NU HAI POPO DISAKNA CHIBAI
~By.Mrs.Redeem Lalremsang
Mother’s Day hi a hmusuoktu chu Anna Jarvis a na, 1864 in a pienga, anu leh an ingngai taluo leiin hmun danga lekha inchuka hang um hmang san chu harsa anti nufa hle el a. Sienkhawm Anna chu atumruna’n a hne hrim hrim leiin, Puplic School zirtirtu trainingna a hlawtling taka a graduate hmakhat chu a nu chu a um hmangsan ta tho tho a nih. Kum 1902 in a Pa in a thisan leiin an nufain a puhai bel lem dingin an inpem dawka. 1905 May 9 in a Nu a thi ve nawk. Anna chun tuor harsa a ti bek beka, kawng iengkimah nu fel le tling lo nisienkhawm, a nu ta ding in thiltha thaw tlawm an ti hle a nih. Chuonga kumhni sung zet mani le mani inthiemnaw pum zing a anu thi a sun zing lai chun, ngaituona danglam deu hung put suokin, 1907 chun rothar a hung rawtsuok ta hlawl el a. A nu thi champha May chawlkar hnina Pathienni chun ruoltha thenkhat chu an ina chun a fielkhawm tawla. A thil rawt suok thar a ram puma Nu hai Ni inser dinga a rawtna chu a tlangzara, lungruoltaka remtipuina a hmuzui nghal bawk a nih.
Chuongchun, Pathienni May 10th 1908 chun, Anna Nu in kum 20 lai zet chawlkar tina Pathien thu alo inchuktirna hmun Methodist Sunday School a ngei chun NUHAI NI hmasatak chu puithu takin naupang 400 leh annu hai hung khawmin inser tan alo ni tah a nih. Pastor pa Bible chang tlang khawm Johan 19:26-27 a Kross lera inthawka Isu tawngbau “Nuhmei en ta, I naupa kha,” ti le “En ta I nu kha,” ti chang kha a nih. Inkhawm tinah, Anna chun ama nu in alo ngainat em em parte nuhai a pek tawl bawk.
Chu thil thar chu a ram roreltu lien deu deu Congress man Governor le Major hai chu lekhathawn hmangin a rawn tawla. Chanchinbua hai Sermon le Politics thila inkhawmna a hai chun a hung inlarin, hril a hung hlaw nghala, khawte le khawpui, chin le lien a hai chun anni tawk tawkin Nuhai Ni chu an hung inser fer ful tawl el tah a. A tawpa lem chu America sawrkar pui “Senate” khawma a hrietpui thu puongin May 8th 1914 khan President Woodrow Wilson in kum tina May chawlkar hnina Pathienni chu Nuhai Ni a inser dingin thupek rampum hriet dingin alo insuo der el ta a nih.Chulaizing chun, Anna ruok chu hmangaina tuipui ah alo changsuol deu leiin, Pasal neilo dingin antiem bur el a nih. Nu hai Ni a chawimawina par petu ding nauhai a nei ve ta si naw leiin, chu ni chu tlak hla um rak chun a um ta bek naw a.Company lien deu deu ha’n sumdawngna’n an hmanga, court ah a khing hiel a nih. A hne chuong sinaw a. Chun, an pumpekna Nu a unau nu Elsinove midel in alo boral san nawk si a, chuongchun, ama khawm 1948 khan kum 84 mi niin, khawvel alo suoksan tah a nih.
Awleh, tu kuma dinga “Nuhai Ni” chu Pathien zarin eilo tlung nawk tah a. Nu ngirhmun hluotu hai po po chawimawina le inzana, ditsakna le ngainatna chibai ka buk cheu.
