Responsive Ad Slot

Hmasawnna Thar | June 20, 2014

Hmasawnnathar

Friday, June 20, 2014

/ Published by VIRTHLI
HEADLINES:
Union Cabinet in Parliament Budget Session hun ding an hriltlang:
Budget Session July 7-31 inkar sunga nei a ni el thei

NEW DELHI: Prime Minister,Narendra Modi inrawinain June 18, 2014 khan Union Cabinet meeting nei a ni a; Parliament Budget Session nei ding nihai an hriltlang a. Amiruokchu, a ni ding hai sukfel a la ni nawh. India President, Pranab Mukherjee in Parliament Budget Session nei dinga riruonga um nihai a pawmpui zo pha leh sawrkarin Parliament Budget Session hun ding la puonglang a tih tiin Union Cabinet meeting zovin Union Law Minister Ravi Shankar Prasad chun a hril.

Parliament Budget Session hi July 7, 2014 niah inṭhung ṭanin July 31, 2014 chen an inṭhung el thei. BJP ṭhuoina le Narendra Modi Prime Minister nina hnuoia National Democratic Alliance (NDA) sawrkar chun, Parliament Budget Session nei ṭanna haptakar hmasa takah
Economic Survey (Pre-Budget) Parliament-ah a phar el thei. Railway Budget, 2014-15 chu July 9, 2014 le General Budget, 2014-15 chu July 11, 2014 ni haiah Narendra Modi sawrkarin Parliament-ah a phar el thei (tentative schedule). Parliament Budget Sesion sung hin Deputy Speaker, Lok Sabha thlangna um a tih. Sawrkar hmasain Vote on Account a lo pasi chu July 31, 2014 hin a tawp ta ding a ni leiin General Budget thar chu sawrkarin July 31, 2014 hma ngeia a pasi a ṭul a nih.

Standing Committee ṭhang lovin Budget hi pasi a ni el thei a, hun dang haia khawm Standing Committee ṭhang lovin Budget pasi a lo ni ta hlak. Ordinance chu dan a siem ning a ta; chu dan thar induong dan ding chu Union Cabinet meeting in a pawmpui tah. Hi Session a hin Bill putlut ning a tih. Group of Ministers (GoMs) le Empowered Group of Ministers (EGoMs) hai ṭhiek le sukbo dinga rawtna um chu Cabinet meeting in ṭha tiin a pawmpui ta niin Ravi Shankar Prasad, Union Law Minister chun a hril. Modi in PM a chel hnunga Budget Session hmasa tak ding a nih. Parliament Budget Session um ding lei hin thla thara Japan rama inzin a tum chu Parliament Budget Session zo tienga inzin lem dingin Modi chun Japan inzin a tum chu a ṭhul hri.

Pasal naupang Gypsy in a baw hlum
CCPUR: Zani zantieng dar 4 vel khan Imphal-a inthawk CCPur pana hung tlan Gypsy pakhat chun Torbung hmuna pasal naupang pakhat Ibungo (7) s/o Surchandra of Torbung chu a baw hlum. Ibungo hi na taka a hliem leiin District Hospital, CCPur hung phurtlung a ni a, sienkhawm Doctor han san hman ta lovin a thi, Hospital panpui a ni lai meka lamlaka thi niin thu dawngna chun a hril. Ibungo hi Unique Public School, Torbung-a Class I inchuklai a ni a, a bawk, a ke le phing haiah hliemna a tuok.

Suangphu khuo mi 4 in Malaria
CCPUR: Behiang Primary Health Centre (PHC) hnuoia Suangphu khaw mi vawng Suanliantung (14) s/o Lampau; Lampau (54) s/o Thongkhanthang; Peter (33) s/o Kamsuanmung le Martha (25) w/o Peter hai hai chu an damnaw leiin District Hospital, CCPur-ah admit
an ni a, an thisen enfel a ni huna Malaria Postive an nih ti hmusuok a nih. Hi le inzawm hin Dr Thangchinkhup Guite, CMO, CCPur chun vawisun (June 20, 2014) hin Suangphu hmunah Medical Team tir a ta, medical team hin damdawi, Thosilen le thosilen inchiena ding damdawitui bakah Thisen test-na ding hmangruo hai chawin a khaw mi hai thisen enfelna nei nghal bawk an tih.

