HWA Rengkai in mi umpui dinga Myanmar-a mi ṭhuoiluttu an man

CCPur, July 19,2014 (HT): Hmar Women Association (HWA) Rengkai Unit chun Singapore-a mi umpui (domestic help) dinga Myanmar rama mi ṭhuoiluttua intum Mrs Thienghlim w/o Changa of Rengkai chu zani hmasa zan khan an man a, Police kutah an pek. Ei thu dawngnain a hril danin Mrs Thienghlim hi Tamu (Myanmar) mi hrim a ni a. Singapore-a sin pe ding tia ṭhuoi naupang pahni mumal nei lova buoi taka um hai chungthu suizui mek a ni lai zingin Mrs Thienghlim hin Thenmuol mi nuhmei pakhat le Sielmat, CCPur mi pakhat hai chu Singapore-a mi umpui (domestic help) a um ding tiin ṭhuoi a tum a. Sielmat nu chu remchang nawna leiin a ṭhuoi thei naw a, Thenmuol nu ruok chu a ṭhuoi ti thu an hriet le inruolin HWA Rengkai Unit chun bawzuiin a nu le pa hai chu Tamu (Myanmar) an lut hma ngeia kokir dingin an hril a, sienkhawm an hang indawn chun Ms Thienghlim hin a mi ṭhuoi (Thenmuol nu) chu Myanmar a lo lut pui hman ta a. Hi hnung hin Ms Thienghlim hih Sielmat nu ṭhuoi dingin a hung kir nawk a, a hung kir nawk ti an hriet le inzawma HWA Rengkai Unit in an bawzuinaa an man ta a nih.

CCPur Police chun Ms Thienghlim hi an kawl mek a, FIR No. 76(7) 2014 CCP- PS U/S 370/372/373/ 346/120-B IPC, 23 JJ Act. & 14 Foreigner Act. case an registered khum a, Chief Judicial Magistrate hmaah inlangtir an tih.