Responsive Ad Slot

Kei ka lo ngai ve dan: ‘Aia, Aiin le Tading’ Thuhmun, ‘Tading le Ta ding’ an ang nawh!

Thursday, December 4, 2014

/ Posted by VIRTHLI HMAR
~ LRS Puruolte

Hmar Tawng hi a tawng neitu le hmang zingtuhai ngei ngei khawma ei thiemnaw a ni chun hnam dangin an thiem chu harsa vieu hrim a tih ti hi inphat ruol an nawh. Hmar tawng thiem ti hin hmang thei naran, Tawng thei le ziek thei naran el an naw a. Tawng kalhmang hriet le thiem baka ziek dik a ngai a nih. Tulai hnaia Hmar tawnga suok hlak nitin chanchinbu inlar tak el, Hmasawnna Thar a Pu H. Zaneisang le Pu Royal Lalsangthang Pakhuongte haiin ‘AIA le TA DING’ an hung ziek hai kha ka lo tiem ve hlak a. Hi chungchang a hin ngaidan mi tamtak khawmin nei ve ngei ei tih ring a um. Tawng thumal hi fimkhur taka inchûkchieng, sui chet chet chu a lo ngai khawp el. Tawng thu hi Lekhabupui a siem khawp er-awr ziek suok khawp zet a lo um a nih. Tuta tum hin tawiterekin Hmar tawnga thuhmal, ei thupui khi hung ziek ka nuom ve rieuna a um a, hung zieklang veng ka tih.

Hmar tawnga thumal hrim hrim hi a thumal zawmpui i zir a indang, thuhran a tam hle el! Hi lei tak hin ei Tawng hausakzie a tarlang hlak a nih. Hmar tawng danglam (Special) vena tak khawm ziek danin a nina tak a hril hlak hi a nih. ‘Aia, Aiin le Tading’ ti a ni chun umzie thuhmun char a nih. ‘On behalf of’ le ‘For’ a nih. Mi tamtakin ‘Tading’ ti le ‘Ta ding’ ti hi ei hrietkar naw nisien a hawi! Entirna’n- Tading:  Krista tadinga hring, Krista tadinga Thalai, HYA tadinga thangpuina thawlawm... ti a lo ni chun hi taka ‘tading’ ti hi ‘for’ a nih. Ta ding: Bufai Kg 1 ah Cheng 35 ni hlak kha Cheng 25 a ni ta ding, Ka fe ta ding, Ka hung vak ta ding. Office fe a hun ta ding, Bu i fak ta ding?...  A umzie chu ziek danin a hrilfie hle. Hmar tawng thumal tamtak hi ziek dan dungzui a umzie um an nih. Ziek mat le inmatlo ding a tam hle, Thlûksei ^ pekna ding dam, Apostrophe ’ siena ngei ngei ding chi dam khawm tamtak a um hlak. Sie seng an naw tiengpang a nih. Hmar tawng a thuziek, Lekhabu siema lo um tah hai dam khawm hi tamtak chu Correct ding a um a nih. Sawiselna po po chu pawm a, correct seng khawm ni vawng chuong nawng a ta. Sawiselna indik, zui le zawm ngei ngei chi ding khawm um ve hlak ngei a tih ti hi hriet dingin a tha hle awm ie.

Chuleiin, hiengang tiengpanga hin hma ei sawn nawk zuol theina dingin vawisunnia inchûklaihai khawm hin Morphology le Linguistic tieng inchûk uor zuol inla nuom a um tak zet. Ei tawng inchûkchieng hi ei insukhmu khawm a hun ta hle an naw maw? Mani mimal ngaidan dan a ei fe an chun buoina ding tam tak la um pei dingin an lang. HLS hin am, tuin am? Tawng chungchanga thumal indik le indik naw hi ei hnam sunga hin hung endik/enkai/siemtha’ng a ta? Chuong an naw chun umna hmun indang leia Hmar Tawng seng seng hmang dan indang mek ta hman hi hrillo, Lekhabu hau inla lem chu Tawng le Thumal hmang dan a buoina a la hung pung pei dingin an lang chieng ta hle. MIL Teacher ei ti hai khawm hi HLS in Training an pek an ni vawng kher awm si naw a. Hmar an ni leia an thawkna inchûknain in a sawr ve el dam ning an ta. Tawng ziek le hmang dan indik thu a ruokchu an inchûktirhai, an naupanghai zui le zawm tlak an ni chie vawng kher di’m? ti khawm ngaituo a ngai ta hle’n a’nlang.

Hiengang hi ei ngirhmun indik tak a ni leiin hma lak vat chu a ngai ta hle an ta naw maw?



Don't Miss
© all rights reserved
made with by Simon L Infimate