Responsive Ad Slot

Mizoram ah mani inthat (suicide) an pung, tukum sung mi 42 an um tah

Sunday, June 8, 2014

/ Published by Simon L Infimate
Aizawl, June 8, 2014: A kum telin Mizoram ah mani insukhlum (suicide) an pung niin report thenkhat chun a tarlang. Tukum January thla a inthawka May thla tawp chen khan mi 42 mania inthat an um ta a, hienghai lai hin mi 25 chu pasal niin 17 hai chu nuhmei an nih.

New Life Charity Society (NELICS) in a sinsie danin tukuma mani le mani inthat laia a tam tak 36% chu lungril sawl (mental depression) lei a ni a, 21% chu sungkuo buoina lei, 15% chu ngaizawng lei , 13% chu inruitheithil lei, 10% chu pawisa chungchang lei, 3% chu hlawsamna lei le 2% chu a san chiengtaka hrietlo an nih. Hieng mani le mani inthat 42 hai laia mi 34 hi inawkhlum an ni a, a dang hi hmangruo dang hmanga insukhlum an nih. Mani insukhlum lai hin kum 15 a'nthawka 40 inkar tam takin 29 an uma, kum 41 a'nthawka 70 inkar mi 11 umin kum 14 hnuoitieng mi 2 an um bawk.

NELICS General Secretary Dr. Zawmsanga sailo in a hril danin a kum tel a mental depression an tam nasan chu nu le pa ha’n an nauhai an duot suol lei le sinthaw an inchuktir naw lei a nih a tih. “Dan naranin hieng ang mi hai hin harsatna an tuok pha an buoi awl a, mental depression an nei nuom viu” niin , Dr. Zawmsanga chun a hril.

Dr. Robert Khawlhring Psychiatrist khawmin Mizoram-ah a kum telin suicide hi a pung niin a hril a, an harsatna tuok khawm an kum i zirin a danglam nuol niin a hril.
Don't Miss
© all rights reserved
made with by Simon L Infimate