Responsive Ad Slot

Hmasawnna Thar | July 25, 2014

Saturday, July 26, 2014

/ Published by VIRTHLI
HEADLINES
Dr I.Ibohalbi Singh in Privilege Motion a putlut : Demands 7 passed
IMPHAL: Zanikhan Dr I.Ibohalbi Singh, Trinamool Congress MLA chun Impact TV, Private TV Channel le Human Rights Activist hmingthang, Babloo Loitangbam chungah breach of Priviledge motion a putlut. Bablo Loitangbam hin member- hai hming hlieu le suksiet theina thu Impact TV-ah July 22, 2014 khan a hril a. A thuhril haia hin “Mithibong Mitambal”, “Manung Hutpa”, MLA-hai chu Contractorsmle a dang dang an nih tiin a hril tiin I.Ibohalbi chun a hril. Hi motion hi Paonam Brojen, MSCP MLA, L. Ibomcha, NCP MLA le Congress MLAs, Dr Ng. Bijoy le R.K. Anand hai khawma an thlawp. Hi thu hi Speaker Th. Lokeshor chun Assembly Privilege Committee ngaituo dingin a peksuok bakah report pelut dingin an hriettir. Manipur Assembly chun zanikhan lungruol takin Demands 7- Medical, Health & Family Welfare, Rs. 342,10,08,000/- ; Co-Operation Rs. 18,00,26,000/- ; Administration of Justice Rs. 40,19,81,000/- ; Stationary & Printing Rs. 5,59,59,000/-; Science & Technology Rs. 5,98,95,000/- le Information & Technology Rs. 8,05,61,000/- lungruol takin an passed.

Bus hai an service ta ding
CCPUR: Churachandpur le Imphal inkar (Tiddim Road)- a passenger phura service Bus hai chu vawisun (July 25, 2014) a inthawk hin an service ṭan nawk ta ding niin ei thu dawngna chun a hril. Bus service hi July 23, 2014 a inthawka kha an chawlsan a ni a, zanikhan sawrkar leh inbiekna an nei a, an inbiekrem thei leia service hi an sunzawm nawk ding niin zani zana ei thu dawngna chun a hril.

LOCAL NEWS
Hearing aids le wheel-chair sem ding
CCPUR: People Advance in Social Service (PASS) chun July 25, 2014 (vawisun) 11:00AM hin DDRC, New Lamka Vengnuam South, CCPur-ah piengphunga ruolbanlo hai kuomah hearing aids le wheel chair semna programme hmang an tih. Hi huna hin S. Khaikhopau Ngaihte, BO, HQ., DC Office le Ms. A. Umarani Devi, DSWO han hearing aid le wheel chair hai semna nei an tih. Hearing Aid le Wheel Chair mamaw hai chun passport photo copies 2, residential certificate le income certificate hai chawia 11AM in a hmun tlungkim seng dingin Henthianlun, Secy. PASS chun inhriettirna a siem. Material semna chu 1PM a nei ding a nih.

HWA ṭhuoitu-han Tamu an pan
CCPur/Tamu: Hmar Womens’ Association (HWA) Gen. Hqrts. ṭhuoitu-hai chu Human Trafficking le inzawma nuhmei 2 Myanmar ram sunga intang le um mek hai hnung suizuiin zani (July 24, 2014), 10:00AM khan Tamu, Myanmar panin an suok.

Hiengang thil laka fimkhur dingin HWA GHQ chun ngenna le inhriettirna an siem a. Sum le hausaksakna hnawta mi hrietchieng lo pawng zui le zawm bansan a, hiengang thil-a inhnamhnawi le ringhlaum taka khawsa hrie le hmu hai chun HWA GHQ kuoma intlun pei hlak dingin mitin an ngen bawk. Hiengang thila inrawl hai chu sawrkar dan ang taka an chungthu rel le HWA area huop sunga lut le cheng nawk thei ta lo dinga hnawtsuok pei ning an tih tiin HWA GHQ chun a hril.

Police remand in July 28 chen Custody-ah
CCPUR: Hmar Women Association (HWA) Rengkai Unit in Singapore-a mi umpui (domestic help) dinga Mynmar rama mi ṭhuoiluttua intuma an man Mrs Thienghlim w/o Changa of Rengkai chu zanikhan Chief Judicial Magistrate (CJM), CCPur hmaah inlangtir a ni a, Police han la kawl dinga an ngen leiin Police remand in CJM chun July 28, 2014 chen Police Custody-a la um nawk phawt dingin a rel. CCPur Police chun Ms Thienghlim hi FIR No. 76(7) 2014 CCP- PS U/S 370/372/373/ 346/120-B IPC, 23 JJ Act. & 14 Foreigner Act. an registered khum a nih.

