Responsive Ad Slot

Hmasawnna Thar | July 05, 2014

Saturday, July 5, 2014

/ Published by VIRTHLI
HEADLINES: 
“SHDC hi Zonauhai ta a nih, Council puitlingna di’n Zonauhai huopzo Party indin a ṭul”: Hmingchungnunga
By Henry L. Khojol Hmar

Aizawl, July 03, 2014: “Sinlung Hills Development Council (SHDC) hi Zonauhai ta a ni a, tu hnam bil ta bik deu amaniha ngaina le hrietna hi thil pawi a nih. Chuleiin mipuiin mani ta angah ei ngaia, sawrkarin ei hmalaknahai a ngai pawimaw theina ding le inremna anga Council sukpuitling a ni theina ding chun Mizo hnamtin huopzo Sinlung hming chawia political party indin a ṭul a nih”, Pu Hmingchungnunga, Chairman, SHDC chun a tih.

‘THE MIZORAM POST’ le ‘SIKPUI’ chanchinbuin a pawlna ah Pu Hmingchungnunga chun “Kum 1994 a Hmar People Convention (HPC) le Mizoram sawrkar (Congress) inremna dungzuia hung piengsuok SHDC hi Sinlung suok Zonauhai ta a ni a. Hnam bil ta bik rieua hrietna le inlakhran tumna anga ngai leia dodalna um hlak hi a pawitakzet a nih”, a ti a. “A ram sunga cheng Zonauhai po po huopzo theitu ding ti a ni leiin a hming a khawm ‘Sinlung Hills Development Council (SHDC)’ inbuk a ni a. Chu chu Mizoram sawrkar le HPC inrem dan khawm a ni hrim a nih. Chuleiin Hnam bil ta bik rieua ngaina le dodalna hi hawisana, sawrkar leh inremna (Accord) sukpuitling ngei dingin a ram mipuihai lungruol taka ei thang tlang a tul ta takzet a nih”, a ti bawk.

Sinlung hming chawia political party indin dinga rawtna thuthang um chu thudik a ni le ninaw thu The Mizoram Post leh Sikpui palaiin an dawnna ah Pu. Hmingchungnunga chun HPC party anga hmalakna reng reng chu chi bing politic anga ngai a ni leiin sawrkar leh Mizoram mipui ah a tlana tanaw thu a hrila. “Hienga HPC ei indara, mipui ei keibum thei tanaw si hin chun HPC kutkhawia indin SHDC hmingin Mizo hnamtin huopzo party indin nisien ti in Council Chairman ka nina angin SHDC huom sunga HPC thuoituhai, Ex-volunteer hai le party dang dang thuoituhai thurawn ka pek a nih”, a tih. HPC hi inthuruolin impumkhat thei inla chu Council puitlingna dingin beiseina tlawmte ei neia, party hran indin kher khawm tulin ka hriet nawh. Sienkhawm hienga ei indara, sawrkarin a nuom a ninga a mi palzut el hi sukkiengna ding le accord sukpuitling a ni theina ding chun party thar indin hi dittlangna (option) umsun a nih”, a ti a Sinlung suok po po huopzo ding Council kan indin ei ti lai zingin HPC anga ei bawizui nawk hin Sawrkar le mipuiin hnam bil politic angah a ngainawk leiin a zik ei suok theinaw a nih, a ti bawk.

A hril peina a chun SHDC Chairman chun HPC hun (chapter)chu khar (close) a tul tah a ti a. HPC party chu 1986 a inthawk 1994, (Accord) ziekni chen khan party hlawtling tak, mipui thlawp hlawtak le impumkhatna thatak nei a ni a. Amiruokchu 1996 a Ratu Special Assembly thutlukna phatsantu an um leia party sungah inthendarna a umtak thu le vawisun chen HPC party anga hmalakna reng reng Mizoram sawrkarin a ngai pawimaw naw bakah a nuom nuom Council Chairman ah a si el tak thu a hrila. Party thar indin tumna khawm hi accord sukpuitling nuomna lei lieu lieu a nih a tih.

