Responsive Ad Slot

Mizoram Chapchar Kut 2015 hlawtling taka hmang

Friday, March 6, 2015

/ Published by VIRTHLI
Aizawl, March 6, 2015: Vawisun khan Chapchar Kut chu a ropui thei ang takin Mizoram hmun hrang hrangah hmang a ni a, an hmangna ropui takna Aizawl a chun Sipai Lammuol-ah hmang a nih. Chief Minister Pu Lal Thanhawla chu Kut Pa niin Art & Culture Minister Pu R. Romawia chu Kut Mikhuoltu a ni a, Taipei Economics & Cultural Centre in India Representative Pu Chung Kwang Tien chu Khuolzaum a hmang a nih.

Hi Kut hmang ding hin ramdang Taipei, Japan, UK, USA a inthawka hung khawm mi iemanizat an uma, India ram hmun hrang hrang ainthawkin an hung tawl bakah NEZCC, Dimapur a inthawkin am hotuhai le Northest states tin cultural item suklang dingin an thang ve.

Kut Pa chun khawvel hmun hrang hranga Zonau umhai chu Chapchar Kut chibai a buk a. Zonau hai ta dinga ni ropui tak, ei Kut ropui ni tak a nih tiin ei hman dan-ah ringtu ei nina le inmil zawnga ei fepui a tha a, siemthat ngai hai ei siem tha pei, a pawimaw takzet a nih tiin a hril. Hun la hung tlung pei dinga Mizoha'n hnam nunphung zemawi ei nei hai phawrsuokin ei zemawi vawng vul zing na'n um sien nuom a um hle a ti bawk a nih.

Chief Minister chun thalaihai chu nu le pa hai thuawina kawnga le mani neka upahai inza thiemna kawngah tlahnuoi pal an tih an lau thu hrilin, entawn tlak lo entawn a, ei nun zemawi suksetu ni pal hlau a tih a ti bawk. Chief Minister chun Kut hi hlimhlawp zawng le a huau huau zawng chau nilovin, hnamdang ramdang mihai khawmin thang vena tlak, inhawi an ti thei vena ding zawnga fepui a ngai thu a hril.

Chapchar Kut 2015 lawmna a hin Aizawl khawpui sunga YMA branch hrang hrang hain Mizo hnam lam mawi tak tak Cheraw, Sarlamkai le Chai lam hai inentirna an nei bakah hlasakthiem inlar tak tak haiin hlasakna hun an nei bawk. NEZCC ainthawkin hmarsak hnam chihrang hrang hai lam inentirna an nei bakah Mizoram Miss Chapchar kut 2015 thlangna nei a nia, Miss Chapchar Kut 2015 dingin H. Vanlalhlimpuii d/o Vanropuia, Ramhlun North chu thlangtling a nia, 1st Runner Up
ah Brenda Laldampuii d/o Lalchawimawia, Chhinga Veng le 2nd Runner Up chu Nathale Zodinpuii d/o Chawngthantluanga Chhinga Veng hai an nih.
Mizoram Miss Chapchar Kut 2015: H. Vanlalhlimpuii 
Miss Chapchar Kut with 1st and 2nd Runner-up



Don't Miss
© all rights reserved
made with by Simon L Infimate