Bomb nia hrila mipui sukthlabartu VDF ban
CCPUR: Zani hmasa (June 18, 2014) nia New Lamkaa Saulim Book Barn tuol laia Rechargeable Dianamo ṭhalo lampui lai dehawna, bomb a nih tia mipui hai nasa taka sukthlabartu mi pahni ZRA in an man hai laia pakhat chu VDF a ṭhang lai a nih ti hriet a ni leiin Police han an pahniin an man nawk a, tuhin CCPur Police han an kawl mek. Mana um mi pahni hai chu Thangthianmuan (20) s/o Hauzachin of Colony Veng Bungmual le Kamkhankhup Thomte (24) s/o Dalzachin of Joar Veng, Bungmual hai an ni a. Mr Kamkhankhup Thomte hi VDF a ṭhang lai mek a ni leiin Mr K. Kabib, IPS, SP, CCPur chun zanikhan a sina inthawk a ban nghal.

NYC/NYV lakna dinga personal interview
CCPUR: Nehru Yuva Kendra (NYK), CCPur hnuoia thawk ding National Youth Corps(NYC)/National Youth Volunteer lakna dinga application pelut hai ta dingin June 25, 2014, 11AM a inthawk khin Mr Maniram Sharma, IAS, Addl. DC, CCPur Chamber-ah personal interview um a tih. Personal interview a hin Application pe thar le NYC hai khawm ṭhang an tih.

RPCNEI TlangramDist. Meet 
CCPUR: June 20-24, 2014 inkr sung khin RPCNEI Tlangram District Meet-cum-Crusade Parbung hmuna um a ta, insukhlimna chi tum tum nei bawk an tih. Hi taka ṭhang ding hin RPC Synod Choir hai chun Parbung an pan mek. Crusade huna thuhriltu ding thu Rev. V. Lalnghakthang, Evangelist at Large ning a tih.

FHW ah ANM inchuk
CCPUR: Female Health Workers Training School, CCPur-a 2014-2015 session sunga ANM inchuk nuom hai ta dingin CMO CCPur Office- ah Rs. 20/- pekin Application Form lak thei a nih. Application Form hi June, 2014 thla sung ngeia peklut nawk ding a nih.

Class XII Improvement/Compartmental Exam
CCPUR: Council of Higher Secondary Education, Manipur chun Higher Secondary Improvement/Compartmental Examination, 2014 chu June 25, 2014 - July 4, 2014 inkar sung hin Imphal-ah huoihawt a tih. CCPur le Hill District Headquarters dang dang haiah Exam Centre um lovin Imphal-ah chau Exam centre a um ding niin ei thu dawngna chun a hril.

Essay Writing Competition
CCPUR: Manipur State Legal Services Authority chun District Legal Services Authorities hai fethlengin Manipur- a District tum tum haiah June 22, 2014 khin Category 3-a ṭhein Essay Writing Competition huoihawt a tum. Essay thupui ding chu ‘Fundamental Duties of Indian Citizens’ ti ning a tih. Category-I Cl. IV-VII, Category- II Cl. VIII - XII le Category-III College Students. CCPur District-a chun V.K. Tawna College-ah competition hi nei ning a tih. Category tina first hai Rs. 1,500/- Rs. 3,000/- le Rs. 3,500/- ning a ta, second hai Rs. 1,000/-, Rs. 2,000/- le Rs. 2500/- ning a ta, 3rd prize hai Rs. 750/-, Rs. 1000/- le Rs. 1500/- ning a tih. Category tina mi 10 pei kuoma consolation prize Rs. 500/- pek ni bawk a tih. Entry form chu Court office-a lak thei ning a ta, June 21, 2014 chen form peklut thei ning a tih: CJM/CCP

CCPur A/C PDS Quota bufai lakdawk
CCPUR: 58-Churachandpur A/C MLA Nominee N. Mangpu chun zanikhan Headquarters Veng-a FCS Godown-a inthawk 58- CCPur A/C a April 2014 Quota PDS bufai a lakdawk a, zani ma khan PDS Agent hai kuoma an biel chita sem dingin an hlan sawng. Bufai lakdawka um hi APL 200 qtls, BPL 819 qtls le AAY 320 qtls a nih.