Helna le rikrapa chetna chun Council puitlingna a thlun theinaw ding zie thu hrilin SHDC Chairman chun “kum 6 (1989 – 94) sung HPC in ramhnuoi lutin Mizoram sawrkar lakah thilphut neiin a hela. Sienkhawm helna le danlo a tharumthawna chu bansana dan angtaka sawrkar leh indawr sunzawm pei dingin 11th August, 1994 khan ‘inremna thuthlung’ ziek a lo nih”, a ti a. Tu hin chu tharumthawna (forceful movement) ni lovin Diplomatic dialogue/process hmangin thataka sawrkar leh indawra inremna ang dungzuia Council chu Zonauhai hmasawnna di’n Sixth Schedule a hlangkai vat a tul thu a hril.

Council Hmalakna hrilin SHDC chairman chun budget tlawmte karah thei ang angin Development scheme chu fepui mek a ni thu a hrila. Khawtinah VC hai le Council member ha’n ram hmsawnna dinga an ngaipawimaw zawng hai chu work proposal ah sawrkar kuomah pek a ni a. Term hmasa a khan works hran hran 221 lai thaw a ni bakah cheng nuoi 60 man ‘rangva’, sungkuo (in) 410 hai kuomah sem a ni a, serthlum chi (valentia) cheng nuoi 15 man chu in 200 hai kuomah kung 100 sengin sem a ni bakah ‘rubber’ nuoi 5 man hu vel chu in 115 kuomah council budget an thawkin sem a ni bawk.

Tuta council budget zat hi Rs. 320 lakhs a ni a. Council budget hin a deinaw leiin RKVY -ah fund hnisa niin Agriculture le Horticulture hnuoiah Rs. 200 lakh sanction a ni bawk.Cheng nuoi 200 hmang hin Agriculture le Horticulture hnuoia ‘sapthei’ ching ding, in 45 (Khawlien tlandungah) le ‘rengthei’ ching ding, in 46 (Ratu tlangdungah) thlang an nih. Hi baka hin WRC (woodland cultivation) scheme hnuoiah in 125 lai chu ‘leilet’ siempek dinga hmalak mek a ni thu, SHDC chairman chun a hril.

Sakawrdai ah SHDC Complex bawlai mek chu ground cutting zo a ni tak thu le DONER Ministry khawmin complex bawlna ding Rs. 592 lakh chu pawm tain hun sawtnawte ah sum an suo vat thei a beisei thu Pu. Hmingchungnunga chun a hrila. SHDC Complex bakah New Secretariat Complex, Aizawl ah Sale Office (multipurpose office) ding Mizoram sawrkarin a pek thu a tarlang bawk.

SHDC council hi May 8, 1997 a inthawk khan Rs. 10 lakh a bul ṭanin, Chairman hmasatak chu Pu Rosiem a ni a. Tuhin Aizawl, Khatla kawnah office neiin, Chairman le secretary hnuoia um a nih. SHDC hnuoia hin Council member 17 (council i ruot 14 le sawrkawr rout 3) lai an uma, Planning Board member 10 an um bawk. Hi bak a hin office staff 36 (council i lak thangsain) an uma, permanent staff 6 le muster roll- 19 an um. Sakawrdai a hin staff 10 lai an um bawk. Thlakhata staff hlaw (Salary) a hmang zat hi Rs. 5,28,183 a nih.

LOCAL NEWS:
KIC inrawinain Public Rally nei
CCPUR: Kuki Inpi Manipur (KIM) hmalaknain zanikhan Manipur state hmun tum tum haia Public peaceful rally nei a ni a, hi le inzawm hin Kuki Inpi CCPur (KIC) inrawinain Public Ground, CCPur-a a khawm Public Rally-cum- Public meeting nei a nih. Rally hi zani 11AM khan Public Ground a inthawk fesuok in Tuibuong-a DC Office chen rally an nei a, mipui tam tak an ṭhang.

