July 18, 2014
July 17, 2014-a Hmar Literature Society, Manipur, Office Bearer-hai le Invitee-hai inkhawmnaa thurel 3-nain, HSA Platinum Jubilee Celebration Committee lekha dawn dinga a rel angin a hnuoia ang hin Dawnna siem a nih.
1. HLS Manipur hin HSA Platinum Literary Meet Committee’n Hmar Literary Day Programme a huoihawt hi a kal naw a. ‘HSA-in a thawlo ding a thaw’ a ti ruok chu, ‘Thumal / hawrawp ziek dan thuhmun ei nei a pawimaw’ ti hril dinga Hmar hnam puiin a fepui dan ni lo, Hmar Literature Society norms le ziek dàn naw anga ziek char chartu Pu Dr. (Rev.) Rochunga Pudaite a ruot le, ‘Ziek dan inanglo / indiklo tlangpuihai le a’n dik lem’ ti hril ding a, Hmar Literature Society ziek naw dana ziek ve char chartu Pu L. Keivom an ruot hi, Hmar hnam pui hi, fepui lai nei a ni leiin, inchûklaihai hmaa ţûl lova insêl hrepna suksuok thei ding a ni leiin, chu chu hnam ta dinga thil hrisello a ni bawk leiin, hieng ang hnam pui kalchawi sukchingpen zawnga HSA-in hmâ a làk hi, HLS chun a thlawp thei naw thu hrilin, HLS Manipur, Chairman le Secretary, Resource Person dinga fiela an um chu, an pawm thei naw thu le an ţhang thei naw ding thu, an hril a ni lem a. Literary Meet hi a kalin a dodal naw a. Inremna ni lova, inremnawna suksuok zawnga HSA Platinum Celebration Committee hmalakna hi, HSA thaw ding niin HLS chun a hriet thei naw a nih.
“HLS-in Hmar ţawng ziek dan ‘style’ tia a pawm le namdet hiiengtiklai khawma HSA chun a sawisel naw a, thlakdanglam a tum bawk nawh” HSA PJCC-in a ti hi, a thilthaw le hin an kal a nih ti hi, hre saa a ti lui a ni ring a um. Chu chu ni naw sien chu, Hmar ţawng ziek dan kal zawnga lekha le Bible hiel insuotuhai ni lovin, Hmar ţawng sukhmasawnna dinga sum le pai le tha le zung tamtak seng a, ‘ka sawl’ ka kham’ khawm ti phal lova, mani insung khawm ngaisak hman lo hiela inrim taka sinthawtuhai hi, “Thumal / hawrawp ziek dan thuhmun ei pawimaw” ti le, “Ziek dan inanglo / indiklo tlangpuihai le a’n dik lem” ti hril ding hin ruot lem ngei a tih. Dilsût takin ngaituo sien chu, HSA PJCC hin a thaw ding thaw lova a thawlo ding a thaw hi, hre suok ngei a tih. Hnam ta dinga sawlhai hre nuom lova, a nawzawnga hmâ a làk hi, a hmalakna san hi, hi committee ţhuoituhai chau naw hi chu, an hriet phàk da’l thei.
2. “BA chena Hmar MIL ei nei leiin Hmar ţhangthar haiin Hmar tawng an thiem pha in an ziek thiem pha hle le hle naw ti khawm ngaituo ve met a ngai bawk” (an ziek dan dana ziek a nih) an ti hi, an ţawng invet a ni naw khawmin, Hmar MIL BA chena ei nei leia Hmar ţhangthar haiin Hmar tawng an thiem pha le an ziek thiem phazie hrechiengtu chu Hmar Literature Society (Manipur)-a Secretary sin chel lai mek hi a nih. Ama anga Hmar MIL inchuktuhaiin an bawr buoi le an suksawl hi, Hmar nauhai lai hin pakhat dang umsa hai sien chu, HLS Secretary(Manipur) hin lawm hle’ng a tih. Ama anga Hmar MIL inchuktuhai hmakhuo ngaitu Hmarnauha’n ei nei hi, suknuor pal ei t’a, a mi helpek chun, ama anga taima le hnam hmangaitu ei um àwm si naw a. Tu ta ama sawiseltuhai hin, ama thaw ang hi in thaw pei si naw chun, insir ieng ang unla khawm, a ţangkai ta âwm si naw a…!