AIR, CCPur stn. Prog.
CCPUR: Vawisuna AIR, CCPur station-a Paite programme a chun hla thlang le This Week in CCPur ngaithlak thei ning a tih. Hmar programme a chun Hmingthangmawi le Vanlalhmuok Fimate han hla sak an ta, This week in CCPur tiem ning a tih. Thadou programme a chun hla thlang le This Week in CCPur ngaithlak thei ning a tih.

ZEO le ADC hnuoia teacher han workshop
CCPUR: DIET, CCPur-a Diploma in Elementary Training nei zo sa ZEO hnuoia teachers 200 le ADC, CCPur hnuoia teachers 100 hi chun June 30, 2014 chen aw dingin zanita inthawk khan Workshop an nei ṭan nawk. Workshop nei sung hin DIET Centre, CCPur-a inthawk Lecturers, Th. Shanayaima Singh, S. Bidyananda Singh, W. Somorjit Singh le Meenashi Devi hai resource person in ṭhang an tih.

Vawisun Summer Mela ṭan ding
CCPUR: Kuki Students’ Organisation(KSO) CCPur chun vawisun a inthawk hin Peace Ground, Tuibuong, CCPur-ah Summer Mela huoihtawt ṭan an tih. Vawisun 1PM hin Pu Ngamhao Touthang, MDC, ADC, CCPur in hi Mela hi Peace Ground, Tuibuong hmuna hawng a tih.

First DAPCC meeting nei
CCPUR: Zani 11AM khan DC Office a BRGF Resource Centre ah Mr P.K. Jha, IAS, DC/DAPCC inrawinain First DAPCC meeting 2014 15 nei a nih. Meeting huna hin FICTC haiah HIV test thaw vawng ding, a thaw nuom lo hai CMO in an thla hlaw hrentang dingin DC CCPur chun a hril. Chun, Line department thawtlangna hrat lema sin thaw ding, mipui tamlemin an sawr thei dan dinga thaw ding, NACP Facilities Centre office timing siem tharna chu Medical Superintendent, Dist. Hospital, CCPur mawphurna dinga sie le thu dang dang hriltlang le rel a nih.

IMPHAL NEWS:
Ministry sawidanglam vat el thei
IMPHAL: Mr O.Ibobi CM nina hnuoia Manipur Congress sawrkar chu MLAs ṭhenkhat hai phutna angin Assembly Session hma annawleh Session zovah sawidanglam ni el theiin zanita ei thu dawngna chun a hril. Congress  MLAs 24 hai chun June 11, 2014 khan CM inhmupuiin ministry sawidanglam dingin an lo ngen ta a nih. Assembly Session hi July thlaa nei ding a nih. Hieng laizing hin CM O.Ibobi Singh chun zanikhan Manipur Governor V.K. Duggal zani zantieng khan an hmupui a, hun sawt tak an inbiek a, an thu hril ruok chu hriet a ni nawh. (UNA)

BRTF Truck eksiden-ah mi 4 an thi
IMPHAL: Zanikhan Imphal-Jiribam Road (NH-37) a Irang hmuna BRTF Truck pakhat a eksiden a, nuhmei 2 ṭhangsain mi 4 an thi a, mi ṭhahnemtawk tak an hliem. Hliem hai laia a hliem inrik an um leiin mithi hi tuta nek hin an la hung tam lem ring a nih. Sansuokna, sawmdawlna le ṭhangpuina sin chu Khongsang a um Assam Rifles le Irang a um CRPF han an thaw niin ei thu dawngna chun a hril. Chun, zani ma khan Imphal-Jiribam Road a Nungdolan-ah Truck ruok pakhat a eksiden a, lamtlang tieng an let tla a, hi thu ei sut chena hin thi le hliem an um le umnaw hrietna ei nei thei hri nawh. BRTF Truck a
chuong hai hi BRTF thawktu vawng an nih.