Natl. & State Level Painting Competition
CCPUR: Ministry of Power, Govt. of India chun December 14, 2014 khin National Energy Consultation Day hmang a tum. Hi thil ding le inzawm hin National le State Level painting Competition category ‘A’ le ‘B’ ah nei ning a ta, Category-A ah Class IV-VI inchuklai le Category B-ah Class VII-IX inchuklai hai ṭhang thei an tih. School tinin category A le B haiah mi pakhat ve ve ruot/ tir thei an ta, School aiawa ṭhang ding (nominee) list chu August 31, 2014 chenin Mr Pumshong Hangshing, DI of Thanlon kuoma peklut ding a nih. Hi Competition-a Prize ding chu- State level-ah category A&B: 1st Rs. 20,000/-, 2nd Rs. 15,000/- le 3rd. Rs. 10,000/- bakah Consolation mi 10 hai kuomah Rs. 2500/- seng pek ning an tih. National Level-a Category- A competition a chun- 1st. Rs. 1 lakh, 2nd Rs. 50,000/- (mi 4 kuomah pek ding); 3rd. Rs. 25,000/- (mi 8 kuoma pek ding) le Consolation mi 10 kuomah Rs. 10,000/- seng pek ning an tih. Category B-a chun Rs. 1 lakh, 2nd Rs. Rs. 50,000 (mi 2 kuomah) , 3rd. Rs. 25,000 (mi 3 kuomah) le Consolation prize Rs. 10,000/- mi 6 kuoma pek ning an tih.

July 30 chen Police Custody-a um dingin
CCPUR: July 21, 2014 nia 26 Assam Rifles han Suangdai Village-a an man Tun Cin Mang Langel (21) s/o En Khong Langel of Tuimui Village, Myanmar chu zanikhan JMIC, CCPur hmaah inlangtir a ni a, Court chun July 30, 2014 chen Police Custody-a la um phawt dingin a rel. CCPur Police chun Tun Cin Mang Langel chunga hin FIR No. 4(7) 2014 SGTPS U/S 14 Foreigners Act an registered a nih.

SDPO rawiin Special Drive an thaw
CCPUR: Zani hmasa zan dar 6:30 vel khan Mr Emmanuel Fimate, MPS, SDPO, CCPur inrawinain CCPur Police han Old Bazar, Super market area-ah Special drive an thaw a. Beer Bottle 31, Cane Beer 25, tuolsung zu litres 80 vel an man. Zu le Beer mana um hai hi zani zantieng 2:00PM khan tuolsung chanchinbumi hai hmuah an bunthlak.

AIR, CCPur stn. Prog. 
CCPUR: Vawisuna AIR, CCPur station-a Paite programme a chun Gloria Chinglianniang le Thangchinkhum & party han hla sak an ta, This Week in CCPur script by Lalmalsawm Sellate tiem ning a tih. Hmar programme a chun Geneviv Lalenkawl in hla sak a ta, This Week in CCPur script by Lalmalsawm Sellate tiem ning a tih. Thadou programme a chun N. Boljang Church Choir han hla sak an ta, This Week in CCPur script by Lalmalsawm Sellate tiem ning a tih. Zan dar 7 a chun Sapthei ching dan chungchanga Ramnghinglo interview-na ngaithlak thei ning a tih.

Tata Winger le motor danghai an tlan
CCPUR: Tiddim Road a tlan phal ninaw sienkhawm Tiddim Road hel le a hla zawngin Tata Wingers, Diesel Engine Auto-Rickshaw, Van, Bolero le Taxi dang danghai chu CCPur le Imphal inkarah an service a, motor chuongman mi pakhatah Rs. 150/200 pei an lak.

HWA Lamka Unit ṭhuoitu thar hai
CCPUR: Hmar Women Association (HWA), Lamka Unit ṭhuoitu thar (2014- 2017) ding thlangna a um a, President dingin Lalhmasuon, Vice President dingin Miss Rebec Siemlien, Sercretary in Darrokim, Asst. Secretary in Lalrengliani, Finance Secretary in Lalsanhim Kholum le Treasurer in Hrilrawnkim hai thlang an nih. Information Secretaries Zone-I in Lalchullo, Zone-II in Ramsiem, Zone-III in Lalthangliani le Zone-IV in Thangrokim hai thlang an nih.

