Mizoram CM in Sialkal Range Development Council hawngna a nei, PTC in CM an chawimawi

Aizawl, January 22, 2015: Zanikhan Sialkal Range Development Council (SRDC) hawngna Mimbung khelmuol-a Chief Minister Pu Lal Thanhawla chun a nei a, hi huna hin Chief Minister chu Mizoram Paite Tribe Council (MTPC ) nasatakin an lo chawimawi bakah Pu Hawla hai nupa hi Mimbung mipui han zawnin an chawimawi a, chawimawina thilpek citation, puondum le siel chal an inhlan a Council hawngna lungphun a hawng bawk a, Churachanpur District Council thuoituthai iemanizat khawm an thang sa bawk anih.

CM chun Sialkal Range Development Council hi Sialkal tlangdunga chenghai hamthatna le hmasawnna hrat lem an hmu thei beiseina leia indin a ni tiin a hril a. A thu hrilna huna chun Chief Minister chun Zohnathlakhai hi Pathienin a bik taka a mi siem kan nih tiin, khawvela sakhuo lien tak tak Hindu, Islam le Buddhist ha'n an min huol sung in Chanchintha hmangin a mi hung zawng suok a, a chanchintha hril dingin a mi dit a, kan hril sung chu tukhawm'n an mi chimral phal naw nih tiin a hril.

Chief Minister chun Zohnathlakhai hi rorelna khat hnuoia um ei nuom a, Pathienin hun a ti huna chun ami lan um tir hi ka beisei tlat ani ti thu a hril. Ei tawnghai hi danglam met sienkhawm inlaichinna hnai tak nei seng ei ni thu le khawsak zierang inang tlang kan nina hai hin sulkhat suok ei nizie a suklang ani thu a hril a. Chuleiin hnamdang hai inza le mi ti na khawp in inngei taka ei khawsak tlang a tul a nih a tih.

Inla hrang khawp khawm ei ni naw a, inruol taka hmasawna nei hi ei dit tak ani a, ei unau thisen inzawmpui hel thenkhat haiin an unau danghai kuoma thawluina hmangin tax an dawla, sawisaka an dawr hai an in khar tir hi thil pawi tak a nih a ti bawk.  Ram hrang hrang India, Myanmar le Bangladesh a hai umin le India state dang dang  Mizoram, Manipur, Tripura le Assam a hai khawm kan uma, kan umna sengah khuo le tui tha, mi ringum le indik ni tum seng ei tiu tiin a hril.

Sialkal Range Development Council hawngna hun hi Pu Damsavung, Council Executive Committee Chairmanin a keihruoi a. Chawimawina hun hi PTC Gen Hqrs, Manipur ainthawkin an President Pu Vungsuanthang chun a neia, Paite hai hi Mizo kan ni ti kan chieng a, Duhlian tawng kan thiem seng naw leiin Mizoram mipuihai hin mi enhrang pal an tih ti hi kan lau tak anih a tih. Mani state ngei Mizoram kan nei ti kan hriet hin kan thla a muong hlak tiin a hrilsa bawk.

MPTC President Pu H. Dal Khen Khai chun Pu Hawla an chawimawina san chu mipui hmaa a hrilin, hi lai tlangdunga chenghai hmangaitu le an hmasawnna dita SRDC hiel petu a ni leiin a nih tih. Hienghai baka Mizoram Legislative Assembly a Paite Hnam hrietpui a Paite Tribe recognition passed tu a nina hai lei a nih tiin a kuoma lawmthu hril hi kan thaw makmaw a nih tiin a hril.

Photographs: DIPR Mizoram