~ LRS Puruolte
Taksa sawizawina ni bawk (Physical Fitness), mani invengna ding insawizawina (Self-Defence Training) hi uor inla a fuk tak el naw ding am a ni aw? ka ti hlak. Kha hma khan tulai khawvel a changkang pawl taka ka hriet le hmu VISION ACADEMY, Rengkai, CCPur chun Physical Fitness le an talent hai sukhmasawnna ding tiengpang hmathlir neiin an inchuklaihai lekha chauh niloin tui inhlieu, rimawi rem dan le a dang dang baka Karate/Kungfu dam inchÛk theina an hung hawng a, lawmum le ṭha ka zuk ti hman vei leh, zuk comment ding ka ti chauhin inchuklai nu-le-pa tamtakin an sawisel thu an mi hril ta lem a. Pawi ka ti kher el. Unaunu (Ka farnu) MC Mary Kom Boxer ang lawm lawma khawvel hrieta thiem le lawmman la phak in/ei lo ni naw khawmin, mani invengna dingin nuhmei hai hi boxing dam lo thiem hai sienla chu vaihai/mihur haiin an tawk el thei ring a um nawh. An pasalhai khawmin an vuok ngam el bik cheu ring a um nawh. Nuhmei hai tak tak hin Kungfu/Boxing inchuk nasa hai sien nuom a um takzet. Pasal hai khawmin inchuk uor inla ei him tlangna ni tak tang a tih. Dan zam a um, Police, Sawrkar ringawt le a mi venghimtu ding bik a ruot pawl hai chunga innghat el chun a thei ta naw mama a ni hih! Mimal malin bodyguard hlak nei seng dan umlo. Mani le mani inveng bak chu thaw thei ding ei nei ta nawh!
Chun, ei suonvawr, ṭhil ṭhangkai post rawn tak, Award dawng thei hiel ding, tlangval fel deu el, inzanain Pu, Neilmerlal Mahtien-in VIRTHLI-ah Sep 15 khan hiengang hin an ziek a (insel, inhal le hmangna bo ei inhniksan lem hlak a, thil ṭhangkai uksak hi ei tlawm leiin ei uksak pek ngai naw a, thil pawi tak a nih. A ṭhaṭ em em vei leh ei lo uksak am? A lo va ṭhang dam iengzat chie am ei um ding?)
Delhi-a NE ṭhalai hai ta dingin self-defence training le Hindi class:
New Delhi, September 15, 2014: Hung tlung ding October 4 anthok khin Delhi Police huoihotna hnuoi-ah Delhi khawpuia India hmasak nuhmei hai ta ding bikin misuol hai laka an inveng theina dingn 'self-defence karate training' DDA Squash & Badminton Auditorium, Sirifort, New Delhi-ah nei ṭan ning a tih.
Hi training programme hi inhnikna nei ta phot hai ta dingin a thlawna ṭhang thei dinga ti a ni a, kum khat sung aw dinga ti a nih. Training hi October 4 anthokin Inrinni le Pathienni dar 4pm-6pm sung nei zie dinga ti a nih. Hi baka hin Hindi ṭong inchuk nuom NE ṭhalai hai ta ding khomin self-defence training nei zo zat dar 6pm-7pm sung nei hlak ni bok a tih.
Self-defence training le Hindi class la nuom hai chun Delhi Police NE Representative hai kuomah annawleh mobile number 9810083486-ah September 25 chen-ah hming pe lut dinga inhriettir an nih.