 Kuki Inpi CCPur chun Protest rally an nei le inzawmin Mr P.K. Jha, IAS, DC, CCPur fethlengin India PM Narendra Modi kuomah memorandum an pek. DC, CCPur chun an Memorandum hi fax in PM kuoma a lo thawn ding thu a hril. Thangjang Haokip, President, KIC chun, an Memorandum hi an bawzui pei ding thu hrillin India sawrkarin a ngaisak naw chun protest/ rally nasa le khau lema an la thaw pei ding thu a hril. Kum 1990-1997 sunga NSCN(IM) han Kuki mi 905 an thatna chungthu, hi leia hnam buoina fe peia khuo 360 haia mihriem nuoi khat (1) chuong mani inluma um ngam lova an chengna hmun le ram hai an suoksan chungthu hai an zieklang. NSCN(IM) le agreement nei hmaa Kuki mipui hai harsatna chingfel phawt dinga an ngenna le NSCN(IM) hai chetna chu ṭha taka suizui dinga an ngenna hai an zieklang. Hieng thiltlung hai suizui dinga KIM in sawrkar thlungpui kuoma ngenna a siem tuchena ngaisak a la ninaw leia public peace rally hi an huoihawt a nih.

DTO in June thla sung Revenue Rs. 13,75,420
CCPUR: District Transport Office (DTO), CCPur chun June, 2014 thla sung khan Revenue/tax Rs. 13,75,420/- an hmu phak a, thla thum (April-June, 2014) sunga Revenue/tax an hmudawk chu Rs. 37,80,174/- a tling phak. Chun, June, 2014 thla sung khan DTO, CCPur chun motor 176 an registered a, hienghai laia 119 chu Bike/ motorcycles a ni a, Autorickshaw 8, Cars 16, Maruti Van 8, Jeep 11, Maxi Cab 3, Medium Truck 9, Ambulance motor 2 an nih. April-June, 2014 (thla 3) liemta sunga DTO, CCPur-a motor registered thar zat chu 554 a nih. Hieng hai laia 415 chu Bike/motorcycles an nih. Hi hun sunga motor registered thar hai lai hin Autorickshaw 20, Cars 47, Maruti Van 20, Jeep 25, Maxi Cab 8, Medium Truck 12, Ambulance 2 le Others 5 a nih.

NLUP Consultation meeting nei
CCPUR: Zani 11:00AM khan District Administration, CCPur huoihawtnain District Training Centre, Tuibuongah Stake Holders Consultation Meeting on New Land Use Policy (NLUP) nei a nih. Hi huna SDOs hai bakah concerned Department, Philanthropic Organisation ṭhuoituhai, Lal (chiefs) hai le VA Chairman/ Secretary hai an ṭhang a, Mr J.C. Ramthanga, IAS, Commissioner (Horti & SC, RD & PR) chu Manipur sawrkar aiawin a ṭhang. New Land Use Policy (NLUP) thaw dan ding chungthu inhrilhrietna nei a nih. NLUP hi Lalthanthanhawl ṭhuoina hnuoia Mizoram Congress sawrkarin a hmang mek a nih.

Income tax payers and experts meet nei
CCPUR: Zani 10AM khan District Hospital, CCPur Conference Hall-ah Income Tax Payers, CCPur and Income Tax experts meeting nei a nih. Hi huna hin panelist in H. Joyo, Inspector (TDS) Income Tax, Dept. Govt. of India, Old Lambulane, Imphal; L. Kunjakishore, Office Supdt. (TDS) IT Dept. Govt. of India, Old Lambulane, Imphal; W. Gokul Singh , Advocate, Tax Consultant, Old Lambulane, Imphal; Rosiemlien, Treasury Offier, CCPur, K. Prince Singh, ATO (MFS), Niangkaichiin, ATO, Treasury office , CCPur hai an ṭhang.

Referee’s Annual fitness test le exam 
CCPUR: All Manipur Football Association (AMF) chun July 12, 2014, 7AM khin Public Ground, CCPurah Referee’s Annual Physical Fitness Test and Theoretical Examination, 2014 huoihawt a tih. Hi huna ṭhang nuom Clubs le mimal hai chun July 8, 2014 chenin CDSA office contact ding a nih.

(L) T. Lianboi Simte Memo Dist. Super Division league
CCPUR: Churachandpur District Sports Association (CDSA) huoihawtnain July 22, 2014 a inthawk khin Public Ground, CCPur-ah (L) T. Lianboi Simte Memorial District Super Division League- 2014 um a tih. CCPur District sunga Super Division Club hai chun CDSA Office-ah July 10, 2014 chenin application form lak le peklut thei ning a tih.