STATE NEWS
Manipur Dy. CM hlui Amutombi a thi
IMPHAL: Manipur Deputy Chief Minister, Cabinet Minister le Deputy Chairman, State Planning Board sin hai lo chel hlak, Pu Kh. Amutombi Singh chu kum 81 mi niin zani hmasa zan khan a chengna In, Babupara, Imphal hmuna a thi. Deputy Chief Minister hi kum 1990 huna a lo chel a nih. Th. Amutombi hi 3rd & 5th Manipur Legislative Assembly Election haia khan Mayang Imphal A/C a inthawka thlangtling a lo nih. Manipur Assembly SessionahCM, Ministers le MLAs han Kh. Amutombi sinthaṭhat le State pumpui ta dinga channna a ni thu an hrillang tawl.

Imphal-Jiribam Road ngirhmun hrillang
IMPHAL: Zanikhan Manipur Assembly-ah Imphal- Jiribam Road ngirhmun thuah Shyamkumar, MLA in attention motion a putlut. CM, O.Ibobi Singh le Works Minister, Dr Kh. Ratan Kumar han Zero to 3.22km chu State PWD in an siem zo ta a, 3.22km to 222km chu BRO kuta um a ni a, an siem zo hun ding hril thei a ni nawh tiin Inpui an inhriettir.

Bekanthu hme leiin mi 30 an damnaw
AIZAWL: Zanikhan Bekanthu hme leiin Aizawlah mi 30 an damnaw pha a, Hospital hran hran panpui an ni a, mi 2 ICU-ah sie an ni a, a danghai chu an ngirhmun a ṭha. Bekanthu hme hi mi 35 an ni a, mi 5 hai chu iengkhawm an ti nawh. Bekanthu siemnaa bekanah mihriem ta dinga ṭha lo thil a um ringhla a nih tiin Dr Lalmalsawma Pachuau, Nodal Officer, Integrated Disease Surveillance Programme chun a hril.

December chena bawl zo ding
IMPHAL: District Headquarters tina Damnaw khum 50 umna seng hai chu bawl mek a ni a, hieng Hospitalhai hi December, 2014 chena zo fel tum a nih. Chun, Imphal le Imphal West District haia Sagolmang haiah damnaw khum 100 seng umna bawl tum a nih tiin Health & Family Welfare Minister Phungzathang Tonsing in zanikhan Manipur Assembly an hriettir.

UNPC cadre 1 man a nih
IMPHAL: Zani hmasa khan Imphal-Moreh Road a Sita lamṭṭheah UNPC a Lieutenant Mayopan Hungyo (20) s/o Ningam Hungyo, Bungpun Village, Kasom Khullen Sub-Division, Ukhrul District chu 24 Assam Rifles han an man.

Mipui hmakhuo ngainaa keklien
IMPHAL: CM O.Ibobi Singh chun, Keishampat to Tulihal Airport, Imphal chen chu sir-khingtieng ve ve, metres 19 lain keklien a ni a, hi thil hi mipui hmakhuo ngainaa keklien a nih. Ram neituhai khawm compensation pek vawng an ni tah tin zanikhan Inpuiah a hril.

IW le IE a Govt. School haiah Chawl puong
IMPHAL: State sawrkar chun Imphal West le Imphal East District sunga Govt. Schols haiah vawisun, zinga le July 28, 2014 haiah chawl a puong.

National Highway-a puong
IMPHAL: Senapati District a Tadubi, Paomata-Ukhrul Road chu National Highway No. 102A a puong a ni tah tiin CM O.Ibobi Singh chun zanikhan Manipur Assembly an hriettir.

MHRC members 2 lak a ni ding
IMPHAL: Manipur Human Rights Commission (MHRC) members 2 lak ning a tih tiin Secretary (Law), Secretariat, Law & Legislative Affairs Department, Govt. of Manipur chun inhriettirna a siem.

