midang 2 an tlansuok niin Police officer chun a hril.

Naga nuhmei suollui a nina le inzawm hin zani hmasa khan Naga Students Federation le Naga Women Hoho hai thangin Naga hnam sunga pawl tum tum hai chun ban thaw in dawr 20 vel ding zet an lo suksiet ta bawk a nih. Nuhmei suolluia um hi Sema Naga, college student nia hril a nih.

Yaoshang Kut tan

IMPHAL: Ni 5 sung aw ding Yaoshang Kut chu Manipur a khawm zanikhan tan a nih. Khuo le veng tinah Games & Sports neia hi Kut hi hmang a ni bakah zan huna Thabalchongba nei a ni hlak. Hi Kut hminga hin Holi (rawng kut) tia ko a nih. Hi Kut hmangtuhai chu rawng an inthe khum hlak. Yaoshang Kut lei hin Imphal nitin Chanchinbuhai khawm vawisuna inthawk March 9, 2015 chenin an chawl ding a nih.

Heroin le Ganja man

IMPHAL: March 3, 2015 khan Narcotics Control Bureau le 54th BSF thangruol han Joljam village, CCPur district-ah Heroin grams 105, Rs. 2.1 lakh manhu; Ganja Kg. 10, Rs. 8,000 manhu le pawisafai Rs. 1.17 lak an man niin ei thu dawngna chun a hril. A neitu Jamlen Khongsai ruok chu a tlan hmang hman.

Delhi H C in a namnghet

NEW DELHI: Kum 2000 a Haryana State a Junior Basic Trained (JBT) Teachers 3,206 indiklo taka lak a nina le inzawma Court in kum 10 lungin intang dinga thiemnaw an changtir ta sa hai, Haryana CM hlui OM Prakash, a naupa Ajay Chautala le IAS Officer pahni- Vidya Dhar le Sanjiv Kumar hai bakah kha huna CM Political Adviser, Sher Singh Badhami hai hremna dinga rel hi an dik a nih tiin zanikhan Delhi High Court khawma hrilin a namnghet.

Nationwide Gospel Music Festival

CCPUR: March 27, 2015 khin New Lamka YPA Hall-ah BYF, EBCC Lamka South Division mikhuolnain Nationwide Gospel Music Festival 3rd Motivation programme hmang ning a tih. Hi huna hin CCPur khawpui sunga kohran tum tum 27 haia inthawk fekhawm ning a ta, Halleluiah Chorus sakruolna um a ta, Rev. K. Kamchinkhup in thuhrilna nei a tih.

Cake sungah Mobile phone

SHILLONG: March 4, 2015 ni khan District Jail, Tura, Meghalaya thuneitu han Cake sunga Mobile Phone thupruka um an dapdawk. Mobile Phone (Samsung) hi Tura District Jail-a intang ANCA cadre, UTP William Sangma kuta pek dinga fak thei chi tum tum funna sunga fun sa, Tengsrang Marak an tiin Jail thawktu UTP Bansang M. Marak kuta an hlan a nih.

India Foreign Secy. Kabul-ah

KABUL: India Foreign Secretary S. Jaishankar chu Kabul-ah a cham mek a, zanikhan Afghanistan President Ashraf Ghani le CEO, Abdullah Abdullah le Afghanistan ram thuoitu dang dang hai an hmupui. Hi zo hin Afghanistan Foreign Minister Salahuddin Rabbani, Deputy Coreign Minsiter Hekmat Kalil Kharzai le Afghanistan President hlui, Hamid Karzai hai an hmupui.

Goa in Bawngsa a tlasam

PANAJI: Maharashtra state-a Bawng that le a sa zawr khap a ni leiin a thenkum Goa a chun Bawngsa hmu ding a um naw a, Goa hmuna Bawngsa zawrtu hai khawm zani leh ni 3 a zawnin an Sa zawrna dawr hai an khar tawl tah. Maharashtra a inthawk Bawngsa supply a umnaw bakah animal rights activist han an sawisak hlak leia an dawr hai an khar niin Goa Meat Sellers Association spokesman Anwar Bepari chun a hril.

Tawngtai ruolna le fellowship

CCPUR: B. Vengnuom a Immanuel ECA Church-ah zanikhan Halleluiya Prayer Band, Town area huoihawtnain bungheia tawngtairuolna an nei. Chun zanima khan Evangelical Baptist Convention(EBC) Lamka North Division hnuoia Dept. Tum tum han Departmental Joint Fellowship, 2015 an nei.

Biekin thangsain In 15 a kang

ITANAGAR: March 3, 2015 sunchang lai tak khan Arunachal Pradesh a West Kameng district sunga Tadin khuoah kangmei a suok a, mihriem chengna In 14, Biekin 1, Buin 2, Buher-khawl 6, motor cycle 1, SBBL silai 2 le thil dang dang cheng nuoitel manhu a kangsiet. Mr Tamik Talom, DC i/c, West Siang chun, kangmei tuorhai thangpuina Rs. 4,00 seng le bufai bag 2 le machi bag 1 a pek.