AIR, CCPur stn. Prog.
CCPUR: Vawisuna AIR, CCPur station-a Paite programme a chun Pethuel BYC EBCC le Vungngaihching & party han hla sak an ta, T. Thangchinlian in Vanamahotsava, 2014 chungthu hril a tih. Hmar programme a chun Genevie Lalenkawl le Jessy Thangjam Sungte han hla sak an tih. Thadou programme a chun Paoa Papao in hla sak a tih.

STATE NEWS:
Manipur-ah nuhmei chunga suolna pung
IMPHAL: Manipur a chun nuhmei chunga suolna le nunrawngna a pung pei a, January, 2014 a inthawk nuhmei chunga suolna cases 147 registered a ni a, hienghai laia 41 hai chu nuhmei inhmangna case a ni a, 8 mani le mani inthatna case, 7 hai chu ringhla um deuva thina an ni a. Nuhmei suolluina le sex thila nuhmei sukrimsikna case khawm pung tieng a pan tiin Sobita Mangshatabam, Secterary, Women Action for Development chun a hril.

SI/Jamadar lakna result witheld
IMPHAL: T. Pachuau, IPS, ADGP (Home Guard) in enquiry report a pek dungzuiin Manipur Police Department hnuoia Sub-Inspectors/Jamadar 87 lakna result chu witheld a nih. Hieng SI/Jamadar post 87 hai hi Y. Joykumar DGP, Manipur a ni laia lak a ni a, Candidates 59 hai chu overage an nih. Chun candidates 6 hai chu OBC ni lo, OBC nia inhril le candidates 11 hai chu sports quota anga lak an nih.

Sangai Express Editor a hliem inrik
IMPHAL: Zani hmasa zan khan Hijam Rajesh, Editor, The Sangai Express (English Edition) chu Raj Bhavan, Imphal tuolzawna a eksiden leiin a hliem inrik hle a, Shija Hospital and Research Centre, Langol-ah enkawl mek a nih.

Governor Bishnupur ah an zin
IMPHAL: Manipur Governor V.K. Duggal chu zanikhan Bishnupur District-ah an zin a, State sawrkar hmalaknaa hmasawna sin thawa um hai a hmuna a va en bakah official-hai an hmupui.

KYKL Cadre pahni man
IMPHAL: 9 Assam Rifles han July 3, 2014 khan Nepali Basti, Moreh Ward No. 5 ah KYKL cadre No. 22, SS Cpl. N. Anand @ Nanao Meitei (19) s/o Manglem Meitei of Nepali Basti, Ward. No. 5,Moreh, Chandel District. An man bakah hi ni ma hin Pallel hmuna KYKL cadre No. 804 SS Sgt. Maj. Bhogen @ Ranbir (22) s/o W. Ngouba Singh of Sekmaijing Mamang Leikai, Thoubal Dist. chu 7.65mm Pistol (Made in USA) le a magazine le a mu 4 leh an man a, Kakching Police station-ah an peklut.

Heroin Grams 120 leh man
IMPHAL: July 3, 2014 khan Imphal West District Police a Narcotics Cell pawlin Akim Kuki (38) w/o Paothang of Saikul Nong Ka, Senapati District chu Mantripukhri-a a In hluoa inthawk Heroin Grams 120 leh an man.

NATIONAL NEWS:
Vanlalsiami a thisaa hmu

AIZAWL: Zani zingkar bufakkhawp vel khan Vanlalsiami (35) chu Bawngkawn Brigade vengah a thisaa hmu a nih. Zani hmasa zana that ta niin an lang. Vanlalsiami hi nunrawng taka that a ni a, a ringa at hlum hnunga lamthlang tienga dehawn a nih. A thina le inzawm hin Police han mi ṭhenkhat an man. A pasal le a nauhai 2 a thisan.

Aizawl le Champhai inkarah mi 3 ralthuom leh man
AIZAWL: Zani hmasa zan khan Mizoram le Myanmar inrina, Aizawl le Champhai inkara National Highway-ah Mizoram Police le Assam Rifles ṭhangruol han Myanmar mi ni dinga ringhla pasal 3 hai chu AK-47 Rifle 4, AK-56 Rifle 2, G-3 Rifles 3, Light Machine Gun 1, Mark-IV Rifle 1, silaimu 1,195 le Spare magazines 221 leh an man. Bangladesh helpawl Shanti Bahini a inthawka inla hran United People’s Democratic Front (UPDF) hai kuoma zawr dinga an hung phur ni dingin Police han an ringhla.