NH-2 ah an service naw ding
IMPHAL: June 13, 2014 zana Jakhalabanda, Assam a Murli Hotel a inthawk ZedTravels Bus Driver, Thokchom Ingobi (45), KCP (MC) Lamyanba Khuman pawl ni dinga ringhla han mana an ṭhuoihmang le an hrentang chu an lan suo naw zing leiin Imphal-Dimapur Road-a Night Super Bus service le Inter-State Bus services pawl chun an service an la chawlsan pei ding niin AMNSDWA bakah All Manipur Inter-state Bus Association chun thusuok an siem. Hieng pawl tum tuma Drivers le thawktu han Driver ṭhuoihmanga um dodaalnain zanikhan North AOC ah ṭhungbuma nuorna an nei.

Sanjenthong leilak CS in a va en
IMPHAL: Sanjenthong leilak bawla um mek chu zanikhan Manipur Chief Secretary Pu P.C. Lawmkunga le official ṭhenkhat han a hmuna an va enfel. Sanjenthong leilak siem ṭan a nia inthawk a helna (diversion) le kea inlawn hai fena ding leilak naran el khawm daw a ninaw leiin Imphal khawpuia cheng han harsatna namen lo takel an tuok a nih. Pu P.C. Lawmkunga chun Sanjenthong Officer’s Colony khawm iengang ngirhmuna um am a nia ti a va enfel nghal.

Rs. 8,82,000 leh a tlan hmang
IMPHAL: Mrs Hazina Bibi w/o Md. Tamizur s/o (L) Md. Ajijur of Irong Chesaba chu pawisafai Rs. 8,82,000 bakah thil dang dang dang leh a tlan hmang niin zanita Md. Tamijur in Manipur Press Club, Imphal-a Chanchinbumihai an hmupui huna a hril.


NATIONAL NEWS:

Congress le JD(U) candidate-hai
AIZAWL: Zanita Mizoram Rajya Sabha seat khata inthlangna um a chun Congress candidate Pu Ronald Sapa Tlau thlangtling a nih. Pu Ronald hi Havard University, USA a MA (Mass Communication) zo, Zoram Electronics Development Corporation (ZENICS) a Chairman ni lai, MPCC ah Chairman (Communication Cell) le General Secretary sin lo chel ta hlak a nih. Bihar a Rajya Sabha seat 2 a inthlangnaa chun JD(U) candidate hai an tling ve ve.

Kut nei lo in Class X exam-ah marks 54%
THANE: Maharashtra state a Palghar biel sunga Nandore khuo a cheng, Vasant Raote (16) chun a Class X exam-ah marks 54% zet a hmu. Vasant Raote hi kut nei lova pieng hrim, a kepar hmanga lekha ziek hlak a ni a, Jeevan Vikash High School a kai niin tribal mi a nih. Class XI ah Commerce a lak a, M.F. Hussain anga painter ni ka tum a nih tiin Raote chun a hril.

Uttarakhand-a A/C 3 ah byelection
DEHRADUN: Zani hmasa khan Election Commission of India chun Uttarakhand a Assembly constituencies 3, Someshwar, Doiwala le Dharchula haiah Byelection chu July 21, 2014 nia nei ding le vote tla hai chu July 25, 2014 a temdingin a puong. Election Notification chu June 27, 2014 a insuo ning a ta, July 4, 2014 chen nomination paper file thei ning a ta, scrutiny July 5, 2014 a nei ding le inhnukdawk nuom han July 7, 2014 chen inhnukdawk thei an tih.