IAF Vuongna tuoksiet a tuok; pilot a him

LANDI: Zanikhan Haryana state-a Kurukshetra districtah Indian Air Force indo vuongna Jaguar chu tuoksiet tuokin a kang a, sienkhawm pilot chu an kapdawk hman a, sienkhawm na takin a hliem. Air Force fighter vuongna hi Ambala-a Air Force station-a inthawka vuong suok a ni a, pilot hi a hliem inrik leiin Ambala military Hospital-ah admit le enkawl mek a nih.

Kum 2014 sungin Sakei 78 an thi

NEW DELHI: Kum 2014 sung khan India rama sapeltuhai le a san dang dang leiin Sakei 78 zet that an ni a, kum 2013 in 68 le kum 2012 khan 89 that an nih tiin Union Environment Minister, Prakash Javadekar chun zani hmasa khan Lok Sabha an hriettir. Kum 2014 in Sai 63 le 2013 in Sai 91 an thi a, kum 2013 in Samak 142 an thi a, kum 2014 in Samak 91 an thi tiin Prakash Javadekar chun a hril bawk.

Pakistan Lunginah India mi 352

NEW DELHI: India Ngamantu iemanizat thangsain tuhin Pakistan lungin haiah mi 352 an intang mek tiin zanikhan External Affairs Minister Sushma Swaraj in Lok Sabha an hriettir. India rama Lungin tum tum haia Pakistan mi 253 le Pakistan Ngamantu 132 an intang mek tiin Ms Sushma Swaraj chun a hril a. Feb. 16, 2015 khan Pakistan chun India Ngamantu 172 le civil mi 1 Pakistan in a hung insuo niin a hril bawk.

India in IAS Officers 1,651 a tlasam

NEW DELHI: Indian Armed Forces chau ni lovin Civil Services khawmin Officers 1,600 chuong a tlasam tiin Minister of State for Personnel Jitendra Singh chun zanikhan Lok Sabha an hriettir.

West Bengal-ah IAS Officer sanction post 359 a ni laiin 220 an um a, 139 in an tlasam a, Uttar Pradesh in sanction post 592 lai 474 umin 118 in an tlasam tiin a hril. India rama IAS Officer approve strength chu 6,270 a ni laiin January 1, 2014 chen khan 4,619 Officer an um a, tuhin officers 1,651 in a tlasam a nih tiin a hril. India rama IAS officer tlaksam hrukbitna dingin sawrkar chun Officer lak zat khawm a sukpung a, kum 1998-a Civil Services Exam-a 55 ni chu kum 2013 khan 180 a sukpung a nih tiin Jitendra Singh chun a hril.

Tripura naupang 16 hai an nu le pa kuoma inhlan ding

AGARTALA: Februarty 25, 2015 nia Assam Police CID le Childline, NGO thangrul han Guwahati Railway station-a naupang 19 an sansuok hai laia Tripura mi naupang 16 hai chu Tripura- a an nu le pa hai kuta inhlan ning an tih tiin zanita official thusuok chun a hril. Hieng naupang 19 sansuoka um hai hi Guwahati-a Assam sawrkar enkawl Children’s Home-a enkawl mek an nih tiin Tripura Social welfare Dept. Secy. M. Nagaraju chun reporters hai kuoma a hril. A thuoi dingin Tripura Child Welfare Committee team Guwahati-ah feng an ta, March 10, 2015 in Tripura thuoitlung le an nu le pa hai kuoma inhlan ning a tih tiin minister chun a hril. Tripura naupang 16 hai hi Mizoram-a inthawk raltlana North Tripura-a refugee camp a um an ni tawl a, a dang hai chu Assam a mi an nih. Puitling pahni in Delhi pan ding Rel-a chuong pui an tum laia naupang 19 hai hi sansuok an nih.

J&K National Highway khar

JAMMU: Km. 300 zeta sei Jammu & Kashmir National Highway chu zani chen khan khar a la nih. Mimkei rapthlak tak takel hmun hran hranah a tlung leia J&K National Highway hi khar a nih tiin official thusuok chun a hril. J&K National Highway khara a um hi ni 4 a tling tah.

Nitish Kumar in March 11 ah an entir ding

PATNA: Bihar Chief Minister Nitish Kumar chun March 11, 2015 khin Bihar Assembly-ah Majority a command le command- naw inentir a tih. Hi ding le inzawm hin JD-U Legislature party meeting chu March 10, 2015 khin Mr Nitish Kumar chengna ina nei ning a tih tiin JD-U thuoitu pakhat chun a hril.

India mihai laia hausa tak Shanghvi a ni tah

NEW YORK: March 4, 2015 nia Forbes business magazine in a tarlang danin India mihai laia hausa tak chu Sun Pharmaceuticals neitu Dilip Shanghvi a ni a, a hausakna le a sum neizat chu dollar 21.5 billion a nih. Kum 8 zet el India mihai laia a zawna hausa tak lo ni hlak Reliance Industries Limited Chief Mukesh Ambani a khumkhel ta a nih. Khawvel pum huopa inkhinaa chun Mr Shanghvi hi 37th position a ni a, Ambani chu 43rd postion le Wipro chief Azim Premji chu 48th position a nih.