Contract Basis in Zirtirtu sin
IMPHAL: Jiribam Sub- Division sunga Government Schools haia contract basis a Primary Teachers ding post 106; Hindi Primary Teacher post 10, Arts Graduate Teacher post 15 le Science Graduate Teacher post 9 a ruok a, Jiribam Sub-Division a cheng han hnina lekha August 8, 2014 chenin Additional Deputy Commissioner, Jiribam Office-ah peklut thei a nih. Application Form chu official website: www. manipureducation.gov.in ah  download thei ning a tih tiin Director (Education), Govt. of Manipur chun inhriettirna a siem.

NATIONAL NEWS
Naga area sungah darkar 48 bandh
DIPHU: Zani zan, zanrila inthawk khan United Naga Council (UNC) chun NH-2 (Imphal-Dimapur), NH-37 (Imphal-Jiribam) le NH- 15- haia Naga mihai chengna biel sungah darkar 48 bandh an thaw ṭan. Bandh hin inchuknainhai, Medical, Power, Water supply le Postal service hai huom sa naw nih. Inlirthei bandh hi Ukhrul District a inthatna le thil ditum lo chi tum tum tlung haia sawrkar thlungpui a hung inrawl nuom naw leia thaw a nih tiin UNC thusuok chun a hril.

Nupa tuok a thisaa hmu
AIZAWL: Jerry Lalnunpuia (29), Kawnpui Bangla Veng chun nuhmei anga a umpui lai Zoduhawmi (32) d/o R.L. Mala, Kanan Veng, Aizawl chu a sinthawna ramhnuoiah July 23, 2014 khan a that a, a hnungin Jrerry Lalnunpuia hi ama le ama an khai hlum. Zoduhawmi hi an ṭu thlangah hmu a ni a, a luah hliemna nasa tak a tuok.

India le Pak. Foreign Secretary hai
NEW DELHI: August 25, 2014 khin India Foreign Secretary Sujatha Singh chu Islamabad khawpuiah inzin a ta, Pakistan Foreign Secretary Aizaz Ahmed Chaudhry leh inbiekna nei an ta, Ceasefire bawsietna chungthu, India le Pakistan inbiekna sukthar nawk dan dinghai an hriltlang beisei a nih. Hieng rambung pahni han Foreign Secretary levela inbiekna an nei tawpna tak chu September, 2012 dai kha a lo ni tah. Inbiekna sunzawm nawk dan ding thu a hung inri thei nawkna chu PM Modi in India PM dinga Pakistan PM Nawaz Sharif a fiel a, a hung ṭhang theina lei nia hril a nih.

12th Plan sungin Rs. 6108 crore
NEW DELHI: 12th Plan (2012-2017) sunga NE biela states 8, Arunachal Pradesh, Assam, Manipur, Meghalaya, Mizoram, Nagaland, Sikkim le Tripura haia Projects thar 226 thawna dinga sum hmang dinga riruong chu Rs. 6,108 crore a nih tiin zani hmasa khan Minister of State (Independent Charge) for Development of North East Region ( DoNER), Gen. (Retd) Dr V.K. Singh chun Lok Sabha hmuna a hril. Hieng project-hai hi NEC fethlenga thaw ta le la thaw ding an nih.

Ralthuom leh KPLT cadres 5 man
DIPHU: Karbi Anglong District, Assam a Dokmoka Police station huop sunga Kharping Kro village a dappui an thawnaah Karbi People’s Liberation Tigers (KPLT) General Secretary, Ranam Lijung ṭhangsain KPLT cadres 5 hai chu ralthuom tam tak leh an man a, dappui hi thaw sunzawm zing a la nih tiin Mughdya Jyoti Mahanta, SP, Karbi Anglong District chun a hril.

Rel le Bus inbawtuo leiin mi 22 an thi
HYDERABAD: Zani zingkar khan Telangana State a Medak District a Masaipat le Wadiaram Railway Station inkarah students 40 vel phurtu Bus le passengers phurtu Rel, Secunderabad a inthawk Nizamabad pan chu Rel lampui kanna hmuna an inbawtuo a, Bus a chuong students 21, kum 6-14 inkar le Bus Driver hai an thi a, midang 18 an hliem. Hliemhai laia 8 an hliem inrik hle. Telangana Irrigation Minister, Haraish Rao chu eksiden tlungna hmuna a va fe a, thina tuok sunghai zangnadawmna Rs. 5,00,000 seng pek dingin a puong. Telangana CM K. Chandrasekhara Rao chun hi thil tlungna san sui dingin thuneituhai order a pek nghal. PM Narendra Modi khawmin thina tuok sunghai a sunpui thu le hi thil tlung hin a lung a ṭhawng nasa hle thu a hril.