Ex-Minister 1 chauin a in hluo a la suoksan
NEW DELHI: Union Minister hlui le MPs hlui hai chu an In hluo hai suoksan dinga inhriettirna pek vawang an ni ta a, sienkhawm tuchen hin Union Home Minister hlui Sushil Kumar Shinde chauin a In hluo a la suoksan. UPA-II sawrkara khan Ministers 75 an um a, NDA sawrkara hin chu ministers 45 chau an la um hri a nih. Urban Development Ministry hnuoia General Pool Residential Accomodation (GPRA) chun Bungalows/ Quarters 250 a nei a, MPs a thlangtling thar 315 hai chun quarter hluo ding an la nei tawl naw a nih.

Sandalwood tum 282 man a nih
GUWAHATI: Mizoram pana fe Truck NL01K-9354 chu June 18, 2014 khan Directorate of Revenue Intelligence han Basistha Charial, Guwahati-ah sukchawlin an dap a,Red Sandalwood, thing man to chi, tum 282 dapdawkin Truck Driver le Handyman hai leh an man. Red Sandalwood mana um hi Rs. 3.5 crore manhu vel nia hril a nih. Hi thinghai hi Mizorama inthawk Myanmar, Myanmar a inthawk China rama thawn lut tum niin DRI official thusuok chun a hril. Red Sandalwood hi a tlangpuiin Andhra Pradesh a inthawka hung inṭan hlak a ni a, a hun inṭanna suizui mek a nih tiin DRI thusuok chun a hril.

Tripura-ah Malaria leia thi mi 28
AGARTALA: Tripura State a Dhalai, Gomti le South Tripura districts haiah tulai hin Malaria natna hri nasa takin an leng a, mi 28 zetin thina an tuok ta bakah Malaria natnaa damnaw 1,700 chuong Government Hospitals haiah enkawl mek an nih tiin Tripura Health & Family Welfare Minister, Badal Choudhury chun reporter-hai kuoma a hril. Unofficial thusuok ruok chun Malaria natna leia thi chu 35 le damnaw chu 2,000 chuong an nih tiin a hril.

MNS Chief Thackeray bail thei lo dingin
GHAZIABAD: Maharashtra Nvnirman Sena (MNS) President Raj Thackeray June 18, 2014 khan Additional Chief Judicial Magistrate in bail thei lo dingin warrant tha an suo nawk. May 15, 2014 khawm khan non-bailable warrant insuo khum a lo ni tah. Bihar state mihai lungril khei zawngin thu a hril tia intum a ni leia Thackeray hin case a nei a nih. Court chun a case hi July 30, 2014 a hearing nei dingin a puong.

Encephalitis leia naupang thi 107
MUZAFFARPUR: Thla 2 liemta sung khan Bihar-a Muzaffarpur District sungah Encephalitis ntna hri leiin naupang 107 an thi ta a, hi natna invawi mi tam tak an la um niin ei thu dawngna chun a hril. Hi natna hri sukrena ding hin Union Health Minister Dr Harsh Vardhan chun hma a lak a, kum 5 sunga ding Action Plan khawm a puonglang.

RIL, Board Director dingin Nita Ambani
MUMBAI: Reliance Industries (RIL) Board of Director thar dingin Ms Nita Ambani w/o Mukesh Ambani, Chairman, RIL ruot a nih. Nuhmei RIL Board Director a ruot hmasatak a nih. Nita Ambani hi kum 50 mi a ni a, a pasal Mukesh Abani chu kum 57 mi a nih. Ramniklal H. Abani chu kum 90 mi a ni ta leiin Board of Director a inthawk a chawl (retired) ta leia Director post hi a hung ruok a nih.