Medical College hming dingin MIMER
AIZAWL: Zani hmasa khan Mizoram Medical College indin dan ding ngaituotu, Board of Management for Establishment chu CM Lalthanhawla inrawinain Cabinet room-ah an meeting a, Mizoram Meidical College hming dingin Mizoram Institute of Medical Education & Research (MIMER) tia ko dingin an rel. MIMER hi August, 2015 a inthawk Session ṭan ning a ta, MBBS inchuk theina seats 50 um a tih.

Bihar Governor in WB Governor
KOLKATA: President, Pranab Mukherjee chun West Bengal Governor M.K. Narayanan inbanna a pawm pek ta a, West Bengal Governor thar ding ruot a ni hma po chu Bihar Governor, D.Y. Patil in West Bengal Governor sin lo chelsa dingin a ruot. M.K. Narayanan chun zani 2PM khan Raj Bhavan, Kolkata a suoksan tah. UPA sawrkarin January, 2010 a kha Narayanan hi West Bengal Governor dinga a lo ruot a nih.

CRPF Dy. Commandant kap hlum
RANCHI: Zanikhan Jharkhand le Bihar ramri zula Jamui District, Bihar sunga Lalchari khuoah Maoist helpawl le CRPF hai an inkaptuo a, 7th Battalion CRPF a Deputy Commandant. H.N. Jha chu kap hlum a nih tiin Rajiv Kumar, DGP, Jharkhand chun a hril. Hi lai hmuna hin CRPF, Bihar Police le Jharkhand Police han Joint Operation an thaw mek.

RBI Dy. Governor hun suksei
NEW DELHI: Sawrkar thlungpui chun H.R. Khan, Deputy Governor, Reserve Bank of India (RBI) hun (term) chu July 4, 2014 a inthawk kum 2 dang zani hmasa khan a suksei nawk. H.R. Khan hin Central Security Cell, Department of External Investment and Operations, Department of Government and Bank Accounts, Department of Payment and Settlement Systems, Foreign Exchange Department, Internal Debt Management Department le Inspection Departments hai chel a tih.

President le PM han sunbu an faktlang
NEW DELHI: President Pranab Mukherjee chun zani hmasa zan khan Rashtrapati Bhavan, New Delhi-ah PM Narendra Modi chu sunbu a fakpui. Modi in PM a ni hnunga President le inhmatuoa sunbu an faktlang vawikhatna a nih. Modi hi May 26, 2014 nia India PM thar dinga sesamna nei a nih. UPA sawrkarin Governor thar ṭhenkhat a lo lak hai sawn dan ding le Governors ruot thar ding thu hai an hriltlang ring a nih.

Keifang-ah mi 3 silai 11 leh man
AIZAWL: Subsidiary Intelligence Bureau (SIB) le 14th Assam Rifles ṭhangruol han July 1, 2014 zan dar 11 vel khan Keifang, Mizoram-ah pasal 3, Thangdeihpianga (38) s/o Vungkhanmang, Khaideihpianga (30) s/o Thangkhenbuai le Lalramnghaka (28) s/o Saimana, Ngaizawl khaw mi hai chu AK-56 Rifle 2, AK-47 Rifle 3, magazines 3, LMG 1 le magazine 1, GS 3 le magazine 3, Mark-IV 2, UBGL 1 le magazinea 2, 5.56 mu 125 le 9.96 mu 1070 leh an man. Ralthuom hi 407 Truck MZ04-7276 a an phur a nih.

Heroin leh mi 3 man an nih
AIZAWL: July 3, 2014 sun dar 11:30 vel khan Mizoram Excise and Narcotics Department (END) a Anti-Narcotics Squad han Thanchhingi (43) d/o (L) Lalsiam, Zokhawthar, Champhai District chu Bawngkawn Shalom Veng ah Heroin grams 42.5 leh an man. Heroin hi sabawn bawm 2 le Penicilin bur ruok 25 a thun, Khawmawi (Ṭiau) a inthawka a hung phur a nih. Hi ni ma 1PM velin Anti-Narcotic Squad han Hunthar Vengah Lalduhkimi (40) w/o Zatluanga of Tuirial Airfield Veng le Laldingliani (47) d/o (L) Roliana, Hunthar Veng, Aizawl hai chu Heroin grams 5.5 leh an man bawk.