World Bank in India kuoma $15-18 billion
NEW DELHI: PM Narendra Modi le World Bank President, Jim Yong Kim hai New Delhi-a an inbieknaa chun, Kum 2017 chen (2015-17) khin World Bank in India ram thawsuok a hung pung theina dinga hmang dingin dollar 15-18 billion dollar an puktir ding thu Jim chun Modi kuoma a hril. PM Modi chun, a khuo-le-tui han dollar nekin thawsuok tam lem, thiemna le varna hai an mamaw lem thu Jim kuoma a hril.

Nigeria rama bomb puokah mi 82 an thi
KADURA: Zani hmasa khan Nigeria ram, Kaduna khawpuia hmun pahniah bomb a puok a, mi 82 an thi. Bomb hi Senior Opposition leader Muhammadu Buhari le Islamic sakhuo ṭhuoitu, Dahiru Bauchi that tumnaa sukpuok a ni a, sienkhawm himin an suokdawk ve ve. Bomb hi Boko Horam helpawlhai sukpuok a nih.

Himanta Biswa Sarma inbanna pawmpek
GUWAHATI: Assam a Tarun Gogoi Chief Minister nina hnuoia Congress sawrkara lungawi lova nuor a, Tarun Gogoi ban dinga ngentu Assam Congress MLAs 32 hai ṭhuoitu le Assam Health & Education Minister Himanta Biswa Sarma inbanna chu pawmpek a ni ta a, Governor pawmpui dingin Governor kuoma an banna hi thawn a ni tah tiin Tarun Gogoi chun a hril. Tarun Gogoi hin Congress High Command thlawp le ditsak a hlaw lem leiin ama kaltu a ṭhang cabinet minsters pahni, Ardhendu Dey, Irrigation & Soil Conservation minister ni lai le Border Areas Minister Siddique Ahmed hai khawm July 23, 2014 khan CM Tarun Goboi chun minister an nina haia inthawk a ban. Himanta Biswa Sarma ṭhangin Assam Ministers pathum ban an nih.

Assam-ah JE leiin mi 165 an thi tah
GUWAHATI: Assam State a chun tukum sung hin Japanese Encephalitis (JE) le Acute Encephalitis Syndrome (AES) natna hri leiin mi 165 zetin thina an tuok tah tiin health official thusuok chun a hril. Assam CM, Tarun Gogoi chun zanikhan health official-hai meeting a neipui a, hi natna an dar pei nawna ding le sukre dinga ṭhang nasa taka la dingin a hril tawl.

INTERNATIONAL NEWS
Algeria Vuongna tuoksiet a tuok
ALGIERS: Algeria Airlines Vuongna, Air Algerie flight ‘Swiftair MD-83’ passengers 116 le a sunga thawktu mi 6 chuongna Burkina Faso a inthawka vuongsuok chu a vuongsuoka inthawk minutes 50 hnungah a chanchin hriet lovin Sahara route-ah an hmang a, tuoksiet a tuok ni dinga ring a nih. Hi vuongna hi Burkina Faso-a Ouagadougou a inthawk Algiers pana vuong a nih. Hi vuongnaa chuong hai lai hin France mi 50, Burkinabe 24, Labanese 8, Algerians 4, Belgium mi 1, Swiss 1, Nigeria mi 1, Cameroon mi 1, Ukraine mi 1, Romania mi 1 an ṭang tiin Air Algerie representative, Kara Terki chun news conference huna a hril. Zani hmasa khan TransAsia Airways mi 47 chuongna tuoksiet a lo tuok ta bakah kar hmasa lai khan Malaysia Airlines Vuongna Ukraine ram sungah kapthlak a ni leiin mi 298 an lo thi ta bawk a nih.

Nigeria rama bomb puokah mi 82 an thi
KADURA: Zani hmasa khan Nigeria ram, Kaduna khawpuia hmun pahniah bomb a puok a, mi 82 an thi. Bomb hi Senior Opposition leader Muhammadu Buhari le Islamic sakhuo ṭhuoitu, Dahiru Bauchi that tumnaa sukpuok a ni a, sienkhawm himin an suokdawk ve ve. Bomb hi Boko Horam helpawlhai sukpuok a nih.