3. “ ‘Literary Day Programme’ hi vawisun ni chen hin sukfel a la ni naw a. HLS ţhuoitu hai a rawn a, an thurawn a lak taluo hi a suksuol lem am a ni aw…ti thei dingin a um. A phut takin thupui ding bik umlo a siem a na, HLS Secy. in siem inla ti thuirawn a pek dungzuia thupui siem a ni a. Ama vek inhmutir nawk a ni a, mi thenkhat subjet hai khawm ama dit dan taka thleng nawk a ni bawk. HLS ţhuoituhai thurawn dungzuia thupui (topics) hai chen siem a ni hnung khawma hieng anga upa lem le inchuk sanglem hai anthawka dawnna a hmu hi HSA ta ding chun mak ti naw ruol hrim a ni nawh. Thil hrim hrim ralkang anthawka zeldin thua “sakhi thingler inlawntir” nekin andiktak hre chieng zeta thutlukna siem chau ni hlak sien chu kan nuom takzet a nih” (an ziek ang anga ziek sawng a nih)
Hi taka ‘HLS Secy’ an ti hi a hming an zuklang rin deu a ni ring a um. “L.Ruoivel Pangamte” an tina a nih. July thla bul khan LRS Puruolte hi Tv. Lalthanzau leh Ruoivel Pangamte inah an leng a. Literary Meet huoihawt an tum thu le Ruoivel Pangamte chu ‘Resource Person-in’ a ţhang thei di’m? ti a’n dawn a. Ruoivel Pangamte chun, “Ieng topic am ka hril ding?” tia a’n dawn chu, “Mani dit dit” tia dawnin, chu le inzawma lekha an siem chu an pek a. Ruoivel Pangamte chun, “Tu tu’m in fiel leh?” tiin a’n dawn pei a. LRS Puruolte chun, Pu Rochunga Pudaite, Pu L.Keivom, Pu Tluonga Bapui, Pu Lalthankunga Hmar le Pu S.K.Khobung le nang…” tiin a dawn a.
Ruoivel chun, “Mani nuom nuom hril ding a ni chun, Pu Rochung le Pu L.Keivom hin ‘Ţ’ aia ‘TR’ le ‘Aw’ aia ‘O’ bawk hung keitho nàwk an t’a. Kei hlak HLS norms hi ka ngirpui tlat âwm si. Insel buoina a suok mei mei naw ding maw?” tiin a hril a. LRS Puruolte chun, “Chuong tiengpang chu hrillo dingin hril ei t’a” a ti a. Ruoivel Pangamte chun, “Chuong nekin Hmarnau laia ei mithiem hmasa khawm an ni a. Pu Rochungin ‘Hmarnau le inchukna’ ti dam hril sien chu, awm a t’a. Chunek hman chun, ‘Literary Meet’ a ni chun, a lekhabu ziek Tlangchar Tuihnar chungchang dàm hril sien, annawleh a hlaphuok Suilung Phanglo thu dam hril sien a ţhat ka ring’ a ti a. Chun, Pu L.Keivom chun hla tamtak a phuok a. Short Story khawm ţha tak tak a ziek a. Chuong tiengpang chu hril sien, ngainuom um a t’a. Chuong a ni naw chun, HLS fepui naw dan an hung hril ngei ngei ding a nih. Chun, HLS-in hieng lawma a sawlpui, BA/BSc chena MIL ei hmu, ei lawm ţum khawm khan, ngaina tak le ditsak takin Guest of Honour le Chief Host ngirhmun ei incheltir a. Amiruokchu, an thuhrilnaah HLS chunga an lawmthu thumal pakhat khawm an sam naw ve ve a nih. Chunek chun, hmun dang dangah HLS ţhuoituhai iengmalo an insuona thu ngawt hriet a ni hlak. Chuleichun, an nuom nuom hril dinga in thaw chun, inselbuoina a suok lem ding a nih” tiin, Literature Society-a Secy. a nina ni lovin, ama mimala hnam hmakhuo a ngaina leiin thurawn a pek a.
Chu hnung chun, Mobile phone-in LRS-in Ruoivel Pangamte chu a biek nawk a. A thurawn anga Topic an siem thu a hril a. Ruoivelin “Pu Rochung le Pu Keivom hai topic a’n dawn a. A ringhla ang hrimin Pu Rochung chun ‘Thumal / hawrawp ziek dan thuhmun ei pawimaw’ ti le, Pu Muong chu, “Ziek dan inanglo / indiklo tlangpui le a’n dik lem’ ti thupuihai an pek thu a hril a. Ruoivel Pangamte chun, “Annawleh, an Seminar Paper chu Hmar writing style pangngaiin an ziek a ngai ding a ni a. In thuhne ding am? Chu chu an nuom naw chun, kei khawm ka ţhang nuom bik naw ding a nih” a ti a.