Bills 4 a lut, MLTP Act a ṭhang
AIZAWL: July 8, 2014 a inthawka Mizoram Assembly Budget Session ṭan dinga chun ngaituotlang ding Bills 4 a lut ta a, chuonghai lai chun Mizoram Liquor Total Prohibition Act thlakthlengna ding Bill khawm a ṭhangsa.

Governor thar ding hai ruot vat ta ding
NEW DELHI: Governor sin ruok hai hluosiptu ding sawrkarin a ngaituo mek a, Governor thar dinghai ruot le puonglang vat ni tang a tih tiin Union Home Minister, Rajnath Singh chun a hril. UPAII sawrkarin a lo ruot Governor- hai laia Uttar Pradesh, Chhattisgarh, West Bengal le Nagaland Governor-hai chu an lo inban tawl ta a nih.

Chennai building chima thi mi 61
CHENNAI: June 28, 2014 zantienga Chennai khawpuia building sawng 11 chim leia thina tuok an la pung peia a, zani chena thina tuok chu mi 61 an tling ta a, mi 27 sansuok an ni tah. Tamil Nadu CM J.Jayalalitha chun building chimna san suitu dingin One Man probe Commission an din.

Spl. Paramilitary Unit in Parliament
NEW DELHI: Parliament House Complex vengna sin chu Paramilitary troops a Commandos, Special training peka um Special Paramilitary Unit han an thaw ṭan tah. Parliament vengtuhai hi CRPF a inthawka a ṭha ṭha thlangsuok an ni a, Parliament Duty Group (PDG) tia ko an nih. PDG hi 1,500 chuong an ni a, Delhi Police, NSG Commandos le Parliamentary Security Staff hai khawma thlawpin an ṭhangpui ding a nih.

Nurses 46 hai dama insuo an nih
NEW DELHI: Iraq rama helpawl ISIS helpawl han an man le hrentang Indian Nurses 46 hai chu ISIS han dam le himin an insuo ta a, vawisun hin Kochi an hungtlung beisei a nih. An ni phurtu ding hin India sawkarin Boein Vuongna pakhat a tir.

Kiren Rijiju PS dingin Vikas
NEW DELHI: 2002 batch IAS Officer, Arunachal Pradesh, Goa, Mizoram le UT cadre, Vikash Anand chu Union Minister of State for Home, Kiren Rijiju Private Secretary (PS) dinga ruot a nih.

Kiren Rijiju PS dingin Vikas
NEW DELHI: 2002 batch IAS Officer, Arunachal Pradesh, Goa, Mizoram le UT cadre, Vikash Anand chu Union Minister of State for Home, Kiren Rijiju Private Secretary (PS) dinga ruot a nih.

BRICS Summit-ah Modi a ṭhang ding
NEW DELHI: July 15 & 16, 2014 hai khin Brazil rama Brazil, Russia, India, China le South Africa (BRICS) Summit um a ta, India PM Narendra Modi khawm ṭhang a tih. Modi hin a fe malamin Frankfurt-ah chawl a ta, German Chancellor, Angela Merkel inhmupui a tih tiin External Affairs Ministry spokesperson chun a hril.

SL Foreign Minister a hung inzin ding
NEW DELHI: Sri Lanka Foreign Minister Prof. G. Peiris chu haptakar thar khin New Delhi-ah hung inzin a ta, External Affairs Minister Sushma Swaraj inhmupuiin Sri Lanka rama Tamil mihai ngirhmun dawmsang le sukhmasawn dan ding bakah Ngamantuhai chungthu hriltlang an tih. Prof. G.L. Peiris hi July 9, 2014 in New Delhi hungtlung a tih.

Brazil a flyover chimin mi 2 a del hlum
BELO HORIZONTE: FIFA Football World Cup umna Brazil rama Belo Horizonte khapwuia Flyover bawl lai mek chu zanikhan a chim a, mi 2 a del hlum a, Car pakhat a del siet der bawk.