EDITORIAL
CCPur le Bishnupur Districts MLAs han an hrietnaw ning a ti?
July 23, 2014 a inthawk khan Tiddim Road-ah passenger bus services han an services an tawpsan a, vawisun chen hin an la service nawzing. Tata Winger service hai khawm service lovin an um a, sienkhawm zani hmasaa inthawk khan Tiddim Road helin a lampui hlat zawngin an service an sunzawm ṭan nawk tah. Bus le Tata Winger hai an service naw leia harsatna nasa takel tuortu chu Bishnupur le Churachandpur District mipui an nih. Churachandpur- Imphal inkara motor chuongman Rs. 70-80 ni hlak kha tulaia inlirthei chi tum tum service han Rs. 150-200 an lak hin mipui harsatna a sukzuol pha leiin thuneitu han hi thil hi enfel hai sienla mipui lawm hleng an tih. July 21, 2014 nia All Manipur Road Transport Drivers and motor workers Union office a Joint Press Conference a B. Dhanabir, General Secretary, Joint Action Committee Bus Owners Association, Tiddim Rod in Chanchinbumihai hmaa thu a hrilnaa chun, July 2, 2014 chena Transport Inspector, Dina State sawkrarin a suspend naw chun July 23, 2014 a inthawk Tiddim Road ah passenger Bus service sukchawl ning a tih tiin a hril a. Fake passenger service permits nei light-passenger vehicles 4 kan mandawk a, July 10, 2014 in Transport minister le Transport Director kan inhmupui a, Minister kuoma permit tehlema service Bus neituhai chungah action la dingin kan ngen a. Transport Director in Transport Inspector, Dina chu action la dinga thu a pek hnung khawmin action a lak chuong nawh. Dina hi thlakthleng dingin minister kan ngen bawk tiin a hril. Chun, Bus Owners Union, Manipur President Radhamohan chun fake permit hi May 22, 2014 a inthawka an check ṭan ta niin a hril.

A.Babu, Convenor, JAC Tiddim Road Bus Owners Association in July 22, 2014 nia reporter-hai an hmupuinaah, Transport Inspector, Dina a sina inthawk suspend a ni hmakhat Tiddim Road-a passenger Bus service chu la sukchawl pei ning a ta, inter-state Bus service operator hai ṭhang lovin Manipur-a passenger bus service operators hai po po July 25, 2014 a inthawk an service chawlsan veng an tih. Chun, state sawrkarin kan thil ngen sukpuitling lova a ngaitha tlat chun Manipur state pumpui huopin ban kan la thaw el thei tiin a hril.

Hieng laizing hin All Manipur Transport Department Employees Associataion chun, JAC Tiddim Road Bus Owners Association in Transport Department an intumna hi an dik nawh tia hrilin Documents an neinaw leiin Tata Wingers 6, MN01W-8917, MN01S4139, MN04A- 8816, MN01W-9759, MN01W-1212 le MN05C-0913 hai chu man le hrentang an ni a, Motor Vehicle Act dungzuiin Compound fee le tax an pektlak zo pha leh insuo ning an tih. Chun, 1-1-2012 a inthawka tax pe ta lo Bus MN02/5406 le 1-4-2006 a inthawka tax pe ta lo Bus MN02/5406 hai man an ni a, tax bat hi an pektlak pha leh insuo ning an tih tiin hi Union thusuok chun a hril. Tiddim Road a nitina passenger Bus service hi 130 vel an ni a, ni 2 chau an hang service naw khawma CCPur le Bishnupur District mipui chun harsatna namen lo takel ei tuok pha a, a bikin hmeruo chen man a hung kaisang pha ta a nih. Bus service naw leia mipui harsatna tuok hi Transport Minister in ngaipawimawin hung ngaisak sienla chu mipui lawm hleng an tih.

Manipur Assembly a khawm CCPur le Bishnupur District mipui hai harsatna hi MLA pakhat khawmin, a bik takin CCPur le Bishnupur District a MLAs han Manipur Assembly budget Session nei meka hin an la hrillang der nawh. Hieng District pahnia MLA-hai hin an District mipui hai harsatna hi an hrietpui dernaw ning a ti? Mipui hlak chun santu le ṭhangpuitu ding an mamaw a, harsa takin an khawsa a nih. Hieng District pahnia MLA han ṭhang an lak a hun.




Don't Miss
© all rights reserved
made with by Simon L Infimate