Union Minister Dadarao Danve an ban

NEW DELHI: Maharashtra BJP President le Union Minister Raosaheb Dadarao Danve chu zanikhan Council of Minister a inthawk an ban. Dadarao Danve hi tuta hma met khan Maharashtra BJP President dinga ruot a ni a, ‘one-man, onepost’ ti a ni le inzawma minister a ninaa inthawka an ban a nih. An banna hi PM Narendra Modi chun a pawmpek nghal a, Danve inbanna lekha hi President Pranab Mukherjee kuomah a thawn. Danve hi Union Minister of State for Consumer Affairs, Food and Public Distribution chel a nih.

Boko Haram thuoitu inpe dingin

N’DJAMENA: Nigeria rama helpawl rura takel Boko Haram thuoitu tak Abubakar Shekau umna ka hriet a, chuleiin Boko Haram pawl inpe raw hai seh. An inpek naw a ni chun Boko Haram thuoitu hi that ning a tih tiin Chad President, Idriss Deby chun thupek khau takel Boko Haram pawl chungah an suo.

EDITORIAL:

Hawp le hmuom

Mihriemhai hin ei taksa ta dinga tha ding, ei hriselna le taksa inthanglienna dinga pawimaw, fak le dawn tam tak ei nei ruolin ei taksa sukse thei, ei hriselna tawkse thei thil tam tak fain ei dawn bawk a. Ei thatna ding ni si lova sum le pai ei khawral tamna tak chu hawp le hmuom hi a ni awm ie. Ei pi le pu haia inthawk khan hawp le hmuom thaw nasa hnam ei nih. Ei pi le puhai khan chu thosi le mise karah kawla nisa suok zuia lo a fe hlak an nileiin an du lei hrim khawm ni lovin thosi le mise hnawt hmangnain puitling chin chun dumkhu an hawp deu vawng hlak. Puitling pangngaiin dumziel an hawp a, kum upa le putar tieng deu han dumbel an hawp a, nu upa le pitar tieng han tuibur an hawp ri kawr kawr hlak. Kawngkhat ngaituo chun ei pi le pu hai kha a pawng a puia sawisel le dem thei ding niin an inlang nawh.

Dumziel, dumbel le tuibur hawp lo hai khawm khan dumhmuom chu an hmuom ve tho a, nisienlakhawm tulaia thangthar han dumhmuom chi tum tum ei hmuom ang hi chu an hmuom ve nawh. Tienlaia ei pi le pu hai kha mani le mani intodel takel an nih. Vai siem sa an hawp naw a, an hmuom naw bawk. |hangtharhai ruok chun vai siem sa vawng ei ring an ta hi! Ei pi le pu hai intodelna, economic le hmathlir thu haiah tluk lo takel ei nih.

Khaini, sahdah le thil dang a hmuoma hmuom chi hai hi chu tienglaia inthawka ei lo thaw hlak khawm ni lo, vaihaia inthawka ei laksawng an nih ti inla ei hril suol taluo ring a um nawh. Vaihai siem sa le thawsuok sa ni lovin mani siemsuok sa hmuom ve awm tak ni si, thawna chang hre lova awlsam taka vaihai siemsuok sa ei hang laksawng el hin ei pi le puhai kha ei tluk naw nasa hle a nih ti a sukchieng hle a nih.

Hun a hung fe pei a, hlo thloa fakzawng lo hai hi hawp le hmuom thaw nasa ei hung ni ta a nih. Thosi le mise hnawthmangna dinga dumkhu hawp chu tlangrama lo sin thaw hai chau an ni ta a, pahirama chenghai chu ei ni nuom thua hawp ei ni tah. Thenkhat lem chun hawp le hmuom chu fashion chi khatah ei hmang niin an lang. Pasalhai hlakin hawp le hmuom thaw lo chu “a pa nawh” an ti a, nuhmeihai hlakin ruol pawlna dingin an ti a, mihai thaw thaw an lo thaw ve pei bawk si. Ei ngaidan hi an dik chie am? tihai hi ei ngaituo chet chet nuom a um.

India rama mi 100 peiah 35 chauvin hawp le hmuom an thaw ta laiin ei rama chun hmun thuma thea hmun hni neka tamin hawp le hmuom eila thaw a nih. Hawp le hmuom do ni’ (World No Tobacco Day) chu kum tin ei hmang hlak a, sienkhawm umzie a nei bek bek nawh. Dumkhu le dum a inthawka siem thil chi tum tum hai a that nawzie ei hriettawk ta ie, bansan a hun ta a nih.

Delhi le India ram khawpui dang dang haia chun hawp le hmuom hi uoulau taka zawr le hawp an ni ta nawh. a hnufuol deu le a mimawl deuhai umna veng tlabir le kawmkar deuah naw chun hmu ding a um ta meu nawh. Khawvela hin dumkhu hawp hlakhai an inchep nasa hle ta a, Airport, Railway Station haia khawm dumkhu hawp khap vawng a ni ta a, “SMOKING ZONE” chu a hming mei meia siem a ni tah. Mani le midang ta dinga harsatna siem lo hi a tha tak a nih.