Dr Zarzolien @ Z.Z. Lien (65) Chanchin tawikim

(L) Dr Zarzolien @ Z.Z. Lien hi 1st March 1953 Rengkai, Churachandpur, Manipur a pieng a nih. A pa chu Pu (L) Lurzatong a ni a, a nu chu Pi Tuotling a nih. Kum 1970 December 9 khan UPC Kohran danin a nuhmei Pi Lalthienghlim le kut an insui a. Unau sang pakhat Pu Lalpekthang, Govt. Headmaster sin thawlai mek piengpui a nei bawk a. Dr. Z.Z. Lien hi Hnam chanchin (History) suitu, Hmar sakhuona le Kristien ringdan pahni hai inringmatna thu (thesis) ziek leia Manipur University chun Doctorate Degree chu 6th January 1989 khan a lo pek a nih. Tiena thu hril hi ama ta ding chun a sum laklutna hnar, a nuhmei le a nauhai a chawmna a nih. Tuhin Associate Professor le Head of Dept. in History sin chu Lamka Govt. College ah a thawk lai mek a ni a. Chu elkhelah, ama hi Research Supervisor, School of Social Science, Manipur University ah a chelsa bawk a nih. An rawina hnuoia hin Ph.D thawlai (Research Scholars) ṭhahnem tawk tak an um a. Ṭobul thusim a inthawk khawvel a hnam nina (Originhomogeneity& identity) zawngsuok le inchien ngei chu a thil tum tak a nih. A mimal hmalakna le University Grants Commission (UGC) inthuopuina hnuoia, a Doctoral Thesis bakah chun Historical Research Project dang pakhat chu a zo nawk a. A vawi thumna dinga beipui (research) chu thlak tumin ama rawihai le an inpuochai lai zing a nih. A thil hmudan le ngaidan hai khawm, tuipuirala mihai hlutsakna dawngin khawvel pumpui hriet dingin satellite T.V. hmanga tlangzar a ni a. India a chun chu Star Plus Channel a insuo a nih. Manipur State Historical Society (M.U) ah member a ni a. Chun, mithiem puipunna hieng- National, State & Local level conferences, Seminars etc hai a Hmar hnam le unau tlangmi dang dang hai chanchin chu ziek le tiema intluntu a ni bawk.

Nau pasal pali (4) le nau nuhmei pahni (2) neiin, Tu (grandchildren) panga (5) a nei bawk.
A nauhai: 1. (L) Lalfamkim (Buonga), 2. Regina Lalnunthar, 3. Aron Hmar, 4. (L) Kailalsanhim (Isaac), 5. Rebeck Hmara, 6. David Lalringum.
A tuhai (Grand Children): Tamar Lalhlimpui, Jessai, Debora, Dina Lalṭhapui, Jonah Lienchunglur, Niangbiakmoi.

Inchukna tieng: Dr Z.Z. Lien hi Sielmat High School-ah Class X(10) zovin, Guwahati University a Graduate a ni a, Manipur University hnuoia Post Graduate, M.Phil le Ph.D a zo a nih. Sin thawna ṭhenkhat hai: Editor of the Fountain of Peace: Feature Articles, write-ups etc, and the profile of progress, 1973. Progressive Assistant (Office of Manipur South Autonomous District Council, 1977). Research Supervisor (School of Social Science, Manipur University, Salem University, Tamil Nadu, 2008 to till date). Associate Professor & Head of Department in History, Lamka College. Member of the Historical Society of Manipur Central University till date. Dr Z.Z. Lien hin literature tieng lawmman chi hran hran hieng, State, National le International level ah lo dawngin, ama hming chawiin lekhabu ṭhahnem tawk tak (hriet chenah Bu 11) a lo siem ta bawk. Tuibur khawl hi ama siem suok (invention) lieu lieu a nih.