Chhattisgarh Governor an ban
RAIPUR: Chhattisgarh Governor, Shekhar Dutt chun zani hmasa zan khan Chhattisgarh Governor a ninaa inthawka an banna lekha President kuoma a pek. Mr Shekhar Dutt hun hi January, 2015 a tawp ding a nih. BJP ṭhuoina hnuoia NDA sawrkarin Congress ṭhuoinaa UPA sawrkarin Governor-a a lo ruot 7 inban dinga inhriettirna a pek hnunga Governor inban a pahnina a nih. Uttar Pradesh Governor, B.L. Joshi chu June 17, 2014 khan a lo inban ta a nih.

Suomhmang han Rs. 12.7 lakh an lak
MEERUT: Uttar Pradesh Power Corporation Limited (UPCL) thawktu han June 18, 2014 nia an sum hmu Bank-asielut dinga an fe laiin City Car a chuong, suomhmang silai chawi han lamlakah an lo suom a, pawisafai Rs. 12.7 lakh an lakpek hnungin an tlan hmang san. Suomhmanghai hin Security Guard, Yogendra chu a luah silai kawmin an vuok a, khaw hre lovin a tlu a, chu phing leh suomhmanghai hin Company Accountant bag sunga um Rs. 12.7 lakh hi an lakpek el a nih tiin Police chun an hril. Hi thil tlung hun hi sun dar 11 vel a nih.

Interpol Secy. General thar dingin Stock
NEW DELHI: Interpol Secretary General thar dingin Interpol Executive Committee chun German mi, Juergen Stock an lak. June 17, 2014 khan Interview nei a ni a, CBI Director, Ranjit Sinha ṭhangin candidates 5 an um. November thla khin Monaco hmuna Interpol General Assembly nei ning a ta, chu huna pawmpui a ni chun Juergen Stock hin kum 2015 a inthawk Interpol Secretary General sin a chel ṭan ding a nih. Tuta Interpol Secretary General nimek chu Ronald K.Noble a nih.

INTERNATIONAL NEWS AND SPORTS:

US-ah pasal pakhat khai hlum
STARKE (FLORIDA): John Ruthel Henry (63) chu June 18, 2014 zan dar 7:43 khan Florida, US-ah khai hlum a nih. Kum 1985 khan a nuhmei Suzanne Henry le an naupa kum 5 mihai a sun hlum leia Court in khai hlum dinga thiemnaw an changtir a nih.

Defending Champion Spain WC a inthawk pet dawk
SAO PAULO: Khawvel-a thil ropui le ro hlutak hai khawm kumhlun iengkhawm a um naw ti sukdiknain FIFA World Cup Defending Champion ni lai mek Spain chu Group opening matchah Fifa ranking 15-na Netherlands in 5-1 zeta an hneban hnungin zani hmasa zan khan FIFA ranking 14- na Chile chun 2-0 a hnein tukum FIFA World Cup-ah tuta Group game ti lova khel nawk thei ta lo dingin an pet dawk der! Spain hin group games khel mekah a tawpna dingin chance vawikhat an la nei a, June 23, 2014, 9:30PM khin Australia leh inkhel an tih. Hi huna hin Australia chu lo hne ta ang hai sienkhawm anni Group ‘B’ a Netherlands le Chile hai chun points 6 veve an hmu ta leiin group game chu an damsuok pui tanaw ding ti a chieng ta a nih. June 23, 2014, 9:30 bawkin Netherlands le Chile hai vawikhat an lan hmasawn nawk ding a nih.

Mexico rama mithiruong 28 hmu
VERACRUZ: Mexico rama Veracruz state a thlan pakhatah mithiruong 28 zet hmu a nih. Mexico a hin Drugs a sumdawngna a hluor hle a, kum 2007 a inthawk ta khan drugs a sumdawngna le inzawmin inthattuona nasa tak a tlung ṭan a, tuchen hin mi 85,000 zetin thina an tuok ta niin ei thu dawngna chun a hril.