Famkim nawna khawvela leng ei ni leiin hiengang ni pawimaw hi thenkhat in, a hlutna le pawimawna hrethiemin hlawk taka an hmang laiin thenkhat, “Nu” nei talo hai chu tapna le lungngaina ni’n an hmanga. Vawisun hin, khawvela Nu tia ko ding nei talo hai mitthli hi Pa Pathien in hrufai pek mawl sien! Ama kuomtienga hip hnaia umin, hadamna le tlamuongna nei seng ding in ka ditsakna kan hlan (Ps.27:10).Pathien lunginsietna zar chau in ka nu’n a mi la dampui a. Vawisun ni chen hin Pathien thu a min fuitu le mi Tawngtai pek zing hlaktu a nih, ka lawm ngawt el. John Quincy in “All that I am my Mother made me” a lo ti angin, ka nina khawvel mithmua iengmalo, Lalpa ngaia hlutak “Hringna thuruk” ka nei le ka damlai ni a Lal Isu ka chel tlat theina dinga lampui mi sat pektu a nih. NU hai hi anlo hlu ngei! An hlut leiin mawphurna hlak an sang. Khawvel map le History a chuong velo indona (Battle) ropuitak a um. Chu chu indona a chun Nu nau nei taphawt an thang a nih. Ti in Joaquin Miller chun a lo hril. Anih, Pathien in nuhai hmanga a thiltum chu nauha’n chatuon hringna nei a, Ama hrietna a inthanglien tir hi nih. NU pakhat hin Missionary Director kuomah lekha a thawn a, ka damsunga kanuom tak chu missionary a fe hi a na sienkhawm ka fe thei sinawh a ta. Director pa chun lekha a thawn kir a, nau iengzam I nei a? ti in. Ama nu chun pali ka nei a ti a. Chu chun Director pa’n i nau hai Krista Sandamna thu hrila, chatuon hringna an nei seng chun missionary ropui tak inih el a ti pek a, a buoina kha thei nghil in, a in sung ngeiah rawngbawltu ropui tak a nizie a hung inhrietsuok ta a nih (Ps.127:3). Juda hai thuvar pakhat chun “Pathien hi hmun tina a um theinaw leiin NU a siem a nih” tiin. Hi thuvar hi indik vawng naw sienkhawm NU hai pawimaw zie a sukchieng hle. Ei nauhai hmakhuo (Future) ding hi nu kutah annghat lien hle. Naupang pakhat hi lekha a thiem theinaw hle el a, nikhat chu an hotu haiiin a hnung tienga lekha pakhat tar pek in anhung tir kira “I naupa hi lekha inchuk ding mi a ni nawh” ti in. Sienkhawm a nu chu beidawng lovin thang nasa taka la in a naupa lekha anchuktir tho tho a. A tawpa chun lekha thiem le scientist hmingthang tak el electric meivar hmusuok tu, Thomas Edision a hung nita a nih.
Nu hai hi anhlu a an man a tamzie le an hmangaina inthukzie nuhmeite pakhat in anu thi hnungin a hung hriet suoka. Chutaka inthawk chun “Mother’s Day” NU hai chawimawina ni hi hmangtan a lo nih. A origin ngaituo hin tulai a eiin ser dan leh ankal met in ka hriet hlak. Vawikhat chu Mother’s day kan hmang na ah Nu pakhat thuhriltu’n a thanga, inkhawm tina refreshment Nuhmeipawl pawisa in kan tuma, chu bakah Nupui po present ding in rawmawl (Handkerchief) kanla tum zui. Mani le mani in present… a va hlu nep! Ka zuk hrilnuom tak chu, Mother/Father’s day khawm nisien inkhawmna a Sermon or thuhriltu hi ei thalai hai nisien, Nu-le Pa hai an mi hmudan le ngaidan mi hrilpek hai sien. Chuong angchun item dang dang khawm thalai le naupang department haiin mawphurna la hai sien, hi ni hmusuok tu Anna Jarvis thiltum a ni lem naw ding maw? Ieng tin am I ngai ve?
Pathien lunginsietna zar chau in, thlarau a mitvarna ka nei hnung hin ka nu le pa mi hmangaina hi ka hrietchieng zuol deu deu a. Hiengang an Ni pawimaw a hung tlung hin mihai ang in sum le puon, thuom le par thawpek theinaw langkhawm, tawngtai pekna neiin chang dan le tawngbauah lawmthu hrilin ditsakna kan hlan hlak. Vawisunni a nu ti a ko ding la nei hai hin, ei nuhai mi hmangaina inthukzie le eita dinga an inpekna hai hi suikir ei tiu a. An damlai ni hun ler tienga hin hrietthiemna le dawthei tak in nau hai hin dawnlet ve inla ka nuom. Ei chin lai hun po po a zanmu sunmu intuo lova an mi bawisawmna kha hrezing in, an lo up-to-date ta rak naw khawm in an ruoltha ni tum ei ta, an kut-le-ke ni a nauhai bula hadam le thlamuong taka an um hi phalpek ei tiu. Abraham Lincoln chun bat rul ding nilang kanu kuoma kabat ka rul hawphur tak a ti angin rulzo tichu umnawng a ta. Amiruokchu, nau in nu laka a mawphurna le thawding chanvo a nei hai hlen ngei dinga lungril ngaituona siem in inbuotsai eitiu. Mobile, Laptop etc. Man to tak tak le thoumhnaw tha nei a ruol el nek in. nu-le-pa duotthiem a dam in el ta in la chu ei lung a awi lem ka ring. Chunga Pathien khawm lawm a ta, Mother’s day ei hmang khawm hin tangkaina le hlutna nei zuol a tih.