VAWISUN THUPUI
Mihriem ring nek chun Lalpaa ringna innghat hi a ṭhalem a nih. Lalhai ring nek chun, Lalpaa ringna innghat hi a ṭhalem a nih. - Sâm 118:8-9

EDITORIAL:

Fimkhur a ṭulin a pawimaw

Ramdang le state danga thil tlung awm lo, mak le danglam tak takel, ei rama tlung dinga ei ring ngai lo, chanchinbu, TV le Internet a ei tiem le hmu hlak hai kha ei rama khawm a tlung ve ta zing a nih ti chu a hretu le a hmutu seng ei nih. Tuhin hieng thilhai hi a tlung mek a, a la hung tlung pei ding a nih ti inla ei hril suol taluo ring a um nawh. Thilṭha thaw nekin thilṭha lo thaw hi ei nuom lem an naw mani ti dingin a um hlak. Thilṭha nekin a ṭha naw tiengpang hi a langsar lemrawp a, suol tiengpang ngaiven chi hrim hrim mihriem ei um bawk leh, ei fimkhur a ṭulin a pawimaw bek bek el a nih. Fimkhurna ding hi a tam a, hril seng ding a ni nawh.

Facebook le SMS fe thlenga ngaizawng inhmu, inhmu dinga intiem, tuoksuol tuok an um ta thu ei hriet. Hriet chieng lo le ‘dating’ hi thil ṭha tak a ni nawh ti ei hriet a ṭha. Hiengang mi le inhmu ding hai chun ei fena ding mani sunghai le ruolṭha hai hril ngam ding a nih. Hriet ngai der lo le inhmu ding lem chun ruol ṭhuoi ngei ngei ding a nih. Mani chau a fe hi thil ṭium a nih. Chun, internet le SMS a inhrietpui hai le inhmu huna khawm fak le dawn fimkhur hle ding a nih. Misuol an lo ni chun fak le dawnah inrui theina annawleh damdawi ṭha lo an pawl thei a nih.

Motor khaltu fel le bengvar tak tak an um lai zingin driver suol le ṭha lo an um thei ti hriet tlat ding a nih. Passenger- hai tlan hmangpuia suollui dam, sum nei si lova motor- ah chuonga driver sawisak hlum ta dam, passenger-hai inthla kuol a, inthla nuhnung tak suollui ta dam an um ta ti ei hriet. Nuhmei ta ding chun hmel hriet lo motor a chuong lo a ṭha. Tuhin chu Cell Phone ei nei ta a, ei chuongna motor chen hai mani sunghai hril pei hlak ding a nih. Mirheim hi ei suol ta em em a, ei ring phak lo thilhai hi tuok thei zing ei nih ti hriet tlat ding a nih.

India ramril tieng annawleh foreign ah sin thaw ding le thawkna hmu pek thei ding nia inhril, nisienlakhawm nawchizawr ding amani, suok sawra sawr ding amani le hlaw khawm pe dukdak lova sin inthawtir dinga inthlema inṭhuoi, harsatna nasa tak tuok hi a tam ta a nih. Ṭhuoi thlak man, sin hmu pek man tia cheng singtel la khawm an um. Sumdawngnaa hmang hiel khawm an um. A mi ṭhuoituhai hrietchieng phawt ding a nih. Ei sinthawna hmun ding, hlaw zat ding, mani umna ding hai chieng taka hriet hmasak ngei ngei ding a nih.

State danga sin annawleh thawkna neia zu fe hai chun mani mi lo um tasa hai zawngsuok a, an inenkawl dan le an khawsak dan hai indawn a, Pathien Biekin a um nawa chu in a inkhawm hlak an ni chun ṭhang ve ngei ngei ding a nih. Mani mi le sa hai bakah mi hmangaitu ding midang an um nawh. Nat le sat tuok thei, harsatna chi tum tum tuok thei ei ni leiin mani mi le sa hai laia inzel ve tluka ṭha a um nawh.

Tulai hin naute, naupang le pitar hai chen suollui an ni hlak ti ei hriet seng. suolin taluo a nei ta naw takzet leiin, naute, naupang, nupui le pitar khawm ni raw hai seh, mi um nawna le fienriel haiah an khat chauva inumtir lo ding a nih. In nghak ding an um naw chun nuhmei an ni phawt phawt chun an khata inumtir lo hrim hrim ding an nih. Tulai hin nuhmeihai an fimkhur zuol hle a ṭul bek bek a nih.

Don't Miss
© all rights reserved
made with by Simon L Infimate