PRESS RELEASE
17/06/2014
With the joining of the siting ADC member of Senvon DC constituency, Pu Lalditsang to the Bharatiya Janata Party, the BJP Churachandpur units as per the instruction of the State President organised a grand reception of the member at the District BJP Office, Tuibuong on the 17th June 2014 (Tuesday) at 3:00PM with Pu M. Chungkhosei Haokip, State BJP Executive member and Pu H. Khaisei, Working President, Churachandpur District as Chief Host and Functional President respectively.

Besides, several leaders of the district namely, Pu Paokhomang Haokip of Matijang, Pu Thiena Vaiphei of Songpha, Pu Lalkholun Gangte of Chongchin/Santing, Pu Pauliankhup Guite of Hiangtam Lamka, Pu Thenkhohao and Pu Loya Hmar of Tipaimukh who have recently joined the BJP all attended the function as special invitees.

The meeting that followed, while welcoming the newly enrolled members discussed the present district political scenarios and the grievances of the general public especially in the remote and hilly places, such as road Communication, power and water supply, educational institutions, Medical, PDS and besides, the prevailing law and order situation in the district.

‘New Home New India’ and ‘Better days Ahead’ of the new charismatic Prime Minister of India was the centre agenda of the meeting. A representation in this regards with Modi’s 100 days road Map programme was duly discussed wherein a memorandum has been sent to the Honourable National President of BJP, Shri Rajnath Singh who is also the Home Minister under Modi’s Government. The Memorandum strive for two points.
1. Completion of NH-150 Churachandpur to Aizawl and
2. Constitute an enquiry team over Khuba Dam Hydro Project under the 100 days road map programme of the Prime Minister.

Now, obviously, the BJP is the ultimate hope of the people. But it is regreted that some ‘differences’ within the Party organisation arises which is a natural phenomenon. But it is not a ‘Crisis’ it shall soon be solved most amicably. The meeting, thus resolved that BJP Churachandpur, with its utmost capacity shall strive for good governance, development and transparency in the district with the sole theme, the ‘needy(s) shall get their rights. Henceforth. However this bold step of the BJP could turn to reality with the co-operation of the District Administrative Authority headed by Pu P.K. Jha, IAS, respected Deputy Commissioner of Churachandpur District, Public Leaders, Social Workers, Medias, student leaders and all bonafide inhabitants of the district.

Last, but not the least, the District BJP is opening public Grievances Cell which shall be opened to all to hear the grievances of the Churachandpurians and help a more developed district in every sphere.

Wishing all a ‘Better Days’ ahead’

Sd/-
Shri H. Khaisei
Working President
Bharatiya Janata Party
Churachandpur District

Sd/-
Shri M. Chungkhosei
State Executive Member
Bharatiya Janata Party
Churachandpur District

VAWISUN THUPUI
Kut zawia sinthaw chu a hung pase a, Kut taima ruok chun ama chu a sukhausa. Nipui laia lakhâwmtu chu naupa var a na, Busik huna ininghil ruok chu naupa, inzakna intluntu chu a nih. - Thuvarhai 10:4-5

EDITORIAL:

Thil iengkim ta dingin hun ruot a nih

Ei Bible chun, thil iengkim ta dinga hun ruota a um thu a mi hril a. “Pieng hun a um a, thi hun a um a,ṭap hun a hun a, innui hun a um; To hun a um a, ṭawng hun a um; Indo hun a um a, muong hun a um” a ti a nih. Hienganga thu hriltu hin ei tulai nun hi lo hmulawk thiem sienla chu, sawrkar hun a um a, sawrkar chelnaw hun le selkaltu pawla ṭhang hun a um; sawrkar sinthaw hun a um a, pension hun a um a; a ti sa ve ngei ring a um. Ei tulai nun a hin thil awm le awm lo, thil inmil le inmil lo hai ngaipawimawna a um ta nawh. Mani hmasiel le duamin ei sip a, pawisa tiem seng lo hi hang nei el inla chu aw! hmang fawm ding leh, titu deu vawng ei ni tawl ta niin an lang. Thil thawtheituhai chun an nuom dan danin thil an thaw tawp el ta a nih. Centre-ah sawrkar thar an hung inlal a, Congress ṭhuoina hnuoia UPA sawrkar hun laia Governor a ruot mi 7, Governor sin chel lai mekhai chu, Centre-a sawrkarna cheltu, BJP ṭhuoina hnuoia NDA sawrkar chun inban dingin an hriettir a. Hieng ang bawk hin Congress ṭhuoina hnuoia UPA sawrkar khawm khan NDA sawrkar hmasain Governor-a a ruot, Governor sin chel mek lai hai chu a lo ban ve tho a, ei ram dan ang ninaw sienkhawm thilthawtheina neihai chun an nuom dan ang angin thil chu an thaw el chu a ni ta hi! Indem le insawisel thei bik ding an um nawh.