Hi ei Nu lekhathawn hi nguntak in lo hang tiem ei tiu aw…!
”Ka nau dittak hai in nu upa tak ta hin in kuomah thucha nuhnung maksan pek cheu ka nuoma, lunginsiettakin hi kathu hril hi in na lo daw in nguntakin milo ngaithla pek hram unla, in theinghil meio mei tanaw na dingin in lungril pheka vawng zing ro aw! Tuhin chu mihriem kum tiem danah upa kalo ni ve ta zing ela, ka hung upat hnung hin ka lakah dawtheina innei hram hram ka va nuom ngei. Ka na, thil hrietna hi a hung tha tawk nawh a, in thuhril ka hriet chieng thei tanaw hnunga khawm “Naset nu” tia mi ko naw hram dingin ka va dit ngei cheu deh! In chin laia in tawngfel hma khawma dawthei taka in thuhril hai ka ngaithlak pekzie cheu kha. Ka thil hril hai kalo hrilnawn rawp a ni khawma hrethiem hram hram un la, ka thuhril hai chu fiemthu thawna a hmang mei mei lovin titakzetin mi ngaithla pek hlak lem ro aw. In chinlai kha hrezing inla, khang hun lai a balloon in ngen kasuk hlawtling hmakhat chun sumlo chat lovin in ngen char char lai dam kha zani ela thil tlung ang el in kala hrietchieng sih a. Ka hung upa a ka rim alo sie ta deu a ni khawmin mi hrethiem hram ro aw! Upa hnung chun nuom angin taksa alo hrat tawk ta nawh a, in sawpfai dam a awlsam tanaw ti hrezing un la. In chinlai kha in la hrietzing am? Insil in nuomnaw lei a ei in hnawt kawi zar zar hun lai hai khan khuo a va suksawt ngei. Bufak dawkan a thleng ka sukkawi pal dam, hme ka sukbuok pal chang dam in, ka mit a fie tawk tanaw lei a nih ti hrethiem unla, mi vin naw hram ro aw! Upa hnung chun lungril an no awl hlaka, mani in thiemnawna kan nei awl bik hlak a nih ti hrezing hlak ro aw. In naupang lai in bu fakna thleng in intlak kawi zo zai hai kha in thawlui an nawh ti ka hrietchieng pui em cheu leiin tawngkam vin deu in chungah ka hmang ngai reng reng nawh.
In sin intul theizie hai kha ka hriet deh, sienkhawm tuhin chu kalo upa ta a, tukhawm biekding ka nei ta naw hi, chuleiin, in hun awl nei ang angin ka khuosawt hnem dingin inpawl khawmna hun misiem pek hlak ro aw! In naupang lai bawk kha ka theinghil thei nawh, hun neilo sa sa khawm in in tienami hril hai dawthei tak a ka ngaitlak peklai hun hai kha theinghil thei in ka mawi nawh. Ka hung upat hnung chun ka nuorna chite ka lawmna chite a nih ti mawl hi theinghil hlau rawi in tih ti kan lau. Ha ka nei tanaw lei a bu khawp taka fak khawm harsa kati ding a ni leiin zingbu le zantieng bufak in kara hin fak ding le dawn ding hai mi ngaituo pek hi theinghil ngailo ding in ka ngen bawk cheu a nih. Upat hnung chun nuor le phengna ding hai a tam ding an leiin Hmangaina le lainatna a in mi dawm thiem kava mamaw hlak awm deh! Ka hung upa hnung chun zun le ek thak hman lova ka lo che mei mei khawm a tlung el thei, chuong hun dam kalo tlung a ni khawmin mi tirdak lovin dawthei tak mi sukfai el hlak unla kava lawm awm ngei. Nangni khawm naupang in ni lai ka tensiet le tirdak hril der lovin hmangai le duot takin kalo sukfai el hlak cheu kha hrezing ro aw!
A tawp taka ding in, ka hun tawptieng panga chun dawthei taka in mi enkawl kava mawmaw nawkzuol awm ngei. Thina kut dei takin ka chungah thla a zar hun alo tlung khawmin, thlamuong taka ka liem ngei theina dingin ka kut hi nghet takin chel thlat ro aw! In naupang lai a lawn kan chuktir hlak lai cheu khan in kut nghet taka ka chel tlat hlak ang khan”.
Nangni thlakhla le hmangai em em tu,
In nu.
Tiemtu hai po po in Nu hlutna le Hmangaina hrechieng zuol dingin hi thu hai hi kan hlan. 