Chuleichun, a chunga HSA PJCC lekhain, HLS Secy. thurawn anga topic an siem nia an hril khi, an ti ang ngeiin, mi ţhenkhat topic chu a’n dik a. Amiruokchu, HLS-in a lem thei lo, ‘Ţ’ aia ‘TR’ le, ‘Aw’ aia ‘O’ bawk hril dingin Pu Rochung le Pu Muonga an pek a nih ti chu a chieng a. Chu ding chun sum le pai khawm an seng ding niawma hril a nih. Chuleichun, ‘Sakhi thimngler inlawntir” an ti hi, a umzie an hriet naw a ni lem el di’m chuh…
Chun, ‘Literary Day Programme’ hi vawisun ni chen hin sukfel a la ni naw a.’ an ti hi July 3 annawleh 4 khan Virthli-ah niâwm tak a nih, ‘Literary Day Programme’ ti hi insuo a ni a. Chu dungzui chun, HLS (Manipur) Chairman le Secretary-in an ţhang thei naw ding thu, lekha an siem a nih. A tir a pha khan, Hmasawnna Thar Ju;y 18, 2014 Issue-a an programme insuo ang hin, programme siem hai sien chu, tukhawmin iengkhawm hril naw’ng an t’a. HLS Chairman le Secretary khawm an inţhangtir naw ang bawk hin, iengkhawm hril naw ni hai.
Hieng ang bawk hin, Hmar Inpuiin Hmar Linguistic Seminar a buotsai tum ţum khawm khan HLS (Manipur) Secretary hi, thudik chenvea intumin a um a. Ruoivel Pangamte hin a mimal ngaidan a nei a, HLS Secretary a ninaa Society ngaidan a zui ding khawm a um bawk a nih. Ama khawmin LRS Puruolte kuomah, “ Ka mimal ngaidan a ni a. HLS ngaidan chu HLS Meeting a um phaleh la hriet ni’ng a tih” a ti a nih.
A mimal ngaidan khawmin, Hmar hawrawp / thumal ziek dan chungthua chu, HLS neka Hmar hawrawp le thumal ziek dan buoipuitu ding hi, ieng pawl dang khawm umin a hriet nawh. A san chu, Manipur Sawrkar le Assam Sawrkar khawmin, Hmar MIL le inzawm hin, Literature Society bawk hi a rawn tak a ni hlak si a. A hrechiengtu tak chu zanmu inhnik tak khawma intuo hman ngailo khawpa Hmar MIL invetchila buoipuitu Ruoivel Pangamte hi a nih. Ama anga buoipui pei an um chun, a sin hi inhlan a nuom zing a nih.
Mi dang an um thlawt naw lei a, kum 10 chuong zet buoipui char char a ni hih. “In hnunga ţhuoitu le mawphurna latu ding in buotsai a ngai ti lo hre ve bawk ro aw..” an ti hi Ruoivel Pangamte an tina a ni chun, buotsai tum el khawm ni lo, ama thlaktu ding zawng hin a’n vir kuol a’n vir kuola chu, a hmu thlawt naw leiin, ţap vàng vâng pumin, a la phur ţawk ţawk a ni hih! Ama hmun hluo dinga ‘in-volunteer’ ding ei um naw maw? Ama khawm hi ţhahnemngai leia in-volunteer’-a, Hmar Literature Society-a inchâwmlût a ni hih! A sawisel hrat hrat hi a thaw peilo an ni hlak.
A sawlzie hi, ràlkânga inthawka zêldin thu ela ngaituo lovin, ‘sakhi thingler inlawntir’ bawk lovin, a sawlumzie hre dingin hung inchâwmlût ve ta unla. Ama chun Hmar ţawng hmasawnna ding le Hmar Literature Society hmasawnna ding hin, a sum le pai tamtak a seng hlaka chu, ‘Bill’ a submit nuom ve ngai nawh. HLS hi chu a hlawkpui nawin a tlawr pha naw nasa a ni aw….! Ruoivelin society pawisa a seprel hrie in um am? A mimal sum a hekpha lem a nih.
Hmar hnam siemthatna dinga hmâ la lova, sukpherna dinga hmalatu hi Ruoivel thil nuomlo tak a nih. Mi’n an inpàk naw khawma a sinthaw a chai naw a, an inpak khawm a, a tha a fân chuong nawh. Hnam ţhatna ding chau hi a ngaituo a nih. Nina (position) ni lovin, hnam ţhatna hi a ngaituo lem hlak.
‘Hmun ţi, ral ngam’ mei mei hi ei ni tâwl el di’m maw…?
Hmar Literature Society aiin,
(L.Ruoivel Pangamte)
Secretary
Hmar Literature Society (Manipur)