Politicians ei tihai chun Governor-hai chunga hin Political Tit for Tat a thaw ni takin an lang. Dan ang tak chun Governor-hai hun (term) hi kum 5 ding a ni a. Sawrkar thar a hung um pha pha leh sawrkar hmasain Governor-a a lo ruot ta sa hai thlakthleng a, sawrkar tharin Governor thar ding an ruot pei ding tina dan a um nawh. Nisienlakhawm, ei rama politicians le sawrkarna cheltuhai chun thaw dan ding hrim annawleh thaw dan pangngain an hung hmang pei el chu an ta hi! Politician-hai hin political thila phuba lakna a an hmang a ni ta ding? ti khawm ngaituo tham fet a tling a nih. Sawrkar hmasa khan tuta President hi an ruot a ni a, BJP ṭhuoina hnuoia NDA sawrkar chun ban a nuom el dim maw?

Democracy rama cheng, inthlang ram ei ni a. Chu dungzui chun kum 5 dan peiah Lok Sabha election le Assembly Election ei nei hlak. Sawrkarna cheltuhai hi mipui kuta um an nih ti hriein mipui inlaltirthiemin suklal thiem hai sienla ti chu mipui chun ngaituona an nei deu fur ring a um. thuneina le inlalna hai hi chatuon dai ding a ninaw leiin hmang thiem a pawimaw bek bek el a nih. Thuneina nei hun, thuneina neinaw hun; inlal hun le inlal naw hun, sawrkar chel hun le chel lo hun khawm a um ngei ding a nih. Hi hi khawvel fe dan pangngai a nih. Thuneina le inlalna chang sawt nuomhai chun mipui dit dan le ngaidan hai an lak le an hmang thiem ve thil ṭul em em el a ni bawk.

A pawi takel chu, ram le hnam ṭhatna dinga pawisa cheng vaibelsie tel ei hmu a, mani le mani mi le sahai ditsaknaa ei hmang ral pei el hi a nih. Thuneina le mawphurna hi an intluk a, fe kawp tlat ding an nih. Ei ni chun mawphurna hi ei haider a, thuneina hi inrim takin ei hmang a. Sap ṭawng ei ngaina a, ei hmang uor bawk a, a remchangna a um. Ei POWER hai hi ei USE a, ei MISUSE a, ei ABUSE rawp el chu niin an lang.

Service hun suksei ( extension) khawm hi dan kal a nih. Sawrkarin a ditsakhai ta dinga ama dan ngirlai ngei kalin, a thlep amani a pawtfan a, dan a bawsiet hlak. An aiawtu ding, Additional Secretary/Additional Director hai kha Secretary/ Director ni dinga tling, a thawk laihai neka fel em em el an ni chang khawm a um hlak. An ditsak lem hai ta dingin hiengang mihai “right” hi haiderin an dang lui tlat a, an sin a inthawka kaisang hai ta dingin theida a um hle hlak. Central sawrkara khun Secretary fel tak tak, an pension huna an pakaina ding Corporation/Commission/ Trust le in ṭha tak tak siemfawm thiem an tam el. Hi sin incheltir theituhai leh an inlawmtawn thiem leia hieng sin hai hi an chel thei a nih.



Don't Miss
© all rights reserved
made with by Simon L Infimate